Ngond wa 1

Chisu chikatay mwan kuvadik ikundj ni mband akat kusangar nakash. Pakwez ap anch anvaj amukat mwanau mukemp, kakutwishap kudandamen kushal mwan ankemb. Pakwez akwishon nakash anch kapaminap. Chilik chimwing, Yehova ukat kusangar anch twakwat mupak wa kumulondul Yesu, pakwez kakusangarap anch twalik kukul mu spiritu. (1 Kor. 3:1) Chawiy, utwitin anch “ikalany antu amakurump” in Kristu. Mu Bibil, dizu da Grek dikarumwinau anch “kukul” dikutwish kand kurumburik “kuswa.” (1 Kor. 2:6) Mud mukatay mwan mukemp kudandamen kupam ni kwikal mukurump, niyetu tufanyidin kudandamen kupam mu urund wetu ni Yehova, anch twasal mwamu tukat kwikal in Kristu aswila. Chakin kamu, ap anch twikal in Kristu aswila, tufanyidin kudandamen kuya kurutu mu spiritu.​—1 Tim. 4:15. w24.04 2 par. 1, 3

Anch muntu wakwipul anch, ‘Yehova ud nany kud ey?’ Yom ik ukulonda? Ukutwish kwakul anch: ‘Yehova ud Tatukwam, Nzamb wam ni Murunam.’ Yehova ukwet kand yijiken yikwau ukutwisha kusadin mulong wa kumutazuk. Pakwez, ov, ukutwish kumuman Yehova mud muntu ukwakina kwol kwend? Mwant David wafanakesha urund uding pakach pa Yehova nau atushalapol End ashinshamena ni urund uding pakach pa mwin kwakan ni angendj akinay. Wipula anch: “A [Yehova], nany ukushakama mu [mwinkand wey]? Nany ukeza kushakam ku mukandu wey utumbila?” (Kus. 15:1) Kusutin mazu minam mapepilau, twilejin anch tukutwish kwikal angendj a Yehova, kwawiy kulond anch, arunend. Kurutu kwa kutang yom yawonsu, Yehova wading amwinend. Pakwez kushik pa chisu chimwing, wamwaka Mwanend wakusambish mu mwinkand wend wa chifanakesh. Yehova wakata nakash kusal mwamu. Bibil ulejen anch Yehova ‘wamusangareshang’ Mwanend. Ngendj wend wa kusambish winou, niyend ‘wasangarang kurutu kwa Yehova machuku mawonsu.’​—Jnsw. 8:30. w24.06 2 par. 1-3

Tongijokin mutapu wasadika yom. Chisak cha amakundj piswimp 340 000 ading abombaken mulong wa kumudish David want mu Isarel mwawonsu. Mu machuku masatu pa diyal dading piswimp ni Heburon pading amakundj awangang nich musangar miminy ya kumushiman nich Yehova. (1 Jsng. 12:39) Pakach pa antu inay pading nsand Sadok. Pakwez, Yehova wasala chakwel twikala nich kashinsh anch Sadok wadingap. (1 Jsng. 12:22, 26-28) Sadok wading mwin kupesh wasalang piswimp ni Mwin Kupesh Mujim Abiatar. Nzamb wamwinkisha kand Sadok manang ni ukaliweny wa kwijik nawamp Rusot rend. (2 Sam. 15:27) Wading ikundj utakamena. Mu machuku minam ma nsuden, Satan uyirishikishin antu a Nzamb nakash. (1 Pita 5:8) Chawiy tufanyidin kwikal atakamena mulong wa kujijaman djat ni pa kumudoshau Satan ni mangand mend ma chisum kud Yehova. (Kus. 31:24) Anch twasal mwamu, tukutwish kwimburij kutakaman kwa Sadok. w24.07 2 par. 1-3

Patangay Yehova ikundj wa kusambish ni mband wa kusambish, wakata anch ikal ni musangar. Wayinkisha ndond yiwamp nakash ya kushakam, chipan cha uruw, ni chisend chisangareshina. Afanyina kwizwish divu nich anau ni kudikadish dawonsu paradis mud mutapu wading chir cha Eden. Wayinkisha kwend chijidik chimwing kusu chiswapela. Ni wayibabesha anch ang ajip chijidik chinech kusutin kumubwambwil kwa kwikatin, chitil chau chafanyina kuyiletin rufu. Twij yom yashikena. Chitang chimwing cha mu spiritu, chading chimukisina Nzamb ni antu, chayipaka antu mulong wa kuyibachik kusal chitil. Adam ni Ev afa mu mupit winou. Mulong akanganya kumuchingejin Tatukwau wa rukat, asala chitil. Mud mutwija, yom yalonday Yehova yasadika kamu. Kudosh kamu dichuku dinida, asambisha kurish ni yibudikin ya mupak wau: asambisha kunanap, ni disuden afa.​—Dis. 1:28, 29; 2:8, 9, 16-18; 3:1-6, 17-19, 24. w24.08 3 par. 3

