Авӷусто

Шон сама пэ дуй важни гиндоря андэ кадэва псалом: 1) о ԥаримос можэт тэ авэл и кай и мануша, савэ кандэн лэ Иеговас; 2) о Иегова улэл амэндар о ԥаримос. Сар во када терэл? Во поможый амэнди тэ диқас пэ жызня кадя, сар во и исин. Хоть о Иегова обещяет, кай и служэния лэла тэ анэн амэнди радость, но во на дэл ӷарантия, кай амэндэ на авэна проблемы андэ кадэя люма (Ис. 66:14). Во поможый амэнди всегда тэ ритярас андо шэро, со авэла англэ. Важ кода кай андо раё пэ ԥув амэндэ авэла па чачимастэ бахтали жызня, сави никала на кончияпэ (2 Кр. 4:16—18). Ай пока о Иегова кажно дес поможый амэнди тэ на сдаспэ и тэ жувас дальшэ (Плач 3:22—24). Сости амэ сытювас лэ Иеговастирэ служытелёнэндар андэ библейско время и андэ амарэ деса. Кодэлэндэ, ко служый лэ Дэвлэсти, можэт тэ авэл нэожыдано ԥаримос. Но если о мануш надеийпэ по Иегова, о Дэл обязательно виарақэла, сар лэс тэ подритярэл (Пс. 55:22). w23.04 14, 15, абз. 3, 4

О Иосифо и Мария — када райкано примеро, сар тэ кандас лэ властен, дажэ если када неудобно (Лука 2:1—6). Кала и Мария ԥирэлас ужэ девято шон, лэнди лэ Иосифоса прижыляпэ тэ прилэн найвушэро ришэния. О Императоро Авӷусто вимэкля указо пала кода, кай всаворэ андэ Римско империя трэбуй тэ прожан перепись. О Иосифо и Мария трэбуй сас тэ жан андо Вифлеемо. Ай када варикай 150 километроря па буӷроря! На ԥэнэса, кай кадэва дром сас удобно. И Мария и лако хулай моӷли тэ пережывают, на авэла када опасно важ латэ и важ лако бэято? Ай со, если прижалапэ тэ анэн лэ бэятос ворта андо дром? И дума жэ жалас пала лэ Христостири жызня! Погиндона вонэ, кай кадэла маменторя дэн лэнди право тэ на кандэн лэ властен? Дажэ если кай о Иосифо и кай и Мария и сас пережывании, вонэ всаек стердэ па законо. О Иегова блаӷословисардя лэн важ лэндири послушания. О Иосифо и Мария блаӷополучно дожылэ андо Вифлеемо. Вой андя зоралэ шаворэс и поможысардя, кай тэ исполница о библейско пророчество (Мих. 5:2). w23.10 8, абз. 9, 11; 9, абз. 12

Со, если ту полэс, кай тутэ исин бари дар, кай тэ дэс каминтарии пэ собрания? Кацави дар исин бутэндэ. Но всаек, со ту можэш тэ стерэс, кай фартэ тэ на пэрэжываеш? Тоди тути поможыя, если ту лэса драго ӷотовица (Прит. 21:5). Кала ту драго полэс и тема, тоди тутэ авэла смилость тэ ваздэс о вас. Ӷотовь пэско каминтариё, кай во тэ авэл най фартэ лунго (Прит. 15:23; 17:27). Кала амэ дас каминтариё найлунго и пэстирэ алавэнца, амэ сыкавас, кай драго подӷотовились и драго полас и тема. Ай со, если ту прилян кадэла советоря, но всаек дарас тэ дэс май бут, чем ек или дуй каминтарии? Патя, кай о Иегова цэний кода, кай ту анда вся оди када терэс (Лука 21:1—4). Во на мангэл тут тэ терэс май бут, чем ту можэш (Флп. 4:5). Полэ, со па тиро зор, стов англа пэстэ цэль и мангпэ пала спокойство. Варико можэт спэрва тэ стол англа пэстэ цэль тэ дэл ек скурто каминтариё. w23.04 21, абз. 6—8

О Павло сыстосардя амэн лэ воиноса, саво полностью утидо и ӷотово каринг и война. О воино трэбуй тэ авэл ӷотово каринг и война андэ любо маменто. Кадяжэ можно тэ ԥэнас и пала амэндэ. Амэ тожэ аваса ӷотови каринг лэ Иеговаско дес, если ласа пэр пэстэ и саструни жылетка — када вера и любовь. Ай кадяжэ ласа пэр пэстэ о шлемо — амари надежда. И саструни жылетка фэрияс лэ воиноско ди. И вера и любовь фэрий амаро ди и гиндоря. Када поможыя постояно тэ служысарас лэ Дэвлэсти и тэ жас пала Исусо. Если амэндэ исин вера, амэ патяс, кай о Иегова блаӷословия амэн, важ кода кай амаро ди цырдэлпэ каринг лэстэ (Евр. 11:6). Вой побудия амэн тэ ашаспэ предани амарэ Ӷосподиности лэ Исусости, дажэ если амэндэ авэна трудности. И вера поможыя амэнди тэ пэрэандярас о ԥаримос андэ жызня. Амэ можэм тэ сытювас лэ ԥралэндар и лэ ԥэяндар, савэ ашэнаспэ предани лэ Иеговасти, хоть лэндэ сас ԥаримос андэ жызня и трудности лэ ловэнца. Кадяжэ и вера поможыя тэ на ужас лэ шэрэса андо затеримос. Важ када амэнди трэбуй тэ сытювас кодэлэндар, ко стердя вся, кай лэндири жызня тэ авэл май просто, кай тэ стон лэ Дэвлэско царство по пэрво ҭан. w23.06 10, абз. 8, 9

