Ngond wa 9

Tufanyidinap kwetu ching kusal usu wa kwikal akudina pakwez tufanyidin kand kusal usu wa kudandamen kukul. Chinech chitin kwipuk kwichingejin. (1 Kor. 10:12) Tufanyidin ‘kudandamen kwipak’ ayinetu mulong wakwikal nich kashinsh anch tudandamedin kukul. Mu mukand wend wayifundinay in Kolosay, kambuy Paul wakasikeshina pa usey wa kudandamen kukul. Ap anch In Kristu a ku Kolosay ading aswila mu spiritu, Paul wayileja anch afanyidin kubabal chakwel kangal yitongijok ya makasu ya antu a mangand yiyipumbula. (Kol. 2:6-10) Ni Epaferas, wading uyija nawamp antu a mu chikumangen, walembila nakash chakwel “ikala antu awanyidina,” ap akudina. (Kol. 4:12) Yom ik twilejidinaku? Paul ni Epaferas ajingunina anch mulong wa kushal muntu uswila chitin kusal usu nakash ni kukimb ukwash wa Nzamb. Akata anch in Kolosay adandamena kwikal in Kristu aswila, ap kukul chikalap nchik yikokujol yading yirishinau nich. w24.04 6-7 par. 16-17

Anch twamwov chakin kamu Yehova wom, tukumukat nakash ni tukusalap chom chin chawonsu chikutwisha kumusal nayimp. Tukwikal nich impu ya kwilej kwijik kwauril kuyip ni kuwap, uyakin ni makasu. Anch twasal mwamu tukutwish kand kwikal ni dilau da Yehova. (Jnsw. 2:3-6; Heb. 5:14) Anch twayov antu wom nakash kusutamu mutapu tumwovila Nzamb wom, tukutwish kuya kulemp ni uyakin. Shinshikin chilakej cha in kutentish 12 aya kutentish ngand yakanay Yehova kuyinkish in Isarel. In kutentish dikum ova wom nakash wa in Kanan kusutamu rukat rau radingau nich mulong wa Yehova. Ayileja ambay nau in Isarel anch: “Etu tukwetap usu wa kurish nau antu ina, mulong awiy akwet usu kupandakan etu.” (Kuch. 13:27-31) Mu kuman kwa antu, in Kanan ading akwet usu nakash. Pakwez kulond anch in Isarel kafanyinap kuyipandakan akankuny nau kwadingap kutong kwa Yehova. In kutentish dikum afanyina kushinshikin pa yom yading yikatinay Yehova anch in Isarel asala. w24.07 9 par. 5-6

Ov, tukutwish kwikal nich kashinsh anch chisu chawonsu chikatay Yehova kuyirumburish antu ukat kukwat mipak yiwamp? Inge! Aburaham wikala nich kashinsh kinak anch Yehova ud utentamina, ukwet manangu nakash, mwin ranaken, “nkalansambu wa mangand mawonsu.” Ni wamwikishin kal mwanend chisend cha kurumburish muntu win mwawonsu. (Yoh. 5:22) Yehova ni Yesu ij yom yida mu muchim wa muntu win mwawonsu. (Mat. 9:4) Chawiy anch amurumburish mun tu ni muntu akat kusal yom “yiwamp”! El tusalany usu wa kuchingejin mu mipak yawonsu ya Yehova. Twij anch tuwanyidinap kurumburish, pakwez ndiy uwanyidin kusal mwamu! (Isay 55:8, 9) Chinech chawiy chitubachikina kuchingejin kurumburish kwawonsu kwa Yehova ni mwanend, twij anch Mwant wetu Yesu ukumwimburij kamu nawamp.​—Isay 11:3, 4. w24.05 7 par. 18-19

Tukutwish kwilej usey wa kwikal in kashinsh mu muchim kusutin yom yasadika chisu chatanijanay Yesu kapamp ka kusambish ni Natanayel. Filip pamuletay murunend Natanayel kud Yesu, kwasadika chom chijim nakash. Ap anch Yesu wading kandikal amanijanangap ni Natanayel, walonda anch: ‘Winou ud mwin Isarel wakin, wakad makasu!’ (Yoh. 1:47) Yesu wamana anch Natanayel wading mwin kashinsh kupandakan. Natanayel niyend wading muntu wakad kuwanyin, pakwez kadingap mwin rubabek ni wading mwin kashinsh mu yom yawonsu. Yesu wasangera nakash win kashinsh wa Natanayel ni wamujikitisha mulong wa chom chinech. Yom yivud yilejenau mu Kuseng 15 yitadin nakash pa mutapu tushiching nau antu akwau. Kuseng 15:3 ulondin anch muntu uda ngendj mu mwinkand wa Yehova ‘kakatap kufukej nich rudim rend, kakumusalangap mukwau chom chiyimp, ni kakuyitwambilangap arunend makasu.’ Anch twayifukejin akwetu, chinech chikuyisal kamu nayimp.​—Yak. 1:26. w24.06 10 par. 7, 9; 11 par. 10

