Тэ дав алав лэ Иеговасти тэ жував важ лэстэ и тэ болдював?

1. Со ту камэс тэ пушэс?

КАЛА ту залян тэ сытёс па кадэя книжка, ту бут со уӷанглян анда Библия. Например, пала вечно жызня, со терэлпэ лэ мулэнца и пала кода, кай, ко муля, ринапэ каринг и жызня (Экклезиаст 9:5; Луки 23:43; Иоанна 5:28, 29; Откровение 21:3, 4). Можэт ту ужэ ԥирэс пэ собрании кай лэ Иеговастирэ свидетеля и полян, кай вонэ полэн лэ Дэвлэс, сар трэбуй (Иоанна 13:35). Файма, тутэ ужэ исин дружба лэ Иеговаса и ту ужэ камэс лэсти тэ служыс. Тоди ту камэс тэ пушэс: «Со мэ акана трэбуй тэ терав?»

2. Васо о эфиопо закамля тэ болдёл?

² Пала када пушлясас ек эфиопо, саво жувэлас андэ лэ Иисусостири время. Во ԥэндя: «Акэ о паи, со ритярэл ман тэ на болдював?» (Деяния 8:26—36). Васо во закамля тэ болдёл? Кала ек анда лэ Иисусостирэ ученикоря, о Филиппо, росԥэндя лэсти, кай о Иисусо, када Христос, када ля лэс лэ одестар и во закамля тэ болдёл.

3. а) Со о Иисусо приԥэндя пэстирэ учениконэнди? б) Сар трэбуй тэ болдён?

³ Андэ Библия драго пистромэ, кала о мануш камэл тэ служый лэ Иеговасти, во трэбуй тэ болдёл. О Иисус Христос приԥэндя пэстирэ учениконэнди: «Жан кай всаворэ народоря, сытярэн лэ манушэн, кай вонэ тэ авэн ученикоря. Болэн лэн» (Матфея 28:19). О Иисусо кадяжэ болделя, и най просто шутя по шэро паи, ай вся и тила сас тала паи (Матфея 3:16). Кадя жэ и акана, и христианоря, кала болдён, трэбуй вся и тила тэ авэл тала паи.

4. Со сыкавэл, кала мануш болдёл?

⁴ Кала мануш болдёл, кадэлэса во сыкавэл, кай камэл тэ авэл лэ Дэвлэско друӷо и тэ служый лэсти (Псалом 40:7, 8). Со трэбуй тэ терэс англа кода, сар тэ болдёс?

ТРЭБУЙ ТЭ ӶАНЭС И ТЭ ПАТЯС

5. а) Если ту камэс тэ болдёс, со трэбуй тэ терэс? б) Васо трэбуй тэ ԥирэс пэ собрании?

⁵ Англа кода, сар тэ болдёс, трэбуй тэ уӷанэс пала Иегова и пала Иисус Христос. И ту ужэ лян кадя тэ терэс, кала залян тэ сытёс па Библия. (Адиносар Иоанна 17:3.) Но када кати пэрво, со трэбуй тэ стерэс. И Библия сытярэл, кай трэбуй «бут и драго тэ ӷанэн», со камэл о Дэл (Колоссянам 1:9). Андэ када тути поможына и собрании, савэ исин кай лэ Иеговастирэ свидетеля. Кала ту на промэкэса и собрании, тоди тутэ авэла лащи дружба лэ Дэвлэса (Евреям 10:24, 25).

6. Вся и Библия чи най трэбуй тэ ӷанэс, кай тэ болдёс?

⁶ О Иегова на аштярэл, кай ту жы каринг кода, кай тэ болдёс, ужэ ӷанэса вся и Библия. Во кадяжэ на аштярэлас када и лэ эфиопостар, саво закамля тэ болдёл (Деяния 8:30, 31). Амэ ласа тэ уӷанас пала Дэл вся и вечность (Экклезиаст 3:11). Кай тэ болдёс, трэбуй драго тэ ӷанэс ӷлавно гиндо анда Библия, и тэ авэс кодэлэса соӷласно (Евреям 5:12).

7. Со через кода, со уӷанглян анда Библия, ту лян тэ терэс?

