Ngond wa 6

Tutanidinamu mu difut da ya kupesh ya Kristu kusambish kamu katat. Chilakej, kusutin difut, Yehova ukat kulikishin yitil yetu. Kakatap kutulikishin mulong ufanyidin kusal mwamu. Pakwez ukat kusal mwamu mulong ukatin. (Kus. 103:3, 10-13) Antu amwing akutwish kuman mud kawanyidinap kutambul dilikishin da Yehova. Uyakin ud anch etu awonsu tuwanyidinap kuditambul. Kambuy Paul wajingunina anch kadingap ‘kawanyidina kumutazuk anch kambuy.’ Ap mwamu walonda anch: “Mulong wa ranaken ra Nzamb am nidi mudi munidia.” (1 Kor. 15:9, 10) Anch twakarumuk ku yitil yetu, Yehova ukutulikishin. Mulong wak? Kadap mulong tuwanyidin kutulikish, pakwez mulong utukatin. Anch wiyovil mud uwanyidinap kukulikishin kud Yehova, vurik anch Yehova kapanap difut mulong wa antu awanyidina, pakwez mulong wa antu akad kuwanyin akata kukarumuk.​—Luka 5:32; 1 Tim. 1:15. w25.01 26-27 par. 3-4

Tukutwishap kuyikangesh antu kutulond ap kutusal yom kanang, pakwez tukutwish kubabel yom tukutwisha etu kusal. Ni yisu yivud chom chiwamp tukutwisha kusal chid kulikishin. Mulong wak? Mulong tumukatin Yehova ni mulong ndiy ukatin anch twikal in kulikishin. Anch twadandamen kujiman ni twalik kulikishin, tukutwish kusal chom cha usup ni kwimesh ayinetu mar. (Jnsw. 14:17, 29, 30) Anch twalik kulam ujim, tukat kusal anch rukuny rilik kuyipish muchim wetu. Tukat kwisadin kand ayinetu chom chiwamp​—tukat kwimik kutongin pa yom yasadika ni kusanger kand mwom. Mutapu ik tukutwisha kupandakan yovil yetu anch atusal nayimp? Mutapu umwing tukutwisha kusal mwamu, ud wa kwishil chisu. Anch muntu watapangau nayimp amwok, chikumwit chisu chakwel ayerik. Chilik chimwing, chikutwish kutwit chisu chakwel tutwish kumulikishin muntu ni muchim wawonsu. (Mul. 3:3; 1 Pita 1:22) Mulembila Yehova chakwel akukwash kwikal mwin kulikishin. w25.02 16-17 par. 8-11

Pakach pa malejan ma pa dishin pad kukarumuk, ritiy, dibatish, ni divumbuk. (Heb. 6:1, 2) Minam mawiy mafundish ma pa dishin mitiyijiningau in Kristu awonsu. Mulong wa diyingishin dined, kambuy Pita wayileja chisak cha antu pa dichuku da Pantekot. (Mid. 2:32-35, 38) Tufanyidin kwitiy mafundish minam makusambish mulong wa kwikal mwin kwilej wa Yesu. Chilakej, Paul walonda patok anch ang witiyijinap mu divumbuk ukutwishap kulond anch ud mwi Kristu wakin. (1 Kor. 15:12-14) Pakwez, mulong wa kwikal mwin Kristu uswila, tufanyidin kwilej yom yivud kulik kwau ching kusu kwimen pa mafundish ma pa dishin.Chinyim ni mafundish makusambish, yakuda ya mu spiritu yikash chidap kwau ching kwilej yijil ya Yehova pakwez kud kand mbil jend jikutwisha kutukwash kutesh chitongijok chend. Mulong wa kutaninamu mu yakuda yiney, tufanyidin kwilej ni kutongijokin chikurikina piur pa yom tutangina mu Dizu da Nzamb. Anch twasal mwamu, tukat kwifumb ayinetu kukwat mipak yimusangareshina Yehova. w24.04 5 par. 12-13

