Декабрё

Если амэ на диқас пала амари дума, када можэт тэ анэн бут ԥаримос. Ԥэнаса, тумэ диқлэпэ лэ ԥралэса чи ла ԥэяса, савэ жувэн котэ, кай амари дила заԥандадэ. Камэлпэ тумэнди тэ роспушэн лэндар, сар лэндэ котэ вижал тэ служын? Канешно, тумэ када пушэн анда оди. Тумэ любин лэ ԥралэн и пэрэжываете пала лэндэ. Тумэ кадяжэ камэн тэ мангэнпэ пала кода, со лэнди трэбуй. Но када время тэ на пушэн, со на трэбуй. Амэ можэм тэ допушас лэ ԥралэстар чи ла ԥэятар, савэ служын котэ, кай амари дила ԥандади. Тоди када сыкавэла, кай амэ най фартэ любисарас лэн. Кадяжэ най фартэ любисарас кодэлэн, ко надеийпэ пэр лэндэ, кай вонэ никасти на росԥэнэна пала лэндири служэния. Нико андар мэндэ на камэл, кай лэ ԥралэнди и лэ ԥэянди, савэ жувэн котэ, кай амари дила заԥандадэ, кай лэнди тэ авэл инке май ԥарэс. Если амэ екжэнэ служысарас андэ кацавэ страны, амэ на ласа вся тэ росԥэнас пала кода, сар амэндэ прожал и собрания чи сар терас авэр лэ Дэвлэстири дила. w20.03 21, 22, абз. 11, 12

О Дэл создал лэ манушэн, кай тэ жувэн вечно. Лэстэ на сас гиндо, кай и мануша тэ мэрэн. Но кай тэ жувэн вечно, о Адамо ла Еваса трэбуй сас тэ кандэн лэ Иеговас и када сас найԥарэс. О Дэл ԥэндя лэ манушэсти: «Кати на ха па витка, сави сыкавэл, со лашимос, ай со найлашимос. Важ кода кай андо дес, кала ту хаса пар латэ, мэрэса» (Бытие 2:16, 17). О Сатана через о сап ԥэндя ла Евати и алава, савэ запистромэ андо стихо по дес. Но вой патяя кадэлэ хохаимасти и халя о плодо и потом и о Адамо халя (Бытие 3: 6). Через када о бэзэх и смэрть ашэлэ андэ амари жызня (Римлянам 5:12). Сар и ԥэндя о Дэл, о Адамо и Ева мулинэ. Ай о Сатана на парашэля тэ обхохавэл лэ манушэн. Сар? Прожыля время и мануша линэ тэ патян андо хохаимос, кай посли кода, сар о мануш мэрэл, во варикай жувэл. Андэ кадэва хохаимос по разному патян и мануша и кацавэ манушэн фартэ бут (1 Тимофею 4:1). w19.04 14, 15, абз. 3, 4

И бэяцэ нэ моӷут, сар и взросли, драго тэ полэн, со терэлпэ и сар трэбуй тэ фэринпэ. Важ када лэ нахальниконэнди вушэро лэн тэ дилярэн. Вонэ замарэн лэ бэятонэнди о шэро, кай и бэяцэ екжэнэ андэ вся дошалэ, кай када лэнго секрето, кай лэнди нико на патяла и на поможыя. Кадяжэ вонэ ԥэнэн, кай када нармально машкар бэято и взросло и сыкавэн, кай кадэлэса вонэ любин лэс. Моӷут тэ прожан бут бэрша, кай о бэято тэ полэл, кай вся, со ԥэнэнас о нахальнико, када хохаимос. Через кода, со тердяпэ, лэ бэятости, кала вибарёл, ашэл пэстар гряца, во гиндой, кай най кацаво, сар всаворэ и кай во на ашэл, кай лэс тэ любин и тэ жалуин. Найудивительно, кай кала лэ бэятонэнца нахально терэн билажавардимос, када анэн ԥаримос пэ бут время. Амэ жувас андэ послидни деса, кала и мануша «на лэна тэ полэн пэстирэ родос», «ай найлашэ и хохавнэ мануша терэна май найдраго и найдраго» (2 Тимофею 3:1—5, 13). w19.05 15, 16, абз. 7, 8

Сар о Иисусо сытярэлас лэ манушэн? Пэрво, во росԥэнэнас лэнди о чачимос, саво фартэ лэлас лэ одестар. Во росԥэнэнас лэнди важ о Дэл, росԥэнэнас, васо о мануш трэбуй тэ жувэл, и ԥэнэнас, кай кати лэ Дэвлэско Царство улэла вся лэнго ԥаримос (Луки 24:19). Дуйто, о Иисусо сытярэлас па пэско примеро. Во сыкавэлас лэ учениконэнди, сар лэнди трэбуй пэс тэ андярэн (Иоанна 13:15). О Иисусо сытярэлас лэ манушэн, кала служыяс пэ ԥув (Матфея 4:23). Инке во лэн сытярэлас сразу, кала рисайля каринг и жызня. Например, лэс диқлэ лэстирэ ученикоря (файма, лэн сас май бут чем 500). Во ԥэндя лэнди тэ сытярэн лэ манушэн, кай вонэ тэ ашэн ученикоря (Матфея 28:19, 20; 1 Коринфянам 15:6). Кала о Иисусо рисайля по нэбо, во, сар ӷлава андэ собрания, кадяжэ на парашэлас тэ сытярэл пэстирэ учениконэн. Кадя, варикай андо 96 бэрш лэ И. Х., через о апостоло Иоанно, во подритярдя и ԥэндя, андэр со тэ парудён и помазани христианоря (Колоссянам 1:18; Откровение 1:1). w19.05 3, абз. 4, 5

