Ianuaria

Sostar daisardea te folosiarel o Iehova le Timoteios mai but ande lesco servicio? Anda codoia că sas-les șucar calități creștino. (Filip. 2:19-22) O apostolo Pavel phendea anda o Timotei că sas iech phral umilo, loialo, vreanico hai demno pachiamasco. Vo camelas anda sea o ilo o miștimos le phralengo. Cadea că, o Pavel iubisardea le Timoteios hai bi te încărel-pe parpale dea-les te cherel buchia importanto. Sa cadea, cana vi amen bariaras calități creștino sam zurales cuci andel iacha le Iehovasche hai daisaras te slujisaras vi mai but amare phralenghe. (Ps. 25:9; 138:6) Cadea că, mang le Iehovas te ajutil-tu te hachiares ca savi calitatea mai trebul te cheres buchi. Pala codoia, de sea chi zor caște bariares-la. Pachias că trebul te sicaves mai but empatia? Cames te aves iech manuș cai rodel sea o timpo i pacea hai cai silo iertătorii? Daștis te pușes ieche amales cai silo mai pașă tutar so calități pachial că trebulas te bariares vi mai but. (Prov. 27:6) w22.04 23 ¶4, 5

O Iehova camel te avas bucurime. Cadea sar jianas, i bucuria cherel partea anda o rodo le spiritosco sfânto. (Gal. 5:22) Anda codoia că si mai but bucuria te das sar te primisaras, amare ile pheren-pe bucuriaia cana das sea amari zor te cheras amari buchi anda o Iehova, hai cana das iech vast caște ajutisaras amare phralen. (Fap. 20:35) Ando texto de aghies o apostolo Pavel phendea anda dui buchia cai ajutin-ame te avas bucurime. I iechto si, te das le Iehovasche sea so si amen mai lașio. (Mat. 22:36-38) I duito si, te na comparisaras-ame averența! Orisave avenas le buchia cai daisaras te cheras-le anda codoia că sam sicade, sasteveste sau si amen diferime talentea, trebul te das pachiv le Iehovasche. Hai, dacă dichas că aver cheren pengo servicio creștino mai mișto sar amen, trebulas te bucurisaras-ame că folosin penghe talentea caște așaren le Iehovas. w22.04 10 ¶1, 2

I distrugerea la religiachi neciaci va cărdiola-pe sigo hai bi te ajucărel-pe chonic. (Rev. 18:8-10) Cana o Babilono o Baro va avela distrugime, sea i lumea le Satanoschi va avela te izdral hai daștil-pe că va avena bare pharimata. Tha o poporo le Devlesco daștil te avel bucurime anda dui motivea: i religia neciaci, cai si iech purano dușmano le Iehovasco, va avela chosli cu sea hai anda sea o timpo, hai amari eliberarea anda cadai lumea nasul si pașă! O Daniel phendea de mai anglal că „o ciacio prinjianimos va bariola”. Aghies, dichas sar pheren-pe cadal cuvintea. Hachiaras mișto le profeții andal ghiesa ande save traisaras. (Dan. 12:4, 9, 10) Cana dichas chichi de exacto pheren-pe, amari pachiv anda o Iehova hai anda lesco Cuvânto inspirime bariol vi mai but. (Is. 46:10; 55:11) Te zuriaras mai dur amaro pachiamos prin o studio atento la Bibliaco hai te ajutisaras vi averen te avel-len iech amalimos chidino le Iehovaia. Vo va ferila sea codolen cai pachian-pe cu sea ande leste hai va dela-len „iech pacea cai încărel”. (Is. 26:3) w22.07 6, 7 ¶16, 17

O lil Revelația sicavel că o Regato le Devlesco rail ando cerii hai că o Satan sas-lo șiudino tele othar. (Rev. 12:1-9) Cadai buchi andea pacea ando cerii, tha, anda amende andea but pharimata. Sostar? Anda codoia că o Satan ortosardea peschi holi contra le slujitori loialo le Iehovasche pa i phuv. (Rev. 12:12, 15, 17) Sar daisaras te așias zurale hai pherde pachiamos angla le atacuri le Satanosche? (Rev. 13:10) Iech buchi cai ajutil-ame si te jianas so va avela ando viitorii. Sar exemplo, ando lil Revelația, o apostolo Ioan del duma anda chichiva miștimata cai va avena amen na pa but timpo. Mașcar cadala miștimata si vi o fapto că le dușmani le Devlesche va avena chosle anda sea o timpo. Chiar anda o iechto verseto anda o lil Revelația, phenel-pe amenghe că le buchia cai va avela te citisaras-le sile amenghe sicade andel „simboluri”, adică ande iech șib figurativo. (Rev. 1:1) w22.05 8 ¶1-3

