Η Αγάπη ι Ντεβλέσκι Ατσσόλα για Πάντα

1, 2. Καβά πρόβλημας τθερένα μπουτ Χριστιανοί;

ΣΚΕΦΤΙΝΕΝ εκ καράβι σο ισί αντρέ εκχέ ντεριαβάτε σο τθερέλα μπαρί φουρτούνα. Ο ζουρανέ κύματα γκερένα ο καράβι ακατάρ ντα οκουτάρ. Ο καράβι κα τζαλ οτθέ σο γκερένα-λες ο κύματα, εκτός άμα κα χρησιμοποιήνελ πι άγκυρα. Η άγκυρα κα ασταρέλ ο καράβι σταθερός για μα τι λελ-λες η φουρτούνα ντουρ.

² Κάνα νακχένα εκ δοκιμασία σο μοιάζελα με φουρτούνα, μπορεί τι νιωθίνενα σαρ ανταβά καράβι. Οντουλά σο νιωθίνενα μπορεί τι γκερέν-τουμέν εκ ακατάρ εκ οκουτάρ. Εκ ντιβές νιωθίνενα ι αγάπη ντα ι βοήθεια ι Ιεχωβάσκι. Αλλά ο γιαβέρ ντιβές να ισινέν σίγουροι ατζέ-ντα άμα ντικχέλα οντουβά σο νακχένα. (Ψαλμ. 10:1· 13:1) Εκ αμάλ μπορεί τι βακερέλ τουμένγκε λάφια σο κα λοκχιαρέν τουμαρό γκι ντα τι νιωθίνεν πο λατσσές για χάνικ. (Παρ. 17:17· 25:11) Αλλά σοράν αρχίνενα πάλι μα τι αβέν σίγουροι ότι ο Ιεχωβά βοηθίνελα-τουμέν. Καζόμ νακχένα κάτι ασακό, σαρ μπορίνενα τι φουρτίνεν ι άγκυρα, σαρ τι βακεράας; Γιαβερέ λαφίντζαρ, σαρ μπορίνενα τι αβέν σίγουροι, ντα τι ατσσόν σίγουροι, ότι ο Ιεχωβά μανγκέλα-τουμέν ντα βοηθίνελα-τουμέν;

3. (α) Σο μανγκέλα τι βακερέλ ο λάφι «αφοσιωμέ αγάπη» σο ισί κο Ψαλμός 31:7 ντα κο 136:1; (β) Σόσκε βακεράσα ότι ο Ιεχωβά σικαβέλα αφοσιωμέ αγάπη ι πο λατσσέ τροπόσαρ; (Ντικχέν ι φωτογραφία-ντα)

³ Εκ τρόπος σο μπορίνενα τι αβέν σταθεροί σαρ εκ άγκυρα ισί τι ντεν-τουμέν γκοντί ι αφοσιωμέ αγάπη ι Ιεχωβάσκι. (Διαβάνεν Ψαλμός 31:7· 136:1) Ο λάφι «αφοσιωμέ αγάπη» μανγκέλα τι σικαβέλ εκ αγάπη σο ισί μπουτ ζουρανί ντα ποτές να χασάρντιβελα. Ο Ιεχωβά σικαβέλα ανταγιά αγάπη ι πο λατσσέ τροπόσαρ. Η Γραφή βακερέλα ότι ισί «πφερντό αφοσιωμέ αγάπη». (Έξοδ. 34:6, 7) Η Γραφή επίσης βακερέλα ι Ιεχωβάσκε: «Σικαβέσα μπουτ αφοσιωμέ αγάπη σαρέ οντουλένγκε σο ρόντενα τούκε». (Ψαλμ. 86:5) Σκεφτίνεν σο σικαβένα ανταλά εδάφια: Ο Ιεχωβά ποτές να μουκχέλα πι πιστέ υπηρετόν! Μα μπιστρέν ότι η αφοσίωση ι Ιεχωβάσκι μπορίνελα τι κερέλ-τουμέν σταθερούς κάνα νακχένα μπαρέ δοκιμασίες.​—Ψαλμ. 23:4.

Η ΑΦΟΣΙΩΜΕ ΑΓΑΠΗ Ι ΙΕΧΩΒΑΣΚΙ ΙΣΙ ΕΚ ΚΑΤΑ ΒΑΣΙΚΑ ΠΡΑΓΜΑΤΑ ΣΟ ΣΙΚΛΙΑΡΕΛΑ Η ΓΡΑΦΗ

4. Βακερέν παραδείγματα πραγματένγκε σο σικλιαρέλα η Γραφή ντα εξηγίνεν σόσκε ναστί τσσιναβάσα εύκολα τι πακιάς-λεν.