Адес тэ затерас ловэ, кай тэ прожувас, найвушэро. Бут ԥрала и ԥэя долӷо терэн пэ бути, кай тэ проправарэн лэ ерес. Кай бут христианоря жал бут время, кай тэ доладэн пэ бути и палпалэ. Ай варикастэ фартэ ԥари бути. И каринг о вэчэро лэндэ совсем нинай зор, кай тэ сытён па Библия. И всаек амэнди трэбуй тэ витидас время, кай драго тэ сытювас па Библия и па литература, сави стерди пар латэ. Када сыкавэла амари дружба лэ Иеговаса и сможэм амэ тэ жувас вечно чи най (1 Тимофею 4:15, 16). Важ када дэко ущел тэсара май рано и пока всаворэ совэн, сытёл па Библия. Ай варико витидэл найбут время вэчэром, кай спокойно тэ сытёл па Библия и тэ погиндой. w19.05 26, абз. 1, 2

Кай о мануш кадя тэ парудёл, пэ када трэбуй время. Можэт тэ парудювас амэнди прижалапэ бут бэрша, и важ када пэстиря ригатар трэбуй тэ стас вся пэско зор (2 Петра 1:5). Трэбуй тэ старысавас и тэ стас зор, кай тэ парувас пэстирэ гиндоря. Пэрво, када трэбуй тэ мангаспэ. Драго када сыкадя амэнди о псалмопевцо, саво пистросардя: «Дэ манди тэ авэл вужо ди, дэ манди нэвэ и састэстэ гиндоря» (Псалом 51:10). Трэбуй тэ прижанас, кай амэнди фартэ трэбуй тэ парувас пэстирэ гиндоря и амэ катэ на обжасапэ би лэ Иеговастирэ зорэско. Дуйто, када тэ гиндосарас. Кала кажно дес адиносарас и Библия, трэбуй тэ витидас и время, кай драго тэ погиндосарас, савэ гиндоря и качестворя амэнди трэбуй тэ отшас пэстар (Псалом 119:59; Евреям 4:12; Иакова 1:25). Важ кода кай пар мэндэ тасавэл кадэва миро, амэ трэбуй тэ полас, каринг со амэн цырдэл и со амэ камас. Инке трэбуй тэ полас, андэр со амэнди трэбуй тэ парудювас и анда вся зор када тэ терас. w19.06 8, абз. 1; 10, 12, абз. 10—12

Кала трэбуй тэ витидэн, полэн, андэ сави время тумэ камэн тэ дотерэн и дила, сави загиндосардэ, и на отстон кадэя время. На аштярэн, кай авэла май лащи время, кацаво можэт и тэ на авэл (Экклезиаст 11:4). На домэкэн, кай и най фартэ важни дилы, тэ одлэн тумэндар о зор и время, сави трэбуй важ и май важни дилы (Филиппийцам 1:10). Если можно, витидэн кацави время, кала тумэнди нико на мишыия. Мангэн кодэлэн, ко паша тумэндэ, кай тэ на мишыин тумэнди андэ кадэя время. Диқэн, если вижала, мударэн о телефоно, на продиқэн, ко тумэнди пистросардя и на зажан андэ соцыальни сети. Кала дотердэ и дила, када шолпэ пэ кода, сар тумэ долаглэ каринг сас тумэнди трэбуй. Если тумэ па чачимастэ камэн тэ доладэн интя каринг трэбуй, тоди тумэ на парашэна тэ ладэн, дажэ если о дром пэрэԥандадо, и тумэнди прижалапэ тэ ладэн па авэр дром. Кадяжэ, кала варисо витидям тэ терас, если амэ гиндосарас, саво лашимос кадэлэстар авэла, тоди амэнди авэла май вушэро тэ стерас варисо па аврятэ и тэ обжас ԥаримос, саво авэл (Галатам 6:9). w19.11 30, абз. 17, 18

Васо тумэ можэте тэ закамэн тэ болдён? Кала драго сытёнас па Библия, тумэ бут уӷанглэ пала о Иегова, саво во и сар во андярэл пэс. Када ля тумэн лэ одестар и тумэ линэ фартэ тэ любин лэс. Тумэ трэбуй тэ болдён кати важ кода, кай любин лэ Иеговас. Тэ болдён трэбуй тоди, кала тумэ драго полэн о чачимос анда Библия. Сгиндосарам лэ Иисусостирэ алава, кала во ԥэндя тэ жан тэ сытярэн лэ манушэн, кай вонэ тэ ашэн лэстирэ ученикоря (Матфея 28:19, 20). О Иисусо ԥэндя, кай нэвэ ученикоря трэбуй тэ болдён «через о алав лэ Дадэско, лэ Шавэско и лэ свынтонэ духоско». Сар када тэ полас? Тумэ трэбуй анда вся оди тэ патян андо чачимос анда Библия пала о Иегова, пала лэско Шаво, о Иисусо и пала свынто духо. Кадэва чачимос састо и можэт тэ лэл лэ одестар. w20.03 9, 10, абз. 8, 9

