Sar te așes mai dur pașa o Iehova cana aver phiraven-pe tusa nasul chiar cana ci san doșalo?

1, 2. Sostar aver phiraven-pe nasul amența chiar cana ci sam doșale?

ANDE iech paramici, o Isus dea duma anda iech phivli cai jialas sea o timpo ca iech judecătoro caște cherel lache ciacimos. Le discipoli le Isusosche hachiarenas mișto prin so nachelas i jiuvli andai paramici anda codoia că, ande codol ghiesa, aver phiravenas-pe nasul bute manușența. (Luca 18:1-5) Vi amen daisaras te hachiaras so sas ando ilo la jiuvliaco andai paramici anda codoia că vi amen nachleam prin cadaia.

² Aghies, bute manușen anda cadai lumea silen gânduri nasul caring aver, ci sicaven lașimos hai cheren buchia nasul. Cadea că ajucăras amen averendar te phiraven-pe nasul amența chiar cana ci sam doșale. (Ecl. 5:8) Tha sam vi mai perade cana iech phral sau iech phei phiravel-pe amența nasul. O ciacimos si că von ci camen te cheren amenghe nasulimos, cadea sar cheren codola cai așen amenghe contra. Von sile numai manușa cai, poiechdata, cheren doșa. Daisaras te sichioas but buchia dacă dichas so cărdea o Isus cana codola cai așenas lesche contra phirade-pe nasul lesa chiar cana vo ci sas-lo doșalo. Dacă si amen răbdarea codolența cai phiraven-pe amența nasul hai așen amenghe contra, trebulas te avel amen mai but răbdarea amare phralența hai pheianța! Tha, so si ando ilo le Iehovasco cana dichel că aver manușa, andai congregația sau avreal i congregația, phiraven-pe nasul amența? Duchal-les amendar?

3. Cathar jianas că le Iehovas duchal-les amendar cana dichel că aver phiraven-pe nasul amența?

³ Le Iehovas duchal-les but cana dichel că aver phiraven-pe nasul amența. Vo „iubil o ortomos”. (Ps. 37:28) O Isus phendea că, co mai lașio timpo, o Iehova ‘va cherela ortomos sigo’. (Luca 18:7, 8) Hai, na pa but timpo, vo va chosela sea so cherel amen te avas duchade hai ci va mai mechela chanicas te phiravel-pe nasul amența. (Ps. 72:1, 2)

4. Sar ajutil amen o Iehova aghies?

⁴ Ji cana o Iehova va cherela ortomos, vo ajutil amen te jianas so te cheras cana aver phiraven-pe nasul amența chiar cana ci sam doșale. (2 Pet. 3:13) Sar avelas, vo sicavel amen so te cheras cana aver phiraven-pe nasul amența caște na avel amen mai but pharimata. Vo mechlea amenghe o exemplo pesche Șiavesco, caște sicavel amen so daisaras te cheras cana aver phiraven-pe nasul amența. Hai, andi Biblia, mechlea amenghe lașe sfaturi caște jianas so te cheras cana nachas prin cadaia.

LE SAMA SO CHERES CANA AVER PHIRAVEN-PE NASUL TUSA CHIAR CANA CI SAN DOȘALO

5. Sostar trebulas te las sama so cheras cana aver phiraven-pe nasul amența bi te avas doșale?

⁵ Cana varecon phiravel-pe nasul amența bi te avas doșale daștil te duchavel amen but sau te arăsas te na mai avel amen pacea ando ilo. (Ecl. 7:7) Manușa cai slujisarde fidelo le Iehovasche, sar sas o Iov hai o Habacuc, nachle prin cado pharimos. (Iov 6:2, 3; Hab. 1:1-3) Chiar cana si normalo te simțosaras cadea, trebul te las sama sar phiravas amen, caște na arăsas te cheras iech dilimos.