Важно тэ зритярэс пэстирэ гиндоря и кода, со терэс. Када поможыя тэ домардёс пэстирэ цэли, особено тоди, кала найвушэро или на камэлпэ. Сэр, кай тэ зритярэс пэс андэ вас — када ужал андэ лэ свынтонэ духоско плодо. Важ када мангпэ лэ Иеговасти пала свынто духо (Лука 11:13; Гал. 5:22, 23). На аштяр, кай вся авэла идиально. Андэ кадэя люма када просто нэ можэт тэ авэл. Если ту лэса тэ надеиспэ пэ када, тоди никала на домардёса пэстири цэль. Амэндэ можэт тэ на авэл жылания тэ домардювас и цэль, если здэлпэ, кай вой фартэ бари. Если и тутэ кадя, тоди можэш тэ розмарэс пэстири ӷлавно цэль пэ дэсавэ найбарэ. Если ту камэс тэ парувэс варисо андэ пэско характеро, можэш ту спэрва тэ терэс када андэ варисо найбаро? Ай если ту камэс тэ проадинос вся и Библия, можэш ту спэрва тэ адинос по набут? w23.05 29, абз. 11—13

Андэ послидни деса о Иегова через пэстири арӷанизацыя постояно праварэл всаворэн амэн па пэстири мисяйля. Када поможый, кай амэ тэ на сжас па «Свынто дром» (Ис. 35:8; 48:17; 60:17). Можно тэ ԥэнэс, кай кала о мануш соӷласийпэ тэ изучает и Библия, лэстэ появийпэ возможность тэ тердёл по «Свынто дром». Дэсавэ мануша лэн тэ жан пэ кадэва дром, но потом ашавэн лэс. Авэр ришыли тэ на сжан па кадэва дром до конца. Но каринг андярэл кадэва дром? Кодэлэн, ко аштярэл и небесно жызня, о «Свынто дром» андярэл андэ «лэ Дэвлэско раё» по нэбо (Тайна 2:7). Ай кодэла, ко лэла тэ жувэл пэ ԥув, дожана па кадэва дром каринг о совершэнство, кала закончица и Тысячелетнё лэ Христостири правления. Если ту акана жас па кадэва дром, на обдиқпэ палпалэ и на ашав лэс, пока на дожаса до конца — каринг о раё пэ ԥув. w23.05 17, абз. 15, 16; 19, абз. 17, 18

Кала ту гиндос пала вся о лашымос, саво стердя важ тутэ о Иегова, тути на прижалапэ тэ заставис пэс тэ отдэс лэсти пэстири жызня. Ту екжэно закамэса када тэ стерэс (Пс. 116:12—14). Андэ Библия пала Иегова ԥэнэнпэ, кай во Дад, саво дэл «всаворэ лашэ и идеальни подаркоря» (Иак. 1:17). Например, во отдя андэ жэртва пэстирэ Шавэс, лэ Исусос. Кати погиндосар! О выкупо домэкэл тути тэ ашэс пашутно друӷо лэ Дэвлэсти и тэ жувэс вечно (1 Иоан. 4:9, 10). Кала ту отдэса пэстири жызня лэ Иеговасти, кадэлэса ту сыкавэса пэстири блаӷодарность важ кадэва и важ авэр подаркоря, савэ тути дя о Иегова (Втор. 16:17; 2 Кр. 5:15). w24.03 5, абз. 8

Адес бут мануша андярэн пэс май вэрыто и май вэрыто. И кала амэ када диқас, амэндэ по ди кадя жэ, сар кай о Лото, саво кандэлас лэ Дэвлэс. Лэсти «сас ԥарэс лэ ӷрешнонэ миростар, саво бисовисно пэс андярэлас». Важ кода кай во ӷанэнас, кай о небесно Дад вэрыцый кацави дила (2 Пёт. 2:7, 8). О Лото даралас лэ Дэвлэстар и любияс лэс. Када поможыяс лэсти тэ на ашэл кацаво, сар и мануша андэ лэстири время. Адес амэ жувас машкар миро, важ саво лэ Дэвлэско законо почти нисо на ашэл. Но амэ можэм тэ ашаспэ вужэ англа Дэл. Важ када трэбуй тэ пристас зор, кай тэ авэл любовь каринг о Дэл и правильно дар англа лэстэ. Кочай о Иегова дя амэнди и книжка Притчи. Вой поможый тэ терас правильно. Всаворэ христианонэнди, и лэ муршэнди и лэ жувлянди, и лэ ԥурэнди и лэ тэрнэнди, авэла драго тэ погиндон пала годявэрнэ гиндоря анда кадэя книжка. Кала амэ дарас лэ Иеговастар, тоди амэ на ласа тэ зашаспэ пала найлащи дила. w23.06 20, абз. 1, 2; 21, абз. 5

