Decembria

Sas o baro manuș cai cherelas buchi ca i thagarni anda Etiopia pregătime anda o bolimos? Te gândisaras amen: O etiopiano „avilea co Ierusalimo caște anel închinarea”. (Fap. 8:27) Cadea că, vo trebulas te avel iech prozelito cai lea-pe pala i religia le evreienghi. Siguro, vo sichilea anda o Iehova andal Scripturi ebraico. Cu sea cadala, vo camelas te prinjianel mai but buchia anda o Del. De fapt, cana o Filip arachlea-les po drom, o etiopiano citilas atento anda le lila scriime catar o profeto Isaia. (Fap. 8:28) Vo camelas te prinjianel mai but buchia. Sas-lo dispuso te avel anda Etiopia ji co templo anda Ierusalimo caște anel închinarea le Iehovasche. O etiopiano sichilea catar o Filip chichiva bare ciacimata. Mașcar cadala sas că o Isus si o Mesia. (Fap. 8:34, 35) Leschi iubirea anda o Iehova hai anda lesco Șiavo barilea. Cadea că vo alosardea te bolel-pe, caște arăsăl iech discipolo le Isusosco. Cana o Filip dichlea că cado manuș sas-lo pregătime anda cado baro paso, boldea-les. w23.03 8, 9 ¶3-6

Ci daisaras te avas cuci andel iacha le Iehovasche dacă hohavas. (Prov. 6:16, 17) Chiar dacă but manușa de aghies pachian că o hohaimos si vareso normalo cana den duma, amen camas te phiravas-ame cadea sar phenel amenghe o Iehova. (Ps. 15:1, 2.) Amen ci phenas hohaimata hai nici na banghiaras o ciacimos, ca le coaver te arăsăn te pachian aver vareso. Sa cadea, na das duma nasul pala averengo dumo. (Prov. 25:23; 2 Tes. 3:11) Cana diches că arăsăl te del-pe duma nasul pala averengo dumo, de chi zor te paruves o subiecto hai phen vareso șucar cai zuriarel. Anda codoia că traisaras ande iech lumea cai le manușa den duma melales sea o timpo, trebul te das sea amari zor ca prin o modo sar das duma te avas mișto dichle le Iehovastar. O Iehova va dela-ame bare miștimata dacă das amari zor te folosisaras o daro te das duma cadea sar camel vo andi predicarea, ca le întruniri hai cana das duma ande fiesavo ghies. Cana cado sistemo nasul va nachela hai, iech data leia, vi o zuralimos cai siles opral le manușa, va avela amenghe but mai ușoro te das pachiv le Iehovasche prin so phenas. (Iuda 15) w22.04 9 ¶18-20

Cana gândisaras-ame chichi de but iubin-ame o Iehova hai o Isus, cadaia cherel-ame te sicavas lenghe vi amen iubirea. (1 Ioan 4:10) Amari iubirea anda lende bariol vi mai but cana hachiaras că o Isus mulea vi anda amende. O apostolo Pavel hachiardea cado ciacimos, cadea că pherdo recunoștința vo scriisardea caring le galateni: ‘O Șiav le Devlesco . . . iubisardea-ma hai dea-pe pes anda mande’. (Gal. 2:20) Anda codoia că o Isus mulea anda sea le manușa, o Iehova țârdea vi tut peste caște daștis te aves amal leia. (Ioan 6:44) Ci pherel-pe chio ilo bucuriatar cana jianes că o Iehova dichlea vareso lașio ande tute hai pochindea o mai baro prețo caște daștis te aves iech anda lesche amala? Ci bariol vi mai but chi iubirea anda o Iehova hai o Isus? Avelas zurales mișto ca fiesavo anda amende te pușel-pe: „So va oblighila-ma i iubirea te cherav?”. I iubirea anda o Del hai anda o Isus zuriarel-ame te sicavas vi amen amari iubirea caring le manușa. (2 Cor. 5:14, 15; 6:1, 2) w23.01 28 ¶6, 7

Prin i Biblia, o Iehova ajutil-ame te slujisaras lesche „iech pașa aver”. Vo camlea ca mai but părți andal Scripturi te aven scriime cadea ca, numai codola umilo te daștin te hachiaren-le. (Luca 10:21.) Manușa de pe sea i phuv citin i Biblia. Tha numai codola umilo hachiaren-la ciaces hai cheren so phenel voi ande lenghi viața. (2 Cor. 3:15, 16) Andi Biblia, arachas vi aver buchia cai daisaras te sichioas-le anda o goghiaverimos le Iehovasco. O Iehova folosil le Scripturi na numai te sicavel-ame sar grupo, tha vi te sicavel hai te sastiarel o ilo fiesavesco anda amende. Savore daisaras te dichas sar lel sama o Iehova pe amende cana citisaras anda lesco Cuvânto. (Is. 30:21) Chichi-var pâtărdean i Biblia hai citisardean iech verseto cai falas-pe că sas-lo scriime chiar anda tute? Cu sea cadala, i Biblia sas-li scriime anda milioanea manușa. Sar daștis te araches ande late sicaimata anda amare ghiesa, cai te ajutin-tu hai te aven exacto so trebul tuche? Cadaia si posibilo numai anda codoia că i Biblia sas cărdi catar o mai goghiaver Jeno anda sea o universo. (2 Tim. 3:16, 17) w23.02 4, 5 ¶8-10