Anch wirijek nawamp mulong wa mudimu wa kulejan, ukwiyakamishap chisu wambambina nau antu. Yesu wayikwasha in kwilej end kwirijek ayituma mu mudimu wa kulejan. (Luka 10:1-11) Mulong asadina yom yafundishau kud Yesu, in kwilej ikala ni musangar nakash piur pa yom yasalau. Mutapu ik tukutwisha kwirijek mulong wa mudimu wa kulejan? Tufanyidin kutongijokin piur pa yom tukulonda, ni kupwa kuyilond mu mutapu wa chivadik ni mu mazu metu. Ni kutongin kand mutapu ukutwishau antu kwakul ni ukuyakula. Anch twambambin ni muntu, tufanyidin kupakish kulik kuzazat, ni tufanyidin kusip, ni kuyisanger. w24.04 16 par. 6-7

Diyingishin da usey nakash ditubachikining kulejan rusangu ruwamp did anch Tumukatin Yehova ni dijin dend ditumbila. Tumening mudimu wetu wa kulejan mud mutapu wa kumushiman Nzamb tukatina. Twitiyin nich muchim wawonsu anch: Yehova Nzamb uwanyidin kutambul uyaj, katumb, ni ukash kud atushalapol end ashinshamena. Tukat kumwinkish uyaj ni katumb patukata kuyilej antu akwau uman wa usu umekeshina anch ndiy “watanga yom yawonsu” ni anch ndiy watwinkisha mwom tukweta. Tukat kumwinkish ukash​—ukash wetu​—pitukata kusadin chisu chetu, usu wetu, ni yom tukweta mulong wa kwipan nakash mu mudimu wa kulejan kukwatijan ni mashakamin metu. (Mat. 6:33; Luka 13:24; Kol. 3:23) Mu wiswimp, tukatining kulond piur pa Nzamb tukatina. Tukat kwiyov kand kwikal abachikinau kuyilej antu akwau dijin dend ni chidimekeshina dijin dined. w24.05 17 par. 11

Yehova ukat kuyifut antu akata kumwifukwil ndiy. (Heb. 11:6) Utwinkishin chisambu ni musangar katat ni ukutwinkish mwom wa chikupu mu machuku ma kurutu. Tukutwish kumuchingejin Yehova ni kwikal nich kashinsh anch ukwet impu ni usu wa kutufut. Ni kashinsh kinak kakat kutubachik kwikal akwatikena mu difukwil detu, mud mwasalau atushalapol ashinshamena a Nzamb a pasak. Yawiy yom yasalay Timote mu mivu chitot ya kusambish. (Heb. 6:10-12) Timote wateka ruchingej rend muday Nzamb mwom. (1 Tim. 4:10) Chawiy wasala mudimu wa usu nakash mulong wa Yehova ni antu akwau. Mutapu ik wasalay mwamu? Kambuy Paul wamukasikesha kudandamen kuya kurutu mu kufundish ni kulejan pakach pa antu. Timote washa kand chilakej chiwamp kud ambay nend in Kristu, amapal nau ansand. Ni amwinkisha kand yisend yikash, kuwejinaku kand kupan yiyul patok nich rukat kud antu ading afanyidinau kuyul. (1 Tim. 4:11-16; 2 Tim. 4:1-5) Timote wading nich kashinsh anch Yehova ukumufut.​—Rom 2:6, 7. w24.06 22-23 par. 10-11

Yisu yivud Yehova wasadina aprofet mulong wa kuyibabesh ni kuyikand antwend. Chilakej, Nzamb walonda kusutin Jeremiy anch: “Ey, Isarel wimikin dis, chirik kudi am. Am nidi mwin riy, kinikwovap ujim. Kinikez kakujimenap chikupu. Ching kamu kwitiyil kufa nich kwey kuwamubwambwila [Yehova] Nzamb wey.” (Jer. 3:12, 13) Yehova walonda kand kusutin Jowel anch: “Karumukany kwen chakin, udiokalany ku yitil, chad wezany kudi am.” (Jow. 2:12, 13) Wamupepila Isay kulond anch: “Itokishany, dioshany yisalijok yen yiyimp kurutu kwam. Likany kusal nayimp.” (Isay 1:16-19) Ni kusutin Ezekiel, Yehova wipula anch: “Ov, utongilany am nikat kusangar mulong wa rufu ra muntu muyimp? Bwat, nikusangar anch ndiy wakarumuk ni kwitiyil yitil yend chakwel apanda. Am kinisotilap umwing wenen afa. . . . Karumukany, udiokalany ku yitil chakwel upandany.” (Ezek. 18:23, 32) Yehova ukat kwov musangar anch wayiman antu akat kukarumuk, mulong ukatin anch adandamen kushakam chikupu! w24.08 9 par. 5-6