О Иегова бишалдя лэ анӷелонэн най кати тэ ԥэнэн, со тэ терэл лэ Лотости, но и кай тэ поможын лэсти тэ ашэлпэ жундо, кала о Дэл лэла тэ сԥабарэл о Содомо (Бытие 19:12—14, 17). Кадя жэ и адес. Кала амэ диқас, кай о ԥрал камэл варисо тэ терэл, со можэт тэ анэн бида, трэбуй лэсти тэ подԥэнас. Дажэ кала во сразу на приашундёл каринг кода, со пистромэ андэ Библия, амэнди всаек трэбуй тэ на холявас и тэ аштярас, кала во приашундёла. На подэнпэ ла холяти и на гиндон, кай о ԥрал на парудёла. На бистрэн, сар и анӷелоря поможысардэ лэ Лотости, и терэн кадя жэ (1 Иоанна 3:18). Када, ԥэнэса, тэ лэн лэс вастэстар и тэ поможын тэ терэл кадя сар подԥэндэ. О Иегова на шолас сама кати пэ кода, со о Лото терэлас най кадя. Кала прожыля время, во ԥэндя лэ апостолости Петрости тэ ԥэнэн по Лото, кай во праведно мануш (Псалом 130:3). Со поможыя амэнди, сар о Иегова, тэ полас лэ ԥралэн и лэ ԥэян, сар во полэлас лэ Лотос? Если амэ май бут шас сама пэ кода, савэ лэндэ лашэ качестворя, амэнди авэла май вушэро пэр лэндэ тэ на холявас и тэ аштярас, кала вонэ парудёна. Ай вонэ пэстиря ригатар, май йто прилэна амэндар и помощь. w19.06 21, абз. 6, 7

Если андэ тумари страна и власти ԥандадэ и дила лэ Иеговастирэ свидетелёнэнди, тумэ можэте тэ пушэн: «Можэт тэ пэрэладав кордэ, кай нинай запрето и котэ тэ служысарав лэ Дэвлэсти?» Када тэ ришыс трэбуй екжэно. Варико можэт тэ диқэл пэ кода, со стердэ и христианоря андэ пэрво вико, кала лэн линэ тэ ӷонин. И ученикоря, савэ жувэнас андо Иерусалимо «рознашлэпэ па вся Иудея и Самария» и дажэ «дожылэ каринг и Финикия, Кипро и Антиохия» (Матфея 10:23; Деяния 8:1; 11:19). Ай варико закамэла тэ терэл кадя, сар о Павло, саво на закамля тэ ашавэл и местность, кай и вороӷоря фартэ ӷонинас важ и вера (Деяния 14:19—23). Сости амэн када сытярэл? Кажнонэ хуласти андо ери, трэбуй екжэнэсти тэ витидэл, тэ пэрэладэл варикаринг чи най и со авэла май драго важ лэско ери. Англа кода, кай варисо тэ витидэл, во трэбуй тэ мангэлпэ каринг о Иегова. Кадяжэ трэбуй тэ диқэл и тэ полэл, со май фартэ трэбуй лэстирэ ерести. Нащи тэ сындос аврэн пала кода, со вонэ витидэ. w19.07 10, абз. 8, 9

О Иисусо приԥэндя амэнди: «Жан кай всаворэ народоря, сытярэн лэ манушэн, кай вонэ тэ авэн ученикоря» (Матфея 28:19). Амэнди трэбуй най кати тэ росԥэнас лэ манушэсти, со о Иисусо аштярэл пэстирэ учениконэндар, но и тэ сыкавас лэсти, сар тэ жувэл кадя, сар сытярэл о Христос. Трэбуй тэ авэл терпения, кай тэ поможысарас лэсти тэ жувэл па аврятэ, када па библейски принцыпоря. Варикасти, кай тэ парувэл пэстирэ гиндоря и кода, каринг со во присытеля, хутилэла дэсавэ шона, ай варикасти пэ када трэбуй авэла май бут время. Еқэ мисианеростэ, саво варикала служыяс андэ Перу, сас кацаво, со сыкадя, кай и терпения анэн лашимос. Акэ со во росԥэндя: «Мэ сытяравас па Библия лэ Раулёс, савэса прожылям дуй книжки, но во кадя и на паруделяпэ. Во на ладияс лэ ереса и дэлас дума фартэ найдраго, ай и бэяцэ на стонас пэр лэстэ патив. Важ кода кай о Раулё вся и время авэлас пэ собрания, мэ на парашавас тэ авав лэстэ и каринг лэско ери и старысававас тэ поможысарав лэнди. Посли кода, сар мэ лэстэ авелэм пэрво разо, прожылэ май бут чем трин бэрш, кати тоди во паруделя и лэсти можно сас тэ болдёл». w19.07 14, 15, абз. 3; 19, абз. 15—17

Погиндосарам, кай сас о Павло, кала пистрояс о Письмо лэ филиппийцонэнди. Во сас андо Римо тала домашнё аресто. Во нэ моӷ свободно тэ росԥэнэн важ о Дэл. И всаек о Павло росԥэнэнас важ о Дэл кодэлэнди, ко лэстэ авэлас. Ай инке, во пистрояс письморя андэ собрании, савэ сас дур. О Павло ӷанэнас, кай лэсти сар и лэ Христости, трэбуй тэ стол вся пэско зор до конца. Важ када во сыстосардя о христианско дром кодэлэса, сар прастэн (1 Коринфянам 9:24—27). Кодэва, ко прастэл па форо, во сэрэл, кай лэсти трэбуй тэ допрастэл до конца и тэ на шол сама пэ варисо авэр. Можэт кацаво тэ авэл, кай кодэла, ко прастэн, тердёна и роздиқэна кода, со исин пэ ветрины андэ маӷазиноря? Канешно, най, важ кода кай вонэ камэн тэ вицэлэн! Кала прастас, кай тэ авэл и вечно жызня, амэнди кадяжэ нащи тэ шас сама ни пэр со. Кала амэ сэрас кода, пала со прастас, и сар о Павло стас вся пэско зор, амэ ласа и наӷрада. w19.08 3, абз. 4; 4, абз. 7

