Noiembria

Cadea sar dichleam ji acana, le dumes melale ci trebun te aven niciechdata pe le ușta ieche creștinosche. Tha daisaras te das duma ande iech modo cai duchavel averen, bi te das amari sama. Sar exemplo, trebul te las sama te na das duma nasul andal manușa cai silen aver cultura, etnia sau naționalitatea. Sa cadea, ci trebul te folosisaras dumes cai pusaven sau cai daștin te duchaven averen. De duma ande iech modo cai zuriarel averen. Cher tuche o obiceio te așares averen ando than te rovares-tu hai te rodes i doș ca le coaver. Le israielițen sas-le but motivea te aven recunoscători, tha von alosarde te rovaren-pe sea o timpo. Cana iech manuș rovarel-pe butivar daștil te cherel vi le coaveren de pașa leste te cheren sa cadea. Te anas amenghe amintea că o raporto nasul andino catar le deș spioni cărdea ca „sea le israeliți . . . te den duma nasul contra o Moise”. (Num. 13:31–14:4) Tha, pe aver partea, le așarimata daștin te zuriaren averen. Cadea că, te rodas ocazii te așaras averen anda sea o ilo. w22.04 8 ¶16, 17

Încă andal puraimata, o Iehova ajutisardea bute tărnen te arăsăn lesche amala. Vo daștil te ajutil vi che șiaven te barion spiritualo, dacă vi von camen cadaia. (1 Cor. 3:6, 7) Chiar cana fal-pe că che șiave duriaren-pe catar o ciacimos, daștis te aves siguro că o Iehova va dichela mai dur iubireaia caring lende. (Ps. 11:4) Cana vo va dichela lende orisavi țâni buchi ‘cai sicavel că silen iech ilo lașio’, vo va avela code pașa lende hai va pâtrela pesco vast caște ajutil-le. (Fap. 13:48; 2 Cron. 16:9) Sa cadea, vo daștil te ajutil vi tut te alosares mișto che cuvintea cana des duma che șiavența hai te jianes cana si o mai mișto te așunen so cames te phenes lenghe. (Prov. 15:23) Sau daștilas te cherel ieche phrales sau iecha pheia andai congregația te sicavel lașimos caring lende. Chiar vi pala so che șiave arăsăn manușa bare, o Iehova daștil te anel ande lenghi goghi vareso cai tu sicadean-le hai șiutean ande lengo ilo cana von sas-le țânorre. (Ioan 14:26) O Iehova va dela-tu but miștimata anda chi phari buchi cai cheres-la caște sicaves mai dur che șiaven prin so phenes hai prin so cheres. w22.04 21 ¶18

Anda codoia că o Satan ci mai daștil te jial ando cerii, vo ortosardea peschi holi caring le creștini machle cai mai așile pi phuv, cai reprezentin o Regato le Devlesco hai casche sas dini i „buchi te den duma anda o Isus”. (2 Cor. 5:20; Ef. 6:19, 20) Ande 1918, ohto andal phrala responsabilo sas-le condamnime pe neciacimaste hai fiesavo primisardea but bărșa ando phandaimos. Le mai but manușa pachiaie că, i buchi cadale creștinenghi machle sas-li ‘mudardi’, adică așiadi. (Rev. 11:3, 7-11) Tha co începuto le bărșesco 1919, cadal phrala machle sas-le mechle avri anda o phandaimos hai pala codoia le doșa cai sas-le andine contra lenghe, sas-le chosle. Le phrala astarde sigo te cheren pale penghi buchi, i lucrarea de predicare. Tha le atacuri le Satanosche contra o poporo le Devlesco ci așile po than. De atunci, vo cherel te șiorel-pe „iech bari len” de persecuții contra o poporo le Devlesco. (Rev. 12:15) Anda codoia, sea le slujitori le Iehovasche „trebun te așen zurale ando pachiamos hai te na mechen-pe”. (Rev. 13:10) w22.05 5, 6 ¶14-16

Andi viziunea, o apostolo Ioan dichel dui grupuri cai alosarde te așen pașa i suveranitatea le Iehovaschi hai cai va primina viața veșnico. Ando iechto grupo si 144 000 jene. Von sile line pa i phuv caște cheren iech guverno, sau iech Regato, ando cerii, pașa o Isus. Cadala va raina opral i phuv ande iech than leia. (Rev. 5:9, 10; 14:3, 4) Andi viziunea, o Ioan dichel-le că beșen le Isusoia po plain cerisco Sion. (Rev. 14:1) Ando timpo so nachlea, mii manușa sas-le alosarde te cheren partea anda codola 144 000. (Luca 12:32; Rom. 8:17) Cu sea cadala, caring o Ioan si phendo că, ando timpo le sfârșitosco, numai iech număro țâno anda cadala, va avena andi viața pi phuv. Pala codoia, ca iech anumime timpo ando baro necazo, cadala va jiana co cerii, pașa le creștini machle cai phandade deja loialo penghi cursa pi phuv, hai cadea o număro 144 000 va arăsăla te avel completo. Von va raina sar regi pașa o Isus ando Regato le Devlesco. (Mat. 24:31; Rev. 5:9, 10) w22.05 15, 16 ¶4, 5