Nzamb wamuvurisha Yona anch in Niniv ‘kijap kwau kwauril yom yiwamp ni yiyimp.’ (Yona 1:1, 2; 3:10; 4:9-11) Kupwa Yesu wasadina chilakej chinech mulong wa kufundish piur pa kutentam kwa Yehova ni ranaken rend. Chirumburikin ik palondinau anch in Niniv akez “kavumbuk” pa dichuku da “dirumburish”? Yesu wafundisha piur pa ‘divumbuk da dirumburish.’ (Yoh. 5:29) Wading ufanakeshin ni Mivu Kanan ya Wiyikel wend, pa chisu chinacha “antu awamp ni antu ayimp” akuvumbuk. (Mid. 24:15) Mulong wa antu ayimp, dikwikal ‘divumbuk da dirumburish.’ Yehova ni Yesu akushinshikin ni kuman yaku yau mu mutapu ukwakulau kumafundish ma Nzamb. Anch mwin Niniv ukuvumbulau walik kwitiy difukwil dishitwila, dirumburish dend dikwila da kumufish nich. (Isay 65:20) Pakwez awonsu akutonda kumwifukwil Yehova nich kushinshaman, dirumburish dau dikwikal diwamp. Akwikal ni dilau da kushakat chikupu!​—Dan. 12:2. w24.05 5 par. 13-14

Yesu wamekesha kamu mu mutapu uwanyidina ranaken rikwetingay Tatukwend. (Yoh. 14:9) Kusutin mazu ni yisal yend, wamekesha anch Tatukwend wa ranaken ni wa riy uyikatin antu ni ukatin kumukwash umwing ni umwing wa pakach petu kupandakan njit turishina pantaliken ni chitil. Yesu wayikwasha antu akayitil kuswimp mulad wa mashakamin mau ni kumulondul. (Luka 5:27, 28) Yesu wading wij yom yafanyina kumushiken kurutu. Wading wij anch akumupan ni akumujipin pa mutond, chawiy wayileja in kwilej end yom yiney tupamp tuvud. (Mat. 17:22; 20:18, 19) Wading wij anch chakupesh chend chikudosh chitil mu mangand. Yesu niyend wafundisha anch kupwa kwa kupan mwom wend, wafanyina ‘kuyipwitin antu a mitapu yawonsu’ kud ndiy. (Yoh. 12:32) Antu akayitil afanyina kumusangaresh Yehova kusutin kumwitiy Yesu mud Nsalejau ni kusutin kwimburij chilakej chend. Kusutin kusal mwamu, afanyina ‘kukwolik ku yitil.’ (Rom 6:14, 18, 22; Yoh. 8:32) Chawiy, nich kutakaman, Yesu witiyina kufa rufu risansena mulong wa kutukwol.​—Yoh. 10:17, 18. w24.08 5 par. 11-12

Tong bil mutapu wiyova pawileja kapamp ka kusambish uyakin wa Dizu da Nzamb. Wajingunina anch Tatukwey wa mwiur ukukatin, anch ukatin anch wikal pakach pa antu amwifukwidina ada mu dijuku dend, anch wakanin kal kupwish kusansan ni mar, anch ukutwish kwikal ni ruchingej ra kumanijan nau akatish ney afila kal akuvumbuka mwi ngand yisu​—ni yom yikwau yivud. (Mar. 10:29, 30; Yoh. 5:28, 29; Rom 8:38, 39; Kuj. 21:3, 4) Uyakin winou wakupukuna ku muchim. (Luka 24:32) Wakata yom wading wilejina, ni watwishap kulam yom yiney mulong weyey amwiney!( Ilakej ni Jeremiy 20: 9.) Anch rukat ra uyakin wa Bibil rikun mu muchim wetu, tukutwishap kuninet. (Luka 6:45) Tukat kwiyov mud in kwilej a Yesu a mu mivu chitot ya kusambish alonda anch: “Kitukutwishap kulik kulond yom yitwamana ni yitwatesha ayinetu.” (Mid. 4:20) Tukatin nakash uyakin, chawiy tukatina kuulejan kud antu avud. w24.05 15 par. 5; 16 par. 7

Mulong tud antu a Yehova, tukat kuyilej antu akwau mulong tumukatin Tatukwetu wa mwiur ni tukatin kuyikwash a mutej netu kumwijik ndiy. Pakwez akwau chiyikasikedining kusanger mudimu wa kulejan. Mulong wak? Amwing akat kov usany ni kwiyov anch kadap kwau alej awamp. Akwau akat kov wom wa kuya ku yikumbu ya antu. Akwau kand akat kov wom anch kakuyitiyap kwau. Akadivar inay nau anambaz amening anch chiyikasikedin kulond piur pa rusang ruwamp kud antu akad kwijikau. Ov, yisu yimwing washadishap kal musangar mu mudimu wa kulejan mulong wa yovil mud yiney? Anch mwawiy, kangal amboku waziy. Ukutwish kumekesh anch ud mwin kwikepish ni kangal kushinshikin pa yom yiney nakash. Ni yikumekesh anch uyijimedinap antu. Kwikil muntu ukatining kumulik kud antu akwau pakampwil anch usadin usu wa kusal yom yiwamp kud antu akwau. Tatukwey wa mwiur wij nawamp yovil urishina nich ni ukatin kukwink ukwash ukweta nich kuswir.​—Isay 41:13. w24.04 14 par. 1-2

