Сытён кай о Иегова — авэн блаӷоразумни

1. Сар о христианино можэт тэ шолпэ пэ витка? (Диқэн кадяжэ и картинка.)

«ЕСЛИ витка бандёл, и балвал ла на ԥагэла». Анда кадэя пословица дицол, со поможый лэ виткэнди тэ на хындён, — када и гибкость. Кай о христианино тэ барёл духовно, во тожэ трэбуй тэ авэл гибко. Пала со жал и дума? Амэнди трэбуй тэ авас блаӷоразумни — то есть тэ ӷанас, сар тэ андярас пэс, кала варисо андэ жызня парудёл, и тэ стас патив пэ кода, со гиндон и витидэн авэр.

2. Савэ качестворя поможына амэнди тэ полас, сар тэ андярас пэс, кала варисо парудёл, и пала со амэ подаса дума андэ кадэя статья?

² Амэ служысарас лэ Иеговасти и важ када камас тэ авас блаӷоразумни. Ай инке амэ камас тэ авас смирени и тэ жалуисарас анда вся оди. Андэ кадэя статья амэ уӷанаса, сар кадэла качестворя поможысардэ дэсавэ христианонэнди тэ присытён каринг кода, кай андэ лэндири жызня варисо паруделя. Амэ кадяжэ диқаса, сар кадэла качестворя поможына амэнди. Но спэрва шаса сама пэ со май лашо примеро, сар тэ авас блаӷоразумни, саво сыкавэн о Иегова и о Иисусо.

О ИЕГОВА И О ИИСУСО БЛАӶОРАЗУМНИ

3. Андар со дицол, кай о Иегова блаӷоразумно?

³ Пала Иегова ԥэнэнпэ, кай во скала, важ кода кай во састо и лэс нисо на змарэла (Втор. 32:4). Но о Иегова инке и блаӷоразумно Дэл. Андэ кадэя люма вся и время варисо парудёл. Но амаро Дэл гибко и во ӷотово сразу жэ варисо тэ парувэл, кай тэ исполница лэско замысло. О Иегова создал лэ манушэн пар пэстэ и стердя кадя, кай вонэ моӷут тэ присытён каринг кода, со ӥто парудёл. Кадяжэ через и Библия во дя амэнди принцыпоря, савэ поможына амэнди тэ прилас годявэрнэ ришэнии, саво бы ԥаримос амэндэ тэ на авэл. Лэ Иеговаско примеро и принцыпоря, савэ во амэнди дя, сыкавэн, кай хоть во и састо, сар скала, всаек во блаӷоразумно.

4. Росԥэнэн, сар о Иегова сыкавэлас пэстири блаӷоразумия (Левит 5:7, 11).

⁴ Вся лэ Иеговастири дила совэршэно, и во андэ вся блаӷоразумно. Во най строӷо каринг и мануша. Акэ сар лэ Иеговастири блаӷоразумия дицолас каринг и израильтяноря. Во на ԥэнэнас, кай и барвалэ и чорэ трэбуй тэ анэн одинакови жэртвы. Дэкала во домэкэлас кай и мануша тэ анэн жэртвы па пэско достатко. (Проадинон Левит 5:7, 11.)

5. Росԥэнэн, сар о Иегова сыкавэлас и смирения и жалуияс анда вся оди.

⁵ О Иегова блаӷоразумно, важ кода кай смирено и жалуий анда вся оди. Например, о Иегова сыкадя и смирения, кала камэлас тэ уничтожыт лэ найлашэ манушэн андо Содомо. Через и анӷелоря о Иегова ԥэндя лэ Лотости тэ нашэл андэ плая. Но о Лото пэрэдарайля. Во ля фартэ тэ мангэл, кай о Иегова тэ мэкэл, кай во и лэско ери тэ нашэн андо Цоаро, — найбаро форицэ, саво тожэ трэбуй сас тэ авэл уничтожэно. О Иегова моӷ бы тэ приԥэнэн, кай о Лото тэ стерэл кадя, сар во ԥэнэн, ай най па пэстирятэ. Но во приашунделя каринг о Лото, хоть через када и трэбуй сас тэ на уничтожыт о Цоаро (Быт. 19:18—22). Через бут бэрша о Иегова анда оди жалуисардя и Ниневия. Во бишалдя лэ Ионас тэ ԥэнэн, кай о форо и всаворэ мануша андэр лэстэ авэна уничтожэни. Но и мануша анда Ниневия каисайлэ. Важ када о Иегова жалуисардя лэн и нэ уничтожыл о форо (Иона 3:1, 10; 4:10, 11).

