Ngond wa 7

Atushalapol a Yehova amwing kakutwishap kamu kusal yom yawonsu yikatinau mulong wa upal, mayej ap ulim. Chawiy akutwish kuman mud kakwetap usey ku mes ma Yehova. Akutwish kwiyipul anch: ‘Ov, kud kand yom nikutwisha kusal mulong wa Yehova?’ Muntu wafunda Kuseng wa 71 niyend warisha ni yovil ya mutapu winou. Walembila anch: “Kangal wangipuk pakupwa kwa usu wam.” (Kus. 71:9, 18) Ap mwamu, nfund a kuseng winou wadandamena kwikal ni kashinsh anch ang wamusadin Nzamb nich kushinshaman, ukumutakel ni kumukwash. Nfund a kuseng wileja anch, Yehova ukat kuyisanger antu awonsu akata kumusadin nich usu wau chikalap nchik mimbu yau. (Kus. 37:23-25) Anch ud ipal, tongin mutapu ukumenay Yehova. Ukutwish kukukwash kudandamen kuya kurutu mu spiritu chikalap nchik upal. (Kus. 92:12-15) Pa ndond pa kushinshikin pa yom wakad kutwish kusal, shinshikin pa yom ukutwisha kusal. w24.10 28 par. 14-16

In Kristu akad kuswa chikutwish kuyikasiken kukwat mipak anch kwikil mbil ja Bibil jilondina kamu patok piur pa mulong uyitadina. Anch kwikil chijil cha Bibil, amwing akat kutong anch akutwish kusay yom yawonsu yikatinau. Akwau akutwish kwit yom yifanyidinau kusal ap anch pikil kwau mbil. Chilakej, in Kristu a ku Korint amwipula kambuy Paul piur pa mbil yitadina piur pa yom yipeshinau kud akish. Pa ndond pa kuyilej yom yafanyinau kusal, Paul wayileja anch muntu ni muntu ufanyidin ‘kukwat mipak yiwamp’ yimedina pa kom kend. Wajimbula mbil ja Bibil jikutwisha kuyikwash kukwat mipak ni jafanyina kuyikwash kwikal ni kom kawamp mulong wa kulik kuyipwakesh antu akwau. (1 Kor. 8:7-9) Paul wayikwasha in Kristu a ku Korint kukul mu spiritu, chinech chafanyina kuyikwash kusadin usu wau wa kwijik kujingunin yom pa ndond pa kwikal atakedinau kud antu akwau ap kusambish kukimb anch pad mbil. w24.04 5 par. 14

Mu chirung cha Yona, in Niniv ikala ni mutapu wa kukarumuk. Chikwau kand, vurik yom yalonday Yesu piur pa “divumbuk da dirumburish.” Mu kwikal “antu awonsu asala nayimp.” (Yoh. 5:29) Chimeken anch kukutwish kand kwikal ruchingej ra antu a mu Sodom ni Gomor. Yitwishidikin anch antu amwing akutwish kuvumbuk ni tukwikal ni mutapu wa kuyifundish piur pa Yehova ni Yesu Kristu. Yehova ukat “kusand manangu ma muntu, [u]kat kupak kand muchim wend.” Pakukwatay mupak piur pa antu akuvumbulay, “[u]kupan kudi muntu mwawonsu mudi mudia mwom ni yisalijok yend.” Yehova kakuswimpap anch chitin kusal mwamu pakwez ukumekesh ranaken anch chikal cha usey kusal mwamu. Chawiy tukutwishap kulond anch muntu kakwetap ruchingej ra divumbuk ching anch twij yom yilondinay Bibil pa mulong winou! w24.05 5-6 par. 15-16

Ap pakur, uruu udokila kud Nzamb wayikasikesha atushalapol end chisu chading chirishinau ni yikokujol. Shinshikin chilakej cha muprofet Yeremiy. Widjidjeka pamwikau chisend cha kulejan kud Yehova. Yeremiy walonda anch: “Am kinijap mutapu wa kulond, mulong nichid kwam nsand.” (Jer. 1:6) Yom ik yamukwasha kwikal ni kutakaman kwa kulejan? Wachingejina pa dizu da Nzamb. Walonda anch: “Chad mazu mey makat kwinswanish mu muchim mudi kasu. pakwez kinikutwishap kulik kulond.” (Jer. 20:8, 9) Ap anch Yeremiy wading ni teritwar mukash, uruu wamwinkishau kulejan wamwinkisha usu wading ukwetay nich kuswir mulong wa kusal mudimu wa kulejan. Uruu uda mu Dizu da Nzamb ukat kuyikasikesh in Kristu. Pafundinay chikumangen cha Kolosay, kambuy Paul walonda anch kwikal ni ronganyin rakin kukutwish kuyibachik akadivar “kwikal nich mwom uwamp mudi musotilay [Yehova]” ni akudandamen “kusal machuku mawonsu yom yikatilay.”​—Kol. 1:9, 10 w24.04 14-15 par. 2-4

