Ngond wa 10

Chisak Chitakedila, kalam wa munyingumuku, biro wa mutiy, ni amakurump​—a chikumangen, akat kutwinkish umutakel utukwashina kumwifukwil Yehova. Pakwez yisu yimwing tukutwishap kamu kutesh nawamp mayingishin matwinkishidinau umutakel kud akadivar inay. Tukutwish kwidjidjek piur pa umutakel utwinkishinau anch ud kamu wakin. Tukusambish kushinshikin pa kuburen kuwanyin kwa akadivar atwinkishina umutakel winou. Anch twend kusutin ritiy, tukwikal ni kashinsh anch Yehova utakedin dirijek dend ni wij yom yawonsu yitushikedina. Mud chibudikin, tukat kuziyin pakad kulab, ni tukat kusal mwamu ni chitongijok chiwamp. (Heb. 13:17) Tukat kwijik anch kuziyin kwetu kukat kukasikesh uumwing wa chikumangen. (Efes 4:2, 3) Tukwet kashinsh anch ap anch akadivar atutakedina ad akad kuwanyin, Yehova ukutuyukish anch twaziyin. (1 Sam. 15:22) Pa chisu chiwanyidina, ukuwapish yom yin yawonsu yakad kwend nawamp. w25.03 23-24 par. 13-14

Tushich pa chirung cha pakampwil! Mulong dichuku din dawonsu tumen mutapu uwanyidina uprofet wa Bibil wasambelau kulejan. Chilakej, tumen “mwant wa kwiyand” ni “mwant wa kurul” arishina mulong wa kwiyikel mangand. (Dan. 11:40) Tumen mutapu ulejenau rusangu ruwamp ra Want wa Nzamb pa mangand mawonsu, ni antu avud akat kutond kumusadin Yehova. (Isay 60:22; Mat. 24:14) Ni tutambwil yakuda ya mu spiritu yivud “pa chisu chiwanyidina.” (Mat. 24:45-47) Yehova udandamedin kutukwash kutesh nawamp mutapu ukusadika yinship ya usey yikushikena piswimp ap. (Jnsw. 4:18) Tukutwish kwikal nich kashinsh anch pa chisu chikusambisha mar makash, tukwijik yom yawonsu tukwikala nich kuswir mulong wa kushal ashinshamena ni kushal mu uumwing pa chisu chinacha chikash. Chawiy, tufanyidin kwijik anch kud yom yimwing tukulika kwijik piur pa machuku mezina piswimp ap. w24.05 8 par. 1-2

Nfund a kuseng ujimbwil pakampwil kafukej. Kafukej chom ik? Mu wiswimp, mad mazu ma makasu ni makutwisha kuyipish kalimish ka muntu. Kuseng 15:3 utuvurishin kand anch angendj a Yehova kakuyisalangap akwau chom chiyimp ap kuyitwambil arunau makasu. (Kus. 15:1) Chirumburikin ik? Tukutwish kumutwambil muntu mukwau makasu pakad kutongin kusutin kupalangesh nsangu jiyimp piur pend. Chilakej: (1) anch nambaz umwing wimik mudimu wend wa chisu chawonsu, (2) anch ambay a uruw kadap kand ku betel, ap (3) anch mukadivar umwing kadap kand mukurump wa chikumangen ap nkwash wa mudimu. Ov, chikwikal chiwamp kutongijokin pa mayingishin maletishang kuswimp kwinoku ni kuyilejamu antu akwau yom yiney? Kukutwish kwikal mayingishin mavud twakad etu kwijik. Chikwau kand, muntu uda ngendj mu mwinkand wa Yehova ‘kakumusalangap mukwau chom chiyimp, ni kakuyitwambilangap arunend makasu.’ w24.06 11 par. 11-12; 12 par. 11-13

