СТАТЬЯ, КАЙ ТЭ СЫТЮВАС 37
Анда вся оди кандэн лэ Иеговас
«Тоди хэба на трэбуй амэ май фартэ тэ кандас амарэ небеснонэ Дадэс?» (ЕВРЕЯМ 12:9).
ДИЛИ 9 Иегова — наш Царь!
ПАЛА СО УӶАНАСА АНДА СТАТЬЯ?a
1. Васо трэбуй тэ кандас лэ Иеговас?
АМЭНДИ трэбуй тэ кандасb лэ Иеговас, кай во амаро Создателё. Важ када во можэт тэ приԥэнэн амэнди, со трэбуй тэ терас (Откровение 4:11). Амэндэ исин ӷлавно, васо лэс тэ кандас, када, кай во само лашо правителё. Важ вся и время сас бут разни правителя, но нико андар лэндэ и пашэ на сыстойпэ лэ Иеговаса андэ лэстири мудрость, любовь, кай во жалуий анда оди и полэл, со аврэндэ по ди (Исход 34:6; Римлянам 16:27; 1 Иоанна 4:8).
2. Васо, сар пистромэ андэ Евреям 12:9—11, амэнди трэбуй тэ кандас лэ Иеговас?
2 О Иегова камэл, кай амэ лэс тэ кандас най важ кода кай дарас, ай важ кода кай любисарас лэс и полас, кай во амаро небесно Дад. Андэ пэско Письмо лэ евреёнэнди, о апостоло Павло драго росԥэндя, кай трэбуй инке «май фартэ тэ кандас амарэ небеснонэ Дадэс». Васо? Важ кода кай о Дэл сытярэл амэн, кай тэ авэл амэнди лашимос. (Адиносар Евреям 12:9—11c.)
3. а) Сар тэ сыкавас, кай амэ кандас лэ Иеговас? б) Савэ вопросоря амэ роздиқаса?
3 Сар тэ сыкавас, кай амэ кандас лэ Иеговас? Амэнди трэбуй анда вся зор тэ старысавас тэ кандас лэс и тэ борисавас кодэлэса, кай камэлпэ тэ терас вся па пэстирятэ (Притчи 3:5). Амэнди авэла май вушэро тэ кандас лэ Иеговас, кала амэ май бут уӷанаса пала лэстэ. Васо? Кай о Дэл всаворэ качестворя лашэ, важ када во терэл лашэ дилы (Псалом 145:9). Со май драго амэ уӷанас лэ Иеговас, со май пашэ амэ ашас каринг лэстэ. Кала любис варикас на трэбуй нисаво списко, васо ту лэс любис, со можно тэ терэс, ай со нащи. Амэ сытювас тэ гиндосарас и тэ авэл амэндэ андо ди кадя, сар камэл о Иегова (Псалом 97:10). Но тэ кандас лэ Иеговас най вся и время вушэро. Васо? Сости и старейшыноря моӷут тэ сытён кай о Неемия? Сости и дада моӷут тэ сытён кай о царё Давидо? Ай сости и дэя моӷут тэ сытён кай лэ Иисусости дэй и Мария? Амэ подаса дума пала кадэла вопросоря андэ кадэя статья.
ВАСО ТЭ КАНДАС ЛЭ ИЕГОВАС НАЙВУШЭРО?
4, 5. Васо, сар пистромэ андэ Римлянам 7:21—23, тэ кандас лэ Иеговас най вся и время вушэро?
4 Васо тэ кандас лэ Иеговас най вся и время вушэро? Када через о бэзэх, саво пэрэжыля амэнди и кай амэ найсовершэни, и вся и время камас тэ терас па пэстирятэ. Кала о Адамо и Ева на канглэ лэ Дэвлэс и халэ о плодо, вонэ витидэ важ пэстэ, со лашимос, ай со найлашимос (Бытие 3:22). Идоси бут мануша на шон сама пэ кода, со гиндой о Иегова и витидэн екжэнэ, со лашо, ай со най.
