О Иегова диқэл пала пэско народо

1. Васо о Иисусо мангля, кай о Иегова тэ фэрий лэстирэ учениконэн?

АНДЭ рят англа пэстири смэрть о Иисусо мангляпэ пэстирэ Дадэсти, кай во тэ фэрий лэстирэ учениконэн. Канешно, о Иегова всегда заботийпэ пала пэско народо и фэрий лэс (Иоан. 17:15, 20). Но о Иисусо ӷанэнас, кай о Сатана лэла фартэ тэ тасавэл по лэ Дэвлэстирэ служытеля. Во полэлас, кай лэнди трэбуй помощь лэ Иеговастар, кай вся када тэ виритярэн.

2. Васо амэ на трэбуй тэ дарас, кай авэла ԥаримос? (Псалом 33:18—20).

² Кадэва миро, савэса правий о Сатана, фартэ тасавэл по лэ Дэвлэско народо. Дэкала амэндэ исин кацавэ трудности, через савэ найвушэро тэ ашаспэ предани лэ Иеговасти, и можэт тэ здэлпэ, кай амэ лэн на виритяраса. Но сар амэ роздиқаса андэ кадэя статья, амэнди найсостар тэ дарас. О Иегова диқэл пала амэндэ. Во ӷанэн, саво амэндэ исин ԥаримос андэ жызня и всегда ӷотово тэ поможый. Давайте роздиқаса дуй примероря анда Библия, савэ сыкавэна, сар «о Иегова шол сама пэ кодэла, ко дарал лэстар». (Проадинон Псалом 33:18—20.)

КАЛА ЗДЭЛПЭ, КАЙ АМЭ ЕКЖЭНЭ

3. Кала амэ можэм тэ гиндосарас, кай амэ екжэнэ?

³ Хоть амэндэ исин бут ԥрала и ԥэя андэ собрания, дэкала амэ всаек можэм тэ гиндосарас, кай амэ екжэнэ. Например, кацаво можэт тэ авэл по ди кай и молодёж. Кала вонэ росԥэнэн пэстирэ однокласниконэнди, андэр со вонэ патян, или кала пэрэладэн андэ нэви собрания. Ай варико умэкля и вас и гиндой, кай екжэно трэбуй тэ улэл кадэва ԥаримос. Дэкала амэнди лажаво тэ росԥэнас, со по ди, важ кода кай амэ гиндосарас, кай нико амэн на полэла. И дажэ можэт тэ авэл гиндо, кай амэ никасти на трэбуй. Кала амэ гиндосарас, кай екжэнэ, амэ можэм тэ парашас тэ патяс, кай вся авэла драго. Но о Иегова на камэл, кай амэндэ тэ авэл кацаво андо ди. Васо амэ можэм кадя тэ ԥэнас?

4. Васо о пророко Илья ԥэндя: «Ашэлэмпэ кати мэ»?

⁴ Давайте подаса дума пала пророко Илья. Во май бут чем 40 деса гарадёлас андэ пещера, кала и царица Иезавель солахадя тэ умарэл лэс (1 Цар. 19:1—9). Тоди во ԥэндя лэ Иеговасти: «Ашэлэмпэ кати мэ» (1 Цар. 19:10). Но пэ кадэя ԥув сас и авэр пророкоря. О Авдиё спасысардя кадэла царицатар 100 пророконэн (1 Цар. 18:7, 13). Тоди васо кай о Илья сас по ди, кай во екжэно? Можэт, во гиндояс, кай кадэла пророкоря ужэ мулинэ, или во умэкля и вас, кай нико на ля тэ служый лэ Иеговасти посли кода, со сас по плай Кармил? Ай можэт, во гиндояс, кай нико на ӷанэн, андэ сави бида во попэля, или кай всаворэ забистэрдэ пала лэстэ? Андэ Библия на росԥэнэнпэ, васо лэстэ сас кацавэ гиндоря. Но амэ точно ӷанас, кай о Иегова драго полэлас, со лэстэ сас по ди и ӷанэнас, сар лэсти тэ поможый.

