Стон патив пэ всаворэ

1. Васо амэнди чалёл, кала пар мэндэ стон патив? (Притчи 22:1).

ВСАВОРЭ́ манушэнди чалёл, кала пэр лэндэ стон патив, важ кода кай амэн кадя создал о Дэл. Если амэнца кадя обжанпэ, тоди амэнди драго по ди. Най евья ԥэнэнпэ андэ Библия: «И патив фэдэр, чем о руп и о сомнак». (Проадинон Притчи 22:1.)

2, 3. Васо дэкала найвушэро тэ сыкавас и патив?

² Дэкала тэ стас патив пэ авэр найвушэро. Васо? Амэнди сразу шолпэ андэ яқа, со андо мануш най кадя. Ай инке амэ жувас андэ кодэя время, кала и мануша присытелэ тэ на стон патив ек пэ ек. Но амэ андярас пэс совсем па аврятэ. О Иегова камэл, кай амэ пативалэс тэ обжаспэ «разнонэ манушэнца» (1 Пёт. 2:17).

³ Анда кадэя статья амэ уӷанаса, со када патив и сар ла тэ сыкавас: 1) каринг амарэ чаче, 2) каринг и ԥрала и ԥэя андэ собрания и 3) каринг кодэла, ко пока на андярэл лэ Иеговастири время. Амэ подаса дума, со поможыя тэ сыкавас и патив, дажэ кала када найвушэро.

САР ТЭ СЫКАВАС И ПАТИВ

4. Сар тэ сыкавас и патив?

⁴ Сар па тирятэ, со када патив? Па романи понятия о мануш затерэл и патив, если во домарделя варисо андэ жызня, лэстэ лашо характеро или во ашундёл лашымаса машкар о миро. Но кадяжэ важно, кай амари патив тэ авэл най просто андо ди, но и кай амэнди тэ камэлпэ тэ сыкавас ла пэ дила (Матф. 15:8).

5. Со поможыя амэнди тэ сыкавас и патив каринг авэр?

⁵ О Иегова камэл, кай амэ тэ стас патив пэ всаворэ. Например, амэнди трэбуй тэ стас патив пэ рая и пэ барэ мануша андэ страна (Римо 13:1, 7). Но варико можэт тэ ԥэнэн: «Мэ лава тэ став патив по мануш, если кати во када затерэла». Правильно кацаво гиндо? Най. Амари патив о мануш затерэл най важ кода, сар во пэс андярэл, ай важ кода, кай амэндар када аштярэл о Иегова. Амэ кадя терас, кай камас тэ радосарас лэ Иеговас (Иис. Н. 4:14; 1 Пёт. 3:15).

6. Вижала амэндэ тэ стас патив по мануш, саво на стол патив пар мэндэ? Росԥэнэн. (Кадяжэ диқэн и картинка.)

⁶ Ай вижала амэндэ тэ стас патив по мануш, саво на стол патив пар мэндэ? Да. Акэ дэсавэ примероря. О царё Сауло англа всаворэ стодя тэлэ моса пэстирэ шавэс лэ Ионафанос (1 Сам. 20:30—34). И всаек о Иоанафано столас патив пэ пэско дад, вся и жызня сас паша лэстэ и вместе лэса ԥирэлас пэ война (Исх. 20:12; 2 Сам. 1:23). О ӷлавно священико о Илиё дошалярдя ла Анна, кай вой авеля мати каринг и свынто катуна (1 Сам. 1:12—14). И Анна, сар и всаворэ андо Израилё, драго ӷанэнас пала лэстирэ ошыбки — кай лэстирэ шавэ абисар пэс андярэнас, ай во ԥандавэлас пэ када и яқа. И всаек и Анна столас патив по Илиё (1 Сам. 1:15—18; 2:22—24). Ай и мануша анда Афины ԥэндэ по апостало Павло «баламуто» (Дила 17:18). Но о Павло всаек дэлас дума лэнца пативалэс (Дила 17:22). Кадэла примероря сыкавэн, кай, если амэ анда вся о ди любисарас лэ Иеговас и дарас тэ на стерас лэсти больно, када поможыя амэнди тэ стас патив пэ авэр, дажэ кала када найвушэро. Ай акана давай подаса дума, пэр кастэ и васо амэ трэбуй тэ стас патив.

