Дума пэ разни шыба. Сости сытярэл и Библия?
Библейско ответо
Дума пэ разни шыба — када чуда, через сави дэсавэ христианоря андо пэрво вико моӷли «[тэ дэн дума] пэ разни шыба», савэ никала на сытелэ (Дила 10:46). Кодэла, ко ӷанэнас кадэла шыба, вушэро полэнас кодэлэн, ко дэлас дума (Дила 2:4—8). И дума пэ разни шыба, када ек анда подаркоря, савэ о Дэл дя через пэско свынто зор дэсавэ христианонэнди андо пэрво вико (Евреёря 2:4; 1 Каринфо 12:4, 30).
Кай и кала линэ тэ дэн дума пэ разни шыба?
Пэрво разо кадэя чуда тердяпэ андо Иерусалимо андо 33 бэрш а. э., тэсара андэ кодэва дес, кала и иудеёря справинас лэ Куртенго празнико. Варикай 120 лэ Исусостирэ Христостирэ ученикоря стидэпэ вместе, и, «всаворэнди, ко котэ находияспэ, сас дино о свынто зор, и вонэ задинэ дума пэ разни шыба» (Дила 1:15; 2:1—4). Стидэпэ фартэ бут мануша «анда разни страны», и «кажно ашунэлас, кай и ученикоря дэн дума пэ лэстири чачи шыб» (Дила 2:5, 6).
Состэ трэбуй сас и дума пэ разни шыба?
Тэ дицол, кай о Дэл подритярэл лэ христианонэн. Андэ дэлмутни время о Дэл сыкавэлас лэ манушэнди удивительно дила, сави доԥэнэнас, кай во подритярэл пэстирэ манушэн, например лэ Маисеёс (Исход 4:1—9, 29—31; Числа 17:10). Важ када о Дэл стердя кадя, кай и мануша тэ дэн дума пэ разни шыба: када сыкавэлас, кай о Дэл подритярэл и нэви христианско собрания. О апостало Павло пистросардя: «Тэ дэн дума пэ авэр шыба — када чуда най важ кодэла, ко патял, ай важ кодэла, ко на патял» (1 Каринфо 14:22).
Када поможысардя лэ христианонэнди май бутэнди тэ росԥэнэн и лащи новость. Акэ со ԥэндя о миро, кала ашундя лэ Исусостирэ учениконэн пэ лэ Куртенго празнико: «Всаворэ амэ ашунас, сар вонэ дэн дума пэ амарэ шыба пала бари лэ Дэвлэстири дила» (Дила 2:11). Вижал, кадэя чуда инке трэбуй сас важ кода, кай и христианоря моӷли тэ росԥэнэн пала Дэл и тэ жан «каринг всаворэ народоря», кай тэ поможын лэ манушэнди тэ ашэн ученикоря, сар и приԥэндя о Исусо (Дила 10:42; Матфеё 28:19). Андэ кодэва дес лэ Христостирэ ученикоря ашэлэ варикай 3 000 мануша, савэ диқлэ кадэя чуда и ашунглэ и лащи новость лэ христианонэндар (Дила 2:41).
Сас и бах тэ дэн дума пэ разни шыба дини навсегда?
Най. И бах лэ свынтонэ зорэстар, ай кадяжэ и способность тэ дэн дума пэ авэр шыба, сас дини кати пэ дэсави время. Андэ Библия пистромэ: «Ай если тэ дас дума пала бах тэ пэрэдэн и дэвликунэ алава, тэ дэн дума пэ авэр шыба или тэ авэн бужанглэ, то када будэр на авэла» (1 Каринфо 13:8).
Кала парашэлэ тэ дэн дума пэ разни шыба?
Обычно и бах лэ свынтонэ зорэстар пэрэдэласпэ аврэ христианонэнди, кала паша лэндэ сас и апосталоря, савэ блаӷословинас лэн (Дила 8:18; 10:44—46). Май ӥто всаворэстар, кодэла, кастэ сас бах лэ свынтонэ зорэстар через и апосталоря, будэр никасти ла на пэрэдэнас (Дила 8:5—7, 14—17). Призындярам примеро: кай о рай исин власть тэ видэл праворя, кай о мануш тэ ездий пэ машына, но о водителё када не можэт тэ терэл. Вижал, и способность тэ дэн дума парашэля тэ авэл после кода, сар мулинэ и апосталоря, ай кадяжэ и мануша, савэнди вонэ пэрэдинэ кадэя способность.
Со можно тэ ԥэнас пала кода, кай и андэ амари время дэн дума пэ разни шыба?
И чуда тэ дэн дума пэ разни шыба, сар дицол, парашэля тэ авэл май пашэ каринг о дуйто вико андэ амари эра. Адес нико не можэт точно тэ ԥэнэн, кай о Дэл дя лэсти кацави бахa.
Пар со можно тэ ӷатярэс лэ чачунэ христианонэн?
О Исусо ԥэндя, кай лэстирэ учениконэн лэна тэ ӷатярэн па бари любовь (Иоано 13:34, 35). О апостало Павло тожэ сытярэлас, кай лэ чачунэ христианонэн ӷатярэна па любовь (1 Каринфо 13:1, 8). Во дя тэ полас, кай через лэ Дэвлэско свынто зор кай и христианоря можэт тэ авэл характеро, када о лашымос лэ Дэвлэстирэ зорэстар, и само ӷлавно андэ кадэва характеро, — када и любовь (Галатия 5:22, 23).
a Дик и статья «Способность говорить на языках. От Бога ли она?».