Возможно, тумэндэ исин ԥаримос, важ кода кай пэр тумэндэ тасавэл о родо. Или тумэ бут состар отԥэнделэ, кай тэ жувэн май просто и май бут тэ отдэн время и о зор важ лэ Дэвлэстири дила (Матф. 6:33). Патян, о Иегова шол сама пэ вся, со тумэ важ лэстэ терэн (Евр. 6:10). Можэт, тумэ ужэ полинэ пар пэстэ, сар исполнинпэ лэ Исусостирэ алава: «Кажнонэсти, ко важ мандэ и важ и лащи новость ашадя о цэр, или лэ ԥралэн, или лэ ԥэян, или ла да, или лэ дадэс, или лэ бэятонэн, или пэстирэ маля, дорэсэлапэ акана в 100 раз май бут цэра, ԥрала, ԥэя, дэя, бэяцэ и маля, и инке лэс ӷонина, ай май англэ лэсти дорэсэлапэ и вечно жызня» (Мар. 10:29, 30). О Иегова дэл тумэнди пэ бутэстэ май бут, чем кода, состар тумэ отԥэндён (Пс. 37:4). w24.03 9, абз. 5

Кала андэ Иудея заляпэ баро боқалимос. И христианоря андэ Антёхия «закамлэ тэ поможын лэ ԥралэнди андэ Иудея, ко соса моӷ» (Дила 11:27—30). Хоть и Иудея сас дур, и христианоря андэ Антёхия фартэ камэнас тэ поможын пэстирэ ԥралэнди (1 Иоан. 3:17, 18). Адес амэ тожэ можэм тэ сыкавас, кай анда вся оди жалуисарас амарэ ԥралэн и ԥэян, савэ попэлинэ андэ бида. Амэ сразу камас варисо тэ терас. Например, амэ ԥэнас лэ барэдэрэ ԥралэнди, кай ӷотови тэ поможысарас, терас пожэртвовании или мангаспэ пала кодэла, ко пострадал. Лэ ԥралэнди и лэ ԥэянди, можэт, дажэ авэла трэбуй само нэобходимо. Ӥто амаро Царё, о Христос Исус, авэла, кай тэ исполнит лэ Дэвлэско приӷоворо важ кадэя люма. Сар дэ важно, кай андэ кодэя время во тэ диқэл, кай амэ анда вся оди жалуисарас амарэ ԥралэн и ԥэян. Тоди во ԥэнэна амэнди: «Получин о Царство» (Матф. 25:34—40). w23.07 4, абз. 9, 10; 6, абз. 12

Сар и лэско дад, о Исусо сас блаӷоразумно. О Иегова бишалдя лэс тэ проповедует лэ «хасардэ бакрорэнди андо Израилё». Но кала во кадя терэлас, о Исусо сас блаӷоразумно. Еқвар и найизраильтянка ля фартэ тэ мангэл лэс тэ исцэлий латиря щя, савя фартэ мучинас и найвужэ. О Исусо анда оди жалуисардя кадэла манушня и исцэлисардя латиря щя (Матф. 15:21—28). Ай акэ авэр примеро. Кала о Исусо сытярэлас лэ апосталонэн, во ԥэндя: «Ко англа миро отԥэндёла мандар, мэ отԥэндювава лэстар» (Матф. 10:33). Но отԥэнделя о Исусо лэ Петростар, саво тривар ԥэндя, кай на ӷанэн лэс? Най. Во диқля лэстири вера и кай во каийпэ. Посли кода, сар о Исусо жунделя, во авеля каринг о Пётро и, май ӥто всаворэстар, ԥэндя, кай любий лэс и простий (Лука 24:33, 34).О Иегова и о Исусо блаӷоразумни. Ай со можно тэ ԥэнас пала амэндэ? О Иегова камэл, кай амэ тэ авас блаӷоразумни. w23.07 21, абз. 6, 7

О Иегова доԥэндя, кай пэ ԥув чаче авэла раё. Сар? Пэрво, во екжэно ԥэнэн пала када. Андэ книжка Свынто тайна ԥэнэнпэ: «Кодэва, ко бэшэл по троно, ԥэндя: „Мэ терав вся нэво!“». Кай о Дэл исин мудрость, зор, и во камэл тэ зритярэл пэско алав. Дуйто, о Иегова ԥэнэн пала кода, со авэла англэ кадя, кабута во ужэ када стердя. Акэ васо во ԥэндя: «Кадэла алава чачунэ и лэнди исин патяимос» и «Вся ашэля кадя, сар сас ԥэндо!» Трито, если о Иегова лэлпэ тэ терэл варисави дила, во вся и время достерэл ла, важ када во ԥэнэн пэр пэстэ «Альфа и Амега» (Тайна 21:6). О Иегова доԥэнэна, кай о Сатана хохавно и кай во нэ можэт тэ тердярэл лэ Дэвлэс тэ зритярэл пэско алав. Важ када, если лэна тэ росԥэнэн пала лэстирэ обещянии аврэ манушэнди, вонэ моӷут тэ ԥэнэн: «Када вся сказки». Тоди заадиносар лэнди Свынто тайна 21:5, 6 и обиснисар. Сыкав, кай о Иегова драго доԥэндя, кай зритярэла пэстирэ алава, посли лэндэ во кабута стодя пэстири роспись (Ис. 65:16). w23.11 7, абз. 18, 19