5. Сар о Иегова сыкадя лэ Ильясти, кай во най екжэно?

⁵ Со стердя о Иегова, кай тэ поможый пэстирэ пророкости? Во заля и дума лэса. Дуварэс во пушля лэ Ильястар: «Илья, со ту катэ терэс?» (1 Цар. 19:9, 13). Кажно разо, кала о Илья росԥэнэнас, сар дэ ԥарэс лэсти сас по ди, о Иегова внимательно лэс виашунэлас. О Дэл сыкадя лэ Ильясти, кай во паша лэстэ и кай во фартэ зорало. Кадяжэ во ԥэндя лэсти, кай во най екжэно и инке бут мануша андо Израилё служын лэ Иеговасти (1 Цар. 19:11, 12, 18). Кати погиндон, сар дэ вушэро ашэля по ди лэ Ильясти, кала во ашундя атвето лэ Иеговастар. Ай инке о Иегова дя лэсти фартэ важно дила. Во ԥэндя, кай о Хазаэло трэбуй тэ авэл царё андэ Сирия, о Ииуё — андо Израилё, ай о Елисеё тэ авэл пророко, и мангля, кай во лэн тэ помажет (1 Цар. 19:15, 16). Кадя о Иегова поможысардя лэсти май бут тэ шол сама по лашымос. Инке о Дэл дя лэ Ильясти лашэ друӷос, лэ Елисеёс. Ай сар амэ можэм тэ додиқас лэ Иеговаско вас, кала амэнди здэлпэ, кай амэ екжэнэ?

6. Пала со ту можэш тэ мангэспэ, кала тути здэлпэ, кай ту екжэно? (Псалом 62:8).

⁶ О Иегова камэл, кай ту тэ росԥэнэс лэсти, со тутэ по ди. Во диқэл, со тути прижалпэ тэ пэрэандярэс и дэл тути тэ ӷанэс, кай во всегда радо тэ виашунэл тирэ молитвы (1 Фес. 5:17). Лэ Иеговасти фартэ чалёл, кала лэстирэ служытеля мангэнпэ лэсти (Прит. 15:8). Пала со ту можэш тэ мангэспэ, кала тути здэлпэ, кай ту екжэно? Росԥэн лэ Иеговасти, со тутэ по ди и пала со ту пэрэжываеш, кадя жэ сар када терэлас о Илья. (Проадинон Псалом 62:8.) Манг, кай о Иегова тэ поможый тути тэ улэс кацавэ гиндоря. Например, если ту дарас тэ росԥэнэс андэ школа, андэр со ту патяс, и тут на́йко тэ подритярэл, манг, кай о Иегова тэ дэл тути смилость. Кадяжэ ту можэш тэ мангэспэ пала мудрость, кай правильно тэ подтидэс и алава и тэ дэс дума ковлэс (Луки 21:14, 15). Ай можэт ту умэклян и вас, и тут затасавэн и гиндоря, кай ту нисо на ашэс. Тоди ту можэш тэ мангэспэ, кай о Иегова тэ поможый тути тэ подэс дума кодэлэ христианиноса, кастэ састи вера, кай во тэ виашунэл тут и тэ полэл, со тутэ по ди. Росԥэн лэ Иеговасти вся, шув сама, сар во атвечает пэ тирэ молитвы, на отԥэндюв, кала авэр камэн тути тэ поможын. Тоди тути ашэла май вушэро.

7. Сости тумэ можэте тэ сытён анда кода, со росԥэндя о Маурисио?

