Со на дэл манди тэ болдював?

1. Со хасардэ о Адамо ла Еваса и каринг со када андя?

КО, ПА ТУМАРЯТЭ, трэбуй тэ витидэл, со лашимос, ай со най? Кала о Адамо ла Еваса халэ о плодо па витка, сави сыкавэл, со лашимос, ай со найлашимос, кадэлэса вонэ сыкадэ, кай на допатян лэ Иеговасти. Инке кадэлэса вонэ отԥэнделэ лэ Иеговастирэ законостар, саво сыкавэлас, со лашимос, ай со най (Бытие 3:22). Но погиндосарам, со анда када вижыля. Вонэ хасардэ и дружба лэ Иеговаса и кода, кай тэ жувэн вечно. Инке вонэ пэрэдинэ всаворэ́ манушэнди о бэзэх и смэрть (Римлянам 5:12). Кода, со витидя о Адамо ла Еваса, андя ԥаримос и биды.

2. Со стердя о эфиопско евнухо, кала о Филиппо росԥэндя лэсти лащи весть важ о Иисусо?

² Акана погиндосарам, со стердя о эфиопско евнухо, савэсти росԥэнэнас о Филиппо лащи весть важ о Иисусо. О евнухо сас фартэ блаӷодарно важ кода, со стердэ важ лэстэ о Иегова и о Иисусо, и катэ жэ во болделя (Деяния 8:34—38). Со амэ сыкавас, кала дас алав лэ Иеговасти тэ жувас важ лэстэ и болдювас? Кадэлэса амэ сыкавас пэстири блаӷодарность лэ Иеговасти и лэ Иисусости важ кода, со вонэ важ амэндэ стердэ. Кадяжэ амэ сыкавас, кай патяс лэ Иеговасти и прижанас, кай кати во можэт тэ стол и законоря, савэ сыкавэн, со лашимос, ай со найлашимос.

3. а) Саво лашимос амэндэ кодэлэстар, кай амэ болдювас? б) Пала со амэ подаса дума андэ кадэя статья?

³ Погиндосарам пала кода, саво лашимос амэндэ исин, кала лас тэ служысарас лэ Иеговасти. Во дэл алав, кай рия вся, со хасардя о Адамо и Ева, ай кадяжэ рия кода, кай тэ жувас вечно. Важ кода кай амэ патяс, кай о Иисусо отдя пэстири жызня пала амэндэ, о Иегова простий кода, со амэ терас най кадя и дэл вужи совесть (Матфея 20:28; Деяния 10:43). Кадяжэ амэ ашас лэ Иеговаско ери, саво анда лэстирэ служытеля, и савэ аштярэн райкано лашимос (Иоанна 10:14—16; Римлянам 8:20, 21). Но хоть и исин бут лашимос кодэлэстар, кай амэ служысарас лэ Иеговасти, всаек дэко, ко ӷанэн лэ Иеговас, на терэн кадя, сар о евнухо. Со лэнди на дэл тэ болдён? Со лэнди поможыя, кай тэ болдён?

СО НА ДЭЛ ТЭ БОЛДЁН?

4, 5. Со на дэлас тэ болдёл о Эйвери и Ханна?

⁴ На патял андэр пэстэ. О Эйвери вибареля андо ери, савэ сас лэ Иеговастирэ свидетеля. Лэстэ лашо дад, саво лэс любияс и савэс всаворэ ӷанэнас, сар лашэ старейшынас. Но о Эйвери на грабияс тэ болдёл. Васо? Акэ, со во росԥэнэн: «Мэ гиндосаравас, кай мандэ на вижала тэ авав кацаво лашо, сар мэрно дад». Ай инке во гиндояс, кай во на стерэла и дила, сави лэсти дэна андэ собрания. Во росԥэнэн: «Мэ пэрэжывал, кай манди варикала ԥэнэна тэ мангавпэ и тэ росԥэнав речь. И кадяжэ дэкала тэ сытярав лэ вазвещятелёнэн, кай тэ сытён тэ росԥэнэн пала Дэл».

⁵ Ханна, савяти сас 18 бэрш, на патялас андэр пэстэ. Хоть латирэ родителя сас лэ Иеговастирэ свидетеля, вой на патялас, кай латэ вижала тэ жувэл па лэ Дэвлэстирэ законоря. Васо? И Ханна гиндояс, кай вой на ашэл нисо. Дэсавэ мануша, кастэ кацаво жэ гиндо, шынэн чи ԥабарэн пэсти тила, или марэн корко пэс. Дэкала лати сас фартэ ԥарэс и вой шынэнас пэсти тила. Но кадэлэстар лати ашэлас инке май вэрыто. Вой росԥэнэн: «Мэ никасти пала када на росԥэнавас, дажэ лэ родителёнэнди. И мэ гиндосаравас, кай лэ Иеговасти на трэбуй кацаво служытелё».

