Сар трэбуй тэ андярас пэс, кала амэнца или аврэнца найдраго обжанпэ?

1, 2. Со можэт тэ авэл по ди кай бут мануша, кала лэнца или аврэнца обжанпэ найдраго, и со амэ роздиқаса андэ кадэя статья?

АДЕС бутэ манушэнца обжанпэ найдраго. Кадя можэт тэ авэл через кода, кай о мануш чороро, или через кода, сар во бареля и сави лэстэ нацыя. Бутэ манушэнди ԥарэс тэ жувэн через кода, кай и барэ мануша анда страны гиндон ек важ кода, сар тэ затерэн май бут ловэ. Через када можэт тэ авэл ԥарэс амэнди или кодэлэнди, кас амэ ӷанас.

² Амэ полас, васо бутэ манушэн холярэл, кала лэнца или варикаса инке обжанпэ найдраго. Всаворэ амэ камас тэ жувас спокойно и кай амэнца тэ обжанпэ драго. Важ када дэсавэ мануша, кала диқэн, со терэлпэ андэ лэндири страна или андэ люма, старыинпэ тэ домардён, кай и жызня тэ ашэл май лащи. Вонэ жан против кодэла правителёря и законоря, савэ лэнди на чалён, и витидэн тэ правин кодэлэ манушэн, савэ дэн алав тэ решын всаворэ проблемы. Но амэ ӷанас, кай и христианоря «на прижан кадэла люмати», и патяс, кай кати лэ Дэвлэско Царство домардёла, кай всаворэнца тэ обжанпэ справедливо (Иоан. 17:16). И всаек, кала амэ диқас, сар аврэнца обжанпэ несправедливо, кадэлэстар можэт тэ дуқал оди и када можэт дажэ тэ холярэл амэн. Тоди амэ можэм тэ пушас пэстар: «Сар мэ тэ андярав пэс, кала аврэнца обжанпэ найдраго? Моӷу мэ тэ на аштярав и тэ стерав варисо ужэ акана?» Давайте када уӷанаса. Но спэрва роздиқам, со по ди кай о Иегова и кай о Иисусо, кала лэ манушэнца обжанпэ найдраго.

О ИЕГОВА И О ИИСУСО НИКАЛА НА ОБЖАНПЭ АВРЭНЦА НЕСПРАВЕДЛИВО

3. Васо амэнди на чалёл, кала варикаса найдраго обжанпэ? (Исайя 5:7).

³ Андэ Библия росԥэнэнпэ, васо амэнди кадя на чалёл, кала варикаса найдраго обжанпэ. Котэ пистромэ, кай о Иегова создал амэн кадя, кай амэ тэ шаспэ пэр лэстэ, ай во «любий чачимос и справедливость» (Пс. 33:5; Быт. 1:26). Во екжэно никала на терэл кода, со авэла несправедливо, и на камэл, кай варико найдраго тэ обжалпэ аврэнца (Втор. 32:3, 4; Мих. 6:8; Зах. 7:9). Например, кала жувэлас лэ Дэвлэско мануш, о Исайя, и израильтяноря найдраго обжанаспэ ек еқэса. О Дэл «ашундя, сар ровэн кодэла, пэр кастэ тасавэн». (Проадинон Исайя 5:7.) О Иегова спушля па кодэла, ко на парашэлас тэ жал против лэско законо и мучияс аврэн (Ис. 5:5, 13).

4. Со кай о Иисусо по ди, кала аврэнца обжанпэ найдраго? (Кадяжэ диқэн и картинка.)

⁴ О Иисусо, сар и лэско небесно Дад, любий справедливость и вэрыцый несправедливость. Еқвар, кала о Иисусо сас пэ ԥув, во додиқля манушэс, савэстэ вишутеля о вас. Лэсти во ашэля жалочко и во вилечисардя лэс. Но и фарисеёря заԥабелэ холятар. Лэнди сас всаек, кай о насвало мануш вилечисайля и парашэля тэ мучийпэ. Вонэ май бут запережывали, кай о Иисусо на шутя сама по законо важ и субота. Со кадэлэстар сас кай о Иисусо по ди? Лэсти ашэля фартэ ԥарэс кодэлэстар, кай лэндэ сас «кацаво баруно ди» (Мар. 3:1—6).

5. Со амэнди трэбуй тэ сэрас пала холи?

⁵ Сар амэ полям, о Иегова и о Иисусо вэрыцын и несправедливость. Важ када, кала амэ холявас, если варикаса обжанпэ найдраго, андэ када нинай нисо вэрыто (Эф. 4:26). Но трэбуй тэ полас, кай амари холи, дажэ если вой прижал, на улэла и несправедливость. Ай если амэ на парашас тэ холявас, через када амэ можэм тэ умэкас и вас и дажэ тэ занасвавас (Пс. 37:1, 8; Иак. 1:20). Так со ж амэ тэ терас, кала варикаса или амэнца обжанпэ найдраго? Ай со терэлас о Иисусо? Давайте уӷанаса.