⁷ О Иегова дя амэнди всаворэнди тэ терас фартэ важно дила. Патя: во шол сама и фартэ цэний вся, со ту терэс андэ служэния и андэ собрания (Пс. 110:3). Если ту лэса май бут тэ служыс лэ Иеговасти, тутэ вижала тэ улэс и гиндоря, кай ту екжэно. Сар? Уӷанам, со сас андэ жызня кай о ԥрал Маурисиоb посли кода, сар во болделя. Лэско пашутно друӷо ля полокорэс тэ дурёл лэ Иеговастар. Во росԥэнэн: «Кала мэ када диқлэм, мэ лэм тэ дарав: “Вижала мандэ тэ ашавпэ предано лэ Иеговасти? Моӷу мэ тэ авав достойно, кай тэ ужав андэ лэско ери?” Манди здэласпэ, кай мэ екжэно и ман нико на полэл». Со поможысардя амарэ ԥралэсти? Акэ со во ԥэнэн: «Мэ лэм май бут тэ росԥэнав пала Дэл. Када поможысардя манди тэ на гиндосарав кати пала пэстэ и пала пэстирэ трудности. Кала мэ служысаравас амарэ ԥралэнца и ԥэянца, мандэ сас радость андо ди, и мэ ужэ на гиндосаравас, кай мэ екжэно». Чаче, дажэ если амэ нэ можэм тэ жас андэ служэния, амэ всаек лас зор, кала вмести пистросарас и письморя и проповедуем па телефоно. Ай со инке лэсти поможысардя? Во ԥэнэн: «Мэ лэм тэ терав май бут дила андэ собрания и драго ӷотовился каринг всаворэ задании. Кала мэ када теравас, мэ полавас, кай о Иегова и авэр ԥрала и ԥэя ман фартэ цэнин».

КАЛА АМЭНДЭ ԤАРИМОС

8. Со амэндэ можэт тэ авэл по ди, кала исин ԥаримос?

⁸ Амэ ӷанас, кай амэндэ авэла ԥаримос, пока амэ жувас андэ кадэла послидни деса (2 Тим. 3:1). Но всаек дэсавэ трудности моӷут тэ авэн нэожыдано. Например, проблемы лэ ловэнца, лэ зорэса, ай кадяжэ варикас анда амарэ чаче можэт тэ на ашэл. Андэ кацави время амэ можэм тэ умэкас и вас и тэ гиндосарас, кай када най па амаро зор. Особено, кала терэлпэ бида пала бидатэ. Сэрэн: о Иегова всегда паша амэндэ, и лэстирэ зорэса амэндэ вижала тэ виритярас вся.

9. Саво ԥаримос сас кай о Иово?

⁹ Подам дума, сар о Иегова поможысардя пэстирэ служытелёсти лэ Иовости. Лэстэ андэ ек время тердяпэ бида пала бидатэ. Во уӷангля, кай лэстэ на ашэля лэско хабэ, мулинэ лэстирэ слуӷоря, ай со инке май ԥарэс, во хасардя всаворэ пэстирэ бэятонэн (Иов 1:13—19). Лэсти и кадя сас фартэ ԥарэс по ди, тай инке во занасвайля ԥарэ насвалимаса (Иов 2:7). О Иово сас умардо бидаса, и важ када во ԥэндя: «Вэрыцысайля манди и жызня, на камав будэр тэ жував» (Иов 7:16).

10. Сар о Иегова подритярдя лэ Иовос, кай во тэ виритярэл о ԥаримос? (Диқэн и картинка пэ обложка.)

¹⁰ О Иегова на ашадя лэ Иовос. Во лэс фартэ любияс и дя лэсти вся, кай во тэ виритярэл кадэва ԥаримос. О Дэл подя дума лэса. Во напомнил пала пэстири бари мудрость и кай во фартэ любий и заботийпэ пала пэстирэ тварении. Во росԥэндя пала дэсавэ удивительни жывотни (Иов 38:1, 2; 39:9, 13, 19, 27; 40:15; 41:1, 2). Кадяжэ о Дэл бишалдя лэ тэрнэ манушэс, савэс ақарэнас Елиуё, кай во тэ подритярэл и тэ дэл зор лэ Иовости. О Елиуё ԥэндя, кай о Иегова всегда блаӷословий кодэлэн, ко виритярэл о ԥаримос. Кадяжэ через о Елиуё о Иегова дя лэ Иовости совето. О Елиуё поможысардя лэ Иовости тэ парашэл тэ гиндой пала пэстэ и тэ сэрэл, кай амэ фартэ цынёне англа амаро Велико Создателё (Иов 37:14). Инке о Иегова дя лэ Иовости ек дила. Во трэбуй сас тэ помангэлпэ пала пэстирэ трин друӷоря, савэ стердэ бэзэх англа Иегова (Иов 42:8—10). Ай сар адес о Иегова подритярэл амэн, кала амэндэ исин ԥаримос?

