Со тути на дэл тэ кандэс лэ Иисусос?

1. Сар дэсавэ и друӷоря и о родо андярдэ пэс, кала ту лэнди пэрво разо росԥэндян о чачимос анда Библия?

ТУ НАВЕРНО сэрэс, кала пэрво разо уӷанглян о чачимос анда Библия. Тути када фартэ чалеля. Важ тутэ када сас фартэ понятно и просто. Ту гиндосас, кай када анэна лашимос аврэнди, кай вонэ авэна кадэлэстар май бахталэ, и кай лэн аштярэл лащи жызня англэ (Пс. 119:105). Важ када ту лян тэ росԥэнэс пала со уӷанглян лэ друӷонэнди и лэ родости. Ту гиндосас, кай вонэ тут ашунэна. Но вонэ совсем на камэнас тэ ашунэн.

2, 3. Патяе и мануша андо Иисусо андо пэрво вико?

² На трэбуй тэ удивисавас, кай и мануша на ашунэн амэн, кала амэ росԥэнас лэнди важ о Дэл. Кала о Иисусо сас пэ ԥув, во терэлас чудеса, исцэлияс, рияс каринг и жызня лэ манушэн. Када доԥэнэнас, кай во Христос, саво трэбуй сас тэ авэл пэ ԥув. Алав «Христос» сыкавэл, кай кадэлэ манушэс витидя о Дэл тэ стерэл, со во загиндосардя. Но и мануша всаек на шонас сама пэ чудеса, савэ терэлас о Иисусо, и на патянас лэсти. Када драго дицэля, кала во рисардя каринг и жызня лэ Лазарёс. Лэ манушэнди, савэ лэс вэрыцынас, и лэ рашанди прижыляпэ тэ прижанэн, кай кадэя чуда о Иисусо стердя па чачимастэ. Но всаек вонэ на камэнас тэ патян, кай о Иисусо када Христос, саво трэбуй тэ авэл пэ ԥув. Вонэ дажэ камэнас тэ умарэн и лэ Иисусос, и лэ Лазарёс! (Иоан. 11:47, 48, 53; 12:9—11).

³ О Иисусо ӷанэнас, кай май бут мануша на закамэна тэ патян, кай пэ ԥув лэс бишалдя о Дэл (Иоан. 5:39—44). Кай о Иоанно Крестителё сас ученикоря, и о Иисусо лэнди ԥэндя: «Бахтало кодэва, ко патял, кай ман бишалдя о Дэл» (Матф. 11:2, 3, 6). Васо андо Иисусо на патянас бут мануша?

4. Пала со амэ уӷанаса анда кадэя статья?

⁴ Андэ кадэя и андэ авэр статья амэ уӷанаса дэсавэ причины, васо и мануша андо пэрво вико на патяе андо Иисусо. Ай кадяжэ уӷанаса, васо адес амэн на ашунэн и мануша, кала амэ росԥэнас пала Дэл. И васо амэ трэбуй тэ на парашас тэ патяс андо Иисусо?

1. И МАНУША ШОНАС САМА, КАТАР И АНДА САВО ЕРИ О ИИСУСО

5. Васо дэсавэ мануша моӷли тэ гиндон, кай о Иисусо най лэ Дэвлэстар?

⁵ Бут мануша на камэнас тэ патян андо Иисусо, важ кода кай ӷанэнас анда саво во сас ери и кай во арақаделяпэ. Вонэ прижанэнас, кай во сас лашо учителё и терэлас бут чудеса, но важ лэндэ во сас шаво простонэ манушэско. Лэско дад сас плотнико. Инке о Иисусо сас анда най ашунгло форо Назарето. О Нафанаило, саво инке на сас лэ Иисусостирэ ученикоса, ԥэндя: «Хэба можэт тэ авэл анда Назарето варисо лашо?» (Иоан. 1:46). Можэт лэсти на чалёлас кадэва форо, ай можэт во камля тэ шол сама по пророчество анда книӷа Михея 5:2, кай пистромэ, кай о Христос трэбуй сас тэ арақадёл андо Вифлеемо, ай най андо Назарето.

6. Со доԥэнэнас, кай лэ Иисусос бишалдя о Дэл?