5 Андэ вся тэ кандэн лэ Иеговас найвушэро дажэ кодэлэнди, ко ӷанэн и любий лэс. Кадя сас лэ апостолоса Павлоса. (Адиносар Римлянам 7:21—23d.) Амэ сар и во камас тэ радосарас лэ Иеговас. Но амэнди вся и время прижалпэ тэ борисавас кодэлэса, со цырдэл амэн тэ терас нэправильно.
6, 7. Васо инке амэнди можэт тэ авэл найвушэро тэ кандас лэ Иеговас? Росԥэнэн пала Воля.
6 Инке васо можэт тэ авэл найвушэро тэ кандас лэ Иеговас, када через амари культура, андэ сави вибарелям. Бут гиндоря, савэ кай о миро, на сжанпэ кодэлэса, со камэл о Иегова. И амэнди трэбуй вся и время тэ стас зор, кай тэ на пэрэлас, сар гиндон и мануша андэ кадэя люма. Акэ ек примеро.
7 Андэ дэсавэ страны ла молодёжа сытярэн, кай ӷлавно андэ жызня, када тэ затерэн барэ ловэ. Кацаво сас ла ԥэяса, савя ақарэн Воляe. Жы каринг кода, сар тэ уӷанэн о чачимос, вой сытёлас андо само лашо университето андэ страна. О родо камэлас, кай и Воля тэ жал пэ лащи бути, кай потинэн барэ ловэ. Вой и екжэни када камэлас. Но кала вой уӷангля пала Иегова и полюбисардя лэс, вой парудя пэстирэ гиндоря. Но всаек вой ԥэнэн: «Дэкала манди попэрдёлпэ лащи бути, пэ сави мэ моӷла бы тэ затерав барэ ловэ. Но када на дэла манди тэ служысарав лэ Иеговасти кадя, сар мэ камав. Но через кода, сар ман барярдэ, манди ԥарэс тэ отԥэндював. Кажно разо манди прижалпэ фартэ тэ мангав лэ Иеговас, тэ поможый манди тэ пэрэандярав када вся и тэ отԥэндював ла бутятар, сави на дэла манди тэ служысарав» (Матфея 6:24).
8. Со амэ акана уӷанаса?
8 Кала кандас лэ Иеговас, када анэн амэнди лашимос. Но кала кодэла, кастэ исин власть, када и старейшыноря, дада и дэя, кандэн лэ Иеговас, кадэлэстар аврэнди авэла драго. Роздиқам дэсавэ примероря анда Библия, савэ сытярэн амэн, сар трэбуй тэ андярас пэс, кала амэндэ исин власть.
СОСТИ И СТАРЕЙШЫНОРЯ МОӶУТ ТЭ СЫТЁН КАЙ О НЕЕМИЯ?
И старейшыноря терэн дила андо зало, кай тидэнпэ лэ Иеговастирэ свидетеля. Кадяжэ сар и о Неемия, саво аврэнца ваздэлас и стины андо Иерусалимо (Диқэн и абзацоря 9—11.)h
9. Саво ԥаримос сас кай о Неемия?
9 О Иегова дя лэ старейшынонэнди тэ заботинпэ пала пэско народо (1 Петра 5:2). И старейшыноря моӷут тэ сытён кай о Неемия, сар тэ обжанпэ лэ Иеговастирэ народоса. О Неемия правияс андэ Иуда и лэстэ сас бари власть (Неемия 1:11; 2:7, 8; 5:14). Лэстэ кадяжэ сас ԥаримос, саво лэсти прижаласпэ тэ пэрэандярэл. О Неемия уӷангля, кай и иудеёря анэнас андо храмо кода, со нащи и кадэлэса на стонас патив по Иегова. Ай инке вонэ на подритярэнас лэ левитонэн кадя, сар сас пистромэ андэ лэ Иеговаско законо. Вонэ на ритярэнас и суббота, ай дэсавэ лэнас пала пэстэ манушнян анда авэр народоря, савэ на тэлёнас лэ Иеговасти. О Неемия сас трэбуй кадэлэса варисо тэ терэл (Неемия 13:4—30).
10. Сар о Неемия обжаласпэ лэ Иеговастирэ народоса?