Piutangina Bibil, pakish kwitekin mipak yisikena. Pakish kusal mwamu: Fund list wa yom ufanyidina kuswimp, ni pakach pa yom yiney, tondap chimwing ap yaad ufanyidina kusambish nich, kupwa chad ukutwish kusadin yikwau. Umen anch pisu ukutwisha kusambishin? Ukutwish kusambish ni yom umena anch yiziyin kusal. Ap ukutwish kusambish ni chom umena anch chid cha pakampwil. Anch wakwat mupak wa yom ufanyidina kusal, kimbijol mu yichap yetu. Pamwing ap ukutwish kusadin Lembil piur pa mupak wey ni mwita Yehova chakwel akwinkish ‘rusot ni usu wa kusal mud muda kutenchik kwend.’ (Filip 2:13) Kupwa ikasikesha kusadin yom wilejina. Anch watwish kuwanyish mupak wey wa kusambish, chinech chikukwinkish kamu usu wa kuwanyish yikwau. Chakin kamu, anch watwish kuswimp ap kuwapish mwikadil wa win Kristu, chikukuswapel kand kusal mwamu mu yom yikwau. w24.09 6 par. 13-14

Ukutwish kunenganan anch yom wasala pakur yayisala antu akwau nayimp. Yom ik yikutwisha kukukwash? Sal yawonsu ukutwisha mulong wa kutenchik yom, ni it kand dilikishin ni muchim umwing. Mwita Yehova ayikwash antu warumbukina. Ukutwish kukukwashan en awonsu kujijaman ni kuchirish kand chisambu. Ilejina ku kurumbuk kwey, ni lik Yehova akusadin mu mutapu ukatinay. Shinshikin chilakej cha muprofet Yona. Pa ndond pa kuya ku Niniv mud mwamulejau kud Nzamb, Yona wachinina kwi ndond yindj. Yehova wamupupa Yona, ni Yona wilejina ku kurumbuk kwend. (Yona 1:1-4, 15-17; 2:7-10) Yehova kimikap kumusadin Yona mud muprofet. Kapamp kakwau, Nzamb wamuleja kand kuya ku Niniv, ni chisu chinech Yona waziyina pakad kulab. Ap anch wanenganana mulong wa yom yasalay, Yona wasala yom yamulejau kud Yehova.​—Yona 3:1-3. w24.10 8-9 par. 10-11

Yehova kakatap kwend ching kusu kulikishin mabaz ap yitil yetu, ukat kuyijimwangesh. Mulong wa kutesh nawamp chom chinech, tong bil mud anch muntu wajip uvud wa nfalang wada ufanyidina kumwinkish nich mufund. Pakwez, antu akutwish kwau kuman uvud winou wa nfalang ap anch aujipin kal nich mufund. Pakwez chinech chishalijadin ni kujimwangesh chom. Mulong wa kutesh nawamp dizu dined, tufanyidin kuvurik anch pakur asadinang ankre wading uswapela kujimwangesh ni mem. Antu ading akwet mutapu wa kujimwangesh yom yafundau nich shifong utalela. Chawiy “palikishinangau” dibaz, dapwangang kamu rawonsu. Antu kadingap kand ni mutapu wa kuman yom yafundau. Chid mud dibaz dikalapaku kwau. Tukat kumujikitish Yehova nakash anch twijik anch ukat kulikishin yitil yetu, mud yikalapaku kwau!​—Kus. 51:11. w25.02 10 par. 11

Anch antu akwau aturumburish ap atusadin mu mutapu uyimp, tufanyidin kwikal ni kashinsh anch Yehova wij nawamp yom yishikedina. Kashinsh mud kinak kakutwish kutukwash kujijaman anch atusadin mu mutapu uyimp mulong twij anch Yehova ukupwish milong pa chisu chiwanyidina. Kusutin kusha yom mu makas ma Yehova, tukat kwipuk kulam ujim ap kuyikis antu akwau. Kudandamen kuyijimen antu akwau kukutwish kutubachik kusal chom chiyimp, kushadish musangar ni kukutwish kand kuyipish urund wetu ni Yehova. Chakin kamu, tukutwishap kamu kulondul chilakej cha Yesu mu mutapu uwanyidina. Yisu yimwing, tukutwish kulond ap kusal yom tukutwisha twinan kwinsuden. (Yak. 3:2) Ni yisu yimwing mutapu utusadidinau nayimp kud antu akwau ukutwish kutuletin kusansan ni mar mu mwom wetu wawonsu. Anch yawiy yom urishina nich, ikal ni kashinsh anch Yehova wij nawamp yom urishina nich. Ni Yesu wij nawamp mutapu wiyovila mulong niyend warisha ni kuburen kutentam. (Heb. 4:15, 16) Musangar mud ik tukweta mulong Yehova utwinkishin kand yiyul mu Dizu dend Bibil yikutwisha kutukwash kurish ni kuburen kutentam. w24.11 6 par. 12-13