Mulong wa kukasikesh wom wetu kud Yehova, chisu chawonsu tukwatina mupak tufanyidin kushinshikin pa yom yikumusangaresha. Piutangina rusang rida mu Bibil, ufanyidin kwiyipul anch: ‘Anch nading mu chishiken chinech, mupak ik nafanyina kukwat?’ Chilakej, tongin mud ukat kuyitesh antakel dikum au in Isarel akat kupan rapor uziyishena kupwa kwa kutentish ngand yakanay Yehova kuyinkish in Isarel. Ov, wafanyina kwitiyij rapor winou ni kwov wom wa an a antu, anch rukat rey mulong wa Yehova ni maku mey ma kumusangaresh yawiy yafanyina kupandakan wom winou? In Isarel avud kitiyijap anch Yoshua ni Kaleb ading alondin uyakin. Mud chibudikin, ashadisha dilau da kwandam mwi Ngand ya Kushilamu.​—Kuch. 14:10, 22, 23. w24.07 10 par. 7

Gomer, mband wa muprofet Ozey, wamulika Ozey mulong wa kwend ni amakundj indj. Ov, wading ni mutapu wa kukarumuk? Yehova ukata kuman yida mu muchim wa muntu wamuleja Ozey anch: “Yang kand ukamekesh rukat rey kudi mukajey ukata kusochik kudi nfumwend wa kuns. Chakin kamu, ufanyidin kumukat mudi am chiniyikatila antwam in Isarel, ap anch angombap nchik nyim, aya kudi [anzamb akwau].” (Ozey 3:1; Jnsw. 16:2) Umen anch mband wa Ozey wading uchidandamedin mu chitil chend chikash. Pakwez chikalap nchik mwamu, Yehova wamuleja Ozey kumukimb Gomer, kumulikishin, ni kumuchirish ku chikumbu. Kusutin chilakej chinech, Yehova wakata kuyifundish antwend mutapu wiyovay piur pau. Ap anch ading awidin kal mu yitil yikash, Yehova wadandamena kuyikat, kuyikimb, ni kuyikwash chakwel akarumuk ni aswimp mwikadil wau. Ov, chilakej chinech chimekeshin anch Yehova, ukata ‘kushinshikin yida mu muchim,’ ukumukimb muntu udandamedina mu chitil chikash ni kusal usu wa kumukwash chakwel akarumuk w24.08 10 par. 7

In Yuda a mu mivu ya kusambish ashikena kwikal in Kristu afanyina kuswimp yom yivud mu mwom wau, pakwez chadingap chiswapela kusal mwamu. Chisu chimwing, in Yuda ading antu atondau kud Yehova. Mu mivu yivud, Yerusalem yading ndond ya pakampwil. Ant atondangau kud Yehova ashakamang mwinimwa. Ni mulong wa kumwifukwil Yehova chading chitin kuya ku tempel wading mu Yerusalem. In Yuda awonsu ashinshamena alondulang Chijil cha Moses chayifundishangau kud antakel a chirelijon. Ading akwet yijil pa mulong utadina yakuda, kutwalan ku mukand, ni piur pa mutapu wa kuyisadin antu a michid yikwau ading akad kwikal in Yuda. Pakwez, kupwa kwa rufu ra Yesu, Yehova kitiyap kand yakupesh ya in Yuda. Chawiy chadingap chiswapela kud in Yuda ikala in Kristu kuswimp mutapu wau wa kwifukwil. (Heb. 10:1, 4, 10) Ap in Kristu aswila mud kambuy Pita, niyau chayikasikena kwitiy mutapu winou wa kwifukwil. (Mid. 10:9-14; Gal. 2:11-14) Mulong wa yitiyij yau yisu, in Kristu inay asambisha kuyipompat kud antakel a chirelijon a in Yuda. w24.09 9 par. 4

Kudosh pakur Yehova ukat kuyinkish antu end chisend, ni ukat kuchingejin anch achiwanyisha. (1 Kor. 14:33) Chilakej, rusot ra Nzamb piur pa antu ukatin anch rusang ruwamp arilejana pa mangand mawonsu. (Mat. 24:14) Yehova wamwinkisha Yesu chisend cha kutakel mudimu winou. Yesu ukatin anch mudimu winou usadika pakad kanvundangesh. Mu mivu chitot ya kusambish, yikumangen ayiteka ku jindond kushalijan, amakurump ayitonda ni kuyinkish umutakel mulong wa kutakel. (Mid. 14:23) Mu Yerusalem chisak chitakedina nau amakurump, mwading atwimbuy nau amakurump, akwata mipak ni yikumangen yawonsu yaziyinang ku mipak yiney. (Mid. 15:2; 16:4) Mud chibudikin cha kuziyin kwimbil jinej jatambulau ‘yikumangen yakasikana mu ritiy, yavulijananga kand dichuku dawonsu.’​—Mid. 16: 5.w24.04 8 par. 1