Yehova ni Mwanend mukatish akatin anch twikal ni musangar. Kuseng 119:2 ulondin anch: “Ayuk kwau akata kulam malejan mend, awiy kamu akata kumusurab nich muchim wawonsu.” Yesu niyend walonda anch: “Ayuk kwau antu akata kutesh dizu da Nzamb ni kudisadin!” (Luka 11:28) Tukwet musangar mulong tud atushalapol a Yehova. Pitukata kutang Dizu da Nzamb pakad kujing ni tukat kusadin yom twilejina. (Yak. 1:22-25) Tukutaninamu mu mitapu yivud. Chilakej, anch twasadin yom twilejina mu Bibil tukat kumusangaresh Yehova, kupwa niyetu tukat kwikal kand ni musangar. (Mul. 12:13) Chikwau kand, anch twasadin yom twilejina mu dizu da Nzamb tukat kuwapish urund wetu ni antu a mu dijuku detu pamwing kand ni akadivar nau anambaz netu. Cha usey nakash, tukat kwipuk milong yivud yikwetau antu akad kuziyin kwi mbil ja Yehova. Yawiy kamu yom yalonday Mwant David. Mu muminy wend umwing, kupwa kwa kujimbul chijil, yijidik, ni dirumburish da Yehova, walonda anch: “Muntu mwawonsu ukata kuyilam ukuman kuwap kujim.”​—Kus. 19:7-11. w24.09 2 par. 1-3

Yom ik yimeningay Yehova pakatay kuyishinshikin atushalapol end? Umening chisu tukweta musangar ap chisu tukweta ushon. (Kus. 37:18) Ukat kusangar anch waman usu tusadina mulong wa kumusadin chikalap nchik yikokujol turishina nich. Kudoshaku chom chinech, ukwet kand impu ya kutukwash ni kutukasikesh. Kuseng 147:3 ulondin anch Yehova ‘ukat kupwish runeng’ ra antu akweta ushon. Verse winou urumburil mutapu ukatay Yehova kuyikwash antu anenganena. Yom ik tufanyidina kusal mulong wa kutambul ukwash wend? Shinshikin chilakej ech: Dokter ukweta ukaliweny ukutwish kusal usu nakash mulong wa kumok muntu uyedina. Pakwez mulong wa kuyerik, muyej ufanyidin kulondul nawamp umutakel wa dokter. Yom yilondinay Yehova kusutil Dizu dend, kud antu anenganena ni tukutwisha kusadin chiyul chend cha rukat. w24.10 6 par. 1-2

Pakur, yichap yetu yisambinang piur pa chipul chitadina yom yikuyishikena antu arumburishay Yehova mud akad kutentam. Twalondang anch antu mud inay kakwetap ruchingej ra divumbuk. Nsang jivud jida mu Bibil jisambidin piur pa dirumburish da Yehova mulong wa antu akad kutentam, chilakej, Yehova wayishesha antu awonsu ku Mabeb kudoshaku Nowa ni dijuku dend. Chikwau kand, wayisadina in Isarel mulong wa kushesh michid sambwad yading yishicha mwi ngand ya kushilamu. Ni wasadina mwangel mulong wa kujip amasalay 185 000 a in Asiria mu uchuku umwing. (Kuv. 7:1-3; Isay 37:36, 37) Pa chinech, ov Bibil utulejin patok anch Yehova wakwatin kal mupak anch muntu mwawonsu wa pakach pau wafil kal rawonsu ni kakez kavumbukap kand? Bwat, chidap mwamu. Tukutwishap kwijik mutapu Yehova warumburishay muntu ni muntu wa pakach pau, twijap kand anch antu inay ajipau ikala ni mutapu wa kumwijik Yehova ni kukarumuk. w24.05 3 par. 5-7

Yesu waleta chilakej cha mband umwing wamwitang nzuj umwing chakwel amukwash mulong muntu umwing wamusadinang mu mutapu uyimp. In kwilej a Yesu afanyina kutesh nawamp mutapu wading wiyovilay mband winou mulong antu avud pa chisu chinicha ayisadinang mu mutapu uyimp. (Luka 18:1-5) Rusang riner rid kand ra usey nakash kud etu ­mulong niyetu tukat kurish ni kuburen kutentam yisu yimwing. Nlel unou mu mangand mud kasolikany, kuburen kutentam ni chisum. Chawiy niyetu twij anch dichuku dimwing akutwish kutusadin mu mutapu uyimp. (Mul. 5:8) Pakwez tukutwish kwov nayimp nakash anch mukadivar ap nambaz watusadin mu mutapu uyimp. Chinyim nau antu akata kutupompat, akadivar nau anambaz netu kakwetingap chitongijok cha kutusadin mu mutapu wakad kutentam. Ad kwau antu akad kuwanyin. Tukutwish kwilej yom yivud kusutin kushinshikin yom yasalay Yesu pamusadinau mu mutapu wakad kutentam kud antu ayimp. Anch tukat kutwish kushimpish muchim mulong wa antu ayimp akata kutupompat, komb tufanyidin kusal mwamu kupandakan kud akadivar nau anambaz netu mu ritiy! w24.11 2 par. 1-2