Atushalapol awonsu a Nzamb akat kutambul yakuda ya mu spiritu, umutakel ni diking yiswirikedinau. Mutapu ukwau umekeshinay Yehova anch kakwetap kasolikany ud kusutin kusal anch antu a pa mangand mawonsu ikal ni Bibil. Mifund Yitumbila kwinsambishin ayifunda mu mazu masatu am: Hebereu, Aram ni Grek. Ov, chinech chimekeshin anch antu atangina Bibil mu mazu mamufundau kwinsambishin akwet urund wa piswimp nakash ni Yehova kuyisutamu antu akwau? Bwat. (Mat. 11:25) Kwikal ni dilau da Yehova kwimedinap pa mashikol ma mangand twileja ap pa kwijik mazu mamufundau Bibil kwinsambishin. Yehova kakatap kupan manangu mend ching kud antu ilejina nakash, pakwez ukat kumapan kud antu a pa mangand mawonsu, ileja nakash ap bwat. Dizu Dend Bibil, adikarumwin kal mu tunan twa mazu; mwamu antu a pa mangand mawonsu akutwish kutaninamu mu mafundish mend ni kwilej mutapu wa kwikal arunend.​—2 Tm. 3:16, 17. w24.06 6-7 par. 13-15

Kusheshik kwa Yerusalem kwasambelay Yesu kulejan kwading kukat kusej piswimp. In Kristu inay afanyina kusadin chisu chading chishadinaku mulong wa kwirijek kusutin kukasikesh ritiy rau ni kujijaman. (Heb. 10:25; 12:1, 2) Tukurish ni mar makash kupandakanamu marishau nich in Kristu a mu Yudeya. (Mat. 24:21; Kuj. 16:14, 16) Tushinshikinany amboku chiyul chimwing chapanay Yehova mulong wa kuyikwash in Kristu inay ni mutapu ukutwisha chiyul chinech kutukwash. Kambuy Paul wayikasikesha ambay nend in Kristu kwilej ni kutongijokin pa Dizu da Nzamb. (Heb. 5:14–6:1) Paul wasadina Mifund ya Hebereu ni warumburila mulong wak mutapu wamwifukwilangau Yehova kud in Kristu wading wa usey nakash kupandakanamu mutapu wifukwilangau in Yuda. Paul wayikasikesha in Kristu kwikal ni ronganyin ra Mifund mulong wa kujingunin mafundish ma makasu chakwel atwish kumipuk. w24.09 8-9 par. 2-3; 10 par. 6

In kwilej a Yesu ading kamu akwet kuswir kwa dikasikesh. Mulong wak? Amwing asha yikumbu yau, majuku mau, ni midimu yau mulong wa kumulondul Yesu. (Mat. 19:27) Akwau ayisadinang mu mutapu wakad kutentam mulong ikala in kwilej a Yesu. (Yoh. 9:22) Asala yom yiney mulong ading achingejin anch Yesu ndiy wading Mesiya washilawamu. (Mat. 16:16) Pakwez pamujipau Yesu, anenganana ni aziya nakash mulong kijikap yom yafanyina kushiken. Chakin kamu Yesu kamanap ushon wa in kwilej end mud kuziy kwa mu spiritu, pakwez mud ushon ukatau antu kwov anch ashadish muntu ukatinau nakash. Chawiy pavumbukay kamu mwamu, wasambisha kuyikasikesh arunend. Chilakej, wamubudikina Mariy Mandalen wading udidina kwi nzay. (Yoh. 20:11, 16) Wayibudikina kand in kwilej aad ku Emaus.Kupwa wamubudikina kambuy Pita. w24.10 13 par. 5-6