Sar ciace creștini amen iubisaras zurales but le Iehovas. Anda codoia, camas te cheras chichi mai mișto amari buchi anda leste. Tha, caște cheras sea so daisaras anda o Iehova, trebul te bariuvas spiritualo hai cadaia însemnol te bariaras calități creștino, te sichioas te cheras buchia neve hai te rodas te ajutisaras averen. Sostar trebul te das sea amari zor caște bariuvas spiritualo? Mai anglal, anda codoia că camas te avas cuci andel iacha amare Dadesche cerisco. O ilo le Iehovasco bariol cana dichel că amen folosisaras amare talentea hai le buchia cai jianas te cheras-le mișto ande lesco servicio. Pala codoia, amen cheras cadai buchi anda codoia că camas te ajutisaras amare phralen hai pheian. (1 Tes. 4:9, 10) Chiar cana sam de mai but timpo co ciacimos sau de mai țâra timpo, savore daisaras te bariuvas spiritualo. w22.04 22 ¶1, 2

O sistemo politico cadala lumeaco va marela-pe contra o Babilono o Baro, o imperio mondialo la religiaco neciaci. Cadai buchi va cherela te astarel o baro necazo. So va avela pala codoia? Va avena but manușa ca i închinarea ciaci? Nici. I Revelația, o capitolo 6, sicavel că, ande codol momentea zurales phare, codola cai ci slujin le Iehovasche va rodena te garaven-pe ca o sistemo politico hai comercialo, cai sile sar le plaina. Anda codoia că ci alosarde te așen pașa Lesco guverno, o Iehova va dichela-le că așen contra lesche. (Luca 11:23; Rev. 6:15-17) Ande cadai perioada zurales phari, va dichiola-pe claro că le slujitori loialo le Iehovasche sile diferime catar sea le coaver manușa. Von va așena o corcoro grupo pa i phuv cai va slujila le Devlesche hai cai ci va camela te așel de i partea la ‘fiarachi’. (Rev. 13:14-17) w22.05 16 ¶8, 9

I ‘vestea lași anda o Regato’ ci si o corcoro mesajo cai trebul te phenen-les le slujitori le Devlesche. (Mat. 24:14) Von trebun te den iech vast vi ca i buchi le îngerenghi anda save citisaras andi Revelația, le capitolea 8-10. Cadal îngeri phenen că va avena mai but bare ‘pharimata’ contra codola cai ci camen o Regato le Devlesco. Cadea, le Martori le Iehovasche phenen iech mesajo anda i cris, cai silo sar ‘o pahos hai i iag’. Prin cado mesajo, von cheren prinjiandi i cris le Devleschi contra le but buchia cai cheren partea andai lumea le Satanoschi. (Rev. 8:7, 13) Le manușa trebun te așunen că o sfârșito si pașă, caște daștin te cheren bare paruimata ande lenghi viața hai, cadea, te așen jiuvinde cana va avela o ghies ande savo o Iehova va sicavela peschi holi. (Țef. 2:2, 3) Tha le manușa ci camen te așunen cado mesajo. Anda codoia, trebul amenghe but tromai te phenas-les. Ando baro necazo, o palutno mesajo anda i cris, va holiarela vi mai but le manușen. (Rev. 16:21) w22.05 6, 7 ¶18, 19

Te gândisaras amen ca iech rrom hai iech rromni cai jucăren te cărdion dada. Ando timpo cai nachlea, daștil-pe că, von așunde but cuvântări anda o bariarimos le șiavengo. Tha acana, că len va avela len iech șiavo hai va trebula te bariaren-les, von hachiaren că cadal sicaimata arăsăn mai importanto anda lende. O bariarimos ieche șiavesco, si ciaces iech bari responsabilitatea. Cadea că, cana aven paruimata ande amari viața, daisaras te dichas ande iech modo nevo le sicaimata biblico mișto prinjiande. Anda codoia, le slujitori le Iehovasche citisaren o Cuvânto le Devlesco hai gândisaren-pe ca le buchia cai citisarde-len „ande sea le ghiesa” anda lenghi viața, cadea sar sas phendo le regenghe israeliți andal puraimata. (Deut. 17:19) Le daden silen iech andal mai bare privilegii cai daștin te aven ieche creștinos, codo te sicaven penghe șiaven anda o Iehova. Tha von trebun te cheren mai but sar numai te phenen lenghe buchia anda o Del. Von camen te șion ando ilo penghe șiavengo iech iubirea zurales bari anda leste. w22.05 26 ¶2, 3