6. Росԥэнэн, андар со дицолас, кай о Иисусо блаӷоразумно, сар и о Иегова.

⁶ Сар и лэско дад, о Иисусо сас блаӷоразумно. О Иегова бишалдя лэс тэ проповедует лэ «хасардэ бакрорэнди андо Израилё». Но кала во кадя терэлас, о Иисусо сас блаӷоразумно. Еқвар и найизраильтянка ля фартэ тэ мангэл лэс тэ исцэлий латиря щя, савя фартэ мучинас и найвужэ. О Иисусо анда оди жалуисардя кадэла манушня и исцэлисардя латиря щя (Матф. 15:21—28). Ай акэ авэр примеро. Кала о Иисусо сытярэлас лэ апосталонэн, во ԥэндя: «Ко англа миро отԥэндёла мандар, мэ отԥэндювава лэстар» (Матф. 10:33). Но отԥэнделя о Иисусо лэ Петростар, саво тривар ԥэндя, кай на ӷанэн лэс? Най. Во диқля лэстири вера и кай во каийпэ. Посли кода, сар о Иисусо жунделя, во авеля каринг о Пётро и, май ӥто всаворэстар, ԥэндя, кай любий лэс и простий (Луки 24:33, 34).

7. Савэ амэ камас тэ авас англа миро, сар ԥэнэнпэ андэ Филиппийцам 4:5?

⁷ Амэ диқлям, кай о Иегова и о Иисусо блаӷоразумни. Ай со можно тэ ԥэнас пала амэндэ? О Иегова камэл, кай амэ тэ авас блаӷоразумни. (Проадинон Филиппийцам 4:5.) Андэ ек ла Библияко переводо андэ Филиппийцам 4:5 ԥэнэнпэ, кай о миро трэбуй тэ ӷанэн, кай амэ блаӷоразумни мануша. Пуш пэстар: «Диқэн авэр, кай мэ блаӷоразумно, на тердював пэ пэско и терпеливо? Или авэр гиндон, кай мэ упрямо, строӷо и никала на жав пэ уступки? Терав мэ вся, кай тэ авэл па мэрнятэ? Или мэ приашундював каринг авэр и, кала када возможно, шав сама пэ кода, со камэн авэр?» Со май бут амэ андярас пэс блаӷоразумно, со май фартэ амэ шаспэ по Иегова и по Иисусо. Давайте розласа дуй маменторя, андэ савэ трэбуй тэ авас блаӷоразумни: кала андэ амари жызня варисо парудёл и кала аврэндири мнения и ришэнии на шонпэ пэ амарэ.

АВЭН БЛАӶОРАЗУМНИ, КАЛА ВАРИСО ПАРУДЁЛ АНДЭ ЖЫЗНЯ

8. Со поможыя амэнди тэ авас блаӷоразумни, кала варисо парудёл? (Диқэн кадяжэ и сноска.)

⁸ Тэ авэс блаӷоразумно — значит тэ ӷанэс, сар пэс тэ андярэс, кала варисо парудёл. Через када моӷут тэ авэн трудности, пала савэ амэ на гиндосарасас. Например, амэндэ моӷут тэ авэн барэ проблемы лэ зорэса. Ай через кода, со терэлпэ андэ политика и андэ экономика, амари жызня можэт тэ ашэл фартэ ԥари (Эккл. 9:11; 1 Кор. 7:31). Дажэ кала парудёл амари назначения андэ арӷанизацыя, када можэт тэ ашэл важ амэндэ ԥаримос. Со бы тэ на терэлпэ андэ амари жызня, тэ присытювас каринг када амэнди поможына штар маменторя: 1) прилэн, кай тумари жызня паруделя, 2) диқэн англэ, 3) гиндон кати пала лашымос и 4) поможын аврэндиb. Давайте розласа, сар дэсавэ манушэнди поможысардэ кадэла советоря.

