Через лэ Дэвлэско барвалимос, саво дорэсляпэ манди лэ дадэстар, мэрни жызня ашэля май барвали

Мэрно дад, о Джоно Миллзо, болделя андо 1913 бэрш андо Нью-Йорко, кала лэсти сас 25 бэрш. И речь важ кодэла, ко тэ болдён, росԥэнэнас о ԥрал Расселло. Прожыля набут время и о дад улаглятар андо Тринидадо. Котэ во жэнисайля по Констанс Фармер, сави служыяс анда вся оди, сар Исследователё Библии. О дад и лэско друӷо Уильямо Брауноa сыкавэнас «Фотодрама творения». Вонэ када терэнас жы кай 1923 бэрш, кала лэ ԥралэс лэ Браунос и лэстиря хулая манглэ, кай вонэ тэ пэрэладэн андэ Западно Африка. Ай мэрнэ родителя, савэ аштярэнас тэ жувэн по нэбо, линэ май дур тэ служын андо Тринидадо.

О ДАД И ДЭЙ, САВЭ ЛЮБИН

Андэ амаро ери сас девять бэятцэ. Пэрвонэ шавэсти о дад и дэй приԥэндэ Рутерфордо па президенто Общества Сторожэво башни, Библий и трактаторя. Ай андо 30 декабрё андэ 1922 бэрш арақаделэмпэ мэ, и манди приԥэндэ Вудворто па Клейтоно Вудворто, саво диқэлас, кай тэ вижал о журнало «Золотой век» (акана «Пробудитесь!»). Родителя динэ амэнди среднё образования. Но со май ӷлавно важ лэндэ сас, кай амэ пэ пэрво ҭан тэ стас лэ Дэвлэсти дила. Кай и мама драго вижалас тэ росԥэнэн стихоря анда Библия. Ай о дадэ интересно росԥэнэнас амэнди анда Библия истории. И тоди и мануша, пала савэ росԥэнэнас анда Библия, ԥэнэса, сас, сар жундэ важ амэндэ.

Кода, кай и родителя стодэ важ амэндэ пэско зор, када на прожыля кадя. Трин анда панч ԥрала висытелэ андэ Школа Галаад. И трин анда штар ԥэя бут бэрша служынас пианеронэнца андо Тринидадо и Тобаго. И родителя сытярэнас амэн и дэнас амэнди лашо примеро. Када можно тэ ԥэнэс, кай вонэ амэн посадисардэ «андэ лэ Иеговаско цэр». Кода, кай вонэ поможынас амэнди, амэ росцветисардям «андэ грады амарэ Дэвлэстэ» (Псалом 92:13).

Часто амэндэ цэрэ авэнас тэ побэшэн и пианероря. Вонэ любинас тэ дэн дума пала ԥрал Джорджо Янго, мисианеро анда Канада, саво авэлас андо Тринидадо. Мэрнэ родителя анда вся оди росԥэнэнас пала ери Брауно, савэнца вонэ служынас и савэ улаглэ андэ Западно Африка. Када со вонэ росԥэнэнас, манди када фартэ чалёлас и кала манди сас дэш бэрш, мэ закамлэм тэ росԥэнав важ о Дэл.

РОСԤЭНАВ ВАЖ О ДЭЛ АНДЭ ТЭРНЭ БЭРША

Андэ кодэя время амарэ журналоря драго сыкавэнас пала хохавнэ веры, пала кодэла, ко тинэн и битинэн и пала правительстворя, савэн подтинэн лэ ловэнца. Через када андо 1936 бэрш и рашая ԥэндэ лэ губернаторости андо Тринидадо, и во заԥандадя вся амари литература анда Общество Сторожэво Башни. И амэ чоралэс адиносарасас амари литература, пока вой сас амэндэ. Амэ ездисарасас пэ лисапедоря па фороря, ԥиравасас и плакаторя, роздасас и листовки. Кадя амэ росԥэнасас важ о Дэл. Вмести лэ вазвещятелёнэнца анда форо Тунапуна амэ облаглям вся о Тринидадо пэ машына, пэ сави сас о рупоро. Када сас лащи время! Через кода, кай мэ общялся манушэнца, савэндэ сас састи вера, мэ болделэм андэ 16 бэрш.

