«Мэ никала на сымас екжэно»

ЛЭ РОДИТЕЛЁНЭНГО ПРИМЕРО

Мэрно дад и дэй сас католикоря. Но кала вонэ уӷанглэ анда Библия, кай лэ Дэвлэс ақарэн Иегова, вонэ линэ тэ служын лэ Иеговасти анда вся ди. Мэрно дад сас плотнико и вишынэлас анда каш лэ Исусос. Но акана во парудя пэстири бути и стердя по пэрво этажо андэ амаро цэр Зало Царства. Када сас пэрво Зало андэ Сан-Хуа́н-дель-Мо́нте, паша форо Мани́ла, столица пэ Филипины.

Мэ арақаделэм андо 1952 бэрш и сымас восьмо бэято андо ери. Мандэ сас штар ԥрала и трин ԥэя. И родителя фартэ старыинаспэ, кай амэ тэ ашас май пашэ каринг о Дэл. Кала мэ подбарелэм, о дад дя манди совето кажно дес тэ адиносарав ек ӷлава анда Библия. Ай инке о дад поможыяс манди май бут тэ уӷанав важ о Иегова анда литература, сави вимэкэлас амари арӷанизацыя. Дэкала амэндэ в ӷости авэнас и разездни старейшыноря и прецтавителя анда филиало. Амэ всаворэ́ ереса любисарасас тэ ашунас и случаёря, савэ росԥэнэнас кадэла ԥрала. Амэ стодям по пэрво ҭан андэ амари жызня лэ Иеговастири дила.

Мэ бут сости сытелэм кай пэстирэ родителя, савэ андэ вся кандэнас лэ Иеговас. Посли кода сар мэрни дэёры занасвайля и муля, амэ лэ дадэса решыли тэ залас тэ служысарас сар пианероря. Када сас андо 1971 бэрш. Потом, андо 1973 бэрш, кала манди сас 20 лет, на ашэля и лэ дадэс. Кала на ашэля мэрнэ родителёнэн, мэ ашэлэмпэ совсем екжэно. По ди сас кадя найдраго и ԥарэс. Но лэ Дэвлэстирэ обещании сас важ мандэ сар «надёжно и састо» якорё (Евр. 6:19). Када поможысардя манди тэ на умэкав и вас и тэ на дурював лэ Иеговастар. Кала прожыля набут время посли кода, сар на ашэля лэ дадэс, ман ақардэ тэ служысарав сар спецыально пианеро по острово Каро́но андэ область Пала́вано, и мэ лаглэм.

АНДЭ НАЙВУШЭРО ДИЛА ЕКЖЭНО

Кала мэ авелэм по острово Кароно, манди сас 21 бэрш. Мэ вибарелэм андо баро форо и важ када мэ дэм наздив кодэлэсти, кай катэ мало кастэ сас свето и паи. Мэ на ԥэнав ужэ важ и машыны и матацыклоря. Хоть по острово сас дэсавэ ԥрала, пианеро сымас ек мэ. Важ када манди часто прижаласпэ тэ росԥэнав важ о Дэл екжэно. Андо пэрво шон мэ фартэ нудисаравас пала пэско ери и пала друӷоря. Сэрав, сар рятянца мэ диқавас пэ звёзды и ровавас. Мэ гиндосаравас: «Всё, хутила! Мэ рисавав цэрэ».

Андэ кацави время мэ лавас тэ мангавпэ лэ Иеговасти и росԥэнавас лэсти вся, со мандэ по ди. Мэ вспоминал гиндоря анда Библия и анда амари литература, савэ придэнас манди зор. Мэ часто гиндосаравас пала алава анда Псалом 19:14. Мэ полэм: о Иегова ашэла «мэрнэ Плаеса», если мэ лава тэ гиндосарав пала кода, со лэсти чалёл, — пала лэстири дила и пала лэско характеро. Манди фартэ поможысардя и статья анда «Сторожэво башня», сави называлась «Ту най екжэно»a. И мэ най еқвар ла пэрэадиносаравас. Мэ на сымас екжэно — мэ сымас лэ Иеговаса. Ай када розлащи возможность тэ мангэспэ, тэ уӷанэс варисо нэво и тэ гиндос пала Иегова.

Посли кода сар мэ авелэм по Кароно, мэ ашэлэм старейшына. Мэ сымас ек старейшына и важ када мэ проандяравас Школа теократического служэния, и встреча важ и служэния, и изучения па книжка пэ встреча и проандяравас изучения па «Сторожэво башня». Кадяжэ мэ кажно курко росԥэнавас ек библейско речь. Екжэнэ полэн, дажэ если мэ тэ камлоп тэ авав екжэно, мандэ пэ када дажэ на ашэласпэ время!