Sadok washala ushinshamena kud Yehova chikalap nchik mupak wa Mwin Kupesh Mujim Abiatar wakwatay mulong wa kumukwash Adonija mwan ikundj wa David watenchika mulong wa kujimbish want. David kidjidjekap mulong wa kushinshaman kwa Sadok. Pijikana yom yading yirijekinay Adonija, David wamutonda Sadok, Natan, ni Benaja kumuzizin Salomon many mud mwant. (1 Ant 1:32-34) Kwikal ni atushalapol ashinshamena a Yehova mud Natan ni akwau amununga Mwant David chikas, kwafanyina kumukasikesh Sadok ni kusal anch ikala muntu utakamena. Pikalay Salomon mwant, “wamuteka mwin kupesh Sadok pa ndond ya Abiatar.” (1 Ant 2:35) Mutapu ik ukutwisha kumwimburij Sadok? Anch muntu wa piswimp niyey watond kumulik Yehova, tond kushal ushinshamena kud Yehova. (Jos. 24:15) Yehova ukukwinkish usu ni kutakaman ukweta nich kuswir. Mulembila Yehova ni shal mu urund wa piswimp ni antu ashinshamena kud ndiy. Yehova usangaredin kushinshaman kwey ni ukukufut.​—2 Sam 22:26. w24.07 6-7 par. 16-17

Mu Kuseng 15:2, tutangin anch murund wa Nzamb ud “muntu ukata kwendil mu kashinsh ni kusadil kutentam.” Chinech chid chom tufanyidina etu awonsu kudandamen kusal. Pakwez, Ov, tukutwish kamu ‘kwendil mu kashinsh’? Mwaning. Chakin kamu, kwikil muntu uwanyidina, Yehova ukutuman mud tukat “kwendil mu kashinsh” anch twasal usu wetu wawonsu mulong wa kumuziyin. Anch twipan kud Nzamb ni atubatish, twasambish kal lel chad kwend pamwing ni ndiy. Chilakej pasak, kwikal pakach pa muchid wa Isarel kwadingap kumekeshina anch muntu ud ngendj wa Yehova. Amwing amulembilang pakwez ‘kadap mu uyakin ni mu kutentam.’ (Isay 48:1) In Isarel a kashinsh ilejang piur pa Nzamb ni aziyinang ku mafundish mend. Chilik chimwing kand nlel, mulong wa kwikal ni dilau da Nzamb, chitin kusal yom yivud kudoshaku kutambul dibatish ni kukumangan ku yikumangan ya win Kristu. Tufanyidin kudandamen ‘kusal yom yitentamina.’ w24.06 9 par. 4; 10 par. 6

Yisu mitapu yimwing yitay Yehova kutumekeshin muchim wa kupan? Tushinshikinanyaku yilakej yikemp. Yehova ukat kutwinkish yom ya ku mujimbu. Pamwing ap tukwikalap kamu nich mashakamin ma piur nakash, pakwez tufanyidin kumujikitish Yehova mulong ukat kutwinkish yom tuswirikedina. Chilakej, ukat kutukwash kwikal nich yakuda, masun ni ndond ya kushakam. (Kus. 4:8; Mat. 6:31-33; 1 Tim. 6:6-8) Ov, Yehova ukat kuwanyish maswir metu ma ku mujimbu mulong ufanyidin kamu kusal mwamu? Bwat kamu! Shinshikin yom yalonday Yesu yida mu Mateu 6:25, 26. Pisambinay piur pa atujil, Yesu walonda anch: “Awiy kakukunangap mbut, kakwangulangap ap kakutekangap yakwangul mu tusik.” Pakwez, tal yom yalonday kupwa kwa kulond mazu minam: “Tatukwen wa mwiur ukat kuyidish.” Kupwa Yesu wipula anch: “Ov, en kiukwetanyap usey kuyisutamu awiy?” Yom yiney yitufundishin ik? Chawiy anch Yehova ukat kuwanyish maswir ma annam, tukutwish kwikal ni kashinsh anch ukuwanyish kand maswir metu! Mud mukatau atatuku kuwanyish maswir metu, Yehova ukat kuwanyish maswir ma dijuku dend nich rukat.​—Kus. 145:16; Mat. 6:32. w24.09 26-27 par. 4-6