Ci arăsăl numai te fal-ame pharo anda le păcatea cai cărdeam-len. Trebul vi te camas te cheras vareso. Iech aver buchi cai o Iehova dichel cana alosarel te iertil sau nici si dacă o manuș mechel le buchia nasul cai cărdea-len, risarel-pe catar i viața cai îngărdea-la mai anglal hai astarel te trail cadea sar camel o Iehova. (Is. 55:7.) Vo trebul te paruvel so si ande leschi goghi hai te mechel-pe sicado le Iehovastar. (Rom. 12:2; Ef. 4:23) Trebul te mechel parpale le gânduri nasul hai le buchia jiungale cai cărdea-len. (Col. 3:7-10) Si ciaces, o Iehova iertil-ame hai chosel amare păcatea numai cana amen sicavas pachiamos andi jertfa de răscumpărare le Cristososchi. O Iehova va folosila cadai jertfa ande amaro miștimos cana va dichela că amen das sea amari zor caște paruvas amaro phiraimos. (1 Ioan 1:7) w22.06 6 ¶16, 17

Le manușa cărde penghe nasul iech averesche. (Ecl. 8:9) Butivar așunas anda manușa cai folosisaren pengo zuralimos caște cheren nasul averenghe, anda manușa cai maren-pe sau mudaren averen, anda jene cai prasan sau daraven averen ca i școala, hai vi anda manușa cai phiraven-pe jiungales penghe familiența. Cadea că, si normalo ca le manușa te daran iech averestar. Sar camel o Satan te folosisarel cadai dar le manușendar caște peravel-ame? O Satan camel te cherel-ame te daras le manușendar caște așavel-ame te na mai predichisaras sau te cherel-ame te na mai așunas le Iehovastar. Tela o zuralimos le Satanosco, le guvernea așade amari predicarea hai persecutin-ame. (Luca 21:12) Andi lumea le Satanoschi, but manușa den mai dur hohaimata nasul andal Martori le Iehovasche hai phenen buchia neciace anda lende. Codola cai pachian cadal hohaimata daștinas te prasan-ame sau chiar te cheren amenghe nasul fizico. (Mat. 10:36) Si neve cadal athaimata le Satanosche? Nici. Vo folosisarel-len încă anda o iechto secolo. (Fap. 5:27, 28, 40) w22.06 16 ¶10, 11

Mașcar codola „but jene” cai va avena andine co ortomos si codola cai va avena uștiade andal mule, codola cai va așena jiuvinde pala o Armaghedono, hai vi le șiave cai daștil-pe că va cărdiona andi lumea nevi. Cana va nachena le 1 000 bărș, sea le manușa pa i phuv va avena perfecți. Te anas amenghe amintea că te aves perfecto ci însemnol te primis po than viața veșnico. O Adam hai i Eva sas-le perfecți. Tha, caște avel-le viața veșnico, von trebunas te sicaven că așunenas le Iehovastar, lengo Del. Tha von ci cărde cadaia. (Rom. 5:12) So daisaras te phenas anda le manușa cai va traina pi phuv pala so va nachena le 1 000 bărș? Ande codo momento, sea le manușa va avena perfecți. Tha va alosarena savore te așen pașa i guvernrea le Iehovaschi? Sau chichiva anda lende va avena sar o Adam hai i Eva, cai arăsle te na aven loialo le Iehovasche? Cadale pușimatande, va avela te primisaras răspunso co timpo potrivime. w22.09 22, 23 ¶12-14

Cana diches sea le pharimata andai lumea aghies, si tuche pharo te pachias că le buchia va paruvena-pe hai va avena mai lașe? Le phanglimata andai familia sile sea mai covle. Le manușa cărdion sea mai ratavale, roden o marimos hai gândin-pe numai pende. But jene anda codola cai silen autoritatea hasarde penghi pachiv. Tha chiar cadal buchia cai si aghies daștin te zuriaren amaro pachiamos. Sostar? Anda codoia că le manușa phiraven-pe exacto cadea sar sas phendo de mai anglal ande iech bari profeția andal „ghiesa de palal”. (2 Tim. 3:1-5) O modo sar pherel-pe cadai profeția – cai niciech manuș le ileia lașio ci daștil te phenel că na-i ciaces – sicavel claro că o Isus Cristos rail sar Rege ando Regato le Devlesco. Tha cadaia si numai iech anda le but profeții cai den duma anda o Regato. Sea cadal profeții potrivin-pe ande iech than, cadea sar le piese anda iech puzzle-o, hai va ajutina-ame te hachiaras cai sam ando calendaro le Iehovasco. w22.07 2 ¶1, 2

