Sar daștis te aves fericime sosa si tut?

1. So însemnol hai so na însemnol te avas fericime sosa si amen?

SAN fericime sosa si tut? Iech manuș daștil te avel fericime sosa siles cana del peschi zor te dichel le miștimata cai primil-len le Iehovastar. Cadaia anel lesche pacea hai bucuria. Vo ci silo perado sau holiardo anda codoia că ci siles le buchia cai camel-len. Cu sea cadala, chiar cana sam fericime sosa si amen, trebul te las sama mai dur sar traisaras amari viața. Sar exemplo, na-i vareso nasul te camas te cheras mai but anda o Iehova. (Rom. 12:1; 1 Tim. 3:1) Tha, cana sam fericime sosa si amen, chiar cana camleam but iech privilegio andi buchi le Iehovaschi hai ci primisardeam-les cana amen ajucărdeam amen, ci hasaras amari bucuria.

2. So buchia nasul daștilas te arăsăl te cherel iech manuș cana ci silo fericime sosa siles?

² Cana ci sam fericime sosa si amen, poiechdata arăsas te cheras alosarimata nasul. Sar exemplo, codola cai ci sile fericime sosa silen daștinas te cheren mai but buchi caște chinen penghe buchia cai ci trebun lenghe ciaces. Chichiva creștini chiar ciorde love sau buchia cai camenas-len. Daștil-pe că phende penghe: „Meritiv cadai buchi”, „Ajucărdem prea but” sau „Va avela te dav parpale le love”. Tha, o Iehova dichel nasul orisavo felo ciorimos hai cadaia meliarel lesco anav. (Prov. 30:9) Aver ci mai slujisarde le Iehovas anda codoia că sas-le zurales perade cana ci primisarde iech privilegio andi buchi le Devleschi. (Gal. 6:9) Sar daștilas iech manuș le Iehovasco te arăsăl te gândil-pe cadale buchiande? Daștil-pe că iech manuș sar cado, țâra po țâra, ci mai sas-lo fericime sosa sas-les.

3. So sichioas anda Filipeni 4:11, 12?

³ Savore daisaras te sichioas te avas fericime sosa si amen. O apostolo Pavel phendea că ‘sichilea te avel fericime sosa siles ande orisavi situația’. (Citisar Filipeni 4:11, 12.) Vo scriisardea cadal dumes cana sas-lo phandado. Cu sea cadala, o apostolo ci hasardea peschi bucuria anda codoia că sichilea sar te avel fericime sosa siles. Dacă si amenghe pharo te avas fericime sosa si amen, so phendea o Pavel hai lesco exemplo sicaven amen că daisaras vi amen te avas cadea. Ci trebul te ajucăras amen te avas pe thaneste fericime sosa si amen, tha mai mișto te sichioas te avas cadea. Sar? Te dichas chichiva buchia cai daisaras te cheras-len caște sichioas sar te avas fericime sosa si amen.

DE CHI ZOR TE DICHES CUCI LE BUCHIA CAI SI TUT

4. Sar arăsas te avas fericime cana dichas cuci so si amen? (1 Tesaloniceni 5:18)

⁴ Cana dichas cuci so si amen, daisaras te avas fericime. (Citisar 1 Tesaloniceni 5:18.) Sar exemplo, cana dichas cuci le buchia cai si amen caște traisaras, ci va avela te gândisaras amen prea but le buchiande cai camas-len hai na-i amen. Cana dichas cuci vi le privilegii cai si amen aghies, das amari zor te cheras mișto i buchi cai sas amenghe dini, ando than te gândisaras amen prea but ca iech privilegio cai camas-les. Vi i Biblia phenel te mulțumisaras le Iehovasche ando manglimos anda le buchia cai si amen. Cana dichas cuci le buchia cai si amen, daisaras te simțosaras „i pacea le Devleschi, cai si mai bari sar orisavo hachiarimos”. (Filip. 4:6, 7)

