Римо
11 Важ када мэ пушав: хэба о Дэл отшутя пэстар пэстирэ народос? Най! Мэ тожэ израильтянино, мэ сым анда лэ Авраамоско ери, анда лэ Веняминоско колено. 2 О Дэл на отшутя пэстар пэстирэ народос, савэс во спэрва витидя. Хэба тумэ на ӷанэн, со андэ Свынти Лила ԥэнэнпэ пала Илья́ и пала кода, сар во хвалияспэ лэ Дэвлэсти пала израильтяноря? 3 О Илья́ ԥэндя: «Иегова*, вонэ умардэ тирэ особонэ манушэн, розмардэ тирэ жэртвеникоря, ашэлэмпэ ек мэ, ай акана вонэ камэн тэ умарэн и ман». 4 Со о Дэл лэсти ԥэндя? «Мандэ исин 7 000 мануша, савэ на тэлелэ лэ Ваалости». 5 Кадя и щас исин найбаро ӷурто, кас о Дэл витидя, кала здиқля пэр лэндэ па пэско баро ковло ди. 6 Ай если када тердяпэ через кода, кай о Дэл здиқля па пэско баро ковло ди, вижал, ужэ най важ кода, кай амэ затердям када пэстиря диласа. Тэ авелоп када кадя, тоди на дицэлоп, саво дэ баро ди кай о Дэл.
7 Со тоди амэ можэм тэ ԥэнас? Най всаворэ́ Израилёсти дорэсляпэ кода, со во камэлас, ай кати кодэлэнди, кас витидя о Дэл. Ай авэр отԥэнделэ тэ ашунэн, 8 сар пала када пистромэ: «О Дэл домэкля лэнди састэс тэ засовэн и кочай идоси лэндирэ яқа на диқэн и лэндирэ кан на ашунэн». 9 И о Давидо ԥэнэн: «Через лэнго хамос тэ пэрэн вонэ андэ яма, тэ астардён, тэ дэнпэдап андо бар и тэ спушэл лэндар о Дэл. 10 Мэк тэмной лэндэ андэ яқа, кай тэ на диқэн. Мэк збандён вонэ тала ԥаримос».
11 Мэ пушав: хэба и евреёря динэпэдап и пэлинэ, кай никала тэ на ущен? Най! Но важ кода, кай вонэ шылисайлэ, и мануша анда авэр народоря моӷут тэ спасынпэ, и када фартэ холярдя лэ евреёнэн. 12 Кода, кай и евреёря шылисайлэ, андя лашымос всаворя люмати, ай кода, кай лэн ашэля май набут, андя лашымос лэ манушэнди анда авэр народоря. Вижал, сар дэ бут лашымос авэла, кала стидэнапэ вонэ всаворэ!
13 Ай акана мэ камав тэ взвисавав каринг тумэндэ, каринг мэрнэ ԥрала, савэ найевреёря. Сар апостало важ авэр народоря, мэ фартэ цэнисарав мэрни дила, сави дя манди о Дэл. 14 Мэ кадяжэ надеисавав, кай через мандэ мэрно народо лэла тэ завидуий кодэлэсти, со исин тумэндэ, и кадя мэ тэ спасысарав хоть дэсавэн андар лэндэ. 15 Кала о Дэл лэндар отԥэнделя, када поможысардя, кай дэсавэ мануша тэ примиринпэ лэса. Но со авэла, если о Дэл прилэла лэн палпалэ? Важ лэндэ када авэла кадя жэ, сар тэ рин лэ мулэн каринг и жызня. 16 Если пэрво котор марно, саво отдино лэ Дэвлэсти, свынто, тоди свынто и вся о марно. И если о корнё свынто, тоди свынти авэна и виточки.
17 Но дэсавэ виточки сас отԥагэ ла виткатар. Потом тут прибарярдэ каринг авэр виточки, хоть ту санас дыко оливково витка. Акана ту пэс о соко анда ла виткако корнё. 18 Но на́ гиндосар, кай ту май лащи лэ виточкэндар, савэ сас отԥагэ. Ай если ту кадя гиндос, тоди на́ бистэр: най ту подритярэс о корнё, ай о корнё тут. 19 Ту можэш тэ ԥэнэс: «И виточки отԥаглэ, кай тэ прибарярэн ман». 20 Чаче тиро. Лэн отԥаглэ, кай вонэ на патянас, ай ту ритярдёс, важ кода кай патяс. Кочай на́ ав путярдо, но фэрисав. 21 Если о Дэл на жалуисардя и виточки, савэ спэрва пэр латэ вибарелэ, тоди во на жалуия и тут. 22 Ту диқэс, кай о Дэл и жалуий, и спушэл. Во спушэл кодэлэндар, ко отпэля, важ кода кай на патял. Но о Дэл жалуий тут, пока ту ашэс када. А то и тут тожэ отшынэла ла виткатар. 23 Ай если и евреёря упалэ лэна тэ патян, тоди и вонэ авэна прибарярдэ каринг и витка, важ кода кай лэ Дэвлэстэ исин зор тэ стерэл када. 24 Тут сшындэ па дыко оливково витка и, хоть кадя на терэлпэ, прибарярдэ каринг и садово оливково витка. Пэскати май вушэро тоди авэла тэ прибарярэн каринг и оливково витка латирэ пэрви виточки!
25 Ԥрала, камав, кай тумэ тэ ӷанэн пала свынто тайна, и тэ на гиндон, кай тумэ кацавэ бужанглэ: дэсавэ израильтяноря на лэна тэ приашундён, пока на авэна стидэ́ всаворэ, ко сас витидо анда авэр народоря, 26 и кадя спасыяпэ вся о Израилё. Пала када ԥэнэнпэ андэ Свынти Лила: «Па плай Сио́но авэла кодэва, ко спасыя и через кастэ лэ Иаковоско ери парашэла тэ терэл найлашымос. 27 И мэ стерава лэнца о доӷоворо, кала простисарава лэнго бэзэх». 28 Но вонэ отԥэнделэ тэ ашунэн и лащи новость и ашэлэ лэ Дэвлэстирэ вороӷоря, и када андя тумэнди лашымос. Но о Дэл витидя дэсавэн андар лэндэ, кай вонэ тэ ашэн лэстирэ друӷоря, важ кода кай во дя алав лэндирэ ԥурэнди. 29 Лэ Дэвлэсти на авэла жалко кодэва лашымос, саво во дя, и кода, кай во дэсавэн витидя. 30 Варикала тумэ на кандэнас лэ Дэвлэс, ай акана во одяло каринг тумэндэ, важ кода кай вонэ на канглэ. 31 И если во одяло каринг тумэндэ, важ кода кай вонэ на канглэ, тоди во можэт и каринг лэндэ тэ авэл одяло. 32 О Дэл домэкля, кай лэндэ тэ на вижал тэ кандэн лэс. Во стердя када, кай тэ авэл одяло каринг всаворэ мануша.
33 Сар дэ бут лашымос дэл о Дэл*! Сар дэ бут во ӷанэн и полэл! Нико не можэт тэ росполэл, сар во гиндой, и тэ уӷанэн вся, со во терэл! 34 «Ко поля лэ Иеговаско гиндо и ко можэт тэ дэл лэсти годи?» 35 Или «ко дя лэсти варисо, кай во акана трэбуй када тэ рий палпалэ?» 36 Вся лэстар, через лэстэ и важ лэстэ. Тэ авэл во ашунгло вся и время. Аминь.