O Isus sicadea pesche continuatoren te dichen-pe ande iech modo echilibrime. Iech data, o Isus phendea lenghe: „Le bala anda tumaro șăro sile sea înghine”. (Mat. 10:30) Catar hachiaras că amaro Dad silo zurales interesime amendar, că sam zurales cuci ande lesche iacha. Dacă poiechdata dichas-ame sar cana ci sam lașe chancesche, cadal cuvintea va zuriarena-ame but. Ci camas te phenas niciechdata că o Iehova ci gândil anda amende sar trebul, hai te pachias că ci sam demno te avas lesche slujitori sau te primisaras o daro la viațaco veșnico. Cam acana 15 bărșa, ande O Turno de veghe samas zuriarde te dichas amen ande iech modo echilibrime: „Si ciaces, ci camas te pachias prea but anda amende, hai cadea te arăsas te avas phuchiarde barimastar; tha nici na camas te peras ando athaimos te pachias că ci sam lașe chancesche. Trebul te dichas amen cadea sar sam ciaces, hai te încăras conto catar le buchia cai jianas te cheras-le mișto, hai vi catar amare defectea”. w22.05 24, 25 ¶14-16

Caște încăras i congregația unime, fiesavo anda amende trebul te rodel i pacea. (Mat. 5:9; Rom. 12:18) De fiesavi data cana cheras o iechto paso caște avas andi pacea varecaia andai congregația, amen cheras vi mai șucar amaro paradiso spiritualo. Te na bâstras că fiesavo manuș cai silo ande cado paradiso sas-lo țârdino le Iehovastar ca i închinarea uji. (Ioan 6:44) So bucurime silo o Iehova cana dichel că das amari zor te avel pacea hai unitatea mașcar lesche slujitori, cai sile lesche zurales cuci! (Is. 26:3; Hag. 2:7) Sar daisaras te țârdas sea mai but miștimata anda le but lașe buchia cai o Iehova del-len pesche slujitorenghe aghies? Daisaras te gândisaras-ame mișto ca so sichioas anda o Cuvânto le Devlesco. Cana studiisaras hai gândisaras-ame ca so citisardeam, cadaia va ajutila-ame te avas manușa mai lașe hai va cherela-ame te sicavas „iubirea phralicani” hai „afecțiunea tandro iech caring aver”. (Rom. 12:10) w22.11 12, 13 ¶16-18

Cana hachiaras că o Iehova iertisardea-ame, traisaras „timpuri cai zuriaren”, adică si amen pacea andi goghi hai iech conștiința uji. Cadai iertarea ci daștil te avel catar le manușa, tha numai „le Iehovastar”. (Fap. 3:19) Cana iertil-ame, vo dichel-ame pale sar lesche amala. Si sar cana, ande lesche iacha, ci păcătuisardeam niciechdata. Iech data so o Iehova iertisardea-ame, vo ci mai doșarel-ame niciechdata hai nici ci mai pedepsil-ame anda o păcato cai cărdeam-les. (Is. 43:25) O Iehova duriarel cadichi de but amare doșa amendar, sar si „de dur o than catar înclel o cham le thanestar cai perel”. (Ps. 103:12) Cana gândisaras-ame chichi de bari si i iertarea le Iehovaschi, amaro ilo bariol hai silo pherdo recunoștința anda amaro lașio Del, casche trebul te sicavas vi mai but pachiv. (Ps. 130:4) Cana o Iehova alosarel te iertil, vo ci dichel chichi de baro si o păcato. O Iehova folosisarel pesco prinjianimos sar Creatorii, sar Codo cai del-ame legi hai sar Judecătorii caște dichel dacă te iertil sau nici varecas. w22.06 5 ¶12-14

O Iehova dea iech șucar speranța sea codolenghe cai iubin-les. Na pa but timpo, vo va chosela i duch, o nasfalimos hai o merimos. (Rev. 21:3, 4) Sa cadea, vo va ajutila ‘codolen umili’ cai sperin ande leste te cheren pale i phuv iech paradiso. (Ps. 37:9-11) Vo va cherela posibilo anda fiesavo anda amende te avel amen iech amalimos chidino leia, chiar vi mai chidino sar codo cai si amen aghies. So bari hai șucar speranța! Tha sostar daisaras te pachias că le promisiuni le Devlesche va pherena-pe? O Iehova ci bâstrel niciechdata pesche promisiuni hai cherel sea o timpo so phenel. Anda codoia, daisaras ‘te sperisaras ando Iehova’. (Ps. 27:14) Sicavas că cheras cadaia cana ajucăras pherde răbdarea hai bucuria ca vo te pherel pesco scopo. (Is. 55:10, 11) Te așias loialo amare Dadesche cerisco hai te pachias zurales că vo va anela but miștimata codolenghe cai „roden-les anda sasto ilo”. w22.06 20 ¶1; 25 ¶18

