Сости амэ сытювас анда послидни алава, савэ ԥэндэ лэ Дэвлэстирэ кандинэ мануша?

1. Васо авелоп драго тэ сытювас кай кодэла, ко май барэдэр амэндар?

КАЛА амэ прилас ришэнии, амэ блаӷодарни, кала варико ригатар подԥэнэн амэнди, сар май драго. Кацави помощь моӷут тэ дэн и барэдэр ԥрала и авэр ԥрала и ԥэя, савэ састэ па лэ Дэвлэстири время. Дажэ если вонэ пэ бутэстэ май барэдэр амэндар, када на сыкавэл, кай лэндирэ советоря на поможына амэнди. О Иегова камэл, кай амэ тэ сытювас лэ ԥурэндар, важ кода кай лэндэ сас май бут время, кай тэ полэн и жызня и тэ ашэн годявэрнэ (Иов 12:12).

2. Со амэ уӷанаса анда кадэя статья?

² Андэ дэлмутни время о Иегова подритярэлас пэстирэ народос и диқэлас пала лэстэ через и кандинэ ԥурэ мурша. Машкар лэндэ сас о Маисеё, о Давидо и о апостало Иоано. Вонэ жувэнас андэ разно время и лэндэ сас разно жызня. Англа кода сар тэ мэрэн, кажно андар лэндэ дя советоря лэ май тэрнэ манушэнди. Всаворэ вонэ шутэ сама, сар дэ важно тэ кандэн лэ Дэвлэс. О Иегова ашадя лэндирэ алава андэ Библия жы каринг амари время. Всаворэнди амэнди — и лэ тэрнэнди, и лэ взрослонэнди — авелоп драго тэ погиндосарас пала лэндирэ советоря (Римо 15:4; 2 Тим. 3:16). Андэ кадэя статья амэ роздиқаса послидни алава, савэ ԥэндэ кадэла трин мурша, и уӷанаса, сости амэ можэм тэ сытювас.

«ТУМЭ ЛЭНА ДОЛӶО ТЭ ЖУВЭН»

3. Со амэ ӷанас пала Маисеё?

³ О Маисеё вся пэстири жызня на парашэлас тэ пристол зор андэ лэ Иеговастири дила. Во пэрэдэлас и алава лэ Дэвлэстар, сас сындомари, барэдэр пэ халавдэ и учоно. Во бут со пэрэжудя андэ пэстири жызня. О Маисеё виандярдя лэ израильтянонэн анда Египто и пэстирэ яқэнца диқэлас разни чудеса, савэ терэлас о Иегова. Через лэ Дэвлэско зор о Маисеё пистросардя панч книжки анда Библия, ай инке 90-то и, файма, 91-во Псалмо. Возможно, инке во пистросардя и книжка Иов.

4. Касти о Маисеё придя зор пэстирэ алавэнца и васо во када стердя?

⁴ Кала лэ Маисеёсти сас 120 бэрш во стидя всаворэ́ израильтянонэн и шутя лэндири сама пэ кода, со стердя важ лэндэ о Иегова. Дэко андар лэндэ сас инке цынёнё, кала о Дэл стердя чудеса и спушля па египтяноря (Исх. 7:3, 4). Вонэ диқлэ, сар розжыляпэ и лоли моря, и прожылэ па шуки ԥув. Ай потом о Иегова поумардя лэ египецконэ халавдэн (Исх. 14:29—31). Андэ пустыня о Дэл заботияспэ пала пэско народо и фэрияс лэс (Втор. 8:3, 4). Акана, кала и израильтяноря тердёнас ворта паша обещано ԥув, о Маисеё камля послиднё разо тэ придэл лэнди зорa.

5. Сар о Маисеё подритярдя лэ израильтянонэн?