Ankwash a mudimu ad akadivar abatishinau kal akatau kutond kud spiritu utumbila mulong wa kuyikwash amakurump chakwel awanyish nawamp yom ya usey nakash mu chikumangen. Ankwash a mudimu amwing akat kuyikwash in kulejan akwau kwikal ni teritwar wa kulejen ni kupan mikand ya kulejan nich. Ankwash a mudimu ad amakundj amukatina Yehova ni akat kushakam kukwatijan ni mbil jitentamina ja Nzamb. Ni ayikatining akadivar ni anambaz nau nakash. (Mat. 22:37-39) Mutapu ik ukutwishau akadivar abatishinau kal kushiken kwikal ankwash a mudimu? Bibil ulejen mikadil yifanyidinay mukadivar kukudish anch ukimbin kwikal nkwash a mudimu. (1 Tim. 3:8-10, 12) Ukutwish kushiken kwikal ni yisend yiney kusutin kwilej mikadil yiney yida mu Bibil ni kusal usu wa kuyikudish. Pakwez cha kusambish ufanyidin kushinshikin yom yikubachikina kwikal nkwash a mudimu. w24.11 15 par. 4-5

Antu avud atangin kal Bibil tupamp tuvud nakash. Chad ov, itiyijining kamu yom yifundishinay Bibil? Ov, akat kwikasikesh kushakam kukwatijan ni mafundish ma Bibil ni kuswimp mu mwom wau? Cha ushon, yisu yivud kakatap kusal mwamu. Pakwez chidap mwamu kud atushalapol a Yehova. Tukat kusal usu wetu wawonsu mulong wa kusadin yiyul ya Bibil mu mwom wetu. Chiswapelingap chisu chawonsu kutang ni kusadin Dizu da Nzamb. Chikutwish kutukasiken kwikal ni chisu cha kutang Bibil. Ap tukutwish kutang mau mau nakash ni kulik kutongijokin pa yom yitutangina. Ap tukutwish kuziy anch twaman anch kud yom yivud nakash tufanyidina kuswimp. Chikalap nchik chikokujol tukutwisha kurish nich, tukutwish kuchipandakan ku ukwash wa Yehova. El etu awonsu tukwatany mupak wa kwikal in kusadin Dizu da Nzamb. Pakad kwidjidjek, anch twatang Dizu da Nzamb ni kudisadin mu mwom wetu, tukwikal ni musangar nakash.​—Yak. 1:25. w24.09 7 par. 15-16

Kusutin spiritu wend utumbila, Yehova ukat kutukasikesh anch yom yiyimp yatushiken. Anch unenganen nakash mulong wa chom kampand chakushikena, muleja kamu Yehova mutapu wiyovila chisu chawonsu ukatina chikalap nchik kulep kwa malembil mey. (Kus. 86:3; 88:2) Chisu chawonsu, mwita Yehova spiritu wend utumbila. Ukwakul kamu ku malembil mey. Ov, urishin ni chikokujol chikuziyishina nakash? Spiritu utumbila ukutwish kukukwash kwikal ni usu wa kudandamen kumwifukwil Yehova nich kushinshaman. (Efes 3:16) Kupwa kwa kumwit Yehova spiritu utumbila, mutapu ik ukutwisha kusal yom kukwatijan ni malembil mey? Sal yom yikutwisha kukukwash kwikal ni spiritu wa Yehova nakash, mud kukumangan ni kusal mudimu wa kulejan. Izwish manang mey ni yitongijok ya Yehova kusutin kutang Dizu dend dichuku dawonsu. (Filip 4:8, 9) Piutangina Bibil, tongijokin pa yilakej ya antu arisha ni yikokujol ni mutapu wayikwashau kud Yehova mulong wa kujijaman. w24.10 9 par. 12-14

Mud Yehova ni Mwanend, niyetu tuyikatin antu. (Jnsw. 8:31) Tukat kuyovil riy nakash antu ada ‘pakad Nzamb’ ni ada ‘pakad ruchingej.’ (Efes 2:12) Mulong wa milong yirishinau nich, ad mud antu awilang kal mu dibuku dilemp nakash. Pakwez etu tukwet moj wa kuyibudishamu nich: rusang ruwamp ra Want wa Nzamb. Rukat tukweta ni riy tuyovidina antu inay yikat kutubachik kusal usu wetu win wawonsu mulong wa kuyilej rusangu ruwamp. Uruu winou wa usey ukutwish kwizwish michim yau nich ruchingej, kuyikwash kwikal ni mwom uwamp nakash nlel, ni kuyinkish mutapu wa kwikal ni “mwom udia wakin”​—mwom wa chikupu​—mwi ngand yisu ya Nzamb. (1 Tim. 6:19.) Rukat retu mulong wa antu ritubachikin kand kuyibabesh piur pa disuden da mangand minam mayimp disejina piswimp. (Ezek. 33:7, 8.) Tukatin kuyilej yom yikusadika pa chisu chinicha cha mar makash​—relijon wa makasu akumunongish, kupwa mangand mawonsu mayimp makusheshik kwi njit ja Armagedon.​—Kuj. 16:14, 16; 17:16, 17; 19:11, 19, 20. w24.05 16-​17 par. 8-9