10 О Неемия на столас лэ Дэвлэстирэ народости пэстирэ законоря, важ кода кай лэстэ сас власть. Ай анда оди мангэлас лэ Иеговас тэ поможый лэсти тэ сытярэл лэ манушэн лэ Дэвлэстирэ Законости (Неемия 1:4—10; 13:1—3). Кадяжэ о Неемия на заваздэлас о шэро и терэлас дила аврэ иудеёнэнца и дажэ поможыяс лэнди упалэ тэ ваздэн и стины андо Иерусалимо (Неемия 4:15).
11. Сар и старейшыноря трэбуй тэ обжанпэ лэ ԥралэнца и лэ ԥэянца, сар пистромэ андэ 1 Фессалоникийцам 2:7, 8?
11 Можэт кай и старейшыноря и нинай кацаво ԥаримос, саво сас кай о Неемия, но вонэ моӷут бут сости лэстар тэ сытён. Вонэ на жалуин пэско зор, кай тэ поможын лэ ԥралэнди и лэ ԥэянди. Вонэ полэн, кай и власть, сави лэнди динэ, када най важ кода, кай тэ авэн май лашэ аврэндар. И старейшыноря драго обжанпэ всаворэнца андэ собрания. (Адиносар 1 Фессалоникийцам 2:7, 8f.) Андэ лэндирэ алава дицол и любовь, и кай на заваздэн о шэро. Акэ со росԥэнэн о Тавричано, саво ужэ бут бэрша служый старейшынаса: «Мэ шутэм сама, кала любис лэ ԥралэн и лэ ԥэян и дэс дума лэнца анда оди, када лэл лэн лэ одестар и вонэ камэн май бут тэ терэн и дила лэ старейшынонэнца». О Шурмано, саво дэлмут служый старейшынаса, росԥэнэн: «Мэ старысавав тэ терав кадя, сар запистромэ андэ Филиппийцам 2:3. Мэ вся и время сэрав, кай трэбуй тэ гиндосарав, кай авэр май лашэ мандар. Када поможый манди тэ на застависарав лэ манушэн тэ терэн кадя, сар мэ камав».
12. Васо лэ старейшынонэнди трэбуй тэ на заваздэн о шэро?
12 Лэ старейшынонэнди трэбуй тэ на заваздэн о шэро и тэ сытён андэ када лэ Иеговастар. Хоть во Хулай пэ вся Люма, во «тэлёл», кай «тэ ваздэл лэ чорорэс анда прахо» (Псалом 113:6, 7; 18:35). Мануша, савэ заваздэн о шэро, гряца лэ Иеговасти (Притчи 16:5).
13. Васо лэ старейшынонэнди трэбуй тэ зритярэн пэстири дума?
13 Кай тэ кандэн лэ Иеговас, лэ старейшынонэнди трэбуй тэ зритярэн пэстири дума. Если вонэ на зритярдёнапэ, вонэ моӷут тэ ԥэнэн варисо най кадя лэ ԥралэсти чи ла ԥэяти, савэ на стон пэр лэндэ патив (Галатам 5:14, 15; Иакова 1:26). О Тавричано, савэстирэ алава сас пистромэ май англал ԥэнэн: «Дэкала кадя камэлпэ тэ стос по ҭан лэ ԥралэс чи ла ԥэя, савэ сар манди здэлпэ, на стон пэр мандэ патив, сави трэбуй. Но кала мэ гиндосарав пала лэ Дэвлэстирэ служытеля, пала савэ пистромэ андэ Библия, и савэ на парашэнас тэ кандэн лэ Дэвлэс, када сытярэл ман тэ на заваздав о шэро и тэ ашэлпэ мандэ ковло ди». И старейшыноря сыкавэн, кай кандэн лэ Иеговас, если ковлэс и анда оди дэн дума лэ манушэнца анда собрания и кадяжэ аврэ старейшынонэнца (Колоссянам 4:6).
СОСТИ И ДАДА МОӶУТ ТЭ СЫТЁН КАЙ О ЦАРЁ ДАВИДО?