Pakur mikat yading yakuda ya pakampwil nakash. (Dis. 14:18; Luka 4:4) Mikat yading kamu ya usey nakash, chawiy yisu yimwing Bibil usadidin dizu mukat ap “dibot” mulong wa kumekesh yakuda yawonsu. (Mat. 6:11; Mid. 20:7) Yesu wasadina kand mikat mu yilay yend yaad yijikena nawamp. (Mat. 16:9, 10) Chilay chimwing pakach pa yilay yiney achilejen mu Yohan shapitre wa 6. Papwishau atwimbuy a Yesu kulejan, Yesu wayisenda waya nau mu waat ushad wa Karung wa Galaliya chakwel apimaku. (Mar. 6:7, 30-32; Luka 9:​10) Ashika kwi ndond yikuchikina yading piswimp ni Betsayida. Pakwez, kupwa kwa chisu chikemp, tunan twa antu eza kwinakwa mulong wa kumutal Yesu. Yesu kayiduulap. Witekina chisu cha kuyifundish piur pa Want wa Nzamb ni kwok ayej. Pikwazweka urel, in kwilej iyipula mutapu welau antu inay awonsu kuman chom cha kuda. Amwing pakach pau ading ni yakuda yikemp, pakwez avud ading akwet kuswir kwa kuya mu mal mulong wa kuland yakuda.​—Mat. 14:15. w24.12 2 par. 1-2

Anvaj etu a kusambish, Adam ni Ev, ading antu awanyidina ni ading ashich mu paradis muwamp nakash. (Dis. 1:27; 2:7-9) Ading ni mutapu wa kusanger mwom chikupu. Pakwez kwashikena chom chiyimp nakash, Adam ni Ev asala chitil. Ashadisha Paradis ni ruchingej rau ra kushakam chikupu. Uswan ik wayishilau anau? Bibil ulondin anch: “Chitil chandama mu mangand kusutin muntu umwing [Adam] ni rufu kusutin chitil, ni mwamu rufu rapalangana kud antu awonsu mulong awonsu asala chitil.” (Rom 5:12) Uswan watushilay Adam chid chitil ni rufu. Chitil twaswana did mud dibaz dijim nakash, dakaday muntu ap umwing kwikal ni mutapu wa kufut. (Kus. 49:8) Yesu wafanikesha chitil nich “ dibaz”. (Mat. 6:12; Luka 11:4) Anch twasal chitil, chid mud twiyandjik kal mu dibaz kud Yehova. Tufanyidin kufut dibaz dined. Anch Yehova kafutap dibaz dined, dafanyina kupwa ching anch twafa.​—Rom 6:7. w25.02 2-3 par. 2-3

Tukwet dilau da kulejan uyakin piur pa Want wa Nzamb kud antu akwau! Kadap muntu mwawonsu ukweta dilau mud dined. Chilakej, padingay Yesu pa divu, kakatap anch ayilembil aleta uman piur pend. (Luka 4:41) Nlel, kurutu muntu asambisha kulejan nau Atuman a Yehova ufanyidin kushakam kukwatijan mu mutapu umusangareshina Yehova. Tukat kumekesh anch tusangaredin dilau da kulejan rusangu ruwamp anch twayilej antu akwau piur pa Want wa Nzamb. Mud Yesu ritong retu rid ra kukun ni kwichil mem pa mbut ja uyakin wa Want mu michim ya antu. (Mat. 13:3, 23; 1 Kor. 3:6) Mu kulondul chilakej cha Yesu, dirijek da Yehova dikat kusal usu win ­wawonsu mulong wa kuyikwash antu akwau kwijik dijin da Nzamb. Bibil​—Dikarumun da Ngand Yisu, dikarumun dined dachirishin dijin da Nzamb pa ndond yin yawonsu yadinga dijin dined mu mazu makusambish mafundau Bibil. Dikarumun dined da Bibil didaku nlel mu mazu piswimp 270 ikala wa chikunku ap wa kabuj. w24.04 9 par. 8-9