Kambuy Paul wayikasikesha in Kristu ‘kulik ujim wa Nzamb usala mudimu.’ Tukat kulik ujim wa Yehova usala mudimu anch twalik chakwel ndiy amwinend atenchika yom pa chisu chend ni mu mutapu ukatinay. Pamusadinau mukadivar John mu mutapu uyimp, walonda anch: “Nading nifanyidin kushinshikin ujim wam chakwel kangal nasal chom chiyimp, pakwez chadingap chiswapela kusal mwamu. Rom 12:19 wankwasha kushimpish muchim ni kumuchingejin Yehova.” Tukat kutaninamu nakash anch twalikin yom mu makas ma Yehova. Anch twasal mwamu, tukutwish kwipuk yakamish yivud ni kuziy tukata kwov anch twapakish kupwish milong yikash ayinetu. Yehova ukatin kamu kutukwash. Utulejin kumushimpishin muchim ni utukanin kudosh kuburen kutentam. Anch twitiyij kushilamu kwa Yehova kulondina anch: “Yam nikufutana,” tukudandamenap kand kwikal ni ujim mulong tukwijik anch ukusal yom yitentamina. w24.11 6 par. 14-15

Tufanyidinap kutek yom ya ku mujimbu pa ndond ya kusambish mu mwom wetu. Kambuy Paul wakasikeshina pa chom chinech payifundinay in Kristu. Wasadina chilakej chiyimp cha in Isarel padingau mwi mpay, kuwejinaku ni yom yayishikena padingau ku Mukandu wa Sinay. Wayileja in Kristu kulik ‘kusot yom yiyimp mud mwasalau in Isarel.’ (1 Kor. 10:6, 7, 11) Yehova wayinkisha in Isarel yakuda mu chilay. Pakwez mulong kayikwatap ni usey, yakuda yiney yikala “yiyimp” kud awiy. (Kuch. 11:4-6, 31-34) Ni chisu chifukwilau musamb a ngomb wa or, in Isarel amekesha anch ading ashinshikidin nakash pa kuda, kuna ni kwisangaresh kusutamu kumuziyin Yehova. (Kub. 32:4-6) Paul wasadina chilakej chau mulong wa kuyibabesh nich in Kristu ading ashicha piswimp ni disheshik da musumb wa Yerusalem ni tempel mu muvu wa 70 C.C. Mulong niyetu tushich kwinsuden kwa mangand minam, tufanyidin kukwat chiyul cha Paul nich usey nakash. w24.12 6 par. 13

Yehova ud ‘Nzamb wa musangar,’ ni ukatin anch niyetu twikala ni musangar. (1 Tim. 1:11) Watwinkishin kal yipan yivud yitukwashina kwikal ni musangar. (Yak. 1:17) Uruw ud pakach pa yipan yiney. Anch ikundj ni mband atijan, akat kushilamu kukatijan ni kulimishijan umwing ni mukwau. Anch ikundj ni mband adandamen kukatijan umwing ni mukwau, akutwish kwikal ni musangar nakash. Cha ushon, nlel ambay a uruw avud kalimishinap kwau machip masalau pa dichuku da uruw. Chawiy, kakwetap kamu musangar. Yehova ukatin anch amakundj ashakam mutapu ik ni akajau? Yehova uyilejin amakundj kuyilimish akajau. Kumulimish chirumburikin kumusadin mu mutapu wa kalimish. Ikundj umulimishina mukajend ukushakam nend mu mutapu uwamp ni wa rukat.​—1 Pita 3:7. w25.01 8 par. 1-2; 9 par. 4-5

Chakin kamu, mukand wayifundinau in Hebereu kud kambuy Paul, wayikwasha in Kristu a mu mivu chitot ya kusambish kwirijek mulong wa mar mafanyinau kurish nich. Paul wayikasikesha akadivar nend kwilej Dizu da Nzamb chikurikina ni kuditesh nawamp. Kusal mwamu kwafanyina kuyikwash kujingunin ni kwiyep mafundish mafanyina kuziyish ritiy rau. Wayikasikesha kand kukasikesh ritiy rau chakwel atwish kuziyin pakad kulab ku umutakel wadokala kud Yesu ni kud antu ading atakedina chikumangen. Ni wayikwasha in Kristu kukudish mwikadil wa kujijaman kusutin kwikal ni chitongijok chiwamp piur pa yikokujol yading yirishinau nich. Afanyina kuman yikokujol yiney mud kufumb kwa Yehova. Niyetu tufanyidin kusadin chiyul chinech cha Bibil. Mwamu tukutwish kujijaman djat ni kwinsuden.​—Heb. 3:14. w24.09 13 par. 17, 19