5. So buchia daștinas te dichen cuci le israeliți? (Dich vi i imaginea.)

⁵ Te gândisaras amen le buchiande prin save nachle le israeliți. Butivar, von rovarenas-pe le Iehovasche că ci sas-len o haben cai hanas-les ando Egipto. (Num. 11:4-6) Si ciaces că i viața ando șuco than sas phari. Tha so daștilas te ajutil-len caște aven fericime sosa sas-len? Le israeliți daștinas te gândin-pe hai te dichen cuci le bare buchia cai o Iehova cărdea-len anda lende. Von daștinas te anen penghe amintea că, cana sas-le sclavi hai le egipteni phiravenas-pe zurales nasul lența, o Iehova andea le deș armaia opral o Egipto hai salvisardea-len. Pala codoia, le israeliți „ciorde catar le egipteni” rup, sumnacai hai hureaimata. (Ex. 12:35, 36) Cana i armata le faraonoschi gălea pala lende ji ca i Marea Loli, o Iehova cărdea iech bari buchi caște șinel ande duiende o pai, hai cadea von daisarde te nachen pe i coaver rig. Pala codoia, ande sea lengo drom prin o șuco than, o Iehova dea-len mana te han ande fiesavo ghies. Atunci, sostar le israeliți rovarenas-pe anda o haben? Chiar cana arăsălas-len o haben dino le Iehovastar ande fiesavo ghies, von ci dichle cuci so cherelas vo anda lende.

6. So daștil te ajutil amen te dichas cuci so si amen?

⁶ Sar daștis te sichios te diches cuci so si tut? Ando iechto than, trebul te cheres tuche timpo ande fiesavo ghies te gândis tut le lașe buchiande anda chi viața. Daștis chiar te scriis dui sau trin buchia cai diches-len cadea. (Plâng. 3:22, 23) Ando duito than, sicav că diches cuci so si tut. Na încăr tut parpale te mulțumis le coaverenghe anda so cheren anda tute. Hai, mai importanto, te mulțumisares le Iehovasche ande fiesavo ghies. (Ps. 75:1) Ando trinto than, alosar tuche amala cai dichen cuci le buchia cai silen. Dacă che amala ci cheren cadai buchi, daștis te arăsăs vi tu sar von. Tha, cana che amala dichen cuci le buchia cai silen, lengo lașio phiraimos daștil te ajutil tut te diches vi tu cuci so si tut. (Deut. 1:26-28; 2 Tim. 3:1, 2, 5) Cana das amari zor te mulțumisaras le coaverenghe anda so cheren, ci va avela te avas perade catar amare pharimata hai ci va avela te rovas pala so na-i amen.

7. So ajutisardea la pheia Aci te avel fericime sosa sas-la?

⁷ Te dichas prin so nachlea i Aci, cai trail andi Indonezia. Voi phenel: „Cana sas i pandemia de COVID-19, astardem te dichav că i situația avere phralenghi sas mai lași sar mânri. Cadea că arăslem te na mai avav fericime sosa sas man”. (Gal. 6:4) So ajutisardea la pheia Aci te paruvel pesco gândimos? Voi phenel: „Astardem te gândiv man le lașe buchiande cai del-len manghe o Iehova ande fiesavo ghies hai ca le miștimata cai si man anda codoia că som ande leschi organizația. Sichilem vi te mulțumiv le Iehovasche ande fiesavo ghies anda so cherel anda mande. Cadea, arăslem te avav ciaces fericime sosa si man”. Dacă vi tut peraven tut le gânduri nasul, daștis te cheres sa cadal buchia caște diches cuci so si tut?

