Μα Μπιστρέν τι Προσευχίντιβεν ι Γιαβερένγκε

1. Σαρ τζανάσα ότι αμαρέ προσευχές ισί σημαντικές ι Ιεχωβάσκε;

Η ΠΡΟΣΕΥΧΗ ισί εκ μπαρό δώρος. Σκεφτίνεν-λες χάνικα: Ο Ιεχωβά ντινάς κο άγγελοι τι κερέν κάποια μπουτιά. (Ψαλμ. 91:11) Επίσης ντινάς πι Τσσαβέστε-ντα κάποιους σημαντικούς διορισμούς. (Ματθ. 28:18) Αλλά σο κερντάς με το προσευχές; Μήπως τσσουντάς κάποιον γιαβέρ τι ασουνέλ-λεν; Όχι! Ανταβά ισί κάτι σο τραμπιντάς τι κερέλ-λες ο ίδιος ο Ιεχωβά. Βοβ ισί “Οντουβά σο ασουνέλα προσευχή”.​—Ψαλμ. 65:2.

2. Σαρ μουκχλάς ο απόστολος Παύλος λατσσό παράδειγμας καζόμ προσευχίντιβελας ι γιαβερένγκε;

² Τζανάσα ότι μπορίνασα τι βακεράς κο Ιεχωβά σο-ντα ανησυχίνελα αμέν. Όμως, πρέπει τι προσευχίντιβας ι γιαβερένγκε-ντα. Ο απόστολος Παύλος κερντάς-λες ανταβά. Για παράδειγμας γραφιντάς κι κχανγκιρί κι Έφεσος: «Τσσουβάβα-τουμέν συνέχεια μι προσευχιέντε». (Εφεσ. 1:16) Ο Παύλος προσευχίντιβελας συγκεκριμέ τζενένγκε-ντα. Φιρειπείν, βακερντάς κο Τιμόθεος: «Τθεράβα μπαρί εκτίμηση ι Ντεβλέσκε, . . . πάντα ανάβα-τουτ μι γκοντιάτε κάνα μολίναβα ι Ντεβλές ντισάρα ντα ιράτ». (2 Τιμ. 1:3) Ο Παύλος-ντα τθερέλας προβλήματα ντα χρειαζίντιβελας τι προσευχίντιβελ ανταλένγκε. (2 Κορ. 11:23· 12:7, 8) Όμως, αρακχέλας χρόνος τι προσευχίντιβελ ι γιαβερένγκε-ντα.

3. Σόσκε μπορεί τι μπιστράς τι προσευχίντιβας ι γιαβερένγκε;

³ Μπάζιμα μπιστράσα τι προσευχίντιβας ι γιαβερένγκε. Σόσκε; Εκ πφεν, η Σαμπρίνα,a εξηγίνελα εκ πράγμας σο μπορεί τι φταίνελα. Βακερέλα: «Η ζωή ανταλέ ντουνιάστε ισί πφερντί άγχος. Αμαρέ προβλήματα μπορεί τι λεν αζόμ μπουτ αμαρί προσοχή ντα αντικάς τι προσευχίντιβας σάντε αμένγκε». Νιωσάλεν-λες τουμέν-ντα ανταβά; Άμα βα, ανταβά μάθημας κα βοηθίνελ-τουμέν. (1) Κα εξηγίνελ σόσκε ισί σημαντικός τι προσευχίντιβας ι γιαβερένγκε ντα (2) κα ντελ-αμέν τι αγαβάς σαρ τι κεράς-λες ανταβά.