Кадэя солах о Иегова дя лэ Авраамости, кала лэсти сас 75 бэрш и лэстэ на сас бэяцэ. Диқля о Авраамо, сар о Иегова зритярдя кадэя пэстири обещяния? Да, но най вся. Посли кода, сар во пэрэжыля и лэн Ефрато, прожылэ инке 25 бэрш, и кати тоди лэстэ арақаделяпэ шаво, Исако. Када сас па чачимастэ чуда. Инке через 60 бэрш арақаделэпэ лэстирэ внукоря о Исаво и о Иаково (Евр 6:15). Но о Авраамо кадя и на диқля, сар лэстирэ потомкоря ашэлэ ашунглэ народоса и линэ тэ хулаин пэ Обетовано ԥув. Но всаек, пока сас жундо, во на парашэлас пашэ тэ дружый лэ Иеговаса (Иак. 2:23). Ай кала о Авраамо жундёла, во уӷанэна, кай через лэстири вера и терпения сас блаӷословлёни всаворэ народоря пэ ԥув (Быт. 22:18). Сар жэ во тоди авэла радо! Сости амэ сытювас? Амэ тожэ най сразу диқаса, сар о Иегова зритярэла варисави лэстири обещяния. Но если амэ терпеливи, сар о Авраамо, тоди можэм тэ патяс, кай о Иегова блаӷословия амэн ужэ акана, ай андо раё пэ ԥув дэла амэнди инке май бут лашымос (Мар. 10:29, 30). w23.08 24, абз. 14

Андэ тэрнэ бэрша о царё Узия сас найӷордо и лэстэ сас бари патив и дар англа Дэл. Во прожудя 68 бэрш и май бут анда кадэла бэрша о Иегова блаӷословияс кадэлэ царёс (2 Лет. 26:1—4). О Узия бут разоря победияс лэ вороӷонэн, савэ сас кай и Иудея, ай кадяжэ позаботисайля, кай о Иерусалимо тэ авэл драго фэрисардо (2 Лет. 26:6—15). Во бут сости домарделя блаӷодаря лэ Дэвлэсти. И наверно, кала о Узия гиндояс пала када, лэско ди фартэ лошавэлас (Эккл. 3:12, 13). Но о царё Узия присытеля тэ приԥэнэн аврэнди, со тэ терэн. Можэт через када во ля тэ гиндой, кай акана можэт тэ терэл вся, со камэл. Еқвар о Узия тердя па пэстирятэ. Во зажыля андэ лэ Иеговаско храмо, кай тэ сԥабарэл о фимиамо. Ай лэ царёнэнди нащи сас када тэ терэн (2 Лет. 26:16—18). О ӷлавно рашай о Азария закамля тэ тердярэл лэс, но о Узия фартэ росхоляйля. Жы каринг кадэва маменто о Узия на парашэлас тэ кандэл лэ Дэвлэс. Но акана во вся римосардя и ашэля прокажоно (2 Лет. 26:19—21). Лэстири жызня авелоп совсем авэр, если бы во вся и время авелоп найӷордо. w23.09 10, абз. 9, 10

О Дэл витидя лэ апосталос лэ Петрос, кай во тэ правий лэ Исусоса по нэбо. Но через када о Пётро на ашэля сразу идеально. Андо 36 бэрш н. э. во диқля, сар о свынто духо сжыля по Корнилиё, саво сас най обшындо и найевреё. Через када драго дицэля, кай о Дэл всаворэнца обжалпэ еқэндар, и кай и мануша анда авэр народоря моӷут тэ ашэн христианоря (Дила 10:34, 44, 45). Посли када о Пётро моӷ спокойно тэ хал кацавэ манушэнца, хоть раньшэ во када на тердоп. Но дэсавэ христианоря, савэ сас евреёря, гиндонас, кай лэнди нащи тэ хан лэ манушэнца анда авэр народоря. Кала кодэла, ко кадя гиндонас, авелэ андэ Антиохия, о Пётро ля тэ дурёл пэстирэ ԥралэндар, савэ на сас евреёря. Во андярдя пэс кадя, важ кода кай даралас тэ холярэл лэ христианонэн анда евреёря. О апостало Павло диқля кацави лицымерия и англа всаворэ стердя лэ Петрости выӷоворо (Гал. 2:13, 14). Но хоть о Пётро шылисайля, во всаек терэлас вся, кай верно тэ служый лэ Иеговасти. w23.09 22, абз. 8