GÂNDISAR TUT CA SO CAMEL O IEHOVA HAI AȘ UMILO

8. So cărdea o Baruc?

⁸ Iech timpo, o Baruc, cai ajutilas le profetos Ieremia, astardea te na mai avel fericime sosa sas-les. Le Barucos sas-les iech phari buchi te cherel: trebulas te ajutil le Ieremias te phenel le israelițenghe, cai ci dichenas cuci so sas-len, so avelas lența anda codoia că ci așunde le Iehovastar. Tha, pala iech timpo, o Baruc ci mai gândilas-pe ca so camelas o Iehova hai fal-pe că astardea te gândil-pe mai but peste hai le buchiande cai vo camelas te cherel-len. Prin o Ieremia, o Iehova phendea le Barucosche: „Tu rodes buchia bare anda tute. Na mai rode buchia sar cadala!”. (Ier. 45:3-5) Avere dumența, o Iehova phendea lesche: „Av bucurime sosa si tut ande chi situația!”. O Baruc mechlea-pe ortosardo hai bucurisardea-pe mai dur anda codoia că o Iehova dichelas-les lașe iachența.

9. Sar ajutin amen le versetea anda 1 Corinteni 4:6, 7 te dichas le privilegii cadea sar trebul? (Dich vi le imagini.)

⁹ Poiechdata, iech manuș cai slujil le Iehovasche daștilas te gândil-pe că trebulas te primil iech privilegio andi buchi le Devleschi. Daștil-pe că les siles iech baro talento, si vreanico hai jianel mișto sar te cherel le buchia sau siles sea cadal trin buchia. Cu sea cadala, aver varecon daștilas te primil o privilegio cai vo camel-les. Sar avelas mișto te dichel cadai buchi? Vo daștilas te gândil-pe le buchiande cai phendea-len o apostolo Pavel ando 1 Corinteni 4:6, 7. (Citisar.) Fiesavo privilegio cai primisaras-les hai fiesavo talento cai si amen aven anda o vast le Iehovasco. Vo ci dea amen cadal buchia anda codoia că sam mai specialo sar aver manușa. Sea le buchia cai primisaras-len lestar sicaven că vo iubil amen hai că si zurales lașio. (Rom. 12:3, 6; Ef. 2:8, 9)

10. Sar daisaras te bariaras amari umilința?

¹⁰ Daisaras te bariaras amari umilința cana gândisaras amen mișto co exemplo cai mechlea-les amenghe o Isus Cristos. Te gândisaras amen ca i riat cana o Isus haladea le pânre le apostolenghe. O apostolo Ioan scriisardea: „O Isus, [1] anda codoia că jianglea că o Dad șiutea sea le buchia ande lesco vast hai [2] că vo avilea le Devlestar hai [3] că jialas le Devleste, . . . astardea te halavel le pânre le discipolenghe”. (Ioan 13:3-5) O Isus daștilas te pachial că le apostoli trebunas te halaven lesche pânre hai că lesche trebulas te avel dini iech pachiv sar cadaia. Tha vo ci pachiaia niciechdata că meritilas iech viața mai barvali sau mai lași. (Luca 9:58) Chiar cana sas o Șiavo le Devlesco, o Isus sas-lo umilo. Vo sas-lo fericime sosa sas-les, hai cadea mechlea amenghe iech exemplo perfecto. (Ioan 13:15)

11. So ajutisardea le phrales Dennis te avel fericime sosa siles?

¹¹ O Dennis, andai Olanda, del sea peschi zor caște lel-pe pala i umilința le Isusoschi, tha na-i lesche sea o timpo ușoro. Vo phenel: „Cana varecon primil iech privilegio cai me camav-les, poiechdata simțosarav man perado anda codoia că gândiv man că daisardemas me te primiv cado privilegio. Ande cadal momentea, sichioav andai umilința. Andi aplicația JW Library^® șiutem manghe etichetea chichiva versetende cai den duma andai umilința, caște daștiv te arachav-len mai sigo hai te citisarav-len de fiesavi data cana trebul. Sa cadea, descărchisardem pe mânro telefono mai but cuvântări cai den duma andai umilința hai așunav-len mai butivar. Arăslem te hachiarav că sea so cheras andi buchi le Iehovaschi si caște das lesche pachiv, na amenghe. O Iehova, pherdo lașimos, mechel fiesaves te cherel vareso ande leschi buchi, tha vo si codo cai cherel te jian mișto le buchia”. Cana astares te na mai aves fericime anda codoia că ci sas tuche dino iech privilegio, de sea chi zor te bariares chi umilința. Cadaia va zuriarela chio amalimos le Iehovasa hai va ajutila tut te aves fericime sosa si tut. (Iac. 4:6, 8)