ΣΟΣΚΕ ΤΙ ΠΡΟΣΕΥΧΙΝΤΙΒΑΣ Ι ΓΙΑΒΕΡΕΝΓΚΕ;

4, 5. Σόσκε αμαρέ προσευχές “τθερένα ζορ ντα μπορίνενα τι βοηθίνεν μπαγιά ι γιαβερέν”; (Ιακώβου 5:16)

⁴ Ο προσευχές σο κεράσα ι γιαβερένγκε “τθερένα ζορ ντα μπορίνενα τι βοηθίνεν-λεν μπαγιά”. (Διαβάνεν Ιακώβου 5:16) Αβέλα-πες ο προσευχές αμαρέ τι επηρεάνεν μπαγιά ι ζωή αμαρέ πφραλένγκι; Βα, αβέλα-πες. Ο Ιησούς τζανέλας ότι μπουτ σουγκό ο απόστολος Πέτρος κα βακερέλας ότι να τζανέλας-λες. Οτθάρ βακερντάς: «Μολιντόμ ι Ντεβλές τούκε για μα τι χασαρές τι πίστη». (Λουκ. 22:32) Ο απόστολος Παύλος επίσης τζανέλας ότι η προσευχή τθερέλα μπαρί ζορ. Κάνα τσσουντέ-λες φυλακή κι Ρώμη, χωρίς τι φταίνελ, γραφιντάς κο Φιλήμονας: «Μπέκιμ τι ελευθερώντιβαβ χάρη τουμαρέ προσευχιένταρ ντα τι μπορίναβ τι αβάβ τι ντικχάβ-τουμέν». (Φιλήμ. 22) Ντα άκ’ ανταβά αβιλό-πες. Ο Παύλος μπουτ σουγκό ελευθερωσάλο κατά φυλακή ντα μπορίνελας πάλι τι κερέλ έργος.

⁵ Ανταβά να μανγκέλα τι βακερέλ όμως ότι κάνα προσευχίντιβασα, μπορίνασα τι ζορισκιαράς ι Ιεχωβάς τι κερέλ κάτι. Βοβ ντικχέλα καζόμ πφαμπάσα αμαρέ πφραλένγκε ντα πφενίνγκε ντα μπάζιμα τραμπίνελα τι κερέλ οντουβά σο μανγκένα λέσταρ. Κάνα σκεφτίνασα-λες ανταβά, βοηθίντιβασα τι κεράς προσευχή αντράλ αμαρέ γκίσταρ οντουλέσκε σο νακχέλα εκ πφραλ ντα σοράν τι μουκχάς ο πράγματα κο βαστά κι Ιεχωβάσκε.​—Ψαλμ. 37:5· 2 Κορ. 1:11.

6. Σαρ μπορίνενα ο προσευχές σο κεράσα ι γιαβερένγκε τι επηρεάνεν οντουλά σο νιωθίνασα λένγκε; (1 Πέτρου 3:8)

⁶ Ο προσευχές σο κεράσα ι γιαβερένγκε βοηθίνενα-αμέν “τι αγαβάς λένγκι ντουκχ”. (Διαβάνεν 1 Πέτρου 3:8) Ο τζενό σο αγαβέλα ι γιαβερένγκι ντουκχ τσσουβέλα σημασία οντουλά σο νακχένα ντα μανγκέλα τι κερέλ κάτι για τι βοηθίνελ-λεν. (Μάρκ. 1:40, 41) Εκ πρεσβύτερος ο Μάικλ, βακερέλα: «Κάνα προσευχίντιβαβα ι γιαβερένγκε αγαβάβα ατζέ πο λατσσές οντουλά σο νακχένα ντα ανταβά κερέλα-μαν τι μανγκάβ-λεν ατζέ πο μπουτ. Νιωθίναβα πο πασέ λέντε παρόλο σο βον μπορεί μα τι τζανένα-λες». Εκ πρεσβύτερος, ο Ρίτσαρντ βακερέλα εκ γιαβέρ-ντα λατσσιπέ σο αβέλα κάνα προσευχίντιβασα ι γιαβερένγκε. Βοβ βακερέλα: «Κάνα προσευχίντιβασα εκχέ τζενέσκε, ανταβά τσσίντελα-αμέν τι κεράς κάτι για τι βοηθίνας-λες. . . . Κάνα βοηθίνασα ι τζενές σο προσευχισάλαμ λέσκε, ισί σαρ τι κεράσα αμέν-ντα κάτι για τι απαντίντιβελ αμαρί προσευχή».

