Мэ виарақлэм врачос, саво исцэлия всаворэ болезни!

Мэ арақаделэм андо 1941 бэрш андо Парижо. Мэрно ери жувэлас найбарвалэс. Манди фартэ чалёлас тэ сытював, но кала манди сас 10 бэрш мандэ виарақлэ туберкулёзо. Мэ нэ моӷ тэ ԥирав андэ школа, и кадэлэстар манди сас фартэ ԥарэс. Кай мэрнэ лёӷки тэ виличинпэ, и врачоря ԥэндэ манди тэ пашлював. Важ кадэла шона мэ адиносаравас о словарё и ашунавас па радио и передачи анда Парижско университето. Кала и врачоря ԥэндэ, кай акана мэ зорало и моӷу упалэ тэ ԥирав андэ школа, мэ радостятар лэм тэ хукав жы каринг о потолко. Тоди мэ погиндосардэм, кай и врачоря — када па чачимастэ суперӷероёря. Кадэла времятар мэ фартэ закамлэм тэ лечисарав лэ манушэн, и кажно разо, кала мэрно дад пушэлас, соса мэ камав тэ залавпэ, мэ ԥэнавас: «Камав тэ авав врачо». Кадя мэ полюбисардэм и медицына.

ЧЕРЕЗ И НАУКА МЭ АШАВ МАЙ ПАШЭ КАРИНГ О ДЭЛ

Мэрно ери сас католикоря, но пала Дэл мэ почти нисо на ӷанавас. Мандэ сас бут вопросоря, пэ савэ мэ нащи виарақавас атветоря. Кати тоди, сар мэ жылэм тэ изучаю и медицына андо университето, мэ лэм тэ диқав, кай и жызня на появисайля корко пэстар.

Сэрав, сар мэ пэрво разо тала микроскопо роздиқавас о тюльпано. Мэ удивисайлэм, сар и клетки фэринпэ андэ бари и низко температура. Инке мэ диқавас, сар и цитоплазма (вещество андэ клетка) стидэлпэ, сар пэр латэ тэ шон лон, но если ла тэ стон андо вужо паи, вой упалэ ашэл май бари. Вся када поможый, кай и разни орӷанизморя тэ присытён, если варисо парудёлпэ андэ природа. Кала мэ диқавас, пэ скати дэ сложно стерди кажно клетка, мэ полавас, кай и жызня нэ моӷла тэ появийпэ корко пэстар.

По дуйто бэрш андо университето мэ уӷанглэм инке май бут доказательства, кай о Дэл исин. Пэ анатомия амэ изучали лэ манушэстири тила. Например, блаӷодаря кодэлэсти, сар стерди амари предплечья, сави жал ла палматар жы каринг и куй, амэ можэм тэ сӷинаем и тэ розӷинаем амарэ ная. И мышцы, и связки и сухожылии стидэ машкар пэстэ фартэ удивительно! Мэ уӷанглэм, кай ек сухожылия цырдэлпэ еқа мышцатар анда предплечья каринг и дуйто кокали андо най. Кадэя сухожылия делийпэ пэ дуй пэрнорэ и, ԥэнэса, терэл мостико, тала саво прожал авэр сухожылия, сави цырдэлпэ каринг и вунди. И сухожылии плотно ритярдёнпэ пэ кокаля. Тэ авелоп када най кадя, тоди амарэ ная авелоп соӷнути, сар о луко, ай и сухожылии натянути, сар и тетива. Важ мандэ сас вся понятно: лэ манушэстири тила придумал па чачимастэ гениё!

Инке май фартэ мэ патяем андо Создателё, кала уӷанглэм, сар о бэято лэл тэ ԥурдэл посли кода, сар авеля пэ люма. Пока о бэято находийпэ андо ӥло кай пэсти дэй, лэсти на трэбуй тэ ԥурдэл, важ кода кай о кислородо лэсти пэрэдэлпэ па пуповина. Андэ кодэя время андэ альвеолы (цынёне пузырики андэ лёӷки) пока нинай воздухо. Важ дэсавэ курте, сар о бэято тэ арақадёлпэ, андрэ пэ альвиолы появийпэ ек вещество, пэ саво ԥэнэн сурфактанто. И акэ, кала о бэято появийпэ пэ люма, терэлпэ варисо удивительно: и отверстия андэ лэ бэятоско ди ԥандадёл, и о рат лэл тэ жал андэ лёӷки. Андэ кадэва маменто о сурфактанто на дэл, кай и альвиолы тэ склеинпэ, и вонэ ӥто ԥэрдён лэ воздухоса. Почти сразу о бэято лэл тэ ԥурдэл екжэно!