⁵ Со о Маисеё ԥэндя? (Проадинон Второзаконие 30:19, 20.) Во ԥэндя кодэлэ израильтянонэнди, кай лэн англэ аштярэл райкани жызня. Блаӷодаря лэ Иеговасти вонэ долӷо жувэнас пэ обещано ԥув. Када сас райкано ҭан! О Маисеё ԥэндя: «О Иегова андярэла тумэн пэ ԥув... кай исин барэ шукарнэ фороря, савэ тумэ на строинас, цэра, андэ савэ ԥэрдо... мищимос, саво тумэ на добисардэ, и хаинга, савэ тумэ на ӷанадэ, и виноӷрадникоря и аливки, савэ тумэ на садинас» (Втор. 6:10, 11).

6. Васо о Дэл домэкля аврэ народонэнди тэ захутилэн о Израилё?

⁶ О Маисеё кадяжэ ԥэндя лэ израильтянонэнди тэ авэн осторожни. Кай долӷо тэ жувэн пэ кодэва барвало краё, лэнди трэбуй сас тэ ритярэн лэ Иеговаско законо. О Маисеё ԥэндя лэнди тэ витидэн жызня — тэ кандэн лэ Дэвлэс и тэ на ашавэн лэс. Но и израильтяноря одбанделэ лэ Иеговастар. Важ када ӷэт май интя о Дэл домэкля, кай и асирийцоря, ай потом и вавилоняноря тэ захутилэн и тэ ундярэн лэн (2 Цар. 17:6—8, 13, 14; 2 Лет. 36:15—17, 20).

7. Сости амэн сытярэн лэ Маисеёстирэ алава? (Кадяжэ диқэн и картинка.)

⁷ Сости амэ сытювас? Кала кандас, када спасый и жызня. Кадя жэ сар и израильтяноря тердёнас ворта паша обещано ԥув, амэ тердювас паша нэво миро, саво обещяет амэнди о Дэл. Ӥто амэ додиқаса, сар вся и ԥув ашэла раё (Ис. 35:1; Лука 23:43). Котэ на авэла лэ Сатанас и лэ найвужэн (Тайна 20:2, 3). И хохавнэ веры на лэна будэр тэ дилярэн лэ мирос (Тайна 17:16). И барэ мануша на лэна тэ тасавэн по пэско народо (Тайна 19:19, 20). Андо раё на авэла кодэлэн, ко жал против Дэл (Пс. 37:10, 11). Всаворэ авэна тэ андярэн лэ Иеговастири время, тэ ладин и тэ любин ек еқэс (Ис. 11:9). Сар жэ амэ аштярас кадэя время. Если амэ кандас лэ Иеговас, тоди амэ ласа тэ жувас андо раё о вико вечно (Пс. 37:29; Иоан. 3:16).

8. Сар и надия пэ вечно жызня поможысардя еқэ ԥралэсти? (Иуда 20, 21).

⁸ И надия пэ вечно жызня поможыя амэнди тэ кандас лэ Дэвлэс и тэ виритярас любо ԥаримос. (Проадинон Иуда 20, 21.) Вой кадяжэ придэл амэнди зор тэ борисавас корко пэса. Акэ со росԥэнэн ек ԥрал, саво най ек бэрш терэл лэ Дэвлэстири дила андэ Африка: «Мэ полэм, кай мандэ на вижала тэ жував вечно, если мэ на кандав лэ Иеговас. Када поможысардя манди тэ на парашав тэ борисавав мэрня проблемаса и инке май фартэ тэ мангавпэ лэ Иеговасти пала латэ. Лэстирэ зорэса мандэ вижыля ла тэ биросарав».

«ТУ АВЭСА БАХТАЛО»

9. Саво ԥаримос пэрэандярдя о Давидо важ пэстири жызня?