СЫКАВЭН И ПАТИВ КАРИНГ И ЧАЧЕ

7. Васо можэт тэ авэл ԥарэс тэ стас патив пэ амарэ чаче?

⁷ Васо дэкала ԥарэс тэ стас патив? Амэ бут время проандярас лэ чаченца. Важ када амэ драго ӷанас, со андэр лэндэ исин лашо, ай со най. Амэ можэм фартэ тэ вицыювас, если анда амаро ери варико занасвайля или варикастэ ашэля найлашо зор через кода, кай фартэ пережывает. Ай дэкала и чаче моӷут тэ пусавэн амэн андэ дума или тэ андярэн пэс амэнца найдраго. Если амэ ласа тэ андярас пэс лэнца кадя жэ, тоди андэ амаро цэр на авэла ладо. Призындяраса ек примеро. Исин кацаво насвалимос, саво римой и кокаля, и через када и вас и пэрнэ не моӷут драго тэ терэн. Точно кадя жэ, если машкар чаче мануша нинай патив ек каринг ек, вся о ери авэла росшуто и на лэла тэ ладий. Чаче, най всаворэ́ насвалимастар вижала тэ вилечиспэ, но кай андо ери всаворэ тэ стон патив ек пэ ек — када андэ амарэ вас. Тоди вся о ери авэла бахтало.

8. Васо важно тэ стас патив пэ амарэ чаче? (1 Тимофеё 5:4, 8).

⁸ Васо трэбуй тэ стас патив? (Проадинон 1 Тимофеё 5:4, 8.) Андо Пэрво письмо лэ Тимофеёсти о Павло пистросардя, кай андо ери кажно трэбуй тэ заботийпэ ек пала ек. И амэ када терас най важ кода, кай трэбуй, ай важ кода, кай стас «бари патив по Дэл». Амэнди трэбуй тэ заботисавас пала амарэ чаче, кай тэ уӷодисарас лэ Иеговасти. Кала амэ стас патив пэ амарэ чаче, кадэлэса амэ сыкавас, кай стас патив по Иегова, важ кода кай лэстар «жылэ всаворэ еря» (Эф. 3:14, 15). Када важно причина, кай тэ стас пэ амарэ чаче патив.

9. Сар о хулай и хулай моӷут тэ сыкавэн и патив ек каринг ек? (Кадяжэ диқэн картинки.)

⁹ Сар тэ сыкавас и патив? О хулай, саво любий пэстиря хулая, стол пэр латэ патив. Во сыкавэл, кай цэний ла и кала вонэ екжэнэ, и машкар о миро (Прит. 31:28; 1 Пёт. 3:7). Во никала на лэла тэ марэл ла, тэ лажаварэл или тэ терэл кода, через со вой лэла тэ гиндой, кай вой лэсти най куч. О ԥрал анда Аргентина, савэс ақарэн Ариэ́льa, росԥэнэн: «Через пэско насвалимос и хулаи дэкала можэт тэ пусавэл ман алавэса. Андэ кацави время мэ ԥэнав корко пэсти, кай па чачимастэ вой кадя на гиндой. Кала ашэл май ԥарэс, манди поможын и алава анда 1 Коринфо 13:5. Мэ старысавав тэ на холявав пэр латэ и тэ дав дума ласа ковлэс» (Прит. 19:11). И хулаи сыкавэл и патив каринг о хулай тоди, кала машкар о миро вой дэл дума пала лэстэ драго (Эф. 5:33). Вой полэл, кай, если лэла тэ пусавэл алавэнца, тэ подасалпэ, тэ ԥэнэн найлашэ алава, — када авэла сар ржавчина, сави лэла тэ римой о ери. Важ када вой никала на лэла тэ домэкэл кацаво андэ дума (Прит. 14:1). Акэ со росԥэнэн ек ԥэй анда Италия, лако хулай мучийпэ через кода, кай пала вся фартэ пережывает. Вой ԥэнэн: «Дэкала манди здэлпэ, кай мэрно хулай ни андар со терэл бида. Раньшэ дажэ па мэрно муй и па мэрнэ алава дицолас, кай вся када терэл манди нервы. Ай акана мэ старысавав тэ проандярав и время кодэлэнца, ко драго дэл дума пала авэр. И со май бут мэ лэнца время проандярав, со май вушэро манди тэ став патив пэ мэрно хулай».