Мэ закамлэм тэ уӷанав лэ Создателёс, саво вся кадя удивительно стердя, и важ када мэ лэм тэ изучаю и Библия. Мэ дэм наздив, кала адиносаравас и законоря пала гигиена, савэ о Дэл дя лэ израильтянонэнди май бут, чем 3 000 бэрш палпалэ. Например, и израильтяноря трэбуй сас тэ заӷанавэн пала пэстэ, кала сԥирдэ, тэ халадён и тэ стон по карантино кодэлэн, кастэ исин заразно насвалимос (Лев. 13:50; 15:11; Втор. 23:13). Андэ Библия сас дэлмут запистромэ пала када, но кати 150 лет палпалэ и учони уӷанглэ, сар розжанпэ и болезни. Кадяжэ мэ шутэм сама пэ законоря андэ книӷа Левит, андэ савэ росԥэнэнаспэ пала интимно гигиена (Лев. 12:1—6; 15:16—24). Через кадэла законоря вся о народо ашэласпэ зорало. Мэ полэм: о Создателё дя кадэла законоря лэ израильтянонэнди, важ кода кай заботияспэ пала лэндэ. Если о народо тэ ритярдоп о законо, када андоп лэнди польза. Мэ диқлэм бут доказательства, кай и Библия лэ Дэвлэстар. Но мэ пока на ӷанавас, сар ақарэн лэ Дэвлэс.

САР МЭ ЖЭНИСАЙЛЭМ И ВИАРАҚЛЭМ ЛЭ ИЕГОВАС

Кала мэ сытювавас андо университето, мэ шутэм сама пэ ек шукарни ракли, савя ақарэнас Лиди, и вой манди фартэ чалеля. Андо 1965 бэрш, кала мэ инке сытювавас, амэ пожэнисайлям. Каринг о 1971 бэрш амэндэ сас ужэ трин бэяцэ. Потом арақаделэпэ инке трин. И Лиди всегда сас важ мандэ лащи помошница — най кати андо ери, но и андэ бути.

Мэ теравас трин бэрш андэ больница, ай потом ԥэрнадэм пэстири клиника. Еқвар мандэ авеля ек пара, пала сави мэ ужэ ԥэндэмас. Кала мэ випистросаравас лэнди и драба, и манушни ԥэндя: «Мангав, кай андо драб тэ на авэл рат». Мэ удивисайлэм и пушлэм: «Чаче? Васо?». Вой ԥэндя: «Амэ лэ Иеговастирэ свидетеля». Ай мэ вобще ни еқвар на ашундэм пала свидетеля, и сар вонэ относинпэ каринг о рат. Тоди кадэя манушни ԥэрнадя и Библия и пар латэ сыкадя, васо вонэ лэ хуласа отԥэндёнпэ лэ ратэстар (Деян. 15:28, 29). Потом вонэ сыкадэ манди, сави жызня авэла, кала правия лэ Дэвлэско Царство: кай на авэла ԥаримос, насвалимос и смэрть (Отк. 21:3, 4). «Со, чаче?! Да када жэ сас мэрни децко мечта! Мэ ашэлэм врачо, кай тэ поможысарав лэ манушэнди». Амэ кадя драго дям дума, кай мэ дажэ на шутэм сама, сар провуряйлэ 1,5 часа. Кала вонэ ужылэтар, андо ди мэ ужэ на сымас католико. Инке мэ уӷанглэм, кай лэ Создателёстэ исин алав — Иегова!

Инке тривар мэ диқлэмаспэ кодэлэ ереса андэ мэрни клиника. И кажно разо амэ дасас дума май бут часостар. Мэ ақардэм лэн пэстэ цэрэ, кай амэ май бут тэ подас дума пала Библия. Хоть спэрва и Лиди сас соӷласно тэ изучает и Библия, вой на камэлас тэ прижанэн, кай и католическо вера нэправильно росԥэнэн кода, со пистромэ андэ Библия. Важ када мэ ақардэм лэ рашас анда катутни қандири. Амэндэ сас ек условия: тэ дас дума кати па Библия. Амэ продям дума жы рятятэ. Посли кадэя дума и Лиди драго поля, кай лэ Иеговастирэ свидетеля сытярэн лэ чачимасти. Кодэла времятар амари любовь каринг о Иегова ля тэ барёл, и андо 1974 бэрш амэ болделям.