Sar jene cai cheras partea anda o chăr le Devlesco, daisaras te pachias zurales că o Iehova, cai si o Șăro cadala familiaco, va încărela o principio anda 1 Timotei 5:8, cai chiar vo lea sama te avel scriime andi Biblia. Cana va avela te hachiaras ande amaro ilo că o Iehova iubil amen hai le jenen ande amari familia, daisaras te pachias că va avena-ame le buchia cai trebun-ame caște traisaras. (Mat. 6:31-33) O Iehova camel te lel sama amendar hai cherel cadai buchi anda sea o ilo hai pherdo generozitatea! Cana cărdea i phuv, o Iehova dea-ame na numai le buchia caște daisaras te traisaras. Ande leschi bari iubirea, vo pherdea i phuv bute buchianța cai anen amenghe iech bari bucuria. (Gen. 2:9) Chiar cana poiechdata si amen numai chiar so trebul-ame, trebul te avas recunoscători anda so si amen. Cadaia sicavel că o Iehova ci mechlea-ame hai că încărdea peschi promisiunea te del-ame so trebul amenghe. (Mat. 6:11) Te na bâstras niciechdata că orisavo hasarimos materialo cai si amen acana si iech chanci pașa le bare miștimata cai o Iehova va dela-le amenghe aghies, hai vi ando viitorii. (Is. 65:21, 22) w22.06 15 ¶7, 8

Na numai codola neve ando ciacimos trebun te prinjianen mai mișto le Iehovas hai le bare sicaimata anda o Cuvânto le Devlesco. Savore trebul te cheras cadaia. O apostolo Pavel scriisardea că, atunci cana cheras so sichileam andai Biblia, daisaras ‘te jianas so si mișto hai so si nasul’. Anda codoia că aghies le manușa sile mai rimosarde moralo sar niciechdata, daștil te avel amenghe pharo te cheras so phenel amenghe o Del. Tha o Isus lel sama pe amende hai zuriarel amaro pachiamos prin o sicaimos cai del-les amenghe caște daisaras te așias loialo. Cado haben spiritualo, bazol-pe po Cuvânto inspirime le Devlesco, i Biblia. Cadea sar o Isus, amen sicavas pachiv caring o anav le Devlesco. (Ioan 17:6, 26) Sar exemplo, anda 1931, amen leam o anav biblico „Le Martori le Iehovasche”. Prin cadaia sicavas chichi de cuci si anda amende o anav le Devlesco hai o amalimos chidino amare Dadeia cerisco. (Is. 43:10-12) Mai but, i Biblia – Traducerea lumii noi șiutea parpale o anav le Devlesco ando than cai trebulas. w22.07 11 ¶11, 12

Andi Biblia arachas vi o ciacimos anda i vestea lași anda o Regato le Devlesco. O Isus phendea că o ciacimos anda o Regato si sar iech comoara garadi. Ando Matei 13:44, vo phendea: „O Regato le cerosco si sar iech comoara garadi po câmpo. Iech manuș arachlea-la hai garadea-la, hai pala codoia, pherdo bucuria, gălea hai bichindea sea so sas-les hai lea pe lovende codo câmpo”. Dichas că o manuș ci rodelas codoi comoara. Tha, pala so arachlea-la, cărdea sea so daisardea caște avel leschi. Vo chiar bichindea sea so sas-les. Sostar? Anda codoia că jianelas că sas iech comoara zurales cuci. Daisaras te pachias că da. Jianas că chanci anda cadai lumea ci daștil te avel mai cuci sar i bucuria cai pherel amaro ilo cana slujisaras le Iehovasche hai cana hachiaras că si amen iech ciaci speranța anda o viitorii, te traisaras veșnico tela o raimos lesche Regatosco. O amalimos chidino le Iehovaia si iech privilegio anda savo meritil te hasaras oriso. Amari mai bari bucuria si codoia te avas „cuci ande lesche iacha cu sea”. (Col. 1:10) w22.08 15 ¶8, 9; 17 ¶12

