«Бахталэ тумэ, сар ӷанэн када и терэн кадя»
«Мэрно хамос, тэ терав вся, со камэл кодэва, ко ман бишалдя и тэ достерав и дила, сави во манди дя» (ИОАННА 4:34).
1. Сар через кода, кай и мануша андэ кадэва миро гиндон кати пала пэстэ, амэ лас тэ заваздас о шэро?
ВАСО ԥарэс тэ терас, со уӷанас анда лэ Дэвлэско алав? Ԥарэс кодэлэстар, кай заваздас о шэро, хоть и камас тэ терас драго англа Дэл. Амэ жувас андэ «послидни деса». Паша амэндэ и мануша, пала савэ андэ Библия пистромэ, кай вонэ любин кати корко пэс, любин и ловэ, патян кати андэр пэстэ, гиндон пала пэстэ бут и на ӷанэн тэ ритярэн пэс андэ вас (2 Тимофею 3:1 жы кай 3). Амэ лэ Дэвлэстирэ мануша ӷанас, кай тэ андярас пэс кадя нащи. Но дэкала здэлпэ, кай и мануша, савэ кадя пэс андярэн, бахталэ и жувэн лащя жызняса (Псалом 37:1; 73:3). Дэкала дажэ гиндосарас кадя: «Чаче, трэбуй тэ гиндосарас спэрва пала авэр, ай тоди кати пала пэстэ? Сар мэ лава тэ андярав пэс лэнца, сар цыкно, на парашэна вонэ тэ стон пэр мандэ патив?» (Луки 9:48). Кала амэ гиндосарас кати пала пэстэ, амэ парашас тэ ладисарас и тэ полас амарэ ԥралэн и ԥэян, савэнца патяс андо ек Дэл. Кадяжэ и авэр на ӷатярэна амэн, сар христианонэн. Андэ Библия пистромэ пала лэ Дэвлэстирэ мануша, савэ на заваздэнас о шэро. Кала амэ гиндосарас пала лэндэ и терас кадя, сар вонэ, амэндэ авэла лашимос.
2. Сости амэ сытювас лэ Дэвлэстирэ манушэндар, савэ жувэнас дэлмут и на парашэнас лэс тэ кандэн?
2 Со дя зор лэ Дэвлэстирэ манушэнди, савэ жувэнас андэ дэлмутни время тэ полэн лэ Дэвлэс, сар кодэлэс, каса ладин, хан и пэн? Катар вонэ лэнас о зор, кай тэ терэн драго англа Дэл? Кала амэ адиносарас и гиндосарас пала лэндэ, амэ лас май фартэ тэ патяс лэ Дэвлэсти.
ВАСО АМЭНДИ ТРЭБУЙ КОДА, СО СЫТЯРЭЛ ВАЖ О ДЭЛ?
3, 4. а) Через со о Иегова сытярэл амэн? б) Васо амэнди, кай и вера тэ ашэлпэ май састи, на хутилэла кати тэ ӷанас пала Дэл?
3 О Иегова амэнди дэл вся, кай амари вера тэ ашэлпэ састи. Амэндэ исин Библия, литература, сави стерди па Библия, интернэт телевидения, собрания и конӷрессоря. Ай о Иисусо ԥэндя, кай амэнди трэбуй най кати тэ ӷанас пала Дэл. Во ԥэндя: «Мэрно хамос, тэ терав вся, со камэл кодэва, ко ман бишалдя и тэ достерав и дила, сави во манди дя» (Иоанна 4:34).
4 Важ о Иисусо тэ терэл, со камэл о Дэл сас, сар о хамос. Кала амэ хас лашо хамос, амэ лас зор и амэнди ашэл май драго по ди. Кадяжэ, кала амэ терас, со камэл о Дэл, амэ май фартэ лас тэ патяс андэр лэстэ. Файма, тумэндэ най еқвар сас кадя. Тумэ жан кордэ, кай стидэнпэ тэ сытён тэ росԥэнэн важ о Дэл и посли жан тэ терэн када. Тумэ цыенэ, ай кала ринпэ цэрэ, сар росԥэндэ пала Дэл, тумэ вурян, сар пэ ԥақа.