⁶ Со ԥэнэнпэ андэ Библия? Бут пророчества сыкавэнас, катар авэла о Христос, и вонэ стердэпэ, кала во авеля пэ ԥув. Но о пророко Исаия ԥэндясас, кай и вороӷоря всаек на лэна тэ шон сама пэ кадэла пророчества и на прилэна лэ Христос (Ис. 53:8). Если и мануша андэ кодэя время май драго тэ розуӷанглоп, со ԥэнэнаспэ андэ пророчества пала Иисусо, тоди вонэ полиноп, кай о Михеё ужэ ԥэндясас пала кода, кай во арақадёла андо Вифлеемо и авэла лэ Давидоско потомко, саво сас царё (Луки 2:4—7). Вонэ на шонас сама, со ужэ сас ԥэндо варикала пала Иисусо, ай полэнас вся па пэстирятэ. И через када вонэ нэ смоӷли тэ патян андо Иисусо, кай лэс бишалдя о Дэл.

7. Васо адес бут мануша на камэн тэ прилэн амари вера?

⁷ Кода, со сас андэ лэ Иисусостири время, шолпэ и пэ амарэ деса. Бут лэ Иеговастирэ служытеля вибарелэ андо просто ери. Бут мануша ӷанэн, кай амэ на прожылям нисави школа важ и рашая (Деян. 4:13). Важ када вонэ гиндон, кай амэ нэ можэм тэ росԥэнас аврэнди пала Дэл. Ай авэр мануша ԥэнэн, кай лэ Иеговастирэ свидетеля, када американско вера, хоть па чачимастэ андэ Америка жувэн кати 14 процэнтов амарэ ԥрала и ԥэя. Ай дэко гиндой, кай амэ вообще на прижанас лэ Иисусос. Бэршэнца пэ Иеговастирэ свидетеля ԥэнэн, кай вонэ коммунисторя, кай вонэ американски шпионоря или экстремисторя. И бут мануша патян андэ када и на камэн тэ розлэнпэ, кай када хохаимос. И важ када на камэн тэ прилэн амари вера.

8. Сар тэ полас, ко адес па чачимастэ служый лэ Дэвлэсти, сар ԥэнэнпэ андэ Деяния 17:11?

⁸ Со поможыя тэ на парашас тэ патяс? Трэбуй драго тэ ӷанас, чачимос кода, со ԥэнэн и мануша, чи най. Именно кадя и терэлас о Лука. Кала во пистрояс и Евангелия, во спэрва вся драго розуӷанэнас. Во камэлас, кай вся со во пистрой, тэ авэл точно и кай вся, со лэна и мануша тэ адинон пала Иисусо тэ авэл чачимос (Луки 1:1—4). И евреёря, савэ жувэнас андо форо Верия терэнас кадяжэ сар и о Лука. Кала вонэ пэрво разо ашунглэ пала Иисусо, вонэ закамлэ май драго тэ уӷанэн чачимос када чи най. (Адиносар Деяния 17:11.) Кадяжэ адес важно, кай ту май драго тэ уӷанэс и тэ сыстос кода, сости сытярэн лэ Иеговастирэ свидетеля, и кода, со ԥэнэнпэ андэ Библия. Инке трэбуй тэ уӷанэс, сар лэ Иеговаско народо служый лэсти андэ амарэ деса. Лэ манушэс, саво када вся драго уӷанэна, на змарэла кода, со дэн дума пала лэ Иеговастирэ свидетеля и сар найдраго лэнца андярэн пэс и мануша.

2. О ИИСУСО НА ТЕРЭЛАС ЧУДЕСА, КАЙ ТЭ ДОԤЭНЭН, КАЙ ВО ЛЭ ДЭВЛЭСТАР

9. Со сас, кала о Иисусо на ля тэ терэл чуда па нэбо?

⁹ Дэсавэ манушэнди на хутилэлас кода, кай о Иисусо лэн сытярэлас. Вонэ камэнас варисо май бут. «Вонэ линэ тэ мангэн лэстар, кай во тэ стерэл чуда па нэбо, кай тэ доԥэнэн, кай лэс бишалдя о Дэл» (Матф. 16:1). Можэт вонэ най кадя полэнас о пророчество анда книӷа Даниила 7:13, 14. Но кадэва пророчество трэбуй сас тэ стерэлпэ потом. Кода, сар о Иисусо сытярэлас и сости во сытярэлас, ужэ доԥэнэнас, кай во исин кодэва, кас бишалдя о Дэл пэ ԥув. Важ када во на ля тэ терэл нисавэ чудеса важ лэндэ, и важ када кадэла мануша на закамлэ тэ патян андо Иисусо (Матф. 16:4).

