Сар лэ Иеговастири любовь поможый амэнди тэ улас и дар

1. Состар моӷут тэ даран и мануша?

РОЗДИҚАСА дэсавэ ситуацыи, савэ моӷут тэ авэн андэ жызня. О Робертоb и лэстири хулаи и Мария закамлэ тэ служын котэ, кай трэбуй май бут проповедникоря. Но кай тэ стерэн када, лэнди трэбуй сас тэ присытён тэ жувэн май просто. Вонэ даранас, кай если лэна тэ затерэн май набут ловэ, лэндири жызня на авэла кацави дэ бахтали. О Биниамо жувэл андэ страна, кай исин запрето. Кала во ашэля лэ Иеговаско свидетелё, лэстэ появисайля и дар, кай лэс тожэ моӷут преследовать. Но инке май фартэ во пэрэжывал, сар лэско родо диқэла, кай во парудя и вера. Кай и Вика появисайля и найлащи дук. И вой нащи виарақэлас врачос, саво соӷласисайлоп тэ личий ла би ратэско. И Вика даралас, кай можэт тэ мэрэл через кадэва насвалимос.

2. Васо амэ трэбуй тэ стас зор, кай тэ зритярас пэстири дар?

² Тумэндэ варикала сас кацави дар? Бутэндэ андар мэндэ сас. Если амэ на сытюваса тэ зритярас пэстири дар, тоди можэм тэ прилас нэправильно ришэния и тэ римосарас пэстири дружба лэ Иеговаса. Имено када о Сатана и камэл. Через амари дар во тасавэл пар мэндэ, кай амэ тэ парашас тэ ритярас лэ Дэвлэско законо, например, тэ росԥэнас лэ манушэнди пала Иегова (Отк. 12:17). О Сатана фартэ зорало, холинако и никас на жалуий. Но амэ можэм тэ фэрисавас лэстар. Сар?

3. Со поможыя амэнди тэ улас пэстар и дар?

³ Если амэ патяс, кай о Иегова любий амэн, и кай во амэнца, тоди лэ Сатанастэ на вижала тэ шол андар мэндэ и дар (Пс. 118:6). Акэ со сас кай лэ Дэвлэско служытелё, саво пистросардя о 118 Псалом. Во пэрэжудя разно ԥаримос. Лэстэ сас бут вороӷоря, и дэсавэ андар лэндэ — када и мануша, кастэ сас бари власть (стихоря 9, 10). Дэкала пэр лэстэ фартэ тасавэнас (стихо 13). Ай инке лэс строӷо просытярдя о Иегова (стихо 18). Но всаек кадэва псалмопевцо ԥэндя кацавэ алава: «На лава тэ дарав». Васо лэстэ сас кацаво по ди? Хоть о Иегова просытярдя лэс, о псалмопевцо ӷанэнас, кай лэско небесно Дад фартэ любий лэс. Во сас уверено, кай дажэ андэ кадэя найвушэро ситуацыя о Иегова процырдэла лэсти о вас (Пс. 118:29).

4. Сави дар амэ можэм тэ улас, если патяс, кай о Иегова амэн любий?

⁴ Если амэ патяс, кай о Иегова любий амэн, када поможыя амэнди тэ улас пэстар и дар, сави часто исин кай и мануша: 1) дар, кай нэ сможэм тэ проправарас лэ ерес, 2) дар англа мануша и 3) дар англа смэрть. Кодэла ԥрала и ԥэя, пала савэ амэ дям дума андо пэрво абзацо, патянас, кай о Иегова любий лэн, и через када смоӷли тэ улэн пэстар и дар.

ДАР, КАЙ НЭ СМОЖЭМ ТЭ ПРОПРАВАРАС ЛЭ ЕРЕС

5. Васо и хулая андо ери моӷут тэ пэрэжывают? (Диқэн и картинка пэ обложка.)