Machuku ma ngond 16 Ngond wa Nisan, amband amwing aya pamanch nakash kwi nzay ya Yesu. (Luka 24:1, 10) Umwing wa pakach pau wading Mariy Mandalen. Pashikay Mariy kwi nzay, katanapamu mujimbu wa Yesu. Chawiy waya mau wamulejamu Pita ni Yohan. Amakundj inay aya mau kwi nzay ni Mariy wayilondula. Kupwa kwa kwimenap ayinau anch mwi nzay mwading mwamwamu, amakundj inay achirika ku chikumbu, pakwez Mariy washala kwi nzay. Washakama kwinikwa, oku ukat kudil. Kadingap kija anch Yesu wading kwinikwa. Yesu wamana anch wading umudidin ndiy ni wakata kumukasikesh. Chawiy wamubudikina Mariy ni wamuleja chom chimwing chamukasikesha nakash. Wamuleja kuya kud anamakwend ni kuyilej uruu wa usey nakash. Wafanyina kuyilej anch Yesu wavumbukang kal.​—Yoh. 20:17, 18. w24.10 13 par. 7

Moses wamusadina Yehova nakash ni muchim wend wawonsu wading muprofet, nzuj, ntakel ni mwin kufund. Moses wading wij yom yivud nakash mu mwom. Wayidosha in Isarel mu usuk wadingau mu Idjibit ni wimenap amwinend yilay yivud ya Yehova. Ni amusadina kand kud Yehova mulong wa kufund mikand yitan ya kusambish ya Bibil, Kuseng wa 90, ni pamwing ap Kuseng wa 91. Chimeken anch ndiy kand wafunda buku wa Job. Padingay ni mivu 120, chisu chikemp kurutu kwa kufa, Moses wayikumangeja in Isarel awonsu pamwing mulong wa kuyivurish yom yawonsu yayisadinau kud Yehova. Padingau ansand, in Isarel amwing imenap yilay yasalay Yehova ni mutapu wayipupay in Idjibit. (Kub. 7:3, 4) Amana mutapu waurilay Yehova mem ma Karung Musunz ni mutapu wamusheshay Farao nau amasalay end awonsu. (Kub. 14:29-31) Yehova wayichidija ni kuyipandish padingau mwi mpay. (Kuv. 8:3, 4) Chawiy, padingau in Isarel piswimp ni kwandam mwi Ngand ya Kushilamu, Moses wasadina chisu chinicha mulong wa kuyikasikesh. w24.11 8-9 par. 3-4

Yom yalonday Yesu pa chisu chinech cha Yakuda ya Urel ya Mwant kud atwimbuy end yishalijadin kamu ni yalonday mu Galaliya, yading yiyitadina antu avud nakash kamu. Padingay Yesu mu Galaliya mu muvu wa 32 C.C., wading uyedin in Yuda ading akatina kwau kuda mikat. Pakwez, wapakisha kuyikwash kutesh anch wading ni chom chikwau cha usey chisutinamu yakuda​—chom chafanyina kuyinkish mutapu wa kutambul mwom wa chikupu. Ni walonda kand anch antu afila kal akutwish kuvumbuk pa dichuku da nsuden ni kwikal ni mutapu wa kushakam chikupu pa divu. Kadingap kalondina piur pa chisak chikemp, mud mwasalay pa chisu cha Yakuda ya Urel ya Mwant. Pakwez, mu Galaliya wading wisambidin piur pa yiyukish yikutwishau kutambul antu awonsu. w24.12 11 par. 10-​11