Лэ ерести можэт тэ авэл ԥарэс тэ присытён, кай амэ акана жувас па лэ Дэвлэско законо. Май йто вонэ шон сама пэ кода, кай амэ будэр на терас празникоря и на ӷуляс андэ политика. Дэко анда ери моӷут дажэ тэ холявэн пар мэндэ (Матфея 10:35, 36). Но амэ трэбуй тэ патяс, кай вонэ полэна. Если амэ парашаса тэ росԥэнас, андэр со амэ патяс, вижал амэ виандярас лэнди о приӷоворо, кай вонэ на ашэн тэ жувэн вечно. Но о Иегова на стодя, кай амэ тэ авас сындомаря. Во отдя кадэва сындо андэ лэ Иисусостирэ вас (Иоанна 5:22). Если амэ ӷанас тэ аштярас, амаро ери, файма, закамэна тэ ашунэн и весть анда Библия. Амэнди трэбуй тэ на холявас и тэ на домэкас, кай амаро ери тэ парувэл амарэ гиндоря, кала амэндэ ԥаримос (1 Коринфянам 4:12б). Трэбуй тэ прожал время, кай о ери тэ полэл, сар дэ куч важ амэндэ тэ служысарас лэ Иеговасти. w19.08 17, 18, абз. 10, 13, 14

«Корконо мэ никала на пэрэандярдоп кадэва ԥаримос!» Ԥэнэнас тумэ кадя варикала чи най? Можэт тумэнди прижыляпэ тэ пэрэандярэн о ԥаримос через о насвалимос или кала муля варико пашутно. Посли вся када тумэ полэн, кай тэ пэрэандярэн када вижыля кати лэ Иеговаса, важ кода кай во дэлас через пэско свынто духо «зор, саво май баро обычнонэстар» (2 Коринфянам 4:7—9). Ай инке, би свынтонэ духоско, амэнди авелоп ԥарэс тэ пэрэандярас кода, кай пар мэндэ тасавэл и люма, савяса правий о Сатана (1 Иоанна 5:19). Ай инке амэнди трэбуй тэ борисавас «против и бэнга, савэ по нэбо» (Эфесянам 6:12). О свынто духо лэ Иеговастар поможый амэнди кодэлэса, кай дэл амэнди зор тэ терас дила, сави амэндэ исин и тэ на диқас по ԥаримос. О апостоло Павло полэлас, кай лэстэ вижалас тэ служый лэ Иеговасти и тэ на диқэл по ԥаримос, важ кода кай надеияспэ по «лэ Христоско зор» (2 Коринфянам 12:9). w19.11 8, абз. 1—3

И Библия када ек книӷа, савяти можно тэ патяс и андэ сави росԥэнэнпэ, со о Иисусо стердя важ и мануша. Если ту сытёса тэ любис лэ Иисусос, ту май фартэ полюбиса лэ Иеговас. Васо? Важ кода кай о Иисусо андэ вся шоласпэ пэ пэско Дад. И со май бут ту лэса тэ уӷанэс пала о Иисусо, со май драго полэса лэ Иеговас и май фартэ лэса лэс тэ любис. Погиндосар, сар о Иисусо полэлас лэ манушэн, савэн авэр вэрыцынас, важ кода кай вонэ сас чорорэ, насвалэ и би зорэско. Сгиндосар пала кода, савэ во дэл советоря важ и жызня и пала кода, сар парудёл тири жызня андэ лащи риг, кала прилэс кадэла советоря (Матфея 5:1—11; 7:24—27). Ту лэса май фартэ тэ любис лэ Иисусос тоди, кала лэса май бут тэ гиндос, кай во отдя пэстири жызня важ тутэ, кай тэ витинэл тут. Кати блаӷодаря лэсти тирэ ӷрехоря простинпэ (Матфея 20:28). И кала ту када полэса и прилэса каринг оди, тоди ту закамэса тэ каиспэ и закамэса, кай о Иегова тэ простий тиро бэзэх (Деяния 3:19, 20; 1 Иоанна 1:9). Ай кала ту лэса тэ любис лэ Иеговас и лэ Иисусос, ту закамэса тэ проандярэс и время кодэлэнца, ко лэн любий. w20.03 5, 6, абз. 10—12

Кай о христианино можэт тэ авэл кацаво гиндо, кай кадэя дила кати во можэт тэ стерэл. Ай и хулаи варисавэ ԥралэсти можэт тэ гиндой: «Мэрно хулай стерэла када май драго, чем варико авэр». Если амэ па чачимастэ на заваздас о шэро, амэ никала на ласа кадя тэ гиндосарас. На бистрам, со терэлас о Моисеё, кала аврэнди дэнас почотно дила. Важ лэстэ сас куч кода, кай о Иегова стодя лэс барэдэрэса тэ диқэл пала израильтяноря. Но сар о Моисеё диқля пэ кода, кай дэсо анда лэстири дила о Иегова пэрэдя аврэ муршэнди? Во пэ када на холяйля (Числа 11:24—29). Ай инке во на заваздэлас о шэро и домэкля, кай авэр тэ поможын лэсти тэ сындой лэ народос (Исход 18:13—24). Через када андо Израилё ашэля май бут мурша, савэ поможынас тэ роздиқэн и дила, важ сави сындонаспэ и лэ манушэнди на прижаласпэ долӷо тэ аштярэн. Лэ Моисеёсти сас найважно, кай во сас баро мануш, ай важ лэстэ сас май куч, кай аврэнди тэ авэл драго. Сар драго лэстар тэ сытювас! Амэнди трэбуй акэ со тэ сэрас. Если амэ камас драго тэ терас лэ Иеговастири дила, тоди най кадя важно, кай амэ бут варисо ӷанас, ай май важно, кай амэ на заваздас о шэро. w19.09 5, 6, абз. 13, 14