Барэдэр ԥрала, ӷотови тумэ и май дур тэ андярэн лэ Иеговастирэ бакрорэн и анда вся оди пала лэндэ тэ заботинпэ? Кала задэс кадэла вопросоря пэсти, дэ чачуно атвето. Кадя ту полэса, андэр со трэбуй тэ парудёс. На умэк и вас! Амаро добро Ӷосподино поможыя тути тэ парудёс (1 Пёт. 2:3). О апостало Пётро ԥэндя амэнди: «О Дэл екжэно поможыя тумэнди андэ вся тэ досытён. Во састярэла тумэн» (1 Пёт. 5:10). Варикала кай о Пётро сас андо ди кацаво, кай во недостойно тэ авэл паша лэ Дэвлэско Шаво (Лука 5:8). Но блаӷодаря кодэлэсти, кай о Иегова и о Исусо лэс подритярдэ, во на здяпэ и на парашэля тэ пристол вся пэско зор, кай тэ жал пала Христос. Лэ Петрости випэля бари бах тэ авэл «андо вечно Царство амарэ Барэ Хуласко и Спасителёско лэ Исусоско лэ Христоско» (2 Пёт. 1:11). Если ту сытёс кай о Пётро тэ на здэспэ и домэкэс, кай о Иегова тут тэ сытярэл, о Дэл дэла тути вечно жызня. Тутэ вижала «через пэско патяимос... тэ домард[ёс] и спасения» (1 Пёт. 1:9). w23.09 30, абз. 14; 31, абз. 16, 17

Дэлмут круӷом свынто катуна сас града — када заӷородимэ тиритория, кай и рашая терэнас пэстири рашаицко дила. Котэ сас баро харкумуно жэртвенико важ и жэртвы, ай кадяжэ харкумуно тазо лэ паеса. Кадэлэ паеса халадёнас и рашая англа кода, сар тэ лэн тэ терэн пэстири служэния (Исх. 30:17—20; 40:6—8). Адес лэ Исусостирэ избрани ԥрала, савэ жувэн пэ ԥув, предано служын андэ внутренё града андо духовно храмо. О баро тазо лэ паеса напоминает лэнди кадя жэ, сар и всаворэ аврэ христианонэнди, кай трэбуй тэ ашэнпэ нравствено и духовно вужэ. Ай со можно тэ ԥэнас пала «баро ӷурто» манушэн? Кай вонэ служын лэ Дэвлэсти? О апостало Иоано диқля, кай вонэ «тердёнас англа троно». Када сыкавэл и внешнё града андо духовно храмо, кай вонэ «терэн важ [о Дэл] и дила о дес и рят» (Тайна 7:9, 13—15). Сар жэ амэ блаӷодарни лэ Иеговасти, кай во дя амэнди честь тэ тэлювас лэсти андэ лэско баро духовно храмо! w23.10 28, абз. 15, 16

О Иегова можэт тэ подритярэл амэн через и барэдэр ԥрала (Ис. 32:1, 2). Важ када, если тумэ пала варисо пережываете, подэн дума барэдэрэ ԥралэнца андэ пэстири собрания. Ай кала вонэ камэн тэ поможын, на отԥэндён, авэн блаӷодарни важ када и прилэн кадэя помощь. Кадя о Иегова дэла тумэнди зор. И надежда пала вечно жызня андо раё пэ ԥув или андо небесно Царство, важ сави ԥэнэнпэ андэ Библия, придэл амэнди зор (Римо 4:3, 18—20). Через кацави надежда амэндэ исин зор тэ виритярас о ԥаримос, тэ росԥэнас и лащи новость и тэ терас разно дила андэ собрания (1 Фес. 1:3). Кадэя жэ надежда — и надежда пэ вечно жызня — подритярэлас лэ Павлос. О апостало Павло ԥэндя, кай пэр лэстэ тасавэн, приследуют и кай во на ӷанэн, со тэ терэл. Дэкала во дажэ чуть на мулясас (2 Кр. 4:8—10). Кай о Павло сас зор тэ виритярэл о ԥаримос, важ кода кай во бут гиндояс пала пэстири надежда (2 Кр. 4:16—18). Во цэнияс пэстири возможность тэ жувэл вечно по небо. О Павло гиндояс пала кадэя надежда, и када дэлас лэсти зор. w23.10 15, 16, абз. 14—17

Кала тумэ мангэнпэ, пушэн пэстар: «Акана вой и время, кай о Иегова тэ стерэл кода, пала со мэ мангав?» Возможно, амэ камас, кай о Иегова тэ дэл ответо сразу, но во май драго ӷанэн, андэ сави время када тэ стерэл (Евр. 4:16). Если амэ на получисарас сразу кода, со камас, тоди амэнди можэт тэ здэлпэ, кай о Иегова ԥэнэн амэнди «най». Но, возможно, о Иегова ԥэнэн: «Набут поаштяр». Например, прецтавьте пала тэрно ԥрал, саво камэлас тэ улэл пэско насвалимос. Но лэско зор на ашэл май фэдэр. Если о Иегова тэ стерэл чуда и тэ улэл лэстар о насвалимос, тоди о Сатана обязательно шола лэ Иеговасти када пэ яқа. Во лэсти ԥэндоп, кай о ԥрал служый лэсти кати важ кода, кай о Иегова виличисардя лэс. О Иегова ужэ стодя и время, кала улэла вся о насвалимос лэ манушэндар (Иов 1:9—11; 2:4). Ай жы каринг кадэва маменто амэ нэ можэм тэ аштярас, кай авэна чудеса, кай всаворэндэ авэла лашо зор (Ис. 33:24; Тайна 21:3—4). Важ када о ԥрал можэт тэ мангэл лэ Иеговастар пала зор и спокойство по ди, кай тэ на здэлпэ и тэ на парашэл тэ борийпэ пэстирэ насвалимаса и верно тэ служый лэ Дэвлэсти. w23.11 24, абз. 13.