10. Сар о Иисусо стердя о пророчество, саво запистромэ андэ Исаия 42:1, 2?

¹⁰ Со ԥэнэнпэ андэ Библия? О пророко Исаия пистросардясас пала Христос: «Во на лэла тэ цыпий и ӷромко тэ дэл дума и пэ вулицы на ашундёла лэско ӷолосо» (Ис. 42:1, 2). Кала о Иисусо служыяс пэ ԥув, во никала на шолас фартэ бут сама пэр пэстэ. Во на строияс барэ храморя, на ԥиравэлас варисави ӥда, кай тэ дицол, кай во варисаво важно мануш. Во на мангэлас, кай пэр лэстэ тэ стон бари патив и тэ ԥэнэн варисаво ашунгло алав. Кала во сас по сындо во на ля тэ сыкавэл нисавэ чудеса, кай тэ уӷодий лэ царёсти лэ Иродости, саво моӷ тэ прилэл ришэния, кай лэс тэ на умарэн (Луки 23:8—11). Да, кала о Иисусо сас пэ ԥув, во терэлас чудеса. Но само ӷлавно важ лэстэ сас, када тэ росԥэнэн пала Дэл. И во дажэ ԥэндя пэстирэ учениконэнди: «Важ када мэ и авелэм» (Мар. 1:38).

11. Со гиндон и мануша пала кода, сави трэбуй тэ авэл и чачуни вера андо Дэл?

¹¹ Кода, со сас андэ лэ Иисусостири время, шолпэ и пэ амарэ деса. Адес исин бут барэ и шукарнэ қандиря, андэ савэ исин бут со кучутно и шукарно. Пэ рашая ԥэнэн ашунгло алав. Котэ проандярэн барвалэ обрядоря, пала савэ ужэ на сэрэн, васо лэн терэн. И мануша гиндон, кай кацави и трэбуй тэ авэл чачуни вера андо Дэл. Но хэба уӷанэн и мануша пэ служба андэ қандири варисо пала Дэл и пала кода, со во загиндосардя важ и мануша? Ай пэ амарэ собрании, всаворэ моӷут тэ уӷанэн, со лэндар аштярэл о Дэл. Амаро Зало Царства най фартэ барвалэс дицол, но андэр лэстэ вужимос и порядко. Пэ амарэ ԥрала нинай варисави особо ӥда, кай тэ сыкавэн, кай вонэ варисавэ ӷлавни. И пэр лэндэ на ԥэнэн варисаво ашунгло алав. Само ӷлавно важ амэндэ, кода, со пистромэ андэ Библия. Но дэкасти здэлпэ, кай амари вера фартэ просто и кода, андэр со амэ патяс, на сжалпэ кодэлэса, со лэнди камэлпэ.

12. Со амэнди трэбуй тэ терас, кай амари вера тэ авэл састи, сар пистромэ андэ Евреям 11:1, 6?

¹² Со поможыя тэ на парашас тэ патяс? О апостоло Павло пистросардя лэ христианонэнди, савэ жувэнас андо Римо: «Кай о мануш тэ патял, спэрва во трэбуй тэ ашунэл, ай кай тэ ашунэл, трэбуй варико лэсти тэ росԥэнэн пала Христос» (Рим. 10:17). Вижал, кай о мануш тэ патял андо Дэл, лэсти трэбуй драго тэ ӷанэн и Свынто Писания, ай най тэ терэл варисавэ обрядоря, савэ терэн андэ авэр религии, савэ бы вонэ шукарнэ и интересни тэ на авэн. Амэнди трэбуй драго тэ ӷанас, со пистромэ андэ Библия и тоди амари вера авэла састи. Андэ Библия пистромэ: «Ко на патял, нэ сможэт тэ уӷодий лэ Дэвлэсти». (Адиносар Евреям 11:1, 6.) Кай тэ полас, кай уӷанглям о чачимос пала Дэл амэнди на трэбуй нисавэ чудеса па нэбо. Амэ трэбуй просто драго тэ изучаем и Библия.