⁹ О Давидо сас ашунгло царё. Во кадяжэ дилабэлас, пистрояс стихоря, сас халавдэса и пэрэдэлас лэ Дэвлэстирэ алава. Кадэва лэ Дэвлэско мануш пэрэандярдя чи мало ԥаримос. Бут бэрша лэ Давидости прижаласпэ тэ гарадёл лэ Саулостар, саво завидуияс лэсти. Кала о Давидо ашэля царё, лэсти упалэ прижыляпэ тэ унашэл, важ кода кай лэско шаво о Авесаломо камэлас лэс тэ умарэл и тэ ашэл царё вместо лэстэ. Хоть о Давидо бут со пэрэандярдя и най еқвар шылияспэ, во вся и жызня на парашэлас тэ кандэл лэ Иеговас. О Иегова ԥэндя пэр лэстэ, кай во мануш, саво лэсти па ди. Амэнди трэбуй тэ приашундювас каринг лэ Давидостирэ советоря! (1 Цар. 15:5; Дила 13:22, сноска).

10. Васо лэ Саламоности трэбуй сас тэ ашунэл лэ Давидоско совето?

¹⁰ Например, давайте роздиқаса, со о Давидо росԥэндя пэстирэ шавэсти, лэ Саламоности, саво трэбуй сас тэ ашэл царё посли лэстэ. О Иегова витидя кадэлэ тэрнэ манушэс, кай во правильно тэ зындярэл лэстири время и тэ строий важ лэстэ и қандири (1 Лет. 22:5). О Саламоно трэбуй сас тэ стерэл бари дила и тэ диқэл пала вся о народо. Би лэ Иеговаско лэстэ нисо на вижылоп. Со жэ ԥэндя лэсти о Давидо? Давайте уӷанаса.

11. Со о Давидо приԥэндя лэ Саламоности и сар жалас лэстири жызня, пока во кандэлас пэстирэ дадэс? (1 Царей 2:2, 3). (Кадяжэ диқэн и картинка.)

¹¹ Со ԥэндя о Давидо? (Проадинон 1 Царей 2:2, 3.) О Давидо ԥэндя пэстирэ шавэсти, кай если во лэла тэ кандэл лэ Иеговас, тоди лэстар лэла тэ марэл и бах. И пока о Саламоно кадя терэлас, во бут со домарделя (1 Лет. 29:23—25). Например, во строисардя лэ Иеговастири қандири и пистросардя дэсавэ книжки, савэ ужылэ андэ Библия. Кадяжэ лэстирэ алава призындярдён и андэ авэр библейски книжки. Пала лэстири годи и барвалимос ашундёлас дажэ пала Израилё (1 Цар. 4:34). Но лэсти трэбуй сас тэ сэрэл лэ Давидостирэ алава пала кода, кай во авэла бахтало, если кати лэла тэ кандэл лэ Иеговас. Ӷэт май интя во ля тэ тэлёл лэ хохавнэ дэвлэнди. Лэ Иеговасти када на чалеля и во парашэля тэ дэл лэ Саламоности мудрость, ай би лако во ужэ не моӷ правильно и справедливо тэ правий (1 Цар. 11:9, 10; 12:4).

12. Сости амэн сытярэн лэ Давидостирэ алава?

¹² Сости амэ сытювас? Кала амэ кандас лэ Иеговас, када анэн амэнди бах (Прит. 1:1—3). Канешно, о Иегова на ԥэндя, кай амэ аваса кацавэ жэ барвалэ и ашунглэ, сар о Саламоно. Но если амэ приашундювас каринг о Дэл, во поможыя амэнди тэ ашас май годявэрнэ (Прит. 2:6, 7; Иак. 1:5). И советоря, савэ запистромэ андэ Библия, поможына амэнди тэ прилас правильни ришэнии андэ разни вопросоря. Например, сави бути тэ витидас, каринг тэ жас тэ сытювас, кала и сар тэ отцыювас и сар тэ тратисарас и ловэ. Кала прилас кадэла советоря лэ Дэвлэстар, амэ фэрисарас амари дружба лэса и тоди сможэм тэ жувас вечно (Прит. 2:10, 11). Ай инке амэндэ авэна лашэ друӷоря и бахтало ери.

13. Васо и Кармэн ашэля май бахтали?