Anvaj, mukwasha mwaney kulond mulong wak witiyijin muday Sakatang. Ukutwish kwisambinany mitu ya milong yilondina anch: “Les Jeunne s’interrogent Création ou évolution ? (1re partie) : Pourquoi croire en Dieu ?” yida pa jw.org. Mwamu mwaney ukutwish kutond yitongijok yilondina piur pa Sakatang yikutwisha kumuswapel kurumburil. Mukasikesha kurumburil yom mu mutapu uswapela ni wakin anch muntu kanang usotin kwambamb nend. Chilakej, mbay nend wa shikol ukutwish kulond anch: “Nitiyijin ching kusu yom nikutwisha kuman, pakwez kandikal nimumanangap Nzamb.” Nsand Mwin Kristu ukutwish kumwakul anch: “Tong bil mud ukat kwend mu dit, mu masuku kulemp ni pol. Ni watan mwingoch wa kutung nawamp. Yom ik ukutonga? Anch mwingoch winou umekeshin patok anch autunga kud muntu ukweta manang, komb mangand mamekeshin kamu patok anch kud muntu wamatanga!” w24.12 18 par. 16

Etu awonsu tukweting kuswir kwa yiyul mulong wa kukwat mipak yiwamp. Tukutwish kutambul yiyul yiney kud amakurump a chikumangen ni kud in Kristu akwau aswila mu spiritu. Anch akwet mivu yivud kutusutamu etu, tufanyidinap kuman yiyul yau mud yikwetap kand usey. Yehova ukatin anch twilejin kud antu amakurump. Asutishin kal chisu chivud nakash mulong wa kwikal ni ukaliweny ni akwet manang kutusutamu etu. Pasak, Yehova wayisadina amapal ashinshamena mulong wa kuyikasikesh atushalapol end ni kuyitakel. Shinshikin chilakej cha Moses, David ni kambuy Yohan. Ashakama mu yirung yishalijadina ni mashakamin mau mading mashalijadin kamu kulemp. Pashikau kwinsuden kwa mwom wau, ayinkisha ansand yiyul ya manang. Amapal inay asatu akasikeshina piur pa usey wa kumuziyin Nzamb. Twikal ansand ap amakurump, tukutwish kutaninamu anch twilej yiyul yau yiney.​—Rom 15:4; 2 Tim. 3:16 w24.11 8 par. 1-2

Pa chirung cha Nowa, Nzamb wayijidika antu kuda mash. (Dis. 9:3, 4) Yehova wachirikina kand mbil yiney mu Chijil chapanay kud in Isarel. Chijil chinech chading chilondin anch: ‘Mwawonsu ukuda mash, akumujip.’ (Lev. 7:27) Yesu wayifundisha in Yuda kuziyin ku yijil yawonsu yayinkishau kud Nzamb. (Mat. 5:17-19) Chawiy kafanyinap ap pakemp kuyilej in Yuda kuda mujimbu wend wakinakin ap kuna mash mend. Yesu wading ulondin mu mutapu wa chifanakesh pading palondinay kud in Yuda. Yesu walonda kand mu mutapu wa chifanakesh chisu chamulejay mband mwin Samariya anch: ‘Mem nikumwinkisha makumwinkish mwom wa chikupu.’ (Yoh. 4:7, 14) Yesu kalondap anch mband mwin Samariya ukutambul mwom wa chikupu anch wana kwend mem mamwing mwamu ma mu mwingoch. Chilik chimwing, kayilejap antu ading ambambinay nend mu Kapernaum anch akwikal ni mwom wa chikupu anch ada mujimbu wend wakinakin ni kuna mash mend. w24.12 9 par. 4-6

Amakundj in Kristu afanyidin kubabal chakwel kangal imburij chitongijok chiyimp cha mangand piur pa amband. Mulong wak? Diyingishin dimwing did anch yom yitonginay muntu, ukat kushikenang kuyisal. Kambuy Paul wayibabesha in Kristu azizidinau many a mu Rom “[kulik] kwimburij mangand minam.” (Rom 12:1, 2) Kambuy Paul payifundinay in Kristu a ku Rom, chikumangen chading chasadin kal mivu yivud. Pakwez, mazu ma Paul mamekeshin anch antu amwing mu chikumangen ading ni yibachikin ya yishankur ni mutapu wa kutong wa mu mangand. Chawiy chayibabeshay chakwel aswimp mutapu wau wa kutong ni yaku yau. Chiyul chinech chiyitadin kamu amakundj in Kristu nlel. Cha ushon, amwing pakach pau alikidina mutapu wa kutong wa mangand kuyitakel ni kusambish kuyimesh akajau mar. w25.01 9 par. 4