Амэ на ӷанас, васо и народоря дэна по Вавилоно Велико. Можэт када авэла через кода, кай и веры па вся и ԥув на дэна лэнди, кай вонэ тэ стерэн тэ авэл мирно и вся и время ӷаминапэ андэ политика. Или, через кода, кай андэ ҭана, кай тэлён лэ хохавнэ дэвлэнди, вонэ стидэ фартэ бут барвалимос (Откровение 18:3, 7). Када на сыкавэла, кай поумарэна всаворэ манушэн, ко андэ хохавнэ веры. Май йто и народоря розмарэна и ҭана, кай тэлён лэ хохавнэ дэвлэнди. Кала кадэла ҭана будэр на авэна, кодэла, ко кордэ ԥирэнас, полэна, кай барэ мануша анда веры обхохадэ лэн, и кода, со вонэ аштярэнас, нинай. И мануша, савэ ԥирэнас кордэ, файма, притерэнапэ, кай на ӷанэн кадэла хохавнэ веры. Тэ розмарэн о Вавилоно Велико, када авэла найдолӷо (Откровение 18:10, 21). О Иегова дя алав, кай стерэла май скурти и деса, кала авэла и само бари бида, кай тэ спасый кодэлэн, кас во витидя важ и чачуни вера (Марка 13:19, 20). w19.10 15, абз. 4, 5

Можэт, тумэ вибарелэ андо ери, кай о дад и дэй ӷрубо дэнас дума лэ бэятонэнца и йто лэнас тэ цыпин. Важ када, кала тумэндэ арақаделэ бэяцэ, файма, тумэ гиндон, кай тэ цыпин пэ бэяцэ, када нинай нисо. Тумэ уӷанглэ лэ Иеговаско гиндо пала кода, сар тэ сытярэн лэ бэятонэн. Но можэт тумэ шон сама, кай тэ авэн спокойни и тэ тэрпин, када ԥарэс, ай май фартэ тоди, кала тумэ цыелэ, ай и бэяцэ на кандэн (Эфесянам 4:31). Андэ кацави время тумэнди трэбуй, сар никала, тэ мангэн, кай о Иегова тэ поможый тумэнди (Псалом 37:5). Дэсавэ дэянди можэт тэ авэл ԥарэс тэ сыкавэн пэстирэ бэятонэнди, кай любин лэн. Кацавэ жувля, файма, вибарелэ андэ кацавэ еря, кай и родителя най фартэ полэнас пэстирэ бэятонэн. Дажэ если тумэнца сас кацаво, на терэн кадя, сар тумарэ родителя. И жувли, сави кандэл лэ Иеговас, трэбуй тэ сытёл тэ сыкавэл пэстири любовь лэ бэятонэнди. Можэт лати найвушэро тэ парудёл, но латэ када вижала! И када анэна лашимос и лати и латирэ ерести. w19.09 18, 19, абз. 19, 20

Кодэва, ко тэлёл лэ Иеговасти, ай кадяжэ стол бут зор, кай тэ авэл барвало, можно тэ ԥэнэс, кай служый дуе хуланди. Тоди, пэр лэстэ на ԥэнэса, кай во служый кати лэ Иеговасти. Кала кончияспэ о пэрво вико лэ И. Х. и мануша анда собрания андо форо Лаодикия абуронас и ԥэнэнас пэсти: «Мэ барвало, барваделэм и мандэ вся исин». Но англа лэ Иеговастирэ и лэ Иисусостирэ яқа вонэ сас бибахталэ, чорэ, корэ и нангэ. О Иисусо ԥэндя пэр лэндэ кадя, най важ кода кай вонэ барвалэ, ай важ кода кай через и любовь каринг и ловэ вонэ хасардэ и дружба лэ Иеговаса (Откровение 3:14—17). Кала амэ шутям сама, кай андэ амаро ди и андэ гиндоря амэ камас тэ авас барвалэ, амэнди со май йто трэбуй тэ парувас пэстирэ гиндоря (1 Тимофею 6:7, 8). Ай если амэ на паруваса и гиндоря, тоди амаро ди авэла розделимэ по епаш, и о Иегова на прилэла, кай амэ лэсти тэлювас. Во камэл, кай амэ «ек лэсти тэ тэлювас» (Второзаконие 4:24). w19.10 27, 28, абз. 5, 6

Ӷреческо алав, саво пэрэандярдэ катэ «сжалас», сыкавэл «андярэлас». Кадэва жэ ӷреческо алав кати па аврятэ пистросардя о Лука андэ книӷа Деяния важ о кораблё, саво «андярэлас и балвал» (Деяния 27:15). Када сыкавэл, кала о апостоло Пётро ԥэндя пэ кодэла, ко пистросардя и Библия, кай пэр лэндэ сжалас о свынто духо. Сар ԥэндя ек учоно, саво полэл и Библия, о Пётро «фартэ драго сыстосардя када кодэлэса, сар о кораблё плавуий па моря». Аврэ алавэнца о Пётро ԥэндя, кай кадяжэ, сар и балвал андярэл о кораблё каринг лэсти трэбуй, кадяжэ и о свынто духо и пророкоря и кодэла, ко пистронас и Библия, терэнас и дила, сави лэнди сас трэбуй. Кодэва жэ учоно ԥэнэн: «И пророкоря, можно тэ ԥэнэс, ваздэнас и парусоря». О Иегова терэлас пэстири дила, во дэлас и балвал, када о свынто духо. Ай кодэла, ко пистронас и Библия, терэнас пэстири дила, вонэ терэнас кадя, сар камэлас о свынто духо. Дэкала хоть и моря найспокойно, и балвал андярэл интя, каринг трэбуй. Кадяжэ о свынто духо поможый амэнди тэ жас через о ԥаримос каринг о лашимос, пала саво о Дэл дэл алав, кай авэла раё пэ ԥув. w19.11 9, 10, абз. 7—9