7. Σαρ ο προσευχές σο κεράσα ι γιαβερένγκε βοηθίνενα-αμέν τι ντικχάς αμαρέ προβλήματα σωστέ τροπόσαρ; (Φιλιππησίους 2:3, 4) (Ντικχέν ο φωτογραφίες-ντα)

⁷ Ο προσευχές σο κεράσα ι γιαβερένγκε βοηθίνενα-αμέν τι ντικχάς αμαρέ προβλήματα σωστέ τροπόσαρ. (Διαβάνεν Φιλιππησίους 2:3, 4) Επειδή τζουβντιάσα εκχέ ντουνιάστε σο κερέλα-λες κουμάντος ο Μπενγκ, σαρέ τθεράσα αμαρέ προβλήματα. (1 Ιωάν. 5:19· Αποκ. 12:12) Κάνα προσευχίντιβασα μπουτ φαρ ι γιαβερένγκε, ντάσα-αμέν γκοντί ότι “σαρέ αμαρέ πφραλά κο ντουνιάς τσσίντενα οντουλά σο τσσίντασα αμέν”. (1 Πέτρ. 5:9) Εκ σκαπάνισσα, η Κάθριν, βακερέλα: «Κάνα προσευχίντιβαβα ι γιαβερένγκε, ανταβά βοηθίνελα-μαν τι τθεράβ μι γκοντιάτε ότι ο γιαβερά-ντα νακχένα δυσκολίες. Αντικάς, να σκεφτίναβα αζόμ μπουτ μιρέ προβλήματα».

ΧΡΕΙΑΖΙΝΤΙΒΕΝΑ ΑΜΑΡΕ ΠΡΟΣΕΥΧΕΣ

8. Καλέ τζενένγκε κα μπορίναας τι προσευχίντιβας;

⁸ Καλέ τζενένγκε μπορίνασα τι προσευχίντιβας; Κα μπορίναας τι προσευχίντιβας σαρέ οντουλένγκε σο τθερένα προβλήματα υγείας, ι τερνένγκε σο πρασάνα-λεν ο τσσαβέ κο σχολείος ή οντουλένγκε σο τθερένα προβλήματα επειδή ισί πφουρέ. Μπουτ αμαρέ πφραλένταρ ντα πφενίνταρ νακχένα διωγμός πουμαρέ φαμιλιάταρ ή κατά κυβέρνηση. (Ματθ. 10:18, 36· Πράξ. 12:5) Μερικά πφραλά έπρεπε τι μουκχέν πουμαρό κχερ επειδή αβένας μπαρέ φασαρίες οτθέ σο μπεσένας. Γιαβερά νακχλέ φυσικές καταστροφές. Μπορεί μα τι τζανάσα ανταλέ πφραλέν ντα πφενίν. Αλλά κάνα προσευχίντιβασα λένγκε, σικαβάσα ότι ντάσα καν κι εντολή κι Ιησούσκι τι “μανγκάς ο εκ ι γιαβερές”.​—Ιωάν. 13:34.

9. Σόσκε πρέπει τι προσευχίντιβας οντουλένγκε σο ισί υπεύθυνοι κι οργάνωση κι Ιεχωβάσκι ντα λένγκε ρομνίνγκε;

⁹ Μπορίνασα τι προσευχίντιβας εμ οντουλένγκε σο ισί υπεύθυνοι αντρέ κι οργάνωση κι Ιεχωβάσκι. Σαρ για παράδειγμας, για το Κυβερνών Σώμας ντα λέσκε βοηθόνγκε, για το Επιτροπές Τμήματος, για το υπεύθυνοι επίσκοποι κο γραφεία τμήματος, για το επίσκοποι περιοχής, ι πρεσβυτερόνγκε ντα ι διακονικέ υπηρετόνγκε. Μπουτ ανταλέ πφραλένταρ τθερένα πουμαρέ-ντα ανησυχίες καζόμ μαρένα-πες για τι βοηθίνεν-αμέν. (2 Κορ. 12:15) Για παράδειγμας, εκ επίσκοπος περιοχής, ο Μαρκ, βακερέλα: «Εκ κατά πο μπαρέ δυσκολίες μάνγκε ισί ότι ισινόμ ντουρ μι πφουρέ νταντέσταρ ντα νταγιάταρ. Ο ντούι-ντα τθερένα προβλήματα υγείας. Παρόλο σο μι πφεν ντα λάκο ρομ φροντίνενα-λεν, στεναχωρίναβα σο να μπορίναβα τι κεράβ πο μπουτ πράγματα λένγκε». Μπορεί μα τι τζανάσα σαρέ ο ανησυχίες σο τθερένα ανταλά πφραλά σο μαρένα-πες αμένγκε, αλλά ισί λατσσό μα τι μπιστράς τι προσευχίντιβας λένγκε. (1 Θεσ. 5:12, 13) Μπορίνασα επίσης τι προσευχίντιβας λένγκε ρομνίνγκε, επειδή βοηθίνενα πιστά πουμαρέ ρομέν για τι ατσσόν πουμαρέ διορισμόντε.