Манди фартэ чалёлас тэ служысарав по Кароно. Дэсавэ анда кодэла, кас мэ сытяравас па Библия, болделэ. Но и би ԥаримаско на обжыляпэ. Инке амари собрания трэбуй сас тэ служый пэ бут цыкнорэ островоря. Мэ часто ававас интя пэ маторно лодка, кала сас буря и найлащи поӷода. Ай мэ дажэ тэ плавуисарав на ӷанав! Но сар бы ԥарэс манди тэ на авэл, о Иегова всегда фэрияс и подритярэлас ман. Май интя мэ полэм, кай вся кадэя время о Дэл поможыяс манди тэ авав ӷотово каринг инке май ԥари дила.

ПАПУА — НЭВИ ГВИНЕЯ

Андо 1978 бэрш ман бишалдэ андэ Па́пуа — Нэви Гвине́я. Андэ кадэя страна бут плая, вой находийпэ каринг о северо ла Австралиятар, ай па размеро примерно кацави жэ, сар и Испания. Мэ дэм наздив, кай котэ трин милионоря мануша дэнас дума май бут чем пэ 800 шыба. Мэ сымас радо, кай май бут мануша моӷли тэ дэн дума пэ шыб меланезийско пи́джино, пэ сави инке ԥэнэн ток-пи́сино.

Мэ дэсави время служысаравас андэ английско собрания андэ столица Порт-Мо́рсби. Потом мэ пэрэжылэм андэ собрания, андэ сави дэн дума пэ шыб ток-пи́сино. Инке мэ ԥиравас пэ курсоря, кай тэ сытював и шыб. Мэ сразу прилавас андэ служэния кода, со уӷанавас пэ кадэла курсы. Када поможысардя манди май ӥто тэ висытював и шыб. Прожыля набут время, и мандэ ужэ вижалас тэ ԥэнав и речи пэ шыб ток-пи́сино. Сар жэ мэ дэм наздив, кала май набут чем через бэршэстэ, ман назначили тэ служысарав пэ кадэя шыб сар раёно старейшына. Мэ трэбуй сымас тэ авав андэ собрания, савэ росшутэ па разни барэ области.

Важ кода кай и собрании находинаспэ дур ек еқэстар, манди трэбуй сас тэ стидав бут раёни канӷрэсоря. Кочай мэ часто сымас андо дром. Спэрва мэ не моӷ тэ вишав анда шэро о гиндо, кай мэ екжэно: нэви страна, нэви шыб, нэвэ понятии. Котэ сас бут плая и почти на сас лашэ дрома. Кай тэ попэрав каринг и ԥрала и ԥэя, почти кажно курко манди прижаласпэ тэ вуряв. Дэкала мэ сымас екжэно по самолёто, саво тинояспэ и еле вурялас. Кала во вурялас, манди сас кадя жэ страшно, сар пэ лодка, пэ сави мэ ладавас через и моря!

Най всаворэндэ сас телефоноря, важ када мэ пистросаравас андэ собрании письморя. Но и сас кадя, кай мэ ававас май рано, чем вонэ дожанас каринг и ԥрала. Важ када мэ пушавас кай катутнэ мануша, кай можно тэ виарақав лэ свидетелёнэн. Кажно разо и ԥрала и ԥэя анда ди прилэнас ман, и мэ полавас, кай вся, пэр со мэ жав, када ашэл. Мэ андэ вся диқавас лэ Иеговаско вас и ашэлэм пэбутэстэ май пашэ каринг лэстэ.

Кала мэ пэрво разо сымас по острово Бугенви́лё, каринг мандэ поджыля мурш пэстиря хулаяса, и вонэ радостяса пушлэ мандар: «Ту ӷатярэс амэн?» Вонэ сас пэрви анда кодэла, касти мэ росԥэнавас важ о Дэл андо Порт-Морсби. Мэ залэм тэ сытярав лэн па Библия, ай потом пэрэдэм ԥралэсти, саво котэ жувэлас. Ай акана вонэ лэдуй болделэ и андярэн лэ Иеговастири время! Када ек анда бут подаркоря лэ Иеговастар, савэ во дарияс манди важ и трин бэрш, пока мэ служысаравас андэ Папуа — Нэви Гвинея.