⁵ И христианоря полэн, кай трэбуй тэ заботинпэ, кай лэ ерестэ тэ авэл вся, со трэбуй важ и жызня (1 Тим. 5:8). Пока жалас кадэя пандэмия, тумэ, хулая, моӷли бут пала со тэ пэрэжываете. Например, кай хасарэна и бути, ай авэр на виарақэна, и через када нэ сможэте тэ проправарэн лэ ерес или тэ потинэн пала цэр. Ай можэт, сар о Роберто и Мария, тумэ гиндон, кай если лэна тэ затерэн май набут, тоди нэ сможэте тэ прожувэн пэ кадэла ловэ. На бистрэн: о Сатана домардёл, кай через кацави дар амэ тэ парашас тэ служысарас лэ Иеговасти.

6. Саво гиндо камэл тэ зашол амэнди о Сатана?

⁶ О Сатана камэл тэ зашол амэнди гиндо, кай о Иегова на позаботияпэ пала амэндэ и на поможыя тэ проправарас лэ ерес. Важ када амэ можэм тэ гиндосарас, кай трэбуй тэ жас пэ вся, кай тэ на хасарас пэстири бути, дажэ если прижалапэ тэ стерас кода, со римоя амари дружба лэ Иеговаса.

7. Со ԥэнэн амэнди о Иисусо пала Иегова?

⁷ О Иисусо ӷанэн пэстирэ Дадэс май драго всаворэндар. И важ када во ԥэнэн амэнди: «Тумаро Дад ӷанэн, со тумэнди трэбуй, инке англа кода, сар тумэ тэ мангэн» (Матф. 6:8). Кадяжэ о Иисусо уверено, кай о Иегова камэл тэ дэл амэнди вся, со трэбуй важ и жызня. Сар христианоря, амэ ужас андэ лэ Иеговаско ери. И амэ можэм тэ патяс, кай о Иегова, сар хулай андо ери, стол патив по принцыпо анда 1 Тимофею 5:8 и екжэно кадя лэла тэ терэл.

8. а) Со поможыя тэ улас и дар, кай амэ нэ сможэм тэ проправарас лэ ерес? (Матфея 6:31—33). б) Диқэн пэ картинка. Сости амэ можэм тэ сытювас лэ ерестар, саво поможый ла ԥьяти и делийпэ лэ хамаса?

⁸ Если амэ патяс, кай о Иегова любий амэн и амаро ери, амэ аваса уверени, кай во дэла амэнди вся, со трэбуй важ и жызня. (Проадинон Матфея 6:31—33.) Лэ Иеговасти фартэ чалёл тэ заботийпэ пала амэндэ. Саво во дэ щедро и любящё Дад! Кала о Иегова создавал и ԥув, во стердя най кати кода, со трэбуй, кай амэ тэ вижувас. Во бут со подарисардя амэнди, кай амэ тэ радосавас ла жызняти (Быт. 2:9). Дажэ если дэкала амэнди хутилэл и ловэ кати пэ само нэобходимо, трэбуй тэ авас блаӷодарни, кай када исин. Када сыкавэл, кай о Иегова заботийпэ пала амэндэ (Матф. 6:11). Сэрэн: кала амэ варисостар отԥэндювас, када на сыстояпэ кодэлэса, сар о Иегова блаӷословий амэн акана и сави лащи жызня во дэла англэ. Када драго полинэ о Роберто и Мария (Ис. 65:21, 22).

9. Сости можно тэ сытювас кай о Роберто и Мария?

⁹ Кай о Роберто и Мария сас райкано цэр и лащи бути андэ Колумбия. Акэ, со вонэ ԥэндэ: «Амэ погиндосардям, кай камас тэ андярас май просто жызня и май бут тэ служысарас лэ Иеговасти. Но амэ дарасас, кай если ласа тэ затерас май набут ловэ, амари жызня на авэла ужэ кацави дэ бахтали». Со поможысардя лэнди тэ улэн кадэя дар? Вонэ линэ тэ вспоминают, сар о Иегова заботияспэ пала лэндэ и сыкавэлас пэстири любовь. Када поможысардя лэнди тэ патян, кай о Иегова лэн никала на ашавэла. Важ када вонэ ашадэ пэстири бути, кай затерэнас барэ ловэ, битиндэ о цэр и пэрэлаглэ кордэ, кай трэбуй сас май бут проповедникоря. Со вонэ акана гиндон пала пэстири ришэния? О Роберто росԥэнэн: «Амэ полям, кай и алава анда Матфея 6:33, — када чачимос! Амэндэ всегда сас вся, со трэбуй важ и жызня. И акана амэ ашэлям инке май бахталэ».