O fapto că codola loiali le Iehovasche așen zurale hai pherde pachiamos, va cherela codolen cai sile contra le Iehovasche te astaren-pe holiatar. Cadea că, iech coaliția de națiuni va atachila o poporo le Devlesco pa sea i phuv. Cadai buchi pherdi holi sili sicadi ande iech modo profetico sar o ataco cai va anela-les o Gog anda Magog. (Ezec. 38:14, 15) So va cherela o Iehova cana va dichela cado ataco zuralo? Vo phenel amenghe: „Va avela te astarav-ma holiatar”. (Ezec. 38:18, 21-23) I Revelația, o capitolo 19, sicavel so va avela pala codoia. O Iehova bișialel pesche Șiaves caște feril Lesche slujitoren pa i phuv hai caște marel-pe contra lenghe dușmani. Ande cado marimos, pașa o Isus va avena „le armate anda o cerii” – le îngeri loialo ande iech than codolența 144 000. (Rev. 17:14; 19:11-15) Sar va sfârșila-pe cado războio? Sea le manușa hai le organizații cai așen contra o Iehova va avena chosle cu sea pa i phuv. (Rev. 19:19-21) w22.05 16, 17 ¶9, 10

Ca țâra timpo pala so o Adam hai i Eva păcătuisarde, o Iehova phendea iech bari profeția, prin savi dea speranța sea le manușenghe. Arachas scriime cadai profeția andi Geneza 3:15: „Va avela te șioav dușmănia mașcar tute hai i jiuvli, mașcar che șiave hai lache șiave. Vo va nichiarela chio șăro hai tu va avela te nichiares lesco călcâio”. Cadai profeția arachas-la ando iechto lil la Bibliaco. Tha, ande iech modo sau aver, sea le coavere lilen andai Biblia silen phanglimos laia. Cadea sar iech cotor încărel ande iech than sea le pagini ieche lilesche, sa cadea, le cuvintea scriime andi Geneza 3:15 phanden ande iech than sea le lila la Bibliache ande iech corcoro mesajo. Savo si cado? Că o Del avelas te bișalel iech Hastraitorii caște distrugil le Satanos hai sea codolen cai așen de leschi rig. Cadaia va anela bare miștimata anda codola cai iubin le Iehovas! O fapto că studiisaras i Biblia, ajutil amen te hachiaras sar pherel-pe cadai profeția ande amare ghiesa. w22.07 14 ¶1-3

Manghen le Iehovas te del tumen goghiaverimos caște ajutin tumare șiaven te bariaren iech bari iubirea anda leste. (Iac. 1:5) O Iehova si o mai lașio jeno cai daștil te sicavel-ame sar te cheras cadaia. Ita dui buchia. I iechto: O Iehova jianel o mai mișto sar te avel iech dad. (Ps. 36:9) Hai i duito: Lesche sicaimata goghiaver sile sea o timpo lașe. (Is. 48:17) O Iehova del but haben spiritualo le daden prin pesco Cuvânto hai peschi organizația. (Mat. 24:45) Sar exemplo, arachen-pe but sfaturi lașe andel articolea „Ajutorii andal familii”, cai cărde partea but bărșa anda i revista Ușten!, hai acana arachas-len po site-o jw.org. Sa cadea, but interviuri hai aver materialea video pa amaro site-o daștin te ajutin le daden te bariaren penghe șiaven cadea sar phenel o Iehova. (Prov. 2:4, 5) w22.05 27 ¶4, 5

I iertarea le Iehovaschi si i mai bari. Ando iechto than, o Iehova silo gata sea o timpo te iertil-ame. Ando duito than, o Iehova jianel sea le buchia anda amende hai prinjianel-ame, cadea că vo daștil te dichel o mai mișto dacă varecon căisardea-pe ciaces. Ando trinto than, cana iertil-ame, o Iehova chosel amare păcatea hai bâstrăl sea le buchia nasul cai cărdeam-le. Cadea, daștil te avel-ame iech conștiința uji hai te avas cuci ande lesche iacha. Si ciaces, chichi timpo sam imperfecți, va avela te păcătuisaras. Tha ci trebul te hasaras amari speranța. Ita so phenel-pe ando lil Perspicacitate: „Anda codoia că o Iehova silo pherdo îndurarea hai jianel save si le covlimata lesche slujitorenghe, cadala ci trebun te simțosaren-pe sea o timpo doșale anda le greșeli cai cărde-len anda codoia că sile imperfecți. (Ps 103:8-14) Dacă den penghi zor te phiren loialo po drom le Iehovasco, daștin te simțosaren bucuria. (Flp 4:4-6; 1Io 3:19-22)”. w22.06 7 ¶18, 19