Catar jianglea o Iosif că o Del dichelas o adultero sar „iech nasul cadea de baro”? I porunca: „Te na cheres adultero”, anda i Legea mozaico, avelas te avel dini numai pala 200 bărșa. (Ex. 20:14) Cu sea cadala, o Iosif prinjianelas cadea de mișto le Iehovas, că hachiardea sar dichelas vo o phiraimos imoralo. Si ciaces că o Iosif jianelas că, andel iacha le Iehovasche, i căsătoria trebulas te avel iech phanglimos mașcar iech corcoro murș hai iech corcori jiuvli. Sa cadea, daștil-pe că așundea sar o Iehova cărdea vareso ande dui ocazii caște feril i pachiv lesca barea phureachi i Sara cana sas-li pașă te avel violime. (Gen. 2:24; 12:14-20; 20:2-7) O Iosif gândisardea-pe cadale buchiande, hai cadea daisardea te hachiarel so sas mișto hai so sas nasul andel iacha le Devlesche. Anda codoia că iubilas le Iehovas, o Iosif iubilas vi lesche norme anda ortomos hai sas-lo hotărâme te încărel-len. w22.08 26 ¶1, 2

I profeția anda Daniel 12:2 ci del duma anda iech jiuvindimos simbolico, sau că ande le ghiesa de palal le slujitori le Devlesche va avena zuriarde spiritualo, cadea sar pachiaiam mai anglal. Ando than, cadal cuvintea den duma anda iech jiuvindimos ciacio, cai va avela andi lumea nevi. Sostar daisaras te phenas cadaia? O cuvânto „phuv” arachel-pe vi ando verseto anda Iov 17:16, sar iech echivalento anda o cuvânto „mormânto”. Cadea că hachiaras că i profeția anda Daniel 12:2 del duma anda iech jiuvindimos ciacio, cai va avela pala so va phandavena-pe le ghiesa de palal hai pala o Armaghedono. Cu sea cadala, ando Daniel 12:2 phenel-pe că va avena ‘chichiva cai va avena jiuvindime anda viața veșnico’. So însemnol cadaia? Codola cai va avena uștiade andal mule hai va prinjianena sau va dena penghi zor te prinjianen mai dur le Iehovas hai le Isusos hai va așunena lendar ande le 1 000 bărș va primina ji la urmă viața veșnico. (Ioan 17:3) w22.09 21 ¶6, 7

Cadaia ci însemnol că o Iehova ajucărel amendar te avel amen iech pachiamos coro ande le coaver; mai but, vo ajucărel-pe amendar te pachias-ame ande lende anda codoia că sicade că sile demno pachiamasche. Caște daisaras te pachias-ame ande amare phrala, trebul te prinjianas-len mai mișto, hai anda cadaia trebul te nachel mai but timpo. Cadea că, te das amari zor te das duma lența angla hai pala întrunirea, te jias lența andi predicarea, te avel amen răbdarea lența hai te mechas-len te sicaven amenghe că sile demno pachiamasche. Mai anglal, daștil-pe că ci va avela te phenes sea so si ande chio ilo varecasche cas atunci prinjiandean. Tha, ando timpo so va avena amala sea mai lașe, va daștia te pâtres chio ilo hai te des duma anda so duchal-tu. (Luca 16:10) Tha so va avela te cheres dacă iech phral phiravel-pe cadea că cherel-tu te na mai pachias-tu ande leste? Na sighiar te șines o phanglimos leia. Mai mișto avelas te ajucăres te nachel iech țâra timpo. Na mech ca le buchia cai cheren-len le coaver te cheren-tu te na mai pachias-tu ande che phrala. w22.09 4 ¶7, 8

Iech phuro de congregație po anav Miqueas anel pesche andi goghi că, iechdata, simțosardea că chichiva phrala cai sas-len responsabilități andi organizația phirade-pe bilașimasco caring leste. Cu sea cadala, vo așilea lucido hai dea peschi zor te încărel parpale pesche sentimentea. Manghlea-pe butivar le Iehovasche te del-les spirito sfânto hai zuralimos caște daștil te nachel părdal cado pharimos. So sichioas catar cado phral? Cana simțosaras că le coaver phiraven-pe nasul amența, si zurales importanto te na holiaras-ame hai te na mechas-ame îngărde catar le sentimentea nasul. Anda codoia că, daștil-pe că ci prinjianas sea le buchia cai îngărde ieche jenes te del duma sau te phiravel-pe ande iech anumime felo, o mai mișto si te pâtras amaro ilo angla o Iehova hai te mangas-les te ajutil-ame te dichas le buchia cadea sar dichel-le vo. Cadaia daștil te ajutil-ame te dichas că o phral ci camlea te duchavel-ame hai te nachas părdal o nasulimos cai sas amenghe cărdo. (Prov. 19:11) Te na bâstras că o Iehova prinjianel mișto amari situația hai va dela-ame o zuralimos cai trebul amenghe. (Ecl. 5:8) w22.11 21 ¶5