Akadivar amwing akweta musangar mu uruw akweting chaku cha kusal yom yimwing dichuku dawonsu yimekeshina anch ayikatin akajau. (1 Yoh. 3:18) Ngatan ukutwish kumumekeshin mukajend rukat kusutin kusal tuyom tukemp tukemp mud, kumulamaku ku chikas ap kand kumubwikataku. Ukutwish kumutumin mesaj ni kumulej anch: “Nikutongin nakash” ap kumwipulaku anch “dichuku dey dasut kal nchik?” Chisu ni chisu, ukutwish kumufundinang yom yimekeshina anch umukatin. Anch ngatan wasal yom yiney, ukumulimish mukajend ni kukasikesh uruw wau. Ngatan umulimishina mukajend, umukwatining ni usey ni kumukasikesh. Ukat kusal mwamu kusutin kusanger yom yawonsu yisadiningay mukajend mulong wa kumukwash. (Kol. 3:15) Anch ngatan wamulej mukajend yom yimukatidinay, ukwiyov nawamp nakash. Mwamu mband ukwiyov anch ud mu diking, amukatin ni kumulimish. w25.01 13 par. 15-16

Kuseng 15 upwil ni kushilamu oku: “Mwin kusal mwamu ukujamish.” Kusutin mazu minam, nfund a kuseng urumburil mulong wak Yehova ukatin anch tusal yom yawonsu yijimbwilau mu kuseng winou. Ukatin anch twikal ni musangar. Chawiy chikatay kutwinkish umutakel ukutuletina yiyukish ni diking dend. Angendj itiyijinay Yehova akutwish kuchingej kwikal ni machuku ma kurutu mawamp. Antu azizidinau many ashinshamena akwikal ni mutapu wa kushakam mwiur muda jindond jayirijekidinau kal kud Yesu. (Yoh. 14:2) Antu akweta ruchingej ra kushakam pa divu achingedin chisu chikuwanyina yom yilejenau mu Kujingunik 21:3. Chakin kamu, etu awonsu tukwet dilau dijim nakash da kututazuk kud Yehova mulong wa kwikal arunend ni kwikal angendj mu mwinkand wend chikupu ni chikupu!​—Kus. 15:1-5. w24.06 13 par. 19-20

Katumb chom ik? Mu Bibil, dizu “katumb” dikutwish kurumburik yom yikata kusal anch muntu ikal ushimwokishena. Machuku makemp kupwa kwa kuyidosh in Isarel mu Idjibit, Yehova wamekesha anch ud Nzamb ushimwokishena nakash. Tong bil: dichuku dinida, in Isarel akumangana kwinshin kwa Mukandu wa Sinay mulong wa kutesh mafundish ma Nzamb. Mukandu wawonsu aubwika ku didj dijim. Pakad kulab, kwalanka mish yivud, kuzal kwa divu kukash, milayilay, anzaj ni chidjimin chijim cha mpuny. (Kub. 19:16-18; 24:17; Kus. 68:9) Pasalay Yehova yom yiney in Isarel afanyina kamu kushimwok nakash pamanau dikand dend. Nlel unou tukata kumutumbish Yehova kusutil kuyilej antu akwau piur pa mikadil yend yishimwokishena ni tukat kumutumbish kand Nzamb anch twachirish katumb kud ndiy mulong wa yom tusadina kusutin ukwash wend.​—Isay 26:12. w25.01 2 par. 2-3

Pading payilau mwi Ngand ya Kushilamu, amakundj amwing asambisha kumurishikish Moses mulong wa chisend chamwikishau kud Yehova. Alonda anch: “Chisak chinech chawonsu chidi cha antu atumbila [kadap ching Moses], ni [Yehova] udi pakach pau.” (Kuch. 16:1-3) Ap anch chading chakin anch ku mes ma Nzamb “chisak chawonsu” chading chitumbil, Yehova wamutonda Moses mulong wa kutakel pakach pa antu End. Mulong amulonda Moses nayimp, chakin kamu antombwij inay amulonda Yehova nayimp. Kashinshikinap pa yom yading yikatinay Yehova, pakwez pa yom yading yikatinau awiy, charumburik anch maz ni kwijikan nakash. Nzamb wayijipa antakel a antombwij, pamwing ni tunan twa antu inunga nau. (Kuch. 16:30-35, 41, 49) Nlel tukutwish kwikal nich kashinsh anch Yehova kakatap kuyisanger antu akata kulik kulimish umutakel udokila ku dirijek dend. w24.07 11 par. 11

Tushich pa chirung chakadau antu avud kwitiyij anch disuden da mangand minam did piswimp. (2 Pita 3:3, 4) Pakwez kud yom yikwau yivud twakad kwijik, tufanyidin kwikal ni ritiy rikash mu yom yilondinay Yehova piur pa disuden da mangand minam. Tufanyidin kuchingejin chamu chisadidinay Yehova mulong wa kututakel​—“kashalapol ushinshamena ni ubabela.” (Mat. 24:45) Pakusambisha mar makash, tukutwish kutambul umutakel wa pakampwil. Chinech chawiy chisu cha kukasikesh ruchingej retu mu umutakel ­tutambwila ku dirijek da Yehova. Anch tuchingejidinap ni kuziyin umutakel tutambwila katat, chikutwish kutukasiken kuziyin ku umutakel tukutambula pa chirung cha mar makash. w24.09 11 par. 11-12