АМАРО НАЙБАРО ДИЛОВО ЕРИ

Андо 1978 бэрш, кала мэ инке служысаравас по Кароно, мэ познакомился еқа райканя ԥьяса, савя ақарэн Адэ́ль. Вой отдэлас вся пэско зор андэ пианерско служэния. Вой екжэни барярэлас дуе бэятонэн — лэн ақарэн Самуэ́лё и Шы́рли, — ай инке вой диқэлас пала пэстири ԥури дэй. Андо 1981 бэрш, кала мэ рисайлэм пэ Филипины, амэ ла Адэляса цэлдям ябьяв. И посли ябьяв амэ вместе служысарасас сар пианероря и заботисавасас пала амаро ери.

Хоть мэ и ашэлэм еряло мануш, андо 1983 бэрш ман всаек манглэ тэ пэрэладав по острово Лина́пакано андэ область Палавано, кай упалэ тэ терав лэ Дэвлэстири дила сар спецыально пианеро. Амэ всаворэ́ ереса пэрэлаглям пэ кодэва дурутно острово. Тоди котэ на сас инке ни ек свидетелё. Через бэршэстэ мэрня хулаятири дэй муля. Но кода, кай амэ вся и время терасас лэ Дэвлэстири дила, поможысардя амэнди тэ пэрэандярас кадэя дук. Андо Линапакано амэндэ залинэпэ кадя бут изучении па Библия, кай амэнди трэбуй сас найбаро Зало Царства. Важ када амэ строисардям лэс екжэнэ. И ужэ через трин бэрш пэ Вечеря сас 110 мануш. Бут андар лэндэ болделэ. Амэ самас фартэ лошалэ кадэлэсти!

Андо 1986 бэрш ман бишалдэ по острово Кулионо. Котэ сас гаворо, кай жувэнас и прокажони мануша. Через дэсавэ бэрша и Адэль тожэ ашэля спецпианеро. Спэрва амэ дарасас тэ росԥэнас пала Дэл лэ манушэнди, савэндэ сас кодэва насвалимос. Но и катутнэ вазвещателя ԥэндэ амэнди, кай лэн лечин, и амэ можэм тэ на дарас тэ занасвавас. Дэсавэ анда кадэла прокажони авэнас каринг амари ԥэй цэрэ, кай тэ авэн пэ встреча. Амэ ӥто присытелям каринг кадэла мануша. Амэнди сас фартэ драго по ди тэ росԥэнас лэнди пала лэ Дэвлэстирэ обещании, важ кода кай лэнди сас ԥарэс — вонэ гиндонас, кай лэндар одбанделя най кати о миро, но и о Дэл. Ай кала вонэ уӷанэнас, кай авэла время и вонэ будэр на авэна насвалэ, кадэлэстар лэнди ашэлас май вушэро по ди (Лука 5:12, 13).

Ай сар амарэ бэяцэ присытелэ каринг и жызня по Кулёно? Амэ ла хулаяса поласас, кай лэнди трэбуй лашэ друӷоря. И важ када амэ ақардям дуе тэрнорэ ԥэян па Кароно тэ пэрэладэн пэ амаро острово. О Самуэлё и Шырли вместе лэ ԥэянца проандярэнас бут изучении па Библия лэ катутнэ бэятонэнца. Ай амэ ла хулаяса изучали лэндирэ родителёнэнца. Сас время, кала май драго уӷанэнас и Библия аж 11 еря. Лэ манушэн, савэ камэнас тэ уӷанэн и Библия май драго, ашэля кадя бут, кай амэнди прижыляпэ тэ стидас нэви собрания!

Спэрва андэ кодэва ҭан старейшына сымас ек мэ. Май интя о филиало мангля ман тэ проандярав кажно курко и встречи най кати важ и восемь вазвещателя анда амари собрания, но и важ и девять — андо гаворо Марили́. Кай интя тэ попэрэс, трэбуй сас тэ плавуис пэ лодка трин часоря. Посли встреча амэ всаворэ ереса бут часоря жасас па дром через и плая, кай тэ проандярас изучения андо гав Ха́лси.

И андэ Марили, и андэ Халси бут мануша авэнас каринг о Дэл. Важ када прожыля время, и амэ строисардям андэ лэдуй гавора Зало Царства. Кадя жэ сар и андо Линапакано, май бут материалоря важ и стройка динэсас и ԥрала и кодэла, ко приашундёлас каринг и лащи новость. И вонэ жэ май бут и строинас. Андо Зало андэ Марили поместинаспэ 200 мануша, и лэс можно сас тэ стерэс май баро, кай котэ тэ прожан и раёни канӷрэсоря.