⁴ Εκ γιαβέρ τρόπος σο μπορίνενα τι αβέν σταθεροί σαρ εκ άγκυρα ισί τι σκεφτίνεν ότι η αφοσιωμέ αγάπη ι Ιεχωβάσκι ισί εκ κατά βασικά πράγματα σο σικλιαρέλα η Γραφή. Σο αβέλα πρώτα τουμαρέ γκοντιάτε κάνα ασουνένα ο λάφι «βασικά πράγματα σο σικλιαρέλα η Γραφή»; Μπορεί τι σκεφτίνενα κάποιες σημαντικές αλήθειες σο σικλιλέν κατά Λάφι ι Ντεβλέσκο. Για παράδειγμας, σικλιλέν ότι ο ναβ ι Ντεβλέσκο ισί Ιεχωβά, ότι ο Ιησούς ισί ο μοναδικός Τσσαβό ι Ντεβλέσκο, ότι ο μουλέ να αγαβένα τίποτα ντα ότι η πφουβ κα αβέλ παράδεισος ντα ο τζενέ κα τζουβντιόν για πάντα. (Ψαλμ. 83:18· Εκκλ. 9:5· Ιωάν. 3:16· Αποκ. 21:3, 4) Από αζομάν σο πακιαντέν ότι ανταλά ισί μπαγιά, να μπορίνελα κάποιος εύκολα τι κερέλ-τουμέν τι τσσιναβέν τι πακιάν-λεν. Σόσκε; Επειδή αγαντέν ότι ανταλά σο σικλιλέν βασίντιβενα αληθινέ πραγματέντε. Άμα να μπιστράσα ότι η αγάπη ι Ιεχωβάσκι ισί εκ κατά βασικά πράγματα σο σικλιαρέλα η Γραφή, ανταβά κα βοηθίνελ-αμέν τι νασκιαράς ι σκέψη ότι Βοβ να ενδιαφερίντιβελα οντουλέσκε σο νακχάσα ή να ντικχέλα-λες. Για τι ντικχάς σαρ αβέλα-πες ανταβά.

5. Βακερέν σαρ μπορίνελα εκ τζενό τι περαβέλ ο ψεύτικα πράγματα σο πακιάλας.

⁵ Κάνα αρχισάλεν τι κερέν μελέτη κατά Γραφή, σο βοηθιντάς-τουμέν τι τσσιναβέν τι πακιάν ο ψεύτικα πράγματα σο σικλιαρένα ο τζενέ; Μάλλον ροντιντέν άμα ο πράγματα σο σικλιαρέλας-τουμέν τουμαρί θρησκεία ταιριάνενα ι πραγματέντζαρ σο σικλιαρέλα η Γραφή. Σκεφτίνεν ακαβά παράδειγμας: Βακερέν ότι ανγκλέ πακιάνας ότι ο Ιησούς ισί ο Ντεβέλ. Όμως, καζόμ κερένας μελέτη κατά Γραφή, πουτσλέν τουμαρό νεαυτός: “Ισί μπαγιά ανταβά;” Αφού ντικχλέν σο σικλιαρέλα η Γραφή ανταλέσκε, αγαντέν ότι η απάντηση ισί όχι. Σοράν τσσιναντέν τι πακιάν-λες ανταβά ντα αρχισάλεν τι πακιάν ακαγιά αλήθεια ι Γραφιάκι: Ο Ιησούς ισί «ο πρώτος σαρέ κατά πράγματα σο λατσσάρντιλε», “ο μοναδικός Τσσαβό σο τθερέλα ο Ντεβέλ”. (Κολ. 1:15· Ιωάν. 3:18) Ισί μπαγιά ότι ο ψεύτικα πράγματα σο σικλιαρένα ο τζενέ μπορίνενα τι αβέν «ζουρανέ σαρ πύργοι» ντα δύσκολος τι περαβάς-λεν. (2 Κορ. 10:4, 5) Αλλά από αζομάν σο αβιλέν σίγουροι για την αλήθεια, να αρχισάλεν τι πακιάν πάλι ανταλά ψεύτικα πράγματα.​—Φιλιπ. 3:13.