⁷ Андэ Библия пистромэ: «Ай ко на патял, нэ сможэт тэ уӷодий лэ Дэвлэсти» (Евреям 11:6). Важ када жы каринг кода, кай тэ болдёл, о мануш трэбуй тэ патял лэ Иеговасти. Андэ Библия пистромэ, кай дэсавэ мануша, савэ варикала жувэнас андо Коринфо, ашундэ, со росԥэнэнас лэ Иисусостири ученикоря, «патяе и болделэ» (Деяния 18:8). Кадя и ту уӷанглян анда Библия и патяян андэ кода, пала со о Дэл дэл алав, и инке патяян, кай о Иисусо отдя пэстири жызня, кай тэ витинэл лэ манушэн лэ бэзэхэстар и ла смэртятар (Иисус Навин 23:14; Деяния 4:12; 2 Тимофею 3:16, 17).

РОСԤЭН АВРЭНДИ ПАЛА ЧАЧИМОС АНДА БИБЛИЯ

8. Васо ту закамэса тэ росԥэнэс аврэнди пала кода, со ту уӷанэс?

⁸ Ту лэса тэ уӷанэс чачимос анда Библия и диқэса, сар во поможый тути андэ жызня. Тоди ту инке май фартэ лэса тэ патяс лэ Иеговасти. Кадэлэстар ту закамэса тэ росԥэнэс инке варикасти пала кода, со ту уӷанглян (Иеремия 20:9; 2 Коринфянам 4:13).

9, 10. а) Каса можэш тэ дэс дума пала кода, со уӷанглян? б) Со трэбуй тэ стерэс, кай тэ жас ла собранияса тэ росԥэнэс важ о Дэл?

⁹ Файма, ту закамэса тэ росԥэнэс пала кода, со уӷанглян нэво, лэ ерести, лэ друӷонэнди, лэ сосидонэнди чи кодэлэнди, каса ездис пэ бутятэ чи терэс пэ бути. Дэ дума ковлэс и анда оди. Прожала время и тути камэлапэ тэ жас тэ росԥэнэс важ о Дэл еқэҭанэ ла собранияса. Кала ту закамэса када тэ терэс, ԥэн пала када кодэлэсти, ко сытярэл тут па Библия. Во диқэла, если ту камэс тэ жас тэ росԥэнэс важ о Дэл и ужэ жувэс па лэ Дэвлэстирэ законоря, тоди тумэ доԥэнэнапэ тэ диқэнпэ дуе старейшынонэнца анда собрания.

¹⁰ Васо и старейшыноря камэн тэ подэн дума туса? Важ кода, кай тэ полэн, драго ту полэс о ӷлавно гиндо, пала со сытярэл и Библия и патяс ту андэ кода. Инке трэбуй тэ полэн, жувэс ту кадя, сар пистромэ андэ Библия, и камэс ту тэ ашэс лэ Иеговаско свидетелё чи най. На трэбуй тэ дарас кадэла думатар, важ кода кай и старейшыноря фартэ заботинпэ пала мануша анда собрания (Деяния 20:28; 1 Петра 5:2, 3). Посли кадэя дума и старейшыноря ԥэнэна тумэнди, можэш ту чи най тэ росԥэнэс важ о Дэл еқэҭанэ ла собранияса.

11. Васо англа кода, сар тэ жас ла собранияса тэ росԥэнэс важ о Дэл, трэбуй тэ парувэс пэстири жызня?

¹¹ Можэт и старейшыноря ԥэнэна, кай англа кода, сар тэ жас тэ росԥэнэс важ о Дэл, тути трэбуй инке дэсо тэ парувэс андэ пэстири жызня. Васо када трэбуй тэ стерэс? Кала ту росԥэнэс лэ манушэнди важ о Дэл, ту дэс дума лэ Дэвлэстирэ алавэстар, и важ када тути трэбуй тэ андярэс достойно жызня, кай тэ ԥэнэн, кай ту чаче лэ Дэвлэско служытелё (1 Коринфянам 6:9, 10; Галатам 5:19—21).

КАИСАВ И ПАРУВ ПЭСТИРИ ЖЫЗНЯ

12. Васо тэ каинпэ трэбуй всаворэ мануша?

¹² Жы каринг кода, сар тэ болдёс, трэбуй тэ стерэс инке ек важно шаго. О апостоло Павло ԥэндя: «Каинпэ и парувэн пэстири жызня, кай тэ простийпэ тумаро бэзэх» (Деяния 3:19). Сар када тэ каиспэ? Када, кала тути по ди ԥарэс, кай варикала стердян найлашэ дилы. Например, тэ каиспэ трэбуй, если ту андярэсас найлащи, билажаварди жызня. Тэ каинпэ трэбуй дажэ кодэла, ко вся и жызня старыияспэ тэ андярэл пэс драго. Васо? Важ кода кай всаворэ мануша ӷрешни и трэбуй, кай о Дэл лэн тэ простий (Римлянам 3:23; 5:12).