Nlel amakurump akwatiken nakash. Ad in kulejan rusang ruwamp. (2 Tim. 4:5) Akat kutushil chilakej chiwamp kusutin kulejan nich mushiku, kutenchik mudimu wa kulejan mu teritwar wetu ni akat kutufumb chakwel tutwish kulejan ni kufundish nawamp. Ading kand anzuj akweta ranaken ni akad kasolikany. Anch Mwin Kristu wasal chitil chijim, amakurump akat kusal usu wa kumukwash kuchirish urund wend ni Yehova. Pa chisu chawiy chimwing, akat kusal usu wa kulam chikumangen chishitwila. (1 Kor. 5:12, 13; Gal. 6:1) Yisu yivud, amakurump ijikening mud atufung. (1 Pita 5:1-3) Akat kusal madiskur mawamp mimedina pa Bibil, kusal usu wa kumwijik muntu mwawonsu uda mu chikumangen ni kuyendin antu mu mudimu wa ukafung. Kudoshaku yom yiney, amakurump amwing akat kukwash kand mudimu wa kutung ni kurijek Yot ya Want, kutenchik yitentam ya rejon, amwing akat kusal kand mu chisak cha Komite wa Kupan Ukwash ku Milong ya Opital ap a mu Yisak ya Kutal Ayej. Chakin kamu, amakurump akat kusal mudimu ukash mulong wetwetu! w24.10 20 par. 9

Bibil ulondin anch twakwolikin kal mulong Yehova wapana difut. Kambuy Pita walonda anch: “En wijany anch akukwolanya ku yaku yamwamu yiwaswananya ya anshankuren. Kakukwolanyap nich yom yikata kushadish usey mud utad wa argent, ap wa or, pakwez en akukwolanya nich mash ma Kristu makweta usey ukash. Ndiy wading mudi mwan a mu koku wa kupesh wakad kapad ap chitaj.” (1 Pita 1:18, 19) Kusutin cha kupesh cha difut, tukutwish kukwolik ku chitil ni rufu. (Rom 5:21) Chakin kamu, tumujikitishin nakash Yehova ni Yesu mulong atukwola kusutin mash ma usey ma Yesu. w25.02 5 par. 15-16

Mutapu ik tukutwisha kwikal achila ku mes? Shinshikin yom tukutwisha kwilejin ku chilakej cha nsand wisambidinau mu Jinswir shapitre wa 7. Wasala masandj ni mband wa kusochik. Verse wa 22 utulejin anch nsand winou wamulondula “swa kamu.” Pakwez, maverse ma kwiur mamekeshin anch wasala yom yivud kurutu kwa chom chinech kumushikij pakemp pakemp ku kusal chitil.Yom ik yamushikija ku kusal chitil? Cha kusambish, urel, nsand winou “wasutila mu mukombil piswimp ni ku dikonk kwashichingay mband wa kusochik.” Chikwau kand, wendina piswimp ni chikumbu cha mband winou. (Jnsw. 7:8, 9) Ni pamumanay mband, kasutap kapamp kamwing. Pakwez, witiya kususu kwend ni kutesh yom yading yimulejinay piur pa milambu ya chisambu yapanay, pamwing ap mulong wa kumushikij kutong anch kadingap muntu muyimp. (Jnsw. 7:13, 14, 21) Anch nsand winou wipuka ubaj utwadina ku kusal chitil, wafanyina kwilam ku yoziu ni ku chitil. w24.07 16 par. 8-9; 19 par. 19

Yehova kakatap kudiul yitil yikash pakach pa antwend. Antu amwing akutwish kutong anch mulong Yehova ud mwin riy, ukutwish kumulik muntu usadina chitil pakad kukarumuk kushal mu chikumangen, pakwez kiwawiyap mutapu ukatay Yehova kumekesh riy rend. Chakin Yehova ud mwin riy, pakwez kadap mwin kudiul yom yiyimp; ap mwin kupipej mbil jend piur pa yom yiwamp ni yiyimp. (Yud 4) Chawiy kusal mwamu kukwikalap kumekesh riy ap pakemp, mulong kukuyitek antu awonsu ada mu chikumangen mu ubaj. (Jnsw. 13:20; 1 Kor. 15:33) Pakwez, twilejin anch Yehova kakatinap anch muntu ap umwing asheshika. Ukatin kuyipandish pa chisu chawonsu chikata kumekan mutapu wa kusal mwamu. Ukat kumekesh riy kud antu akata kuswimp michim yau ni akatina kurijek urund wau ni ndiy. (Ezek. 33:11; 2 Pita 3:9) Chawiy, chisu chakarumukay ikundj wa mu Korint ni kuswimp yaku yend, Yehova wamusadina kambuy Paul mulong wa kuyirumburil antu a mu chikumangen anch ikundj winou chading chifanyidin kumulikishin ni kumwak mu chikumangen. w24.08 17 par. 7; 18-19 par. 14-15