Afanyidina kumekesh ritiy muday Yesu mulong wa ‘kwikal ni mwom wa chikupu.’ (Yoh. 3:16-18, 36, Yoh. 17:3) In Yuda avud kitiyap anch ading afanyidin kumekesh ritiy muday Yesu. Amwipula anch: ‘Ey usadinap chilay ik, chakwel etu tuchiman ni tukwitiyija ey?’ (Yoh. 6:30) Kupwa alonda anch pa chisu cha Moses antu ayinkisha mana mu chilay, ni chikala chakuda chau cha dichuku dawonsu. (Neh. 9:15; Kus. 78:24, 25) Chimeken patok anch ading akwet kwau kuswir kwa kutambul chakuda cha ku mujimbu. Ni chisu chalonday Yesu piur pa ‘mukat wakin udokila mwiur’ wading mud mana uletina mwom wa chikupu, kamwipulap kurumburik kwa mazu minam. (Yoh. 6:32) Ashinshikina nakash pa maswir mau ma ku mujimbu mu chilik cha kulik kutesh malejan ma Yesu piur pa mwom wa chikupu. w24.12 5-6 par. 10-11

Paday ku shikol mwaney ukutwish kuman anch yom yiney yid kand mu yitang yikwau. Chilakej, mitond yivud yikweting yijil ya chitangil ya mutapu umwing. Mutond ukat kwiyangan mwi ntiy, ntiy jikat kwiyangan mu tumitiy tukemp tukemp ni tumitiy tukat kwiyangan mu mikung. Chijil chinech achitazukining anch fractale. Chijil cha fractale chid kand mu yitang yikwau. Pakwez nany wateka yijil yiney yiwamp mu yitang? Anch mwaney watongijokin chikurikina pa yom yiney, ukutwish kwikal ni kashinsh anch Nzamb ndiy sakatang wa yom yawonsu. Yisu yimwing, ukutwish kumwipul anch: “Anch Nzamb ndiy watutanga, ov, umenap anch wij kamu nawamp yom tufanyidina kusal mulong wa kwikal ni musangar?” Kupwa ukutwish chad kumulej anch Nzamb watwinkisha Bibil mulong wa kutulej yom tufanyidina kusal mulong wa kwikal ni musangar. w24.12 16 par. 8

Yehova wamupepila kambuy Paul kufund mukand wading upanina umutakel wa kumudosh mu chikumangen muntu walika kukarumuk ku chitil chend. (1 Kor. 5:13) Mutapu ik wafanyinau in Kristu ashinshamena kumuman muntu winou? Paul wayileja “kulik kudandamen kwibomb” nend. Chinech chading chirumburikin ik? Paul warumburila anch mbil yiney yirumburikin kand ‘kulik ap kuda ni muntu wa mutapu winou.’ (1 Kor. 5:11) Anch wada pamwing ni muntu, chikukuswapel kusutish nend chisu chivud pamwing. Choviken kamu patok anch mazu ma Paul mading marumburikin anch chikumangen chifanyidinap kwimbomb pamwing ni muntu winou. Kusal mwamu kwafanyina kuchidij chikumangen ku chibachikin chiyimp cha muntu winou. (1 Kor. 5:5-7) Chikwau kand, kwipuk kwibomb ni muntu winou kwafanyina kumukwash kujingunin chilik chamurumbukidinay Yehova, ni wafanyina kwov usany ni kusal usu wa kukarumuk. w24.08 15 par. 4-5

In Isarel asalang musambu wa pakampwil dichuku dimwing pa muvu, dichuku dinida aditazukang anch Dichuku da Kuchakwish. Pa dichuku dinida, mwin kupesh mujim wapanang yakupesh ya annam mulong wa antu. Chakin kamu, yakupesh ya annam yafanyinap kamu kujimwangesh yitil ya in Isarel rawonsu, mulong annam kakwetap usey umwing nau antu. Pakwez chisu chawonsu chakarumukangau in in Isarel ni kupan yakupesh yading yitinay Yehova, walikishinang yitil yau. (Heb. 10:1-4) Ditenchik dined dayivurishang in Isarel anch ading akayitil. Pakwez, Yehova wasala anch chakwel atwish kulikishin yitil ya antu. Warijeka yom chakwel Mwanend mukatish ‘apana kapamp kamwing yakupesh ya kudosh yitil ya antu avud.’ (Heb. 9:28) Yesu wapana “mwom wend mud difut mulong wa kuyikol antu avud.”​—Mat. 20:28. w25.02 4 par. 9-10