6. Σόσκε μπορίνενα τι αβέν σίγουροι ότι ι Ιεχωβάσκι «αφοσιωμέ αγάπη ατσσόλα για πάντα»;

⁶ Μπορίνενα τι κερέν κάτι ασακό με την αγάπη ι Ιεχωβάσκι-ντα. Ανταβά-ντα ισί εκ κατά βασικά πράγματα σο σικλιαρέλα η Γραφή. Κάνα νακχένα εκ δυσκολία ντα αρχίνενα τι σκεφτίνεν άμα ο Ιεχωβά μανγκέλα-τουμέν, πουτσέν τουμαρό νεαυτός: “Σκεφτίναβα σωστά;” Συγκρίνεν ο αμφιβολίες σο τθερένα για την αγάπη ι Ιεχωβάσκι ι λαφίντζαρ σο ισί κο βασικός εδάφιος ανταλέ μαθημάσκο, κο Ψαλμός 136:1. Σόσκε ο Ιεχωβά βακερέλα ότι λέσκι αγάπη ισί «αφοσιωμέ»; Σόσκε ο λάφια «λέσκι αφοσιωμέ αγάπη ατσσόλα για πάντα» βακέρντιβενα 26 φαρ κο Ψαλμός ανταβά; Σαρ ντικχλάμ, εμ η αφοσιωμέ αγάπη σο τθερέλα ο Ιεχωβά πι λαόσκε ισί εκ κατά βασικά πράγματα σο σικλιαρέλα η Γραφή. Οτθάρ, πρέπει τι δεχτίνας-λα σαρ δεχτιντάμ ο γιαβερά-ντα βασικά πράγματα ι Γραφιάκε. Ισί εκ μπαρό ψέμας τι πακιάς ότι ο Ιεχωβά να μανγκέλα-αμέν ντα λέσκε γιακχίντε να τθεράσα καέκ αξία. Τσσιναβέν τι πακιάν ανταβά πράγμας, σαρ τσσιναντέν τι πακιάν-ντα κο πράγματα σο σικλιαρέλα η ψεύτικη κχανγκιρί!

7. Βακερέν μερικά εδάφια σο κερένα-αμέν σίγουρους ότι ο Ιεχωβά μανγκέλα-αμέν.

⁷ Η Γραφή τθερέλα μπουτ γιαβερά-ντα αποδείξεις σο σικαβένα αμένγκε ότι ο Ιεχωβά μανγκέλα-αμέν. Για παράδειγμας, ο Ιησούς βακερντάς πι μαθητένγκε: «Τουμέν τθερένα πο μπαρί αξία μπουτέ τσιρικλένταρ». (Ματθ. 10:31) Ο Ιεχωβά βακερντάς πι λαόστε: «Κα νταβ-τουτ ζορ, βα, κα βοηθίναβ-τουτ· κα ασταράβ-τουτ σικίς μι δεξί βαστέσαρ σο ανέλα δικαιοσύνη». (Ησ. 41:10) Προσοχιντέν ι σιγουριά σο ντένα-αμέν ανταλά εδάφια; Ο Ιησούς να βακερέλα “μάλλον τθερένα πο μπαρί αξία” ούτε ο Ιεχωβά βακερέλα “μπορεί τι βοηθίναβ-τουτ”. Οκιά μπάνταρ βακερένα: «Τθερένα πο μπαρί αξία» ντα «κα βοηθίναβ-τουτ». Άμα κα νακχέν εκ δοκιμασία ντα να κα αβέν σίγουροι για την αγάπη ι Ιεχωβάσκι, ασακέ εδάφια όχι σάντε κα κερέν-τουμέν τι νιωθίνεν ότι ο Ιεχωβά μανγκέλα-τουμέν, αλλά κα κερέν-τουμέν ντιπ σίγουρους ότι μανγκέλα-τουμέν. Ασακέ εδάφια τθερένα αποδείξεις για την αγάπη ι Ιεχωβάσκι. Κάνα σκεφτίνενα-λεν με προσευχή, ανταβά κα κερέλ-τουμέν τι βακερέν ο λάφια σο ισί κο εδάφιος 1 Ιωάννη 4:16: «Αμέν σικλιλάμ ότι ο Ντεβέλ μανγκέλα-αμέν ντα ισινάμ σίγουροι ανταλέσκε».a

8. Σο μπορίνενα τι κερέν άμα μπάζιμα να ισινέν σίγουροι ότι ο Ιεχωβά μανγκέλα-τουμέν;