Kukwatijan ni Bibil, difut ud usey ukatau kupan mulong wa kuchakwish nich. Ku mes ma Yehova, dikat kutukwash kuchirish chom chashadishau. Mutapu ik? Tuvurikany anch Adam ni Ev ashadisha mwom uwanyidina ni mutapu wa kushakam chikupu. Chawiy difut dafanyina kwikal nich usey wisikena nich chom chashadishau. (1 Tim. 2:6) Difut dined afanyina kudipan kud muntu ikundj wapamina kal (1) wading uwanyidina; (2) wading ni mutapu wa kushakam chikupu pa divu; ni (3) wading ukatina kupan mwom winou mulong wetwetu. Tushinshikinany mayingishin masatu mamekeshina anch Yesu wading uwanyidin kupan difut. (1) Wading muntu uwanyidina​—“kasalap chitil” ap chimwing. (1 Pita 2:22) (2) Mulong wa chom chinech, wading ni mutapu wa kushakam chikupu pa divu. (3) Wading ukatin kufa ni kupan mwom wend mulong wetwetu.​—Heb. 10:9. w25.02 4-5 par. 11-12

Ikal ni kashinsh anch Yehova ukukatin ni ukatin anch wikala muntu wa mu dijuku dend. Chid kamu chakin, chikalap nchik yikokujol urishina nich mulong wa kukubatish. Yesu wayileja in kwilej end a mu mivu chitot ya kusambish anch: “Ang ukwetany ritiy rijim mud rubut ra mutard, ukutwishany kuulej mukandu ou anch: ‘Dokal pinap yang akwa,’ chad ukushemunik, ni kwikil chom chikukukasikenanya.” (Mat. 17:20) Antu inay alejay Yesu ading asambish kal kumulondul pasut kal kwau chisu chikemp, chawiy ading akwet kuswir kwa kukasikesh ritiy rau. Pakwez Yesu wayinkisha kashinsh anch ang ikal ni ritiy rikash, Yehova wafanyina kuyikwash kupandakan yikokujol yida mud mikandu. Niyey Yehova ukukukwash kusal mwamu! Anch wajingunin yom yikukangeshina kukubatish, sal usu wa kuyipandakan pakad kulab. Ipana kud Yehova ni kwat mupak chakwel akubatisha. Kwikil mupak ukwau usutinamu winou! w25.03 7 par. 18-20

Niyetu tukutwish kupandakan yikokujol anch twavurik anch Nzamb mwom ud kwaku mulong wa kutukwash. Tukutwish kukasikesh kashinsh ketu anch Yehova ukutukwash mud mwasalay pasak. (Isay 37:17, 33-37) Chikwau kand, shinshikin rapor uda pa kapend ka jw.org ulejena mutapu uyikwashinay Yehova akadivar nau anambaz netu nlel unou. Kupwa, vurik chisu chakukwashay Yehova mu mwom wey. Kangal wov wom anch kandikal urishangap ni chikokujol. Mulong wak? Cha kusambish ijik anch Yehova wakusadidin kal yom yivud nakash mu mwom wey! Yehova wakutazuka mulong wa kwikal murunend. (Yoh. 6:44). Ov, umen nchik anch wamwit kukukwash kuvurik chisu chakulay ku malembil mey, kukwinkish usu pa chisu chiwanyidina, ap kukubangin mu yirung yikash? Kutongijokin pa yom mud yiney kukutwish kukukwash kukasikesh kashinsh key muday Yehova anch ukudandamen kukukwash mu mwom wey. w24.06 21 par. 8

Tufanyidin kukwat mupak wa kulik kusal chom chikutwisha kumunenganesh Yehova. Pakwez tud antu akad kuwanyin, ni chiswapel kuwil mu choziu. (Rom 7:21-23) Pakad kuchingejin, tukutwish kwikal mu chishiken tukutwisha kuman mud kusal chitil wawiy kamu mupak wa nsuden. Mulong wa kushal ashinshamena kud Yehova ni Mwanend, tufanyidin kulondul chiyul cha Yesu cha kudandamen kuchish ku mes pantaliken ni choziu. Etu awonsu akutwish kutupak mulong wa kusal chitil. Pakwez muntu ni muntu ukwet paziyidinay. Chikutwish kwikal pamwing ap kusal chitil chijim, kwiyandjik mu mwikadil kanang wijondila, ap kwimburij mutapu wa kutong wa mangand. Chilakej, muntu umwing ukutwish kurish ni choziu cha kusal chitil cha masandj. Mukwau chikumwit kurish nakash pantaliken ni choziu cha kusal chom chijondila, mud kwichuku ap kutal pornografi. Ni muntu mukwau ukutwish kurish nich wom wa antu, kukangany kusal chom chiwamp mulong wa yom yikutwishau antu akwau kutong, kujiman swa, ap yom yikwau kand. w24.07 14 par. 3; 15 par. 5