11. Сар и Библия можэт тэ поможый амэнди, кала исин ԥаримос?

¹¹ Адес о Иегова на дэл дума амэнца ворта, кадя жэ, сар лэ Иовоса. Но амэ можэм тэ ашунас лэс через лэско алав и Библия (Рим. 15:4). Амэндэ исин розлащи надежда по лашымос, саво авэла англэ, и када придэл зор. Давайте роздиқаса дэсавэ гиндоря анда Библия, савэ моӷут тэ подритярэн амэн, кала исин трудности. Андэ пэско Алав о Иегова обещяет, кай нисо, дажэ баро ԥаримос, «нэ смоӷут тэ одлэн амэндар [лэстири] любовь» (Рим. 8:38, 39). Инке амаро Дэл «пашэ каринг всаворэ, ко ақарэл лэс» андэ молитва (Пс. 145:18). О Иегова ԥэнэн, кай если амэ ласа тэ надеисавас пэр лэстэ, тоди амэндэ вижала тэ виритярас любо ԥаримос и дажэ тэ на хасарас и радость андэ кадэва маменто (1 Кор. 10:13; Иак. 1:2, 12). Инке андэ Библия ԥэнэнпэ, кай амарэ трудности най пэ долӷонэстэ, ай англэ амэн аштярэл и вечность (2 Кор. 4:16—18). О Иегова дэл алав, кай улэла кодэлэс, кастар жан всаворэ трудности — лэ Сатанас и всаворэн, ко терэн о найлашымос (Пс. 37:10). Авелоп драго тэ висытювас дэсавэ библейски стихоря, савэ придэна зор андэ ԥари время.

12. Со о Иегова камэл, кай амэ тэ терас?

¹² О Иегова камэл, кай амэ тэ на промэкас тэ изучаем и Библия и тэ розмышляем пала кода, со проадиносардям. Кала амэ прилас андэ пэстири жызня кода, со уӷанглям, амари вера ашэл май састи и амэ ашас инке май пашэ каринг амаро небесно Дад. Блаӷодаря кадэлэсти амэндэ исин зор тэ пэрэандярас всаворэ трудности. Кадяжэ о Иегова дэл пэско свынто духо кодэлэнди, ко патял ла Библияти. И кадэва духо можэт тэ дэл амэнди «зор, саво май баро обычнонэстар», кай амэ тэ виритярас любо ԥаримос (2 Кор. 4:7—10).

13. Сар кода, со дэл амэнди «о годявэрно и кандино рабо», поможый тэ виритярас о ԥаримос?

¹³ Через «о годявэрно и кандино рабо» о Иегова дэл амэнди вся, кай амэ тэ ашас май пашэ каринг лэстэ (Матф. 24:45). Важ када амэндэ исин бут статьи, видео и диля, савэ поможын, кай амари вера тэ ашэл май састи. Давайте ласа тэ прилас вся, со дэл амэнди о Иегова. Ек ԥэй анда США фартэ блаӷодарно пала кода, со дэл о Иегова. Вой росԥэнэн: «Мэ служысарав лэ Иеговасти 40 лет, и мандэ сас разни ситуацыи, андэ савэ сас найвушэро тэ ашавпэ предано лэ Иеговасти». Кай кадэя ԥэй сас бут ԥаримос. Латирэ папос на ашэля через о мато водителё, латирэ родителя мулинэ ԥарэ насвалимастар, ай и врачоря ԥэндэ, кай латэ виарақлэ и найлащи дук. Со поможысардя лати вся када тэ пэрэандярэл? Вой росԥэнэн: «О Иегова всегда заботияспэ пала мандэ. Во поможыяс манди вся када тэ виритярав. Важ када мандэ по ди кадя жэ, сар кай о Иово, саво ԥэндя: “Пока мэ на мэрава, ашавапэ вужо англа Дэл”» (Иов 27:5).