“Chakin kamu, muchim usotil kusal yom yiwamp, pakwez mujimbu uziyin.” (Mat. 26:41b) Kusutin mazu minam, Yesu wamekesha anch wading wij anch tud antu akad kuwanyin ni anch yisu yimwing tukutwish kurumbuk. Pakwez mu mazu mend mud kand kubabesh kunoku: Kangal wichingejinany kusut chipim. Mu asaa akemp kurutu kwa Yesu kulond mazu minam, in kwilej end alonda anch kakumulikap. (Mat. 26:35) Yibachikin yau yading yiwamp. Pakwez, aburena kwijik anch akutwish kuziy anch kwikal chibachikin chikash. Chawiy chayibabeshay Yesu nich mazu mada mu mufund wa nlel. Cha ushon, in kwilej katwishap kuchish ku mes. Chisu chamukwatau Yesu, ov, afanyina kushal nend anch afanyina kwov wom ni kuchin? Mulong kachishap ku mes, in kwilej asala yom yalondau anch kakuyisalap, amuchina Yesu.​—Mat. 26:56. w24.07 14 par. 1-2

Adam ni Ev ashadisha kand chom cha usey nakash: urund ni Tatukwau, Yehova. Kwinsambishin, Adam ni Ev ading mu dijuku da Nzamb. (Luka 3:38) Pakwez chisu chamubwambwilau Yehova, wayopata mu dijuku dend kurutu asambish kuval an. (Dis. 3:23, 24; 4:1) Mulong tud anau, chawiy tufanyidin kuchakwish ni Yehova. (Rom 5:10, 11) Mu kulond kukwau, tukwet kuswir kwa kukudish urund wa piswimp ni ndiy. Kukwatijan ni referans umwing, dizu da Grek dikarumwinau mu verse winou anch “kuchakwish” dikutwish kurumburik “kuta urund ni mukankuny.” Cha musangar nakash, Yehova ndiy wasala rizau ra kusambish mulong wa kuchakwish ni yetwetu. Mutapu ik? Kusutil ditenchik da kuchakwish datekay Yehova mulong wa kuchirish urund wa piswimp ni akayitil. Chinech chirumburikin kuswimp chom kanang ni chom chikwau chikweta usey umwing. Mwamu, chom chashadishau akutwish kuchiswinkesh ap kuchichirish. w25.02 3-4 par. 7-8

Kambuy Paul walonda anch ‘dipup damupupinau kud antu avud dimuwanyidin ikundj winou.’ (2 Kor. 2:5-8) Mu kulond kukwau, kupup kwawanyisha chitongijok chamupupinau muntu winou. (1 Kor. 5:1) Chitongijok ik? Mulong wa kumushikij ku kukarumuk. (Heb. 12:11) Kupwa, Paul wapana umutakel ku chikumangen wa: “Kumulikishin ni kumwongoj” mukadivar wapumbuka, ni ‘kumwinkish kashinsh chakwel iyova anch amukatin.’ Umen anch Paul wading ukatin anch chikumangen chisal yom yivud kusutamu kwau kwimen pa kumuchirish muntu wasala chitil pakach pa antu a Yehova. Paul wading ukatin anch amwinkisha muntu wakarumuka kashinsh kusutin mazu mau ni yisal yau anch amulikishidin chakin kamu ni amukatin. Mwamu afanyina chad kumekesh patok anch ading amwakin muntu winou wachirika mu chikumangen. w24.08 15 par. 4; 16-17 par. 6-8