⁸ Όμως σο μπορίνενα τι κερέν άμα μπάζιμα να ισινέν σίγουροι ότι ο Ιεχωβά μανγκέλα-τουμέν; Συγκρίνεν οντουβά σο νιωθίνενα με το αποδείξεις σο τζανένα. Οντουλά σο νιωθίνενα μπάζιμα αβένα ντα μπάζιμα νασένα. Οκιά μπάνταρ, ο αποδείξεις σο τζανένα ισί κάτι σο να αλλάνελα. Η Αγία Γραφή ισί πφερντί αποδείξεις ότι ο Ιεχωβά μανγκέλα-αμέν. Άμα να πακιάσα ότι ο Ιεχωβά μανγκέλα-αμέν, ισί σαρ τι μπιστράσα ι πο σημαντική ιδιότητα λέσκι, ι αγάπη.​—1 Ιωάν. 4:8.

ΣΚΕΦΤΙΝΕΝ ΟΤΙ Ο ΙΕΧΩΒΑ «ΜΑΝΓΚΕΛΑ-ΤΟΥΜΕΝ ΑΝΤΡΑΛ ΠΙ ΓΚΙΣΤΑΡ»

9, 10. Καλέ πραγμάσκε κερέλας λάφι ο Ιησούς κάνα βακερντάς: «Ο Ντατ μανγκέλα-τουμέν αντράλ πι γκίσταρ»; (Ιωάννης 16:26, 27) (Ντικχέν ι φωτογραφία-ντα)

⁹ Μπορίνασα τι σικλιάς πο μπουτ για την αγάπη ι Ιεχωβάσκι αντράλ ακαλέ λαφίνταρ σο βακερντάς ο Ιησούς πι μαθητένγκε: «Ο Ντατ μανγκέλα-τουμέν αντράλ πι γκίσταρ». (Διαβάνεν Ιωάννης 16:26, 27) Ο Ιησούς να βακερντάς ανταλά λάφια για τι κερέλ απλά πι μαθητέν τι νιωθίνεν πο λατσσές. Κάνα διαβάνασα ο εδάφια σο ισί πο πριν ανταλέ λαφίνταρ, ντικχάσα ότι ο Ιησούς να μανγκέλας τι κερέλ λάφι οντουλένγκε σο νιωθίνενας λέσκε μαθητές. Οκιά μπάνταρ, μανγκέλας τι κερέλ λάφι εκχέ γιαβερέ θεμάσκε​—ι προσευχιάκε.

¹⁰ Ο Ιησούς βακερντάς πι μαθητένγκε τι προσευχίντιβεν λέσκε ναβέστε ντα όχι λέστε. (Ιωάν. 16:23, 24) Ισινέ σημαντικός λένγκε τι τζανέν-λες ανταβά. Σοράν κατά ανάσταση λέσκι, ο μαθητές μπορεί τι μανγκένας τι προσευχίντιβεν κο Ιησούς. Μπέκιμ μανγκένας τι κερέν-λες ανταβά επειδή ο Ιησούς ισινέ λένγκο αμάλ. Μπορεί τι σκεφτίνενας ότι, επειδή μανγκέλας-λεν αντράλ πι γκίσταρ κα ασουνέλας λένγκε προσευχές ντα σοράν κα τζάλας πι Νταντέστε για τι βακερέλ λέσκε τι βοηθίνελ-λεν. Όμως, ο Ιησούς βακερντάς λένγκε ότι δεν πρέπει τι σκεφτίνεν αντικάς. Σόσκε; Επειδή, σαρ βακερντάς: «Ο Ντατ μανγκέλα-τουμέν αντράλ πι γκίσταρ». Ανταγιά αλήθεια ισί αντρέ κο βασικές αλήθειες σο τθερένα τι κερέν ι προσευχιάσαρ. Σκεφτίνεν σο μανγκέλα τι βακερέλ ανταβά τουμένγκε: Αντράλ κατά μελέτη ι Γραφιάκι σο κερντέν, σικλιλέν ντα μανγκλέν ι Ιησούς. (Ιωάν. 14:21) Αλλά σαρ ο μαθητές ι Ιησούσκε, μπορίνενα τι προσευχίντιβεν με σιγουριά κο Ντεβέλ επειδή τζανένα ότι «ο Ντατ μανγκέλα-τουμέν αντράλ πι γκίσταρ». Σικαβένα καζόμ μπουτ πακιάνα ανταλά λάφια κάθε φαρ σο κερένα προσευχή κο Ιεχωβά.​—1 Ιωάν. 5:14.