Mu chishimu cha amikoku nau ampemb, Yesu walonda anch ukuyirumburish antu kukwatijan ni mutapu ukuyikwashau akadivar nend azizidinau many. (Mat. 25:31-46) Pa chisu cha “mar makash” Yesu ukuyauril amikoku nau ampemb kurutu kwa Armagedon. (Mat. 24:21) Mud mukatay kafung kwauril amikoku nau ampemb, Yesu ukuyauril antu awonsu ayikwasha in kwilej end azizidinau many ni antu alika kwau kusal mwamu. Bibil ulondin anch Yesu uda Nzuj watondinau kal kud Yehova, ukuyirumburish antu nich kutentam. (Isay 11:3, 4) Ukushinshikin nawamp yom yisadinau antu, yitonginau ni yom yilondinau kuwejinaku mutapu uyisadidinau akadivar azizidinau many. (Mat. 12:36, 37) Yesu ukujingunin nawamp antu ayikwasha in kwilej end azizidinau many. Mutapu umwing wa pakampwil ukutwishay muntu kuyikwash akadivar nend a Kristu kud kulejan rusang ruwamp. w24.09 20-21 par. 3-4

Tukutwish kwikal ni kashinsh anch yom twitiyijina yid yakin kusutin kuyilakej ni yom yilondinay Bibil. Chilakej, tongin piur pa nsand wakad kwikal ni kashinsh anch Yehova umubangidin chakin kamu. Ov, ukutwish kwend kwitiy anch yitongijok yiney yid yakin? Bwat, ufanyidin ‘kushinshikin yom yawonsu’ kusutin kwikal ni chitongijok cha Yehova piur pa chom chinech.Chisu tutangina Bibil, tukat kwambamb ni Yehova. Pakwez tufanyidin kusal yom yivud anch tukimbin kutan yakul ku yipul yetu. Tufanyidin kushinshikin pa maverse makutwisha kutukwash kutan yakul ku yipul yetu. Mulong wa kusal mwamu, tufanyidin kukimbijol mu yichap yetu. (Jnsw. 2:3-6) Tufanyidin kumwit Yehova ukwash mu malembil chakwel tutana yakul ku yipul yetu. Kupwa tufanyidin kukimbijol mbil ja Bibil ni nsang jikutwisha kutukwash etu pakampwil. w24.10 25 par. 4-5

Yehova kakumuyukishap muntu mwawonsu wikwatina nich usey nakash. (1 Kor. 10:24, 33; 13:4, 5) Yisu yimwing ap antu ading arund a piswimp nakash a Yesu akata kwikal ni yisend yimwing, pakwez yibachikin yau yadingap yiwamp. Tongin piur pa yom yasalay Yakobu ni Yohan. Amwita Yesu kuyinkish chisend cha piur nakash mu Want wend. Yesu kayibazap mulong wa yibachikin yau. Pakwez, wayirumburila atwimbuy awonsu 12 anch: “Muntu mwawonsu usotila kwikal mujim pakach pen ufanyidin kwikal mwin kukusadinany en, ni muntu mwawonsu usotila kwikal wa kusambish, ufanyidin kwikal kashalapol wa antu awonsu.” (Mar. 10:35-37, 43, 44) Akadivar akweta yibachikin yiwamp, akweta kuswir kwa kuyisadin antu akwau, akutwish kukwash chikumangen mu mitapu yivud.​—1 Tes. 2:8. w24.11 15-16 par. 7-8

Anch twakwat mipak, rukat rikutubachik kukimb uwamp wa muntu “mukwau” ni kwijik mimbu yetu. (1 Kor. 10:23, 24, 32; 1 Tim. 2:9, 10) Mwamu tukukwat mupak umekeshina anch tuyikatin ni tuyilimishin antu akwau.Anch usotin kukwat mupak ujim, tongin pa yom yifanyidina kusal mulong wa kuwanyish mupak winou. Yesu watufundisha ‘kusal tupamp.’ (Luka 14:28) Chawiy shinshikin chisu, yom ni usu uswirikedina mulong wa kuwanyish mupak wey. Yisu yimwing, chikutwish kwikal cha usey kwisamb ni dijuku dey dawonsu, mulong wa kuman yom yifanyidinay kusal muntu ni muntu mulong wa kukwash mupak wey. Mulong wak chid cha usey kurijek yom mu mutapu winou? Yikutwish kukukwash kuman anch chid cha usey kuswimp yom kanang mu mupak wey ap kuswimp kamu mupak win. Ni anch wisambin mupak wey pamwing nau antu a mu dijuku dey ni kutesh yitongijok yau, akutwish kukunung chikas mulong wa kuwanyish mupak wey. w25.01 18-19 par. 14-15