9. Сар ек мисианерско ери виритярдя о ԥаримос, саво вонэ на аштярдэ?

⁹ Прилэн, кай тумари жызня паруделя. О Эмануэ́лё и Франче́ска сас назначени тэ служын сар мисианероря андэ авэр страна. Кати вонэ линэ тэ сытён и нэви шыб и уӷанглэ и собрания, сар заляпэ и пандэмия КОВИДО-19 и лэнди прижыляпэ тэ бэшэн цэрэ. Потом кай и Франческа муля и дэй. Канешно, лати камэласпэ тэ авэл паша пэстирэ чаче андэ кадэя ԥари время. Но через и пандэмия вой нэ моӷла каринг лэндэ тэ ладэл. Со поможысардя лати тэ на умэкэл и вас андэ кадэя найвушэро время? Пэрво: вонэ лэ хуласа мангэнаспэ, кай фартэ тэ на пэрэжывают и тэ ришын и проблемы по набут. О Иегова дя атвето пэ лэндирэ молитвы через и духовни гиндоря, савэ поджанас важ кодэя время. Например, лэн фартэ подритярдэ и алава, савэ ԥэндя ек ԥрал андо видеоинтервью: «Со май ӥто амэ шас сама пэ нэвэ обстоятельства, со май ӥто амэ ашас радосни. Исин возможности, кай андэ кадэла обстоятельства тэ авэл май бут лашымос»c. Дуйто: вонэ ришыли, кай лэна тэ сытён май драго тэ служын па телефоно. Лэндэ дажэ вижыля тэ залэн изучения Библии. Трито: вонэ цэнинас кода, кай и катутнэ ԥрала и ԥэя подритярэн лэн. Ек ԥэй цыло бэрш бишалэлас лэнди кажно дес найбаро библейско гиндо. Если амэ, сар и кадэла мисианероря, прилас кода, со паруделя, тоди амэ аваса радосни кодэлэстар, со можэм тэ терас.

10. Со стердя ек ԥэй, кала латири жызня фартэ паруделя?

¹⁰ Диқэн англэ и гиндон кати пала лашымос. И Кристина, румынка, сави жувэл андэ Япония, фартэ ростроилась, кала и английско собрания, андэ сави вой ԥирэлас, ԥандадэ. Но вой на ля тэ гиндой кати пала кода, со тердяпэ. Вой ришыла тэ служый андэ японско собрания и тэ терэл май бут дила андэ служэния. Вой мангля ла манушня, савяса раньшэ терэлас бути, тэ поможый лати май драго тэ дэл дума пэ японско шыб. И манушни соӷласисайля и ля тэ сытярэл ла па Библия и па брашура «Жувэн вечно пэ бахтатэ!». Када сас райкани идея! И Кристина ля май драго тэ дэл дума пэ японско, ай само ӷлавно — кадэя манушни закамля тэ уӷанэн и истина. Если амэ диқас англэ и гиндосарас пала лашымос, тоди кода, со парудёл андэ амари жызня, можэт тэ анэн бут блаӷословении.

11. Сар ек ери пэрэжудя и проблемы андэ экономика?

¹¹ Поможын аврэнди. О ери, саво жувэл андэ страна, кай амари дила тала запрето, хасардя пэстири бути через кода, кай сас проблемы андэ экономика. Со поможысардя лэнди тэ лэн тэ жувэн па аврятэ? Спэрва вонэ линэ тэ жувэн май просто. Кадяжэ вонэ ришыли фартэ тэ на загиндонпэ пала пэстирэ проблемы, ай тэ поможын аврэнди и май бут тэ росԥэнэн пала Дэл (Дила 20:35). О хулай ԥэнэн: «Амэ самас фартэ заняти андэ служэния и бут время отдасас важ лэ Иеговастири дила. Важ када амэнди сас найкала тэ бэшас и тэ жалуисарас пэс». Кала амари жызня парудёл, важно и май дур тэ поможысарас аврэнди. Ай со май лашо, со амэ можэм тэ терас, — када тэ росԥэнас лэ манушэнди и лащи новость пала Царство.