Alosar tuche amala cai iubin le Iehovas. Le amala cai alosares-len tuche daștin te ajutin-tu te barios spiritualo hai te aves iech lașio creștino. (Prov. 13:20.) O Julien, cai aghies silo phuro de congregație hai slujil co Betelo, anel ande peschi goghi: „Cana somas mai tărno, cărdem manghe lașe amala cana gălem ande iech than lența andi predicarea. Von predichinas pherde zelo hai ajutisarde vi man te dichav chichi de șucar daștil te avel i predicarea. Anda codoia că alosardem manghe amala numai mașcar le tărne cai sas-le ande iech bărș manța, hachiardem că hasardem i ocazia te aven-ma vi aver șucar amalimata. Tha, dacă des chi sama că o amalimos ieche jeneia andai congregația daștilas te rimosarel chio amalimos le Iehovaia? O Pavel jianelas că chichiva creștini anda o iechto secolo ci sas-le cadea de zurale spiritualo. Anda codoia, phendea le Timoteiosche te lel sama hai te așel dur lendar. (2 Tim. 2:20-22.) Amen deam sea amari zor caște pașioas le Iehovastar hai amaro amalimos leia si zurales cuci anda amende. Cadea că, ci trebulas te mechas chanicas te covliarel cado phanglimos cai si mașcar amende hai amaro Dad cerisco. w22.08 5, 6 ¶13-15

Amen ci sam sar codola cai urân le sfaturi cai aven catar o Del. Mai but, amen sichioas te iubisaras o modo sar gândil o Del hai iubisaras vi sea lesche legi moralo. Cadai iubirea bariol sea mai but cana dichas so miștimata si amen cana încăras cadal norme hai so întâmplol-pe cana ci încărel-pe conto lendar. Das amari sama so but pharimata cheren penghe le manușa anda codoia că sile bi goghiaco hai ci camen le sfaturi goghiaver le Iehovasche. Pala codoia, te gândisaras-ame că amari viața si but mai lași hai șucar anda codoia că așunas le Devlestar. (Ps. 32:8, 10) O Iehova camel te del pesco goghiaverimos savorenghe, tha ci oblighil chanicas te lel-les. Cu sea cadala, vo phenel so întâmplol-pe codolența cai alosaren te na așunen catar lesco goghiaverimos: „Cadala va trebuna te suportin sea so va avela pala lengo phiraimos”. (Prov. 1:29-32) Ando timpo, lengo modo viațaco va anela lenghe na numai pharimata hai duch, tha, ji la jurmă, cadaia va anela lenghe vi i distrugerea. Tha codola cai așunen catar le sfaturi goghiaver le Iehovasche hai cheren so phenel-pe ande lende va dichena sar va pherela-pe i promisiunea: „Con așunel mandar va beșela andi siguranța hai ci va darala catar niciech nasulimos”. (Prov. 1:33) w22.10 21 ¶11-13

Cana daras le Iehovastar, sicavas lesche iech pachiv cadea de bari, că încăras-ame parpale te cheras vareso cai daștilas te avel nasul ande lesche iacha. (Prov. 16:6) Cadea că, amen cheras sea so daisaras caște încăras le norme le Devlesche anda so si mișto hai so si nasul, cai vo sicadea-len amenghe andi Biblia. (2 Cor. 7:1) Dacă va avela te cheras so si cuci andel iacha le Iehovasche hai va avela te duriaras amendar le buchia cai urâl-len, va avaia fericime. (Ps. 37:27; 97:10; Rom. 12:9) Ci arăsăl ca iech manuș te jianel că le Iehovas siles o drepto te phenel so si mișto hai so si nasul anda leste, vo trebul vi te alosarel te încărel ca le norme le Devlesche. (Rom. 12:2) O phiraimos cai si amen sicavel că, anda amende, o fapto te încăras ca le norme le Iehovasche si o mai lașio modo viațaco. (Prov. 12:28) Vi o David pachiaia zurales cado ciacimos hai, anda codoia, phendea anda o Iehova: „Cheres manghe prinjiandi i rig la viațachi. Cai san tu si bari bucuria, ca chiri ciaci si fericirea veșnico”. (Ps. 16:11) w22.10 8 ¶9, 10

