Ngond wa 2

Akadivar akweta mikadil yiwamp ya mu spiritu, akutwish kukwash chikumangen nakash. Ikundj ‘wisikena’ uding mwin kulet chisambu. Anch ukimbin kwijikan mud muntu wisikena, yitesha antu akwau ni kulimish yitongijok yau. Chilakej, anch amakurump avud akwat mupak kanang ukwatijadina ni mbil ja Bibil, ufanyidin kuwitiyij ap anch ukwet chitongijok chindj. Ukatap kuyishindin antu akwau kusal yom mud muukatina ey. Ukat kusanger yitongijok ya antu akwau. (Dis. 13:8, 9; Jnsw. 15:22) Pa ndond pa kwikal muntu mukash, ud muntu witudishina ni ukweta nkeu. Ikundj mwin chisambu, ukat kusal usu nakash wa kulet chisambu ap mu yishiken yikash. (Yak. 3:17, 18) Ukat kulond mu mutapu wa kalimish ap kud antu akad kwitiyij yitongijok yend.​—Ank. 8:1-3; Jnsw. 25:15; Mat. 5:23, 24. w24.11 23 par. 13

Ap anch Kristu wafa “kapamp kamwing rawonsu,” pakwez udandamedin ni katat kwipan nakash mulong wetwetu. (Rom 6:10) Mutapu ik? Udandamedin kusal usu wa kutwinkish yom yivud yiwamp tukutwisha kutambul nlel mulong wa difut. Tal yom yisadinay. Ud Mwant wetu, Mwin Kupesh Mujim ni ntakel wa chikumangen. (1 Kor. 15:25; Efes 5:23; Heb. 2:17) Ndiy ukweta chisend cha kukumangej in Kristu azizidilau many ni chisak chijim, mudimu ukupwishay kusal kurutu mar makash mapwa. (Mat. 25:32) Ukat kusal kand usu wa kwikal ni kashinsh anch atushalapol end ashinshamena ayidishin nawamp mu spiritu mu machuku minam ma nsuden. (Mat. 24:45) Ni mu Winyikel wend wa Mivu Kanan, ukuyikel mulong wa uwamp wetu. Chakin kamu Yehova wamupana Mwanend mulong wetwetu! w25.01 24 par. 12

Anch Yehova watulikishin yitil yetu, chid mud twayisalap kwetu ni tukutwish kwikal ni kashinsh anch kakutwishap kand kutupup mu machuku ma kurutu. Chinech chitukwashin kwikal ni urund uwamp ni Tatukwetu wa mwiur. Pa chisu chawiy chimwing, tukat kuvurik anch dilikishin dakin chid chipan. Yehova ndiy ukata kuchipan ku rukat ni ku ranaken rend rijim rikatay kuyimekeshin akayitil. Chid kwau chipan chamwamu. Tumujikitishin nakash Yehova mulong wa dilikishin dend! (Kus. 130:4; Rom 4:8) Pakwez, anch tukatin anch Yehova atulikishin, kud chom cha usey tufanyidina kusal. Yesu walonda anch: “Anch en walikany kuyilikishin akwen kurumbuk kwau, Tatukwen niyend kakukulikishinanyap kurumbuk kwen.” (Mat. 6:14, 15) Chawiy komb, tufanyidin kumwimburij Yehova kusutin kuyilikishin antu akwau. w25.02 13 par. 18-19

Shinshikin piur pa antu a mu Sodom ni Gomor. Ikundj utentamina Lot wading ushich pakach pau. Pakwez, ov, twij anch Lot wayileja antu awonsu? Bwat kamu. Ading kamu antu ayimp, pakwez awonsu ading ij kamu yom yiwamp? Tuvurikany anch amakundj avud mu musumb eza mulong wa kuyilal ku usu angendj ading kwa Lot. Bibil ulondin anch chisak cha antu “eza ombamu chikumbu dung.” (Dis. 19:4; 2 Pita 2:7) Twij kamu nawamp anch Yehova Nzamb wa ranaken wayifishin kal kamu nich antu inay awonsu pakad ruchingej ra kuvumbuk? Yehova wamwinkisha Aburaham kashinsh anch mu musumb mwadingap antu dikum atentamina. (Dis. 18:32) Chawiy ading antu akad kutentam ni Yehova wading ni diyingishin da kuyishesh. Tukutwish kulond kand ni kashinsh anch, kwikil pakach pau muntu ukuvumbuka ku ‘divumbuk da antu akad kutentam’? Bwat, tukutwishap kulond mwamu nich kashinsh! w24.05 2 par. 3; 3 par. 8