13. Со сыкавэл о алав тэ «парудёс»?

¹³ Хутилэла просто тэ жалуисарас пала кода, со терасас най кадя? Най. О апостоло Пётро ԥэндя, кай трэбуй инке тэ парудёс, када тэ парашэс тэ андярэс и найлащи жызня, и тэ залэс тэ жувэс па аврятэ. Ԥэнаса, ту пэрво разо авелян андэ варисаво форо. И андэ ек маменто полэс, кай ладэс най андэ кодэя риг. Со ту терэса? Канешно, ту сшоса и скорость. Ту тердёса, ай потом розбандёса (аврэ алавэса, парувэса о дром) и лэса тэ ладэс андэ авэр риг, андэ сави трэбуй. Кадя жэ и кала сытёс па Библия, ту можэш тэ полэс, кай трэбуй варисо тэ парувэс андэ пэстири жызня. Тутэ вижала тэ стерэс када, ԥэнаса, тэ розбандёс и тэ залэс тэ жувэс правильно?

ДЭС АЛАВ ТЭ ЖУВЭС ВАЖ О ИЕГОВА

14. Со сыкавэла, кай дэс алав лэ Иеговасти?

¹⁴ Инке ек важно шаго, саво трэбуй тэ стерэс англа кода, сар тэ болдёс, када тэ дэс алав лэ Иеговасти тэ жувэс важ лэстэ. Када ту трэбуй тэ стерэс андэ молитва. Ту дэс алав лэ Иеговасти, кай лэса тэ служыс кати ек лэсти и пэ пэрво ҭан тутэ авэла кода, со камэл о Дэл (Второзаконие 6:15).

15, 16. Васо о мануш можэт тэ закамэл тэ дэл алав лэ Дэвлэсти тэ жувэл важ лэстэ?

¹⁵ Кала дэс алав тэ служыс ек лэ Иеговасти, када можно тэ сыстос кодэлэса, кала дэс алав манушэсти, савэса камэс тэ прожувэс вся и жызня. Роздиқам ек примеро. Тэрнэ манушэсти чалёл тэрни манушни. Во старыийпэ тэ уӷанэн ла со май драго. Прожал время и во полэл, кай вой лэсти фартэ чалёл и камэл тэ жэнийпэ пэр латэ. Во полэл, кай када фартэ бари дила. Но во всаек камэл тэ жэнийпэ, важ кода кай любий ла.

¹⁶ Кала ту уӷанэса лэ Иеговас со май драго, тоди ту полэса, кай любис лэс и камэс тэ служыс лэсти анда вся оди. Ту закамэса андэ молитва тэ дэс алав лэ Дэвлэсти, кай служыса лэсти. Андэ Библия пистромэ, кай кажно, ко камэл тэ жал па лэ Иисусоско дром, трэбуй тэ отԥэндёл пэстар (Марка 8:34). Со када сыкавэл? Када сыкавэл, кай трэбуй андэ вся тэ кандэс лэ Дэвлэс. Важ кода кай, со камэл о Дэл май куч, чем кода, со фартэ камэлпэ и кода, со камэс тэ домардёс. (Адиносар 1 Петра 4:2.)

НА ДАР, КАЙ НА ЗРИТЯРЭСА

17. Васо дэко дарал тэ дэл алав лэ Иеговасти?

¹⁷ Дэко, файма, дарал тэ дэл алав лэ Иеговасти, кай тэ служый лэсти, важ кода кай на зритярэла пэско алав. Кацаво мануш дарал, кай на уӷодия лэ Иеговасти. Ай варико гиндой, если на дя алав лэ Дэвлэсти, тоди о Дэл на спушэла лэстар пала кода, со во терэл.

18. Со поможыя тути тэ на дарас, кай на зритярэса о алав?

¹⁸ И любовь каринг о Дэл поможыя тути тэ на дарас кодэлэстар, кай на зритярэса о алав. Если ту любис лэс, тоди ту стерэса вся, кай тэ зритярэс пэско алав (Экклезиаст 5:4; Колоссянам 1:10). Ту на лэса тэ гиндос, кай тэ кандэс лэ Дэвлэс, када фартэ ԥарэс. О апостоло Иоанно пистросардя: «Любовь каринг о Дэл дицол андэ кода, кай амэ ритярас лэско законо и лэско законо найԥаро» (1 Иоанна 5:3).