12. Сар лэ Павлоско примеро поможый амэнди тэ авас гибки андэ служэния?

¹² Кала амэ росԥэнас пала лэ Дэвлэско Царство аврэнди, амэ трэбуй тэ авас гибки. И мануша, савэнца амэ дас дума, по разному гиндон пала Дэл, лэндэ разно нацыя и культура. О апостало Павло виарақэлас подходо каринг всаворэ, и амэ можэм лэстар тэ сытювас. О Иисусо стодя лэ Павлос, кай во тэ авэл «апостало важ и найевреёря» (Рим. 11:13). И кай о Павло драго када вижалас. О Павло росԥэнэнас пала Дэл най кати лэ евреёнэнди, но и лэ греконэнди, кодэлэнди, кастэ сас образования, простонэ манушэнди, лэ барэдэрэ манушэнди андэ страна и лэ царёнэнди. Кай и истина тэ запэрэл андо ди кажнонэсти, о Павло стердя вся, со можно сас, кай тэ поможый разнонэ манушэнди (1 Кор. 9:19—23). Во шолас сама пэ лэндири культура, пэ кода, сар вонэ барелэ, андэр со патянас, и виарақэлас подходо каринг лэндэ. Амари служэния тожэ анэна май бут польза, если амэ аваса гибки и сытюваса тэ виарақас подходо кажнонэ манушэстэ, савэса амэ дас дума андэ служэния.

СТОН ПАТИВ ПЭ КОДА, СО ГИНДОН АВЭР

13. Сар ԥэнэнпэ андэ 1 Коринфянам 8:9, сави опасность амэ обжаса, если ласа тэ стас патив пэ кода, со гиндон авэр?

¹³ И блаӷоразумия поможыя амэнди тэ стас патив пэ кода, со гиндон авэр. Например, дэсавэ ԥэянди чалёл тэ красынпэ, ай авэр витидэн када тэ на терэн. Дэсавэ христианонэнди чалёл тэ пэн (канешно кадя, кай тэ на матён), ай авэр витидэн вобще тэ на пэн. Всаворэ христианоря камэн, кай лэндэ тэ авэл лашо зор, но витидэн разно личения. Если амэ гиндосарас, кай правильно кати кода, со амэ витидас, и камас, кай кадя жэ тэ терэн авэр, тоди можэм тэ ашас сар о бар, через саво и ԥрала и ԥэя моӷут тэ пэрэн, и када анэна каринг и разделения. Канешно, амэ када на камас (проадинон 1 Коринфянам 8:9; 10:23, 24.) Роздиқам дуй примероря, сар кода, кай амэ жувас па библейски принцыпоря, поможый амэнди тэ авас уравновешэни и тэ ладисарас аврэнца.

14. Савэ библейски принцыпоря поможын тэ витидас ӥда и прическа?

¹⁴ Ӥда и внешнё видо. О Иегова на стол строӷи правилоря андэ кода, сар амэ тэ утидаспэ. Вместо када во дэл амэнди принцыпоря. Амэ трэбуй тэ утидаспэ кадя, кай авэр тэ полэн, кай амэ лэ Дэвлэстирэ служытеля — «скромно и годяса» и кай тэ дицол амари блаӷоразумия (1 Тим. 2:9, 10; 1 Пёт. 3:3). Амэ на камас, кай пар мэндэ тэ шон фартэ бут сама. И Библейски принцыпоря кадяжэ поможын лэ барэдэрэ ԥралэнди тэ на стон пэстирэ правилоря важ и ӥда и прически. Андэ ек собрания кай и тэрнэ ԥрала сас модни стрижки: скурти, но фартэ найакуратни. Сар и барэдэр ԥрала смоӷли лэнди тэ поможын, но на стодэ важ када нисавэ правилоря? Вонэ стердэ, сар ԥэндя лэнди о раёно барэдэр ԥрал: «Ԥэнэн кадэлэ тэрнэ ԥралэнди: „Если, кала тумэ тердён пэ сцэна, и мануша май бут шон сама пэр тумэндэ, чем пэ кода, со тумэ дэн дума, тоди андэ тумари ӥда и андэ прическа варисо най кадя“». Кадэла гиндоря поможысардэ лэ тэрнэ ԥралэнди тэ полэн, со лэндар аштярэн. Ай лэ барэдэрэ ԥралэнди на прижыляпэ тэ стон правилоряd.

