Sar meliarel i religia neciaci o anav le Devlesco

O Del silo iubirea. Cu sea cadala, le religii cai phenen că den duma hai cheren le buchia ando anav le Devlesco, cheren but nasulimata. Sar daștil-pe cadaia? Anda codoia că cadal religii sile neciace. Prin so phenen hai so cheren, sicaven le manușen hohaimata anda o Del. Sar cheren von cadaia? So simțosarel o Del caring i religia neciaci? Hai so va cherela vo laia?

1. Sar meliarel i religia neciaci o anav le Devlesco prin so sicavel le manușen?

I religia neciaci ‘parudea o ciacimos le Devlesco ande iech hohaimos’. (Romani 1:25) Sar exemplo, le mai but religii ci sicaven le manușen savo si o anav le Devlesco, chiar cana i Biblia phenel că trebul te folosisaras lesco anav. (Romani 10:13, 14) Cana întâmplol-pe vareso nasul, chichiva rașaia phenen că cadea camlea o Del. Tha cadaia si iech hohaimos. O Del ci cherel buchia nasul niciechdata. (Citisaren Iacov 1:13.) Fal amenghe pharo că le hohaimata cai phenen-le le religii duriarde bute manușen le Devlestar.

2. Sar meliarel i religia neciaci o anav le Devlesco prin so cherel?

I religia neciaci ci phiravel-pe le manușența cadea sar phiravel-pe o Iehova. I Biblia phenel că „lache păcatea vazdine-pe ji opre, co cerii”. (Revelația 18:5) De șăla bărșa, le religii hamisaren-pe andi politica, len partea ca le războaia hai anen o merimos bute manușengo. Chichiva conducători religioși manghen love catar le manușa anda codoia că placian lenghe te train ando barvalimos hai te aven-le le mai cuci buchia. Prin sea cadal buchia, von sicaven că ci prinjianen le Devles hai că nai-le o drepto te phenen că si le manușa le Devlesche. (Citisaren 1 Ioan 4:8.)

3. So si ando ilo le Devlesco cana dichel i religia neciaci?

Dacă tu sar manuș holiares-tu cana diches le buchia cai cherel-le i religia neciaci, so pachias că si ando ilo le Iehovasco cana dichel so cherel voi? Vo iubil le manușen, tha silo holiardo pe le conducători religioși cai meliaren lesco anav hai phiraven-pe zurales nasul le manușența. Vo promitil că i religia neciaci va avela chosli cu sea hai că „ci va mai avela arachli niciechdata”. (Revelația 18:21) Na pa but timpo, o Del va chosela pa i phuv sea-l religii neciace. (Revelația 18:8)

HACHIAR MAI MIȘTO

4. O Del ci dichel sea le religii lașe

But manușa pachian că sea le religii sile sar niște droma cai îngăren co Del. Tha si ciaces cadai buchi? Citisaren Matei 7:13, 14 hai pala codoia den duma:

• Sar phenel i Biblia că si o drom cai îngărel ca i viața?

Dichen o MATERIALO VIDEO hai pala codoia den duma:

MATERIALO VIDEO: Angla o Del, sea-l forme de închinare sile lașe? (iech cotor) (3:22)

• Sicavel i Biblia că si mai but religii cai cheren so camel o Del?

5. I religia neciaci ci sicavel i iubirea le Devleschi

Le religii meliaren o anav le Devlesco ande but feluri. Sar exemplo, len partea ca le războaia. Caște hachiares sar cheren cadai buchi, dichen o MATERIALO VIDEO. Pala codoia den duma:

MATERIALO VIDEO: I changheri lea partea ca o Duito Războio Mondialo (2:22)

• So cărde but changherea cana sas o Duito Războio Mondialo?

• So si ande chio ilo cana jianes că von line partea ca o războio?

Citisaren Ioan 13:34, 35 hai 17:16. Pala codoia den duma:

• So pachias că si ando ilo le Iehovasco cana dichel că le religii len partea ca le războaia?

• Le religii neciace cheren-pe doșale anda but buchia nasul. Von ci sicaven i iubirea le Devleschi. So buchia nasul cai cheren-le le religii neciace dichlean-le vi tu?

6. O Del camel te hastravel le manușen anda i religia neciaci

Citisaren Revelația 18:4a hai pala codoia den duma:

• O Del camel te ajutil le manușen cai sas-le athade catar i religia neciaci, te înclen anda late. Sar fal-tu cadai buchi?

7. Na mech-tu, sichio mai dur anda o ciacio Del

Trebulas te meches ca i religia neciaci te cherel-tu te pachias hohaimata anda o Del? Imaginisar tuche iech șiavo cai ci camel te așunel pesche dadestar, cai silo mai goghiaver. Vo tiliarel de chăral hai cherel buchia zurales nasul. Tha o dad ci camel ca lesco șiavo te cherel cadal buchia. Sostar ci avelas mișto te phenas că o dad silo doșalo anda o phiraimos nasul lesche șiavesco?

• Avelas mișto te phenes că o Iehova si doșalo anda so cherel i religia neciaci hai te na mai sichios anda leste?

SO SICHILEAM

I religia neciaci meliarel o anav le Devlesco prin o fapto că sicavel le manușen hohaimata anda o Del hai prin le buchia zurales nasul cai cherel-le. O Del va chosela pa i phuv i religia neciaci.

So dichleam

• So pachias anda le sicaimata hai anda le buchia nasul cai i religia neciaci cherel-le?

• So pachias că si ando ilo le Iehovasco cana dichel i religia neciaci?

• So va cherela o Del la religiaia neciaci?

RODE MAI BUT

Va avela te diches dui buchia prin save le mai but religii meliaren o anav le Devlesco.

„Sile sea le religii ande sa codo felo? Îngăren-ame sea co Del?” (Articolo pa amaro site-o)

Sostar camel o Iehova te anas lesche închinarea ande iech than averența?

„Trebul te cheras partea anda iech religia organizime?” (Articolo pa amaro site-o)

Iech rașai sas-lo duchado cana dichlea so cherel-pe ande leschi religia, tha cadaia ci așadea-les te sichiol o ciacimos anda o Del.

„Sostar mechlea iech rașai i changheri” (Ușten!, februaria 2015)

De mii bărșa, le religii phenen hohaimata anda o Del hai cheren le manușen te pachian că le Devles ci duchal-les amendar hai că silo ratavalo. Va avela te diches trin anda cadal hohaimata hai savo si o ciacimos.

„Hohaimata cai duriaren le manușen le Devlestar” (O Turno de veghe, 1 noiembria 2013)