СТАТЬЯ, КАЙ ТЭ СЫТЮВАС 25
«Мэ екжэно лава тэ родав мэрнэ бакрорэн»
«Мэ екжэно лава тэ родав мэрнэ бакрорэн и позаботисавава пала лэндэ» (ИЕЗЕКИИЛЬ 34:11).
ДИЛИ 105 «О Дэл исин любовь»
ПАЛА СО УӶАНАСА АНДА СТАТЬЯ?a
1. Васо о Иегова ԥэндя пала пэстэ, кай во, сар дэй, сави драго диқэл пала пэско бэято?
«ХЭБА можэт и дэй тэ бистрэл пала пэско ԥарнэнго бэято?» Кацаво вопросо о Иегова задя, кала жувэлас о Исаия. И во ԥэндя пэстирэ народости: «Дажэ если вой забистрэла, мэ тут на бистрава!» (Исаия 49:15). О Дэл ридко, кала ԥэнэн пала пэстэ, сар пала дэй. Но катэ во ԥэндя пала пэстэ кадя. О Иегова ԥэндя пала дэй и лако ԥарнэнго бэято, важ кода кай камэлас тэ сыкавэл, пэ скати дэ фартэ во любий пэстирэ служытелёнэн. Бут дэя соӷласинпэ кодэлэса, со ԥэндя ек ԥэй, савя ақарэн Лидоb: «Кала ту заботиспэ пала пэско бэято, тоди ту лэса тэ цырдэспэ каринг лэстэ вся пэстири жызня».
2. Со по ди кай о Иегова, кала ек анда лэстирэ бэяцэ дурёл лэстар?
2 Лэ Иеговасти найдраго, кала дажэ ек анда лэстирэ бэяцэ парашэл тэ росԥэнэн пала лэстэ и парашэл тэ ԥирэл пэ собрании. Кати погиндон, сави дэ бари дук анэн лэсти кода, кай кажно бэрш бут лэстирэ служытеля ашэн неактивниc.
3. Со камэл о Иегова?
3 Бут ԥрала и ԥэя, савэ ашэлэ неактивни, ринпэ андэ собрания. Амэ фартэ лошалэ кадэлэсти! О Иегова камэл, кай всаворэ, ко отжыля лэстар, упалэ тэ ринпэ андэ собрания. И амэ кадяжэ када камас (1 Петра 2:25). Сар амэ можэм лэнди тэ поможысарас? Спэрва уӷанаса, васо дэсавэ ԥрала и ԥэя парашэн тэ ԥирэн пэ собрании и тэ росԥэнэн важ о Дэл.
ВАСО ДЭСАВЭ ХРИСТИАНОРЯ ПАРАШЭН ТЭ СЛУЖЫН ЛЭ ИЕГОВАСТИ?
4. Со ашэля дэсавэ манушэнца через и бути?
4 Дэсавэ христианоря фартэ бут время проандярэн пэ бути. О ԥрал Тахир, саво жувэл андэ Азия, росԥэнэн: «И бути заля вся мэрни жызня. Мэ екжэно андэ када дошало. Мэ гиндосаравас, если мандэ авэна май бут ловэ, тоди манди авэла май вушэро тэ служысарав лэ Иеговасти. Важ када мэ теравас пэ бути май бут и май бут. Мэ лэм тэ промэкав и собрания и кадя совсем парашэлэм тэ ԥирав пэр лэндэ. Здэлпэ, кай о Сатана через кадэя люма терэл вся, кай и мануша понабут тэ парашэн тэ служын лэ Дэвлэсти».
5. Со ашэля еқа ԥьяса через вся лако ԥаримос?
5 Кай авэр ԥрала и ԥэя ԥарэс по ди, важ кода кай лэндэ исин бут ԥаримос андэ лэндири жызня. Акэ со росԥэнэн амари ԥэй анда Англия, савя ақарэн Энн, и савятэ панч бэяцэ: «Ек мэрно шаво арақаделяпэ инвалидоса. Кай авэр шаво появисайля ԥаро насвалимос лэ нервэнца, и пала лэстэ трэбуй тэ диқав вся и время. Ай еқа мэрня щя исключисардэ анда собрания. Манди сас кадя ԥарэс по ди, кай мэ парашэлэм тэ ԥирав пэ собрании и тэ росԥэнав важ о Дэл. И через и время мэ ашэлэм неактивно вазвещятелё». Амэнди фартэ жалко ла ԥья и лако ери, ай кадяжэ аврэн ԥралэн и лэ ԥэян, савэндэ андэ жызня бут ԥаримос.