10, 11. Μπεϊντίνελα ο Ιεχωβά ο προσευχές σο κεράσα γενικά σαρέ αμαρέ πφραλένγκε ντα πφενίνγκε; Εξηγίνεν.

¹⁰ Σαρ ντικχλάμ, μπουτ φαρ προσευχίντιβασα σαρέ ι πφραλένγκε γενικά. Για παράδειγμας, χωρίς τι τθεράς αμαρέ γκοντιάτε εκχέ συγκεκριμέ πφραλές, μπορεί τι μανγκάς κατά Ιεχωβά τι βοηθίνελ οντουλέν σο ισί κι φυλακή ή τι λοκχιαρέλ ο γκι οντουλένγκο σο χασαρντέ εκχέ τζενές κο μεριπέ. Εκ πρεσβύτερος, ο Ντόναλντ, βακερέλα: «Ισί αζόμ μπουτ ο πφραλά ντα ο πφενιά σο νακχένα δυσκολίες, σο μπάζιμα κεράσα εκ τανί προσευχή σαριλένγκε».

¹¹ Μπεϊντίνελα ο Ιεχωβά ασακέ προσευχές; Σίγουρα! Ισί μπαγιά ότι να τζανάσα ι ανάγκη σο τθερέλα ο κάθε πφραλ. Άρα, σαρ αγαβάσα, ισί λατσσό τι μανγκάς κατά Ιεχωβά τι βοηθίνελ σαρέ ι πφραλέν σο νακχένα κάποια συγκεκριμέ προβλήματα. (Ιωάν. 17:20· Εφεσ. 6:18) Ανταλά προσευχές σικαβένα ότι “μανγκάσα σαρέ αμαρέ πφραλέν”.​—1 Πέτρ. 2:17.

ΚΑΝΑ ΠΡΟΣΕΥΧΙΝΤΙΒΑΣΑ ΣΥΓΚΕΚΡΙΜΕ ΤΖΕΝΕΝΓΚΕ

12. Σαρ κα κεράς πο συγκεκριμέ αμαρέ προσευχές άμα ντικχάσα προσεκτικά ι γιαβερέν;

¹² Ντικχέν προσεκτικά ι τζενέν. Παρόλο σο ισί λατσσό τι προσευχίντιβας σαρέ αμαρέ πφραλένγκε γενικά, ισί λατσσό επίσης τι προσευχίντιβας μερικέ συγκεκριμέ-ντα τζενένγκε. Μήπως υπαρχίντιβελα κάποιος τουμαρέ κχανγκιριάτε σο τθερέλα εκ νασφαλιπέ για μπουτ μπρεσά; Μήπως εκ τερνό νιωθίνελα ότι να τθερέλα ζορ ιτιρί κατά δυσκολίες σο νακχέλα κο σχολείος; Μήπως υπαρχίντιβελα εκ ντατ ή εκ ντάι σο μαρέλα-πες κορκορί τι μπαριαρέλ πι τσσαβές με τη “διόρθωση ντα με το συμβουλές ι Ιεχωβάσκε”; (Εφεσ. 6:4) Άμα ντικχένα προσεκτικά ι γιαβερέν, κα μπορίνεν τι αγαβέν-λεν πο λατσσές ντα αντικάς κα μανγκέν ατζέ πο μπουτ τι προσευχίντιβεν λένγκε.b​—Ρωμ. 12:15.