Kambuy Paul wafanyina kulond ni kashinsh kawonsu yom yifanyidina kusal mulong wa kujijaman. Wayivurisha in Kristu inay anch mulong wa kujijamen yikokujol, kafanyinap kuchingejin pa usu wau pakwez afanyina kumuchingejin Yehova. Paul wafanyina kulond nich kutakaman anch: ‘Yehova ud mwin kwinkwash; nikwovap wom.’ (Heb. 13:6) Akadivar netu amwing akat kurish ni rupompat. Mutapu umwing tukutwisha kuyimekeshin rukat ud wa kuyilembil. Ni yisu yimwing tukutwish kuyikwash kusutin kuyinkish yom yikwetau nich kuswir. Pakwez Bibil ulejen patok anch: “Awonsu asotila kwikal nich mwom utumbila mu Kristu Yesu akez kuyizengol.” (2 Tim. 3:12) Mulong wa diyingishin dined, etu awonsu tufanyidin kwirijek mulong wa mar mezina kurutu oku. El tudandamenany kumuchingejin kamu Yehova chipandakena ni kwikal ni kashinsh anch ukutukwash kujijamen yikokujol tukutwisha kurish nich mu machuku ma kurutu. Pa chisu chiwanyidina, ukulet kwiswedish kud antu awonsu amushinshamedina.​—2 Tes. 1:7, 8. w24.09 13 par. 17-18

Yom ik yayikwasha in Korint chakwel ayibatisha? (2 Kor. 10:4, 5) Dizu da Nzamb ni usu wa spiritu wend utumbila yawiy yayikwasha kuswimp mwom wau. (Heb. 4:12) In Korint awonsu itiya rusang ruwamp alikap yisal mud, kuleu, wij ni utun. (1 Kor. 6:9-11) Man anch in Korint ading ni yaku yiyimp yikunina kal, pakwez katongap anch kakutwishap kuyipandakan yaku yiney mulong wa kwikal in Kristu. Asala usu chakwel endina mwi njil yikemp yitwadina ku mwom wa chikupu. (Mat. 7:13, 14) Ov, niyey usadin usu wa kupandakan chaku chiyimp chakwel uwanyish yitinau mulong akubatish? Kangal waziy! Mulembila Yehova chakwel akwinkish spiritu wend utumbila ukutwisha kukwinkish usu wa kulik kusal yom yiyimp. w25.03 6 par. 15-17

Yehova ukanin kutwinkish manang makutwisha kutukwash kujingunin anch mupak tukimbina kukwat ukumusangaresh. Ukat kupan manang minam “kud awonsu [pakad] katond.” Kupwa kwa kumwit Yehova chakwel akutakel, sal usu wa kukimb chakul chend. Chilakej: Anch uyil mu weny ni kupwa washadik, ukutwish kwit ukwash kud muntu wija kwi ndond uyila. Pakwez ov, ukusinik kwey ni kusambish kuya kurutu ndiy akwakul? Bwat. Ukutesh kamu nawamp yom yikukulejay. Chilik chimwing, kupwa kwa kumwit Yehova manang, ikasikesha kujingunin chakul chend kusutin kukimb yijil ni mbil ja Bibil jikwatijadina ni mulong wey. Chilakej, anch ukimbin kukwat mupak mulong wa kuman anch ukuya ap bwat ku, ukutwish kushinshikin yom yilondinay Bibil piur pa arund ayimp ni usey wa kutek Want wa Nzamb pa ndond ya kusambish.​—Mat. 6:33; Rom 13:13; 1 Kor. 15:33. w25.01 16 par. 6-7

Uprofet wa Isay ulejen kushalijan kuda pakach pa antu ada mu paradis wa mu spiritu ni antu ada pol. Yehova ukat kuyink atushalapol end chom chin chawonsu chikwetau nich kuswir mulong wa kushal piswimp ni ndiy. Tukwet spiritu utumbila, Dizu dend, ni yakuda ya mu spiritu chawiy tukutwish “kuda, . . . kunang, . . . [ni] kusangar.” (Ilakej ni Kujingunik 22:17.) Pakwez kud kushalijan nau antu akad kwikal mu paradis wa mu spiritu “akwet nzal . . . , akwet ushon . . . , [ni] amen mar.” Kamwijap kwau Nzamb. (Amos 8:11) Yehova ukat kupan ni muchim wawonsu kud antu end yom yikwetau ni kuswir, kuwejaku ni yakuda ya mu spiritu. (Jow. 2:21-24) Chilakej, utwinkin Bibil ni mikand yimedina pa Bibil, kapend ketu, yikumangan, yitentam ya munyingumuku ni ya rejon. Tukutwish kutaninamu mu yom yiney machuku mawonsu, ni anch twasal mwamu tukwikal ni ukash wa mujimbu ni kwiyov pee. w24.04 21 par. 5-6