Tongin yom yafanyina kushiken anch amakurump alika kwitiy anch muntu wakarumuka chakin achirik mu chikumangen, ap yafanyina kushiken anch kupwa kwa kuchirik, chikumangen chalika kumumekeshin rukat. Muntu winou wafanyina kwiyov nayimp nakash mulong ‘ushon [wafanyina] kumupandaken.’ Wafanyina kwiyov anch kakezap kand kikal chid cha chikumangen. Wafanyina kand kulikap usu wading usadinay mulong wa kuchirish urund wend ni Nzamb. Chipandakena kuyip, anch akadivar ni anambaz akwau mu chikumangen alika kumulikishin muntu wakarumuka, afanyina kutek urund wau ni Yehova mu ubaj. Mulong wak? Mulong afanyina kulik kumwimburij Yehova ukata kuyilikishin antu akata kukarumuk ku yitil yau. Pakwez, afanyina kumwimburij Satan, ukweta chisum ni wakad kuyovilang antu riy. Chawiy, afanyina kwikal yamu yikutwishay Djabul kusadin mulong wa kuyishesh antu mu spiritu.​—2 Kor. 2:10, 11; Efes 4:27. w24.08 17 par. 7, 10-11

Yesu Kristu wapana antu akwau ‘mud yipan’ mulong wa kukwash chikumangen mu mutapu ukwau. Wasadina amakurump ading mu Yerusalem mulong wa kumutum Paul, Barnabas nau antu akwau mud atulam a munyingumuku. (Mid. 11:22) Mulong wak? Mulong wa diyingishin dimwing datondinangau akwash a mudimu ni amakurump: mulong wa kukasikesh yikumangen. ( (Mid. 15:40, 41) Atulam a munyingumuku akat kwendangan nakash. Amwing asadining weny wa yitot ya makilometre mulong wa kushik ku chikumangen chikwau. Rubing ni rubing, kalam wa munyingumuku usadining madiskur, mudimu wa ukafung, kutakel chikumangan cha ayibol, chikumangan cha amakurump ni yikumangan ya mudimu wa kulejan. Ukat kurijek madiskur, yitentam ya munyingumuku ni yitentam ya rejon. Ukat kufundish ku shikol ya ayibol, kurijek chikumangan cha pakampwil cha ayibol a mu munyingumuku. Kudoshaku yom yiney, ukat kusal kand yom yikwau ya usey ni yisu yimwing biro wa mutiy ukat kumwit kusal yom kanang pakad kulab. w24.10 21 par. 12-13

Yehova wamuleja muprofet Jeremiy kukwatijan ni mufund wa nlel. Kambuy Paul wajimbula mazu minam palonday anch: “Kinikez kuyivurikinap kand kuyip kwau.” (Heb. 8:12) Chom ik chirumburikina chakin kamu mazu minam? Mu Bibil dizu “kuvurik” kakatap kudisadin chisu chawonsu mulong wa kulond piur pa muntu udandamedina kutongijokin piur pa chom chasadika pakur. Pakwez, akat kudisadin mulong wa kulond piur pa muntu usadina chom kanang. Chilakej: Mpongarik wapampau pa mutond pamwing ni Yesu wamwela Yesu anch: “Yesu, nvurika piukeza kwez mudi Mwant!” (Luka 23: 42, 43) Kamwitap kwend Yesu kutong yom kanang piur pend pa chisu chinicha. Yesu wamuleja ikundj winou anch ukumuvumbul. Chawiy, komb anch Yehova walond anch kavurikinap kand yitil yetu, chinech chirumburikin anch kakutusalap kand chom chiyimp. Kakutupupap chisu chimwing mu machuku ma kurutu mulong wa yitil yatulikishinay kal. w25.02 10-11 par. 14-15

Ronganyin rakin ridokiling ku kwijik mikadil ya Yehova, yom yitonginay kusal ni yikisinay. Iyipula anch:‘ Kukwatijan ni yom nija piur pa Yehova, mupakk ik ukutwisha kumusangaresh?’ (Efes 5:17) Yisu yimwing chikutwit kusal yom yakad kuyisangaresh anamakwetu ap arunentu mulong wa kumusangaresh Yehova. Chilakej, anvaj amwing ayibangidina anau akutwish kumubachik mwanau kwatijan ni ikundj ukweta nfalang jivud ap ukutwisha kuyinkish dipit divud​—ap anch kadap kwend muntu ukasikena mu spiritu. Chakin, akatin anch mwanau amwat kud muntu ukumulama nawamp ku mujimbu, pakwez nany ukumukwasha kuya kurutu mu spiritu? Mutapu ik umenay Yehova yom? Chakul chid mu Mateu 6:33. Verse winou uyikasikeshin in Kristu kudandamen “bil kukimb Want.” Ap anch tuyilimish anvaj etu ni antu a kwol kwetu, chitongijok chetu chijim chi cha kumusangaresh Yehova. w25.01 17 par. 9-10