Mulong wa kurish ni milong ya kuburen nfalang, antu amwing itiya midimu yayita kusha majuku mau, pakwez avud ajingunin kal anch wadingap mupak wa manang. Kurutu kwa kwitiy mudimu usu, kangal washinshikin ching kusu kwau pa nfalang ukutambula, pakwez shinshikin kand pa urund wey ni Nzamb. (Luka 14:28) Iyipula anch: ‘Yom ik yikushikena mu uruw wetu anch namusha mbay nam wa uruw mu chisu chilemp? Ov, nikwikal ni mutapu wa kukumangan, kusal mudimu wa kulejan ap kusutish chisu ni akadivar nau anambaz?’ Anch ukwet an, ukutwish kwiyipul kand chipul chinech cha usey: ‘Mutapu ik nikutwisha kuyikwash an am ni kuyilil “mu dipup ni mu umutakel wa Yehova” anch nidap nau piswimp?’ (Efes 6:4) Chisu ukwatina mupak, lik yitongijok ya Nzamb yikutakel pa ndond pa kulondul yitongijok ya antu a mu dijuku ap aruney akad kulimish mbil ja Bibil. w25.03 29 par. 12

Mwin Kristu wakad kukul akutwish kumupumbul kusutin “makasu” ni yom “yitenchikinau ya makasu” ni akutwish kumoz kusutin yitongijok ya kwel anch yom yibudikina kwau ni ya in kupumbok. Ukutwish kuyovil antu akwau mukau, kupwitamijan nau, ap kwikal mwin kujiman swa ni ukutwish kusal yom yiyimp anch amupak. (1 Kor. 3:3) Mifund yikat kufanakesh mutapu ukatay muntu kukul mu spiritu ni kukul kwa mujimbu. (Efes 4:15) Kud yom yivud yakadingay mwan kwijik pakwez ukwet kuswir kwa muntu mukurump mulong wa kumutakel ni kumuchidij. Chilakej, maku ukutwish kumulej mwanend kumukwat ku makas pamatikinau njil. Payilay mwan mukupam, makwend ukutwish kumulik kwauk njil amwinend, pakwez ufanyidin kwikal nich kashinsh anch kwikil motak usutina. Anch mwan wikal kal mukurump, ukwijik mutapu wa kwipuk ubaj. Chilik chimwing anch in Kristu akudina akwat mipak, akat kushinshikin pa mbil ja Bibil mulong wa kwijik chitongijok cha Yehova pa mulong winou, kupwa akat kuusadin. w24.04 3 par. 5-6

Mu mivu yivud nakash, angendj a Nzamb ading kusu awiy ashiching mwiur pamwing ni ndiy. Mu kusut kwa chisu, Yehova watandurila mwinkand wend mulong wa kwandjikamu antu a pa divu. Pa chisu chinicha, pakach pa angendj end pading antu mud Enok, Nowa, Aburaham, ni Yobu. Bibil uyilejen atushalapol inay akin, mud arund a Nzamb, ap antu endang “pamwing ni Nzamb.” (Dis. 5:24; 6:9; Job 29:4; Isay 41:8) Kudosh kamu mu yitot ya mivu, Yehova udandamedin kutazuk arunend kwikal angendj end. (Ezek. 37:26, 27) Chilakej, uprofet wa Ezekiel utufundishin anch Nzamb ukatin kamu anch atushalapol end ashinshamena ikal mu urund wa piswimp ni ndiy. Washilamu kusuk nau ‘mansuk ma chisambu.’ Uprofet winou wisambidin chisu chikwikalau antu akweta ruchingej ra kuya mwiur, ni antu akweta ruchingej ra kushakam pa divu mu uumwing mu mwinkand wend wa chifanakesh mud “chisak chimwing” cha amikoku. (Yoh. 10:16) Yawiy kamu yisadikina katat! w24.06 2 par. 2, 4; 3 par. 5