Дэкала амэ умэкас и вас. Но амэнди на трэбуй тэ домэкас, кай тэ гиндосарас ек важ о ԥаримос. Тоди амэ парашаса тэ гиндосарас пала лашимос, саво авэла англэ, и саво подарисардя амэнди о Иегова (Откровение 21:3, 4). Кала умэкас и вас, када можэт тэ одлэл о зор и амэ можэм тэ сдаспэ. Акэ со сас еқа ԥэяса анда Соединённи Штаторя, савяти прижыляпэ тэ диқэл пала пэско фартэ насвало хулай. Сар вой терэл, кай тэ авэл латири вера май састи? Вой пистросардя: «Дэкала амэнди фартэ ԥарэс и амэ умэкас и вас, но амари надежда всаек састи. О Иегова бут со дэл, кай тэ ашэл амари вера май састи! Мэ фартэ блаӷодарно лэсти пала када. Амэ на обжасапэ би лэстирэ советонэнго, и кай во тэ на подритярэл амэн. Вонэ поможын амэнди тэ виритярас о ԥаримос». Анда латирэ алава дицол, со трэбуй тэ терас, кай тэ на умэкас и вас. Трэбуй тэ виритярас о ԥаримос и тэ сыкавас, кай на парашас тэ патяс лэ Иеговасти и тэ на подаспэ лэ Сатанасти, и трэбуй тэ цэнисарас вся, со дэл о Иегова, и тэ сэрас, кай во можэт амэн тэ подритярэл. w19.11 16, абз. 9, 10

Лэ старейшынонэнди со май фартэ трэбуй тэ терэн кадя, сар пистромэ андэ кадэва библейско принцыпо. Лэнди на трэбуй тэ росԥэнэн аврэнди кода, со авэр нащи тэ ӷанэн. О старейшына полэл, кай на трэбуй тэ росԥэнэн ла хулаяти, со лэсти росԥэндэ и ԥрала и ԥэя пала пэстэ. Если во росԥэнэна, тоди лэсти парашэна тэ патян андэ собрания и пэр лэстэ ужэ на стона кацави патив. И ԥрала, савэндэ исин бут дила андэ собрания, нащи тэ хохавэн (1 Тимофею 3:8). Када сыкавэл, кай нащи тэ хохавэн аврэн и нащи тэ дэн дума пала думэ. О хулай, саво любий пэстиря хулая, на лэла тэ росԥэнэн лати, со вой на трэбуй тэ ӷанэн, важ кода кай на камэл, кай лати тэ авэл ԥарэс. И хулаи, сави камэл, кай пэ лако хулай тэ на парашэн тэ стон патив, на лэла тэ вимангэл лэс тэ росԥэнэн лати кода, со нащи. Кацави хулаи сыкавэла, кай подритярэл пэстирэ хулас, ай кадяжэ стол патив пэ кодэла, ко лэсти патян. И со май ӷлавно, вой радуия лэ Иеговас. Кала вой кадя терэл, андэ собрания авэла мирно и всаворэ авэна ек пала еқэстэ (Римлянам 14:19). w20.03 22, абз. 13, 14

Андо 1512 бэрш жы кай И. Х., кала паша плай Синаё стодэсас и свынто бари катуна о Моисеё стердя обрядо, андэ саво о Аароно и лэстирэ шавэ ашэлэ рашанца (Исход 40:17; Левит 9:1—5). Сар о Иегова сыкадя, кай лэсти чалелэ кадэла рашая? Кала о Моисеё и Аароно блаӷословисардэ лэ народос, лэ Иеговастар па нэбо сжыля и яг и сԥабардя вся, со сас по жэртвеннико (Левит 9:23, 24). Со сыкадя и яг, сави сжыля па нэбо? Кадя о Иегова сыкадя, кай подритярэл лэ Ааронос и лэстирэ шавэн, савэн во стодя тэ авэн рашая. Кала и израильтяноря диқлэ, сар о Иегова подритярэл лэ рашан, вонэ полинэ, кай трэбуй кадяжэ андэ вся тэ подритярэн лэн. Поджал када каринг амэндэ чи най? Канешно. Всаворэ рашая, савэ сас андо Израилё, када сас «тень» кодэлэсти, кай авэла о Само баро Рашай о Иисус Христос и 144 000 царёря и рашая, савэ лэна тэ служын лэ Христоса по нэбо (Евреям 4:14; 8:3—5; 10:1). Амэ патяс, кай о Иегова диқэл пала пэстири арӷанизацыя и фартэ блаӷословий ла. w19.11 23, 24, 25, абз. 13, 14, 16

Кала о апостоло Павло сас андо Коринфо, во жувэлас кай о Акила и Прискилла и еқэҭанэ лэнца сувэлас и катуны. Кода, кай о Павло терэлас бути «дес и рят», на сыкавэл, кай во отдэлас кадэлэсти вся пэстири время. Например, андэ суббота во на терэлас бути. Через када во моӷ тэ росԥэнэн лащи весть лэ иудеёнэнди, савэ кадяжэ андэ суббота на терэнас бути (Деяния 13:14—16, 42—44; 16:13; 18:1—4). Да, лэ Павлости прижаласпэ тэ терэл бути. О Иегова дажэ ԥэндя лэсти тэ пистрой: «Если варико на камэл тэ терэл бути, мэк тоди и на́ хал» (2 Фессалоникийцам 3:10). И всаек во старыияспэ вся и время тэ терэл и «свынто дила важ и лащи весть» (Римлянам 15:16; 2 Коринфянам 11:23). Кадяжэ о Павло ԥэнэнас, кай и авэр тэ терэн кадя. Во ԥэнэнас лэ коринфянонэнди тэ «терэн бут дила, сави терэл о Ӷосподо» (1 Коринфянам 15:58; 2 Коринфянам 9:8). Во ԥэндя по Акила и пэ Прискилла, кай вонэ лэса «терэнас еқэҭанэ лэ Христостири дила» (Римлянам 12:11; 16:3). w19.12 5, абз. 12, 13