Andi pandemia de COVID-19, primisardeam îndrumări claro anda sar te cheras amare întruniri hai i lucrarea de predicare. De pe iech ghies pe aver, astardeam te încăras amare întruniri hai congresea prin videoconferința. Sa cadea, vi o modo sar predichisardeam parudea-pe hai astardeam te șioas mărturia sea mai but prin lila hai telefono. Cu sea cadala, o Iehova dichlea că das amari zor caște cheras sea so daisaras hai dea-ame but miștimata. But filiale dichle că o număro le vestitorengo barilea but. Ande sa cado timpo, bute phralen sas-len șucar experiențea. Daștil-pe că chichiva pachian că i organizația lea prea but măsuri caște ferin-ame ande cadai pandemia. Tha butivar sicadea-pe că i îndrumarea cai primisardeam-la sas goghiaver. Ando timpo so gândisaras-ame ca o modo iubitorii ande savo o Isus conducil pesche poporos, amaro pachiamos zuriarel-pe că, indiferento so va avela ando viitorii, o Iehova hai lesco Șiavo va avena pașa amende. (Evr. 13:5, 6) w22.07 13 ¶15, 16

Amen camas na numai te așaras le Iehovas, tha vi te mulțumisaras lesche anda le but șucar buchia cai del-len amenghe. Sar exemplo, daisaras te mulțumisaras lesche anda le but șucar lulughia, anda le but lașe habena hai anda amare lașe amala. Amaro Dad iubitorii del-ame cadal daruri hai but aver numai anda codoia că camel te cherel-ame fericime. (Ps. 104:12-15, 24) Hai vi mai importanto, mulțumisaras le Iehovasche anda o but haben spiritualo cai del-les amenghe caște încăras zuralo amaro pachiamos hai anda i șucar speranța cai si amen anda o viitorii. Daisaras te bâstras sigo te anas mulțumiri le Iehovasche anda sea so cherel anda amende. So daisaras te cheras ande cadai situația? Iech buchi si codoia te cheras amenghe iech lista le buchianța cai mangleam-len le Iehovastar hai te rodas te dichas sar vo dea amenghe răspunso lende. Pala codoia, te sicavas amari recunoștința ando manglimos anda o ajutorii cai dea-les amenghe o Iehova. (Col. 3:15) w22.07 22 ¶8, 9

Savore jianas că ci arăsăl numai te prinjianas o ciacimos. Caște aven amen miștimata hai te simțosaras chichi de cuci silo, trebul te traisaras-les, adică te șioas-les ande amari viața. Numai atunci o ciacimos va cherela-ame ciaces fericime. (Iac. 1:25) Catar daisaras te jianas că traisaras o ciacimos? Iech phral phenel te cheras amenghe timpo te gândisaras-ame caște dichas le buchia cai cheras-les cadea sar sichileam andai Biblia, hai codola save mai trebul te paruvas-le. O apostolo Pavel phendea cadea: „Sar ji acana barileam spiritualo, te phiras vi mai dur ande iech modo orta pe sa cado drom”. (Filip. 3:16) Te gândisaras-ame ca le miștimata cai si amen dacă ‘va avela te phiras mai dur ando ciacimos’. Amari viața va avela mai lași hai amaro phiraimos va bucurila le Iehovas hai amare phralen. (Prov. 27:11; 3 Ioan 4) O ciacimos si că si amen sea le motivea te iubisaras o ciacimos hai te traisaras-les. w22.08 19 ¶16-18

Le phure daștin te sicaven că iubin le Iehovas hai le Isusos, cana len sama pe le bacrea le Isusosche. (1 Pet. 5:1, 2) O Isus sicadea cadai buchi cana dea duma le apostoloia Petru. Pala so o Petru phendea trin-var că ci prinjianel le Isusos, daștil-pe că o Petru camelas anda sea o ilo te sicavel le Isusosche că iubil-les. Pala so sas-lo uștiado andal mule, o Isus pușlea le Petros: „Simon, șiav le Ioanosco, iubis-ma?”. Daisaras te pachias ciaces că o Petru avileas te cherel oriso caște sicavel peschi iubirea caring lesco stăpâno. O Isus phendea caring o Petru: „Le sama pe mânre bacriorre!”. (Ioan 21:15-17) Sea leschi viața, o Petru lea sama pherdo grija pe le bacrea le Raiesche hai cadea sicadea că iubilas-les. Cuci phure, sar daștin te sicaven că hachiaren chichi de importanto si o sfato cai dea-les o Isus le Petrosche? Daștin te sicaven chichi de but iubin le Iehovas hai le Isusos cana cheren tumenghe timpo te zuriaren le phralen hai pheian andai congregația hai cana den sea tumari zor caște ajutin codolen inactivo te aven parpale co Iehova. (Ezec. 34:11, 12) w23.01 29 ¶10, 11