Kupwa Isay urumburil mulong wak tufanyidin “kusangar ni kuzangijal” mu paradis wa mu spiritu. Paradis winou wa chifanakesh amutanga kud Yehova. (Isay 65:18, 19) Chawiy chishimokishinap kuman anch Yehova utusadidin mulong wa kuyikwash antu kushakam mu dirijek dined da pa mangand! Ni tuzangijadil mulong wa yiyukish tusangaredina mulong wa kwikal mu uyakin ni tukat kuyilej antu akwau mulong wa yom yiney. (Jer. 31:12) Tujikitishin kand ni kuzangijal mulong wa ruchingej tukweta mu paradis wa mu spiritu. Bibil ukanin anch: Tukez ‘katung yikumbu [ni] kushakamamu ayinetu [ni] kadim yir ya mitond ya nviny ni kudia mabuj mau.’ Ni ‘midimu yawonsu tukusala yikez kawanyin’ mulong akez ‘katuyukish kud Yehova.’ Utukanin diking ni mwom usangareshina. Ndiy ukez kijik maswir ma muntu win mwawonsu ni ‘ukuyikutish awonsu akweta mwom.’​—Isay 65:20-24; Kus. 145:16. w24.04 22-23 par. 11-12

Tukat kumusal Yehova kwikal diyal detu anch twikamen kuday ndiy. Tukwet kashinsh anch ang twamuziyin chikalap nchik mu yisu yikash, tukat kutaninamu nakash. (Isay 48:17, 18) Chisu chawonsu anch twaman mutapu utukwashinay Yehova, chinech chikat kusal anch tumuchingejin nakash. Tukat kwikal nich kashinsh anch ching kusu Yehova ndiy ukutwisha kutukwash kujijamen chikokujol chin chawonsu chikutwisha kushiken. Mud diyal dijim, Yehova kakunyikekangap ni kakuswimpangap. Wuntu ni ntong jend yikuswimpangap. (Mal. 3:6) Pamubwambwilau kud Adam ni Ev, Yehova kaswimpap rutong rend. Mud mwafunday kambuy Paul, Yehova “kakutwishap kwitun amwinend.” (2 Tim. 2:13) Chinech chirumburikin anch kwikil chom chikutwisha kushiken ap chikutwishau kusal antu akwau, chikutwisha kuswimp mikadil ya Yehova, rutong rend ap mbil yend. Mulong Yehova kakuswimpangap, twij anch ukutukwash mu yisu ya mar ni ukuwanyish kushilamu kwend mulong wa machuku ma kurutu.​—Kus. 62:6, 7. w24.06 27-28 par. 7-8

Anch wendijadidinany, yom ik yikukukwasha kukwat mupak wa kwandam mu uruw ap bwat? Kud kwijikijan nawamp umwing ni mukwau. Ukwet kuswir kwa kwilej yom kampand piur pa muntu kurutu kwa kutondijan. Pakwez ijik anch ukwet kuswir kwa kwijik “ufun wend wa mukach mwa muchim.” Chinech chitin kwilej yom yivud piur pa urund wend ni Yehova, wuntu wend, ni yitongijok yend. Chikwau kand, ufanyidin kushiken chilik cha kwakul yipul yiney: ‘Ov, muntu winou ukwikal mbay wa uruw muwamp kud am?’ (Jnsw. 31:26, 27, 30; Efes 5:33; 1 Tim. 5:8) ‘Ov, nimumekeshidin rukat ni yovil yikwetay nich kuswir, ni ndiy wimekeshidinay? Tukutwish kusambish kudiulijadin tu ulim umwing ni mukwau?’ (Rom 3:23) Piuyilanya mu kwijikijan umwing ni mukwau, ufanyidin kuvurik anch: Chom cha usey kadap mu yom utanijadinana pakwez ufanyidinany kusal usu wa kwijidin umwing ni mukwau. w24.05 27 par. 5

Mwant David wasala chitil chijim. Pakwez chisu chayay muprofet Natan kwambamb nend mulong wa chitil chend, David wakarumuka nich kwikepish. (Mazu mafunday David mu Kuseng 51 mamekeshin anch wakarumuka kamu chakin. David kamekeshap kwend mud unenganen kurutu kwa Natan ap mulong wa kwipuk dipup. (Kus. 51:3, 4, 17) Mwant Ezekias niyend wasala chitil ku mes ma Yehova. (2 Jsng. 32:25) Pakwez mud David, Ezekias wakarumuka nich kwikepish. (2 Jsng. 32:26) Mud chibudikin, Yehova wamumana mud mwant ushinshamena “wasala yom yitentamina.” (2 Ant 18:3) Yom ik twilejidina? Tufanyidin kukarumuk ku yitil yetu ni kusal usu nakash wa kulik kuyichirikin kand. Chikwikal nchik anch twatambul chiyul kud amakurump a chikumangen ap anch tutongin anch chidap kwau cha usey? Tufanyidinap kwiyov anch Yehova nau amakurump katukatinap. Ap ant awamp a mu Isarel ading niyau akwet kuswir kwa kuyiyul ni kuyikand. (Heb. 12:6) Anch atukand, tufanyidin (1) kwitiy nich kwikepish, (2) kusal usu wa kuswimp, ni (3) kudandamen kumusadin Yehova nich muchim wawonsu. Anch twakarumuk ku yitil yetu, Yehova ukutulikishin.​—2 Kor. 7:9, 11. w24.07 21 par. 8; 22 par. 9, 11