14. Со о Иегова дя лэ дадэнди и со во лэндар аштярэл?
14 О Иегова дя лэ дадэнди тэ авэн хулая андо ери. Во аштярэл, кай вонэ лэна тэ барярэн и тэ сытярэн пэстирэ бэятонэн (1 Коринфянам 11:3; Эфесянам 6:4). Но када на сыкавэл, кай о дад можэт тэ хулаий кати кадя, сар во камэл. Андэ Библия пистромэ важ о Иегова, во кодэва «савэстар о ери» (Эфесянам 3:14, 15). Важ кода кай о Иегова создал о ери, во спушэла лэ дадэстар, сар во хулаий андо ери. Сар и дада сыкавэн, кай кандэн лэ Иеговас? Вонэ хулаин кадя, кай тэ радуин лэ Дэвлэс. И дада бутэсти моӷут тэ сытён, кала гиндон, сар жувэлас о царё Давидо.
Кала о дад мангэлпэ, трэбуй тэ дицол, кай во на заваздэл о шэро (Диқэн и абзацоря 15, 16.)i
15. Сости моӷут тэ сытён и дада кай о царё Давидо?
15 О Иегова приԥэндя лэ Давидости тэ хулаий най кати пэ пэско ери, но и по Израильско народо. Кай о царё Давидо сас бари власть. Дэкала во хулаияс най кадя, сар трэбуй и терэлас ошыбки (2 Самуила 11:14, 15). Но во дицолас, кай кандэлас лэ Иеговас, и парудёлас, кала лэсти ԥэнэнас, со во терэлас най кадя. О Давидо нисо на гаравэлас, кала дэлас дума лэ Иеговаса андэ молитва и росԥэнэнас, со лэстэ по ди. Во анда вся зор старыияспэ тэ терэл кадя, сар камэл о Иегова (Псалом 51:1—4). Кадяжэ во на заваздэлас о шэро и приашундёлас каринг и годявэрнэ алава, савэ сас най кати лэ муршэндар, но и лэ жувляндар (1 Самуила 19:11, 12; 25:32, 33). О Давидо сытёлас па пэстири дош. Важ лэстэ ӷлавно сас андэ жызня тэ служый лэ Иеговасти.
16. Сости и дада моӷут тэ сытён кай о царё Давидо?
16 Сости и дада моӷут тэ сытён кай о царё Давидо? Акэ сости. О Иегова дя тумэнди тэ хулаин по ери. Терэн када правильно. Прижанэн пэстири дош и приашундён каринг кодэла, ко ԥэнэн тумэнди па Библия, со тумэ терэн най кадя. Кала о ери диқэла, кай тумэ на заваздэн о шэро, лэла тэ стол май бут патив пэр тумэндэ. Кала мангэнпэ лэ ереса, росԥэнэн лэ Иеговасти, со тумэндэ по ди. Мэк тумаро ери ашунэл, сар фартэ тумэ камэн, кай о Иегова тэ поможый тумэнди. Ай со май ӷлавно важ лэндэ, кай вонэ тэ диқэн, кай тумэ нащи жувэн би кодэлэско, кай тэ на служын лэ Иеговасти (Второзаконие 6:6—9). Кала тумэ вся када терэн, када само кучутно подарко, саво тумэ можэте тэ стерэн пэстирэ ерести.
СОСТИ И ДЭЯ МОӶУТ ТЭ СЫТЁН КАЙ И МАРИЯ?
17. Сави дила андо ери о Иегова дя лэ дэянди?
17 О Иегова дя лэ дэянди важно дила андо ери, кай вонэ тэ хулаин пэ бэятцэ (Притчи 6:20). Кода, со терэл и дэл дума и дэй, ашэлпэ кай и бэятцэ пэ вся лэндири жызня (Притчи 22:6). Сости моӷут тэ сытён и дэя кай и Мария кай лэ Иисусостири дэй?
18, 19. Сости и дэя моӷут тэ сытён кай и Мария?