БИДА, ГИНДОРЯ, КАЙ МЭ ЕКЖЭНО, И УПАЛЭ ЛОШАЛО

Андо 1993 бэрш, кала и бэяцэ подбарелэ, мэ и Адэль залям тэ служысарас сар раёни пэ Филипины. Потом андо 2000 бэрш ман ақардэ пэ Школа важ лэ ԥралэндири дила (ШԤД), кай май интя мэ тэ авав котэ преподавателё. Манди здэласпэ, кай мэ на поджав важ кадэя дила. Но и Адэль патялас, кай мандэ вся вижала, и подритярэлас ман. Вой ԥэнэнас, кай о Иегова дэла манди зор и мандэ вся вижала (Флп. 4:13). И Адэль ӷанэнас када пар пэстэ, важ кода кай вой драго терэлас лэ Дэвлэстири дила, хоть латэ и сас найлашо зор.

Андо 2006 бэрш, кала мэ сытяравас андо ШԤД, кай и Адэль виарақлэ болезнь, пэ сави ԥэнэн Паркинсо́но. Важ амэндэ када сас бида! Мэ камлэм тэ отԥэндював дэсавя дилатар андэ арӷанизацыя, кай май бут тэ шав сама мэрня хулая. Но вой ԥэндя: «Хамэлэс, виарак манди врачос. Во поможыя манди тэ лечисавав. Ай вся авэр авэла андэ лэ Иеговастирэ вас». Шов бэрш и Адэль на парашэлас тэ служый лэ Иеговасти и ни пэр со на ровэласпэ. Кала вой ужэ не моӷла тэ ԥирэл, вой росԥэнэнас важ о Дэл андо инвалидно кресло. Ай кала лати ужэ ашэля ԥарэс тэ дэл дума, вой отвечала пэ встречи еқэ или дуе алавэнца. И ԥрала и ԥэя вся и время шонас лати сообщении, андэ савэ подритярэнас ла и блаӷодаринас важ лако райкано примеро, кай вой састэс виритярэлас о ԥаримос. Вой муля андо 2013 бэрш. Май бут чем 30 бэрш паша мандэ сас хулаи, сави любияс ман и никала на ашавэлас. И акана ман упалэ линэ тэ хан и гиндоря, кай мэ екжэно, и манди сас фартэ ԥарэс по ди.

И Адэль камэлас, кай мэ тэ на парашав тэ терав лэ Дэвлэстири дила. Кадя мэ и теравас. Мэ вся и время теравас дила, и када поможысардя манди тэ на гиндосарав пала кода, кай мэ екжэно. Лэ 2014 бэршэстар жы кай 2017 бэрш мэ ававас андэ тагальскиb собрании андэ страны, кай амари дила сас тала запрето. Май интя мэ ававас андэ тагальски собрании по Тайванё, андэ США и Канада. Андо 2019 бэрш мэ проандяравас и Школа важ кодэла, ко росԥэнэн пала Царство, пэ английско шыб андэ Индия и андо Таиландо. Кадэя дила анэнас манди бари радость! Мэ сымас па чачимастэ бахтало, кала вся пэско зор отдавас андэ служэния лэ Иеговасти.

ПОМОЩЬ САС ВСЯ И ВРЕМЯ

Кай бы мэ тэ на служысарав, и ԥрала и ԥэя ашэнас манди сар чаче и тэ ашавав лэн сас ԥарэс. Но мэ сытелэм андэ вся тэ патяв лэ Иеговасти. Мэ всегда полавас, кай о Иегова паша мандэ и када поможыяс манди тэ виритярав вся, со терэласпэ андэ мэрни жызня. Адес мэ терав лэ Дэвлэстири дила сар спецыально пианеро пэ Филипины. И собрания, андэ сави мэ служысарав, ашэля важ мандэ сар любящё ери. Кадяжэ мэ лошало, кай кай о Самуэлё и Шырли кацави жэ састи вера, сар сас кай лэндири дэй (3 Иоан. 4).

Да, андэ мэрни жызня сас бут ԥаримос. Мэ нащи бистрав, сар мучияспэ лэ насвалимастар и муля мэрни кучутни хулаи. Кадяжэ манди часто прижаласпэ тэ присытював каринг кода, со парудёлас андэ мэрни жызня. Но мэ диқавас, кай о Иегова «найдур кажнонэстар андар мэндэ» (Дила 17:27). «Лэ Иеговаско вас най скурто» — во подритярэл и придэл зор пэстирэ манушэнди, кай бы вонэ тэ на жувэн (Ис. 59:1). О Иегова, мэрно Плай, сас манца вся мэрни жызня, и мэ фартэ лэсти блаӷодарно пала када. Мэ никала на сымас екжэно.