О Иегова дя лэ пэрвонэ ерести, кай лэндэ тэ авэн бэяцэ. Но ко витидэл важ кодэла, ко найдэлмут жэнисайля, кай лэндэ тэ авэн бэяцэ чи най? И если вонэ витидэ, кай тэ авэн лэндэ бэяцэ, тоди кала? Андэ дэсавэ культуры трэбуй, кай кодэлэндэ, ко кати жэнисайлэ, со май йто тэ авэн бэяцэ. Родо и авэр мануша моӷут тэ тасавэн пэр лэндэ, кай вонэ тэ терэн кадя, сар терэлпэ андэ лэндири культура. О Джетро, ԥрал анда Азия, росԥэнэн: «Андэ собрания дэсавэ христианоря, кастэ исин бэяцэ, тасавэн пэ кодэла, ко найдэлмут жэнисайля, кай лэндэ май йто тэ авэн бэяцэ». О Джеффри, авэр ԥрал анда Азия, росԥэнэн: «Исин ԥрала и ԥэя, савэ ԥэнэн кодэлэнди, кай, кала вонэ ԥурёна, пала лэндэ най ко авэла тэ диқэл». Но кажнонэ хуласти и хулаяти, корконэнди трэбуй тэ витидэн, тэ авэн лэндэ бэяцэ чи най. Када лэндири дила, и вонэ ӷанэн, сар май фэдэр (Галатам 6:5). Понятно, кай о родо и друӷоря камэн важ лэндэ ек о лашимос. Но вонэ трэбуй тэ на бистрэн, кай када ек лэндири дила (1 Фессалоникийцам 4:11). w19.12 22, 23, абз. 1—3

Ԥарэс тути тэ полэс лэ Дэвлэс, сар дадэс, чи най? Дэко гиндон, кай о Иегова кацаво баро, кай амэ важ лэстэ нисо на ашас. Вонэ на патян, кай о Всемоӷущё Дэл, шола сама пэр лэндэ. Но амаро Дад, саво амэн любий, на камэл, кай амэ кадя тэ гиндосарас. Во дя амэнди жызня и во камэл, кай амэ лэс тэ родас и тэ виарақас. О апостоло Павло, кала ԥэндя кадэла алава, сыкадя кодэлэнди, ко жувэлас андэ Афины, кай о Иегова «найдур кажнонэстар амэндар» (Деяния 17:24—29). О Дэл камэл, кай амэ тэ полас лэс кадя, сар о бэято полэл пэстирэ дадэс, саво любий и заботийпэ. Аврэнди ԥарэс тэ полэн лэ Дэвлэс, сар дадэс, важ кода кай вонэ на диқлэ пэстирэ чаче дадэстар и любовь и о лашимос. Ек амари ԥэй росԥэндя: «Мэрно дад ԥэнэнас найлашэ алава пэр мандэ. Сар кати мэ лэм тэ сытював па Библия, манди сас ԥарэс тэ полав лэ Иеговас, сар небеснонэ Дадэс». Ай тумэнди ԥарэс тэ полэн лэ Иеговас, сар пэстирэ дадэс? Сар када кадя, нэ пэрэжывайте. Прожала и время и тумэ полэна, кай о Иегова само лашо Дад па вся и люма. w20.02 3, абз. 4, 5

О Иисусо сытярэлас кадя, кай дажэ, если амэндэ на вижал бут тэ терас андэ служэния или амэнди здэлпэ, кай амэ на стас бут зор, через кода кай ԥурелям, важ о Иегова всаек куч вся, со амэ терас андэ служэния (Псалом 92:12—15; Луки 21:2—4). Важ када спэрва гиндон пала кода, со па тумаро зор. Например, тумэ можэте тэ росԥэнэн аврэнди пала о Иегова, тэ мангэнпэ пала ԥрала и ԥэя и тэ подритярэн лэн, кай вонэ тэ на парашэн тэ кандэн лэ Иеговас. О Иегова полэл тумэн, сар пэстирэ амалэн, но най важ кода, кай тумэ варисо лэсти тэ дэн, ай важ кода, кай тумэ камэн лэс тэ кандэн (1 Коринфянам 3:5—9). Сави када бари бах тэ служысарас лэ Иеговасти, лэ Дэвлэсти, саво па чачимастэ цэний кодэлэн, ко на парашэл лэс тэ кандэл! Во создал амэн, кай амэ тэ терас кода, со во камэл, и кала амэ лэсти служысарас, кадэлэстар амари жызня ашэл май бахтали (Откровение 4:11). Хоть андэ люма, савяса правий о Сатана, пар мэндэ моӷут тэ диқэн кадя, кай амэ нисо на ашас и нисо нэ можэм тэ терас, лэ Иеговасти найлажаво важ амэндэ и во кадя на гиндой (Евреям 11:16, 38). Амэнди можэт тэ авэл ԥарэс через о насвалимос, через и бэрша чи через кода, кай най сар тэ затерас ловэ. Тоди трэбуй никала тэ на бистрас, кай нисо нэ сможэт амэн тэ одлэл кодэлэстар, кай амэн тэ на любий о небесно Дад! (Римлянам 8:38, 39). w20.01 18, абз. 16; 19, абз. 18, 19