О Самсоно фартэ шылисайля, но во на здяпэ. Во всаек всаворэ́ одеса камэлас тэ терэл и дила, сави лэсти дя о Дэл (Суд. 16:28—30). Важ када во мангля лэ Иеговас: «Домэк тэ рисарав лэ филистимлянонэ́нди». О чачуно Дэл ответил лэсти пэ молитва и каринг о Самсоно рисайля лэско необычно зор. И вижыля, кай пэ кадэва разо о Самсоно умардя май бут филистимлянонэн, чем важ вся пэстири жызня. Хоть о Самсоно потиндя бари цэмин важ пэстири ошыбка, во всаек камэлас тэ терэл кадя, сар камэл о Иегова. Кадя жэ сар и амэ. Если амэ шылисавас и амэнди дэн совето или дажэ хасарас и почотни обязаности, амэнди нащи тэ здаспэ. Сэрэн, кай амаро небесно Дад ӷотово тэ простий (Пс. 103:8, 9). Дажэ если амэ раньшэ шылисавасас, о Иегова можэт тэ дэл амэнди нэви задания и зор, сар лэ Самсоности. w23.09 6, абз. 15, 16

Если амэ ашаспэ састэ, када поможый амэнди тэ авас уӷодни лэ Дэвлэсти. Хэба лэ Иеговасти чалёл, кала амэндэ исин ԥаримос? Канешно, най. Но во лошавэл, кала амэ на парашас лэс тэ кандас, дажэ андэ ԥари время. Имено кадя амэ уӷодисарас лэ Дэвлэсти. Сар дэ драго тэ полас, кай о Иегова абурой амэнца, кала амэ виритярас о ԥаримос! (Пс. 5:12). Погиндон пала Авраамо. Лэстэ сас баро ԥаримос, но во драго лэс виритярдя. Важ када о Иегова ԥэндя, кай во лэско друӷо и прижангля лэс найдошалэса (Быт. 15:6; Римо 4:13, 22). Наверно, ту тожэ камэс, кай о Дэл тэ ԥэнэн када и пала тутэ. Хэба када возможно? Да, амэ можэм тэ уӷодисарас лэ Дэвлэсти. Када дицол най па кода, савэ задании амэндэ исин и сар дэ бут амэ терас андэ служэния. Важ о Дэл важно, кай амэ тэ на парашас лэс тэ кандас дажэ андэ ԥари время. Тэ ашэлпэ састо андо ԥаримос можэт кажно мануш. Пэ када не влияет, сави лэстэ ситуацыя андэ жызня, скати лэсти бэрш и савэ лэстэ способности. Исин тутэ акана варисаво ԥаримос? Ӷан, о Иегова диқэл, кай ту на парашэс лэс тэ кандэс. Кала амэ драго полас, кай андярас пэс кадя, сар чалёл лэ Дэвлэсти, када поможый састэс тэ патяс, кай во амэнца довольно. Ай када сыкавэл, кай амэндэ точно авэла лашымос лэ Дэвлэстар. Кадя амари надежда ашэл май састи. w23.12 11, абз. 13, 14

И христианоря трэбуй тэ ӷанэн драго тэ дэн дума аврэнца. Вонэ трэбуй тэ авэн внимательни каринг авэр и драго лэн тэ виашунэн (Прит. 20:5). Важ када ԥрал трэбуй тэ сытёл тэ шол сама пэ кода, сар о мануш андярэл пэс, кала дэл дума, саво лэстэ муй и тоно андэ кодэва маменто. Кай када тэ полэс, трэбуй тэ проандярэс и время лэ манушэнца. Но если ту кати общаешься через и сообщении, тути авэла трудно тэ дэс дума лэ манушэса, кала диқэсапэ лэса. Отстов о телефоно и родэ возможность тэ подэс дума лэ манушэса лично (2 Иоан. 12). Кадяжэ, о христианино, савэстэ лащи дружба лэ Иеговаса, трэбуй тэ ӷанэн тэ затерэл и ловэ, кай тэ проправарэл пэс или пэстирэ ерес (1 Тим. 5:8). Тэ висытёс пэ варисави спецыальность андэ тэрнэ бэрша — када фартэ драго. Када поможыя потом тэ арақэс бути (Дила 18:2, 3; 20:34; Еф. 4:28). Анда вся оди тер и бути и присытюв вся и время тэ дотерэс кода, пала со лянпэ. Тоди пэр тутэ ԥэнэна, кай ту надёжно мануш. Ай кацавэ мануша фартэ трэбуй пэ бути. w23.12 27, абз. 12, 13

Кала андэ Библия ԥэнэнпэ пала «лэ Иеговаско дес», и дума жал пала время, кала о Всемоӷущё Дэл сындой пэстирэ вороӷонэн и спасый пэстирэ служытелёнэн. Андэ дэлмутни время о Иегова сындояс дэсавэ народонэн (Ис. 13:1, 6; Иез. 13:5; Соф. 1:8). Андэ амари время «лэ Иеговаско дэс» залэлапэ, кала и мануша дэна по Вавилоно Велико и закончица кодэлэса, кала авэла о Армагидоно. Кай тэ спасысавас андэ кодэва «дес», трэбуй тэ авас ӷотови ужэ акана. О Исусо сытярэлас, кай амэнди трэбуй вся и время тэ авас ӷотови каринг и бари бида (Матф. 24:21; Лука 12:40). О апостало Павло андэ 1 Фессалоникийцам ԥэндя пала примероря, савэ поможына лэ христианонэнди тэ авэн ӷотови каринг лэ Иеговаско сындо. О Павло полэлас, кай лэ Иеговаско дес авэла най ӥто (2 Фес. 2:1—3). Но во всаек ԥэнэнас лэ ԥралэнди и лэ ԥэянди, кай вонэ тэ авэн ӷотови каринг кадэва дес, сар бута во авэла тэся. Амэ тожэ можэм тэ прилас о совето лэ Павлоско. w23.06 8, абз. 1, 2