Na mech tut athado te pachias că chonic ci hachiarel prin so naches! Cado modo gândimasco daștil te cherel-tu te pachias că ci daștis te încles anda iech situația hai că ci daștis te așes contra le camnimata nasul. Andi Biblia phenel-pe aver vareso: „Cana va avela o zumaimos, vo va pregătila tumenghe vi i calea te înclen, caște daștin te nachen părdal leste”. Cadea că, chiar cana le camnimata nasul sile zurale, daisaras te așias lenghe contra! Le ajutoroia le Iehovasco, daisaras te încăras-ame parpale hai te na cheras so si nasul! Te na bâstras că, anda codoia că sam imperfecți, daștil-pe ca poiechdata te aven amen camnimata nasul. Cana astaren anda amende cadal camnimata, trebul te duriaras-le sigo amendar, cadea sar cărdea vi o Iosif, cai nașlea catar i rromni le Potifaroschi. (Gen. 39:12) Ci trebul te pachias că na-i amen zuralimos angla le camnimata nasul! w23.01 12, 13 ¶16, 17

Iech calitatea șucar cai sicavel-la o Iehova, si o ortomos. (Deut. 32:4) Butivar, iech jeno cai silo orta ci cherel diferențea mașcar le manușa, hai o Iehova silo vi vo sa cadea. (Fap. 10:34, 35) O Iehova phendea că, andel palutne ghiesa, „o ciacio prinjianimos” cai arachel-pe andi Biblia „va bariola”, adică but manușa va avela te hachiaren-les. (Dan. 12:4.) Cado prinjianimos barilea vi mai but anda codoia că i Biblia hai le publicații biblico sas-le traducime hai tipărime ande mai but șiba. Ji acana, o poporo le Iehovasco traducisardea o Cuvânto le Devlesco, sea sau cotora anda leste, ande mai but sar 240 șiba, hai oricon camel daștil te avel-les iech Biblia traducime ande leschi șib, bi te pochinel-la. Cadea că, manușa anda sea le națiuni așunen ‘i vestea lași anda o Regato’ anglal te avel o sfârșito. (Mat. 24:14) Amaro Del cai silo orta camel te del chichi mai bute manușenghe i posibilitatea te arăsăn te prinjianen-les cana citin lesco Cuvânto. Vo cherel cadai buchi anda codoia că iubil-ame zurales but. w23.02 5 ¶11, 12

Iubis vi tu o ortomos? Daisaras te pachias că da. Tha, anda codoia că sam imperfecți, o modo sar dichel i lumea o ortomos daștil sigo te athavel-ame dacă ci las sama. (Is. 5:20) But jene pachian că iech manuș orta si iech manuș baricano, cai rodel i doș ande aver hai cai pachial că silo mai orta sar aver. Tha le Devles ci placian-les cadal trăsături. Cana sas-lo pi phuv, o Isus doșardea le conducătoren religioși anda lesco timpo, anda codoia că cherenas le buchia cadea sar pachianas von că si orta. (Ecl. 7:16; Luca 16:15) Iech manuș ciaces orta ci pachial niciechdata că silo mai lașio sar le coaver. O ortomos si iech șucar calitatea. Phendo harnes, însemnol te cheras so si orta andel iacha le Iehovasche Del. Andi Biblia, le cuvintea traducime prin „ortomos” sicaven i ideea te traisaras pala le mai uce norme, le norme le Iehovasche. w22.08 27 ¶3-5

O Isus pachiaia-pe ande pesche discipoli, chiar cana cadala cărde greșeli. (Ioan 15:16) Cana o Iacov hai o Ioan mangle le Isusos te del-len iech than specialo ando Regato, o Isus ci pachiaia că von slujin le Iehovasche numai anda cadai buchi hai nici na lea lendar o privilegio te aven apostoli. (Mar. 10:35-40) Mai târzio, cana o Isus sas-lo phandado, sea lesche discipoli mechle-les. (Mat. 26:56) Cu sea cadala, o Isus ci hasardea niciechdata pesco pachiamos ande lende. Chiar cana prinjiandea mișto save sas lenghe covlimata, o Isus „iubisardea-len ji co sfârșito”. (Ioan 13:1) Pala so sas-lo jiuvindime, vo chiar dea le 11 apostolen i bari buchi te aven angla i lucrarea de predicare hai te len sama pe lesche cuci bacrea. (Mat. 28:19, 20; Ioan 21:15-17) Vo daisardea te pachial-pe ciaces ande cadal manușa imperfecți. Savore slujisarde pherde pachiamos le Iehovasche ji cana lenghi viața pi phuv arăslea co sfârșito. Cadea că, o Isus sicade amenghe prin lengo lașio exemplo că daisaras te pachias-ame andel manușa imperfecți. w22.09 6 ¶12