¹³ И Ка́рмэн анда Мозамбико гиндояс, кай трэбуй тэ авэс фартэ ӷрамотно, если камэс варисо тэ домардёс. Важ када вой жыля тэ сытёл по архитекторо. Амари ԥэй росԥэнэн: «Манди кадя чалёлас тэ сытював, но када одлэлас фартэ бут время и зор. И урокоря залэнаспэ фартэ рано и кончинаспэ аж вэчэром. Важ када манди ашэля ԥарэс тэ попэрав пэ собрании, и мэ лэм тэ дурював лэ Иеговастар. Мэ полэм, кай камав тэ уӷодисарав дуе дэвлэнди» (Матф. 6:24). И Кармэн мангэласпэ и адинояс амарэ публикацыи. Инке вой ԥэнэн: «Мэ подэм дума лэ барэдэрэ ԥралэнца и ла мамаса и витидэм тэ ашавав и учоба, кай тэ ашав пианеро. Када сас со май правильно ришэния, и мэ радо, кай ла прилэм».

14. Пэр со шутэ сама о Маисеё и о Давидо, кала ԥэндэсас послидни алава?

¹⁴ О Маисеё и о Давидо фартэ любинас лэ Иеговас и полэнас, сар дэ важно тэ кандэн лэс. Андэ пэстирэ послидни алава вонэ ԥэндэ аврэнди тэ лэн лэндар примеро и никала тэ на дурён лэ Дэвлэстар. Вонэ кадяжэ ԥэндэ, кай кодэла, ко одбандёна лэ Иеговастар, парашэна тэ авэн лэсти уӷодни, и о Дэл на лэла лэн будэр тэ блаӷословий. Лэндирэ алава поджан и каринг амари время. Ай кала прожылэ бут бэрша, инке ек лэ Иеговаско мануш сыкадя, сар дэ важно тэ на ашавэн лэ Дэвлэс.

«ВАЖ МАНДЭ НИНАЙ МАЙ БАРИ РАДОСТЬ»

15. Со важ пэстири жызня диқля о Иоано?

¹⁵ О Иоано сас лэ Исусоско пашутно друӷо и апостало (Матф. 10:2; Иоан. 19:26). Во часто ԥирэлас тэ росԥэнэн лэ Исусоса важ о Дэл, диқэлас пэстирэ яқэнца всаворэ лэстирэ чудеса и подритярэлас лэс андэ ԥари время. О Иоано сас паша Исусо, кала лэс умардэ и диқля лэс посли кода, сар во жунделя. Во кадяжэ диқля, сар и цынёни ӷрупа ашэля баро христианско ӷурто, ай и лащи новость розжыляпэ «па вся и люма» (Клс. 1:23).

16. Касти придэн зор лэ Иоаностирэ письморя?

¹⁶ Кала о Иоано сас фартэ ԥуро, лэсти випэля бари бах тэ пистрой дэсавэ книжки андэ Библия. Ек андар лэндэ, савятар жал жэро па тила, — када «лэ Исусостири лэ Христостири свынто тайна» (Тайна 1:1). Ай инке во пистросардя ек анда штар книжки пала Исусо и трин письморя. Пэско трито письмо о Иоано пистросардя лэ Дэвлэстирэ манушэсти лэ Гаёсти, савэс любияс, сар пэстирэ шавэс (3 Иоан. 1). Андо ӷурто сас и бут авэр христианоря, савэн о Иоано кадя жэ любияс. Кода, со пистросардя о Иоано андэ пэстирэ ԥурэ бэрша, подритярэл лэ Исусостирэ учениконэн и адес.

17. Сар ԥэнэнпэ андо 3 Иоано 4, со анэна амэнди радость?

