Домэкав, кай о Иегова тэ андярэл ман па правильно дром

АНДА МЭЛАЛИ СТРАНА АНДЭ ТАТИ АФРИКА

Мэ арақаделэм андо 1935 бэрш андо Дарластоно, андэ Кали страна. Када регионо андэ Англия. Пэр лэстэ кадя ԥэнэн, важ кода кай котэ фартэ бут заводоря и фабрики, и кадэлэстар о форо пропитано калэ дымоса. Манди сас варикай штар бэрш, кала лэ Иеговастирэ свидетеля линэ тэ изучают мэрнэ родителёнэнца. Кала манди сас 14 или 15, мэ полэм, кай када чачимос, и андо 1952 бэрш, кала манди сас 16 лет, мэ болделэм.

Варикай андэ кодэя жэ время мэ жылэм тэ терав по баро заводо, саво вимэкэл ручно инструменто и запчасти важ и машыны. Котэ мэ сытювавас, кай ӷэт май интя тэ ашав начальнико. Кацави бути мэ вся и жызня камавас!

Андэ кодэя время о разъездно старейшына предложыл манди тэ проандярав и книӷоизучения андэ мэрни собрания андо форо Уилленхолло. Манди трэбуй сас драго тэ погиндосарав, важ кода кай тоди мэ ԥиравас пэ дуй собрании. Андэ рабочи деса мэ ԥиравас пэ собрания андо форо Бромсгрово. Када сас найдур мэрня бутятар, варикай 30 километров мэрнэ цэрэстар. Ай пэ выходни, кала мэ сымас кай и родителя, мэ ԥиравас пэ собрания андо форо Уилленхолло.

Мэ камавас тэ подритярав лэ Иеговастири арӷанизацыя и соӷласисайлэм тэ проандярав и книӷоизучения, хоть важ када манди трэбуй сас тэ ужав па бути, сави манди кадя чалёлас. Мэ фартэ радо, кай домэклэм, кай о Иегова тэ сыкавэл манди правильно дром андэ кодэва маменто! Блаӷодаря кадэлэсти, мандэ сас фартэ интересно жызня, пала сави мэ ни еқвар нэ пожалел.

Кала мэ ԥиравас пэ собрания андо форо Бромсгрово, андэ мэрни жызня дэсо паруделя. Манди чалеля ек ԥэй, савя ақарэнас Энн. Вой фартэ любияс лэ Иеговас. Андо 1957 бэрш амэ жэнисайлям и вмести служысарасас сар общи и спецыальни пианероря. Кадяжэ амэ самас андэ разъездно и андэ вефильско служэния. И Энн — када мэрни бах!

Андо 1966 бэрш амэн ақардэ тэ сытювас андо 42 класо андэ Школа Галаадо. Амэ самас фартэ ради кадэлэсти. Посли кадэя школа амэн бишалдэ тэ служысарас андэ Малави. И мануша андэ кадэя страна фартэ дружелюбни и ӷостеприимни. Но амэ на ӷанасас, кай амэ котэ на заритярдюваса.

СЛУЖЫСАРАС АНДЭ МАЛАВИ АНДЭ ԤАРИ ВРЕМЯ

Амэ авелям андэ Малави андо 1 февралё андо 1967 бэрш. Андо пэрво шон амэ вся о зор отдасас, кай тэ сытювас и нэви шыб, ай посли када амэ начали и областно служэния. Амэ ездисарасас по джипо, пала саво дэсавэ гиндонас, кай во можэт тэ проладэл везде, дажэ па паи. Но амэ моӷли тэ проладас пэр лэстэ кати через найӷлыбоко паи. Дэкала амэнди прижаласпэ тэ рятярас андэ найбарэ цэрора, савэ сас стердэ анда ӷлина и сулум. Андэ время, кала жан и брышында, амэнди трэбуй сас тэ шас о брезенто, кай тэ на пропитял и крыша. Акада чаче сас проверка важ и нэвэ мисианероря! Но амэнди чалёлас амари служэния.

Андо апрелё мэ ашунглэм па радио и речь, сави ԥэндя о малавийско президенто о Хастингсо Банда. Тоди мэ полэм, кай амэн аштярэл ԥари время. Во дошалярдя лэ Иеговастирэ свидетелёнэн, кай вонэ на потинэн и налоӷоря и ӷулен андэ политика. Но када сас хохаимос! Па чачимастэ амэн наоборот вэрыцынас важ кода, кай амэ на залас никастири риг андэ политика и со май фартэ, кай и ԥрала на тинэнас и партийни билеторя.