Yehova ukisin muntu mwawonsu ukweta chisum. (Kus. 11:5) Yehova kakatiningap muntu ukata kumumesh mukajend mar. (Mal. 2:16) Anch ikundj kashichap nawamp ni mukajend, urund wend ni Nzamb ukuyip. Chimeken anch Yehova kakuteshap kwend malembil mend. (1 Pita 3:7) Amakundj amwing akat kuyiswejin akajau ni kuyilond mazu makash makata kuyitap ku muchim. Pakwez Yehova ukisin ‘ujim, kuswej, kubarok ni mazu ma masaal.’ (Efes 4:31, 32) Ikundj ukata kumulond mukajend yom yiyimp kayipishinap kwend ching uruw wend, pakwez uyipishin kand urund wend ni Nzamb. (Yak. 1:26) Chilik chimwing kand ni ikundj ukata kutal pornografi. Ukat kuyipish urund wend ni Yehova. Ni ukat kumupipej kand mukajend. Yehova ukatin anch ikundj amushinshamen mukajend mu yisal ni mu yitongijok. Yesu walonda anch muntu mwawonsu ukumutala mband nich maku mayimp wasal kal chitil cha makaj “mu muchim wend.”​—Mat. 5:28, 29. w25.01 9 par. 6-8

Bibil ulondin anch atushalapol a Yehova ayimen kud ndiy anch atentamin. Chinech chirumburikin anch tukwetap kand kuswir kwa kufut mulong wa yitil tukata kusal. Ap anch Yehova wasala mwamu, kakutwishap kujip mbil jend piur pa kutentam. Ukat kutuman anch tutentamin ku ranaken rend rijim. Chikwau kand, Yehova kakatap kusanger yitil. Pakwez ukatin kulikishin yitil yetu mulong tumekeshin ritiy mu yom yasalay ndiy ni Yesu wapana difut. (Rom 3:24) Mutapu ik tukata kutaninamu anch Yehova watuman anch tutentamin? Antu amwing amenau kal anch atentamin ayitondin kal mulong wa kuyikel pamwing ni Yesu mwiur ni ikadin kal an a Nzamb. (Tit. 3:7; 1 Yoh. 3:1) Yitil yau ayilikishidin kal. Chid mud kand kal asalangap yitil, ni chawiy chisadina anch ikal awanyidina kwandam mu Want. (Rom 8:1, 2, 30) Antu akwau amenau anch atentamin akushakam chikupu pa divu. Yehova walikishidin kal yitil yau ni ikadin kal arunend.​—Yak. 2:21-23. w25.02 5 par. 17; 7 par. 18

Shinshikin chisu chalikay kambuy Pita kwimburij mutapu wa kutong wa Yehova. Yesu wayileja in kwilej end anch ufanyidin kuya ku Yerusalem, ni kwinikwa akumupan kud amakurump a chirelijon, kumumesh mar, ni kumujip. (Mat. 16:21) Pita wading wij anch Yesu ndiy wading Mesiya washilawamu ni wafanyina kuyipandish antu a Nzamb. Chawiy, chading chimukasikedin Pita kwitiy anch Yehova alika chakwel amujipa Yesu. (Mat. 16:16) Pita wamupwitina Yesu kuns ni wamwel anch: “Iyovila riy Nsalejam, yom yiney yikukushikenap bwat.” (Mat. 16:22) Yesu ni Pita katanijanap pa mulong winou, mulong Pita kadingap ni chitongijok cha Yehova. Yesu wading wij anch, mulong wa kusal rusot ra Yehova, chading chimufanyidin kuman mar ni kufa. Chawiy Yesu walika chiyul cha Pita ap anch Pita wading upakishin kumukwash. Mulong wa chom chinech, Pita wileja anch wading ufanyidin kutong mud mutonginingay Nzamb. Dined did dilejan da usey nakash tufanyidina niyetu kwilej. w25.03 9 par. 5-6