6. Васо, если варико на прилэл кода, со пистромэ андэ Колоссянам 3:13, можэт тэ отжал ла собраниятар?
6 Адиносар Колоссянам 3:13d. Исин и кацавэ лэ Иеговастирэ служытеля, савэнди ашэля ԥарэс по ди через кода, со стердя о ԥрал чи ԥэй андэ собрания. О апостоло Павло прижангля, кай дэкала амэндэ исин кода, васо тэ холявас пэ авэр христианино. Можэт дажэ амэнца обжылэпэ кадя, сар амэ на затердям. Если амэ на шас сама пэ кода, кай холяйлям и холи можэт тэ авэл инке май бари. Ай кала о мануш фартэ холявэл, во можэт тэ отжал лэ Дэвлэстирэ народостар. Акэ со сас лэ ԥралэса анда Южно Америка, савэс ақарэн Пабло. Варико хохадя пэр лэстэ и дошалярдя лэс, кай во стердя варисо най кадя. О Пабло на сас дошало. Но и старейшыноря ришыли, кай во дошало и злинэ лэстар почотно дила андэ собрания. Сар во пэс андярдя? О Пабло росԥэнэн: «Мэ фартэ холяйлэм и понабут отжылэм ла собраниятар».
7. Со можэт тэ авэл лэ манушэса, саво дошалярэл пэс?
7 Если варико стердя баро ӷрехо, во можэт инке долӷо тэ гиндой, кай во дошало. Во можэт тэ гиндой, кай на ашэл, кай о Дэл лэс тэ любий. Хоть кацаво христианино каисайля, во всаек можэт тэ гиндой, кай лэсти нинай ҭан машкар лэ Дэвлэско народо. Кадя гиндояс ек ԥрал, савэс ақарэн Альберто. Во росԥэнэн: «Важ кода кай мэ стердэм билажавардо бэзэх, манди виандярдэ порицания. Спэрва мэ ԥиравас пэ собрании, но потом мандэ ляпэ депрессия и мэ лэм тэ гиндосарав, кай мэ на ашав кода, кай тэ авав ек анда лэ Дэвлэско служытелё. Оди дошалярэлас ман, и мэ гиндосаравас, кай о Иегова ман на простисардя. Через и время мэ парашэлэм тэ росԥэнав важ о Дэл и тэ ԥирав пэ собрании». Ай со тумэ гиндон пала кацавэ ԥрала и ԥэя, пала савэ дям дума? Жалуин тумэ лэн чи най? И со май ӷлавно, со о Иегова пала лэндэ гиндой?
О ИЕГОВА ЛЮБИЙ ПЭСТИРЭН БАКРОРЭН
Израильски пастухоря драго заботинаспэ пала бакрорэ, савэ хасарделэпэ (Диқэн и абзацоря 8, 9.)h
8. Бистрэл о Иегова кодэлэн, ко варикала служыяс лэсти? Росԥэнэн.
8 О Иегова на бистрэл кодэлэн, ко служыяс лэсти, но парашэля када тэ терэл пэ дэсави время. Кадяжэ во на бистрэл вся кода, со вонэ терэнас важ лэстэ (Евреям 6:10). О пророко Исаия фартэ шукарнэ алавэнца ԥэндя пала кода, сар о Иегова любий пэстирэ служытелёнэн и заботийпэ пала лэндэ: «Во лэла тэ пасый пэско стадо, сар пастухо. Во екжэно лэла тэ стидэл лэ бакрорэн и тэ ԥиравэл лэн пэ пэско колин» (Исаия 40:11). Со по ди кай о Иегова, Велико Пастырё, кала ек анда лэстирэ служытеля парашэл лэсти тэ служый? Акэ, сар о Иисусо росԥэндя пала када пэстирэ учениконэнди: «Сар тумэ гиндон, если варисавэ манушэстэ авэла сто бакрэ и ек андар лэндэ хасардёлапэ, хэба на ашавэла во и девяносто девять андэ плая и на жала тэ родэл кодэлэ бакрорэс, саво хасарделяпэ? И если лэстэ вижала тэ виарақэл лэс, чаче ԥэнав тумэнди, во лэла тэ радуийпэ лэсти май фартэ, чем кодэлэ девяносто девяти, савэ на хасарделэпэ» (Матфея 18:12, 13).
9. Сар андэ библейско время лашэ пастухоря андярэнас пэс пэстирэ бакрорэнца? (Диқэн и картинка пэ обложка.)