5. Саво лашимос авэла кодэлэндэ, ко терэл годявэрнэс?
5 Кала амэ кандас лэ Иеговас, амэ терас годявэрнэс (Псалом 107:43). Саво лашимос амэндэ тоди авэла? Андэ Библия ԥэнэнпэ: «Бахтало мануш, саво виарақля и мудрость... Вой май куч лэ кораллонэндар, и нисо, со тути куч, на сыстояпэ ласа. [...] Вой ла жызнятири витка важ кодэла, ко хутилдёл пала латэ, и пэ кодэла, ко састэс ритярдёлпэ пала латэ, ԥэнэна, кай вонэ бахталэ» (Притчи 3:13 жы кай 18). О Иисусо ԥэндя: «Бахталэ тумэ сар ӷанэн када и терэн кадя» (Иоанна 13:17). Кай тэ авэн бахталэ, лэ Иисусостирэ учениконэнди трэбуй сас тэ терэн, со во ԥэндя лэнди. Вонэ трэбуй сас тэ жувэн, сар сытярдя лэн о Иисусо и тэ андярэн пэс кадя, сар во. Када вонэ трэбуй сас тэ терэн най время времятар, ай вся и жызня.
6. Васо амэ трэбуй тэ на парашас тэ терас, сости сытювас анда Библия?
6 Амэнди трэбуй и адес тэ на парашас тэ терас, сости сытювас анда Библия. О мануш, саво терэл и вураля, ӷанэн най кати, сар и вураля тэ терэл, ай кадяжэ соса лэн тэ терэл. Но кала во на терэл и бути кодэлэса, со лэстэ исин, тоди лэстэ вижала набут со. Сар во камэл драго тэ терэл и вураля, во трэбуй тэ на парашэл тэ терэл кадэя дила, хоть во и дэлмут залэлпэ кадэлэса. Кадяжэ и амэ. Кала амэ кати лям тэ терас, сости сытювасас анда Библия, амэ самас лошалэ кодэлэстар, кай амэндэ када вижалас. Но кай тэ на парашас тэ авас лошалэ, амэнди трэбуй кажно дес тэ терас кадя, сар сытярэл о Иегова.
7. Со тэ терас, кай тэ сытювас лэ манушэндар, пала савэ пистромэ андэ Библия?
7 Подам дума, сар тэ на заваздас о шэро, кала амэнди ԥарэс. Инке уӷанаса, сар кай лэ Дэвлэстирэ мануша, савэ на парашэнас лэс тэ кандэн, вижалас тэ на заваздэн о шэро. Но амэнди трэбуй най кати тэ адиносарас пала када. Трэбуй тэ гиндосарас и тэ терас, сар вонэ.
АНДЯРЭН ПЭС АВРЭНЦА КАДЯ, КАЙ ТУМЭ НАЙ МАЙ ЛАШЭ АВРЭНДАР
8, 9. О Павло на завазгля о шэро. Со амэ уӷанас пала када анда Деяния 14:8 жы кай 15? (Диқэн и картинка англа статья.)
8 О Дэл «камэл, кай и разни мануша тэ спасынпэ и драго тэ полэн о чачимос» (1 Тимофею 2:4). Ай, сар ту андярэс пэс лэ манушэнца, савэндэ най кацави нацыя, сар тутэ, и вонэ инке на уӷанглэ о чачимос? О апостоло Павло росԥэнэнас лащи весть лэ евреёнэнди, савэ ужэ ӷанэнас пала Иегова, ай кадяжэ и най лэ евреёнэнди. Заваздэлас о Павло о шэро чи най, дицэля, кала во росԥэнэнас пала Дэл лэ манушэнди, савэ тэлёнас хохавнэ дэвлэнди.