O Isus dichlea-pe sea o timpo ande iech modo echilibrime hai sas-lo umilo. Ando timpo cana sas-lo ando cerii, o Isus cărdea bare buchia ando servicio le Iehovasco. „Prin leste sas cărde sea le coaver buchia andal ceruri hai pa i phuv.” (Col. 1:16) Cana boldea-pe, daștil-pe că o Isus andea pesche amintea, le buchia cai cărdea-le ande iech than pesche Dadeia. (Mat. 3:16; Ioan 17:5) Cu sea cadala, so andea pesche amintea ci cărdea-les te avel baricano. Vo ci pachiaia niciechdata că silo mai baro sar le coaver. Vo phendea le discipolenghe că ci avilea pi phuv „caște slujil-pe lesche, tha te slujil hai te del peschi viața sar răscumpărarea anda butende”. (Mat. 20:28) Mai but, vo phendea pherdo modestia că ci daștilas te cherel chanci corcoro. Cadea că, o Isus si iech baro exemplo cai sicadea umilința. w22.05 24 ¶13

O Iehova jianel dacă codo cai păcătuisardea jianglea că so cherel si nasul hai încărel conto cadala buchiatar cana alosarel te iertil. O Isus sicadea cadaia claro, ando Luca 12:47, 48. Cana varecas siles iech plano te cherel vareso nasul – hai jianel mișto că si iech buchi melali andel iacha le Iehovasche – cherel-pe doșalo anda iech baro păcato. O Iehova daștilas te alosarel te na iertil ieche jenes cai cherel cadaia. (Mar. 3:29; Ioan 9:41) Mai si vroiech speranța ande iech situația sar cadaia? Da! Iech aver buchi cai dichela o Iehova cana alosarel te iertil sau nici, si dacă o manuș cai păcătuisardea căil-pe ciaces. Iech manuș sicavel căința cana „ujiarel peschi goghi catar le buchia melale, paruvel pesco phiraimos sau paruvel so camel te cherel”. Sa cadea, ieche manușes cai căil-pe, fal-les zurales nasul anda le buchia cai cărdea-len sau fal-les nasul că ci cărdea le lașe buchia cai trebulas te cherel-len. Iech manuș cai căil-pe silo duchado na numai anda codoia că cărdea-pe doșalo anda buchia nasul, tha vi anda codoia că lesco amalimos le Iehovaia ci mai sas-lo cadea de zuralo hai îngărdea-les te cherel cado păcato. w22.06 5, 6 ¶15-17

Amare dușmani phenen hohaimata anda le phrala cai sile angla amende andi organizația le Iehovaschi. (Ps. 31:13) Chichiva anda cadala sas-le phandade hai doșarde pe neciacimaste că cărde buchia nasul. Prin iech situația sar cadaia nachle vi le creștini anda o iechto secolo. Cana o apostolo Pavel sas-lo phandado hai doșardo pe neciacimaste andi i Roma, chichiva phrala mechle-les. (2 Tim. 1:8, 15; 2:8, 9) Gândin tumen so sas ande lesco ilo. Vo nachlea prin but pharimata hai chiar sas-lo gata te merel anda lende. (Fap. 20:18-21; 2 Cor. 1:8) Amen ci camas te avas sar codola cai mechle le Pavelos! Cadea că, amen daisaras te ajucăras-ame ca o Satan te atachil le phralen cai sile angla amende. Vo camel te cherel-le te na așen loialo le Iehovasche hai te daraven-ame. (1 Pet. 5:8) Te așias mai dur loialo pașa amare phrala. (2 Tim. 1:16-18) w22.11 16, 17 ¶8-11

Pala so fal-pe, o manuș nasul cai căisardea-pe hai sas-lo șiuto po stâlpo pașa o Isus sas-lo evreo. Le evrei anenas închinarea ieche corcore Devlesche, tha le manușa andal națiuni pachianas ande mai but devla. (Ex. 20:2, 3; 1 Cor. 8:5, 6) Dacă cado manuș nasul avileas andal națiuni, o pușimos anda o texto de aghies trebulas te avel vareso sar cadaia: „Ci daras niciech țâra le devlendar?”. Mai but, o Isus sas-lo bișialdo na ca le manușa andal națiuni, tha „ca le bacrea hasarde anda o chăr le Israelosco”. (Mat. 15:24) O Del sicadea le israelițenghe că vo avelas te uștiavel pale viațate codolen mule. Daștil-pe că cado manuș nasul cai căisardea-pe prinjianelas cado sicaimos anda o jiuvindimos. Cadea că vo hachiardea că o Iehova avelas te jiuvindil le Isusos caște rail ande Lesco Regato. Anda so fal-pe, cadale murșes sas-les i speranța că o Del avelas te uștiavel vi les andal mule. Sar evreo, o manuș nasul cai căisardea-pe trebulas te jianel anda o Adam hai i Eva, hai anda o Paradiso cai o Iehova cărdea-les anda lende. Cadea că, vo daisardea te hachiarel că o Paradiso anda savo dea duma o Isus avelas te avel iech șucar bar cade, pi phuv. (Gen. 2:15) w22.12 8, 9 ¶2, 3