3. О ИИСУСО РИТЯРЭЛАС НАЙ ВСАВОРЭ ТРАДИЦЫИИ, САВЭ САС КАЙ И ИУДЕЁРЯ

13. Васо бут мануша на камэнас тэ патян, кай о Иисусо када исин Христос?

¹³ Лэ Иоанностирэ Крестителёстирэ ученикоря на полэнас, васо лэ Иисусостирэ ученикоря на ритярэн о посто. О Иисусо ԥэндя лэнди, кай пока во лэнца, лэнди на трэбуй када тэ терэн (Матф. 9:14—17). Но фарисеёря всаек сындонас лэ Иисусос, кай во на терэлас па лэндирэ обычаи и традицыи. Вонэ холявэнас, кала во исцэлияс лэ насвалэ манушэн андэ суббота (Мар. 3:1—6; Иоан. 9:16). Еқа ригатар вонэ сытярэнас, кай и суббота свынто и кай нащи тэ терэн нисави дила андо суббота, ай авря ригатар на диқэнас нисо вэрыто андэ кода, кай тэ битинэн андэ кадэва дес андо храмо. И кала о Иисусо пала када ԥэнэнас лэнди ворта, вонэ холявэнас пэр лэстэ (Матф. 21:12, 13, 15). Ай кала о Иисусо росԥэнэнас пала Дэл андэ синагога андо Назарето, во лажавардя лэ манушэн, кай вонэ гиндон кати пала пэстэ и на допатян лэ Дэвлэсти. Вонэ фартэ росхоляйлэ (Луки 4:16, 25—30). О Иисусо на старыияспэ тэ уӷодий лэ манушэнди, и важ када бут ко на камэлас тэ патял, кай во Христос, саво трэбуй сас тэ авэл пэ ԥув (Матф. 11:16—19).

14. Васо о Иисусо сындосардя лэ манушэн, савэ ритярэнас и обычаи, савэ на сжанаспэ кодэлэса, со пистромэ андэ Свынто Писания?

¹⁴ Со ԥэнэнпэ андэ Библия? О Иегова ԥэндя через пэско пророко Исаия: «Кадэла мануша ԥэнэн, кай тэлён манди. Вонэ кати ԥэнэн, кай кандэн ман, но лэнго ди най манца и вонэ даран мандар кати важ кода, кай и мануша лэн кадя сытярэн» (Ис. 29:13). О Иисусо справедливо сындосардя лэ манушэн, савэ ритярэнас и обычаи, савэ на сжанаспэ кодэлэса, со пистромэ андэ Свынто Писания. Лэнди май важно сас лэ манушэндирэ законоря, чем лэ Дэвлэстирэ. Кадэлэса вонэ сыкадэ, кай на камэн тэ жувэн па лэ Иеговаско законо и на камэн тэ прижанэн, кай лэ Иисусос бишалдя о Дэл.

15. Васо бут мануша холявэн пэ Иеговастирэ свидетеля?

¹⁵ Кода, со сас андэ лэ Иисусостири время, шолпэ и пэ амарэ деса. Бутэ манушэнди на чалёл, кай лэ Иеговастирэ свидетеля на стон празникоря и на ритярэн и традицыи, савэ най па Библия. Када, например, кацавэ празникоря сар Кричуно, Патради, день рождения. Авэр холявэн, кай амэ на дилабас о гимно и кай на тэлювас лэ флаӷости. Ай кадяжэ вонэ холявэн, кай амэ на притидас лэ манушэс, саво муля, па лэндирэ традицыи, савэ най па Библия. Кадэла мануша гиндон, кай кадя вонэ уӷодин лэ Дэвлэсти. Но вонэ нэ моӷут тэ уӷодин лэ Иеговасти, если вонэ жувэн па традицыи, савэ ритярэн и мануша андэ кадэя лэ Сатанастири люма (Мар. 7:7—9).

16. Со амэ трэбуй тэ терас и состар трэбуй тэ фэрисавас? (Псалом 119:97, 113, 163—165).

¹⁶ Со поможыя тэ на парашас тэ патяс? Амэ трэбуй фартэ тэ любисарас лэ Дэвлэстирэ законоря и принцыпоря. (Адиносар Псалом 119:97, 113, 163—165.) Если амэ любисарас амарэ Дэвлэс, амэ на аваса тэ жувас па кодэла традицыи, савэ лэсти на чалён. Амэнди трэбуй тэ фэрисавас кодэлэстар, через со амэ можэм тэ парашас тэ любисарас лэ Иеговас.