Tukwet kuswir kwa ukwash wa Yehova mulong wa kudandamen kulejan ap anch twarish ni rupompat. (Kuj. 12:17) Mulong wak ufanyidin kwikal ni kashinsh anch Yehova ukukukwash? Shinshikin malembil ma Yesu mafundinau mu Yohan 17. Yesu wamwita Yehova chakwel ayilama ni kuyibangin atwimbuy end, ni Yehova wakula malembil minam. Buku wa Midimu ulejen mutapu wayikwashay atwimbuy kulejan nich mushiku chikalap nchik kuzengol. Mu malembil mend, Yesu wamwita kand Yehova kuyilam ni kuyibangin antu awonsu afanyina kwitiyij yom yafundishangau atwimbuy end​—kuwejinaku niyey. Yehova wadandamena kwakul ku malembil ma Yesu; niyey ukukukwash mud mwayikwashay kand atwimbuy. (Yoh. 17:11, 15, 20) Mulong disuden disejin piswimp, chikutwish kutukasiken kulejan rusang ruwamp ra want tukutambul ukwash tukweta nich kuswir mulong wa kudandamen kulejan ni mushiku.​—Luka 21:12-15 w25.03 18 par. 13-14

Antu a Nzamb akutwish “kuwang nich musangar” mulong wa kumujikitish Yehova. Uyakin ukasikeshina ni kushilamu kukasikeshina kwa Dizu da Nzamb ni ruchingej retu rimedina pa yakupesh ya difut da Yesu yikat kutukwash kwikal ni ‘muchim wakad yakamish.’ Kwisambin piur pa yom yiney nau akadivar ni anambaz kukat kutukwash kwikal nich musangar wakin! (Kus. 34:8; 133:1-3) Rukat ni uumwing yida pakach pau antu a Nzamb yawiy mikadil yaad yida mu paradis wa mu spiritu. “Uumwing” winou ukat kutukwash kuman mutapu ukwikala mashakamin mwi ngand Yisu, mukwikalau atushalapol a Nzamb ni rukat ni uumwing upandakena kusut nlel. (Kol. 3:​14) Muntu mwawonsu ukatina kwikal nich musangar ufanyidin kwikal mu paradis wa mu spiritu. Chikalap nchik yom yikutwisha mangand kutong piur pa atushalapol a Yehova, akwet dijin diwamp, ntumb yiwamp, mu dijuku da pa mangand mawonsu.​—Isay 65:15. w24.04 21 par. 7-8

Mutapu ik tukutwisha etu awonsu kuyikwash in Kristu ajich akimbina kwandam mu uruw? Tufanyidin kubabel yom tulondina. (Efes 4:29) Tufanyidin kwiyipul anch: ‘Ov, nikat kuyibachik ajich kwandam mu uruw? Anch naman mukadivar ni nambaz mujich akat kwambamb, ov, nikat kutongin anch isambin piur pa rukat?’ (1 Tim. 5:13) chikwau kand, tufanyidinap kusal anch in Kristu ajich iyova mud ad antu akad usey mulong kadap mu uruw. Ov, umenap anch chid chiwamp kukimb mitapu ya kuyijikitish in Kristu ajich? Chid nchik anch twatong anch mukadivar umwing ni nambaz akutwish kwikal ambay a uruw awamp? Bibil utulejin kulimish yovil ya antu akwau. (Rom 15:2.) Ajich avud kakatiningap anch antu akwau ayilej muntu wa kwatijan nend, ni tufanyidin kulimish yitongijok yau. (2 Tes. 3:11) Akwau akutwish kukatish ayikwasha, pakwez tufanyidinap kusal mwamu anch katulejinap kuyikwash.​—Jnsw. 3:27. w24.05 24-25 par. 14-15

Tushich mu mangand tukutwisha kurish ni milong yakad kuchingejin yikutwisha kusal anch mwom wetu ukasikana kamu nakash ap kuswimp. Pakwez tumujikitishin Yehova Nzamb nakash mulong wa ukwash wend. Anch twatambul ukwash wend, chinech chikat kutwinkish kashinsh anch “[Yehova] ud mwom!” (Kus. 18:46) Pakwez, kupwa kwa kulond mazu minam, David wamutazuka Nzamb anch “Diyal dam.” Mulong wak Yehova amufanikeshin ni chom chakad mwom ni wamutazuka Yehova anch “diyal dam”. Mazu minam marumburikin ik? Bibil umufanikeshin Yehova ni “diyal” mulong wa kutukwash kwijik mikadil yend yimwing. Yisu yivud anch atushalapol a Yehova Nzamb amutumbish mulong wa mikadil yend yiwamp, chinech chikat kumekesh mud mulondinay Bibil anch ud diyal. Kapamp kakusambish kamulejenu Yehova mud “Diyal” kad mu Kuvurik Yijil 32:4. Ana walonda mu malembil anch “kwikil diyal dida mud Nzamb wetu.” (1 Sam. 2:2) Abakuk wamutazuka Yehova anch “Diyal dam.” (Aba. 1:​12) Muntu wafunda Kuseng 73 wamutazuka Nzamb anch ‘diyal da muchim wam.’ (Kus. 73:26) Ni Yehova amwinend ukat kwifanikesh ni diyal.​—Isay 44:8. w24.06 26 par. 1, 3