Mwaney kakutwishap kwikal ni ritiy muday Nzamb mulong niyey ukwet ritiy. Yisu yimwing mwaney ukutwish kusambish kwiyipul anch: ‘Mutapu ik nija anch Nzamb udingaku? Ov, nifanyidin kamu kwitiyij yom yilondinay Bibil?’ Bibil utukasikeshin kusadin “usu [wetu] wa kutong” ni ‘kushinshikin yom yawonsu.’ (Rom 12:1; 1 Tes. 5:21) Chad, mutapu ik ukutwisha kumukwash mwaney kukasikesh ritiy rend? Mukwasha mwaney kwikal ni kashinsh anch yom yilondinay Bibil yid yakin. Anch mwaney ukwet yipul, mukwasha kutan yakul kusutin mikand ya kukimbijol nich, mud Index des publications des Témoins de Jéhovah ni Ukwash wa Kukimbijol Nich wa Atuman a Yehova. Anch watal mu Ukwash wa Kukimbijol Nich yang pafundinau anch “Bibil” ni kushirik pafundinau anch “Amupepila Kudi Nzamb” mulong wa kwikal ni kashinsh anch Bibil kadap kwend ching kusu buku muwamp wafundau kud antu, pakwez did kamu ‘dizu da Nzamb.’​—1 Tes. 2:13.w24.12 14-15 par. 4-5

Mutapu ik ukutwishau amakurump kumwimburij Yesu? Afanyidin kuyifumb ni kuyikwash akadivar ap achida kal ansand nakash mulong wa kwikal ni yisend yivud. Amakurump kafanyidinap kuchingej anch antu afumbinau ikal awanyidina. Afanyidin kuyiyul nich rukat chakwel ansand ikal ni ukaliweny ni kuman usey wa kwikal ikepishina, akweta ritiy ni in kuyisadin antu akwau nawamp. (1 Tim. 3:1; 1 Pita 5:5) Yesu kayinkish ap kwend in kwilej end ching kusu chisend cha kulejan, pakwez wayinkisha kand chisend cha kufundish. In kwilej afanyina kutong anch kakutwishap kusal nawamp mudimu wayinkishau kud Yesu. Pakwez, Yesu wading ni kashinsh anch akutwish kusal mudimu winou nawamp. Ni wayileja kusal mwamu. Yesu wamekesha anch uyichingejidin payilejay anch: “Mud mwantumau am kud Tatuku, niyam nakutumany kal en.”​—Yoh. 20:21. w24.10 16 par. 15; 17 par. 17

David wading mwant mujim nakash. Wading kand mwin kuwang, mwin kufund, mwin kurish njit ni muprofet. Warisha ni yikokujol yivud nakash. Mu mivu yivud, wajingamijanang mulong Mwant Saul wading ukimbin kumujip. Pikalay mwant, David wajingamijana kand mulong mwanend Abisalom wakimba kumujip chakwel ndiy ikal mwant. Ap anch David warisha ni milong mud yiney ni ap anch wasala yitil yijim, washala ushinshamena kud Nzamb djat ku rufu rend. Yehova walonda anch David wading ‘ikundj usangareshina muchim wend.’ Komb tufanyidin chakin kamu kutesh yiyul ya manang ya David! (1 Ant 15:5) Chilakej, shinshikin chiyul chapanay David kud Salomon, mwanend mwin kumuswinkan. Nsand winou ading amutondin kal kud Yehova mulong wa kulam difukwil dishitwila ni kutung tempel mulong wa kumutumbish Nzamb. (1 Jsng. 22:5) Salomon wafanyina kurish ni yikokujol kushalijan. Yom ik yamulejau kud David? David wamuleja mwanend anch, ang wamuziyin Yehova, ukwikal mwant muwamp ni Yehova ukumuyukish.​—1 Ant 2:2, 3. w24.11 10 par.  9-11