14. Сар о Иегова подритярэл амэн андэ ԥари время через пэстирэ служытеля? (1 Фессалоникийцам 4:9).

¹⁴ О Иегова сытярэл пэстирэ служытелёнэн, кай вонэ тэ любин и тэ подритярэн ек еқэс андэ ԥари время (2 Кор. 1:3, 4; проадинон 1 Фессалоникийцам 4:9). Кадя жэ сар о Елиуё, амарэ ԥрала и ԥэя фартэ камэн тэ поможын амэнди тэ ашаспэ предани лэ Иеговасти андо ԥаримос (Деян. 14:22). Например, давайте подаса дума пала амари ԥэй Диана. Кала лако хулай фартэ занасвайля, и собрания поможыяс лэнди тэ ашэнпэ предани лэ Иеговасти. Вой росԥэнэн: «Амэнди сас фартэ ԥарэс, но амэ чуствовали, сар о Иегова ритярэл амэн пэстирэ вастэса и сыкавэл и любовь андэ кадэя найвушэро время. Амарэ ԥрала и ԥэя на парашэнас амэнди тэ поможын. Вонэ авэнас в ӷости, звонинас и облэнас. Када поможысардя амэнди тэ на умэкас и вас. Мэ на ӷанав тэ ездисарав пэ машына, но и ԥрала и ԥэя подындярэнас ман пэ собрании и андэ служэния». Сави дэ бари бах тэ авав андэ кацаво любящё ери!

БЛАӶОДАРНИ ЛЭ ИЕГОВАСТИ ВАЖ И ЛЮБОВЬ И ЗАБОТА

15. Васо амэ патяс, кай амэндэ вижала тэ виритярас о ԥаримос?

¹⁵ Кажнонэстэ андар мэндэ можэт тэ авэл варисаво ԥаримос. Но сар амэ уӷанглям, амэ на ласа тэ пэрэандярас кадэва ԥаримос екжэнэ. Амаро любящё небесно Дад Иегова диқэл пала амэндэ. Во всегда паша амэндэ, ӷотово тэ виашунэл амарэ молитвы и тэ подритярэл амэн (Ис. 43:2). Во бут со амэнди дэл, кай амэ тэ виритярас любо ԥаримос. Важ када амэ патяс, кай када па амаро зор. Амэ можэм тэ росԥэнас лэсти, со амэндэ по ди. Амэндэ исин Библия и бут литература, ай кадяжэ любящи ԥрала и ԥэя, савэ ӷотови тэ поможын андэ любо время.

16. Со трэбуй тэ терас, кай о Иегова тэ заботийпэ пала амэндэ вся и вечность?

¹⁶ Када бари бах, кай амэндэ исин кацаво любящё и заботливо небесно Дад, саво никала амэн на ашавэл! «Во радость важ амаро ди» (Пс. 33:21). Амэ сыкаваса пэстири блаӷодарность важ лэ Иеговастири любовь и забота, если ласа тэ прилас вся, со во амэнди дэл. Ай со инке трэбуй тэ терас, кай во тэ на парашэл тэ заботийпэ пала амэндэ? Важно всегда лэс тэ кандас и тэ терас кода, со правильно андэ лэстирэ яқа. Тоди о Иегова лэла тэ заботийпэ пала амэндэ вся и вечность! (1 Пет. 3:12).