Через лэ Дэвлэско барвалимос, саво дорэсляпэ манди лэ дадэстар, ай кадяжэ, через кода, кай мэ служысаравас андэ тэрнэ бэрша, манди закамляпэ тэ ашав мисианеро. Мэ на парашэлэм пала када тэ гиндосарав и тоди, кала андо 1944 бэрш улаглэм по острово Аруба. Котэ мэрнэ напарникоса ашэля о ԥрал Эдмундо Каммингсо. Амэ кадя самас ради, кала андо 1945 бэрш по Вэчэро, кай сэрэн пала лэ Иисусостири смэрть авелэ дэш мануш. Ай пэ авэр бэрш андо Аруба ашэля пэрво собрания.

Прожыля набут время и мэ лэм тэ росԥэнав важ о Дэл тэрня манушняти, савя ақарэнас Орис Уильямс и савяса теравас пэ бути. Вой фартэ драго доԥэнэнас, андэр со вой патялас, кай када чачимос. Но кала вой ля тэ сытёл па Библия, вой уӷангля, со па чачимастэ пистромэ андэ Библия, и болделя 5 января андэ 1947 бэрш. Прожыля время и амэ фартэ чалелям ек аврэсти и жэнисайлям. Вой ля тэ служый пианероса андо ноябрё андо 1950 бэрш. Кода, кай мандэ сас и Орис, мэрни жызня упалэ «росцветисардя».

ФАРТЭ ЛАЩИ СЛУЖЭНИЯ АНДЭ НИГЕРИЯ

Андо 1955 бэрш амэн ақардэ тэ сытювас андэ 27 класо андэ Школа Галаад. Ради када, мэ и Орис ужылям па бути, битиндям о цэр и инке дэсаво хабэ и улаглям анда Аруба. О выпуско анда амаро класо сас андо 29 июля андо 1956 бэрш. И амэ улаглям тэ служысарас андэ Нигерия.

И Орис росԥэнэнас: «Лэ Иеговаско духо поможыяс амэнди тэ присытювас каринг кода, со парудёл андэ мисианерско служэния. Мэрно хулай камэлас тэ служый мисианероса, ай мэ никала на камавас. Манди здэласпэ, кай фэдэр тэ авэл пэско цэр, тэ барярав лэ бэятонэн. Но кала полэм, кай тэ росԥэнав важ о Дэл, када фартэ важно и нащи тэ отстав пэ авэр время, мэ лэм пэ аврятэ тэ диқав пэ када. И кала амэ закончили и Школа Галаад, мэ ужэ всаворэ одеса камавас тэ служысарав мисианероса. Анда Нигерия амэ отплывисарасас по кораблё „Куин Мэри“. Тэ проандярэл амэн авеля о ԥрал Уэрто Торнтоно, саво терэлас дила еқэҭанэ лэ ԥралэса лэ Норроса. Во ԥэндя, тэ авэл о дром бахтало, и инке во ԥэндя, кай амэ ласа тэ служысарас андо вефилё. Манди када на чалеля и мэ ԥэндэм: „Дэ-э-э!“. Но мэ йто присытелэм и манди чалеля о вефилё. Котэ мэ теравас разно дила. Но манди со май фартэ чалёлас тэ терав дила андо приёмно. Мэ любисаравас лэ манушэн, и котэ мэ моӷла тэ поможысарав лэ нигерийсконэ ԥралэнди и ԥэянди. Бут андар лэндэ авэнас пэ экскурсия цыенэ, боқалэ, мэлалэ и вся андэ прахостэ. Манди чалёлас тэ заботисавав пала лэндэ и тэ поможысарав лэнди, кай вонэ тэ обхаладён, тэ отцыён и тэ лэн зор. Вся када сас свынто служэния лэ Иеговасти и анэнас манди радость и по ди лашимос». Кала амэ ласаспэ пала любо дила, када дэлас амэнди «тэ росцветисарас».