Андо сентябрё амэ проадиносардям андэ ӷазета, кай о президенто дошалярдя амэн андэ всаворэ проблемы андэ страна. Во ԥэндя, кай ӥто о правительство запретия лэ Иеговастирэ свидетелёнэн. И када тердяпэ 20 октября 1967 ӷода. Ай ӷэт май интя андо Вефилё авелэ и рая и мануша анда миграционо служба, кай тэ ԥандавэн о филиало и тэ одбишалэн лэ мисианеронэн анда страна.

Трин дес амэн ритярэнас андо баруно, ай потом одбишалдэ по Маврикиё, пала саво диқэлас и Великобритания. Но и власти котэ на мэклэ амэн, кай амэ тэ авас сар мисианероря. Посли када амэн одбишалдэ андэ Родезия (акана Зимбабве). Кала амэ авелям интя, ек чиновнико, савэсти на чалёнас лэ Иеговастирэ свидетеля, на мэкля амэн андэ страна. Во ԥэндя: «Тумэнди на динэ тэ ашэнпэ андэ Малави. Тумэн на мэклэ по Маврикиё. И со, тумэ гиндон, кай амэ тумэнди ради аваса?» И Энн розровъяпэ. Амэнди здэласпэ, кай амэ никасти на трэбуй. Манди камэласпэ вся тэ мэкав и тэ рисавав андэ мэрни любимо Англия. И власти мэклэ амэн тэ рятярас ек рят андо филиало, если амэ аваса пэ авэр дес лэндэ андо цэнтрально офисо. Амэндэ совсем на сас зор, но амэ на парашасас тэ надеисавас по Иегова. Амэ аштярасас, сар во ришыя кадэя ситуацыя. Пэ авэр дес нэожыдано амэнди розришыли тэ ашаспэ андэ Зимбабве сар туристоря. Никала на бистрава, со мандэ сас по ди андэ кодэва маменто! Мэ анда вся оди патявас, кай о Иегова андярэл амэн па правильно дром.

НЭВИ НАЗНАЧЕНИЯ: ЗАБОТИСАВАС ПАЛА МАЛАВИ АНДА ЗИМБАБВЕ

Андо филиало андэ Зимбабве ман назначили андо служэбно отдело. Мэ поможысаравас лэ свидетелёнэнди андэ Малави и андо Мозамбико. Лэ ԥралэн андэ Малави фартэ жэстоко преследовали. Мэ трэбуй сымас тэ пэрэандярав и письморя, савэ бишалэнас и раёни старейшыноря анда Малави. Еқвар мэ проровьем вся о вэчэро, пока адиносаравас пала кода, сар дэ жэстоко обжанпэ мэрнэ ԥралэнца и ԥэянцаa. Но кадяжэ мэ абуросаравас, кай вонэ предани лэ Дэвлэсти, на парашэн тэ кандэн и виритярэн вся о ԥаримос (2 Кор. 6:4, 5).

Амэ терасас вся, со сас па амаро зор, кай тэ поможысарас лэ ԥралэнди и лэ ԥэянди, савэ ашэлэпэ андэ Малави, ай кадяжэ кодэлэнди, ко нашля андо Мозамбико, тэ ашэнпэ састэ андэ вера. Лэ переводчиконэн пэ шыб чичева, пэ сави дэн дума со май бут мануша андэ Малави, мэклэ тэ жувэн пэ бари ферма кай ек свидетелё андэ Зимбабве. Кадэва ӷостеприимно ԥрал стердя важ лэндэ и цэра, ай кадяжэ и офисоря, кай тэ терэн и дила. Блаӷодаря кадэлэсти, амэ на парашэлям тэ пэрэандярас и библейско литература.

Амэ стердям вся, кай и раёни старейшыноря анда Малави кажно бэрш тэ авэн пэ областно канӷрэсо андэ Зимбабве. Посли канӷрэсо амэ дасас лэнди планоря важ и всаворэ лэндирэ речи. Кала кадэла ԥрала ринаспэ андэ Малави, вонэ росԥэнэнас кадэла важни гиндоря лэ ԥралэнди и лэ ԥэянди. Ай еқвар амэ стердям андэ Зимбабве и Школа священного служэния, кай тэ подритярас кадэлэ раёнонэ старейшынонэн.