Anch ukimbin kusambish kwendijadin ni muntu, ukutwish kwirijek mulong wa kwambamb nend pa ndond pada antu ap ku telefon. Muleja patok yovil yey. (1 Kor. 14:9) Anch chid cha usey, Mushila muntu chisu cha kutong mulong wa kukwakul. (Jnsw. 15:28) Ni anch muntu kakatinap ufanyidin kulimish yovil yend. Chikwikal nchik anch muntu ukukatin? Chikumwit kwikal utakamena mulong wa kukulej, chawiy ikal muntu muwamp ni ukweta kalimish. Ufanyidin kulond anch ukwet kuswir kwa chisu mulong wa kwitiy anch ukusambish kwendijadinany. Chawiy, pakish kwakul pakad kulab anch chiswapel kusal mwamu. (Jnsw. 13:12) Anch chikukatishinap, akul nawamp ni patok. Anch ukatin kwendijadin ni muntu, isambinany piur pa yovil yen ni yom ukusalanya. Yom ukusala yikutwish kushalijan ni ya muntu mukwau, mud yaku ya kol kwen, ap kand yom yikwau. w24.05 23-24 par. 12-13

Chimeken anch, padingay uchid nsand, David waya kutal mu chibeng cha amasalay a in Isarel. Watana anch amasalay ading ovil wom mulong wa Goliyat mwin Filistin wayela anch “Ilel unou nakufunyishany kal kamu en amasalay au in Isarel.” (1 Sam. 17:10, 11) Amasalay ading ovil wom mulong wa chitabu ikundj Goliyat ni yom yayelay. (1 Sam. 17:24, 25) Pakwez David wamana yom mu mutapu windj. David wading wij anch Goliyat payisalangay amasalay a in Isarel, wading umusadin “Nzamb mwom.” (1 Sam. 17:26) David wading umuchingejidin Yehova. David wading uchingejin anch Nzamb wamukwasha chisu chadingay kafung ukumukwash kand mu chishiken chinech. Kuukwash wa Nzamb, David warisha ni Goliyat ni wamupandakana!​—1 Sam. 17:45-51. w24.06 21 par. 7

Tongin bil mutapu wafanyina kwikal mwom wetu anch twadap tumusadidina Yehova. Anch twavurik mulong wak chid cha usey kud etu kumusadin Yehova, chikutukwash kushal ashinshamen kud ndiy. Mud nfund a kuseng tukulond anch: “kudi am chidi chiwamp kamu kusej piswimp kud Nzamb.” (Kus. 73:​28) Tukutwish kurish nich yikokujol yikutwisha kwez mu machuku minam ma nsuden mulong “tumusadidin Nzamb wakin mwom.” (1 Tes. 1:9) Nzamb wetu ukat kutubangin ni ukutukwash kamu chisu chawonsu. Wamekesha mwamu mu kwikal nau atushalapol end a pasak, ni nlel ud kand ni yetwetu. Piswimp ap tukurish ni mar makash. Pakwez tukwikalap ayinetu, Yehova ukwikal netu. Chawiy mwamu niyetu “tukutwish kulond patok, wakad wom, anch: ‘Yehova ud mwin kwinkwash; nikwovap wom.’”​—Heb. 13:5, 6. w24.06 25 par. 17-18

Bibil ulejen majin ma amakundj 40 ni kusut ayikela mud ant mu Isarel. Mwant muwamp David. Yehova walonda anch: “Kashalapol wam David . . . [wanlondula] nich muchim wend wawonsu, mu kusal ching yom yitentamina ku mes kwam.” (1 Ant 14:8) Pakwez ikundj winou wasala masandj ni mband wayen ni watenchika chakwel amujip nfumwend kwi njit. (2 Sam. 11:4, 14, 15) Ku mutambu ukwau, ant avud ading akad kushinshaman asala yom yiwamp. Shinshikin chilakej cha Robowam. “Wasala yom yiyimp.” Ku mes ma Yehova. (2 Jsng. 12:14) Pakwez, Robowam wasala kand yom yiwamp. Chilakej wamuziyina Yehova chisu chamulejay anch kangal warishikish michid dikum ya in Isarel ni kuyilik itondinap mwant. Muchid wend wataninamu kand nakash mulong wakasikesha misumb. (1 Ant 12:21-24; 2 Jsng. 11:5-12) Yom ik yamukwasha Yehova mulong wa kwijik anch mwant kanang ud ushinshamena ku mes Mend? Washinshikin pa mwikadil wa muchim wend, kukarumuk, ni kusadin difukwil dakin. w24.07 20 par. 1-3