6. So sichioas anda so cărdea o Absalom? (Dich vi i imaginea.)

⁶ Cana varecon phiravel-pe nasul amența sau varecasa cai si drago amenghe, daștil-pe că camas te pochinas lesche parpale. Tha, cana cheras cadaia, daștin te aven amen mai but pharimata. Te dichas so cărdea o șiav le regesco David, o Absalom. Vo sas-lo holiardo cana lengo phral maștevo, o Amnon, sutea la Tamarasa chiar cana voi ci camlea cadai buchi. Pala i Legea mozaico, o Amnon trebulas te merel. (Lev. 20:17) Ci sas nasul că o Absalom sas-lo holiardo. Tha sas nasul că cărdea pesche corcoro ortomos hai mudardea le Amnonos. (2 Sam. 13:20-23, 28, 29)

7. Sar simțosardea-pe o psalmisto cana dichlea că aver phiraven-pe nasul?

⁷ Cana fal-pe amenghe că le manușa cai phiraven-pe nasul na-i le ortosarde, daștil-pe că astaras te gândisaras dacă si amen vroiech miștimos cana amen cheras so si mișto. Codo cai scriisardea o Psalmo 73 dichlea că le manușa nasul îngăren-la mișto, chiar cana von phiravenas-pe jiungales codolența lașe. Vo chiar phendea: „Cadala sile codola nasul, len na-i len niciech pharimos”. (Ps. 73:12) Vo sas-lo cadea de holiardo anda codoia că aver ci phiravenas-pe ortomasa, că sas-lo pașă te na mai pachial că siles vroiech miștimos anda codoia că slujil le ciace Devlesche. Vo phendea: „Cana camlem te hachiarav, ci sas man pacea”. (Ps. 73:14, 16) Vo mai phendea: „Somas pașă ca mânro pânro te na mai phirel po ciacio drom, ci mai sas man but caște perav”. (Ps. 73:2) Iech phral, casche va avela te phenas Alberto, nachlea prin sa codoi buchi.

8. So întâmplosardea-pe ieche phralesa cana aver cărde lesche iech nasulimos bi te avel doșalo?

⁸ O Alberto sas doșardo pe neciacimaste că ciordea andal love la congregațiache. Cadea că vo hasardea o privilegio te slujil sar phuro de congregație hai cana le phrala așunde so cărdea ci mai dine lesche pachiv. Vo anel pesche amintea: „Somas holiardo hai perado”. Vo mechlea ca i holi hai i duch anda lesco ilo te covliarel lesco amalimos le Iehovasa. Cadea că, ci mai gălea ca le întruniri hai andi predicarea panji bărșa. So întâmplosardea-pe cadale phralesa sicavel amenghe so daștil te avel amența dacă ci încăras parpale amari holi cana varecon cherel amenghe iech nasulimos bi te avas doșale.

LE TUT PALA SO CĂRDEA O ISUS CANA AVER PHIRADE-PE NASUL LESA BI TE AVEL DOȘALO

9. Prin so nasulimata nachlea o Isus? (Dich vi le imagini.)

⁹ O Isus sicadea amenghe so te cheras cana aver phiraven-pe nasul amența. But manușa, chiar vi anda leschi familia, phirade-pe nasul lesa chiar cana ci sas-len sostar. Lesche neamuri cai ci pachianas ande leste phenenas lesche că si dilo. Le bare manușa andai changheri doșarenas-les că cherelas buchi le benghența. Hai le soldați romani marde-les, prasade-les hai, ji la urmă, mudarde-les. (Mar. 3:21, 22; 14:55; 15:16-20, 35-37) Cu sea cadala, chiar cana aver phirade-pe nasul lesa, o Isus ci pochindea lenghe parpale niciechdata nasulimasa. So sichioas de cathar?

10. So cărdea o Isus cana aver phirade-pe nasul lesa? (1 Petru 2:21-23)

¹⁰ Citisar 1 Petru 2:21-23.a So cărdea o Isus cana aver phirade-pe nasul lesa si iech exemplo perfecto anda amende. Vo jianglea cana te del duma hai cana te na del duma. (Mat. 26:62-64) O Isus ci phendea parpale de fiesavi data cana varecon phendea iech hohaimos anda leste. (Mat. 11:19) Hai cana alosarelas te del duma, vo ci prasalas hai nici na daravelas codolen cai phiravenas-pe jiungales lesa. O Isus încărdea-pe parpale anda codoia că „mechelas-pe ando vast Codolesco cai judechil orta”. Vo jianglea că so si importanto si sar dichel o Iehova le buchia. Mai but, o Isus pachiaia ciaces că lesco Dad va avela te lașiarel orisavo nasulimos co mai lașio timpo.

