2 Пётро

3 Кучутнэ ԥрала, мэ ужэ до дуйто пистросарав тумэнди. Сар и кода разо, мэ мангав тумэн здраво тэ гиндон и тэ на бистрэн пала кода, со тумэ ужэ ӷанэн. 2 Када поможыя тумэнди тэ сэрэн, со ԥэнэнас лэ Дэвлэстирэ особи свынти мануша, ай кадяжэ лэ Барэ Хуласко и лэ Спасителёско законо, саво тумэнди пэрэдинэ тумарэ апосталоря. 3 Со май пэрво, тумэ трэбуй тэ ӷанэн, кай андэ послидни деса появинапэ мануша, савэ лэна тэ приасанпэ и тэ терэн кода, каринг со лэн цырдэл лэнго ди. 4 Вонэ лэна тэ ԥэнэн: «И кай во? Во жэ дя алав, кай рияпэ? Важ кода кай идоси, сар мулинэ амарэ ԥурэ, нисо на парудёл, вся ашэлпэ кадя, сар сас кодэла времятар, сар о Дэл создал лэ манушэн».

5 Вонэ на камэн тэ шон сама, кай андэ дэлмутни время сас небо и сас ԥув, сави, сар приԥэндя о Дэл*, видицолас анда паи и састэс тердёлас машкар о паи, 6 и кай и люма, сави сас андэ кодэя время, потасыля, кала дя кадэва паи. 7 И кадя жэ, сар приԥэндя о Дэл*, о небо и ԥув, савэ исин адес, ашэнпэ важ кода, кай тэ сԥабон андэ яг, фэринпэ жы кай о дес, кала сындона и умарэна лэ найлашэ манушэн.

8 И всаек, кучутнэ ԥрала, на́ бистрэн, кай важ о Иегова* ек дес сар тысяча бэрш и тысяча бэрш сар ек дес. 9 О Иегова на цырдэл и время, кай тэ зритярэл пэстири обещания, сар гиндон дэсавэ мануша, но во тэрпий и старыийпэ тэ поможый тумэнди. Важ кода кай во на камэл, кай варико тэ хасарэл и жызня, во камэл, кай всаворэ тэ каинпэ. 10 Лэ Иеговаско дес авэла сар чор. Тоди о небо барэ шумоса парашэла тэ авэл, ай кода, со исин по небо и пэ ԥув, росԥабардёла и потом полностью росшордёла. И авэла сыкади и ԥув и дила, сави терэлпэ пэр латэ.

11 Важ кода, кай вся када кадя росшордёла, погиндон, савэ манушэнца тумэ трэбуй тэ авэн. Тумэнди трэбуй тэ андярэн пэс сар свынти и па тумари дила трэбуй тэ дицол бари патив каринг о Дэл, 12 андэ кодэя время пока тумэ аштярэн лэ Иеговаско дес и сэрэн пала лэстэ*. Андэ кадэва дес о небо сԥабола андэ яг, ай кода, со исин по небо и пэ ԥув, росплавияпэ лэ барэ жаростар. 13 Но амэ аштярас нэво небо и нэви ԥув, пала савэ во дя алав. Пэр лэндэ лэла тэ терэлпэ ек и правильно дила.

14 Важ када, кучутнэ ԥрала, пока тумэ аштярэн кадэя время, стон вся пэско зор, кай тэ авэн кодэлэнца, ко англа Дэл вужо, бидошако и жувэл мирно. 15 Кадяжэ, диқэн пэ кода, кай амаро Баро Хулай тэрпий и старыийпэ тэ поможый тумэнди, сар пэ тумари спасения. Пала када жэ тумэнди пистросардя амаро любимо ԥрал о Павло, савэстэ исин годявэрнимос лэ Дэвлэстар. 16 Во ԥэнэн пала када андэ всаворэ пэстирэ письморя. Чаче тэ ԥэнав, най вся, со во пистрой, вушэро тэ полас, ай и найгодявэрнэ мануша, савэ най састэ андо патяимос, пэрэбандярэн кадэла письморя, сар и авэр части анда Свынти Лила, и кадя цырдэн бида пэ пэско шэро.

17 Кучутнэ ԥрала, тумэ ӷанэн, со трэбуй тэ авэл, кочай фэринпэ, кай кадэла бэзэхэстирэ мануша тэ на обдилярэн тумэн пэстирэ хохаимаса и тумэ тэ на парашэн састэс тэ ритярдён лэ чачунэ дромэсти. 18 Но на́ парашэн тэ терэн кадя, кай амаро Баро Хулай и Спасителё о Исусо Христос инке май фартэ тэ здиқэл пэр тумэндэ па пэско баро ковло ди, и старыинпэ инке май бут тэ уӷанэн пала лэстэ. Тэ авэл во ашунгло акана и о вико вечно. Аминь.