13. Σαρ μπορίνασα τι προσευχίντιβας πφραλένγκε σο να τζανάσα;

¹³ Προσευχίντιβεν ι γιαβερένγκε λένγκε ναβέσαρ. Μπορίνασα τι κεράς-λες ανταβά ατζέ-ντα πφραλένγκε σο να τζανάσα. Για παράδειγμας, σκεφτίνεν αμαρέ πφραλέν ντα πφενίν σο ισί κι φυλακή τθανέντε σαρ ισί η Ερυθραία, η Κριμαία, η Ρωσία ντα η Σιγκαπούρη. Κο ιστότοπος jw.org, μπορίνενα τι αρακχέν ο ναβά ι πφραλένγκε ντα πφενίνγκε σο ισί κι φυλακή.c Εκ επίσκοπος περιοχής σο βακερένα λέσκε Μπράιαν, βακερέλα: «Αγαντόμ ότι κάνα γραφίναβα ο ναβ εκχέ φυλακισμέ πφραλέσκο ντα σοράν βακεράβα-λες ζουρανές, ανταβά βοηθίνελα-μαν μα τι μπιστράβ-λες ντα τι βακεράβ-λες μι προσευχιέντε».

14, 15. Σαρ μπορίνασα τι μανγκάς συγκεκριμέ πράγματα κατά Ιεχωβά;

¹⁴ Μανγκέν συγκεκριμέ πράγματα. Ο Μάικλ βακερέλα: «Κάνα διαβάναβα κο jw.org ι φυλακισμέ πφραλένγκε, προσπαθίναβα τι σκεφτίναβ σαρ κα νιωθίναβας άμα ισινόμας λένγκε θεσιάτε. Τζανάβα ότι κα ανησυχίναβας μι ρομνιάκε ντα κα μανγκάβας τι αβάβ σίγουρος ότι τθερέλα σο-ντα χρειαζίντιβελα. Αντικάς τθεράβα κάτι συγκεκριμέ τι βακεράβ μι προσευχιέντε ι πφραλένγκε σο ισί παντριμέ».​—Εβρ. 13:3, υποσ.

¹⁵ Κάνα σκεφτίνασα σαρ μπορεί τι νακχένα ο πφραλά κι φυλακή, μπορίνασα τι αρακχάς γιαβερά-ντα τρόπους τι κεράς συγκεκριμέ προσευχές. Φιρειπείν μπορίνασα τι προσευχίντιβας οντουλά σο αρακχαβένα ι πφραλέν κι φυλακή τι σικαβέν λένγκε λατσσιπέ ντα οντουλά σο τθερένα εξουσία τι μουκχέν-λεν τι ντεν λατρεία ελεύθερα. (1 Τιμ. 2:1, 2) Μπορίνασα τι μανγκάς κατά Ιεχωβά τι λελ ζορ η κχανγκιρί ι φυλακισμέ πφραλέσκι κατά πιστός παράδειγμας λέσκο. Ή τι μανγκάς κατά Ιεχωβά τι τσσουβέν σημασία οντουλά σο νανέ Μάρτυρες ι λατσσί συμπεριφορά ι φυλακισμέ πφραλέσκι ντα αντικάς τι δεχτίνεν ο λατσσέ αμπέρια. (1 Πέτρ. 2:12) Κάτι ασακό μπορίνασα τι κεράς οντουλένγκε-ντα σο νακχένα γιαβερά-ντα δοκιμασίες. Κάνα ντικχάσα προσεκτικά ι γιαβερέν, προσευχίντιβασα ι γιαβερένγκε λένγκε ναβέσαρ ντα μανγκάσα κατά Ιεχωβά συγκεκριμέ πράγματα λένγκε, σικαβάσα “ατζέ πο μπουτ ότι μανγκάσα ο εκ ι γιαβερές”.​—1 Θεσ. 3:12.