Ngatan ukata kumubul mukajend ap kumulond yom yiyimp ufanyidin kusal yom yivud mulong wa kurijek urund wend ni Yehova ni kutenchik yom ni mukajend. Cha kusambish, ufanyidin bil kwijik anch ukwet mulong ujim. Kwikil kwau chom chijingamining ku mes ma Yehova. (Kus. 44:21 TMK; Mul. 12:14; Heb. 4:13) Cha kaad, ufanyidin kulikap kumubul mukajend ni kuswimp yaku yend. (Jnsw. 28:13) Cha kasatu, ufanyidin kumujikitish mukajend ni Yehova ni kuyit dilikishin. (Mid. 3:19) Ufanyidin kand kumwit Yehova chakwel amukwasha kuswimp mutapu wa kutong, wa kulond ni kusal yom yikatinay Yehova. (Kus. 51:12-14; 2 Kor. 10:5; Filip 2:13) Cha kanying, ufanyidin kusal kukwatijan ni malembil mend ni kulik mitapu yin yawonsu ya chisum ni mazu mayimp. (Kus. 97:10) Cha katan, ufanyidin kukimb ukwash pakad kulab kud amakurump a chikumangen. (Yak. 5:14-16) Cha musamban, ufanyidin kukwat mipak yikutwisha kumukwash chakwel kangal asala kand yom yiyimp. w25.01 11 par. 14

Ov, umukatin Yehova Nzamb wakwinkisha ey yipan yawonsu kuwejinaku ni mwom? Ov, ukatin kumekesh anch umukatin? Mutapu uwamp wa kusal mwamu ud wa kwipan amwiney kud ndiy ni kumekesh chisal chinech patok kusutin kutambul dibatish. Anch wasal mwamu ukwikal mu dijuku da Yehova. Mud chibudikin, Nzamb uda Tatukwey ni Muruney ukukutakel ni kukubangin. (Kus. 73:24; Isay 43:1, 2) Kwipan ni kukubatish kukukwinkish kand dilau da kusanger mwom chikupu. (1 Pita 3:21) Ov, kud chom chikukangeshina kukubatish? Anch chid mwamu, ijik anch udap kwey amwiney. Mamiliyon ma antu abatishau kurutu kwey asala usu wa kuswimp mwikadil wau ni mutapu wau wa kutong mulong wa kuwanyish yitinau kurutu kwa kuyibatish. Katat amusadidin Yehova nich musangar ni mushiku. w25.03 2 par. 1-2

Yisu yivud, Bibil ukat kufanikesh yitil ni chisend chilimina nakash. Mwant David walonda piur pa yitil yend anch: “[Yitil yam yasutil] kal piur pa mutu wam mudi chisend chilimina nakash padi am.” (Kus. 38:4, TM K.) Pakwez Yehova ukat kulikishin yitil ya antu akata kukarumuk. (Kus. 25:18; 32:5) Dizu da Hebereu dikarumwinau anch “kulikishin” dirumburikin “kuzambul” ap “kusend.” Chawiy anch Yehova watulikishin yitil yetu, ukat kudosh chisend chilimina chida pa mutu wetu. Chid mud twad tusendin chisend chilimina pa mutu wetu, ni ndiy ukat kutwambulach. Bibil usadidin kand dizu dikwau dimekeshina anch Yehova ukat kudjibul yitil yetu kulemp. Kuseng 103:12 ulondin anch: “Mudi mudia kwingangel kulemp ni kurand, mwawiy kand mwatwalay kuyip kwetu kulemp ni yetwetu.” Kwingangel kud kulemp nakash ni kurand. Mitambu yiney yaad yikutwishap kusankanijan. Chinech chirumburikin anch Yehova ukat kudjibul yitil yetu kulemp nakash kamu. Chinech chitwinkishin kashinsh anch Yehova ukat kulikishin yitil yetu rawonsu! w25.02 9 par. 5-6

Kupwa kwa Yesu kuchirik mwiur, kambuy Pita wamwoka mu chilay ikundj umwing wading chishet. (Mid. 1:8, 9; 3:2, 6-8) Antu avud amunyingumuka Pita mulong wa chilay chinech. (Mid. 3:11) Ov, Pita wasangera ntumb yamwinkishau chisu chinicha mulong wading muntu wapamina kwi ndond kwayibachikangau antu kukimb katumb ni ndond ya piur? Bwat kamu, Pita wayileja antu kupan ntumb kud Yehova ni Yesu, palonday anch: “Ukash wa dijin da Yesu ni ritiy mu dijin dend”. (Mid. 3:12-16) Tukutwish kwimburij chilakej cha Pita anch twakudish mwikadil wa kwikepish. Tukat kusalang yom yiwamp kud antu akwau mulong tumukatin Yehova ni antu, pakwez kadap chakwel atubaza. Tukumekesh anch twikepishin chakin anch twamusadin Yehova ni akadivar netu nich musangar kukwatijan ni usu wetu ap anch antu akwau kamenap yom tusadina​—Mat. 6:1-4. w25.03 10-11 par. 11-12