6. Со на дэлас ла Ванессати тэ болдёл?

⁶ Тасавэн и друӷоря. И Ванесса, савяти 22 бэрш, росԥэнэн: «Мандэ сас лащи подружка, савяса мэ дружысаравас почти дэш бэрш». И Ванесса камэлас тэ болдёл. Но латири подружка, сави на патялас андо Иегова, на камэлас, кай и Ванесса када тэ терэл. И Ванесса росԥэнэн: «Манди найвушэро знакомица лэ манушэнца. И мэ пэрэжывала, кай кала мэ парашава ласа тэ дружысарав, мэ никала будэр на виарақава кацавя подружка́».

7. Состар даралас и Макейла и васо?

⁷ Дар, кай стерэса варисо най кадя. Ла Макейлати сас панч бэрш, кала латирэ ԥралэс исключисардэ анда собрания. Кала вой барёлас, вой диқэлас, сар ԥарэс лэ родителёнэнди кодэлэстар, со терэлас лако ԥрал. И Макейла росԥэнэн: «Мэ даравас, кай кала мэ болдювава и стерава варисо най кадя, тоди ман исключина анда собрания и лэ родителёнэнди ашэла инке май ԥарэс».

8. Состар даралас о Майлзо?

⁸ Дар, кай авэна против. Кай о Майлзо и родителя розжылэпэ. Лэско дад и мачеха, лэ Иеговастирэ свидетеля, ай лэстири дэй най. Во росԥэнэн: «Мэ жувавас ла даса 18 бэрш и даравас тэ ԥэнав лати, кай камав тэ болдював. Мэ сэрав, сар и дэй холяйля, кала о дад закамля тэ ашэл лэ Иеговаско свидетелё. И мэ фартэ пэрэжывал, кай вой авэла против».

САР ТЭ УЛЭС КОДА, СО НА ДЭЛ ТЭ БОЛДЁС?

9. Со авэла, кала тумэ уӷанэна, сар о Иегова любий и скати лэстэ терпения?

⁹ О Адамо ла Еваса ашадэ лэ Иеговас, важ кода кай лэндэ на хутилэлас любовь каринг лэстэ. Но всаек о Иегова домэкля, кай вонэ тэ жувэн варисави время, кай лэндэ тэ авэн бэятцэ, и кай вонэ екжэнэ тэ сытярэн пэстирэ бэятонэн па пэстирятэ. Кода, кай вонэ закамлэ тэ авэн корко пэсти хула́я, дицэля, саво дилимос вонэ стердэ. Лэнго барэдэр шаво умардя пэстирэ ԥралэс, саво на сас ни андэр со дошало. Прожыля время и мануша ашэлэ инке май вэрыти и линэ тэ гиндон май бут кати пала пэстэ (Бытие 4:8; 6:11—13). Но вся кадэя время кай о Иегова сас, через кастэ во моӷ тэ спасый всаворэ́ лэ Адамостирэ и ла Еватирэ бэятонэн (Иоанна 6:38—40, 57, 58). Сар май бут уӷанэна пала кода, пэ скати о Иегова тумэн любий и скати лэстэ терпения, тоди тумэ инке май фартэ лэна лэс тэ любин. Тумэ закамэна тэ ашавэн о дром, саво витидэ о Адамо и Ева, и отдэна пэстири жызня лэ Иеговасти.

10. Васо, кала гиндосарас пала алава, савэ запистромэ андо Псалом 19:7, када поможыя амэнди тэ лас тэ служысарас лэ Иеговасти?

¹⁰ На параш тэ уӷанэс пала Иегова. Чем май бут ту уӷанэса пала Иегова, со май фартэ ту патяса, кай тутэ вижала лэсти тэ служыс. О Эйвери, пала саво дям дума май англал, росԥэнэн: «Мэ лэм тэ патяв андэр пэстэ, кала лэм тэ гиндосарав пала алава, савэ запистромэ андо Псалом 19:7b». (Адиносар.) О Эйвери поля пар пэстэ, кай о Иегова зритярэл пэстирэ алава, и во ля инке май фартэ тэ любий лэс. Любовь каринг о Иегова дэл амэнди зор тэ патяс андэр пэстэ. Но кадяжэ вой поможый тэ гиндосарас спэрва пала Иегова и пала кода, сар тэ терас, со во камэл. Ай со можно тэ ԥэнас пала Ханна? Вой росԥэнэн: «Кала мэ адиносаравас и Библия и екжэни пар латэ сытювавас, мэ полэм, кала мэ шынав пэсти тила, кадэлэса мэ терав найдраго лэ Иеговасти, и кадэя найлащи привычка на чалёл лэсти» (1 Петра 5:7). И Ханна ля тэ жувэл кадя, сар уӷанэнас анда лэ Дэвлэско алав (Иакова 1:22). Со анда када вижыля? И Ханна ԥэнэн: «Кала мэ теравас кода, со аштярэл мандар о Иегова, мэ диқавас, саво лашимос манди када анэн. И тоди мэрни любовь каринг о Иегова ашэля инке май бари. Акана мэ драго ӷанав, кала манди трэбуй авэла помощь, о Иегова стола ман по правильно дром». И Ханна уля пэстар и найлащи привычка тэ шынэн пэсти тила. Вой дя алав лэ Иеговасти тэ жувэл важ лэстэ и болделя.