Mulong tud antu a Yehova, tufanyidin kunung chikas ku Want wa Nzamb, pakwez chinech chitin kutakaman mulong wa kusal mwamu. (Mat. 6:33) Chilakej, mu mangand minam mayimp, tukwet kuswir kwa kutakaman mulong wa kushakam kukwatijan ni mbil ja Yehova ni mulong wa kusal mudimu wa kulejan. Chikwau, mangand maurokin nakash kamu mulong wa milong ya politik, chawiy tufanyidin kwikal atakamena mulong wa kulik kwikal ku mutambu kanang. (Yoh. 18:36) Antu avud pakach pa antu a Yehova arishin ni milong ya kuburen nfalang, kuyibul ap kuyitek mu rukan mulong alikin kwiyandjik mu milong ya politik ni mu usalay. Tukutwish kwikal ni usu ni kutakaman anch twashinshikin yilakej ya antu anunga chikas ku winyikel wa Yehova nich kutakaman. Padingay pa divu, Mwant wetu Yesu Kristu walika nich kutakaman kwikal ku mutambu kanang wa politik wa mangand ma Satan. (Mat. 4:8-11; Yoh. 6:14, 15) Wachingejina kand pa usu wa Yehova. w24.07 3 par. 4; 4 par.  7

Yehova wafundikisha rusang riner ra ushon mulong wa uwamp wetu. Ritukwashin kutesh nawamp mulong wak ukisining nakash chitil. Chitil chikat kutwauril ni Tatukwetu, ni chikat kuletish rufu. (Isay 59:2) Chinech chawiy chisadina anch Satan, ntombwij waletisha kanrumbangesh kinak, akat nakash chitil ni kukimb kuyibachik antu kuchisal. Chawiy pasalay Adam ni Ev chitil, pamwing ap Satan watonga anch wakangesh kal rutong ra Yehova piur pa antu. Pakwez wavuramena anch Yehova ud Nzamb wa rukat nakash. Nzamb kaswimpap ap pakemp rutong rend piur pa an a Adam ni Ev. Uyikatin antu, chawiy wayinkisha kapamp kamwing ruchingej. (Rom 8:20, 21) Yehova wading wij anch an amwing a Adam ni Ev afanyina kutond kumukat ni kukimb ukwash wend mulong wa kurish ni chitil. Ni mud Tatukwau ni Sakatang wau, wafanyina kuyinkish mutapu wa kukwasinik ku chitil ni kusej piswimp ni ndiy. w24.08 3 par. 3-4

Atushalapol a Yehova avud akwatakening nakash. Tukat kusal midimu ya ku mujimbu mulong wa kuwanyish maswir ma dijuku detu. (1 Tim. 5:8) In Kristu akwau alamin ayej ni anamakwau ananapina kal. Ni avud pakach petu tukwet kuswir kwa kubangin ukash wa mujimbu wetu, ni chinech chitining chisu nakash. Kudoshaku yisend yiney, tukwet kand yisend yikwau mu chikumangen. Chisend cha usey nakash tukweta chid cha kulejan rusang ruwamp. Kutang Bibil chid pakach pa ‘yom yida ya usey nakash’ kud etu in Kristu, chawiy tufanyidin kwikal ni kashinsh anch tukweting chaku cha kusal mwamu. Piur pa muntu ukweta musangar, verse wa kusambish wa Kuseng ulondin anch: “Ukat kusangar pa kulondul yijil ya [Yehova], ukat kuyilej muten ni uchuku.” (Kus. 1:1, 2) Choviken patok anch tufanyidin kwitekin chisu mulong wa kutang Bibil. Chisu ik chiwamp cha kutang Bibil? Muntu ni muntu ukutwish kutond chisu chida chiwamp kud ndiy. Pakwez chida cha usey chid kwitekin chisu chikutwisha kutukwash kutang Bibil pakad kujing. w24.09 3 par. 5-6

Ov, in Kristu aswila kakwetap kuswir kwa ukwash wa muntu mukwau? Bwat kwau. Antu aswila akweting niyau kuswir kwa kwit ukwash chisu chimwing. Muntu wakad kupam mu spiritu ukat kuchingel chakwel antu amulej yom yifanyidinay kusal ap mipak yifanyidinay kukwat. Mwin Kristu ukudina mu spiritu, kumutambu ukwau, anch wit ukwash kud antu akwau ukat kusadin manangu ni ukaliweny mulong wij anch chid chisend chend cha kukwat mipak yichingejinay Yehova anch muntu “asend chisend chend amwinend.” Mud mushalijadiningau antu amakurump ku mujimbu, in Kristu akudina kal mu spiritu ashalijadining mu mikadil ya mu spiritu mud mu manang, kutakaman, kupan, ni ranaken. Chawiy, anch in Kristu aad aswila arish ni mulong wa mutapu umwing, akutwish kukwat mipak yishalijadina pakwez yimedina pa mbil ja Bibil. Chom chinech chikat kushiken anch in Kristu akwat mipak yimedina pa kom kau. Anch ikal nich kashinsh kinak, akutwish kwipuk kurumburishijan umwing ni mukwau. Pakwez,akudandamen kwikal mu uumwing.​—Rom 14:10; 1 Kor. 1:10. w24.04 4 par. 7-8