9 О Павло лэ Варнаваса пэрво разо жылэ дур тэ росԥэнэн пала Дэл. Вонэ жылэ андэ Листра. И мануша, савэ котэ жувэнас, линэ тэ гиндон, кай вонэ дэвла, о Зевсо и о Гермесо, савэ авелэ андэ манушыкани тила. Чалеля када лэ Павлости и лэ Варнавасти? Линэ вонэ тэ гиндон, кай када лашимос важ лэнго ԥаримос, саво вонэ пэрэжудэ андэ авэр фороря? Кала и мануша драго прилинэ лэ Павлос и лэ Варнавас, линэ вонэ тэ гиндон, кай через када и мануша лэна май драго тэ ашунэн и лащи весть? Най! О Павло и о Варнава росшындэ пэр пэстэ и йда и линэ тэ цыпин: «Состэ тумэ када терэн? Амэ кацавэ жэ мануша, сар и тумэ» (Деяния 14:8 жы кай 15).
10. Сар о Павло и о Варнава гиндонас пала мануша, савэ жувэнас андэ Листра?
10 Кала о Павло ԥэндя лэ манушэнди анда Листра: «Амэ кацавэ жэ мануша, сар и тумэ», во на ԥэндя, кай вонэ кадяжэ тэлён лэ хохавнэ дэвлэнди. Лэн о Иегова стодя, кай вонэ тэ авэн миссионероря (Деяния 13:2). Пэ кадэла ԥрала сас лэ Иеговаско свынто духо и вонэ аштярэнас тэ жувэн по нэбо. И всаек, вонэ на гиндонас, кай май лашэ аврэндар. О Павло и о Варнава полэнас, кай сар и мануша, савэ жувэн андэ Листра прилэна и лащи весть, вонэ кадяжэ лэна тэ аштярэн тэ жувэн по нэбо.
11. Сар амэнди тэ на заваздас о шэро, сар о Павло, кала росԥэнас и лащи весть?
11 Кай о Павло вижалас тэ на заваздэл о шэро. Сар амэнди тэ терас кадя, сар во? Пэрво. Кала о Иегова дя амэнди тэ терас май бут дила важ лэстэ, амэнди нащи тэ аштярас, кай амэнца лэна май драго тэ обжанпэ. Дуйто. Кажнонэсти андар мэндэ трэбуй тэ пушас пэстар: «Со мандэ андо ди каринг и мануша, савэ жувэн котэ, кай мэ жував? На гиндосарав мэ пала лэндэ вэрыто, сар и авэр мануша?» Па вся люма лэ Иеговастирэ свидетеля родэн лэ манушэн, савэ камэн тэ уӷанэн пала Дэл. Лэ Иеговастирэ свидетеля терэн бут со, кай тэ уӷанэн, пэ сави шыб дэн дума и мануша котэ, кай и ԥрала и ԥэя анда лэндири собрания росԥэнэн пала Дэл. Сар дэ драго када! Но и мануша гиндон пала авэр вэрыто. Ай дэсавэ христианоря всаек сытён и шыб и уӷанэн, сар и мануша андярэн пэс андэ пэстири культура. Кадэла христианоря никала на гиндон, кай вонэ май лашэ аврэндар. Вонэ камэн тэ полэн кажнонэ манушэс и тэ поможын тэ прилэн и лащи весть пала царство.
МАНГЭНПЭ ПАЛА ԤРАЛА И ԤЭЯ
12. Сар дицэля, кай о Епафрасо гиндояс пала авэр?
12 Инке амэндэ вижала тэ на заваздас о шэро, кала мангаспэ пала кодэла, «ко ужэ патял андо Дэл, сар и амэ» (2 Петра 1:1). Кадя терэлас о Епафрасо. Андэ Библия, андэ лэ Павлостирэ письморя пала лэстэ ԥэнэнпэ кати триварэс. О Павло бэшэлас андо Римо, сар андо баруно, и лэсти нащи сас тэ вижал цэрал. Котар во пистрояс лэ христианонэнди, савэ жувэнас андэ Колоссы, кай о Епафрасо фартэ мангэласпэ пала лэндэ (Колоссянам 4:12). О Епафрасо драго ӷанэнас лэ ԥралэн и лэ одеса фартэ загиндояспэ пала лэндэ. И дажэ тоди, кала о Епафрасо сас лэ Павлоса андо баруно, во на бистрэлас пала авэр христианоря (Филимону 23). Сар жэ драго андярэлас пэс о Епафрасо! Во на парашэлас тэ гиндой пала авэр мануш, дажэ кала лэстэ сас пэско ԥаримос. О Епафрасо мангэласпэ пала пэстирэ ԥрала и ԥэя, савэнца патялас андо ек Дэл. Амэ терас сар во, кала мангаспэ пала ԥрала и ԥэя па алавэндэ. Када дэл лэнди баро зор (2 Коринфянам 1:11; Иакова 5:16).