Ov, uziyin nakash mulong muntu wada uchingejidina wakusadidin mu mutapu uyimp? Uyakin ud anch, chikalap nchik yom yakusadidinau kud muntu, Tatukwey uda mwiur ukukatin.Anch muntu waturumbukin, tukutwish kand kutan dikasikesh mu mazu ma David mada mu mufund wa nlel. Buku umwing ulondin anch antu “akweta michim yinenganena” akutwish kuyifanikesh ni “antu akad chom chiwamp mukach mwau.” Mutapu ik ukatay Yehova kuyikwash antu iyovila mwamu? Yehova “udi piswimp” niyetu. Ud mud tatuku ap maku umwongojina mwanend udidina. Anch tunenganen mulong muntu kanang watutombukidin ap watulikin, Yehova ukat kutesh mutapu twiyovila ni ukutukwash pakad kulab. Ud kwaku mulong wa kutukasikesh chisu tunenganena ap anch tutongin anch tukwetap kand usey. Ni utukanin yom yivud yikutwisha kutukwash kujijamen yikokujol turishina nich.​—Isay 65:17. w24.12 23 par. 13-14

Nlel amakurump akutwish kwikal nich kashinsh anch Yehova ukat kuman ni ukwatin nich usey mudimu wau wa usu usadinau. Kuwejinaku mudimu wa ukafung, kufundish, ni kulejan. Amakurump avud akat kunung chikas ku ma proje ma kutung, ni kupan ukwash kwi ndond kushikedina mar. Amakurump akwau asadin mu yisak ya kwendin ayej ap CLH. Amakurump akata kwipan kusal midimu yiney mulong ij anch chikumangen chid cha Yehova. Chawiy akat kwipan ni muchim umwing mu yisend yiney ni akwet kashinsh anch Yehova ukuyifut mulong wa yom yisadinau. (Kol. 3:23, 24) Kadap muntu mwawonsu ukutwisha kwikal mukurump. Pakwez etu awonsu tukutwish kumwinkish Yehova chom kanang. Nzamb wetu ukat kusangar anch twasal usu wa kumusadin. Ukat kuman anch twapan yipan mulong wa kunung chikas ku mudimu usadikina pa mangand mawonsu ap anch tukwet yom yikemp nakash. Ni anch twasal usu wa kuyilikishin antu akata kuturumbukin. Ikal nich kashinsh anch Yehova ukwatin nich usey yom ukutwisha kusal. Ukukatin mulong wa yom yiney ni ukukufut.​—Luka 21:1-4. w24.06 23 par. 12-13

Rusang ra Salomon rimekeshin yom yikutwisha kumushiken kashalapol mwawonsu wa Yehova. Ukutwish kuwil mu chitil chijim ni kutong anch yom yashikena kapamp kamwing. Ap ukutwish kulond anch: “Yashikenang pakad kutongin.” Pakwez anch wishil chisu cha kutongijokin pa yom yasadinay, ukutwish kujingunin anch wakwata mipak ya usup kurutu kwa kusal chitil chijim. Mipak yiney yikutwish kwikal pamwing ap kutond kuyimp kwa arund, kwipuwangej kuyimp, kwendin ndond yakad kufanyin kud mwin Kristu, ap tupend tuyimp. Pamwing ap wad kand walikin kal kulembil, kutang Bibil, kukumangan, ap kwipan mu mudimu wa kulejan. Mud nsand wisambidinau mu Jinswir, chimeken anch kasalap kamu chitil kapamp kamwing. Yom ik twilejidinaku? Tufanyidinap kwipuk ching kwau kusu chitil pakwez kand nzau jitwadina ku kusal chitil. Salomon wisambina chom chinech kupwa kwa kulejan yom yashikena.​—Mat. 5:29, 30. w24.07 16 par. 10-11