Tukutwish kuvudish mushiku wetu mu mudimu wa kulejan anch twadandamen kumukat Yehova ni mutej. (Mat. 22:37-39) Tongin mutapu ukwovay Yehova musangar anch watuman tusadin mudimu ni mutapu ukatau antu kusangar anch asambish kwilej Bibil! Vurik anch, antu akaita kutesh uruu wetu ni kukwat mupak wa kumusadin Yehova akutwish kushakam chikupu. (Yoh. 6:40) Ov, chikukasikedining kudokal kwol kwey mulong wa mayingishin kampand? Anch chid mwamu, shinshikin pa yom ukutwisha kusal mulong wa kumekesh anch umukatin Yehova ni mutej. Pa chirung cha chipupu cha KOVID-19, Samuel ni Dania kabudikangap ku chikumbu. Chading chirung chikash, apana uman chisu chawonsu kusutin telefon, kufund mikand, ni kutakel malejan ma Bibil kusutin Zoom. Ap anch Samuel ni Dania katwishap kand kulejan mud pakur asala usu wa kulejan ni asangera yibudikin yikalau nich. w24.04 18 par. 15-16

Uruw kiwawiyap musul wa musangar, ajich avud in Kristu, ikala ansand ap amapal, akwet impu ya kwikal ni mbay wa uruw. Chakin kamu, kurutu kwa kukwat mupak winou, ufanyidin kukasikesh urund wey ni Yehova, kwiyijik nawamp, ni kwikal mu chilik cha kuwanyish yisend ya dijuku yitina dikut. (1 Kor. 7:36) Chid kand cha usey kwijik yom ukatina kud mbay ney kurutu kwa kusambish kwendijadin mulong wa kwatijan. Chikwau kand, ukutwish kumudiul muntu wafanyina kwikal mbay muwamp ni kukimb kutond muntu wa kand kuwanyin. Chakin kamu, mbay wa uruw win mwawonsu wakin ufanyidin kwikal mwin Kristu ubatishinau. (1 Kor. 7:39) Pakwez kadap mwin Kristu mwawonsu ubatishinau ukwikal mbay wa uruw muwamp kud ey. Chawiy ufanyidin kwiyipul anch: ‘Ntong ik nikweta mu mwom? Mikadil ik ya usey nikatina anch mbay nam wa uruw ikala nich? Yom nichingejina yid yisikena?’ w24.05 20 par. 1; 21 par. 3

Mud antu endijadina, mutapu ik ukutwishanya kupwish milong yikutwisha kushiken chisu ni chisu? Ov, yiney yimekeshin anch urund wen uyilap nawamp? Bwat kwau, antu in awonsu akat kupwitamijan yisu yimwing. Uruw ukash uyibombining antu aad akutwisha kusal pamwing mulong wa kupandakan milong. Chawiy mutapu upwishinanya milong katat ukumekesh anch uruw wen ukwikal uwamp. Mud ambay a uruw, iyipulany anch: ‘Ov, tukat kwambamb nawamp ni mu kalimish? Tukat kwitiyin kurumbuk kwetu ni kusal usu wa kuswimp? Tuswapeling kwitiyin, kwit dilikishin ni kulikishijadin?’ (Efes 4:31) Chawiy, Ang wamanany anch mu kwendijadin kwen mud milong yikash, milong yiney yikupwap kwau ap anch watijanany. Anch waman anch muntu kadap kand muwamp kud ey, kwimik kwendijadin ukwikal mupak uwamp kud en awonsu aad. w24.05 29 par. 12

Tukwikal chilakej chiwamp kud antu akwau anch twiminy daang mu yom yiwamp ni anch tukat kukwat mipak yimedina pa mbil ja Bibil. Pa tuyila mukupam mu ritiy ni mu ronganyin rakin, tukat kukasikan mu uyakin. Tudap antu akad kutwish kukwat mipak ap aswapela kuperol oku ni oku nich mafundish ma makasu ni mutapu wa kutong wa mangand. (Efes 4:14; Yak. 1:6-8) Tukat kuyikwash kand arishina ni yoziu. (1 Tes. 3:2,3) Amakurump afanyidin kwikal in kuyikel yaku yau, akweta manang mawamp, in kusal yom pakad kanvundangesh, ni isikena. Amakundj inay akat kuyikwash akwau kwikal ni ritiy rikash kusutin ‘kulamat ba ku dizu dishinshamena.’ (Tit. 1:9; 1 Tim. 3:1-3) Kusutin chilakej chau ni mudimu wau wa ukafung, amakurump akat kuyikwash in kulejan kwikal nich mushiku wa kukumangan, wa kulejan, ni wa kusal dilejan dau da pakampwil. Chisu chirishinau akadivar nau anambaz nich milong yiyakamishina, amakurump akutwish kuyikwash kusutin kuyivurish kumuchingejin Yehova ni kushinshikin pa kushilamu kwend. w24.06 31 par. 16-18