Cana pachias zurales că o Iehova iubil-ame hai silo pașa amende, o Satan ci va daștila te daravel-ame. Sar exemplo, o manuș cai scriisardea o Psalmo 118 nachlea prin situații zurales phare cai cărde lesco ilo te izdral. Les sas-les but dușmani, mașcar save sas chichiva manușa zurale (le versetea 9, 10). Poiechdata, cărde-pe bare presiuni pe leste (o verseto 13). Hai vi mai but, o Iehova ortosardea-les zurales (o verseto 18). Chiar cana nachlea prin sea cadal pharimata, lesco ilo cărdea-les te phenel: „Ci va avela te darav”. Vo jianglea că, chiar cana o Iehova ortosardea-les, lesco Dad cerisco iubilas-les. O psalmisto pachialas zurales că lesco Del iubitorii sas-lo sea o timpo gata te ajutil-les, indiferento prin so avelas te nachel. (Ps. 118:29) Trebul te pachias zurales că o Iehova iubil fiesaves anda amende. Cado pachiamos va ajutila-ame te nachas părdal trin feluri daraimata cai si bute manușen: i dar că ci daisaras te las sama ca amara familia te avel-la le buchia cai trebun-la caște trail, i dar le manușendar hai i dar le merimastar. w22.06 14, 15 ¶3, 4

Trebul te das amari zor ca i închinarea co Iehova te avel po iechto than ande amari viața. Anda codoia că vo cărdea-ame, o Iehova meritil te anas lesche închinarea anda sea o ilo. (Rev. 4:11; 14:6, 7) Cadea că, i mai importanto buchi cai trebulas te avel anda amende si te anas lesche închinarea cadea sar camel vo, „spiritoia hai ciacimaia”. (Ioan 4:23, 24) Amen camas ca o spirito sfânto le Devlesco te cherel buchi ande amende, ca amari închinarea te avel pala le ciacimata scriime ando Cuvânto le Devlesco. I închinarea andini le Iehovasche trebul te așel po iechto than, chiar dacă daștil-pe că traisaras ande iech them cai amari buchi sili așadi sau ci daisaras te predichisaras libero. Aghies, mai but sar 100 phrala hai pheia sile phandade anda codoia că sile Martori le Iehovasche. Vi ande cadai situația, von ci hasarde penghi bucuria hai cheren sea so daștin caște manghen-pe le Iehovasche, te bariaren pengo prinjianimos hai te den duma vi averența anda amaro Del hai lesco Regato. Cana sam prasade sau persecutime, daisaras te avas fericime anda codoia că jianas că o Iehova silo pașa amende hai că vo va pochinela-ame parpale anda so cheras anda leste. (Iac. 1:12; 1 Pet. 4:14) w22.10 9 ¶13

Ando lil Proverbe, o Iehova del-ame sfaturi cai sile lașe sea o timpo hai cai cheren amari viața mai șucar. Te dichas dui exemplea. O iechto: Av mulțumime soia si tut. I Biblila del cado sfato: „Na chiniar-tu te nașes pala barvalimata. . . . Că siguro von cheren penghe phaca sar i acvila hai jian opre caring o cerii”. Cu sea cadala, vi le barvale, hai vi le ciore manușa de aghies den sea penghi zor te cheren love. Cadaia cherel-len butivar te phiraven-pe ande iech modo cai rimosarel lengo lașio anav, lenghe amalimata averența hai chiar vi lengo sastimos. (Prov. 28:20; 1 Tim. 6:9, 10) O duito: Gândisar angla so te des duma. Dacă ci las sama sar das duma, daisaras te cheras but nasulimos prin so phenas. Ando Proverbe 12:18 phenel-pe: „Cana varecon del duma bi te gândil, si sar cana pusavel-tu iech sabia, tha i șib codolenghe goghiaver si sastiarimos”. Amen daisaras te hachiaras-ame mișto averența cana ci das duma nasul pala lengo dumo anda lenghe greșeli. (Prov. 20:19) w22.10 21 ¶14; 22 ¶16, 17

O Ezechiel trebulas te hachiarel zurales mișto o mesajo cai trebulas te phenel-les. Cado trebulas te cherel partea anda leste hai te cherel buchi ca lesco ilo. Pala codoia, întâmplosardea-pe vareso neajucărdo. O Ezechiel dichlea că o sulo „sas-lo gulo sar i mierea”. (Ezec. 3:3) Sostar? Anda o Ezechiel i bari pachiv cai sas lesche dini te reprezentil le Iehovas, sas iech experiența guli hai șucar. (Ps. 19:8-11) Vo sas-lo recunoscătorii anda codoia că o Iehova alosardea-les te slujil lesche sar profeto. Pala codoia, o Iehova phendea caring o Ezechiel: „Așun sea le dumes cai va avela te phenav-len tuche hai șiu-le ande chio ilo”. (Ezec. 3:10) Cadea o Iehova phendea le Ezechielosche te încărel ande peschi goghi le dumes scriime ando sulo hai te gândil-pe lende. Cadaia zuriardea o pachiamos le profetosco hai, ande sa codo timpo, pregătisardea-les te phenel le manușenghe cado pharo mesajo. (Ezec. 3:11) Anda codoia că o mesajo le Devlesco sas ande lesco ilo hai pe lesche ușta, o Ezechiel sas-lo gata te astarel te cherel i buchi cai sas lesche dini. w22.11 6 ¶12-14