Андо февралё андо 1975 бэрш мэ авелэм кай и малавийски ԥрала и ԥэя, савэ жувэнас андо лаӷерё важ и бежэнцоря андо Мозамбико. Кадэла ԥрала терэнас вся кадя, сар ԥэнэнас лэ Иеговастири арӷанизацыя, и андэ лэндирэ собрании ужэ сас советы старейшын. Кадэла нэвэ назначени старейшыноря драго арӷанизовали, сар тэ прожан и собрании. Вонэ ԥэнэнас и речи, обсуждали лэ ԥралэнца и лэ ԥэянца о стихо по дес и «Сторожэво башня», ай кадяжэ проандярэнас и раёни канӷрэсоря. Кадэла лаӷеря шонаспэ пэ ҭана, кай проандярэнас и барэ канӷрэсоря. И ԥрала стердэ разни отделоря, кай тэ диқэн пала уборка, кай тэ роспределин о хамос и кай тэ авэл безопасно. О Иегова подритярэлас кадэлэ ԥралэн, и лэндэ вижыля тэ стерэн фартэ бут дила! Кала мэ када диқлэм, ман када фартэ ля лэ одестар.

В концэ андэ 1970-ти бэрша пала Малави ля тэ диқэл о замбийско филиало. Но мэ на парашавас тэ гиндосарав и тэ мангавпэ пала ԥрала андэ Малави. Мэ ӷанавас, кай пала лэндэ мангаваспэ най кати ек мэ. Мэ служысаравас андо камитето андэ зимбабвийско филиало. Блаӷодаря кадэлэсти, мэ най еқвар сымас пэ встречи лэ ԥралэнца анда Малави, ЮАР и Замбия, кала авэлас о прецтавителё анда всемирно ӷлавно управления. И кажно разо амэ задасас вопросо: «Ай со инке амэ можэм тэ стерас важ амарэ ԥрала анда Малави?»

Прожыля время, и лэ Иеговастирэ свидетелёнэн линэ май набут тэ преследуют. И бежэнцоря ринаспэ андэ Малави, ай и ԥрала, савэ ашэлэпэ андэ страна, смоӷли тэ жувэн спокойно посли кода, сар лэнца бут бэрша обжанаспэ жэстоко. Авэр страны, савэ сас рядом, злэнас и оӷраничении па лэ Иеговастирэ свидетеля и домэкэнас, кай вонэ тэ терэн пэстири дила. Андо Мозамбико када сас андо 1991 бэрш. Но всаворэ аштярэнас: кала жэ лэ Иеговастирэ свидетеля лэна свободно тэ служын лэ Дэвлэсти андэ Малави?

РИСАВАС АНДЭ МАЛАВИ

И ситуацыя андэ политика андэ Малави полокорэс парудёлас, и андо 1993 бэрш о правительство зля о запрето па лэ Иеговастирэ свидетеля. Посли када мэ дэмас дума еқэ мисианероса, и во пушля: «Ну со, ладэса палпалэ андэ Малави?» Манди тоди сас 59 лет, важ када мэ ԥэндэм: «Най, мэ ужэ ԥуро». Но прецтавьте, андэ кадэва жэ дес амэнди авеля о письмо, саво бишалдя о Руководящё совето. Котэ вонэ мангэнас, кай амэ тэ рисавас андэ Малави!

Амэнди чалёлас тэ служысарас андэ Зимбабве, важ када сас найвушэро тэ прилас и ришэния. Амэ ужэ присытелям тэ жувас катэ, и амэндэ сас розлашэ друӷоря, савэ сас фартэ куч амэнди. О письмо, саво бишалдя о Руководящё совето, сас пистромэ ковлэс. И ԥрала ԥэнэнас, кай если камас, амэ можэм тэ ашаспэ андэ Зимбабве. Амэ кадя и тердоп, если камлоп тэ жас пэстирэ дромэса. Но мэ вспомнил пала Авраамо и Сарра, савэ андэ ԥурэ бэрша ашадэ пэско лашо цэр и канглэ лэ Иеговас (Быт. 12:1—5).

Амэ ришыли тэ приашундювас каринг кода, со ԥэнэн лэ Иеговастири арӷанизацыя, и рисайлям андэ Малави андо 1 февралё андо 1995 бэрш. Када сас кодэва жэ дес, кала 28 лет палпалэ амэ пэрво разо авелям интя. Ман назначили андо камитето филиала андэ Малави. Манца котэ терэнас инке дуй ԥрала. Амэ пристасас вся пэско зор, кай андэ кадэя страна упалэ тэ жал лэ Иеговастири дила, сави во терэл через пэстири арӷанизацыя.

О ИЕГОВА ВИБАРЯРЭЛ

Сар жэ радосно тэ диқэс, кай о Иегова блаӷословий пэстири арӷанизацыя! Андо 1993 бэрш лэ вазвещятелёнэн сас варикай 30 000. Кадэва число ӥто вибареля, и андо 1998 бэршb лэн сас ужэ май бут, чем 42 000. О Руководящё совето одобрил, кай тэ строин о филиало. Через када вонэ моӷли тэ заботинпэ пала ԥрала и ԥэя. Амэ тиндям участко, саво сас 12 гектаров, андо Лилонгве, и ман назначили андо строительно камитето.