В концэ андэ 1970-ти бэрша андо Токио построисардэ небоскрёбо, андэ саво 60 этажоря. И мануша гиндонас, сар во виритярэла и землетрясении, савэ котэ часто терэнпэ. Но васо кадэя здания сас састи? И инжэнероря стердэ кадя, кай кадэя здания еқа ригатар тэ авэл састи, ай авря ригатар — гибко, кай тэ виритярэл и землетрясении. И христианоря шонпэ пэ кацаво небоскрёбо. Сар када? О христианино трэбуй тэ ӷанэн, кала тэ авэл састо, ай кала гибко. Во трэбуй тэ на парашэл тэ патял, кала и дума жал пала лэ Иеговастирэ законоря. Во ӷотово тэ кандэл и на жал пэ уступки. Авря ригатар, во трэбуй тэ авэл годявэрно, или гибко, кала када возможно — и особенно кала када трэбуй (Иак. 3:17). О христианино, савэстэ вижал кадя тэ терэл, лэла тэ андярэл пэс годявэрнэс. Во на авэла фартэ строӷо или черезчур ковло. w23.07 14, абз. 1, 2

О Исусо трэбуй сас тэ виритярэл о ԥаримос, саво подшолас о Сатана. Кадэва вороӷо дажэ ворта ԥэндя лэсти, кай во тэ придэл лэ Дэвлэс (Матф. 4:1—11). О Сатана пристолас вся пэско зор, кай тэ заставий лэ Исусос тэ стерэл бэзэх. Если лэстэ када тэ вижылоп, о Исусо не смоӷ бы тэ потинэл о выкупо. Кала о Исусо ля тэ служый, о ԥаримос лэс на ашавэлас. И вороӷоря тасавэнас пэр лэстэ и най еқвар камэнас тэ умарэн лэс (Лука 4:28, 29; 13:31). Лэсти трэбуй сас тэ тэрпий кода, кай лэстирэ ученикоря шылинаспэ (Мар. 9:33, 34). Кала лэ Исусос сындонас, лэстар издевались и приасанаспэ. Лэстири смэрть сас фартэ ԥари и позорно (Евр. 12:1—3). Ай о послиднё ԥаримос лэ Исусости прижыляпэ тэ пэрэжувэл екжэнэсти, би лэ Иеговаско (Матф. 27:46). Чаче, лэ Исусости прижыляпэ тэ пэрэжувэл бут ԥаримос, кай тэ потинэн о выкупо. Кала амэ гиндосарас, пэр со во жыля важ амэндэ, амэ ашас анда вся оди май блаӷодарни и май фартэ любисарас лэс. w24.01 10, 11, абз. 7—9

Через и терпения амэнди май вушэро тэ ладисарас аврэнца. Вой поможый драго тэ виашунас, кала амэнди варисо росԥэнэн (Иак. 1:19). Кадяжэ и терпения поможый, кай тэ авэл мирно. Ай инке через и терпения амэ спэрва гиндосарас, ай потом дас дума. Тоди дажэ андэ фартэ ԥари ситуацыя амэ на ԥэнаса варисо найлашо. Кадяжэ, если амэ терпеливи, амэ на захолявас, кала варико ԥэнэн или терэл кода, состар амэнди ашэл ԥарэс. Амэ на рисарас пала пэстэ. Вместо када амэ терас кадя, сар пистромэ андэ Библия: «Старыинпэ сар исин тэ прилэн ек еқэско характеро и анда ди простин ек еқэс» (Клс. 3:12, 13). Если амэ терпеливи, када дицола па амарэ ришэнии. Вонэ авэна пэ бутэстэ май лашэ. Амэ на ласа тэ грабисавас или тэ терас варисо, если драго на погиндосардям. Амэ роздиқаса всаворэ варианторя и приласа со май лащи ришэния. Например, амэ родас бути. Можэт, амэ ӷотови тэ витидас любо бути. Но если амэ терпеливи, амэ погиндосараса пала кода, сар кадэя бути повлияет пэ амаро ери и пэ амари дружба лэ Иеговаса. Если амэ терпеливи, амэ на ласа тэ хас и куя́ через кода, кай прилям най кодэя ришэния. w23.08 22, абз. 8, 9