Андэ 1961 бэрш амэ авелям андо Тринидадо тэ диқас амарэ чачен. Кала амэ котэ самас, авеля о ԥрал Брауно. Во росԥэндя дэсавэ интересни случаёря анда пэстири служэния, савэ сас лэстэ андэ Африка. Мэ кадяжэ росԥэндэм, кай андэ Нигерия ашэлэ май бут собрании. Тоди о ԥрал Брауно обля ман и ԥэндя лэ дадэсти: «Джонно, ту кадя и на санас андэ Африка, ай кай о Вудворто када вижыля!» Пэ када о дад ԥэндя: «Тер и май дур кадя, мэрно шаво!» Лэндирэ алава, драго ман подритярдэ и динэ манди зор инке май драго тэ терав мэрни дила.

Андэ 1962 бэрш ман инке еқвар ақардэ тэ прожав 37 класо андэ Школа Галаад, саво жалас 10 шона. О надзирателё андо филиало андэ Нигерия Уилфредо Гучо закончил 38 класо андэ Школа, и лэс отбишалдэ андэ Англия. Пэр лэско ҭан надзирателёса андо филиало стодэ ман. Сар и о ԥрал Брауно, мэ бут ездисаравас. Кала мэ ездисаравас, мэ май драго уӷанглэм и полюбисардэм лэ нигерийсконэ ԥралэн. Лэндэ бут со на сас, со сас андэ май барвалэ страны. Но всаек, кадэла христианоря сас бахталэ и на ровэнаспэ пэ жызня. Када сыкавэлас, кай можно драго тэ жувэс, кала тутэ нинай барвалимос. Кала ӷанэс, сар вонэ жувэн, амэ удивисавас кодэлэстар, кай вонэ вся и время авэн пэ собрания драго утидэ и вужорэ. Пэ канӷрэсоря и ԥрала и ԥэя авэнас пэ ӷрузовикоря чи автобусоря (болекаджа)b, савэ лэндэ котэ ездинас. Пэ кадэла автобусоря часто сас пистромэ «Океано, када бут капли».

Сар дэ чачунэ кадэла алава! Куч кода, со терэл кажно андэ кадэя дила. И амэ кадяжэ дэсо стердям пэстиря ригатар. Андо 1974 бэрш и Нигерия ашэля пэрво страна, кроме Соединенни Штаты, кай лэ вазвещятелёнэн ашэля 100 000. И дила важ о царство жалас фартэ драго!

Лэ 1967 бэршэстар жы кай 1970 бэрш, кала лэ вазвещятелёнэн ашэлас май бут, андэ Нигерия жалас гражданско война. Бут шона амарэ ԥрала андэ страна Биафра, сави сас пэ авэр бэрэӷо кай и лэн Нигер, на сас связь лэ ԥралэнца анда филиало. Амэ нэ моӷли тэ ашавас лэ ԥралэн би литературако. Сар росԥэнэнаспэ май англал, амэндэ най еқвар вижалас тэ пэрэплывисарас и лэн, важ кода кай амэ надеисавасас кати по Иегова.

Мэ драго сэрав кадэла страшни поездки па лэн Нигер. Амэн моӷли тэ застрелин чи тэ занасвавас найлашэ насвалимаса. Сас и авэр ԥаримос. Ек дила тэ прожас и федеральни посторя, кала пэр тутэ диқэн и халавдэ. И совсем авэр дила, кала прожас о посто, кай тердён кодэла, ко вазглэпэ против правительство андэ Биафрана. Еқварэс манди прижыляпэ тэ пэрэплывисарав и лэн Нигер, сави фартэ нашэлас. Мэ плывисардэм пэ каноэ, када лодка, пэ сави пэрэандярэнас набут манушэн анда Асаба андэ Оничо. Котар мэ лаглэм андэ Энуга, кай тэ поможысарав и тэ дав зор лэ старейшынонэнди. Пэ авэр разо мэ авелэм тэ подритярав лэ старейшынонэн андэ Абе. Котэ на мэкэнас и рят тэ дэн яг о свето. Андо Порт-Харкорто амэ грабисайлям, кай май йто тэ закончим и собрания молитваса, важ кода кай и федеральни халавдэ динэ пэ мануша, савэ вазглэпэ против правительство андэ Биафрана, савэ сас ужэ паша форо.