Tha i dar te avas persecutime catar le guvernea ci si i corcori dar saveatar folosil-pe o Satan. Chichiva daran catar so va pachiana le jene anda lenghi familia cana va așunena că von alosarde te aven Martori le Iehovasche. Cadai dar si mai bari sar codoia te aven persecutime hai marde. Von iubin zurales but penghe neamuren hai camen ca vi von te prinjianen hai te iubin le Iehovas. Cadea că, von sile zurales duchade cana cadala den duma bipachivales anda o Iehova hai anda lesche închinători. Tha, poiechdata, le neamuri cai sas mai anglal contra, avile co ciacimos. Tha so avelas te cheras dacă le jene anda amari familia șinen orisavo phanglimos amența anda codoia că si amen iech nevi religia? Daisaras te avas zuriarde hai te avel-ame iech bari pacea ando ilo cana gândisaras-ame ca le șucar cuvintea anda Psalmo 27:10. Cana anas amenghe andi goghi chichi de but iubil-ame o Iehova, ci mai daras anda so va avela, chiar cana amari familia duriardea-pe amendar. Sa cadea, daisaras te pachias că o Iehova va pochinela-ame parpale anda codoia că ci mechas-ame. Chonic ci daștil te ajutil-ame cadea sar o Iehova! Vo del-ame sea so trebul amenghe caște traisaras, lel sama pe amaro ilo caște avas bucurime hai ajutil-ame te așias pașă lestar. w22.06 16, 17 ¶11-13

Cana sas-lo pi phuv, o Isus sas-lo doșardo pe neciacimaste că sas-lo hașvalo po haben hai po pimos, că cherelas buchi anda o Beng, că ci încărelas o sabato hai chiar sas phendo anda leste că ci sicavelas pachiv le Devlesche. (Mat. 11:19; 26:65; Luca 11:15; Ioan 9:16) Tha, o Isus ci holiardea-pe hai ci phendea lenghe parpale dumes cai pusaven. Cana aver camen te holiaren-ame prin so phenen, amen trebul te las-ame pala o exemplo le Isusosco hai te na das duma nasul lența. (1 Pet. 2:22, 23) Si ciaces, ci si amenghe ușoro te încăras-ame parpale ande cadal situații. (Iac. 3:2) So daștil te ajutil-ame? Cana iech manuș savesche phenas i vestea lași, del duma bi lașimasco, te das amari zor te dichas părdal le buchia cai phenel-len. Iech phral po anav Sam phenel: „Gândisarav-ma sostar si importanto anda cado manuș te așunel o ciacimos hai dav mânri zor te încărav andi goghi că vo daștil te paruvel-pe”. Poiechdata, iech manuș daștil te avel holiardo, cana dichel-ame ca lesco udar anda codoia că ci arachleam-les ande iech momento lașio. Cana das duma ieche manușeia cai silo holiardo, daisaras te phenas iech harno manglimos, ande savo te mangas le Iehovas te ajutil amen te na holiarel-pe hai te na phenel vareso cai ci sicavel lașimos sau pachiv. w22.04 6 ¶8, 9

Iech buchi importanto prin savi daștin te ajutin tumare șiaven te pașion le Iehovastar si te sichion andai Biblia lența. (2 Tim. 3:14-17) Cu sea cadala, i Biblia mai sicavel aver buchi prin savi von daștin te sichion anda o Del. Ando lil Proverbe, iech dad phenel pesche șiavesche te na bâstrel niciechdata le șucar calități le Iehovasche, cai sile sicade andi creația. (Prov. 3:19-21) Dadale, siguro placial tumen te beșen avri andi natura tumare șiavența! Folosin cado timpo caște ajutin-le te dichen sar le șucar buchia cai cărdea-le o Iehova sicaven sar silo vo ciaces. (Rom. 1:20) O Isus folosisardea i creația caște sicavel averen. Iech data, vo phendea pesche discipolenghe te dichen caring le corbi hai le crini. (Luca 12:24, 27-30) Vo sicadea pesche discipolen iech baro sicaimos anda chichi de lașio si lengo Dad cerisco hai sode but buchia dea-len vo. Cadaia sicavel că o Iehova va dela pesche slujitoren loialo so te han hai so te len pe pende, cadea sar cherel le ciricleanța hai le lulughianța pa o plain. w23.03 20 ¶1-4

Anas mulțumiri le Iehovasche vi anda codoia că daisaras te mangas-ame lesche prin lesco Șiavo. Sea prin leste, o Iehova del-ame so mangas lestar. O Del așunel amare manglimata cărde ando anav le Isusosco hai del-ame răspunso lende. Sa cadea, o Iehova iertil amare păcatea prin i jertfa de răscumpărare le Isusoschi. (Rom. 5:1) Andi Biblia, anda o Isus phenel-pe că si Baro Rașai hai că beșel „ca i ciaci le tronoschi le Barimaschi, andel ceruri”. (Evr. 8:1) O Isus si ‘o ajutorii cai si amen co Dad’. (1 Ioan 2:1) Chichi de but bariol amaro ilo hai sam recunoscători le Iehovasche că dea-ame iech Baro Rașai pherdo empatia, cai hachiarel amare covlimata hai „del duma ande amaro miștimos”! (Rom. 8:34; Evr. 4:15) Dacă ci avileas i jertfa le Isusoschi, ci daisardeamas te pașioas le Iehovastar ando manglimos. Amen jianas mișto că niciechdata ci va daisaraia te sicavas recunoștința cu sea anda o cuci daro cai dea-les amenghe o Iehova: pesche Șiaves iubime! w22.07 23 ¶10-12