ΣΑΡ ΤΙ ΝΤΙΚΧΑΣ ΣΩΣΤΕ ΤΡΟΠΟΣΑΡ Ι ΠΡΟΣΕΥΧΗ

16. Σαρ μπορίνασα τι ντικχάς ι προσευχή σωστέ τροπόσαρ; (Ματθαίος 6:8)

¹⁶ Σαρ ντικχλάμ, αμαρέ προσευχές μπορίνενα τι βοηθίνεν τι αλλάνεν ο πράγματα κι ζωή εκχέ πφραλέσκι. Όμως, χρειαζίντιβελα τι τθεράς αμαρέ γκοντιάτε ακαβά-ντα: Κάνα προσευχίντιβασα, να βακεράσα κο Ιεχωβά κάτι σο να τζανέλα-λες ήδη ντα ούτε χρειαζίντιβελα τι βακεράς λέσκε αμέν σαρ τι τακτοποιήνελ ο πράγματα. (Διαβάνεν Ματθαίος 6:8) Αφού ισί αντικάς, σόσκε τι προσευχίντιβας ι γιαβερένγκε; Εκτός οντουλένταρ σο ντικχλάμ ανταλέ μαθημάστε, κάνα προσευχίντιβασα ι γιαβερένγκε σικαβάσα ότι πφαμπάσα λένγκε. Αμαρί αγάπη ισί οντιά σο τσσίντελα-αμέν τι προσευχίντιβας ο εκ ι γιαβερέσκε. Ντα ο Ιεχωβά χαιρίνελα κάνα ντικχέλα πι υπηρετόν τι σικαβέν αγάπη σαρ βοβ.

17, 18. Σαρ μπορίνασα τι μοιασκιαράς ο προσευχές σο κεράσα αμαρέ πφραλένγκε;

¹⁷ Ατζέ-ντα άμα ντικχίντιβελα ότι αμαρέ προσευχές να αλλάνενα ο πράγματα κι ζωή αμαρέ πφραλένγκι, σικαβάσα ότι μανγκάσα-λεν ντα ο Ιεχωβά ντέλα-λες σημασία ανταβά. Σκεφτίνεν ακαβά παράδειγμας: Βακερέν ότι εκ φαμιλί τθερέλα εκχέ χουρντέ τσσαβές ντα εκχέ χουρντέ τσσαγιά. Ο τσσαβό νασφάλιβελα ντα ισί κο κρεβάτι. Η τσσάι μολίνελα πι νταντές: «Κερ κάτι μι πφραλέσκε. Ισί μπουτ νασφαλό!» Ο ντατ ήδη κερέλα πράγματα για τι αβέλ λατσσές λέσκο τσσαβό. Μανγκέλα-λες ντα φροντίνελα-λες ι πο λατσσέ τροπόσαρ. Όμως καζόμ χαρούμενος πρέπει τι αβέλ ο ντατ σο ντικχέλα πι χουρντέ τσσαγιά τι πφαμπόλ αζόμ μπουτ πι πφραλέσκε σο μολίνελα πι νταντές τι βοηθίνελ-λες.

¹⁸ Άκ’ ανταβά μανγκέλα ο Ιεχωβά τι κεράς. Μανγκέλα τι πφαμπάς ο εκ ι γιαβερέσκε ντα τι προσευχίντιβας ο εκ ι γιαβερέσκε. Κάνα κεράσα-λες ανταβά, σικαβάσα ότι να ντικχάσα σάντε αμαρό νεαυτός ντα ότι μανγκάσα μπαγιά αμαρέ πφραλέν ντα πφενίν ντα ο Ιεχωβά ντέλα-λες σημασία ανταβά. (2 Θεσ. 1:3· Εβρ. 6:10) Επίσης, σαρ ντικχλάμ, μερικέ περιπτωσιέντε αμαρέ προσευχές μπορίνενα τι αλλάνεν μπουτ ο πράγματα κι ζωή εκχέ πφραλέσκι. Οτθάρ, να μανγκάσα τι μπιστράς τι προσευχίντιβας ο εκ ι γιαβερέσκε.