СО ТЕРЭЛАС О ИИСУСО, КАЛА АВРЭНЦА НАЙДРАГО ОБЖАНАСПЭ

6. Сар и барэ мануша обжанаспэ лэ мироса, кала о Иисусо сас пэ ԥув? (Кадяжэ диқэн и картинка.)

⁶ Кала о Иисусо сас пэ ԥув, во диқэлас, сар бутэ манушэнца найдраго обжанаспэ. И фарисеёря и законикоря постодэ бут правилоря, па савэ лэ простонэ манушэнди сас ԥарэс тэ жувэн (Матф. 23:2—4). Ай и римски правителёря фартэ тасавэнас по миро. Бут евреёря на камэнас, кай пэр лэндэ тэ хулаин и римляноря. Дэсавэ дажэ тидэнас мирос, кай тэ жан тэ марэнпэ лэ римлянонэнца. Но о Иисусо никала на ӷулелас андэ кацави дила и на подритярэлас ла. Кала во уӷангля, кай и мануша камэн тэ стон лэс царёса, во ужыля лэндар (Иоан. 6:15).

7, 8. Васо кала о Иисусо жувэлас пэ ԥув, во на лэласпэ тэ решый всаворэ лэ манушэндирэ проблемы? (Иоанно 18:36).

⁷ Кала о Иисусо сас пэ ԥув, во на старыияспэ тэ решый и проблемы вместе лэ барэ манушэнца. Васо? Во полэлас, кай лэ манушэндэ нинай право тэ хулаин пэ авэр. Тай инке о Дэл на дя лэнди тэ ӷанэн када тэ терэн (Пс. 146:3; Иер. 10:23). Кадяжэ и мануша не моӷут тэ улэн и ӷлавно причина, васо нинай справедливость, — када о Бэнг и о бэзэх. Вся и люма андэ вас кай о жэстоко правителё, саво подмарэл аврэн, кай вонэ тэ обжанпэ ек еқэса найдраго (Иоан. 8:44; Эф. 2:2). Ай инке дажэ само лашэ мануша, савэ камэн вся и время тэ андярэн пэс правильно, дэкала не моӷут када тэ терэн просто важ кода, кай на ӷанэн, со када чачуни справедливость (Эккл. 7:20).

⁸ О Иисусо ӷанэнас, кай всаворэ кадэла проблемы сможэт тэ улэл кати лэ Дэвлэско Царство. Важ када во вся пэстири время и вся пэско зор отдэлас кодэлэсти, кай тэ росԥэнэн пала кадэва Царство (Лука 8:1). Во придэлас зор лэ манушэнди, савэ фартэ камэнас, кай будэр тэ на авэл о найлашымос и о вэрытимос (Матф. 5:6; Лука 18:7, 8). Ни ек манушыкано правительство не можэт када тэ домардёл — када можэт тэ стерэл кати лэ Дэвлэско Царство. И кадэва Царство най кацаво, сар «кадэла люматирэ царстворя». (Проадинон Иоанно 18:36.)

АНДЯРЭН ПЭС САР О ИИСУСО

9. Васо тумэ патян, кай кати лэ Дэвлэско Царство решыя всаворэ проблемы?

⁹ Амэ жувас андэ «послидни деса», и адес и мануша мучинпэ дажэ май фартэ, чем андэ лэ Иисусостирэ деса. Но сар и тоди, ӷлавно причина кадэлэсти — када о Сатана и вэрыти мануша (2 Тим. 3:1—5, 13; Тайна 12:12). Сар и о Иисусо, амэ ӷанас, кай всаворэ проблемы решыя кати лэ Дэвлэско Царство. Амэ витидям кадэва правительство и важ када на ӷуляс андэ лэ правителёнэндири дила и на старысавас екжэнэ тэ домардювас, кай тэ авэл андэ люма справедливо. Акэ со сас кай и ԥэй Сте́йсиa. Жы каринг кода, сар тэ уӷанэн пала Иегова, вой пристолас бут зор, кай тэ подритярэл кодэлэн, ко камэлас тэ домардёл справедливость. Но через дэсави время и Стейси парашэля тэ патял, кай када па чачимастэ можэт тэ поможый лэ манушэнди. Вой росԥэнэн: «Да, мэ старысававас тэ домардював, кай тэ авэл справедливо. Но кадяжэ мэ загиндосававас: правильно мэ вся терав чи най? Ай акана, кала мэ подритярав лэ Дэвлэско Царство, мэ точно ӷанав, кай витидэм правильно риг. И мэ патяв, кай о Иегова позаботияпэ пала кажно, каса найдраго обжылэпэ, пэбутэстэ май драго, чем мэ» (Пс. 72:1, 4).