18 И Мария фартэ драго ӷанэнас и Свынто Писания. Вой фартэ бари патив столас по Иегова и латэ сас лащи дружба лэса. Вой камэлас вся и время тэ кандэл лэ Иеговас. Дажэ тоди, кала када фартэ парудоп вся латири жызня (Луки 1:35—38, 46—55).
Трэбуй тэ стос бут зор, кай тэ на вишос и холи по ери, кала ту цыено и тэ ԥэнэс, кай ту лэн любис (Диқэн о абзацо 19.)j
19 Дэя, саво лашимос тумэ можэте тэ сытён кай и Мария? Пэрво, терэн вся, кай тумэндэ тэ авэл лащи дружба лэ Иеговаса. Андэ када тумэнди поможыя, кала тумэ екжэнэ сытён па Библия и присытелэ тэ мангэнпэ. Дуйто, авэн ӷотови варисо тэ парувэн андэ пэстири жызня, кай тэ радуин лэ Иеговас. Можэт, тумэ вибарелэ андо ери, кай о дад и дэй ӷрубо дэнас дума лэ бэятонэнца и йто лэнас тэ цыпин. Важ када тумэ, файма, присытелэ тэ гиндон, кай тэ цыпин пэ бэятцэ, када нинай нисо. Тумэ уӷанглэ лэ Иеговаско гиндо пала кода, сар тэ сытярэн лэ бэятонэн. Но можэт тумэ шон сама, кай тэ авэн спокойни и тэ тэрпин, када ԥарэс, ай май фартэ тоди, кала тумэ цыелэ, ай и бэятцэ на кандэн (Эфесянам 4:31). Андэ кацави время тумэнди трэбуй, сар никала, тэ мангэн, кай о Иегова тэ поможый тумэнди. И ԥэй, савя ақарэн Русалина ԥэнэн: «Дэкала манди прижалпэ фартэ тэ мангав лэ Иеговас, кай во тэ поможый манди тэ зритярав и холи, кала о шаво ман на кандэл. Мэ дажэ тердярав пэс, кала дав дума и мангавпэ кай о Иегова андо гиндо. И молитва поможый манди тэ улав пэс» (Псалом 37:5).
20. Саво ԥаримос исин кай дэсавэ дэя и сар лэс тэ улэн?
20 Дэсавэ дэянди можэт тэ авэл ԥарэс тэ сыкавэн пэстирэ бэятонэнди, кай любин лэн (Титу 2:3, 4). Кацавэ жувля, файма, вибарелэ андэ кацавэ еря, кай и родителя най фартэ полэнас пэстирэ бэятонэн. Дажэ если тумэнца сас кацаво, на терэн кадя, сар тумарэ родителя. И жувли, сави кандэл лэ Иеговас, трэбуй тэ сытёл тэ сыкавэл пэстири любовь лэ бэятонэнди. Можэт лати найвушэро тэ парувэл пэстирэ гиндоря, пэско ди и кода, сар вой пэс андярэл. Но латэ када вижала! И када анэна лашимос и лати и латирэ ерести.
НА ПАРАШЭН ТЭ КАНДЭН ЛЭ ИЕГОВАС
21, 22. Со, сар пистромэ андэ Исаия 65:13, 14, амэндэ авэла, кала амэ кандас лэ Иеговас?
21 О царё Давидо полэлас, саво лашимос анэн, кала кандэс лэ Иеговас. Во пистросардя: «Лэ Иеговастирэ законоря справедливи и радуин оди. Лэ Иеговастирэ законоря вужэ и дэн лэ яқэнди тэ ԥабон. Вонэ фэрин тирэ служытелёс, и кала лэн ритярэн, авэла лащи наӷрада» (Псалом 19:8, 11). Драго дицол, ко кандэл лэ Иеговас, ай ко на кандэл лэс. Кодэла, ко кандэн лэс, «лэна тэ цыпин андо ди ла радостятар». (Адиносар Исаия 65:13, 14g.)
22 Кала и старейшыноря, дада и дэя анда оди кандэн лэ Иеговас, када анэна лашимос андэ лэндири жызня. Када анэна любовь и радость андо ери, ай мануша андэ собрания ашэна май дружни. Но со май важно, када радуия лэ Иеговаско ди (Притчи 27:11). Хэба исин кадэлэстар варисо май лашо?