ДАР АНГЛА МАНУША

10. Васо и мануша даран ек еқэстар?

¹⁰ Посли кода, сар о Адамо и Ева жылэ против о Дэл, и мануша линэ тэ анэн вредо ек еқэсти (Эккл. 8:9). Например, и барэ мануша используют пэстири власть, кай найдраго тэ обжанпэ аврэнца. Кадяжэ амэ диқас фартэ бут преступность андэ люма. Андэ школа и однокласникоря издеваюца ек еқэстар. Ай дэсавэ мануша андярэн пэс жэстоко дажэ пэстирэ ереса. Важ када амэ полас, васо и мануша даран манушэндар. Сар о Сатана использует кадэя дар?

11, 12. Сар о Сатана использует против амэндэ и дар англа мануша?

¹¹ О Сатана камэл, кай через и дар англа мануша амэ тэ на кандас лэ Иеговас и тэ парашас тэ проповедуем. Во терэл кадя, кай и власти тэ стон запрето пэ амари дила и тэ преследуют амэн (Луки 21:12; Отк. 2:10). Бут мануша андярэн найлащи дума пала лэ Иеговастирэ свидетеля и хохавэн пэр лэндэ. Кодэла, ко патян кадэлэсти, лэн тэ подасанпэ амэндар и моӷут дажэ ӷрубо тэ андярэн пэс амэнца (Матф. 10:36). Но амэ на удивисавас. О Сатана терэлас кадяжэ и андо пэрво вико (Деян. 5:27, 28, 40).

¹² Лэ Иеговаско вороӷо най кати через и преследовании тасавэл пар мэндэ. Например, дэсавэ фартэ пэрэжывают, сар лэнго ери диқэла пэ кода, кай вонэ ашэна лэ Иеговастирэ свидетеля. Вонэ даран кадэлэстар дажэ май фартэ, чем варисостар тэ мардён. Кадэла ԥрала и ԥэя фартэ любин пэстирэ родос и камэн, кай вонэ тэ уӷанэн пала Иегова и тэ ашэн лэстирэ друӷоря. Лэнди ԥарэс тэ ашунэн, кай вонэ найдраго дэн дума пала Дэл и пала лэстирэ служытеля. Дэкала варико анда ери, саво раньшэ тасавэлас пар мэндэ, можэт тэ ашэл лэ Иеговаско свидетелё. Но со, если через и нэви вера амаро ери парашэла амэнца тэ общяеца? Сар амэ пэс андяраса?

13. Сар лэ Иеговастири любовь поможыя амэнди, если о родо отԥэнделя амэндар? (Псалом 27:10).

¹³ Амэнди моӷут тэ придэн зор и алава анда Псалом 27:10 (проадинон). Кала амэ розмышляем, сар дэ фартэ о Иегова любий амэн, амэндэ по ди спокойно, дажэ если о родо отԥэнделя амэндар. И амэ патяс, кай о Иегова блаӷословия амэн, если амэ вся виритяраса. О Иегова позаботияпэ пала вся, со амэнди трэбуй важ и жызня, кай амэндэ тэ ашэл драго по ди и тэ авэл лащи дружба лэса. Када андэ пэстири жызня поля о ԥрал Биниамо.

14. Сости тумэ можэте тэ сытён анда кода, со росԥэндя о Биниамо?