10. Сар и бэяцэ и молодёж моӷут тэ сыкавэн, кай стон патив пэ пэстирэ родителя?

¹⁰ Ай сар тумэ, бэяцэ и молодёж, можэте тэ сыкавэн, кай стон патив пэ пэстирэ родителя? Приритярдён кодэлэсти, саво порядко и родителя стодэ андо ери (Эф. 6:1—3). Дэн дума пэстиря даса и пэстирэ дадэса пативалэс (Исх. 21:17). Кала тумарэ родителя лэнапэ андэ бэршэндэ, лэнди инке май бут трэбуй авэла тумари помощь. Старыинпэ со май драго тэ диқэн пала лэндэ. Акэ со сас кай и Мария. Лако дад — най лэ Иеговаско свидетелё. Кала во занасвайля, во андярэлас пэс кадя, кай лати сас ԥарэс тэ диқэл пала лэстэ. Вой ԥэнэн: «Мэ мангаваспэ, кай мэрни патив каринг о дад тэ авэл най кати андо ди, но и пэ дила. Мэ гиндосаравас кадя: если о Иегова мангэл ман тэ став патив пэ родителя, тоди, вижал, во дэла манди зор, кай мэ кадя тэ терав. Через дэсави время мэ полэм, кай манди на трэбуй тэ аштярав, кала о дадэ парудёла, — мэ моӷу тэ став пэр лэстэ патив ужэ акана». Если амэ стас патив пэ амарэ чаче, дажэ кала када фартэ ԥарэс, амэ сыкавас, кай стас патив по Иегова, савэстар жылэ всаворэ еря.

СЫКАВЭН И ПАТИВ КАРИНГ И ԤРАЛА И ԤЭЯ АНДА СОБРАНИЯ

11. Васо амэнди можэт тэ авэл ԥарэс тэ стас патив по ԥрал или пэ ԥэй?

¹¹ Васо дэкала ԥарэс тэ стас патив? Амарэ ԥрала и ԥэя жувэн па лэ Дэвлэско законо. Но дэкала варико андар лэндэ можэт амэнца найдраго пэс тэ андярэл, тэ гиндой пала амэндэ неправильно или варисоса тэ холярэл. Вся када можэт тэ пусавэл амаро ди, и тоди амэнди авэла ԥарэс тэ сыкавас и патив (Клс. 3:13). Со тоди можэт тэ поможый?

12. Васо важно тэ стас патив пэ ԥрала и пэ ԥэя? (2 Пётро 2:9—12).

¹² Васо трэбуй тэ стас патив? (Проадинон 2 Пётро 2:9—12.) О апостало Пётро пистросардя, кай андо пэрво вико дэсавэ христианоря найпативалэс дэнас дума пала старейшыноря, савэн стодя о Иегова. Пэ када вся диқэнас и анӷелоря. Сар вонэ пэс андярдэ? Хоть кодэла христианоря андярэнас пэс наӷло и путярдэс, и анӷелоря через кода, кай «стон патив по Иегова», на ԥэндэ пала лэндэ ни ек найлашо алав. Кати погиндон! И совершэни анӷелоря на линэ найдраго тэ дэн дума пала кодэла христианоря. Вонэ полэнас, кай тэ сындой лэ манушэн можэт кати о Дэл (Римо 14:10—12; диқэн Иуда 9). Сости амэ сытювас кай и анӷелоря? Вонэ на парашэнас тэ стон патив дажэ пэ кодэла, ко жыля против о Иегова. Пэскати жэ май важно амэнди тэ на домэкас тэ обжаспэ найпативалэс лэ ԥралэнца и лэ ԥэянца, савэ любин лэ Дэвлэс. Амэнди трэбуй пэрвонэнди тэ стас пэр лэндэ патив (Римо 12:10). Кадя амэ сыкаваса, кай стас патив по Иегова.