Iech manuș demno pachiamasco phenel o ciacimos hai del peschi zor te încărel pesche promisiuni. (Ps. 15:4) Le manușa jianen că daștin te pachian-pe ande leste. Savore camas ca amare phrala hai pheia te pachian cadai buchi ande amende hai te avas prinjiande sar manușa demno pachiamasche. Ci daisaras te cheras zuralimaia le coaveren te pachian-pe ande amende. Trebul te sicavas le coaverenghe prin amaro phiraimos că sam demno pachiamasche. Phenel-pe că o pachiamos si sar le love: cheren-pe phares, tha hasaren-pe sigo. Amen jianas că daisaras te pachias-ame ando Iehova, anda codoia că vo sicadea amenghe cadaia. „Sea so cherel . . . si demno pachiamasco”. (Ps. 33:4) Vo camel ca vi amen te las-ame pala leste. (Ef. 5:1) Sam zurales recunoscători le Iehovasche anda codoia că țârdea-ame ande leschi șucar familia, cai arachas phrala demno pachiamasche. Savoren si amen i buchi te cheras ca amare phrala hai pheia te pachian-pe ande amende. Dacă fiesavo anda amende va dela peschi zor te sicavel andi congregația iubirea, umilința hai discernământo, va phenela o ciacimos hai va încărela-pe parpale, le phrala va pachiana-pe iech ande aver. Ca le coaver te daștin te pachian-pe ande amende, trebul te das amari zor sea o timpo te cheras cadaia. Savore camas te las-ame pala amaro Del, o Iehova, hai te sicavas că sam demno pachiamasche. w22.09 8 ¶1, 2; 13 ¶17

Chiar cana cheras partea andai șucar familia le Iehovaschi, cai si amen but phrala hai pheia, poiechdata daștil-pe că simțosaras-ame corcore. Chichiva anda amende daisaras te simțosaras-ame perade hai pachias că trebul te nachas părdal cadal sentimentea corcore. O Iehova ci camel te simțosaras-ame cadea. Te gândisaras amen sar ajutisardea le profetos Ilie. Vo zuriardea-les te del duma hai pușlea-les dui-var: „So cheres cade?”. (1 Regi 19:9, 13) De fiesavi data cana o Ilie șiordea pesco ilo angla leste, o Iehova așundea-les atento. Sa cadea, cărdea lesche prinjiando că sas but aver închinători pherde pachiamos. (1 Regi 19:11, 12, 18) Si ciaces că o Ilie simțosardea sar cana lea-pe iech baro bar pa lesco ilo, pala so pâtărdea-pe angla o Iehova hai așundea Lesco răspunso. Mai but, o Del dea-les te cherel chichiva buchia importanto: șiutea-les te machel le Hazaelos, rege opral i Siria, le Iehus, opral o Israelo, hai le Eliseos, profeto. (1 Regi 19:15, 16) Cana dea-les cadal buchia te cherel, o Iehova ajutisardea-les te încărel peschi goghi ca buchia lașe. Mai but, vo dea-les iech lașio amal, o Elisei. w22.08 8 ¶3; 9 ¶5

Lean partea vi tu, ande iech than la congregațiaia, cana vazdea-pe sau cărdea-pe buchi ca iech sala le Regatoschi? Dacă da, siguro așilea ande chi goghi i iechto întrunirea cai sas încărdi code. Sanas zurales recunoscătorii le Iehovasche. Daștil-pe că sanas cadea de bucurime, că che iacha pherdile-pe asfența hai sas tuche pharo te mai ghilabes i ghili cai pâtărdea o programo. Si ciaces, le săli le Regatosche mișto vazdine așaren le Iehovas. Tha așaras vi mai but le Iehovas cana cheras iech aver felo buchi anda o vazdimos. Cadai buchi si but mai cuci sar i buchi cana vazdel-pe iech clădirea. Si i duma anda o vazdimos le manușengo cai aven ande cadal thana andai închinarea. Andi goghi le apostoloschi Pavel sas chiar cadai buchi anda o vazdimos, cana scriisardea le cuvintea anda o texto de aghies. O apostolo Pavel jianglea sar te vazdel pesche phralen. Vo sicadea empatia caring lende. Daisaras te las-ame pala lesco exemplo hai te zuriaras vi amen amare phralen hai pheian. (1 Cor. 11:1) w22.08 20 ¶1, 2