¹⁴ О Биниамо ашэля лэ Иеговаско свидетелё, хоть андэ лэстири страна лэн фартэ преследовали. Давайте подаса дума, сар лэ Иеговастири любовь поможысардя лэсти тэ улэл и дар англа мануша. Во росԥэнэн: «Мэ дажэ на гиндосаравас, савэ дэ барэ преследовании моӷут тэ авэн. Но инке май фартэ мэ даравас кодэлэстар, кай мэрнэ ерести на чалёла мэрни нэви вера. Мэ фартэ пэрэжывал, кай мэрнэ дадэсти авэла лажаво, кай мэ ашэлэм лэ Иеговаско свидетелё и кай мэрно ери на лэла тэ стол патив пэр мандэ». Но о Биниамо сас уверено, кай о Иегова вся и время заботийпэ пала кодэла, кас любий. Во росԥэнэн: «Мэ розмышлял пала кода, сар о Иегова поможыяс аврэ ԥралэнди и ԥэянди, кала лэндэ сас трудности лэ ловэнца, кала пала лэндэ вэрыто гиндонас, и дажэ кала лэн марэнас. Мэ ӷанавас, кай если мэ ашавапэ предано лэ Иеговасти, во ман блаӷословия. Ман най еқвар бэшарэнас андо баруно и дажэ пытали. Но мэ пэр пэстэ диқлэм: если амэ ашаспэ предани лэ Иеговасти, во всегда амэнди поможый». О Иегова ашэля важ о Биниамо, сар чачуно Дад, ай лэско народо — сар ери.

ДАР АНГЛА СМЭРТЬ

15. Васо амэндэ можэт тэ авэл дар англа смэрть?

¹⁵ Андэ Библия ԥэнэнпэ, кай и смэрть — када амаро вороӷо (1 Кор. 15:25, 26). Амэндэ можэт тэ авэл дар англа смэрть, особено кала амэ или варико анда амарэ чаче фартэ насвавэл. Но васо амэндэ исин кадэя дар? Важ кода кай о Иегова создал амэн кадя, кай амэндэ тэ авэл жэлания тэ жувас вечно (Эккл. 3:11). И дар англа смэрть можэт тэ фэрий амари жызня. Например, блаӷодаря кадэлэсти, амэ, возможно, закамаса тэ хас полезно хамос, тэ заласпэ спортоса, тэ жас кай о врачо, кала трэбуй, ай кадяжэ тэ на терас нисо, состар амэ моӷли бы тэ хасарас и жызня.

16. Сар о Сатана можэт тэ тасавэл пар мэндэ, если амэ дарас ла смэртятар?

¹⁶ О Сатана ӷанэн, кай амари жызня важ амэндэ фартэ куч. И во ԥэнэн, кай амэ жаса пэ вся, кай тэ на мэрас, дажэ если прижалапэ тэ хасарас и дружба лэ Иеговаса (Иов 2:4, 5). Саво хохаимос! Но о Сатана на сдэлпэ. Во «кодэва, ко можэт тэ анэн и смэрть». Через кадэя дар англа смэрть во тасавэл пар мэндэ, кай амэ тэ отԥэндювас лэ Иеговастар (Евр. 2:14, 15). Дэкала во када терэл через и мануша, савэ ԥэнэн, кай умарэна амэн, если амэ када на стераса. Ай можэт тэ авэл кацаво, кай амэнди срочно авэла трэбуй помощь лэ врачонэндар. Тоди во можэт тэ стерэл вся, кай амэ тэ на кандас лэ Иеговас. Например, и врачоря и о родо, саво на патял лэ Иеговасти, моӷут тэ тасавэн пар мэндэ, кай амэ тэ пэрэшас о рат и кадя тэ жас против лэ Дэвлэско законо. Или кай амэ тэ витидас кацави лечения, сави на чалёла лэ Иеговасти.

17. Васо амэ на трэбуй тэ дарас ла смэртятар? (Римлянам 8:37—39).