ΑΓΑΒΕΝ ΚΑΤΑΡ ΑΒΕΝΑ Ο ΑΜΦΙΒΟΛΙΕΣ

11. Σόσκε κα αβέλας ο γκι ι Μπενγκέσκο άμα να κα αβάας σίγουροι ότι ο Ιεχωβά μανγκέλα-αμέν;

¹¹ Κατάρ αβένα ο αμφιβολίες ότι ο Ιεχωβά να μανγκέλα-αμέν; Μπέκιμ κα βακερένας ότι αβένα κατά Μπενγκ ντα ανταβά ισί αλήθεια. Ο Μπενγκ “ρόντελα για τι χαλ-αμέν”, ντα κα αβέλας λέσκο γκι άμα κα πακιάας ότι ο Ιεχωβά να μανγκέλα-αμέν. (1 Πέτρ. 5:8) Η αγάπη σο τθερέλα αμένγκε ο Ιεχωβά τσσιντιντάς-λες τι ντελ αμένγκε ο λύτρος. Ντα ο Μπενγκ μανγκέλα τι νιωθίνας ότι αμέν να αξίνασα-λες ανταβά. (Εβρ. 2:9) Όμως κάσκο γκι κεράσα άμα να ισινάμ σίγουροι για την αγάπη ι Ιεχωβάσκι; Ι Μπενγκέσκο. Ντα κον κα χαιρίνελας άμα κα χασαράας αζόμ μπουτ αμαρί ζορ σο κα τσσιναβάας τι υπηρετίνας ι Ιεχωβάς; Ο Μπενγκ. Βοβ μανγκέλα τι πακιάς ότι ο Ιεχωβά να μανγκέλα-αμέν. Αλλά ο Μπενγκ ισί οντουβά σο ο Ιεχωβά να μανγκέλα-λες. Άρα, εκ κατά πο μπαρέ “παγίδες ι Μπενγκέσκε” ισί ότι μαρέλα-πες τι κερέλ-αμέν τι νιωθίνας ότι αμέν χασαρντάμ ι αγάπη ι Ιεχωβάσκι ντα ότι κα τιμωρίνελ-αμέν. (Εφεσ. 6:11) Κάνα αγαβάσα σο μανγκέλα τι πετυχίνελ αμαρό ντουσμάνι, ανταβά κα κερέλ-αμέν τι αβάς αποφασισμέ “τι τζας κόντρα κο Μπενγκ”.​—Ιακ. 4:7.

12, 13. Σαρ αμαρί ατέλεια μπορεί τι κερέλ-αμέν μα τι αβάς σίγουροι για την αγάπη ι Ιεχωβάσκι;

¹² Υπαρχίντιβελα κάτι γιαβέρ-ντα σο μπορεί τι κερέλ-αμέν μα τι αβάς σίγουροι για την αγάπη ι Ιεχωβάσκι. Σο κα μπορίνελας τι αβέλ ανταβά; Η αμαρτία σο κληρονομιντάμ. (Ψαλμ. 51:5· Ρωμ. 5:12) Η αμαρτία γκερντάς-αμέν ντουρ αμαρέ Δημιουργόσταρ. Επίσης κερντάς μπαρό ζιάνι κο τρόπος σο σκεφτίνασα, κο πράγματα σο νιωθίνασα ντα κι υγεία αμαρί.

¹³ Η αμαρτία επηρεαντάς οντουλά σο νιωθίνασα μπέτι τροπόσαρ, κερέλα-αμέν τι νιωθίνας τύψεις, άγχος, λατζ ντα ότι να ισινάμ αρακχαντέ. Νιωθίνασα ασακέ πράγματα κάνα κεράσα εκ αμαρτία. Επίσης παρόλο σο κερντιλάμ για τι αβάς τέλειοι, μπορεί τι νιωθίνας ανταλά μπέτι συναισθήματα επειδή αγαβάσα καζόμ ατελείς ισινάμ. (Ρωμ. 8:20, 21) Για παράδειγμας, εκ αυτοκίνητος σο τθερέλα πφαραντό λάστιχος ναστί κερέλα μπουτί ι τροπόσαρ σο κερντιλό τι κερέλ μπουτί. Αντικάς αμέν-ντα επειδή ισινάμ ατελείς ναστί κεράσα ο πράγματα ι τροπόσαρ σο κερντιλάμ τι κεράς-λεν. Οτθάρ, να κερέλα αμένγκε εντύπωση σο μπάζιμα να ισινάμ αζόμ σίγουροι για την αγάπη ι Ιεχωβάσκι. Άμα κα αβέλ-πες ανταβά, μπορίνασα τι ντας-αμέν γκοντί ότι ο Ιεχωβά ισί “ο μπαρό Ντεβέλ, σο . . . σικαβέλα αφοσιωμέ αγάπη οντουλένγκε σο μανγκένα-λες ντα κερένα λέσκε λάφια”.​—Νεεμ. 1:5.