11. Сар и Ванесса виарақля лашэ друӷонэн и сости када сытярэл амэн?

¹¹ Годявэрнэс витидэ лэ друӷонэн. И Ванесса, важ сави дасас дума май англал, акэ, со поля. Кода, кай вой дружыяс пэстиря подружкаса, на дэлас лати тэ служый лэ Иеговасти. Важ када вой парашэля ласа тэ дружый и закамля тэ арақэл пэсти друӷонэн андэ собрания. Па латирэ алава, лати поможысардя кода, сар жувэлас о Ноё и лэско ери. И Ванесса ԥэнэн: «Вонэ жувэнас машкар и мануша, савэ на любинас лэ Иеговас. Но вонэ фартэ драго полэнас ек аврэс». Кала и Ванесса болделя, вой ля тэ служый пианероса. И акэ вой росԥэнэн: «Кадя мэ виарақлэм лашэ друӷонэн най кати андэ мэрни собрания, но инке и анда авэр». Тумэндэ кадяжэ авэна лашэ друӷоря, кала тумэ лэна май бут тэ терэн и дила, сави дя тумэнди о Иегова (Матфея 24:14).

12. Сави дар на сас кай о Адамо и кай и Ева?

¹² Сытю май бут тэ дарас, кай тэ на уӷодис лэ Дэвлэсти. Дэкала тэ дарас, када драго. Например, амэ трэбуй тэ дарас тэ на уӷодисарас лэ Иеговасти (Псалом 111:10). Тэ авелоп кацави дар кай о Адамо и кай и Ева, вонэ никала на отбанделоп лэ Дэвлэстар. Кала вонэ жылэ против о Дэл, лэндэ ԥэрнаделэпэ и яка. Вонэ полинэ, кай ашэлэ ӷрешни. Акана вонэ моӷли тэ пэрэдэн пэстирэ бэятонэнди кати о бэзэх и смэрть. Кала вонэ када полинэ, лэнди ашэля лажаво, кай вонэ нангэ и вонэ судэ пэсти котора, кай набут тэ заушаравэн и тила (Бытие 3:7, 21).

13, 14. а) Васо, сар пистромэ андэ 1 Петра 3:21, амэнди на трэбуй фартэ тэ дарас ла смэртятар? б) Со амэндэ исин, васо тэ любисарас лэ Иеговас?

¹³ Еқа ригатар, амэнди трэбуй тэ дарас, кай тэ на уӷодисарас лэ Иеговасти. Ай авря ригатар, амэнди на трэбуй фартэ тэ дарас ла смэртятар. О Иегова ужэ стердя, кай амэ тэ жувас вечно. Кала амэ стердям варисаво ӷрехо, но анда вся оди каисавас, о Иегова простий амэн. Васо? Важ кода кай амэ патяс, кай о Иисусо, лэско Шаво, отдя пэстири жызня пала амэндэ. Кала амэ патяс, тоди амэ дас алав, кай отдас пэстири жызня лэ Иеговасти тэ жувас важ лэстэ и болдювас. (Адиносар 1 Петра 3:21c.)

¹⁴ Амэндэ исин бут, васо тэ любисарас лэ Иеговас. Кажно дес во дэл амэнди кода, со амэн радуий. Во росԥэнэн амэнди о чачимос пала пэстэ и пала кода, со во загиндосардя тэ стерэл важ амэндэ (Иоанна 8:31, 32). Во подритярэл амэн и сытярэл через и христианско собрания. Инке поможый амэнди, кала амэндэ ԥаримос. Кадяжэ дэл амэнди тэ аштярас о лашимос, саво авэла англэ и тэ жувас вечно андо раё (Псалом 68:19; Откровение 21:3, 4). Кала амэ гиндосарас, сар дэ бут о Иегова важ амэндэ ужэ стердя, кай тэ сыкавэл, кай любий амэн, амэндэ просто на вижала тэ на любисарас лэс кадяжэ. Ай амари любовь каринг о Иегова, поможыя, кай амэндэ андо ди тэ авэл дар тэ на уӷодисарас лэсти. Када дар тэ на терас больно кодэлэсти, кас амэ любисарас.