10. Сар ԥэнэнпэ андо Матфеё 5:43—48, васо амэ на старысавас тэ парувас о правительство и о законо? (Кадяжэ диқэн и картинка.)

¹⁰ Адес бут мануша пристон вся о зор, кай тэ парувэн о правительство. Дэсавэ андар лэндэ ашэн кацавэ холинатирэ, кай дажэ жан против законо и терэн найлашымос аврэнди. Но о Иисусо сытярэлас най кадэлэсти (Эф. 4:31). Акэ со росԥэнэн о ԥрал, савэс ақарэн Дже́ффри: «Спэрва вся прожал мирно, ай потом можэт ӥто тэ зажал бида и беспорядко». Ай сости сытярэлас о Иисусо? Тэ любисарас всаворэ́ манушэн и драго тэ обжаспэ дажэ кодэлэнца, ко на подритярэл амэн или ӷоний. (Проадинон Матфеё 5:43—48.) Амэ андэ вся старысавас тэ шаспэ по Иисусо и андярас пэс кадя, сар во сытярэлас.

11. Васо дэкала амэнди можэт тэ авэл ԥарэс тэ терас кадя, сар о Иисусо?

¹¹ Амэ ӷанас, кай точно авэла время, кала лэ Дэвлэско Царство решыя всаворэ проблемы. Но кала амэнца найдраго обжанпэ, амэнди можэт тэ авэл ԥарэс тэ лас примеро лэ Иисусостар. Акэ со росԥэнэн и Джа́ния, савя вэрыцынас через латири нацыя: «Лэ манушэндирэ алава фартэ ман пусавэнас, мэ сымас фартэ холинати и камавас, кай кадэлэ манушэн тэ просытярэн. Тоди мэ лэм тэ загиндосавав, кай тэ лав тэ подритярав лэ манушэн, савэ боринпэ, кай тэ на авэл несправедливость. Манди здэласпэ, кай если мэ када стерава, манди ашэла май вушэро». Но через дэсави время и Джания поля, кай када неправильно и лати трэбуй дэсо тэ парувэл. Вой росԥэнэн: «Вместо кода, кай всаворэ́ одеса тэ патяв лэ Иеговасти, мэ лэм тэ приашундював каринг кода, со ԥэнэн авэр мануша, и тэ патяв лэнди. Кочай мэ ашадэм вся кодэя дила». Кала амэнца или аврэ манушэнца обжанпэ несправедливо, амэ можэм тэ лас тэ холявас. Но амэнди трэбуй тэ авас осторожни, кай тэ на ӷуляс андэ политика и тэ на лас екжэнэ тэ решысарас и проблемы, савэ исин андэ кадэя люма (Иоан. 15:19).

12. Васо амэнди трэбуй тэ авас осторожни, кала варисо адиносарас, диқас или ашунас?

¹² Со поможыя амэнди тэ на подаспэ ла холяти, кала диқас и несправедливость или кала амэнца обжанпэ найдраго? Например, амэнди трэбуй тэ авас осторожни андэ кода, со амэ адиносарас, ашунас и диқас. Андо интэрнэто бут со стердо кадя, кай тэ подваздэн лэ манушэн, и кай вонэ тэ авэн недовольни по правительство. Часто андэ новости и мануша росԥэнэн кода, со вонэ екжэнэ гиндон, ай най кода, со сас па чачимастэ. Но дажэ если и проблема па чачимастэ исин, хэба вой решыяпэ, если амэ постояно ласа тэ гиндосарас или тэ адиносарас пала латэ? Най. Со май бут амэ ужас андэ када лэ шэрэса, со май вэрыто амэнди потом авэла (Прит. 24:10). Тоди амэ можэм дажэ тэ парашас тэ стас лэ Дэвлэско Царство по пэрво ҭан андэ пэстири жызня и тэ бистрас, кай кати во решыя всаворэ проблемы и улэла вся о ԥаримос.

13. Сар и Библия поможый амэнди правильно тэ диқас пэ несправедливость?

¹³ Если амэ кажно дес адиносарас и Библия и гиндосарас пала кода, со амэ проадиносардям, тоди амэ ласа тэ ӷанас, сар правильно пэс тэ андярас, кала диқас и несправедливость. Еқа ԥьяти, савя ақарэн Али́вия, сас фартэ ԥарэс, кала вой диқэлас, сар аврэ манушэнца обжанпэ найдраго. Вой росԥэнэн: «Еқвар мэ пушлэм пэстар: „Ай мэ вобще патяв, кай о Иегова стерэла кадя, кай кадэла проблемы будэр на авэна?“ Мэ проадиносардэм Иов 34:22—29 и кадэла стихоря поможысардэ манди тэ полав, кай о Иегова вся диқэл и лэстар на гарадёса. Кати во ӷанэн, со када па чачимастэ справедливость, и кати лэсти па зор тэ улэл всаворэ проблемы». Но када на сыкавэл, кай если амэ аштярас лэ Дэвлэско Царство, амэнди нисо на трэбуй тэ терас. Дэсо амэ трэбуй тэ стерас. Со када?