ДИЛИ 123 Верно следуем теократическому порядку
a Андэ кадэя статья амэ подаса дума, васо трэбуй тэ кандас лэ Иеговас. Амэ кадяжэ уӷанаса, сости моӷут тэ сытён и старейшыноря, дада и дэя, и всаворэ, кастэ исин власть кай о правителё Неемия, кай о царё Давидо и кай и Мария лэ Иисусостири дэй.
b РОСԤЭНЭНПЭ, САР ТЭ ПОЛАС О АЛАВ. Алав «тэ кандэс» важ кодэла, кас заставин тэ кандэн, можэт тэ здэлпэ най фартэ лашо. Но лэ Дэвлэстирэ служытелёнэн нико на заставий тэ кандэн лэ Дэвлэс. Вонэ екжэнэ витидэ тэ кандэн, важ када вонэ на гиндон, кай кадэва алав найлашо.
c Евреям 12:9—11: «Кажнонэстэ амэндэ сас дад, саво сытярэлас амэн, и амэ стасас патив пэр лэстэ. Тоди хэба на трэбуй амэ май фартэ тэ кандас амарэ небеснонэ Дадэс и тэ жувас? Во сытярэлас амэн бут деса, кадя сар лэсти здэласпэ трэбуй. Но о Дэл сытярэл амэн, кай тэ авэл амэнди драго, кай и амэ тэ ашас свынти, сар во. Чаче, кала тумэн сытярэн важ тумаро бэзэх, андэ кадэя время здэлпэ, кай кадэлэстар кати дуқал оди, ай нинай радость, но май интя через када, тумэндэ авэла лашимос».
d Римлянам 7:21—23: «И акэ, диқав кадэва законо андэр мандэ. Кала мэ камав тэ терав лашимос, андэр мандэ ужэ исин о найлашимос. Мэрнэ одести чалёл лэ Дэвлэско законо. Но андэ мэрни тила диқав авэр законо, саво жал против законо, саво андэ мэрнэ гиндоря. Кадэва законо терэл ман рабоса лэ бэзэхэстирэ законости, саво исин андэ мэрни тила».
e Андэ кадэя статья, дэсавэн манушэн на ақарэн кадя, сар катэ пистромэ.
f 1 Фессалоникийцам 2:7, 8: «Амэ жалуисарасас тумэн, сар и дэй жалуий пэстирэ ԥарнэстирэ бэятос. Амэ фартэ любисарас тумэн, и важ када самас лошалэ най кати тэ пэрэдас тумэнди лэ Дэвлэстири лащи весть, но и тэ отдас тумэнди пэско ди, важ кода кай тумэ фартэ куч амэнди».
g Исаия 65:13, 14: «Важ када кадя ԥэнэн Владыка Ӷосподо о Иегова: „Мэрнэ служытеля лэна тэ хан, ай тумэ авэна боқалэ. Мэрнэ служытеля лэна тэ пэн, ай тумэндэ на авэла нисо тэ пэн. Мэрнэ служытеля лэна тэ радосавэн, ай тумэнди авэла лажаво. Мэрнэ служытеля лэна тэ цыпин андо ди ла радостятар, ай тумэ авэна тэ цыпин через кода, кай фартэ дуқал оди и тэ цыпин кодэлэстар, кай умэклэ и вас“».
h Пэ картинки. О старейшына лэ шавэса терэл дила андо зало, кай тидэнпэ лэ Иеговастирэ свидетеля. Во сытёл кай о Неемия, саво аврэнца ваздэлас и стины андо Иерусалимо.
i Пэ картинка. О дад лэ ереса анда оди мангэлпэ лэ Иеговасти.
j Пэ картинка. О бэято долӷо цэлэласпэ андэ иӷра, важ када нисо на стердя па цэр и на стердя урокоря. Лэстири дэй авеля па бути цыени. Вой росԥэнэн лэ шавэсти, кай нащи кадя пэс тэ андярэл. Но вой ритярэл пэс андэ вас и на цыпий пэр лэстэ.