Amen daisaras te cheras amari buchi andi predicarea numai le ajutoroia le spiritosco sfânto. Sostar? Anda codoia că o Satan îngărel iech războio amența hai camel te cherel-ame te na mai predichisaras. (Rev. 12:17) Dacă dichas prin le iacha le manușenghe fal-pe că o Satan silo but mai zuralo sar amen hai că ci daisaras te așias lesche contra. Tha, prin i predicarea, amen maras-les. (Rev. 12:9-11) Sar? Cheras cadaia cana ci mechas-ame darade lestar. De fiesavi data cana predichisaras, o Satan silo perado. Cadaia sicavel că o Iehova del-ame zuralimos prin pesco spirito sfânto hai sam cuci ande lesche iacha. (Mat. 5:10-12; 1 Pet. 4:14) O spirito le Devlesco daștil te del-ame o zuralimos cai trebul amenghe caște nachas părdal orisavo pharimos cai si amen andi predicarea. (2 Cor. 4:7-9) Tha so daisaras te cheras caște avel amenghe dino o spirito sfânto? Trebul te mangas-les sea o timpo le Iehovastar hai te pachias zurales că o Iehova așunel amare manglimata. w22.11 5 ¶10, 11

Daisaras te sicavas amari iubirea caring amare phrala hai pheia cana cheras sea so daisaras caște așias andi pacea lența. Camas te das amari zor te iertisaras cadea sar o Iehova. Dacă o Iehova sas-lo gata te mechel pesche Șiaves te merel anda amare păcatea, ci trebulas te avas vi amen gata te iertisaras le phralen hai pheian cana păcătuin contra amenghe? Ci camas te avas sar o sclavo nasul anda savo dea duma o Isus ande iech anda lesche parabole. Chiar cana lesco stăpâno choslea lesco baro camimos, codo sclavo ci camlea te chosel o camimos but mai țâno ieche avere sclavosco. (Mat. 18:23-35) Dacă vi tut sas tut iech nehachiarimos varecasa andai congregația, daștias te cheres tu o iechto paso caște aves andi pacea codole jeneia angla so te jias ca i Comemorarea? (Mat. 5:23, 24) Cana cheres cadea sicaves chi bari iubirea anda o Iehova hai anda o Isus. w23.01 29 ¶8, 9

Daisaras te jianas so si nevoia le phralen hai le pheian, cana șion lenghe pușimata cai ci cheren-len te avel lenghe lajiav. (Prov. 20:5) Trebul lenghe haben, draba sau aver buchia? Sile pașă te hasaren penghi buchi sau pengo chăr? Trebun te aven ajutime caște primin o ajutorii dino catar o stato? O Iehova acharel fiesaves anda amende te zuriaras hai te ajutisaras averen. (Gal. 6:10) Chiar cana daisaras te cheras numai vareso țâno anda varecaste nasfalo, cadaia daștil te zuriarel-les but. Iech șiavorro daștilas te bișialel iech lil sau daștilas te cherel iech șucar deseno caște zuriarel ieche phrales. Iech tărno daștilas te chinel haben sau te pochinel le facturi anda iech phei. Aver jene andai congregația daștinas te cheren haben anda varecon nasfalo. Chichiva phrala bișialde dumes andai mulțumirea le phurenghe, saven silen but buchia te cheren cana astarel iech baro nasfalimos. Savore camas te cheras amari partea caște ‘zuriaras-ame vi mai dur iech averes hai te vazdas-ame iech averes’. (1 Tes. 5:11) w22.12 22 ¶2; 23 ¶5, 6

Le saduchei prinjianenas mișto le dintune panji lila andal Scripturi ebraico, tha von nachle părdal chichiva bare ciacimata cai sas-le phende code. Te dichas so phendea o Isus caring le saduchei cana von șiute lesche iech pușimos anda o jiuvindimos. Vo pușlea-len: „Ci citisardean ando lil le Moisesco, anda i relatarea anda i tufa anda canră, că o Del phendea lesche: «Me som o Del le Avraamosco, o Del le Isaacosco hai o Del le Iacobosco»?” (Mar. 12:18, 26) Si ciaces, le saduchei citisarde butivar cado pasajo, tha o pușimos le Isusosco sicadea că von nachle părdal iech baro ciacimos andal Scripturi: o jiuvindimos. (Luca 20:38) So sichioas catar? Cana citisaras, si importanto te rodas te dichas so daisaras te sichioas amen anda iech verseto sau anda iech relatarea biblico. Amen ci camas te hachiaras numai le sicaimata de bază, tha vi le cuci garade ciacimata anda o Cuvânto le Devlesco. w23.02 11 ¶9, 10