Iech creștino cai camel te avel orta andel iacha le Iehovasche va avela pachivalo ande sea so cherel andel afaceri. Iech manuș cai iubil o ortomos ci daștil te dichel sar varecon phiravel-pe neorta ieche manușeia. Hai, „caște avel cu sea cuci” le Iehovasche, iech manuș ciaces orta pușel-pe sea o timpo sar dichel Vo le buchia cai alosarel te cherel-len. (Col. 1:10) I Biblia phenel că o Iehova si Codo castar avel o ortomos. Anda codoia, anda leste phenel-pe că si „o chăr le ortomasco”. (Ier. 50:7) Sar Creatoro, numai le Iehovas siles o drepto te phenel so si mișto hai so si nasul. Vo daștil te jianel exacto so si mișto hai so si nasul. Tha amen, ci daisaras te hachiaras cu sea cadai buchi. (Prov. 14:12; Is. 55:8, 9) Cu sea cadala, anda codoia că sam cărde pala o chipo le Devlesco, daisaras te încăras lesche norme anda o ortomos hai chiar sam bucurime te cheras cadaia. (Gen. 1:27) I iubirea anda amaro Dad cerisco cherel-ame te las-ame chichi mai mișto pala lesco exemplo. (Ef. 5:1) w22.08 27 ¶5, 6

Cana sam duchade sau perade, daștil-pe că simțosaras că trebul te cheras vareso caște na mai așel amari goghi ca amare pharimata. Cadai buchi si normalo, tha trebul te las sama te na cheras vareso cai o Iehova urâl. (Ef. 5:10-12, 15, 16) Ande lesco lil caring le filipeni, o apostolo Pavel zuriardea le creștinen te roden mai dur le buchia cai sile „orta, uje, meritin iubime . . . [hai] lașe”. (Filip. 4:8) Chiar cana ande cado contexto o Pavel ci dea duma andai destinderea, lesche cuvintea daștin te ajutin-ame te alosaras goghiaia o modo sar nachavas amaro timpo. Daisaras te cheras cadaia: te șioas ando than le cuvântosco „buchia”, le cuvintea „ghilea”, „filmea”, „lila” sau „jocuri video”. Cado exercițio daștil te ajutil-ame te dichas so divertismentea sile lașe andel iacha le Iehovasche hai save nici. Savore camas te traisaras amari viața pala le bare norme le Iehovasche. (Ps. 119:1-3) w22.10 9 ¶11, 12

Angla so te meren, chichiva anda „codola neorta” cărde buchia zurales nasul. Anda codoia, va trebuna sicade sar te train pala le bare norme orta le Iehovasche. Caște daștil te cherel-pe cadaia, o Regato le Devlesco va cherela o mai baro programo anda siacimos cai sas cărdo vroiechdata pi phuv. Con va sicavela codolen neorta? I bari mulțimea hai codola orta, cai va avena jiuvindime. Ca o anav codolengo neorta te avel scriime ando lil la viațaco, von trebun te pașion le Iehovastar, te arăsăn te avel-len iech amalimos chidino leia hai te dedichin penghi viața lesche. O Isus Cristos hai codola machle va avena zurales atento te dichen anda o cerii sar codola neorta va bariarena pengo pachiamos hai so va cherena soia sichile. (Rev. 20:4) Sea codola cai ci camen o ajutorii cai si lenghe dino ci va așena jiuvinde, chiar cana daștilas te avel-len 100 bărșa. (Is. 65:20) Anda codoia că o Iehova hai o Isus daștin te citin o ilo, ci va avela mechlo chanicasche te cherel vroiech nasul andi lumea nevi. (Is. 11:9; 60:18; 65:25) w22.09 16, 17 ¶11, 12

Ande cado verseto, ‘le autorități mai bare’ si le conducători pa-i phuv cai silen zuralimos hai controlo opral le manușa. Le creștini trebun te așunen catar cadala autorități hai te aven lenghe supuso. Von încăren i ordinea mașcar le manușa, len sama ca le manușa te cheren so phenel i legea hai, poiechdata, chiar aven andi apărarea le slujitorenghi le Devlesche. (Rev. 12:16) Cadea că, amen trebulas te pochinas lenghe le taxe, le impozitea hai te das-le i dar hai i pachiv cai manghen-la. (Rom. 13:7) Cu sea cadala, cadale guvernen silen autoritatea numai anda codoia că o Iehova mechel-len. O Isus sicadea claro cado ciacimos cana sas-lo angla o guvernatoro romano Ponțiu Pilat. Cana o Pilat phendea că sas-les autoritatea te mechel andi viața le Isusos sau te condamnil-les co merimos, o Isus phendea lesche: „Ci avelas-tu niciech autoritatea opral mande dacă ci avileas tuche dini de opral”. (Ioan 19:11) Cadea sar i autoritatea cai sas le Pilatos sas limitato, i autoritatea sea le conducătorenghi hai manușenghi politico de aghies sili sa cadea. w22.10 13 ¶6