So daisaras te cheras cana iech paruimos cărdo andi organizația șiol vi amari loialitatea co zumaimos? Te susținisaras anda sea o ilo le paruimata andai organizația. Ando timpo so phirenas ando pustio, le chehatiți cherenas iech buchi zurales importanto. De fiesavi data cana le israeliți muchinas penghi tabăra, chichiva chehatiți phiravenas i arca le legământoschi angla sea o poporo. (Num. 3:29, 31; 10:33; Ios. 3:2-4) Iech privilegio ciaces specialo! Cu sea cadala, le buchia parude-pe anda lende cana le israeliți șiute-pe te beșen ando Them Promiso. I arca ci mai trebulas te avel îngărdi anda iech than ande aver. Cadea că, le chehatiți primisarde te cheren iech aver buchi. (1 Cron. 6:31-33; 26:1, 24) Andi Biblia, ci phenel-pe andal chehatiți că rovarde-pe sau că manghle te cheren aver buchi mai importanto anda codoia că mai anglal sas-len iech baro privilegio. De cathar sichioas că si zurales importanto te susținisaras anda sea o ilo le paruimata cai cheren-pe andi organizația le Iehovaschi, vi mai but codola cai paruven amari viața. Te arachas bucuria ande orsavi buchi cai si amenghe dini hai te na bâstras că na amare responsabilități andi organizația cheren-ame cuci andel iacha le Iehovasche. Anda o Iehova i mai importanto buchi si te așunas lestar na so privilegio si amen. w22.11 23 ¶10, 11

O Onisifor rodea le apostolos Pavel, hai cana arachlea-les, cărdea sea so daisardea caște ajutil-les soia sas-les nevoia, chiar cana trebuisardea te șiol peschi viața ando pericolo. So sichioas lestar? Te na mechas ca i dar le manușendar te daravel-ame sau te așiavel-ame catar o fapto te avas pașa amare phrala cai sile persecutime. Ando than te cheras cadaia, te sicavas că nai-le doșale hai te das amari zor te ajutisaras-le. (Prov. 17:17) Len silen nevoia catar amari iubirea hai ajutorii. Te gândisaras-ame ca le phrala hai le pheia andai Rusia, sar ajutisarde von penghe phralen cai sile phandade. Cana vroiech anda lende arăsăn angla o judecătorii, but phrala hai pheia aven co tribunalo caște aven pașa lende. So sichioas lendar? Cana le phrala cai sile angla amende sile prasade, phenen-pe hohaimata anda lende, sile phandade sau persecutime, ci trebul te daras. Te mangas-ame anda lende, te las sama pe le jene anda lenghe familii hai te rodas te cheras vi aver buchia prin save te ajutisaras-le. (Fap. 12:5; 2 Cor. 1:10, 11) w22.11 17 ¶11, 12

Le phuren silen vi i buchi te zuriaren le phralen andai Biblia hai te ajutin codolen cai sile perade. (1 Pet. 5:2) Cana si iech dezastro, von trebun mai anglal te dichen dacă fiesavo phral hai phei sile mișto hai te len sama te avel-le haben, hureaimata hai iech than cai te beșen. Tha lenghi buchi ci așel po than cade. Vi pala mai but șiona, le phralen silen vi mai dur nevoia te aven zuriarde. (Ioan 21:15) „Trebul te nachel mai but timpo caște sastiol chio ilo”, phenel o Harold, iech phral cai slujil ando comiteto iecha filialaco hai cai dea duma mai bute phralența hai pheianța cai nachle prin dezastrea. „Daștil-pe că lenghi viața jial angle hai astarel te avel pale normalo, tha butivar aven ande lenghi goghi amintiri duchade anda codola drago cas hasarde-le, anda iech buchi cai sas lenghe zurales cuci sau anda i situația nasul anda savi phares scăpisarde jiuvinde. Cadal amintiri daștin te astaren pale ande lengo ilo iech bari duch. Cadaia ci sicavel că nai-le pachiamos, tha si vareso normalo.” Le phure hachiaren chichi de importanto si o sfato „roven codolența cai roven”. (Rom. 12:15) w22.12 22 ¶1; 24, 25 ¶10, 11