GÂNDISAR TUT CA LE PROMISIUNI LE IEHOVASCHE

12. Save promisiuni le Iehovasche anda o viitorii ajutin amen te avas fericime sosa si amen? (Isaia 65:21-25)

¹² Daisaras te avas mai fericime sosa si amen cana gândisaras amen le șucar buchiande cai o Iehova promitisardea că va cherela-len ando viitorii. Ando lil Isaia, o Iehova phenel amenghe că hachiarel prin chichi de but pharimata nachas, tha vi promitil amenghe că va chosela sea cadal pharimata. (Citisar Isaia 65:21-25.) Ando viitorii, va avela te traisaras andi siguranța hai va avena amen șucar chăra. Va avela te avas bucurime cana cheras buchi hai o haben va avela sastevesto hai zurales lașio. Ci va mai trebula te daras niciechdata că daștilas te avel vareso nasul amența sau amare șiavorrența. (Is. 32:17, 18; Ezec. 34:25) Daisaras te pachias anda sea o ilo că o Iehova va cherela sea so phendea.

13. Cana trebul mai but te gândisaras amen ca le promisiuni le Iehovasche anda o viitorii?

¹³ Acana, mai but sar oricana, trebul te gândisaras amen mai but le șucar buchiande cai o Iehova promitisardea că va cherela-len ando viitorii. Sostar? Anda codoia că traisaras andel „palutne ghiesa” hai nachas prin pharimata ‘cai phares cheras lenghe fața’. (2 Tim. 3:1) O Iehova si ande fiesavo ghies pașa amende hai del amen sfaturi, zuralimos hai ajutil amen cana si amen nevoia. (Ps. 145:14) Vi le promisiuni le Iehovasche anda o viitorii daștin te zuriaren amen cana nachas prin pharimata. Daștil-pe că na-i tuche ușoro te chines le buchia cai trebun chia familiache. Tha va avela te aves cioro sea chi viața? Jianas mișto că na! O Iehova promitisardea că ando paradiso va dela amen mai but sar le buchia cai trebun amenghe. (Ps. 9:18; 72:12-14) Daștil-pe că naches prin iech depresia, si tut iech nasfalimos cai duchavel tut but sau aver bare nasfalimata. Tha va avela te aves duchado anda sea o timpo hai ci va avela te aves sastevesto niciechdata? Jianas că na-i cadea! O nasfalimos hai o merimos va avena chosle cu sea andi lumea nevi le Devleschi. (Rev. 21:3, 4) Cadai promisiunea ajutil amen încă de acana te avas fericime sosa si amen hai ajutil amen te na avas holiarde hai perade. Daisaras te avas fericime sosa si amen, chiar cana nachas prin iech neciacimos, hasardeam varecas ando merimos, nachas prin iech baro nasfalimos sau aver pharimata. Sostar? Anda codoia că, orichichi de bare avenas le pharimata prin save nachas, jianas că ‘va încărena iech țâra’ timpo hai că, andi lumea nevi, ci va mai avela te nachas prin cadal ducha niciechdata. (2 Cor. 4:17, 18)