13. Сар тумэ тэ терэн, сар о Епафрасо, кала мангэнпэ?
13 Погиндон, пала кастэ тумэ камэн тэ мангэнпэ па алавэндэ андэ пэстирэ молитвы. И христианоря терэн, сар о Епафрасо, кала мангэнпэ пала ԥрала и ԥэя, савэндэ ԥари время. Файма, дэкасти ԥарэс тэ витидэл, ай варикасти трэбуй тэ нашэл кодэлэстар, через со во закамэла тэ стерэл, со нащи. Бут андар мэндэ мангэнпэ пала христианоря, савэ бэшэн андо баруно пала пэстири вера. Лэндирэ алава амэ виарақаса пэ амари интэрнэт телевидения. Амэ кадяжэ на бистрас пала кодэла, ко хасардэ пэстирэ чачен, ко пэрэжудэ и война, ко попэлинэ андо ураӷано, землетрясения или инке андэ варисави бида. Инке амэ на бистрас пала кодэла, кастэ андэ страна на хутилэн и ловэ. Чаче, бутэ ԥралэнди и ԥэянди трэбуй, кай амэ тэ мангаспэ пала лэндэ. Кала амэ мангаспэ пала лэндэ, амэ сыкавас, кай терас «драго най кати важ пэстэ, ай и важ авэр» (Филиппийцам 2:4). О Иегова ашунэл кацавэ молитвы!
«КАЖНО МАНУШ ТРЭБУЙ МАЙ ЙТО ТЭ АШУНЭЛ»
14. Сар о Иегова сыкадя, сар трэбуй тэ виашунас аврэн?
14 Инке амэ на заваздас о шэро, кала виашунас аврэн. Андэ Иакова 1:19 пистромэ: «Кажно мануш трэбуй май йто тэ ашунэл». О Иегова драго сыкавэл амэнди, сар када тэ терас (Бытие 18:32; Иисус Навин 10:14). Проадиносарам, со пистромэ андэ Исход 32:11 жы кай 14a (адиносар). Лэ Иеговасти на трэбуй сас кай о Моисеё тэ подԥэнэн лэсти. Но о Иегова виашундя лэ Моисеёс. Тэ авелоп ту пэ Иеговаско ҭан, виашундоп ту манушэс, саво гиндой най кадя, и стердоп ту сар во ԥэнэн? Ай о Иегова на грабийпэ тэ холявэл и виашунэл всаворэ манушэн, савэ патян андэр лэстэ и мангэнпэ лэсти.
15. Сар амэ тэ терас, сар о Иегова, кай тэ шас сама аврэн?
15 Кала о Иегова дэлас дума и виашунэлас лэ Авраамо́с, ла Рахиля́, лэ Моисеёс, лэ Иисусо́с Навино́с, лэ Маноёс, лэ Илья́с и лэ Езекия́с, во на заваздэлас о шэро. Кажно андар мэндэ трэбуй тэ пушэл пэстар: «Хэба на трэбуй манди тэ став патив пэ ԥрала и ԥэя, савэ патян манца андо ек Дэл, тэ виашунав лэн, ай кадяжэ тэ приашундював каринг кода, со вонэ манди ԥэнэн? Кас анда мэрно родо чи ԥрала и ԥэя анда собрания мэ тэ шав сама май бут? Со мэ важ лэндэ тэ стерав?» (Бытие 30:6; Судей 13:9; 1 Царей 17:22; 2 Летопись 30:20).