¹⁷ Со пистросардя о Иоано? (Проадинон 3 Иоано 4.) О Иоано ԥэнэнас пала радость, сави амэндэ исин кодэлэстар, кай амэ кандас лэ Дэвлэс. Каринг кодэя время, сар во пистросардя пэско трито письмо, появисайлэ мануша, савэ сытярэнас хохаимасти и римонас ладо андо ӷурто. Но сас и кодэла, ко на оджалас лэ Дэвлэстирэ дромэстар. Вонэ кандэнас лэ Иеговас и жувэнас па «лэ Дэвлэстири время» (2 Иоан. 4, 6). Кадэла лэ Дэвлэстирэ мануша радуинас най кати лэ Иоанос, но и лэ Иеговас (Прит. 27:11).

18. Сости амэн сытярэн лэ Иоаностирэ алава?

¹⁸ Сости амэ сытювас? Кала кандас лэ Иеговас, када анэн бари радость (1 Иоан. 5:3). Например, амэ лошавас, кала терас кода, со чалёл лэ Иеговасти. Во фартэ радо тэ диқэл, кай амэ на поддаспэ лэ бэзэхэсти и жувас па лэстирэ законоря (Прит. 23:15). Радуинпэ и лэстирэ анӷелоря (Лука 15:10). Ай инке амэ лошавас, кала амарэ ԥрала и ԥэя на ашавэн лэ Дэвлэс, дажэ если пэр лэндэ тасавэн и лэндэ ԥаримос (2 Фес. 1:4). Ай кала лэ Сатанастиря люматар нисо на ашэлапэ, амэ аваса инке май лошалэ кодэлэстар, кай на парашэлям тэ кандас лэ Иеговас.

19. Со по ди кай и Рэйчел, кала вой поможый аврэнди тэ андярэн лэ Дэвлэстири время? (Кадяжэ диқэн и картинка.)

¹⁹ Амэ фартэ лошалэ кодэлэстар, кай можэм тэ росԥэнас лэ манушэнди пала Иегова. И Рэйчел, сави жувэл андэ Даминиканско Республика, цэний, кай можэт тэ поможый аврэнди тэ андярэн лэ Дэвлэстири время. Акэ со вой ԥэнэн пала кодэла, касти поможый тэ уӷанэн пала Дэл: «Аж оди радуийпэ, кала вонэ лэн тэ любин лэ Иеговас, тэ патян лэсти и тэ парувэн пэстири жызня важ лэстэ. Тоди мэ полав, кай вся, со мэ теравас, сас най евья».

ПРИАШУНДЁН КАРИНГ И ПОСЛИДНИ АЛАВА, САВЭ ԤЭНДЭ ЛЭ ДЭВЛЭСТИРЭ КАНДИНЭ МАНУША

20. Андэр со амэ шаспэ лэ Маисеёса, лэ Давидоса и лэ Иоаноса?

²⁰ О Маисеё, о Давидо и о Иоано жувэнас фартэ дэлмут и лэндири время на шолпэ пэ амари. Но амэндэ исин кода, андэр со амэ шаспэ. Вонэ тэлёнас лэ чачунэ Дэвлэсти — кодэлэ Дэвлэсти, савэсти тэлювас и амэ. Вонэ мангэнаспэ лэ Иеговасти, патянас лэсти и взвинаспэ каринг лэстэ пала совето и помощь. И амэ терас точно кадя жэ. О Иегова блаӷословил кадэлэ кандинэ муршэн и амэ патяс, кай во блаӷословия и амэн.

21. Со аштярэл всаворэн, ко приашундёла каринг и послидни алава, савэ ԥэндя о Маисеё, о Давидо и о Иоано?

²¹ Лэ Дэвлэстирэ трин годявэрнэ, кандинэ мануша ԥэнэн амэнди тэ ритярас лэ Иеговаско законо. Давайте кадя и тэ терас. Тоди амэ па чачимастэ аваса бахталэ, со бы амэ тэ на терас. Амэ ласа долӷо тэ жувас — амэндэ авэла вечно жызня! (Втор. 30:20). И амэ ласа тэ лошавас, важ кода кай уӷодисарас амарэ небеснонэ Дадэсти. Во стерэла вся, пала со дя алав, тай инке кадя, сар амэ дажэ не можэм пэсти прецтавить (Еф. 3:20).