Padingay pa divu, Yesu wayifundisha antu anch Tatukwend uswakeling kuyilikishin anch asal chitil. Shinshikinany rusang ruwamp ra mwan washadika. Mwan winou nsand watonda kudokal ku chikumbu ni kusal yom yimwing yiyimp nakash. Pakwez kupwa kwa chisu kanang, ‘wachirisha manang’ ni wachirika ku chikumbu. Mutapu ik wasalay tatukwend? Yesu walonda anch “pachadingay kulemp ni kwol kwau, tatukwend wamumana, wamwovila riy nakash. Ndiy waya mau, wamubwikat mwanend, wamulangwisha nich kususu ku kan.” Mwan kachingejinap anch tatukwend ukumulikishin. Chawiy wamwita anch ukutwish kusal mud kashalapol ku chikumbu. Pakwez tatukwend waswakala kumulikishin. Wamutazuka anch “mwanam” ni wamuchirisha pa ndond yend ku chikumbu. Tatuku walonda anch: “Wading washadikin kal, pakwez katat wamekan kal.” (Luka 15:11-32) Padingay Yesu mwiur kurutu kwa kwez pa divu, chakin kamu wamana tupamp tuvud mutapu Tatukwend wayanakenangay akayitil ni kuyilikishin swa anch akarumuk. Rusang riner ratulejay Yesu ritwongojin chakin kamu ni rimekeshin mutapu uday Tatukwetu, Yehova, mwin ranaken! w24.08 11 par. 11-12

Mwin Kristu ukweta ­manang mawamp ukat kwikasikeshang kukwat mipak yiwamp yikwatijadina ni chitongijok cha Yehova. Mwin Kristu winou wijing anch kwikil chom chida cha usey nakash kusutamu urund wend ni Yehova. Ukweting chitongijok chiwamp piur pa amwinend, ni witiyining kand anch kijap kamu yom yawonsu. Ukat kumekesh kand anch umuchingejidin Yehova kusutin kumulembil chisu chawonsu nich kwikepish. Tufanyidin kudandamen kumulembil Yehova ap anch tutongin anch yom yimwing yituswapedining kwetu kusal. Pakampwil anch tukimbin kukwat mipak ya usey nakash, tufanyidin kumulembil Yehova chakwel atutakel, ni kwikal ni kashinsh anch ndiy kamu wija yom yida yiwamp kud etu. Tumujikitishin Yehova nakash mulong watutanga ni ukaliweny wa kwimburij mikadil yend. (Dis. 1:26) Chakin kamu, tukutwishap kumwimburij Yehova mu mutapu uwanyidina.​—Isay 55:9. w25.03 12 par. 13, 17-18

Kangal kuyirumburish antu akwau. Anch antu akwau kasangaredinap yom tuyisadidina, tukutwish kwiyipul anch: ‘Ov, ading kamu antu akad kujikitishang, anch avuramenang kwau kujikitish?’ Pamwing ap kud mayingishin makwau masadina anch alik kutujikitish mud twada tuchingejina. Antu amwing akutwish kwikal ni muchim wa kujikitish pakwez chiyikasikedin kumekesh patok mu mazu. Akutwish kwiyov nayimp anch atambul ukwash, pakampwil anch ading ni mutapu wa kupan pakur. Pakwez anch tuyikatin kamu akadivar nau anambaz netu, tukutwishap kuyirumburish, tukudandamen kuyinkish kwa kwikatin. (Efes 4:2) Ikal mwin kushimpish muchim. Pa mulong utadina kupan, Mwant mwin manang Salomon wafunda anch: “Pan, ujindjik, chakwel wez utambul kand.” (Mul. 11:1) Mazu minam matufundishin anch yisu yimwing antu akutwish kutujikitish kupwa kwa machuku mavud. w24.09 30 par. 18-19

Yisu yimwing akat kwijikish mu chikumangen anch muntu kanang amupupin. Anch chashiken mwamu, tukutwish kudandamen kwibomb ni muntu winou, mulong twij anch wakarumukin ni walikinap mwikadil wend uyimp. Ukushal mu chikumangen ni ukwet kuswir kwa kumukasikesh kud akadivar ni anambaz chakwel adandamen kusal yom yiwamp. (Heb. 10:24, 25) Pakwez, kud kushalijan ni muntu wadoshinau mu chikumangen. Tukat kuziyin mbil yilondina anch “kangal wadandamenany kwibomb” ni muntu winou ni “ufanyidinanyap ap kuda ni muntu wa mutapu winou.” (1 Kor. 5:11) Ov, chinech chirumburik anch ik tufanyidin kumudiwul rawonsu muntu winou? Bwat. Chid chakin anch tufanyidinap kwibomb nend. Pakwez in Kristu akutwish kusadin kom kau kafumbinau kud Bibil mulong wa kukwat mupak anch akumutazuk muntu wadoshinau kal mu chikumangen chakwel eza ku yikumangan​—pamwing ap mwanamakwau ku mujimbu ap ud muntu wadinga nau piswimp kurutu kwa kumudosh mu chikumangen. w24.08 30 par. 13-14