14. Κάνα σκεφτίνασα λατσσές ο λύτρος, σαρ ανταβά κα βοηθίνελ-αμέν τι αβάς σίγουροι ότι ο Ιεχωβά μανγκέλα-αμέν; (Ρωμαίους 5:8) (Ντικχέν ο πλαίσιος-ντα «Αρακχαβέν-τουμέν Κατά “Ζορ σο Τθερέλα η Αμαρτία τι Χουχαβέλ”»)

¹⁴ Μπάζιμα, μπορεί τι νιωθίνασα ότι να αξίνασα τι τθεράς ι αγάπη ι Ιεχωβάσκι. Αλλά ακριβώς ανταβά ισί σο κερέλα-λα αζόμ ξεχωριστή, ότι ντινάς-λα αμέντε χωρίς τι αξίνας-λα! Να μπορίνασα τι κεράς τίποτα για τι κερδίνας ι αγάπη ι Ιεχωβάσκι. Όμως, ο λύτρος ιτσσαρέλα αμαρέ αμαρτίες, ντα ο Ιεχωβά ντινάς ανταβά λύτρος επειδή μανγκέλα-αμέν. (1 Ιωάν. 4:10) Ντεν-τουμέν γκοντί ότι ο Ιησούς αβιλό τι σώνελ αμαρτωλέ τζενέν, όχι τέλειε τζενέν. (Διαβάνεν Ρωμαίους 5:8) Καέκ ναστί κερέλα ο πράγματα με τέλειος τρόπος ντα ο Ιεχωβά να μπεκλεντίνελα κάτι ασακό αμένταρ. Άμα κα αγαβάς ότι αμαρί ατέλεια μπορίνελα τι κερέλ-αμέν μα τι αβάς σίγουροι για την αγάπη ι Ιεχωβάσκι, κα αβάς πο αποφασισμέ μα τι μουκχάς τι αβέλ-πες ανταβά.​—Ρωμ. 7:24, 25.

ΤΡΑΜΠΙΝΕΝ ΤΙ ΑΤΣΣΟΝ ΑΦΟΣΙΩΜΕ

15, 16. Άμα ατσσάσα αφοσιωμέ κο Ιεχωβά, καλέ πραγμάσκε μπορίνασα τι αβάς σίγουροι, ντα σόσκε; (2 Σαμουήλ 22:26)

¹⁵ Ο Ιεχωβά μανγκέλα τι τραμπίνας σωστά ντα τι “αβάς πασέ λέστε”. (Δευτ. 30:19, 20) Άμα κα κεράς-λες ανταβά, μπορίνασα τι αβάς σίγουροι ότι ο Ιεχωβά κα ατσσόλ πιστός αμέντε. (Διαβάνεν 2 Σαμουήλ 22:26) Καζόμ ατσσάσα αφοσιωμέ κο Ιεχωβά, μπορίνασα τι αβάς σίγουροι ότι κα βοηθίνελ-αμέν τι νταϊντίνας σο-ντα πρόβλημας κα τθεράς αμαρέ ζωγιάτε.

¹⁶ Σαρ ντικχλάμ, τθεράσα μπουτ λόγους τι αβάς σταθεροί κάνα νακχάσα δοκιμασίες. Τζανάσα ότι ο Ιεχωβά μανγκέλα-αμέν ντα κα βοηθίνελ-αμέν. Άκ’ ανταβά σικλιαρέλα η Γραφή. Άμα κάποια στιγμή να ισινάμ σίγουροι για την αγάπη λέσκι, μπορίνασα τι σκεφτίνας οντουλά σο τζανάσα ότι ισί μπαγιά ντα όχι οντουλά σο νιωθίνασα ότι ισί μπαγιά. Μακάρι τι αβάς ντιπ σίγουροι ότι η αγάπη ι Ιεχωβάσκι ατσσόλα για πάντα, αντικάς σαρ σικλιαρέλα η Γραφή.