15. Савэ законоря и принцыпоря анда Библия поможына амэнди тэ витидас личения? (Римлянам 14:5).

¹⁵ Зор. Кажно христианино трэбуй екжэно тэ витидэл, сар тэ заботийпэ пала пэско зор (Гал. 6:5). Андэ Библия исин кати дэсавэ законоря пала личения. Например, тэ ритярдювас май дур лэ ратэстар и лэ бэнгалимастар (Дила 15:20; Гал. 5:19, 20). Андэ авэр маменторя амэ витидас екжэнэ. Варико жал кай и врачоря, ай варико личийпэ па аврятэ. Дажэ если амэ уверени, кай витидям правильно личения, амэнди трэбуй тэ стас патив пэ кода, кай и ԥрала и ԥэя моӷут тэ витидэн екжэнэ. Ритярэн андо гиндо акэ со: 1) кати лэ Дэвлэско Царство улэла вся о насвалимос, саво исин кай и мануша (Ис. 33:24); 2) кажно христианино витидэл кода, со авэла со май драго важ лэстэ (проадинон Римлянам 14:5); 3) нащи тэ сындосарас аврэн или тэ терас кода, через со лэндири вера ашэла май слабо (Рим. 14:13); 4) и христианоря сыкавэн и любовь и на гиндон, кай лэнго право тэ витидэн май важно, чем о единство андэ собрания (Рим. 14:15, 19, 20). Если амэ сэрас кадэла гиндоря, тоди амари дружба лэ ԥралэнца и лэ ԥэянца авэла састи и пэстиря ригатар амэ стераса вся, кай андэ собрания тэ авэл мирно.

16. Сар о барэдэр ԥрал сыкавэла блаӷоразумия, кала во розлэл варисавэ вопросоря аврэ барэдэрэ ԥралэнца? (Диқэн кадяжэ и картинка.)

¹⁶ И барэдэр ԥрала трэбуй тэ сыкавэн, сар када — тэ авэн блаӷоразумни (1 Тим. 3:2, 3). О ԥрал на трэбуй тэ гиндой, кай если во май ԥурэдэр аврэ барэдэрэ ԥралэндар, значит авэр трэбуй тэ терэн кадя, сар во ԥэнэн. Во полэл: лэ Иеговаско духо можэт тэ побудий любонэс анда лэ барэдэрэ ԥралэнго круӷо тэ ԥэнэн кода, со поможыя тэ прилэн мудро ришэния. Если на жылэ против библейски принцыпоря, о блаӷоразумно барэдэр ԥрал анда оди подритярэла кода, со витидэ май бут ԥрала, дажэ если во гиндой па аврятэ.

САВО ЛАШЫМОС АНЭН И БЛАӶОРАЗУМИЯ?

17. Саво лашымос исин кодэлэндэ, ко андярэл пэс блаӷоразумно?

¹⁷ Если амэ андярас пэс блаӷоразумно, амэндэ авэла бут лашымос. Амэндэ лащи дружба лэ ԥралэнца и лэ ԥэянца, ай андэ собрания мирно. Амэ лошавас, кай о Иегова стидя амэн андэ ек баро дружно ери, хоть амэндэ всаворэндэ разно характеро и культура. Ай со май ӷлавно, амаро ди лошавэл кодэлэстар, кай амэ май фартэ шаспэ пэ амаро блаӷоразумно Дэл, Иегова.