Ant amusangareshang Yehova amwifukwilang nich muchim wau wawonsu. Bibil ulondin piur pa Josafat anch: “Kikwadingap mwant mukwau mudi ndiy watala kudi [Yehova] nich muchim wend wawonsu.” (2 Ant 23:25) Chid nchik piur pa Salomon, muntu washikena kusal yom yiyimp mu kusut kwa mivu? “Muchim wend wawonsu kiwadingap kand kudi [Yehova] Nzamb wend.” (1 Ant 11:4) Ni piur pa mwant wakad kushinshaman Abijam, Bibil ulondin anch: “Muchim wend wawonsu kiwadingap kud [Yehova] Nzamb wend.” (1 Ant 15:3) Kumusadin Yehova nich muchim wawonsu chirumburikin ik? Muntu umwifukwidina Nzamb nich muchim wawonsu kakatap kwend kumwifukwil mulong wij anch chitin kwau kusal mwamu. Pakwez ukat kumusadin Yehova nich muchim wawonsu. Ni ukat kudandamen kumekesh kalimish ni rukat rikurikina mulong wa Yehova mu mwom wend wawonsu. w24.07 21 par. 4-5

Yehova usadidin dizu da mutapu umwing mulong wa kurumburil mutapu ukatay kujimwangesh yitil yetu rawonsu. Ulondin anch: “Najimangesha yitil yen mudi didj.” (Isay 44:22) Anch Yehova watulikishin, chid mud ukat kusadin didj mulong wa kubwik yitil yetu chakwel kangal yimekana kand. Mazu minam matufundishin ik? Anch Yehova watulikishin yitil yetu, tufanyidinap kudandamen kwifish nich piur pa yitil yiney. Kusutin mash ma Yesu Kristu, mabaz metu amalikishidin kal kamu rawonsu. Anch Yehova walikishin chitil, chid mud twachisalap kwetu. Winou wawiy mutapu ukatay Yehova kutulikishin anch twakarumuk kamu chakin. Tukutwish kwikal ni kashinsh anch ud kand murunetu ni chinech chikutwish kutukwash kulik kudandamen kwifish nich. w25.02 10 par. 11-14

Akadivar asadina komite wa amakurump akwet chisend kurutu kwa Yehova cha kulam chikumangen chishitwila. (1 Kor. 5:7) Akat kusot kand anch antu asadina yitil ashiken ku kukarumuk anch chitwishikin. Mulong wa kusal mwamu, amakurump akat kulam chitongijok chiwamp ni kuchingej anch muntu ukukarumuk. Mulong wak? Mulong akatin kumwimburij Yehova, uda “mwin riy ni mwin ranaken nakash.” (Yak. 5:11) Tal mutapu wamekeshay kambuy Yohan wading wananapina kal chitongijok chinech. Wafunda anch: “Anam, akarukat mu Yesu, nikufundidilany yom yiney chakwel kangal wez wasalany yitil. Pakwez anch muntu wasal chitil tukwet kal mwin kutulondilap, ndiy kamu Yesu Kristu, utentamina, udia piswimp nend Tatuku Nzamb.” (1 Yoh. 2:1) Cha ushon, yisu yimwing mwin Kristu ukutwish kulik kukarumuk. Anch chikal mwamu, chifanyidin kumudosh mu chikumangen. w24.08 25 par. 19-20

Pamwing ap ukutwish kwilakej yom usadina ni yom yisadinau antu akwau. Kangal amboku kusal mwamu! Mulong wak? Mulong Yehova kakusalangap mwamu. (Gal. 6:4) Chilakej, Mariy wamuzizila Yesu malash ma usey nakash. (Yoh. 12:3-5) Pakwez mwadamufu kazwendj, walambula nfalang jaad ja usey ukemp nakash mu tempel. (Luka 21:1-4) Ap mwamu, Yesu kayilakejap amband inay aad. Pakwez wayimana awonsu aad mud amband akweta ritiy. Yesu wamwimburija kamu Tatukwend mu mutapu uwanyidina. Chawiy ikal ni kashinsh anch Yehova umen yom yin yawonsu usadina mulong ukwet ritiy muday ndiy ni umukatin. Yehova uyikwatining ni usey nakash ap anch ey umen mud yidap kwau ya usey. Yisu yimwing etu awonsu tukat kwidjidjekang. Pakwez Bibil ukutwish kutukwash kupandakan kwidjidjek kwin kwawonsu. Ukutwish kwikal ni kashinsh pa ndond pa kuziy. Yehova ukwij kamu nawamp. Usangaredin usu usadina mulong wa kumutek pa ndond ya kusambish mu mwom wey ni ukudandamen kuwanyish maswir mey. Yehova uyikatin ni ukat kuyibangin atushalapol end awonsu ashinshamena. w24.10 25 par. 3; 29 par. 17-18