9 Васо можно тэ ԥэнас, кай о Иегова, сар пастухо? Важ кода кай андэ библейско время лашо пастухо фартэ любияс пэстирэ бакрорэн. Например, о Давидо, борияспэ лэ левоса и лэ медведёса, кай тэ фэрий пэстирэ бакрорэн (1 Самуила 17:34, 35). Дажэ если хасарделоп ек бакроро анда сотня, о лашо пастухо додиқлоп када (Иоанна 10:3, 14). Во ашадоп аврэн бакрорэн андо заӷоно чи манглоп аврэс пастухос тэ диқэл пала лэндэ, кай тэ авэл лэнца вся драго. Ай екжэно жылоп тэ родэл кодэлэ еқэ бакрорэс, саво хасарделяпэ. О Иисусо призындярдя кадэва примеро, кай тэ сытярэл амэн кодэлэсти, со фартэ важно: «Кадя и мэрно Дад, савэ по нэбо, на камэл кай тэ мэрэл хоть ек анда кадэла цынёне» (Матфея 18:14).
О пастухо пэрэԥандэл лэ бакрорэсти, саво хасарделяпэ, о пэрно. (Диқэн о абзацо 9.)
О ИЕГОВА РОДЭЛ ПЭСТИРЭ БАКРОРЭН
10. Со, сар запистромэ андэ Иезекииль 34:11—16, о Иегова ԥэндя стерэла важ пэстирэ бакрорэ, савэ хасарделэ?
10 О Иегова любий кажнонэс андар мэндэ, кадяжэ и кодэлэн, ко одмарделя лэ стадостар. Через о пророко Иезекиилё о Дэл дя алав, кай лэла тэ родэл пэстирэ бакрорэн, савэ хасарделэ, и поможыя лэнди тэ рий лащи дружба лэ Дэвлэса. Во ԥэндя, кай тэ спасый лэн, во стерэла кадя, сар стердоп о израильско пастухо, савэстэ хасарделяпэ о бакроро. (Адиносар Иезекииль 34:11—16e.) Спэрва о пастухо родэлас пэстирэ бакрорэс. Пэ када моӷло тэ ужал бут время и зор. Кала во лэс виарақэлас, во андярэлас лэс палпалэ андо стадо. Потом, если лэ бакрорэстэ варисо дуқалас и во мэрэлас боқатар, о пастухо диқэлас пала лэстэ, пэрэԥандэлас лэсти и рана, ԥиравэлас лэс пэ пиқэ и праварэлас. Лэ старейшынонэнди, савэ диқэн пала лэ Дэвлэско стадо, трэбуй тэ терэн кадяжэ, кай тэ поможын кодэлэнди, ко отжыля ла собраниятар (1 Петра 5:2, 3). И старейшыноря родэн кацавэ ԥралэн и ԥэян, поможын лэнди тэ ринпэ андэ собрания и анда вся оди поможын лэнди тэ ашэн лэ Иеговастирэ друӷонэнцаf.
11. Со полэлас о лашо пастухо?
11 О лашо пастухо полэлас, кай и бакроро можэт тэ хасардёлпэ. И если кацаво сас, во на андярэлас пэс лэса жэстоко. Акана подаса дума, сар о Иегова поможыяс пэстирэ служытелёнэнди, савэ пэ дэсави время отжылэ лэстар. Ай кадяжэ, сости амэ сытювас анда када.
12. Со стердя о Иегова, кала о Иона лэс на кангля?
12 О пророко Иона на кангля лэ Иеговас и на жыля андо форо Ниневия. Но о Иегова на одбанделя лэстар. Сар о лашо пастухо, о Иегова спасысардя лэ Ионас и дя лэсти зор, кай кодэва тэ стерэл кода, со во лэсти ԥэндя (Иона 2:7; 3:1, 2). Потом о Дэл вибарярдя и тыква и па лако примеро поможысардя лэ Ионасти тэ полэл, пэ скати дэ куч и жызня кажнонэ манушэсти (Иона 4:10, 11). Сости када амэн сытярэл? И старейшыноря на гиндон пала христианино, саво ашэля неактивно, кай во никала на парудёла. Вместо када вонэ старыинпэ тэ полэн, васо кадя вижыля лэса. Ай кала во рийпэ каринг о Иегова, и старейшыноря на парашэн тэ любин и тэ заботинпэ пала лэстэ.
13. Сости амэн сытярэл кода, сар о Иегова андярдя пэс кодэлэса, ко пистросардя 73 Псалом?