15. Васо и Макейла парашэля тэ дарал, кай стерэла варисо най кадя?

¹⁵ И Макейла, пала сави дасас дума май англал, парашэля тэ дарал, кай стерэла варисо най кадя, кала поля, кай о Иегова любий и простий. Вой ԥэнэн: «Мэ полэм, кай всаворэ амэ найсовершэни и ласа тэ терас варисо най кадя. Инке мэ полэм, кай о Иегова амэн любий и простий, важ кода кай отдя пэстирэ Шавэс важ амэндэ». Важ кода кай и Макейла ля май фартэ тэ любий лэ Иеговас, вой закамля тэ дэл алав лэсти тэ жувэл важ лэстэ и тэ болдёл.

16. Сар лэ Майлзостэ вижыля тэ улэл пэстар и дар?

¹⁶ О Майлзо даралас, кай лэстиря дати фартэ на чалёла лэстири ришэния, кай во камэл тэ болдёл и во мангля помощь кай о раёно надзирателё. О Майлзо росԥэнэн: «О раёно тожэ вибареля андо ери, андэ саво кати ек анда родителя служыяс лэ Иеговасти. Во подԥэндя манди, сар май драго тэ подав дума ла даса, кай мэ камав тэ болдював и тэ ԥэнав лати, кай мэ екжэно витидэм када, ай най мэрно дад». И дэй важ када фартэ холяйля и лэ Майлзости прижыляпэ тэ пэрэладэл латар. Но жылания тэ болдёл лэстэ на прожыля. Во росԥэнэн: «Кала мэ полэм, скати лашимос важ мандэ стердя о Иегова, ман када ля лэ одестар. Мэ лэм драго тэ гиндосарав пала кода, кай о Иисусо отдя пэстири жызня важ амэндэ и полэм, сар дэ фартэ ман о Иегова любий. Через када мэ закамлэм тэ жував важ лэстэ и болделэм».

НА ПАРУВ КОДА, СО ВИТИДЯН

17. Со амэ сыкавас, кала болдювас?

¹⁷ Кала и Ева халя па витка о плодо, саво сыкавэл, со лашимос, ай со найлашимос, кадэлэса вой отбанделя пэстирэ Дадэстар, лэ Иеговастар, ай о Адамо жыля пала ла Евако долоӷо. Кадэлэса во сыкадя, кай лэстэ андо ди на сас нисави блаӷодарность каринг о Иегова. Ай скати дэ бут лашимос о Иегова стердя важ о Адамо. Амэ всаворэ можэм тэ сыкавас, кай на камас тэ авас, сар о Адамо и Ева. Кала амэ болдювас, амэ сыкавас, кай соӷласни кодэлэса, кай ек лэ Иеговастэ исин право тэ стол законоря, савэ сыкавэн, со лашимос, ай со най. Кадэлэса амэ доԥэнас, кай любисарас амарэ небеснонэ Дадэс и патяс лэсти.

18. Кала анэна лашимос кода, кай амэ служысарас лэ Иеговасти?

¹⁸ Посли кода, сар амэ болдювас, трэбуй тэ старысавас кажно дес тэ жувас па лэ Иеговаско законо, ай най па пэстирэ законоря. Милионоря лэ Дэвлэстирэ служытеля жувэн па лэско законо. Тумэндэ тожэ кадя вижала тэ жувэн. Кала? Если тумэ на парашэна тэ уӷанэн май драго и Библия и май бут время тэ проандярэн лэ ԥралэнца и лэ ԥэянца анда собрания. Кадяжэ анда оди тэ росԥэнэн аврэнди пала кода, со тумэ уӷанглэ пала любящё небесно Дад (Евреям 10:24, 25). Кала тумэ варисо камэн тэ терэн, приашундён каринг кода, со о Иегова ԥэнэн через и Библия и через пэстири арӷанизацыя (Исаия 30:21). Када анэна тумэнди лашимос (Притчи 16:3, 20).

19. Пала со амэнди вся и время трэбуй тэ сэрас и васо?

¹⁹ Кала тумэ полэн, скати блаӷословения тумэнди анэн лэ Иеговастирэ советоря, тоди тумари любовь каринг лэстэ и каринг лэстирэ законоря ашэла инке май бари. Тоди кай о Сатана на вижала тэ терэл кадя, кай и служэния лэ Иеговасти тэ на авэл тумэндэ пэ пэрво ҭан. Представьте пэс через тысяча бэрша. Кала тумэ вспомните пала кода, кай закамлэ тэ болдён, тумэ ԥэнэна: «Када сас само лащи ришэния андэ мэрни жызня!»