O rege David scriisardea tela inspirația anda sar va avela i viața tela o raimos ieche regesco lașio hai goghiaver. (Psalmo 37:10, 11, 29) Cana das duma averența anda o Paradiso, butivar citisaras lenghe o verseto anda Psalmo 37:11, hai cadaia si zurales mișto, anda codoia că o Isus dea duma anda cado verseto ande leschi Predica pa o plain, hai sicadea că va pherela-pe ando viitorii. (Mat. 5:5) Tha so phendea o David sicadea vi sar avelas te avel i viața tela o raimos le regesche Solomon. Cana o Solomon railas ando Israelo, le Devlesche manușa bucurisarde-pe catar iech bari pacea hai but barvalimata ande iech them cai ‘thabdelas thud hai mierea’. O Del phendea: „Dacă va avela te phiren mai dur pala mânre legi . . . va avela te anav pacea ando them; va avela te șion tumen te soven hai chonic ci va cherela tumen e daran”. (Lev. 20:24; 26:3, 6) Cadal promisiuni pherdile-pe tela o raimos le regesco Solomon. (1 Cron. 22:9; 29:26-28) Le dumes cai arachas-len ando Psalmo 37:10, 11, 29 pherdile-pe vi andel puraimata, hai va pherena-pe vi ando viitorii. w22.12 10 ¶8

Amen sar ciace creștini, trebul te las amen pala le îndrumări cai si amenghe dine catar i organizația. I Biblia del cado lașio sfato: „Pala iech îndrumarea goghiaver va avela te îngăres chio războio hai prin but sfătuitori avel o succeso”. (Prov. 24:6, n.s.) Te dichas sar ajutil-ame cado principio te cheras mișto amari buchi andai predicarea hai sicaimos. Ando than te cheras cadai buchi cadea sar pachias amen că si mișto, amen das amari zor te încăras conto catar le îndrumări cai si amenghe dine. Ca le întruniri creștino, primisaras „iech îndrumarea goghiaver” catar but ‘sfătuitori’ – phrala hai pheia cai silen experiența, cai încăren teme hai demonstrații bazome pi Biblia. Mai but, i organizația le Iehovaschi del-ame lașe instrumentea – publicații hai materialea video – , cai ajutin le manușen te hachiaren i Biblia. Sam zurales recunoscători anda codoia că o Iehova dea-ame but lașe sfaturi ande pesco Cuvânto. Cai avileamas bi lengo? Te das amari zor ca, sea o timpo, te phiravas-ame pala o goghiaverimos cai del-les amenghe o Iehova! (Prov. 3:13-17) w22.10 23 ¶18, 19

Ca amaro corpo te avel zuralo, trebul te has haben hai te mechas-les te digeril-pe. Sa cadea, ca amaro pachiamos te avel zuralo trebul te sichioas mai but buchia anda o Cuvânto le Devlesco hai te gândisaras-ame ca so citisardeam. O Iehova camel te das amari zor te hachiaras-les sea mai mișto. Daisaras te cheras cadaia cana mangas-ame le Iehovasche, citisaras hai gândisaras-ame ca so citisardeam. Mai anglal, cana mangas-ame pregătisaras amaro ilo caște hachiaras le gânduri le Devlesche, pala codoia citisaras iech cotor andai Biblia hai așias po than caște gândisaras-ame ca so citisardeam. Sar va ajutila-ame cadaia? Cana hachiaras sea mai mișto o Cuvânto le Devlesco, amaro pachiamos va avela sea mai zuralo. Sostar si importanto te citisaras i Biblia hai te gândisaras-ame late? Anda codoia că cadea primisaras o zuralimos savestar si amen nevoia caște predichisaras o mesajo anda o Regato aghies hai ando viitorii pașardo te phenas o zuralo mesajo anda cris. Sa cadea, cana gândisaras-ame ca le șucar calități le Iehovasche, amaro amalimos leia va avela sea mai zuralo. w22.11 6, 7 ¶16, 17

O Isus sicadea că na numai lesche discipoli, tha vi codola avreal i congregația avenas te hachiaren con si le ciace creștini. Sar? I iubirea cai si mașcar le ciace creștini si zurales specialo. Tha, cu sea cadala, le Martori le Iehovasche ci sile perfecto. (1 Ioan 1:8) Cana arăsas te prinjianas mai mișto codolen andai congregația, va avela te dichas vi lenghe covlimata. (Rom. 3:23) Si nasul că chichiva mechle ca le coaverenghe imperfecțiuni te peraven-len. Sar sicadea o Isus iubirea caring pesche apostoli? Hai sar daisaras vi amen aghies te sicavas iubirea cadea sar o Isus?”. Savore daisaras te gândisaras-ame cadale pușimatande. Cadaia va ajutil-ame te bariaras amari iubirea, vi mai but cana dichas le coaverenghe imperfecțiuni. (Ef. 5:2) w23.03 26, 27 ¶2-4