Yom ik ukutwisha kusal anch udandamedin kwiyov anch ukwetap usey? Tang ni kutongijokin pa maverse ma Bibil makwinkishina kashinsh anch ukwet usey ku mes ma Yehova. Anch wakangeny kuwanyish mupak kanang, ap anch uziyin mulong utwishinap kusal yom mud antu akwau, kangal wifish nich. Yehova kachingejinap anch usal yom yikusutina chipim. (Kus. 103:13, 14) Anch muntu wakusadina mu mutapu uyimp pakur, kangal wifish nich mulong wa yom yakushikena. Vurik anch Yehova ukuyirumburish in kuyisadin akwau mu mutapu uyimp, pakwez ukat kuyikwash antu asadidinau mu mutapu uyimp. (1 Pita 3:12) Ikal ni kashinsh anch Yehova ukutwish kukusadin mulong wa kuyikwash antu akwau. Wakwinkisha dilau da kusal nend mudimu pamwing mu mudimu wa kulejan. (1 Kor. 3:9) Mulong wa yikokujol warisha nich, chikutwish kukuswapel kutesh mutapu wiyovilau antu akwau arishina ni yikokujol. Ukutwish kusal yom yivud mulong wa kuyikwash. w24.10 7-8 par. 6-7

Yehova ukatin anch atusadin mu mutapu uwamp ni ukat kuman anch antu akwau atusadin mu mutapu uyimp. “[Yehova] ukatil kutentam.” (Kus. 37:28) Yesu utwinkishin kashinsh anch Yehova ukulet kutentam pakad kulab pa chisu chiwanyidina. Ni piswimp ap ukudosh kamu yom yawonsu yituletidina mar ni kakulikidilap kand chakwel tumana mar madokila ku kuburen kutentam. (Kus. 72:1, 2) Tufanyidin kuchingel chisu chikupwishay Yehova milong yawonsu, pakwez ap nlel ukat kutukwash anch antu akwau atusadin mu mutapu uyimp. (2 Pita 3:13) Chilakej, ukat kutufundish mutapu tufanyidina kusal anch atusadin mu mutapu uyimp mulong wa kwipuk milong yivud. Kusutin Mwanend, Yehova watushila chilakej chiwamp piur pa mutapu wa kurish ni kuburen kutentam. Utwinkishin kand yiyul mu Bibil piur pa yom tukutwisha kusal anch muntu watusadin mu mutapu wakad kutentam. w24.11 2-3 par. 3-4

Yesu upanin mbil chakwel ayidisha yisak ya antu, winou wading kamu mulong ujim, mulong kwading piswimp amakundj 5 000. Ni anch twawejaku amband nau an, chimeken anch chading chifanyidin kudish antu 15 000. (Mat. 14:21) Andre walonda anch: ‘Kunoku kud nsand ukweta mikat yitan ya wung wa masang ni tuyish twaad. Pakwez ov, yom yiney yikutwish kuyiwanyin antu avud mwamu?’ (Yoh. 6:9) Mikat ya wung wa masang ayidangang kud atuzwendj ni antu akwau ni chimeken anch tuyish twading tuumin, twakutek mung. Pakwez yom yadingay ni nsand winou yafanyinap kuyiwanyin antu inay awonsu, kimwauyap? Mulong wakata kumekesh mwikadil wa kupan, Yesu wayileja antu kushakam pa masuku mu yisak. (Mar. 6:39, 40; Yoh. 6:11-13) Kupwa, Yesu wamujikitisha Tatukwend mulong wa mikat ni ansh. Mu kusal mwamu, wamekesha anch Nzamb ndiy kamu wading Musul wa yakuda yiney ni wamekesha kujikitish mulong wa yakuda. Niyetu tufanyidin kulondul chilakej cha Yesu kusutin kulembil kurutu kwa kuda, twikal ayinetu, ku mudimu, ku shikol ap ni dijuku detu. Kupwa Yesu wayileja in kwilej end kuyangen antu yakuda ni awonsu ada ikut. w24.12 2-3 par. 3-4