Кала тумэ полэн, кай оди цырдэл каринг о найлашымос, тумэндэ моӷут тэ умэкэнпэ и вас. Но на здэнпэ! Сэрэн пала алав, саво тумэ динэ лэ Иеговасти, када поможыя тумэнди тэ на подэнпэ лэ бэзэхэсти. Сар када тэ полас? Кала тумэ отдинэ пэстири жызня лэ Иеговасти, тумэ отԥэнделэ пэстар. Возможно, раньшэ тумэ камэнас варисо важ пэстэ и тумэндэ сас цэли, савэ на чалёнас лэ Иеговасти (Матф. 16:24). Важ када андэ ԥари ситуацыя акана тумэнди на трэбуй тэ витидэн, со тэ терэн. Тумэ ужэ витидэ важ пэстэ ек дром — тэ на парашэн тэ служын лэ Иеговасти, и анда вся оди камэн тэ радуин лэс. Тумэ авэна кацавэ жэ састэ, сар о Иово. Лэстэ сас фартэ баро ԥаримос, но во ԥэндя: «Ашавапэ вужо англа Дэл!» (Иов 27:5). w24.03 9, абз. 6, 7

О Иегова амэнца, во «Дэл, саво любий» (2 Кр. 13:11). О Иегова шол сама кажнонэс андар мэндэ. Во отдэл важ амэндэ пэско ди (Пс. 32:10). Кала амэ гиндосарас пала када, амэ ашас инке май пашэ каринг лэстэ и май фартэ лэсти патяс. Амэ можэм смило тэ мангаспэ лэсти и тэ ԥэнас, кай амэнди трэбуй лэстири любовь. Амэ можэм кадяжэ тэ росԥэнас пала пэстирэ пережывании и тэ патяс, кай во амэн полэла и обязательно дэла зор (Пс. 145:19). Андо шудро дес камэлпэ май ӥто тэ авэс котэ, кай тато. Кадя жэ приятно тэ пашос каринг о Иегова, савэстар жал о татимос через лэстири любовь. Лэстири любовь бари, во глаба пала амэндэ. Сави дэ бари бах тэ ӷанас, кай о Иегова амэн любий. Давайте кадя жэ, сар о псалмопевцо, ԥэнаса: «Мэ любисарав лэ Иеговас!» (Пс. 116:1). w24.01 31, абз. 19, 20

О Исусо най просто ԥэнэнас лэ манушэнди, кай лэ Дэвлэс ақарэн Иегова. И евреёря, савэн во сытярэлас, ужэ и кадя пала када ӷанэнас. Но о Исусо поможыяс лэнди май драго тэ уӷанэн лэ Дэвлэс (Иоан. 1:17, 18). Например, кала и мануша адинонас и Еврейски Лила, вонэ моӷли тэ уӷанэн, кай о Иегова полэл и анда вся оди жалуий лэ манушэн (Исх. 34:5—7). Кай май драго када тэ полэн, о Исусо росԥэндя и притча пала шаво, саво ужыля цэрал. Кала о дад дурал додиқля пэстирэ шавэс, саво каисайля, во прастая каринг лэстэ, обля лэс и анда вся оди простисардя. Кала амэ адиносарас пала када, амэ лэ одеса можэм тэ полас, пэскати дэ фартэ о Иегова полэл лэ манушэн и жалуий лэн (Лука 15:11—32). О Исусо сыкадя лэ манушэнди, саво па чачимастэ лэско Дад. w24.02 10, абз. 8, 9

О Иегова дэл зор и подритярэл кодэлэн, касти када трэбуй. Сар амэ можэм тэ терас кадя, сар о Иегова? Тэ жалуисарас анда вся оди и тэ подритярас аврэн. Кадэлэсти трэбуй тэ сытювас, кай анда ди када тэ терас. Кай тэ на парашас кажно дес тэ подритярас ек еқэс, амэнди трэбуй тэ заботисавас пала авэр и тэ полас, со лэндэ по ди (Клс. 3:12; 1 Фес. 4:18; 1 Пёт. 3:8). Со май фартэ жалуисарас, заботисавас и полас кодэлэн, касти ԥарэс, со май фартэ амэ камаса тэ подритярас лэн. О Исусо ԥэндя: «Со кай о мануш андо ди, пала кода во и дэл дума. О лашо мануш гаравэл андэ пэско ди лашымос, и лэстар жал о лашымос» (Матф. 12:34, 35). Кала амэ подритярас лэ ԥралэн и лэ ԥэян, савэ пэрэандярэн о ԥаримос, кадя амэ сыкавас, кай вонэ куч амарэ одести. w23.11 10, абз. 10, 11

Кай тэ полас и библейски пророчества, амэнди трэбуй помощь. Роздиқам ек примеро. Прецтавь, кай ту авелян интя, кай никала на санас. Но драго, кай ту най екжэно. Вмести туса лагля о друӷо, саво драго ӷанэн кодэва ҭан. Во точно ӷанэн, кай тумэ щяс и каринг андярэл кажно дром. О Иегова шолпэ пэ кацаво друӷо. Во ӷанэн, андэ сави время амэ жувас и со амэн аштярэл англэ. Вижал, кай тэ полас и библейски пророчества, амэ трэбуй смирено тэ мангас лэ Иеговастар помощь (Дан. 2:28; 2 Пёт. 1:19, 20). Всаворэ родителя камэн, кай лэндирэ бэяцэ тэ авэн бахталэ. О Иегова имено кацаво Дад (Иер. 29:11). Но о Дэл най сар и мануша. Во можэт точно тэ росԥэнэн, со авэла англэ (Ис. 46:10). w23.08 8, абз. 3, 4