Anch muntu wasalang chitil amudosha mu chikumangen mulong walikang kukarumuk chikalap nchik usu wasalangau amakurump wa kumukwash tupamp ni tupamp chakwel ashikena ku kukarumuk. (2 Ant 17:12-15) Yisal yend yamekeshin kal anch watondin kal kulik kuziyin kwi mbil ja Yehova. (Kuv. 30:19, 20) Anch muntu wasalang chitil wakad kukarumuk amudosh mu chikumangen, akwijikish chikumangen anch muntu winou kadap kand Kaman wa Yehova. Chitongijok cha chijikish chinech chidap cha kumukwatish muntu wasalang chitil usany. Pakwez, akat kusal mwamu chakwel chikumangen chiziyin mbil yida mu Bibil yilondina anch “kangal wadandamenany kwibomb” ni muntu winou ni “ufanyidinanyap ap kuda ni muntu wa mutapu winou.” (1 Kor. 5:9-11) Kud mayingishin mawamp masadina anch Yehova apana mbil yiney. Kambuy Paul wafunda anch: “Chivish chikemp chikat kututwish mutand wawonsu.” (1 Kor. 5:6) Antu asadina yitil akad kukarumuk akutwish kuziyish mupak wa antu asadina usu wa kushakam kukwatijan ni mbil jitentamina ja Yehova.​—Jnsw. 13:20; 1 Kor. 15:33. w24.08 27 par. 3-4

Tukwetap usu wakad mimbu mud Yehova. Pakwez tukutwish kumwimburij kusutin kusadin usu wetu mulong wa kuyikwash antu akwau. Chilakej, tukutwish kumukwash mukadivar ap nambaz ipal ap uyedina kurijek mu chikumbu ap kumulandinaku yom. Anch tukwet mutapu, tukutwish kwipan mulong wa kukwash kutenchik ap kukorop mu Chot cha Want. Kangal twavuramen anch tukutwish kand kuyikasikesh antu akwau kusutin mazu metu. Ov, ukutwish kutongin muntu ukutwisha kukasikesh anch wamulej ang usangaredin yom yisadinay. Ov, wij muntu ukweta kuswir kwa dikasikesh? Anch mwawiy, sal usu wa kumumekeshin muntu winou anch umubangidin. Ukutwish kuya kumutal kwol kwend, kumutazuk ku telefon ap kumutumin uruu. Kangal kwey wiyakamish piur pa yom ukulonda. Mazu makemp ma rukat mawiy kwau makutwishay mukadivar ap nambaz ney kuswiriken mulong wa kushal ushinshamena ap kwikal ni ruchingej.​—Jnsw. 12:25; Efes 4: 29. w24.09 28 par.  8-10

Anch ud nkwash a mudimu, chimeken anch usadin usu wa kuwanyish yitinau mulong wa kwikal mukurump. Ov, ukutwish kuyisadin akadivar nau anambaz ney kusutin kwikal mukurump? Wisu mudimu ukatau kusal amakurump? Akat kulejan nich mushiku pamwing ni chikumangen, akat kusal mudimu wa ukafung, kuyifundish akadivar nau anambaz ni kukasikesh ritiy rau kusutin mazu mau ni yisal yau. Chawiy chilondinay Bibil anch amakurump ad yipan. (Efes 4:8) Yom ik ufanyidina kusal mulong wa kwikal mukurump? Yom ufanyidina kusal yishalijadin nakash ni yom yikatay kusal muntu anch ukimbin mudimu. Mulong wa kupat mudimu, ufanyidin kwikal ni ukaliweny uswirikedinay mukurump wey wa mudimu. Pakwez, anch usotin kwikal mukurump, ufanyidinap kwey ching kusu kwikal ni ukaliweny mu mudimu wa kulejan ap kwikal mwin kufundish muwamp. Ufanyidin kukudish mikadil yilejenau mu 1 Timote 3:1-7 ni Titus 1:5-9. w24.11 20 par. 1-3