Padingay pa divu, Yesu wamutumbisha Tatukwend kusutin kulond anch Ndiy wading Musul wa yilay yasalangay. (Mar. 5:18-20) Wapana kand katumb kud Yehova kusutin yom yalondangay piur pa Tatukwend ni yom yayisadinangay antu akwau. Dichuku dimwing, Yesu wading ukat kufundish mu Sinagog umwing. Pakach pa antu ading amuteshina pading mband umwing wading ukweta chilembil kudosh mivu 18. Chilembil wading wamufumba kal nyim ni kadingap ni mutapu wa kwonik. Chading kamu chikokujol chikash kud mband winou! Mulong wamwovila riy, Yesu wamusejina ni wamuleja nich ranaken anch: “Mband ey, mayej mey mapwa kal.” Kupwa, wamwazuka makas ni kapamp kamwing mband winou wonika ni “wasambish kumutumbish Nzamb.” Wamujikitisha Yehova nakash mulong wamukwasha kamu kwikal ni ukash wa mujimbu uwamp! (Luka 13:10-13) Mband winou wading kamu ni mayingishin ma kupan katumb kud Yehova, chilik chimwing kand niyetu. w25.01 2-3 par. 3-4

Ov, tukutwish kand kutambul yom yashadishay Adam ni Ev? Tukutwishap kusal mwamu ku usu wetu ayinetu. (Kus. 49:8-9) Pakad ukwash, twafanyinap kwikal ni ruchingej ra kwikal ni mwom mu machuku ma kurutu ap ruchingej ra divumbuk. Rufu retu rela kwau kwikal mud ra annam. (Mul. 3:19; 2 Pita 2:12) Tatukwetu wa rukat, Yehova, watwinkisha chipan mulong wa kufut dibaz da chitil chatuswanishay Adam. Yesu walonda anch: “Nzamb wakata ngand nakash, ndiy wamupana Mwanend kapwokal chakwel muntu mwawonsu ukumwitiyija ndiy kakujiyap, pakwez ukez kwikal nich mwom wa chikupu.” (Yoh. 3:16) Chikwau kand, chipan chinech chitukwashin kand kwikal ni urund wa piswimp ni Yehova.Tukutwish kutaninamu mu chipan chinech chiwamp chakwel atulikishin yitil, ap “mabaz” metu. w25.02 3 par. 3-6

Yom ik yamukwasha Saul kutambul dibatish? Pamumekenau kud Yesu, Saul wikala mputames. (Mid. 9:3-9) Mu machuku masatu, wajila yakuda ni chimeken anch watongijokina nakash pa yom yamushikena. Mwaning, Saul wikala ni kashinsh anch Yesu wading kamu Mesiya ni anch in kwilej end ading kamu mu relijon wakin. Kud malejan tukutwisha kwilej kusutin chilakej cha Saul. Wafanyina kulikidil chibud ni wom wa antu yimukangesh kutambul dibatish. Pakwez kasalap mwamu. Saul wakata kwikal mwin Kristu ap anch wading wij anch akumuzengol. (Mid. 9:15, 16; 20:22, 23) Kupwa kwa kumubatish, wadandamena kuchingejin ukwash wa Yehova mulong wa kujijamen yikokujol kushalijan. (2 Kor. 4:7-10) Anch watambul dibatish mulong wa kwikal Kaman wa Yehova, ukutwish niyey kurish ni yikokujol yikutwisha kupak ritiy rey. Pakwez ukutwish kwikal nich kashinsh anch Nzamb ni Kristu akukwinkish ukwash uswirikedina mulong wa kujijaman ni kushal ushinshamena.​—Filip 4:13. w25.03 4 par. 8-9

Kutang Bibil kud kwa usey nakash. Pakwez, tufanyidin kusal kand yom yikwau anch tusotin kutaninamu mu yom tutanigina mu Bibil.Tongijokin pa chilakej ech: Mutond ukweting kuswir kwa mem mulong wa kudandamen kwikalaku. Pakwez anch ruval muvud wanak mu chisu chikemp, divu dikutwish kuyip. Anch chikal mwamu, ruval muvud kakwikalap kand wa usey. Divu dikweting kuswir kwa chisu mulong wa kuna mem ma ruval ni mulong wa kudish mitond. Chilik chimwing, tufanyidin kwipuk kutang Bibil mau mau mu chilik cha kukangany kutongijokin pa yom tutangina. (Yak. 1:24) Ov, wamen kal anch kud chisu ukata kutangang Bibil mau mau nakash? Yom ik ufanyidina kusal? Tang pakemp pakemp. Sal usu wa kutongijokin pa yom utangina ap yawapwisha kal kutang. Chikasikenap kwau kusal mwamu. Ukutwish kwitekin chisu chivud cha kwilej mulong wa kutongijokin pa yom utangina. w24.09 4 par. 7-9