О ИЕГОВА ПОМОЖЫЯ ТУМЭНДИ
О Давидо ԥэндя: «Ашавэн лэс». Ай со тердоп ту? (Диқэн и абзацоря 16, 17.)
16. Сар андярдя пэс о Давидо лэ Шимеёса?
16 Дэкала амэн камэн тэ доандярэн, кай амэ тэ вижас андар пэстэ. Кала амэ на заваздас о шэро, када поможыя амэнди тэ ритярас пэс андэ вас (Эфесянам 4:2). Уӷанаса, со пистромэ андэ 2 Самуила 16:5 жы кай 13 b (адиносар). О Шимеё, саво сас анда лэ царёско, лэ Саулоско родо, дэлас амрая лэ Давидос и лэстирэ слуӷонэн и шувидэлас андэр лэндэ бара. Кай о Давидо вижылоп тэ тердярэл лэ Шимеёс, но во зритярдя пэс андэ вас. Со лэсти дя зор? Пала када уӷанаса анда трито Псалом.
17. Со дя зор лэ Давидости тэ зритярэл пэс андэ вас? Сар амэнди тэ терас кадяжэ, сар во?
17 О Давидо пистросардя о трито Псалом, кала «нашэлас пэстирэ шавэстар лэ Авессаломостар». Андэ кадэва Псалом, андэ пэрви дуй стихоря пистромэ, пала со росԥэнэнпэ андэ 2 Самуила 16 ӷлава. Ай андэ Псалом 3:4 о Давид ԥэнэн: «Фартэ ақарава лэ Иеговас, и во ашунэла ман па пэско свынто плай». Кала амэнца обжанпэ, сар амэ на затердям, амэнди кадяжэ трэбуй тэ мангаспэ лэ Иеговасти. О Иегова дэла амэнди пэско свынто духо, кай амэ вся тэ виритярас. Погиндон, кала тумэнди трэбуй тэ зритярэн пэс андэ вас чи тэ простин кодэлэс, ко тумэн холярдя? Патян тумэ, кай о Иегова диқэл вся тумаро ԥаримос и дэла зор тумэнди?
«И МУДРОСТЬ ПЭ ПЭРВО ҬАН»
18. Саво лашимос амэндэ авэла, кала амэ тераса, со драго андэ лэ Дэвлэстирэ яқа?
18 Кала амэ терас, со драго андэ лэ Дэвлэстирэ яқа, када анэна амэнди лашимос. Андэ Притчи 4:7 пистромэ: «И мудрость пэ пэрво ҭан». Кай тэ авэл мудрость, о мануш трэбуй бут со тэ ӷанэн. Но кати када на хутилэла. И мудрость дицол анда кода, со амэ витидас. Андэ Библия пистромэ, кай и лэ тиряндэ исин мудрость, сави дицол, кай вонэ тидэн пэсти о хамос по йвэн (Притчи 30:24, 25). О Христос, када «лэ Дэвлэстири мудрость». Во вся время терэлас, со чалёлас лэстирэ дадэсти (1 Коринфянам 1:24; Иоанна 8:29). Амэнди трэбуй най кати тэ витидас, со драго англа Дэл, но и тэ терас када. О Иегова дэл лашимос пэстирэ служытелёнэнди, савэ на заваздэн о шэро и терэн, со драго андэ лэстирэ яқа. (Адиносар Матфея 7:21 жы кай 23c). Акана терам вся, кай тэ на заваздас о шэро, кай всаворэнди андэ собрания тэ авэл вушэро тэ терэн кадяжэ. Чаче, тэ терас, со драго англа Дэл, най кажно разо вушэро. Кай кадя тэ терас, трэбуй время, ай кадяжэ тэ ӷанас тэ аштярас и тэ на грабисавас тэ холявас. Кадя амэ сыкаваса, кай на заваздас о шэро. Када анэна амэнди бах пэ вся время.