13 Кодэлэсти, ко пистросардя 73 Псалом, сас ԥарэс по ди важ кода, кай лэсти здэласпэ, кай лэ найлашэ манушэндэ вся драго. Во парашэлас тэ патял, кай трэбуй тэ служый лэ Дэвлэсти (Псалом 73:12, 13, 16). И со стердя о Иегова? Во на ля тэ сындой лэс. О Иегова дажэ стердя кадя, кай и алава, савэ ԥэндя кадэва служытелё, тэ авэн запистромэ андэ Библия. Сар прожыля время, во поля, кай нинай нисо май лашо кодэлэстар, кай тэ дружыс лэ Иеговаса (Псалом 73:23, 24, 26, 28). Сости амэн када сытярэл? И старейшыноря на лэна тэ грабинпэ тэ сындон кодэлэн, ко парашэл тэ патял, кай служэния лэ Иеговасти анэн лашимос. Вместо кода, кай тэ сындон кацавэ манушэс, и старейшыноря трэбуй тэ старыинпэ тэ полэн, васо во кадя ля пэс тэ андярэл. Кати тоди и старейшыноря моӷут тэ подэн дума лэса па библейски стихоря, кай тэ подритярэн лэс.
14. Васо лэ Ильясти сас трэбуй помощь, и сар о Иегова поможысардя лэсти?
14 Кала о пророко Илья нашэлас ла Иезавелятар, лэсти сас кадя фартэ ԥарэс по ди, кай во закамля тэ мэрэл. Васо? Важ кода кай во гиндояс, кай будэр нико на служый лэ Иеговасти, сар пророко. Во гиндояс, кай лэстири служэния лэ Дэвлэсти сас евья (1 Царей 19:1—4, 10). О Иегова на ля тэ сындой лэ Ильяс, ай ԥэндя лэсти, кай во най екжэно, и кай во можэт тэ патял, кай о Дэл дэла лэсти зор, и кай англэ инке бут бути. О Иегова драго ашунэлас, кала о пророко росԥэнэнас лэсти, пала со во пэрэжывает, и потом дя лэсти тэ стерэл нэви дила (1 Царей 19:11—16, 18). Сости када амэн сытярэл? Всаворэнди амэнди, ай май фартэ лэ старейшынонэнди, трэбуй драго тэ обжаспэ лэ Иеговастирэ бакрорэнца. И старейшыноря драго виашунэн, кала о христианино росԥэнэн кода, со лэстэ по ди, дажэ если андэ лэстирэ алава исин холи чи во гиндой, кай о Иегова лэс никала на простия. Кала вонэ лэс виашундэ, вонэ старыинпэ, кай во упалэ тэ патял, кай о Иегова лэс любий.
САР АМЭ ТРЭБУЙ ТЭ ДИҚАС ПЭ ИЕГОВАСТИРЭ БАКРОРЭ, САВЭ ХАСАРДЕЛЭПЭ?
15. Сар анда Иоанна 6:39 дицол, сар о Иисусо диқэлас пэ пэстирэ Дадэстирэ бакрорэ?
15 Сар амэ трэбуй тэ диқас пэ Иеговастирэ бакрорэ, савэ хасарделэпэ? Со амэндар аштярэл о Дэл? Подам дума пала кода, сар андярэлас пэс о Иисусо. Во ӷанэнас, кай важ о Иегова куч всаворэ лэстирэ бакрорэ. Важ када во терэлас вся, кай «кодэла бакрорэ андэ израильско народо, савэ хасарделэпэ», тэ ринпэ каринг о Дэл (Матфея 15:24; Луки 19:9, 10). Сар лашо пастухо, о Иисусо столас вся пэско зор, кай тэ на хасардёлпэ ни ек лэ Иеговаско бакроро. (Адиносар Иоанна 6:39g; 10:11.)
16, 17. Сар и старейшыноря трэбуй тэ поможын кодэлэнди, ко камэл тэ рийпэ каринг о Иегова? (Диқэн и рамка «Со по ди кодэлэндэ, ко хасарделяпэ?».)
16 О апостоло Павло ԥэндя, кай и старейшыноря анда эфесско собрания, терэнас кадя сар о Иисусо: «Тумэ трэбуй тэ дэн зор кодэлэнди, касти во трэбуй и тэ сэрэн лэ Ӷосподостирэ лэ Иисусостирэ алава: „Май бари бах, кала дас, чем кала лас“» (Деяния 20:17, 35). Сар дицол анда кадэла алава, кай и старейшыноря исин особо дила, када тэ заботинпэ пала лэ Иеговаско народо. Акэ со ԥэнэн ек старейшына анда Испания, савэс ақарэн Сальвадоро: «Кала мэ гиндосарав, сар о Иегова любий пэстирэ бакрорэн, савэ хасарделэпэ, манди камэлпэ тэ стерав вся, со па мэрно зор, кай тэ поможысарав лэнди. Мэ патяв, о Иегова камэл, кай мэ тэ заботисавав пала кодэла, ко лэстар отжыля».