Сар жэ амарэ ԥралэнди трэбуй сас кадэла собрании! Вонэ икне май фартэ линэ тэ полэн, сар о Иегова любий и заботийпэ пала лэндэ. Кадяжэ лэнди дэнас советоря, савэ лэнди трэбуй сас андэ кодэя время. Кадэла советоря сас, кай тэ на парашэн тэ авэн ек пала еқэстэ и андэ политика тэ на залэн никастири риг. Андэ кадэя страшно война и нигерийски ԥрала на парашэлэ тэ кандэн лэ Иеговас. Вонэ сыкадэ пэстири любовь, сави май бари чем и нэнависть машкар и племена, и на парашэлэ тэ авэн ек пала еқэстэ андэ собрания. Важ мандэ сас бари бах тэ подритярав лэн андэ кадэя ԥари время.

Андо 1969 бэрш по стадионо «Янки» андо Нью-Йорко прожалас международно канӷрэсо «Мир на земле». Председателё пэр лэстэ сас о ԥрал Милтоно Хеншелё, ай мэ поможысаравас лэсти и бут со сытелэм лэстар. Када сас фартэ драго, важ кода кай андо 1970 бэрш андо Лагосо (Нигерия) сас международно канӷрэсо «Люди благоволения». Кала прожыля о канӷрэсо амэ полям, кай када о Иегова поможысардя, важ кода кай кати уляпэ и гражданско война. Пэ кадэва канӷрэсо сас 121 128 манушэн, и пэрво разо и проӷрамма пэрэандярэнас пэ 17 шыба. И ԥрала о Норро и о Хеншелё, ай кадяжэ авэр мануша, кас ақардэ, заԥэндэ самолёто и привуряйлэ по канӷрэсо анда Соединенни Штаты и Англия. Всаворэ вонэ диқэнас, сар болделэ 3 775 мануша. Када ек канӷрэсо, пэ саво само бут болделэ мануша, чем варикала посли Пятидесятница. Мэ поможысаравас, кай тэ авэл кадэва канӷрэсо. Мандэ инке никала на сас кадя дэ бут дила. Лэ вазвещятелёнэн андэ Нигерия ашэлас со май бут и май бут.

Амэ прослужысардям андэ Нигерия май бут чем 30 бэрш. Дэкала мэ служысаравас сар разъездно и зонально надзирателё андэ Западно Африка. Мэ общялся лэ мисианеронэнца и подритяравас лэн, важ када вонэ сас фартэ блаӷодарни. Мэ анда вся оди ԥэнавас лэнди, кай пала лэндэ сэрэн и цэнин. Кала теравас кадэя дила, мэ полэм важ мандэ, кай амарэ ԥрала и ԥэя «тэ росцветин», ай кадяжэ тэ подритярэн ек аврэс андэ лэ Иеговастири арӷанизацыя и тэ ашэнпэ ек пала еқэстэ, трэбуй тэ шос сама кажнонэс анда оди.

Кати важ кода, кай амэнди поможыяс о Иегова, амэ пэрэандярдям вся о ԥаримос и насвалимос, кала жалас и гражданско война. Амэ вся и время диқасас пар пэстэ лэ Иеговастири блаӷословения.

Акэ, со росԥэнэнас и Орис: «Амэ лэдуй най еқварэс самас насвалэ малярией. Еқвар о Вудворто хасардя и сознания и лэс андярдэ андэ больница андо Лагосо. Манди ԥэндэ, кай во можэт тэ мэрэл. Но, наис лэ Дэвлэсти, во вижудя! Кала авеля андэ сознания, во сразу ля тэ росԥэнэн важ лэ Дэвлэско царство лэ санитарости, саво диқэлас пала лэстэ. Кала прожыля время, амэ авелям кай кадэва санитаро, савэстэ лали Нвамбиве, тэ поможысарас, кай во и май дур тэ уӷанэн и Библия. Во болделя, и кала прожыля время, во ля тэ служый старейшынаса андэ Абе. Инке мэ поможысардэм бутэ манушэнди, кадяжэ и лэ мусульманонэнди, савэ фартэ патянас андэ пэско дэл, кай вонэ тэ лэн тэ служын лэ Иеговасти. Ай инке амэ фартэ лошалэ, кай смоӷли май драго тэ уӷанас и тэ полюбисарас лэ нигерийцонэн, лэндири культура, обычаё и шыб».