СО АМЭ МОЖЭМ ТЭ ТЕРАС УЖЭ АКАНА

14. Со амэ можэм тэ терас ужэ акана? (Колоссы 3:10, 11).

¹⁴ Най па амаро зор тэ стерас кадя, кай всаворэ мануша тэ обжанпэ ек еқэса драго. Но амэ можэм тэ следисарас пала кода, сар амэ обжаспэ аврэнца. Сар амэ ужэ уӷанглям, амэ лас примеро лэ Иисусостар и важ када старысавас тэ любисарас лэ манушэн. И любовь поможый амэнди тэ стас патив пэ всаворэ — дажэ пэ кодэла, ко амэн ӷоний (Матф. 7:12; Римо 12:17). О Иегова лошавэл, кала амэ обжаспэ лэ манушэнца драго и справедливо. (Проадинон Колоссы 3:10, 11.)

15. Сар можэт тэ поможый лэ манушэнди о чачимос анда Библия?

¹⁵ Со инке амэ можэм тэ стерас, кай андэ люма тэ авэл май набут несправедливость? Тэ росԥэнас лэ манушэнди пала Дэл. Васо када кадя важно? Кала о мануш уӷанэн пала Иегова и камэл тэ уӷодий лэсти, во лэл тэ парудёл, сытёл драго тэ обжалпэ аврэнца и тэ любий лэн (Ис. 11:6, 7, 9). Акэ со сас кай о Джема́ло. Англа кода, сар тэ уӷанэн лэ Иеговас, во вместе аврэ манушэнца камэлас тэ домардёл, кай тэ парудёл о правительство. Во ԥэнэн: «Нахально лэ манушэн на парувэса, лэн можэт тэ парувэл кати о чачимос анда Библия. Имено када и поможысардясас манди». Кода, со о Джемало уӷанэнас анда Библия, поможысардя лэсти тэ ашавэл и дила, савяса во залэласпэ. Кала амэ росԥэнас лэ манушэнди пала Дэл, амэ поможысарас лэнди тэ парашэн тэ андярэн пэс несправедливо аврэнца.

16. Васо ту камэс тэ росԥэнэс пала лэ Дэвлэско Царство?

¹⁶ О Иисусо сытярэлас, кай кати лэ Дэвлэско Царство можэт тэ улэл всаворэ проблемы. Амэ тожэ камас, кай пала када тэ уӷанэн со май бут мануша. Важ кода кай и надежда пэ лащи жызня англэ можэт тэ подритярэл кодэлэн, каса обжылэпэ несправедливо (Иер. 29:11). И Стейси, пала сави амэ ужэ дям дума, ԥэнэн: «Мэ ӷанав, кай о Дэл улэла мэрно ԥаримос. Када поможый манди тэ на прилав фартэ пашэ каринг оди, кала манца или аврэнца обжанпэ несправедливо». Амэ камас, кай и аврэндэ по ди тэ авэл кадя жэ. Со важ када трэбуй? Спэрва амэнди екжэнэнди трэбуй драго тэ розласпэ, со андэ Библия ԥэнэнпэ пала несправедливость и ԥаримос. И тоди амэ сможэм тэ росԥэнас пала када, если пэ бути или андэ школа зажала кацави думаb.

17. Сар о Иегова поможый амэнди, кала амэнца несправедливо обжанпэ?

¹⁷ Амэ полас: пока о Сатана правий кадэла люмаса, о ԥаримос на ужала. Но кадя авэла най вся и время. О Иегова дэл алав, кай на ашавэла амэн екжэнэн, и ӥто о Сатана «авэла видарадо» (Иоан. 12:31). Андэ Библия о Дэл най кати росԥэнэн, васо исин несправедливость, но и ԥэнэн, кай лэстэ дуқал оди, кала во диқэл пэ амаро ԥаримос (Пс. 34:17—19). Амэ сытювас лэ Иисусостар, сар май правильно пэс тэ андярас, кала амэнца найдраго обжанпэ. И ӥто лэ Дэвлэско Царство улэла вся о ԥаримос, и мануша будэр никала на лэна тэ мучинпэ (2 Пёт. 3:13). Давайте ласа тэ пристас о зор и май англэ тэ росԥэнас пала лэ Дэвлэско Царство и тэ аштярас и время, кала па вся и ԥув авэла «справедливость» (Ис. 9:7).