Anch atambul umutakel, amakurump afanyidin kutang nawamp ni kusal usu wa kuusadin. Akat kutambul umutakel chidap kwau ching mutapu wa kusal yikunku ku yikumangan ni mutapu wa kulembil pakwez kand mutapu wa kubangin amikoku a Kristu. Anch amakurump alondul umutakel wawonsu udokila ku dirijek, akadivar nau anambaz akat kwiyov anch Yehova uyibangidin. Anch twatambul umutakel udokila kudau amakurump, tufanyidin kamu ku uziyin. Anch twasal mwamu, chikuyiswapel antu atakedina kusal mudimu nawamp. Bibil utukasikeshin kuyiziyin antu akata kututakel. (Heb. 13:7, 17) Yisu yimwing chikutwish kwikal chikash. Mulong wak? Mulong amakundj inay ad antu akad kuwanyin. Pakwez, anch twashinshikin pa mikadil yau yiyimp ni twalik kushinshikin pa yiwamp, tukuyiman mud ad akankuny netu. Mulong wak tulondina mwamu? Chikutukasiken kuchingejin mu dirijek da Nzamb. w24.04 10 par. 11-12

Antu awonsu akufa pa chisu cha mar makash, ov, akufa kamu rawonsu pakad kwikal ni ruchingej ra divumbuk? Mifund yilejen patok anch antu akad kutentam akumubwambwila Yehova akuyishesh ku Armagedon kakuvumbukap. (2 Tes. 1:6-10) Pakwez chid nchik piur pa antu akwau, chilakej, antu afa kuyishiken yidokila ku yom yatangau, ku akisidan ap ajipau kud antu akwau? (Mul. 9:11; Zak. 14:13) Ov, amwing apakach pa antu inay akutwish kwikal pakach pa “antu akad kutentam” akuvumbulau mwingand yisu? (Mid. 24:15) Twijap kamu nawamp. Pakwez twij chakin kamu yom piur pa yinship ya machuku ma kurutu. Chilakej, twij anch ku Armagedon, antu akuyirumburish kukwatijan ni mutapu ukuyisadinau akadivar nend a Kristu. (Mat. 25:40) Ni antu akuyikwasha azizidinau many ni Kristu akuyirumburish mud amikoku.​—Kuj. 12:17. w24.05 10-11 par. 9-11

‘Machukuma kwinsuden makez kwikal ma mar nakash’​—wawiy mutapu ulejenay Bibil piur pa machuku tushicha. (2 Tim. 3:1) Atushalapol a Yehova akat kurish ni milong yirishinau nich antu awonsu mu mangand minam mayimp ma Satan. Yom ik yikutwisha kutukwasha kudandamen kumwifukwil Yehova chikalap nchik milong yiney? Diyingishin did anch mulong twij anch Yehova ukat kutukwash ni twij anch ud “Nzamb mwom.” (Jer. 10:10; 2 Tim. 1:12) Yehova ud muntu wakin udaku ukata kutukwash, ni ukat kukimb chisu chawonsu mitapu ya kutukwash. (2 Jsng. 16:9; Kus. 23:4) Anch twavurik anch Nzamb wetu ukat kutubangin ni ud kwaku chisu chawonsu mulong wa kutukwash, tukutwish kwikal ni usu wa kujijamen chikokujol chin chawonsu chikutwisha kutushiken. w24.06 20 par. 1-2