Мэ ла хулаяса инке со полэм. Кай амари вера тэ авэл састи андэ служэния пала ӷраница, трэбуй тэ сытёс тэ любис лэ ԥралэн и лэ ԥэян, и тэ на шос сама, кай амэндэ по разному терэлпэ андэ культура.

НЭВЭ ЗАДАНИИ АНДЭ СЛУЖЭНИЯ

Андэ 1987 бэрш амэнди динэ нэви задания тэ служысарас мисианеронэнца по шукарно острово Сент-Люсия андо Карибско моря. Кадэя служэния сас райкани. Но пэ кадэва острово сас па аврятэ. Андэ африкански страны, о мурш моӷ тэ лэл пала пэстэ най еқа манушня, но пэ кадэва острово о хулай и хулаи жувэнас вмести и на терэнас реӷистрацыя по брако. Лэ Дэвлэско алав и Библия поможысардя бутэ манушэнди, кас амэ сытярасас па Библия, тэ парувэн пэстири жызня.

Амэнди ашэлэ май бут бэрша и о зор ашэля май набут. И важ када андо 2005 бэрш о руководящё совето анда вся оди позаботисайля пала амэндэ и пэрэандярдэ амэн тэ служысарас андо всемирно ӷлавно управления андо Бруклино (Нью-Йорко). Мэ кажно дес ԥэнав лэ Иеговасти «наис», кай мандэ сас и Орис. Вой муля андо 2015 бэрш, кадэя дук андо ди на пэрэдэса алавэнца. И Орис сас лашо друӷо и фартэ лащи и любящё хулаи. Амэ прожудям еқэҭанэ 68 бэрш, и всаворэ кадэла бэрша мэ фартэ ла любисаравас. Амэ виарақлям важ пэстэ, сар тэ авас бахталэ сар андо ери, кадя и андэ собрания. Када тэ стос патив по ӷлава, тэ простис анда вся оди ек аврэс, никала тэ на заваздэс о шэро и тэ терэс кадя, сар сытярэл о «свынто духо».

Кала амэндэ сас ԥарэс по ди и амэ умэкэсас и вас, амэ мангасас лэ Иеговас, кай во тэ дэл амэнди зор и май дур тэ служысарас лэсти. Амэ вся и время старысавасас тэ парудювас и амэ диқасас, сар андэ лэ Дэвлэстири арӷанизацыя варисо парудёлас андэ май лащи риг. Но само лашимос авэла инке англэ! (Исаия 60:17; 2 Коринфянам 13:11).

О Иегова блаӷословисардя служэния мэрнэ родителёнэнди и кадяжэ аврэ ԥралэнди и ԥэянди андо Тринидадо и Тобаго. Ай акана по послиднё отчёто, котэ служын 9 892 вазвещятеля. Бут ԥрала андэ Аруба бут со стердэ важ и пэрво собрания, андэ сави мэ служысаравас, кай тэ авэл май састи. Ай акана по острово 14 лашэ собрании. Андэ Нигерия ашэлэ бут вазвещятеля 381 398. Ай по острово Сент-Люсия росԥэнэн важ лэ Дэвлэско царство 783 мануша.

Манди ужэ пала 90 бэрш. Андо Псалом 92:14 пала кодэла, кас, ԥэнэса, посадисардэ андэ лэ Иеговаско цэр, ԥэнэнпэ: «Вонэ лэна тэ росцветин дажэ, кала авэна сиди. Вонэ ашанапэ зоралэ и на цыёна». Мэ фартэ блаӷодарно лэ Иеговасти важ кода, сави мандэ сас жызня андэ служэния лэсти. Через о барвалимос, саво лэ Дэвлэстар и саво дорэсляпэ манди лэ дадэстар, мэ закамлэм вся пэстири жызня тэ служысарав лэ Иеговасти. Во на парашэлас ман тэ любий и домэкля ман тэ цветисарав андэ лэстирэ грады (Псалом 92:13).