Chiar cana sea le martori anda save del duma o texto de aghies nachle prin phare zumaimata ande lenghi viața, von sas-le prinjiande angla o Iehova sar manușa pherde pachiamos. (Evr. 11:36-40) Sas o fapto că ci mechle-pe hai dine sea penghi zor te așen zurale ando pachiamos de ivea? Nici. Chiar cana ci dichle sar pheren-pe sea le promisiuni le Iehovasche, von sperisarde mai dur ande leste. Von daisarde te pachian că sile cuci andel iacha le Iehovasche hai că avelas te dichen ando viitorii sar pheren-pe sea lesche promisiuni. (Evr. 11:4, 5) Cana gândisaras-ame ca lengo exemplo, sam vi mai hotărâme te sperisaras ando Iehova. Aghies, i lumea ande savi traisaras cărdiol sea mai nasul. (2 Tim. 3:13) O Satan șiol vi mai dur co zumaimos le jenen anda o poporo le Devlesco. Sam hotărâme ca, prin orisave zumaimata va avela te nachas, te slujisaras pherde zelo le Iehovasche hai pherde pachiamos că „șiuteam amari speranța ande iech Del jiuvindo”. (1 Tim. 4:10) w22.06 25 ¶17, 18

Camas te las sama pe amaro sastimos caște slujisaras le Iehovasche pherde zuralimos. (Mar. 12:30) Cadea că duriaras amendar le buchia cai jianas că daștin te rimosaren amaro sastimos. (Rom. 12:1) Si ciaces, orichichi de but las sama pe amaro sastimos, ci daisaras te phenas că niciechdata ci va avela te peras nasfale. Cu sea cadala, cheras sea so încărel amendar caște sicavas amare Dadesche cerisco că dichas cuci i viața, o șucar daro cai vo dea-les amenghe. Daștil-pe că, o nasfalimos sau o phurimos, ci mai mechen-ame te cheras cadea de but sar mai anglal. Cadaia daștil te cherel-ame te simțosaras-ame duchade hai perade. Cu sea cadala, trebul te las sama mai dur pe amaro sastimos. Sostar? Anda codoia că, vi dacă sam nasfale sau phurileam, daisaras te așiaras mai dur le Iehovas, cadea sar cărdea vi o rege David. Zuriarel-ame but te jianas că sam cuci andel iacha le Iehovasche, vi cana sam nasfale sau phure! (Mat. 10:29-31) Hai vi dacă va avela te meras, le Iehovasche va avela lesche doro amendar hai va anela-ame parpale viațate. (Iov 14:14, 15) Chichi timpo sam andi viața, camas te cheras sea so daisaras caște las sama pe amaro sastimos hai pe amari viața. w23.02 20, 21 ¶3-5

Va așena le anava codolenghe andai bari mulțimea ando lil la viațaco pala so va nachena jiuvinde părdal o Armaghedono? Da. (Rev. 7:14) O Isus phendea anda codola cai sile sar le bacrea că va jiana caring i „viața veșnico”. (Mat. 25:46) Cu sea cadala, codola cai va așena jiuvinde pala o Armaghedono ci va primina po than viața veșnico. Ando Raimos de Iech Mia Bărș, o Isus „va păstorila-le hai va îngărela-le ca le paia la viațache”. Codola cai va lena-pe pala i îndrumarea le Cristososchi hai va sicavena că sile loialo caring o Iehova ji co sfârșito, lenghe anava va avena scriime anda sea o timpo ando lil la viațaco. (Rev. 7:16, 17) Tha le buznea va avena distrugime co Armaghedono. O Isus phendea că von „va jiana co merimos veșnico”. (Mat. 25:46) Tela inspirația le Devlestar, o Pavel phendea că „va avela-le i pedeapsa la crisachi anda i distrugerea veșnico”. (2 Tes. 1:9; 2 Pet. 2:9) w22.09 16 ¶7, 8

Cana le familii beșen ande iech than andi natura, simțon-pe sea mai mișto, prinjanen-pe hai zuriaren-pe iech averes. O Iehova cărdea but șucar thana pi phuv ande save daisaras te cheras buchia cai cheren-ame fericime. But familii beșen ande iech than andi natura, ando gav, co plain sau ca i marea. Andi lumea nevi, le dada hai le șiave va daștina te bucurin-pe cu sea catar so cărdea o Iehova. Atunci ci va mai avena amenghe sostar te daras catar le animalea hai nici le animalea ci va mai darana amendar. (Is. 11:6-9) Va avela amen sea o timpo caște bucurisaras-ame catar i creația le Iehovaschi. (Ps. 22:26) Tha le dada ci trebun te ajucăren ji atunci caște ajutin penghe șiaven te dichen cuci i creația. Cana folosin i creația caște sicaven tumare șiaven anda o Iehova, daștil-pe că vi von va phenena sar o rege David: „O, Iehova, ci si buchia cadea sar chire”.(Ps. 86:8) w23.03 25 ¶16, 17