Кай тэ на завидуисарас, амэнди трэбуй тэ терас вся, кай тэ на гиндосарас пала пэстэ бут и май бут тэ цэнисарас кода, со амэндэ исин. Если амэндэ андо ди исин када вся, тоди амэ на ласа тэ завидуисарас. Кала о мануш на заваздэл о шэро, во на гиндой пала пэстэ бут. Тоди кацаво мануш на аштярэл, кай лэс фартэ тэ шон сама (Галатам 6:3, 4). Ай о мануш, саво цэний кода, со лэстэ исин, када важ лэстэ фартэ куч и во на сыстойпэ аврэнца (1 Тимофею 6:7, 8). Мануша, савэ на гиндон пала пэстэ бут, цэнин кода, со лэндэ исин, и вонэ радуинпэ, кала аврэндэ вся драго вижал. Амэнди трэбуй о свынто духо, кай тэ на завидуисарас и тэ на гиндосарас пала пэстэ бут и тэ цэнисарас, со амэндэ исин (Галатам 5:16; Филиппийцам 2:3, 4). Лэ Иеговаско свынто духо поможый амэнди тэ полас, со амэндэ андо ди и васо. Лэ Дэвлэстирэ зорэса амэндэ вижала тэ вилас и найлашэ гиндоря и о найлашимос, саво амэндэ андо ди и тэ гиндосарас кати пала лашимос (Псалом 26:2). w20.02 15, 17, абз. 8, 9

Кала дэса алав лэ Иеговасти тэ жувэс важ лэстэ, во лэла тэ аштярэл, кай ту кадя и терэса. Важ када драго ладисар лэ ԥралэнца и лэ ԥэянца анда тири собрания. Акана када тиро ери, савэса ту патяс андо ек Дэл. Кала на промэкэс и собрании, тутэ ашэл май лащи дружба лэ ԥралэнца и лэ ԥэянца. Кажно дес адиносар лэ Дэвлэско Алав и Библия, и гиндосар пала кода, со адиносардян (Псалом 1:1, 2). Виарак время, кай драго тэ погиндос. Тоди кадэла гиндоря анда Библия дожана каринг оди. «На парашэн тэ мангэнпэ» лэ Иеговасти (Матфея 26:41). Тирэ молитвы анда оди пашарэна тут каринг лэстэ. Родэн «спэрва лэ Дэвлэско Царство» (Матфея 6:33). Важ када трэбуй, кай со май ӷлавно андэ тири жызня, тэ авэл тэ росԥэнэс важ о Дэл. Кала кажно шон росԥэнэс важ о Дэл. Кадя ту май фартэ лэса тэ патяс. Любо ԥаримос, саво исин андэ люма «най пэ долӷонэстэ и вушэро» (2 Коринфянам 4:17). Кала дэс алав лэ Иеговасти тэ жувэс важ лэстэ и болдёс, ту ашэс май бахтало ужэ акана и англэ тутэ авэла «чачуни жызня». Хэба вся када на ашэл, кай амэ кадя тэ терас? Канешно ашэл! (1 Тимофею 6:19). w20.03 13, абз. 19—21

Если кай о мануш, савэс ту сытярэс па Библия, на ашэл май лащи дружба лэ Дэвлэса, тути прижалапэ тэ пушэс пэстар: «Трэбуй чи най тэ парашав тэ сытярав лэс па Библия?» Задэ пэсти кацавэ вопросоря: «Моӷу мэ чи най тэ ԥэнав, кай лэ манушэстэ, савэс мэ сытярав па Библия, ашэл май лащи дружба лэ Иеговаса? Дицол чи най па кода, саво лэстэ зор, бэрша, саво ери чи вушэро лэсти тэ полэл или най кода, со во сытёл, кай лэстири дружба лэ Иеговаса тэ ашэл май лащи? Заля во тэ терэл кадя, сости сытеля?» (Матфея 28:20). Сар бы ԥарэс тэ на авэл, но дэсавэ мануша, кас сытярас па Библия, гиндон кадяжэ, сар и израильтяноря, савэ жувэнас андэ кодэя время, кала жувэлас о Иезекиилё. Акэ со о Иегова ԥэндя пала кодэла мануша пэстирэ пророкости: «Ту важ лэндэ сар лащи дили, сар мануш, кастэ лашо ӷолосо и саво драго дилабэл по инструменто, савэстэ исин струны. Вонэ ашунэн тирэ алава, но нико на терэл кадя» (Иезекииль 33:32). Канешно, найвушэро тэ ԥэнэс манушэсти, кай будэр на лэса тэ сытярэс лэс па Библия. Но на бистэр, «кай время ашэляпэ набут». Фэдэр тэ на сытярэс па Библия кодэлэс, кастири дружба лэ Иеговаса на ашэл май лащи. Ай фэдэр тэ арақэс кодэлэн, кас цырдэл «каринг о чачимос, саво дэл вечно жызня» (Деяния 13:48). w20.01 6, абз. 17; 7, абз. 20

Андэ Библия драго пистромэ, кай и лашэ мануша, савэ кандэн лэ Дэвлэс, жувэна вечно пэ ԥув. Но и христианоря, савэ кати ԥэнэн, кай патян андо Христос, адес кадэлэсти на сытярэн (2 Коринфянам 4:3, 4). Андэ бут христиански қандиря росԥэнэн, кай всаворэ лашэ мануша, посли кода, сар мэрэн, жан по нэбо. Но набут мануша Исследователя Библии, савэ в концэ андо 19 вико линэ тэ вимэкэн о журнало «Сторожэво башня» диқэнас пэ када па аврятэ. Кадэла мануша полинэ, кай о Дэл упалэ стерэла о раё пэ ԥув, и милионоря мануша, савэ кандэн лэс, лэна тэ жувэн най по нэбо, ай катэ пэ ԥув. Но трэбуй сас тэ прожал время. Васо? Кай май драго тэ полэн, ко авэна кодэла мануша, савэ кандэн лэ Дэвлэс. И Исследователя Библии кадяжэ полинэ, кай дэсавэ мануша, авэна витиндэ па ԥув, кай тэ правин лэ Иисусоса по нэбо (Откровение 14:3). Кадэла мануша трэбуй сас тэ авэн 144 000 христианоря, савэ анда оди на парашэнас тэ кандэн лэ Иеговас пэ ԥув. w19.09 27, абз. 4, 5