Tufanyidin kudandamen kuchingejin dirijek da Yehova. Anch chamekan patok anch kud kuswir kwa kurijek mutapu wetu wa kutesh uyakin umwing wa Bibil ap chom kanang piur pa mutapu tukata kumusadin Yehova, akadivar atakedina kakatap kwidjidjek kuswimp. Akat kusal mwamu mulong akatining kumusangaresh bil Yehova. Akat kusal kand usu wau wawonsu mulong wa kukwat mipak yimedina pa Dizu da Nzamb, chilakej chifanyidinau kulondul antu awonsu a Yehova. Kambuy Paul wakasikeshana anch: ‘Lam daang chilakej cha mazu mawamp.’ (2 Tim. 1:13) Mazu ‘chilakej cha mazu mawamp’ mamekeshin mafundish ma win Kristu mada mu Bibil. (Yoh. 17:17) Mafundish mud minam wawiy mufulandal wa yom yin yawonsu twitiyijina. Dirijek da Yehova ditufundishin kulam daang chilakej chinech. Anch twadandamen kusal mwamu, akutuyukish. w24.07 11-12 par. 12-13

Mulong kambuy Pita wijika mutapu wiyovilingay muntu anch wakarumuk ni amulikishin, wading ni mutapu wa kuyifundish antu akwau piur pa kukarumuk ni piur pa dilikishin. Chisu chikemp kupwa kwa musambu wa Pantekot, Pita wafundisha kurutu kwa chisak cha in Yuda akad kwitiyij, wayirumburila anch awiy amujipa Mesiya. Pakwez, wayikasikesha nich rukat anch: ‘Chawiy karumukany ni chirikany chakwel yitil yen ayijimwangesh, chakwel yirung ya kwiswedish yeza kud Yehova amwinend.’ (Mid. 3:14, 15, 17, 19) Pita wafundisha anch kukarumuk kukat kumubachik muntu kuswimp, charumburik anch kuswimp yitongijok ni yisal yiyimp, kwimik kusal yom yiyimp, ni kusambish kusal yom yimusangareshina Nzamb. Kambuy Pita wamekesha kand anch Yehova wafanyina kulikishin yitil yau ni kuyikusul chikupu. Ruchingej ruwamp mud ik rikwetau in Kristu anch asal chitil​—ap anch chikalap nchik chitil chikash! w24.08 12 par. 14

Anch tukwet kashinsh anch Yehova ukushesh mangand minam mayimp piswimp ap, chinech chikutwish kutukwash kulik kutong anch kwikal ni yom ya ku mujimbu chawiy chom cha usey nakash. Pa chisu cha mar makash nfalang jikwikalap kand ni usey, antu ‘akez kudjibul utad wau wa or, ni wa argent mu mikombil’ mulong akuman anch ‘utad wa argent ap wa or kiukutwishap kuyipandish pa dichuku da ujim wa Yehova.’ (Ezek. 7:19) Pa ndond pa kukimb nfalang nakash, tufanyidin kukwat mipak yikutwisha kutukwash kuwanyish maswir metu ni kutukwash kumusadin Yehova. Chinech chirumburikin anch tufanyidin kwipuk kutambul mabaz makad usey ap kusutish chisu chivud mulong wa kwitutin yom ya ku mujimbu. Tufanyidin kand kubabal nakash chakwel kangal yom ya ku mujimbu yikal ya usey nakash mu mwom wetu. (Mat. 6:19, 24) Pitudandamedina kusej piswimp nakash ni disuden da mangand minam, tufanyidin kutond nany tukuchingejina: Yehova anch yom ya ku mujimbu. w24.09 11 par. 13-14

Tukutwish pamwing ap kupandakan kuziy kwetu kapamp kamwing. Pakwez tukutwish kudandamen kurish ni kuziy kumwing mu chirung chilemp. Shinshikin yom yamushikena kambuy Pita. Wamutuna Yesu tupamp tusatu mulong wova wom wa antu. (Mat. 26:69-75) Kupwa Pita wapandakana kuziy kwend mulong walejana nich kutakaman piur pa Yesu kurutu kwa in Sanedrin. (Mid. 5:27-29) Pakwez mu kusut kwa mivu, “wova wom wa antu eza mulong awiy ading asotila kuyitwal antu a michid yikwau ku mukand,” wimika kuda nau in Kristu a michid yikwau. (Gal. 2:11, 12) Pita wachirikina kand kuziy kwend. Pamwing ap wom wend wapwap kamu kapamp kamwing. Niyetu yom yiney yikutwish yatushiken. Pakwez, tukutwish kurish kuziy kwinoku anch twalondul chiyul cha Yesu chilondina anch: “Dandamenany kuchish ku mes.” (Mat. 26:41) Ap chisu wiyovila anch ukasiken, dandamen kwipuk yom yikutwisha kukutwal ku choziu. Dandamen kudin yom yakukwasha kurishikish kuziy kwey.​—2 Pita 3:14. w24.07 18-19 par. 17-19