14. Sar daisaras te zuriaras amaro pachiamos andel promisiuni le Iehovasche anda o viitorii?

¹⁴ Anda codoia că le promisiuni le Iehovasche ajutin amen te avas fericime sosa si amen, so daisaras te cheras caște zuriaras amaro pachiamos ande lende? Cadea sar ieche manușes siles nevoia catar ochelari caște dichel mai mișto le buchia cai sile mai dur, vi amen daisaras te zuriaras amaro pachiamos andel promisiuni le Iehovasche caște dichas mai mișto o paradiso cai va avela. Sar exemplo, cana sam perade cana gândisaras amen că ci va arăsăna amenghe le love caște traisaras, daisaras te gândisaras amen sar va avela i viața andi lumea nevi cana ci va mai trebula amenghe love hai chonic ci va mai avela cioro. Cana sam perade anda codoia că ci primisardeam iech privilegio andi buchi le Iehovaschi, daisaras te gândisaras amen chichi de țâne si cadal buchia pașa i șucar viața perfecto cai ajucărel amen andi lumea nevi. Pala so va avela te arăsas perfecți, va avela te daisaras te slujisaras le Iehovasche anda mii bărșa. (1 Tim. 6:19) Daștil-pe că si amen cadichi de but pharimata po șăro, că si amenghe pharo te gândisaras amen ca le șucar promisiuni anda o viitorii. Tha, cana cheras amenghe timpo te gândisaras amen cadale buchiande, le promisiuni le Iehovasche va avena vi mai ciace anda amende.

15. So sichioas anda so phendea i Christa?

¹⁵ Te dichas sar ajutisarde le promisiuni le Iehovasche la pheia Christa, i rromni le Dennisoschi, anda savo deam duma mai anglal. Voi phenel: „Si man iech baro nasfalimos cai mechel man bi zuralimasco. Ci daștiv te phirav, cadea că trebul manghe iech scamin cu rotile hai trebul te beșav but ando pato. Si man bare ducha ande fiesavo ghies. De țâra timpo, o medico phendea manghe că ci va avela te avav mai mișto. Gândisardem man sigo: «Vo ci dichel o viitorii cadea sar dichav-les me». Me gândiv man le șucar buchiande cai o Iehova phendea că va cherela-len. Anda codoia, si man pacea andi goghi. Si ciaces, ande cadai lumea mânri viața si pherdi ducha, tha andi lumea nevi, va avela te bucurisarav man ciaces viațatar”.

„CI LIPSOL CHANCI CODOLENGHE CAI DARAN LESTAR”

16. Sostar daisardea te phenel o rege David că „ci lipsol chanci codolenghe cai daran [le Iehovastar]”?

¹⁶ Chiar cana sam fericime sosa si amen, va avena amen mai dur pharimata. O rege David sas-lo duchado cana hasardea trin anda lesche șiave. Chichiva doșarde-les pe neciacimaste, lesche amala mechle-les hai iech rege rodea te mudarel-les mai but bărșa. Cu sea cadala, chiar cana nachlea prin bare pharimata, vo phendea: „Ci lipsol chanci codolenghe cai daran [le Iehovastar]!”. (Ps. 34:9, 10) Sostar daisardea o David te phenel cadai buchi anda le slujitori le Iehovasche? Anda codoia că, chiar cana ci ajucăras amen te avel amen iech viața bi pharimatango, jianas ciaces că ci va lipsola amenghe le buchia cai trebun amen ciaces. (Ps. 145:16) Pachias anda sea o ilo că o Iehova va avela pașa amende cana nachas prin pharimata. Daisaras te avas fericime sosa si amen, prin orisavo pharimos avelas te nachas.

17. Sostar cames te sichios te aves fericime sosa si tut?

¹⁷ O Iehova camel te avas fericime sosa si amen. (Ps. 131:1, 2) Cadea că, cher sea so daștis caște sichios te aves fericime sosa si tut! Dacă des chi zor te diches cuci le buchia cai si tut, te gândis tut ca so camel o Iehova, te așes umilo hai te zuriares chio pachiamos andel promisiuni le Devlesche, vi tu va avela te phenes: „Da, som fericime sosa si man”. (Ps. 16:5, 6)