Ando timpo so pașioas sea mai but catar o sfârșito cadale sistemosco, daisaras te ajucăras-ame ca andel congregații te aven situații cai va zumavena amari loialitatea. Anda codoia, si zurales importando te așias lucido. Dacă șimțosares că iech phral phiradea-pe nasul tuia, na mech ca chio ilo te pherel-pe holiaia. Dacă sanas ortosardo, nach părdal i lajiav, mech-tu ortosardo hai cher le paruimata cai trebun. Cana si cărde paruimata andi organizația cai paruven cu sea chi viața, acceptosar-le anda sea o ilo hai așun catar le îndrumări. Încăr chio pachiamos zuralo ando Iehova hai ande leschi organizația! Na holiar tut, gândisar ujes hai dich le buchia cadea sar dichel-len o Iehova. Mang le Iehovas te ajutil-tu hai na alosar niciechdata te beșes corcoro dur cathar le phrala andai congregația. Cadea, prin orisavo pharimos va avela te naches, o Satan ci va daștila te duriarel-tu cathar o Iehova hai leschi organizația. (Iac. 4:7) w22.11 24, 25 ¶14-16

Le phure, ajutin penghe phralen te aven pregătime angla so te avel iech dezastro. Von len sama ca savore jene andai congregația te jianen so trebun te cheren caște ferin-pe hai sar te len o phanglimos le phurența. So daisaras te cheras fiesavo mașcar amende? Dacă si iech dezastro ando than cai beșes, de duma le phurența caște jianes sar daștis te ajutis. Daștis te meches-len te beșen ande chio chăr anda iech timpo, codolen cai trebuisarde te tiliaren anda penghe chăra sau codolen cai avile te ajutin. Sau daștis te îngăres haben sau aver buchia codolenghe cai silen nevoia. Tha vi cana si iech dezastro ande iech than mai dur tutar, vi cadea daștis te ajutis. Sar? Daștis te manghes-tu le Iehovasche anda codola cai nachen prin o dezastro. (2 Cor. 1:8-11) Sa cadea, daștis te cheres donații anda i lucrarea mondialo. (2 Cor. 8:2-5) Dacă daștis te jias ando than cai sas o dezastro de duma le phurența caște jianes so trebul te cheres caște ajutis. Cana san achardo, daștil-pe că va avela te aves sicado caște daștis te aves folosime cana hai cai si o mai mișto. w22.12 24 ¶8; 25 ¶11, 12

Ande iech aver traducerea la Bibliachi o texto de aghies silo traducime cadea: „Ci avilea pe tumende niciech aver zumaimos avreal codola prin save nachen savore manușa”. Cadal cuvintea sas-le phende caring le creștini anda Corint, vi murșa, hai vi jiuvlea. Chichiva anda lende sas-le mai anglal manușa adultero, homosexuali hai machiarde. (1 Cor. 6:9-11) Pachias că pala o bolimos ci mai trebuisarde te maren-pe niciechdata contra iech camnimos nasul? Nici. Chiar cana sas-le creștini machle, sas-le sea manușa imperfecto. Cadea că, poiechdata vi von trebuisarde te maren-pe contra le camnimata nasul. Cadai buchi trebulas te zuriarel-ame. Sostar? Anda codoia că jianas că, indiferento contra savo camnimos nasul trebul te maras-ame, sas varecon angla amende cai daisardea te așel contra lesche. Savore daisaras te așias ‘zurale ando pachiamos, că jianas că sea-l phrala andai lumea nachen prin sea codola ducha’. (1 Pet. 5:9) w23.01 12 ¶15

O Isus manglea pesche Dadestar te lel sama lesche discipolendar. (Ioan 17:11) Cadaia zuriarel vi amen hai del-ame tromai, că jianas că o Iehova silo but mai zuralo sar orisavo dușmano. (1 Ioan 4:4) Vo dichel sea le buchia. Cadea că, amen pachias anda sea o ilo că, cana șioas amaro pachiamos ando Iehova, daisaras te nachas părdal amare daraimata hai te sicavas tromai. Si tuche lajiav poiechdata ca i școala sau ca i buchi te phenes că san iech Martoro le Iehovasco? Încăres-tu parpale te cărdios iech vestitoro sau te boles-tu anda codoia că daras so va pachiana le coaver anda tute? Na mech ca cadal buchia te așiaven-tu te cheres so si orta! Mang-tu anda sea o ilo le Iehovasche. Mang-les te del-tu tromai te cheres leschi voința. Cana va avela te diches sar del o Iehova răspunso ca che manglimata, va aveia mai zuralo hai mai tromano. (Is. 41:10, 13) w23.01 29 ¶12; 30 ¶14

O Isus șiutea o pușimos „Ci citisarden?” caște sicavel i atitudinea nasul cai sas le fariseien cana citinas le Scripturi. (Mat. 12:1-7) Ande codoi ocazia, le farisei doșarde le discipolen le Isusosche că uștarenas o sabato. Sar răspunso, o Isus phendea lenghe dui exemplea andal Scripturi hai phendea anda șăro iech verseto anda Osea, caște sicavel că le farisei ci hachiarenas so însemnolas ciaces i legea anda o sabato hai că ci sicavenas îndurarea. Sostar ci mechle cadal murșa ca o Cuvânto le Devlesco te cherel buchi anda lende? Anda codoia că cana citinas, lengo ilo sas-lo phuchiardo barimastar hai rodenas numai te prasan averen. Cadea că, von ci hachiarenas so citinas. (Mat. 23:23; Ioan 5:39, 40) Te dichas iech aver exemplo. Ando Matei 19:4-6, o Isus șiol sa codo pușimos le fariseienghe: „Ci citisarde?”. Chiar cana von citisarde i relatarea andai creația, von ci hachiarde so sicavelas-le cadaia anda o modo sar dichelas o Iehova i căsătoria. Anda le cuvintea le Isusosche sichioas chichi de importanto si te avel amen iech atitudinea lași cana citisaras andai Biblia. Na cadea sar le fairsei, amen camas te avas umilo hai te mechas-ame sicade. w23.02 11, 12 ¶12, 13