¹⁷ Хоть амэ на камас тэ мэрас, амэ ӷанас, кай о Иегова на парашэла амэн тэ любий, дажэ если кацаво авэла. (Проадинон Римлянам 8:37—39.) Кала лэ Иеговастирэ друӷонэн на ашэл, во на бистрэл пала лэндэ. Вонэ важ лэстэ сар жундэ (Луки 20:37, 38). Во аштярэл и время, кала рия лэн каринг и жызня, и фартэ камэл када тэ стерэл (Иов 14:15). О Иегова потиндя бари цэмин — отдя важ амэндэ пэстирэ кучутнэ Шавэс, «кай кажно, ко сыкавэл, кай патял андэр лэстэ... тэ жувэл вечно» (Иоан. 3:16). Амэ ӷанас, сар дэ фартэ о Иегова любий амэн и заботийпэ пала амэндэ. Важ када, если амэндэ ԥаро насвалимос или амэн камэн тэ умарэн, амэ всаек на отԥэндювас лэ Иеговастар. Наоборот, амэ мангаспэ, кай во тэ дэл амэнди зор, мудрость и тэ подритярэл амэн. Имено кадя и стердэ амари ԥэй Вика и лако хулай (Пс. 41:3).

18. Сости тумэ можэте тэ сытён анда кода, со росԥэндя и Вика?

¹⁸ Кала амаря ԥьяти сас 35 лет, вой уӷангля, кай латэ найлащи дук, сави фартэ ридко. Давайте уӷанаса, сар лэ Иеговастири любовь поможысардя лати тэ улэл и дар англа смэрть. Вой росԥэнэн: «Кала амэ уӷанглям пала кадэва насвалимос, амэ лэ хуласа фартэ загрыжысайлям. Манди трэбуй сас операцыя. Но нико анда врачоря на камэлас када тэ терэл би ратэско. Мандэ сас фартэ бари дар! Но всаек мэ на домэклэм, кай манди тэ пэрэшон о рат, важ кода кай кадя мэ жылоп против лэ Дэвлэско законо. Андэ мэрни жызня мэ най еқвар диқлэм, сар о Иегова сыкавэлас и любовь каринг мандэ! Ай акана мандэ появисайля возможность тэ сыкавав пэстири любовь каринг лэстэ. Кажно разо, кала и врачоря ԥэнэнас, кай мандэ лэ зорэса вся найдраго, мэ инке май фартэ камавас тэ радосарав лэ Иеговас. Мэ на камлэм тэ домэкав, кай о Сатана тэ вицэлэл. И акэ манди стердэ операцыя би ратэско. Хоть мандэ всаек о зор най фартэ лашо, о Иегова всегда дэл манди кода, со трэбуй. Например, важ дэсавэ деса, сар мэ уӷанглэм пала кадэя найлащи дук, пэ собрания амэ розлямас и статья “Сохраняйте мужество в бедственные времена”c. Вой фартэ придя манди зор! Посли када, амэ лэ хуласа адиносарасас ла бут разоря. Амэ на парашасас тэ росԥэнас пала Иегова, тэ авас пэ собрании, и тэ адиносарас кацавэ статьи. Када поможысардя амэнди тэ авас спокойни и тэ прилас правильни ришэнии».

УЛАС ПЭСТИРИ ДАР

19. Со ӥто авэла?

¹⁹ Лэ Иеговастирэ зорэса кай и христианоря па вся и ԥув вижал тэ виритярэн о ԥаримос и тэ на домэкэн, кай о Сатана тэ победий (1 Пет. 5:8, 9). Тумэндэ тожэ када вижала! Фартэ ӥто о Иегова ԥэнэна лэ Иисусости и лэ помазаниконэнди тэ улэн «вся, со стердя о Сатана» (1 Иоан. 3:8). Тоди кай лэ Дэвлэско народо авэла бахтали жызня «и нико на даравэла лэн» (Мих. 4:4; Ис. 54:14). Ай пока кадэя время на авеля, давайте ласа тэ пристас зор, кай тэ улас пэстири дар.

20. Со амэнди поможыя тэ улас пэстири дар?

²⁰ Важно тэ терас вся, кай инке май фартэ тэ патяс, кай о Иегова любий и фэрий пэстирэ друӷонэн. Давайте ласа тэ розмышляем, сар о Иегова фэрияс пэстирэ служытелёнэн андэ дэлмутни время, и тэ росԥэнас пала када аврэнди. Ай кадяжэ на ласа тэ бистрас, сар о Иегова поможыяс лично амэнди, кала амэндэ сас ԥаримос. Лэ Иеговастирэ зорэса амэндэ вижала тэ улас пэстири дар! (Пс. 34:4).