Poiechdata si pharo te cheras so si mișto, tha o Iehova ajutil-ame te îngăras mai dur o marimos contra le camnimata nasul hai del-ame buhlimaia pesco spirito sfânto. Cana studiisaras i Biblia, mechas ca o spirito le Devlesco te cherel buchi ande amende. Amen primisaras spirito sfânto vi cana jias ca le întruniri. Code, bucurisaras-ame te beșas ande iech than amare phralența hai pheianța, cai, cadea sar amen, den penghi zor te cheren so si orta hai cadaia zuriarel-ame but. (Evr. 10:24, 25; 13:7) Hai cana pașioas le Iehovastar ando manglimos hai mangas lestar anda sea o ilo te ajutil-ame te maras-ame contra iech anda amare covlimata, vo del-ame pesco spirito sfânto, cai zuriarel-ame. Chiar cana cheras sea cadal buchia, daștil-pe că amare camnimata nasul ci va nachena. Tha va avela amen o zuralimos te așias lenghe contra. Iechdata so cărdeam amenghe iech programo andal buchia spiritualo cai ajutin-ame te zuriaras amaro amalimos le Iehovaia, si zurales importanto te încăras-ame lestar hai te bariaras mai dur camnimata lașe ande amare ile. w23.01 11 ¶13, 14

Chiar cana i Biblia ci si iech lil cai phenel amenghe sar te las sama pe amaro sastimos sau so te has, voi sicavel amenghe sar dichel o Iehova cadal buchia. Sar exemplo, vo zuriarel-ame te duriaras amendar „sea so si jiungalo” anda amaro corpo, adică sea so rimosarel amaro sastimos. (Ecl. 11:10) I Biblia phenel amenghe te na has hai te pias prea but. (Prov. 23:20) Cadal buchia daștin te rimosaren amaro sastimos, hai chiar te mudaren-ame. O Iehova camel te sicavas că jianas te încăras-ame parpale cana alosaras so hai chichi te has hai te pias. (1 Cor. 9:25) Daisaras te folosisaras amari goghi cana cheras alosarimata cai sicaven chichi de cuci si o daro la viațaco anda amende. (Ps. 119:99, 100; Prov. 2:11) Sar exemplo, daisaras te alosaras goghiaver so te has. Dacă placial-ame iech anumime haben, tha jianas că ci perel amenghe mișto, o goghiaverimos cherel-ame te na has-les. Sa cadea, sicavas că sam goghiaver dacă sovas chichi trebul, cheras exerciții fizico hai încăras amaro corpo hai chăr uje. w23.02 21 ¶6, 7

Sar daisaras te arachas cuci sicaimata cana citisaras i Biblia? Te dichas so phenel-pe ando 2 Timotei 3:16, 17. Cadal versetea sicaven că „sea i Scriptura si . . . lași”: 1) te sicavel, 2) te mustrol, 3) te ortol le buchia hai 4) te disciplinil. Chiar vi le lila biblico cai ci folosisaras-le cadea de but daștin te cheren cadai buchi. Cana citisaras iech relatarea, te gândisaras-ame so sichioas anda o Iehova, anda so camel vo te cherel hai anda le principii devlicane. Sa cadea, te dichas sar cadai relatarea mustrol amen. Sar exemplo, te dichas sar ajutil-ame so citisardeam te duriaras amendar o phiraimos sau le camimata nasul caște așias pherde pachiamos po drom lașio le Iehovasco. Sa cadea, te dichas sar cadai relatarea ortosarel iech hachiarimos greșime, cai daștil-pe că așundeam-les andi predicarea. Te dichas sar disciplinin amen cadal versetea, caște arăsas te dichas le buchia cadea sar o Iehova. Dacă si tut cadal ștar buchia andi goghi cana citis, va avela te araches cuci sicaimata hai cadea va avela te țârdes but miștimata andai citirea la Bibliachi. w23.02 11 ¶11

Iech profeția anda o lil Daniel phendea de mai anglal că o Isus avelas te astarel te rail ando Regato pala so avelas te nachel iech perioada profetico cai bușiol „efta timpuri”. Daisaras te jianas cana sas cărdo o Isus Rege? (Dan. 4:10-17). Le „efta timpuri” si iech perioada anda 2 520 bărșa. Cadaia astardea ande 607 a.a.e., cana le babilonieni duriarde le palutne reges pa o trono le Iehovasco, anda Ierusalim. Cadai perioada phandadea-pe ande 1914, cana o Iehova cărdea le Isusos – „codo cai siles o drepto legalo” – Rege lesche Regatosco. (Ezec. 21:25-27) Sar zuriarel-ame cadai profeția? Cana hachiaras i profeția anda le „efta timpuri”, zuriaras amaro pachiamos că o Iehova pherel pesche promisiuni co timpo alosardo lestar. Cadea sar o Iehova pherdea i profeția anda sar sas cărdo o Isus Rege co timpo potrivime, sa cadea vo va pherela vi le coaver profeții co mai lașio timpo, alosardo lestar. Daisaras te pachias ciaces că o ghies le Iehovasco „ci va arăsăla târzio”! (Hab. 2:3) w22.07 3 ¶3-5