Chikwikal nchik anch mwan mukemp wabatishinau kal​—uda mwinshin mwa mivu 18​—wasal chitil chikash? Chisak cha amakurump chikutond amakurump aad chakwel atanijan ni mwan mukemp wasadina chitil pamwing ni anvaj end in Kristu. Amakurump akuyipul anvaj yom yasadinau kal mulong wa kumukwash mwanau kuswimp ni kukarumuk. Anch mwan winou wateshin yiyul ya anvajend ni anvaj apukwin muchim wend, amakurump aad inay akutwish kukwat mupak wa kuyilik anvaj chakwel adandamen kumukwash mwanau. Amakurump ij anch Yehova wayinkishin kal anvaj chisend cha kuyikand anau nich rukat. (Kuv. 6:6, 7; Jnsw. 6:20; 22:6; Efes 6:2-4) Chawiy amakurump akusambish kushinshikin pachipatu pamwing ni anvaj mulong wa kwikal nich kashinsh anch mwan winou utambwil ukwash uswirikedinay. Pakwez, chikwikal nchik anch mwan winou wabatishinau kal walik kukarumuk ni wadandamen kusal yom yiyimp? Anch chikal mwamu, amakurump asatu akutanijan nend pamwing nau anvaj end in Kristu. w24.08 24 par. 18

Etu awonsu tukat kusangar anch muntu watwinkish chipan. Pakwez, tukat kwikal ni musangar nakash anch twayinkish antu akwau. Kusutin kututang mu mutapu winou, Yehova watwinkisha mutapu wa kwikal ni musangar nakash. Tukutwish kuvudish musangar wetu kusutin kwikal ni chaku cha kupan. Chitusangareshin nakash pa kwijik anch wawiy mutapu watutangay Yehova! (Kus. 139:14) Mulong Bibil utulejin anch antu akata kupan akweting musangar, tukutwish kutesh mulong wak Yehova ud ‘Nzamb wa musangar.’ (1 Tim. 1:11) Ndiy mwin kupan mujim ni wa kusambish. Kusutin ndiy, “tukwet mwom, tukat kwend [ni] tudiaku.” (Mid. 17:28) Chakin kamu, ‘chipan chin chawonsu chiwamp ni chiwanyidina’ chidokil kud Yehova. (Yak. 1:17) Chimeken anch etu awonsu tukatin kwiyovilap musangar uvud udokila ku kupan. Tukutwish kusal mwamu anch twimburij muchim wa kupan wa Yehova.​—Efes 5:1. w24.09 26 par. 1-4

Kupwa kwa kushinshikin yom yitinau mulong wa kwikal mukurump, ankwash a mudimu amwing akutwish kuman anch kakutwishap ap pakemp kwikal amakurump. Pakwez vurik anch Yehova ni dirijek dend kachingejinap anch wikal muntu uwanyidina. (1 Pita 2:21) Ni spiritu wa Yehova ukweta usu ndiy ukukwashina kukudish mikadil yiney. (Filip 2:13) Ov, kud mwikadil ufanyidina kukudish pakampwil? Mulembila Yehova piur pa mulong winou. Kimbijol piur pa mwikadil winou ni mwipulap mukurump umwing chakwel akulej mutapu ukutwisha kukudish mwikadil winou. Dandamen kuya kurutu! Mwita Yehova akufumba chakwel umusadin nakash mu chikumangen. (Isay 64:8) El Yehova ayukish usu usadina mulong wa kuwanyish yitinau mulong wa kwikal mukurump. w24.11 25 par. 17-18

Kwikil muntu ap umwing wa pakach petu ufanyidina kutong anch Yehova ufanyidin kutulikishin mulong twamusadidin kal mu mivu yivud. Chakin kamu, Yehova ukat kuvurik yom yawonsu twamusadidina kal. Watwinkishay Mwanend mud chipan cha riy, kadap mulong wa kutufut mulong wa mudimu tumusadidina. Chawiy chidap chiwamp kutong anch tuwanyidin kutambul dilikishin da Yehova mulong twamusadidin kal yom yivud. Anch twatong mwamu, chinech chikumekesh anch tukwetap kwetu kuswir kwa difut. (Ilikej ni Galatiya 2:21.) Kambuy Paul wading wij anch kafanyinap kutambul dilau da Nzamb mulong wa yom yading yisadinay. Chad mulong wak wipana nakash mwamu mu mudimu wa Yehova? Kadap mulong wa kumekesh anch wading uwanyidin kutambul dilau da Nzamb, pakwez mulong wa kumekesh kujikitish kwend piur pa uwamp ni ranaken ramumekeshinau kud Yehova. (Efes 3:7) Mud Paul, tudandamedin kumusadin Yehova nich mushiku kadap mulong wa kutambul dilau da Yehova, pakwez mulong wa kumekesh kujikitish kwetu kud ndiy. w25.01 27 par. 5-6