11. Sar daisaras te las sama sar das duma? (Dich vi le imagini.)

¹¹ Cana varecon phiravel-pe nasul amența, daisaras te las-amen pala o Isus hai te las sama so phenas. Poiechdata, ci trebul te cheras sau te phenas vareso, anda codoia că ci sas cărdo amenghe iech nasulimos cadea de baro. (Ecl. 3:7; Iac. 1:19, 20) Aver data, daștil-pe că trebulas te das duma, sar avelas, cana dichas că varecon cherel sau phenel buchia nasul aver varecasche sau cana trebul te phenas o ciacimos. (Fap. 6:1, 2) Cana alosaras te das duma, trebul te das amari zor te cheras cadaia pherde lașimos hai pachiv. (1 Pet. 3:15)b

12. Sar daisaras te mechas amen „ando vast Codolesco cai judechil orta”?

¹² Las amen pala o Isus vi cana mechas amen „ando vast Codolesco cai judechil orta”. Cana aver doșaren amen pe neciacimaste sau phiraven-pe nasul amența, ci trebul te bâstras că o Iehova jianel savo si o ciacimos. Cana pachias ciaces cadaia, va avela amenghe mai ușoro te nachas părdal cadal pharimata. Jianas ciaces că, ji la urmă, o Iehova va lașiarela le buchia. Cana mechas le pharimata ando vast le Iehovasco, ci mechas ca ande amaro ilo te cherel pesche than i holi sau te dichas jiungale iachența averen. Tha, dacă ci cheras cadaia, i holi daștilas te ciorel amari bucuria hai te duriarel amen le Iehovastar. (Ps. 37:8)

13. So daștil te ajutil amen te jias mai dur cana aver phiraven-pe nasul amența?

¹³ Trebul te phenas că niciech anda amende ci daștil te lel-pe cu sea pala o Isus. Daștil-pe că va avela te phenas sau te cheras vareso hai, pala codoia, va avela te fal amenghe nasul. (Iac. 3:2) Hai poiechdata, cana aver phiraven-pe nasul amența daștin te mechen amaro ilo duchado sau te cheren amenghe iech nasulimos cai va nachela numai andi nevi lumea. Dacă vi tu naches prin cadaia, pachia ciaces că o Iehova jianel prin so naches. Hai o Isus, daștil te hachiarel so si ande chio ilo anda codoia că vi lesa phirade-pe nasul le manușa. (Evr. 4:15, 16) O Iehova mechlea amenghe o exemplo perfecto le Isusosco, tha vo dea amen vi lașe sfaturi cai daștin te ajutin amen cana sam duchade anda codoia că varecon phiradea-pe nasul amența. Te dichas dui anda cadal sfaturi ando lil caring le Romani.

„MECHEN LE DEVLES TE SICAVEL PESCHI HOLI”

14. Sar daisaras ‘te mechas le Devles te sicavel peschi holi’? (Romani 12:19)

¹⁴ Citisar Romani 12:19. O apostolo Pavel zuriardea le creștinen ‘te mechen le Devles te sicavel peschi holi’. Cheras cadaia cana mechas le Iehovas te lașiarel le buchia cadea sar jianel vo mai mișto hai cana jianel vo mai mișto. Ieche phralesche cai bușiol John sas lesche cărdo iech nasulimos. Vo phenel: „Sas manghe pharo te încărav man parpale te na lașiarav cadea sar jianglem me că si mișto o nasulimos cai sas manghe cărdo. O verseto anda Romani 12:19 ajutisardea man te ajucărav le Iehovas”.

15. Sostar cana nachas prin iech nasulimos, i mai lași buchi cai daisaras te cheras-la si te ajucăras le Iehovas te lașiarel le buchia?