О ИЕГОВА АШЭЛ ВАЖ АМЭНДЭ СО МАЙ ӶЛАВНО АНДЭ ЖЫЗНЯ

Кала амэ уӷанглям пала лэ Дэвлэско замысло важ и мануша, када полностью парудя мэрни жызня. И важ мандэ, и важ и Лиди само ӷлавно андэ жызня ашэля и служэния лэ Иеговасти. Амэ ришыли тэ поможысарас амарэ бэятонэнди тэ цэнин и Библия и принцыпоря андар латэ. Блаӷодаря кодэлэсти, кай амэ любисарасас лэ Дэвлэс и лэ манушэн, амэ ашэлям инке май пашэ ек еқэстэ (Матф. 22:37—39).

Амарэ бэяцэ ӷанэнас, кай амэ ла даса ек команда. Кадяжэ вонэ ӷанэнас, кай лэ Иисусостирэ алава «Мэк тумаро алав „да“ авэл „да“ и тумаро „най“, „най“» сас амэндэ цэрэ сар правило (Матф. 5:37). Например, еқвар и Лиди на мэкля амаря барэдэря щя, савяти сас 17, тэ жал тэ поӷуляет лэ подружкэнца. Тоди ек андар лэндэ ԥэндя: «Если и дэй на мэкэл тут тэ жас, пуш кай о дад». Но амари щей атветила: «Най, кадя на вижала. Лэндэ всегда ек гиндо». Всаворэ амарэ бэяцэ диқэнас, кай через и библейски принцыпоря амаро ери ашэлас инке май дружно. Амэ блаӷодарни лэ Иеговасти, кай почти всаворэ амарэ бэяцэ служын лэ Иеговасти.

Хоть и истина парудя мэрни жызня, манди всаек чалёлас и медицына. Важ када мэ предложыл тэ поможысарав сар врачо андо филиало андэ Франция, саво спэрва сас андо Парижо, ай потом андэ Лувье. Сар внештатно сотруднико мэ служысарав май бут чем 50 лет. Важ кадэя время мандэ появисайлэ бут пашутнэ друӷоря. Дэсавэнди андар лэндэ пала 90. Ай еқвар мэ познакомился еқэ тэрнэ ԥралэса и фартэ удивисайлэм, кала уӷанглэм, кай варикай 20 лет палпалэ мэ сымас акушэро, кала во арақаделяпэ!

ДИҚАВ, САР О ИЕГОВА ЗАБОТИЙПЭ ПАЛА ПЭСКО НАРОДО

Важ кадэла бэрша мэрни любовь каринг о Иегова барёлас, кала мэ диқавас, сар во руководий пэстирэ народоса и заботийпэ пала лэстэ. Например, андэ 1980 бэрша о Руководящё совето стердя андэ США спецыально проӷрама, кай лэ Иеговастирэ свидетеля и медицынски арӷанизацыи май драго тэ сотрудничают ек еқэса.

Потом андо 1988 бэрш о Руководящё совето стердя андо Вефилё нэво отдело — служба важ и больнично инфармацыя. Спэрва кадэва отдело диқэлас пала камитеторя па связи лэ больницэнца андэ США. Вонэ поможынас лэ свидетелёнэнди тэ виарақэн личения, сави на жал против лэ Дэвлэско законо. Потом кадя линэ тэ терэн андэ авэр страны, и кадяжэ и андэ Франция. Ман лэл лэ одестар, сар лэ Иеговастири арӷанизацыя заботийпэ пала насвалэ ԥрала и ԥэя.

МЭРНИ ДЕЦКО МЕЧТА УЖЭ ИСПОЛНЯЕЦА!

Спэрва манди фартэ чалёлас и медицына. Но потом мэ полэм, кай само важно дила — тэ поможысарав лэ манушэнди тэ уӷанэн пала амаро Создателё, Дэл Иегова. Кала мэ ужэ сымас пэ пенсия, амэ ла Лидаса закамлям тэ ашас общи пианероря, кай инке май бутэ манушэнди тэ росԥэнас пала лащи новость важ лэ Дэвлэско Царство. И акана амэ на парашас тэ поможысарас лэ манушэнди тэ спасынпэ.

Мэ идоси личисарав лэ манушэн. Но мэ полав, кай дажэ со май лашо врачо нэ можэт тэ виличий всаворэ насвалимастар и тэ фэрий ла смэртятар. Важ када мэ фартэ аштярав кодэя время, кала будэр на авэла ни дук, ни болезни, ни смэрть. Кадэя время пашола фартэ ӥто, и мандэ авэла вся и вечность, кай май бут тэ уӷанав пала вся лэ Дэвлэстири тварения, ай кадяжэ, сар создано и манушыкани тила. Чаче, мэрни децко мечта ужэ ля исполняца, но мэ патяв, кай со май лащи время аштярэл амэн англэ!