Каринг о маё андо 2001 бэрш достроисардэ о филиало. О ԥрал Гаё Пирсо анда Руководящё совето ԥэндя и речь важ и посвящения, кай кадэя здания авэла важ лэ Иеговастири дила. Пэ кодэя радосно встреча сас варикай 2 000 катутнэ свидетеля. Бут андар лэндэ служынас лэ Иеговасти ужэ май бут, чем 40 лет. Кадэла ԥрала и ԥэя ашэнаспэ верни лэ Дэвлэсти, дажэ кала лэн фартэ преследовали, кала сас запрето. Хоть кадэла ԥрала и ԥэя сас фартэ чорорэ, вонэ сас барвалэ кодэлэса, кай лэндэ сас лащи дружба лэ Иеговаса и састи вера. Ай акана лэндэ сас пэско нэво Вефилё! Па вся филиало дилабэнас и диля важ о Дэл андо африканско стилё. Блаӷодаря кадэлэсти, кадэя встреча сас особено и дицолас, кай о Иегова анда вся оди блаӷословий кодэлэн, ко пэрэандярэл о ԥаримос.

Сар достроисардэ о филиало, мандэ появисайля возможность тэ ԥэнав и речи важ и посвящения важ и нэвэ Залоря Царства. И собрании андэ Малави участвовали андэ строительно проӷрама важ и страны, кай лэ ԥралэндэ и лэ ԥэяндэ сас набут ловэ. Раньшэ дэсавэ собрании проандярэнас и встречи тала навесоря, савэ сас стердэ анда эвкалиптови витки. Пэ крыша вонэ шонас и тросникови париндора, ай бэшэнас и ԥрала и ԥэя пэ скамейки анда ӷлина. Акана и ԥрала радостяса строин шукарнэ нэвэ залоря анда кирпичёря, савэ обԥабарэнас андо самодельно бов. Но тэ бэшэн лэнди всаек чалёлас най пэ стулоря, ай пэ скамейки, важ кода кай, сар ԥэнэнпэ «пэ скамейка всегда виарақэлапэ ҭаноро инке важ ек мануш».

Ман фартэ ля лэ одестар, сар о Иегова блаӷословияс пэско народо! Особено манди чалеля, кай и тэрнэ африкански ԥрала фартэ камэнас тэ терэн май бут дила андэ служэния. Вонэ ӥто сытёнас андэ лэ Иеговастири арӷанизацыя, ашэнас май опытни и сразу терэнас кадя, сар сытелэ. Блаӷодаря кадэлэсти, вонэ моӷли тэ терэн май бут андо Вефилё и андэ собрании. И нэвэ старейшыноря, ай кадяжэ катутнэ раёни старейшыноря придэнас зор лэ ԥралэнди и лэ ԥэянди тэ служын лэ Иеговасти. Бут анда кадэла ԥрала сас жэнати. И хоть лэнго родо и авэр мануша аштярэнас, кай лэндэ тэ авэн бэяцэ, вонэ лэ хулаянца прилинэ ришэния май бут время тэ отдэн пэ служэния лэ Иеговасти.

НИ ПАЛА СО НЭ ЖАЛЕЮ

Амэ служысарасас андэ Африка 52 ӷода, но потом мэрно зор римосайля. О катутно камитето филиала ԥэндя, кай амэн тэ пэрэназначат андэ Великобритания. И о Руководящё совето одобрил када. Амэнди сас найвушэро тэ ашавас и служэния, сави амэ полюбисардям. Но о вефильско ери анда британско филиало анда вся оди приля амэн и драго заботияспэ пала амэндэ андэ амарэ ԥурэ бэрша.

Мэ патяв: када сас со май лащи ришэния тэ домэкав, кай о Иегова тэ андярэл ман па правильно дром! Если мэ тэ витидоп тэ надеисавав пэр пэстэ и стодоп по пэрво ҭан и бути, тоди ко ӷанэн, кай бы мэ авелоп акана. О Иегова всегда ӷанэнас, со манди сас трэбуй, кай тэ жав па «правильно дром» (Прит. 3:5, 6). Андэ тэрнэ бэрша манди чалёлас тэ терав бути по баро заводо, но када на сыстояпэ ла бутяса, сави дя манди о Иегова андэ пэстири всемирно арӷанизацыя. Важ мандэ и служэния лэ Иеговасти сас и ашэлпэ само бахтало дром андэ жызня!