a Исход 32:11 жы кай 14: «О Моисеё ля тэ дэл дума лэ Дэвлэса лэ Иеговаса кадя, кай тэ ковлярэл лэско ди. Во ԥэндя: „Иегова, состэ тути тэ холявэс по народо, савэс ту фартэ барэ зорэса и састэ вастэса виандярдя анда Египто? Состэ тэ домэкэс, кай и египтяноря тэ ԥэнэн: „Во виандярдя лэн, кай камэлас тэ стерэл лэнди фартэ вэрыто, кай тэ умарэл лэн андэ плая и тэ улэл па ԥув“? Зритяр пэстири холи, савяса камэс тэ сԥабарэс и жалуисар тирэ народос. На тер лэсти вэрыто. Сэр пала пэстирэ мануша пала Авраамо, Исаако и о Израилё, савэнди ту солахадян корко пэса, кала ԥэндян: „Мэ стерава, кай лэ бэятонэн, савэ жана тутар, авэла фартэ бут, сар и черӷая по нэбо. И вся кадэя ԥув, пала сави мэ ԥэндэм, отдава тирэ бэятонэнди, кай вонэ тэ авэн хулая пэр латэ вечно“. О Иегова жалуисардя, кай камля тэ стерэл вэрыто пэстирэ народости, пала саво ԥэндя май англал».
b 2 Самуила 16:5 жы кай 13: «Кала о царё Давидо дожыля жы кай о Бахуримо, котар вижыля о мануш анда лэ Саулоско родо. Лэс ақарэнас Шимей, во сас лэ Гераско шаво. Во жалас и дэлас амрая. Кадэва мануш ля тэ шувидэл и бара андо царё Давидо и андэ всаворэ лэстирэ слуӷоря. Ай всаворэ мануша и всаворэ зоралэ мурша, слинэ лэ царёстар па право и па лево риг. О Шимеё цыпияс и дэлас амрая: „Ужа, ужа, бибахтало, ту умарэс лэ манушэн! О Иегова рий тути вся о рат, саво питяя андэ лэ Саулоско цэр, пэ каско ҭан, ту царё акана. О Иегова отдэл царско власть андэ вас тирэ шавэсти лэ Авессаломости. Акэ васо тутэ бида. Ту кодэва, ко умарэл!“ Лэ Саруияско шаво, о Авесса, ԥэндя лэ царёсти: „Васо кадэва муло хорто дэл амрая тут, хулас и царёс? Мэк ман, мэ жава и злава лэсти о шэро“. Но о царё ԥэндя: „Шавэ лэ Саруиястирэ, сави амэнди дила каринг када? Мэк дэл амрая, екжэно о Дэл ԥэндя лэсти: „Дэ амрая лэ Давидос“. И ко ԥэнэна: „Васо ту када стердян?“ О Давидо ԥэндя лэ Авессасти и всаворэ пэстирэ слуӷонэнди: „Кала мэрно шаво камэл тэ умарэл ман, тоди со тэ ԥэнав пала кадэва вениамитянино! Ашавэн лэс, мэк дэл амрая, кадя ԥэндя лэсти о Иегова! О Иегова, файма, диқэла пэстирэ яқэнца и дэла манди лашимос важ кода, кай адес о Шимеё ман дэл амрая“. О Давидо пэстирэ манушэнца жыля май дур. Ай о Шимеё кадя ворта паша лэстэ и жалас, жалас па плай и дэлас амрая лэс. О Шимеё жалас паша Давидо и шувидэлас андэр лэстэ бара и о прахо».
c Матфея 7:21 жы кай 23: «Най кажно, ко ԥэнэн манди: „Ӷосподо, Ӷосподо“, зажала андо царство, саво по нэбо, ай кати кодэва, ко терэл, со камэл мэрно дад, саво по нэбо. Бут ко ԥэнэна манди андэ кодэва дес: „Ӷосподо, Ӷосподо, хэба най тирэ алавэстар амэ ԥэнасас, со авэла англэ, хэба най тирэ алавэстар амэ видаравасас лэ бэнгэн и хэба най тирэ алавэстар амэ терасас бут бари дила“. И тоди мэ ԥэнава лэнди: „Мэ никала на ӷанавас тумэн! Вижан мандар, ко терэл о найлашимос“».