13, 14. Сар амэ можэм тэ сыкавас и патив каринг и ԥрала и ԥэя андэ собрания? Росԥэнэн примероря. (Кадяжэ диқэн картинки.)

¹³ Сар тэ сыкавас и патив? Старейшыноря, кала сытярэн аврэн, терэн када всаворэ одеса (Флм. 8, 9). Если тумэ диқэн, кай варико терэл неправильно, на дэн совето анда холи. На грабин и терэн када ковлэс. Ԥэя, тумэ можэте бут со тэ стерэн, кай андэ собрания тэ авэл мирно и всаворэ пативалэс ек еқэса тэ обжанпэ. Важ када никала на подритярэн и дума, андэ сави исин сплетни: найлашэ алава или хохавни дума пала авэр (Тито 2:3—5). Всаворэ амэ можэм тэ сыкавас, кай стас патив пэ старейшыноря, если ласа тэ терас лэнца дила. Инке важно тэ ԥэнас лэнди, кай амэ цэнисарас вся, со вонэ анда ди терэн важ амэндэ, — кай вонэ проандярэн и собрании, дэн помощь тэ росԥэнас важ о Дэл лэ манушэнди и поможын кодэлэнди, ко змарделя па правильно дром (Гал. 6:1; 1 Тим. 5:17).

¹⁴ Ла ԥьяти, савя ақарэн Роси́о, сас ԥарэс тэ стол патив по старейшына, саво дя лати совето. Вой росԥэнэн: «Манди на чалеля, сар во манца дя дума, — во моӷ бы тэ стерэл када и май ковлэс. Хоть мэ и старысававас када тэ на сыкавав, но мэ на патявас, кай во чаче камэлас манди тэ поможый, и важ када на прилэм лэско совето. Ай цэрэ мэ лэм найдраго тэ дав дума пала кадэва ԥрал». Со поможысардя ла ԥьяти тэ парашэл тэ холявэл? Вой росԥэнэн: «Кала адиносаравас и Библия, мэ шутэм сама пэ алава анда 1 Фессалоники 5:12, 13. Мэ полэм, кай на став патив по ԥрал, и ман ля тэ хал и совесть. Мэ мангаваспэ лэ Иеговасти и родавас андэ амари литература советоря, савэ поможысардоп манди тэ парував пэско гиндо. Потом мэ прижанглэм, кай и проблема най андо ԥрал, ай андэ кода, кай мэ ӷордо. Акана мэ точно ӷанав: если тутэ исин ӷордость, тутэ на вижала тэ стос патив пэ авэр. Канешно, мэ идоси пристав зор, кай тэ парудював. Но кала мэ старысавав тэ став патив пэ авэр, мэ полав, кай када чалёл лэ Иеговасти».

СЫКАВЭН И ПАТИВ КАРИНГ КОДЭЛА, КО ПОКА НА АНДЯРЭЛ ЛЭ ИЕГОВАСТИРИ ВРЕМЯ

15. Васо амэнди можэт тэ авэл ԥарэс тэ стас патив пэ кодэла, ко найсвидетеля?

¹⁵ Васо дэкала ԥарэс тэ стас патив? Кала росԥэнас важ о Дэл, амэ часто диқас манушэн, савэ на камэн амэнца тэ дэн дума пала Дэл и Библия (Эф. 4:18). Дэсавэ манушэн просто кадя барярдэ. Варикастэ пэ бути строӷо хулай или учителё, савэсти ԥарэс тэ уӷодис. Ай варикасти найвушэро тэ ладий кодэлэнца, каса терэл бути или каса сытёл андэ школа. Через кода, сар андярэн пэс и мануша, амэ можэм тэ хасарас каринг лэндэ и патив, и тоди амэнди авэла ԥарэс тэ обжаспэ лэнца драго.