4. О ИИСУСО НА ӶУЛЕЛАС АНДЭ ПОЛИТИКА

17. Васо май бут мануша андэ лэ Иисусостири время на патяе андэр лэстэ?

¹⁷ Дэсавэ мануша андэ лэ Иисусостири время аштярэнас, кай варисо парудёла андэ политика. Вонэ аштярэнас, кай о Христос освободия лэн кодэлэстар, кай и римски правителя на дэнас лэнди спокойно тэ жувэн. Важ када вонэ закамлэ тэ стон лэ Иисусос царёса, но во отԥэнделя (Иоан. 6:14, 15). Ай авэр мануша и и рашая даранас, кай во лэла тэ ӷулел андэ политика. Вонэ даранас, кай кадэлэса во можэт тэ холярэл лэ римсконэ правителёнэн, и вонэ залэна лэ рашандар и власть, сави дя лэнди о римско правительство. Через када вся и иудеёря на закамлэ тэ патян лэ Иисусости.

18. Пэ савэ пророчества пала кода, кай лэ Иисусос витидя о Дэл, и мануша на камэнас тэ шон сама?

¹⁸ Со ԥэнэнпэ андэ Библия? Хоть андэ бут пророчества пала Иисусо ԥэнэнпэ, кай во авэла воино, саво победия, андэ авэр пророчество ԥэнэнпэ, кай спэрва во трэбуй сас тэ мэрэл важ амаро бэзэх (Ис. 53:9, 12). Но васо и мануша андэ кодэя время аштярэнас лэ Иисусостар совсем авэр? Бут андар лэндэ на камэнас тэ шон сама пэ всаворэ пророчества, кай пистромэ, кай о Христос на улэла лэндар вся о ԥаримос сразу, сар вонэ када камэнас (Иоан. 6:26, 27).

19. Васо адес бут мануша на камэн тэ ашунэн амэн?

¹⁹ Кода, со сас андэ лэ Иисусостири время, шолпэ и пэ амарэ деса. Бут мануша на ашунэн амэн, важ кода кай амэ на ӷуляс андэ политика. Вонэ камэн, кай амэ тэ ӷолосуем пэ выборы. Но амэ ӷанас, кай если амэ витидаса варисавэ манушэс, кай во тэ правий амэнца, тоди када сыкавэла, кай амэ жас против о Иегова (1 Сам. 8:4—7). Инке вонэ гиндон, кай амэ трэбуй тэ терас лашимос кодэлэса, кай тэ строисарас больницы и школы. Но амэ май бут зор отдас андэ служэния лэ Дэвлэсти, ай най кодэлэсти, кай тэ ришысарас и проблемы, савэ исин андэ кадэя люма. Важ када вонэ на камэн тэ ашунэн, кала амэ авас тэ росԥэнас пала Дэл.

20. Со важ амэндэ трэбуй тэ авэл само важно, сар ԥэндя о Иисусо андэ Матфея 7:21—23?

²⁰ Со поможыя тэ на парашас тэ патяс? (Адиносар Матфея 7:21—23.) Само важно дила важ амэндэ, када тэ терас, со приԥэндя амэнди о Иисусо (Матф. 28:19, 20). И амэнди на трэбуй тэ хасарас и время, кай тэ ришаем и проблемы андэ кадэя люма. Амэ любисарас лэ манушэн и сыкавас када пэ дила. Но со май важно важ амэндэ, када тэ росԥэнас лэ манушэнди важ лэ Дэвлэско Царство и тэ поможысарас, кай лэндири дружба лэ Иеговаса тэ авэл лащи.

21. Со амэнди трэбуй тэ на парашас тэ терас?

²¹ Андэ кадэя статья амэ уӷанглям штар причины, васо андо пэрво вико и мануша на патянас андо Иисусо, и васо адес вонэ на камэн амэн тэ ашунэн. Но исин инке авэр штар причины. Пала лэндэ амэ уӷанаса андэ авэр статья. Тераса вся, кай тэ на парашас фартэ тэ патяс лэ Дэвлэсти. Ай кадяжэ тэ на парашас тэ патяс, кай лэ Иисусос бишалдя о Дэл!