Kwikil muntu ap umwing wamekeshap kal muchim wa kupan mud Yesu. Padingay pa divu, Yesu wayikwasha antu akwau kwa kwikatil kusutin yilay yasalay. (Luka 9:12-17) Wapana chipan chipandakena kujimb nakash kusutin kupan mwom wend mulong wetwetu. (Yoh. 15:13) Ap kupwa kwa kuvumbuk, Yesu wadandamena kumekesh muchim wa kupan. Mud mwashilayamu, wamwita Yehova kutufundish ni kutukasikesh kusutin spiritu wend utumbila. (Yoh. 14:16, 17; 16:13) Ni kusutin yikumangan yetu, Yesu udandamedin kand kutwinkish yom tuswirikedina chakwel tutwish kuyifundish antu a pa mangand mawonsu piur pa Bibil ni kwikadish in kwilej. (Mat. 28:18-20) Kambuy Paul wafunda anch kupwa kwa Yesu kuya mwiur, ‘wayipana antu mud yipan.’ (Efes 4:7, 8) Paul warumburila anch Yesu wapana amakundj inay mulong wa kukasikesh chikumangen mu mitapu kushalijan. (Efes 1:22, 23; 4:11-13) Nlel, pakach pa antu inay apanau ‘mud yipan’ pad ankwash a mudimu, amakurump a chikumangen ni atulam a munyingumuku. Chakin kamu, amakundj inay ad antu akad kuwanyin, chawiy akat kurumbok. (Yak. 3:2) Pakwez Nsalejetu Yesu Kristu ukat kuyisadin mulong wa kutukwash, chakin kamu amakundj inay ad kamu yipan kud etu. w24.10 18 par. 1-2

David wamuleja mwanend anch, wafanyina kutwish ching anch wadandamena kumuziyin Yehova Nzamb. Cha ushon, mu kusut kwa chisu, Salomon wasambisha kuyifukwil anzamb akwau. Yehova kasangerap yom yiney ni kamwinkishap kand manang mading maswirikedinay mulong wa kuyikel antu nich kutentam ni mu mutapu uwamp. (1 Ant 11:9, 10; 12:4) Disu dilejan kud etu? Anch twamuziyin Yehova ukutuyukish ni kutukwash. (Kus. 1:1-3) Chakin kamu, Yehova katukaninap kutwinkish mapit ni katumb mud kadingay nich Salomon. Pakwez anch twamuziyin Nzamb wetu, ukutwinkish manang tuswirikedina chakwel tutwisha kukwat mipak yiwamp. (Jnsw. 2:6, 7; Yak. 1:5) Umutakel wa Yehova ukutwish kutukwash kukwat mipak piur pa mudimu, kwilej shikol, kwipuwangej, milong ya nfalang ni yom yikwau. Anch twalondul yiyul yend tukuchidij urund wetu wa piswimp ni ndiy ni tukutambul mwom wa chikupu. (Jnsw. 2:10, 11) Tukutwish kwikal ni arund awamp. Ni tukwikal kand ni musangar wakin mu dijuku. w24.11 10-11 par. 11-12

Anvaj akwet mitapu kushalijan ya kwambamb nau anau piur pa Bibil ap piur pa Nzamb. Akutwish kusal mwamu kusutin kuya kutal musée. Ukutwish kumulej mwaney mutapu ukwatijadina chom ap rusang kanang ra pakur nich yom yilejenau mu Bibil. Chinech chikutwish kumukwash mwaney kuman anch yom yifundishinay Bibil yid yakin. Ov, mwaney wij anch dijin da Nzamb adifundin pa Diyal da Mowab (Stèle de Mésha) dikweta mivu 3 000? Ukutwishany kutal yipich ya yom ya pakur mud Diyal da Mowab pa internet ap mu mikand yetu. Chikwau kand, chifatul cha Diyal da Mowab achitekin pa yom ya kutadish: “La Bible et le nom divin” yida ku Biro Mujim wa pa Mangand Mawonsu wa Atuman a Yehova ku Warwick, New York. Diyal da Mowab dimekeshin anch Mwant Mesha wa in Mowab wayibwambwila in Isarel. Mwamu mulejenau kand mu Bibil. (2 Ant 3:4, 5) Anch mwaney waman anch yom yifundishinay Bibil yid yakin, ritiy rend rikwikal kamu rikash. w24.12 14 par. 4; 15 par. 6