16. Васо трэбуй тэ стас патив пэ кодэла, ко инке на андярэл лэ Иеговастири время? (1 Пётро 2:12; 3:15).

¹⁶ Васо трэбуй тэ стас патив? Лэ Иеговасти най всаек, сар амэ обжаспэ кодэлэнца, ко пока на андярэл лэстири время. О апостало Пётро ԥэндя лэ христианонэнди: кала о миро диқэла, кай вонэ достойно пэс андярэн, можэт, варико через када андярэла лашо алав по Дэл. Акэ васо во дя совето тэ росԥэнэн пала пэстири вера «ковлэс и баря пативаса» каринг авэр. (Проадинон 1 Пётро 2:12; 3:15.) Неважно, ко англа амэндэ: сындомари, рай, правителё или просто мануш, — амэ трэбуй тэ дас дума лэса кадя, ԥэнэса паша амэндэ тердёл екжэно о Иегова. Важ кода кай амэ ӷанас: о Дэл ашунэл вся, со амэ дас дума, и шол сама, сар амэ када терас. Кочай амэнди трэбуй тэ стас патив пэ кодэла, ко пока на андярэл лэ Дэвлэстири время.

17. Сар амэ тэ сыкавас и патив каринг и найсвидетеля?

¹⁷ Сар тэ сыкавас и патив? Кала росԥэнас важ о Дэл, амэ часто диқас манушэн, савэ найдраго розлэнпэ андэ Библия. Но амэнди нащи тэ домэкас, кай вонэ тэ гиндон пала амэндэ кадя, ԥэнэса амэ лэндар май годявэрнэ. Амэ трэбуй тэ сэрас, кай важ о Иегова вонэ куч, важ када амэнди нащи тэ гиндосарас, кай амэ май лашэ лэндар (Агг. 2:7; Флп. 2:3). Бывает кадя, кай пар мэндэ моӷут тэ ԥэнэн найлашэ алава через кода, андэр со амэ патяс. И амэнди можэт тэ закамэлпэ, кай амэ тэ рисарас лэнди или тэ подлас андэ дума, кай тэ стас лэ манушэс по ҭан. Но кадя тэ терас нащи (1 Пёт. 2:23). Если тутэ на вижыля тэ зритярдёс и ту ԥэндян кода, со на камлян, сразу манг прощения. Ай сар тэ сыкавэс и патив пэ бути? Драго тер и дила и старысав тэ диқэс варисо лашо андэ кодэла, каса терэс бути и пэр кастэ терэс (Тито 2:9, 10). И дажэ если и мануша на шон сама пэ кода, кай ту на хохавэс и драго терэс бути, сэр — када цэний о Иегова (Клс. 3:22, 23).

18. Васо амэ камас тэ стас патив пэ авэр и сар тэ сыкавас када пэ дила?

¹⁸ Сар амэ полям, амэндэ исин васо тэ стас патив пэ авэр и тэ сыкавас када пэ дила. Например, кала амэ стас патив пэ амарэ чаче, кадэлэса амэ сыкавас, кай стас патив по Иегова, важ кода кай лэстар жылэ всаворэ еря. Точно кадя жэ амэ стас патив пэ амаро небесно Дад, кала пативалэс обжаспэ лэ ԥралэнца и лэ ԥэянца андэ собрания. Ай если амэ стас патив пэ кодэла, ко пока на андярэл лэ Иеговастири время, тоди вонэ, возможно, закамэна вместе амэнца тэ андярэн лашо алав по Дэл. И дажэ если авэр на стон патив пар мэндэ, нащи тэ умэкас и вас. Васо? Важ кода кай о Иегова дэла амэнди лашымос. Во дэл алав: «Мэ става патив пэ кодэла, ко стол патив пэр мандэ» (1 Сам. 2:30).