O Iehova dea le israelițenghe legi anda sar daștinas von te ferin-pe catar le bare accidente cana sas-le chăre sau cana cherenas buchi. (Ex. 21:28, 29; Deut. 22:8) Iech jeno cai mudarelas bi te camel aver varecas trebulas te suportil le phare urmări. (Deut. 19:4, 5) Cadea sar sicavelas i Legea, trebunas pedepsime chiar vi codola cai cherenas bi te camen iech nasul ieche șiavorresche cai ci sas-lo năștime. (Ex. 21:22, 23) I Biblia sicavel claro că o Iehova camel te avas zurales atento ca i siguranța. Sicavas că si cuci anda amende o daro la viațaco dacă las amenghe măsuri de siguranță cana sam chăre hai ca i buchi. Cadea că, șiudas le buchia cai șinen, le buchia toxico sau draba, las sama te cheras cadaia bi te cherenas nasul averenghe. Sa cadea, ci șioas-le ande iech than cai daștin te aven arachle catar le șiave. Cana astaras i iag, șioas te chiradiol o haben sau folosisaras aver uneltea, ci camas te mechas-le code hai te tiliaras. Ci tradas i mașina dacă leam draba cai covliaren amare simțuri, pileam sau sam lindrale, hai nici na încăras andel vasta dispozitivea cai daștin te țârden amari atenția. w23.02 21, 22 ¶7-9

O Iehova silo iech sicaitorii lașio, răbdătorii, cai hachiarel-ame. O Del rodel so si lașio ande codola cai sicavel-len. (Ps. 130:3) Vo ci ajucărel niciechdata amendar mai but sar daisaras te cheras. Mai but, te na bâstras că vo si codo cai cărdea amari goghi, cai si iech șucar daro. (Ps. 139:14) Amaro Del camel te sichioas anda sea o timpo hai cadaia te anel amenghe bucuria. Cadea că, si goghiaver ca încă de acanara ‘te camas sea mai but’ te sichioas le ciacimata andai Biblia. (1 Pet. 2:2) Șiu tuche obiectivea savende daștis te arăsăs hai cher tuche iech lașio programo anda i citirea hai o studio la Bibliachi ande fiesavo ghies. (Ios. 1:8) Le ajutoroia le Iehovasco va avela te araches sea mai but bucuria cana citis hai sichios mai but buchia anda leste. Tha ci arăsăl numai o fapto te avel-tu prinjianimos. O prinjianimos si cuci anda tute dacă ajutil-tu te sichios mai but buchia anda o Iehova, hai te bariares calități, sar avelas o pachiamos hai i iubirea anda leste. (1 Cor. 8:1-3) Ando timpo so sichios mai but buchia anda o Iehova, mang-les te ajutil-tu te bariares chio pachiamos. (Luca 17:5) Vo camel anda sea o ilo te ajutil-tu. w23.03 10 ¶11, 13

O Isus camlea ca lesche discipolen te avel-len sea o timpo so te cheren ando timpo so ajucărenas te avel o sfârșito. O Isus poruncisardea lenghe te phenen i vestea lași „ando Ierusalimo, andi sea i Iudeea, andi Samaria hai ji ande o mai duriardo than la phuveaco”. (Fap. 1:6-8) So bari buchi trebunas te cheren le continuatori le Isusosche! Cana denas sea penghi zor te phenen i vestea lași averenghe, von folosinas pengo timpo ando mai lașio modo. Te las sama pe amende însemnol te gândisaras-ame mișto sar folosisaras amaro timpo. „Le buchia cai ci ajucăras-le arăsăn le savoren”. (Ecl. 9:11) Daisaras te hasaras amari viața ande orisavo momento. Amen daisaras te folosisaras chichi mai mișto amaro timpo cana cheras i voința le Iehovaschi hai zuriaras amaro amalimos leia. (Ioan 14:21) Amen trebul te avas ‘zurale, te na mechas-ame perade, te avel amen sea o timpo but buchia te cheras andi buchi le Raieschi’. (1 Cor. 15:58) Cana va avela o sfârșito amara viațaco sau o sfârșito cadala lumeaco, ci va fala amenghe pharo că ci cărdeam mai but anda o Iehova. (Mat. 24:13; Rom. 14:8) w23.02 18 ¶12-14