¹⁵ Cana mechas le Iehovas te lașiarel le buchia, si amen numai miștimata. Cadea, ci va avela te maras amaro șăro sau te avas perade cana das amari zor caște lașiaras amen corocore le buchia. O Iehova camel te ajutil amen. Si sar cana phenel amenghe: „Mech cado pharimos ande mânre vasta. Lașiarav me cado nasulimos”. Cana pachias anda amaro ilo că o Iehova va judechila ortomasa codolen cai phiraven-pe nasul amența, ci mai trebul te avas holiarde, anda codoia că jianas că vo va cherela so si mișto. Cadal buchia ajutisarde vi le Johnes, anda savo deam duma mai anglal. Vo phendea: „Cana ajucărav le Iehovas liniștime, jianav că va lașiarela le buchia mai mișto sar daștiv te lașiarav-len me”.

„MAR O NASULIMOS PRIN O MIȘTIMOS”

16, 17. Sar daștil te ajutil amen o manglimos ‘te maras o nasulimos prin o miștimos’? (Romani 12:21)

¹⁶ Citisar Romani 12:21. Iech aver sfato cai o Pavel dea le creștinenghe sas ‘te maren o nasulimos prin o miștimos’. Andi Predica pa o plain, o Isus phendea: „Iubin mai dur tumare dușmanen hai manghen tumen le Devlesche anda codola cai phiraven-pe jiungales tumența”. (Mat. 5:44) O Isus cărdea ciacimasa cadai buchi. Daștil-pe că savore gândisaras amen chichi de duchado sas o Isus cana sas-lo șiuto po stâlpo catar le soldați romani. Ci daisaras te hachiaras cu sea i duch cai simțosardea-la, chichi de but sas cărdo lajiavestar hai o nasulimos cai sas lesche cărdo bi te avel doșalo.

¹⁷ O Isus sicadea mai dur iubirea hai așilea pașa o Iehova chiar cana aver phirade-pe nasul lesa. Ando than te del armai le soldațen, vo chiar phendea le Iehovasche ando manglimos: „Dade, iertisar-len, că ci jianen so cheren!”. (Luca 23:34) Cana phenas le Iehovasche ando manglimos te ajutil codolen cai phiraven-pe nasul amența, vo va ajutila amen te așias liniștime hai te na mai avas cadea de holiarde. Cadaia daștil te ajutil amen vi te dichas mai mișto codolen cai cheren amenghe nasulimos.

18. Sar ajutisardea o manglimos le Albertos hai le Johnos te mechen palal le nasulimata prin save nachle?

¹⁸ O manglimos ajutisardea le duie phralen anda save deam duma mai anglal te mechen palal le nasulimata prin save nachle. O Alberto phenel: „Manglem man anda le phrala cai phirade-pe nasul manța chiar cana ci somas doșalo. Manglem le Iehovas mai butivar te ajutil man te nachav părdal cado pharimos”. Sam bucurime că acana o Alberto slujil pale le Iehovasche. O John anel pesche amintea: „Manglem man butivar le Iehovasche te ajutil le phrales cai cărdea manghe nasul hai te ajutil vi man te iertisarav-les. O Iehova dea man zor te na avav holiardo pe mânro phral hai te na mai judechisarav-les. Sa cadea, vo dea man pacea ando ilo”.

19. So trebulas te cheras ji cana o Iehova va chosela cu sea cadai lumea jiungali? (1 Petru 3:8, 9)

¹⁹ Ci jianas prin so nasulimata va avela te nachas ji cana o Iehova va chosela cu sea cadai lumea jiungali. Prin oriso pharimata avelas te nachas, te mangas mai dur o ajutorii le Iehovasco. Sa cadea, te las amen pala so cărdea o Isus cana aver phirade-pe nasul lesa bi te avel doșalo hai te cheras mai dur so phenel amenghe i Biblia. Cadea, daisaras te pachias ciaces că o Iehova va dela amen but miștimata. (Citisar 1 Petru 3:8, 9.)