17 Всаворэнди ԥралэнди и ԥэянди, пала кастэ дям дума андэ кадэя статья, поможысардэ тэ ринпэ каринг о Иегова. Но исин инке бут кодэла, ко отжыля лэ Дэвлэстар, но камэн тэ ринпэ каринг лэстэ. Андэ авэр статья амэ уӷанаса, сар амэ можэм лэнди тэ поможысарас.
ДИЛИ 139 Представь ту пэс андо раё пэ ԥув
a Васо дэсавэ ԥрала и ԥэя, савэ бут бэрша на парашэнас тэ служын лэ Иеговасти, парашэлэ тэ росԥэнэн пала лэстэ аврэнди и парашэлэ тэ ԥирэн пэ собрании? Сар о Дэл диқэл пэр лэндэ? Уӷанаса атветоря пэ кадэла вопросоря, ай кадяжэ подаса дума, сар андэ библейско время о Иегова поможыяс кодэлэнди, ко пэ дэсави время отжыля лэстар, и сости када амэн сытярэл.
b Дэсавэн манушэн на ақарэн кадя, сар катэ пистромэ.
c РОСԤЭНЭНПЭ, САР ТЭ ПОЛАС О АЛАВ. Неактивно ԥэнэн по вазвещятелё, саво на здэлас отчото пала служэния шов шона чи май бут. Но неактивни вазвещятеля всаек ашэнпэ амарэ ԥралэнца и ԥэянца, савэн амэ фартэ любисарас.
d Колоссянам 3:13: «На холявэн ек пэ ек и анда вся оди простин ек еқэс, если варикастэ исин васо тэ холявэл пэ авэр. Сар о Иегова анда вся оди простисардя тумэн, кадяжэ простин и тумэ».
e Иезекииль 34:11—16: «Кадя ԥэнэн о Велико Дэл Иегова: „Акэ мэ. Мэ екжэно лава тэ родав мэрнэ бакрорэн и позаботисавава пала лэндэ. Мэ лава тэ заботисавав пала мэрнэ бакрорэ, сар о пастухо заботийпэ пала пэстирэ бакрорэ, савэн виарақля, савэ поразнашлэпэ. Мэ стидава лэн анда всаворэ ҭана, па савэ вонэ поразнашлэпэ андо дес, кала тучи и фартэ бари тэмнота, и спасысарава лэн. Мэ виандярава лэн анда авэр народоря и стидава лэн па авэр ҭана, анава лэн андэ лэндири ԥув и лава тэ пасысарав лэн пэ Израильски плая, паша лэна и пэ всаворэ ҭана, кай жувэн и мануша андэ кодэя ԥув. Мэ анава лэн пэ лашэ ҭана и вонэ лэна тэ пасынпэ пэ вуче лэ Израилёстирэ плая. Котэ вонэ лэна тэ пашлён пэ лашэ ҭана, вонэ лэна тэ пасынпэ пэ само лашо ҭан, кай исин пэ Израильски плая“. ‚Мэ екжэно лава тэ пасысарав пэстирэ бакрорэн и екжэно лава тэ совлярав лэн,— ԥэнэн о Велико Дэл Иегова.— Мэ виарақава кодэлэс, саво хасарделя, рисарава кодэлэс, саво одмарделя лэ стадостар, пэрэԥандава и рана кодэлэсти, савэстэ вой исин и дава зор кодэлэсти, саво слабо. Ай кодэлэс, саво росхаляпэ и саво марэлпэ мэ умарава. Мэ лава тэ пасысарав лэн справедливо‘“».
f Пала кода, сар и старейшыноря моӷут када тэ терэн, росԥэнэнпэ андэ авэр статья.
g Иоанна 6:39: «Ай кодэва, ко ман бишалдя камэл, кай анда всаворэ, кас во манди дя, мэ тэ на хасарав ни еқэс, но тэ рисарав лэн каринг и жызня андэ послиднё дес».
h ПЭ КАРТИНКА. Андо дэлмутно Израилё о пастухо фартэ пэрэжывал пала бакроро, саво хасарделяпэ. Важ када во родэлас лэс и поможыяс лэсти тэ рийпэ андо стадо. Адес кодэла, ко диқэл пала лэ Дэвлэстирэ бакрорэ, терэн кадяжэ.
i ПЭ КАРТИНКА. И ԥэй, сави ашэля неактивно, диқэл через и фэлястра анда автобусо дуен свидетелёнэн, савэ служын лэ Дэвлэсти радостяса.