19. Васо трэбуй тэ на дарас тэ дэс алав лэ Дэвлэсти?

¹⁹ О Иегова на аштярэл амэндар, кай если амэ даса лэсти алав, амэ на ласа ни андэр со тэ шылисавас. Во на аштярэл амэндар май бут, чем кода, со амэ можэм лэсти тэ дас (Псалом 103:14). О Иегова дэл алав, кай поможыя амэнди тэ терас, сар май драго (Исаия 41:10). Андэ Библия пистромэ: «Патя лэ Иеговасти всаворэ тирэ одеса... ...И во стерэла тиро дром ворта» (Притчи 3:5, 6).

ТЭ БОЛДЁС

20. Со трэбуй тэ стерэс посли кода, сар дян алав лэ Иеговасти?

²⁰ Если ту ужэ дян алав лэ Иеговасти, тоди вижал, ту можэш тэ терэс инке ек шаго, када тэ болдёс.

21, 22. Сар ту можэш англа всаворэ тэ сыкавэс, кай камэс тэ служыс лэ Дэвлэсти?

²¹ Трэбуй тэ ԥэнэс лэ старейшынасти, саво координаторо андо совето старейшын андэ пэстири собрания, кай ту ужэ дян алав лэ Иеговасти и камэс тэ болдёс. Во мангэла варикас анда старейшыноря тэ подэн дума туса пала ӷлавни гиндоря анда Библия. Если вонэ диқэна, кай ту ӷанэс, со трэбуй, вонэ ԥэнэна тути тэ болдёс по само пашутно канӷрэсо кай лэ Иеговастирэ свидетеля. По канӷрэсо авэла речь, андэ сави драго росԥэнэна, со сыкавэл кода, кала о мануш болдёл. Посли када, кодэва, ко росԥэнэна и речь, ԥэнэна кодэлэнди, ко камэл тэ болдёл, тэ дэн атвето пэ дуй важни вопросоря. Кала ту англа всаворэ ԥэнэса «да», ту сыкавэса, кай камэс тэ служыс лэ Дэвлэсти (Римлянам 10:10).

²² Акана ту ӷотово тэ болдёс. Тут болэна полностью андо паи. Кода, кай ту болделян, сыкавэла всаворэнди, кай ту дян алав лэ Иеговасти тэ жувэс важ лэстэ и ашэлян лэ Иеговаско свидетелё.

СО СЫКАВЭЛ КОДА, КАЛА БОЛДЁН?

23. Со сыкавэн и алава, кай трэбуй тэ болдёс «через о алав лэ Дадэско, лэ Шавэско и лэ свынтонэ духоско»?

²³ О Иисусо ԥэндя, кай лэстирэ ученикоря трэбуй тэ болдён «через о алав лэ Дадэско, лэ Шавэско и лэ свынтонэ духоско». (Адиносар Матфея 28:19.) Када сыкавэл, кай амэ прижанас лэ Иеговастири власть, и полас, со стердя о Иисусо андэ кода, со загиндосардя о Дэл. Кадяжэ полас, кай, со о Иегова камэл тэ стерэл, пэ кода лэстэ исин о свынто духо. (Псалом 83:18; Матфея 28:18; Галатам 5:22, 23; 2 Петра 1:21).

24, 25. а) Со сыкавэл кода, кай болделян? б) Пала со подаса дума андэ послиднё ӷлава.

²⁴ Кала о мануш болдёл, када во, ԥэнэса, мэрэл кодэла жызнятар, сави лэстэ сас, ай кала ваздэлпэ анда паи, во залэл тэ жувэл нэвя жызняса, сар лэ Дэвлэско служытелё. На бистэр, кай ту дян алав най варисавэ манушэсти чи варисавя арӷанизацыяти чи варисавя дилати. Ту отдян пэстири жызня лэ Иеговасти.

²⁵ Кала ту дян алав и болделян, патя, кай кадэлэстар тутэ авэла май лащи дружба лэ Иеговаса (Псалом 25:14). Кай ту болделян, када инке на сыкавэл, кай ту ужэ спасысапэ. О апостоло Павло ԥэндя: «Дараса и баря пативаса андо ди .... [домардён] пэстири спасения» (Филиппийцам 2:12). На бистэр, кода, кай ту болделян, када кати пэрво шаго каринг кода, кай тэ спасыспэ. Со трэбуй тэ терэс, кай тэ на хасарэс и тири дружба лэ Иеговаса? Пала кадэва вопросо подаса дума андэ послиднё ӷлава.