Yiyukish yiney chom ik? Ud mudimu wa kupandish mwom kusutin kulejan rusang ruwamp. (2 Kor. 4:1) Manung ma kam chom ik? Mamekeshin atushalapol a Nzamb akata kuyilej antu akwau rusang ruwamp. Chisu cha Paul, in kwisak asadina yilaud ya makalash mulong wa kusendinamu yom ya usey, mud ya kuda, nviny, ni nfalang. Chilik chimwing, Yehova utwikishin uruu wa usey nakash uda rusangu ruwamp. Ni ukwash wa Yehova, tukutwish kwikal ni usu wa kulejan rusangu ruwamp ni kushinshaman. Yisu yimwing, tukutwish kov wom wa antu ap wom wa kutwopat kud antu. Mutapu ik tukutwisha kupandakan chikokujol chinech? Shinshikin malembil ma atwimbuy chisu chayikangeshau kulejan. Pakwez kovap wom ni kimikap kulejan, Amwita Yehova chakwel ayikwash “kulond wakad wom.” Yehova wakula ku malembil mau pakad kulab. (Mid. 4:18, 29, 31) Anch twayov antu wom chisu chimwing, niyetu tufanyidin kumwit Yehova ukwash, mwita Yehova chakwel akukwash kukasikesh rukat rey mulong wa antu. w24.04 16 par. 8-9

Rukat tukweta mulong wa Yehova rikat kutubachik kutumbish dijin dend. Tukatining kunung chikas ku kushitwish dijin dend ku masal ni makasu ma Satan. (Dis. 3:1-5; Job 2: 4; Yoh. 8:44) Mu mudimu wetu wa kulejan, tukatining nakash kumulondin, mu kuyilej awonsu akatina kutesh uyakin piur pend. Tukatining muntu mwawonsu ijik anch mwikadil wend ujim nakash rid rukat, anch mutapu wend wa kuyikel utentamin, ni anch piswimp ap Want wend ukupwish mar mawonsu ni ukuyiletin antu chisambu ni musangar. (Kus. 37:10, 11, 29; 1 Yoh. 4:8) Pitukata kuyilej antu yom yiney piur pa Yehova tukat kutumbish dijin dend. Tukwet kand musangar wa kwijik anch tushich kukwatijan ni dijin detu. w24.05 18 par. 12

Akadivar, ukumekeshany anch udany ‘in kwakan’ anch wayisadinany antu akwau yom yiwamp, kuwejaku ni antu akad kwikal arunen. (1 Pita 4:9) Ndinguril umwing wa Bibil ulondin anch muntu mwin kwakan ukat kuyibangin ap antu akaday kwijik ni ukweting musangar wa kuyitazuk kwol kwend. Iyipula anch: ‘Ov, antu akwau angij mud muntu ukata kuyak antu akata kwez mu chikumangen cham?’ (Heb. 13:2, 16) Ikundj mwin kwakan ukat kuyak antu awonsu. Chilakej, ukat kuyak atuzwendj, antu ezina kusal madiskur mu chikumangen chau ni antu akwau asadina usu wa kuyikasikesh akadivar nau anambaz mud atulam a munyingumuku.​—Dis. 18:2-8; Jnsw. 3:27; Mid. 16:15; Rom 12:13. w24.11 21 par. 6

Mu chishimu cha atujik, Yesu walonda piur pa atujik dikum aya kumusankan ngatan. (Mat. 25:1-4) Awonsu ading achingejin kumutwalaku ngatan ku musambu wa uruw. Yesu walonda anch atan pakach pau ading “ababel” ni atan akwau ading “ayisup.” Atujik ading ababela irijeka nawamp ni ading achil ku mes ading amuchingedin ngatan djat ni pakushikinay, ap anch washika mu mapep ma uchuku. Chawiy, asenda malamp mau makweta many mulong wa kulet chitokish mu mididim. Ading kand akwet many makwau kuns mulong wa kumuchingel nich ngatan nawamp djat kamu pakwezinay. Chawiy irijeka chakwel kangal malamp mau majim. (Mateu 25:6-10) Pashikay ngatan, atujik ababela andama nend mu musambu wa uruw. Chilik chimwing, in Kristu azizidinau many amekeshina kushishaman kwau djat ni pakwezinay Kristu, akwikal ni dilau da kwandam mu Want wa mwiur pamwing ni Ngatan, charumburik anch Kristu. (Kuj. 7:1-3) w24.09 21 par. 6

Tukutwish kwikal ni mushiku nakash mu mudimu wa kulejan anch twatongijokin mutapu usadikina mudimu winou pa mangand mawonsu nlel. Muvu ni muvu, mamiliyon ma antu asangaredina akat kukumangan ku Chivurikish ni tukat kwilej nau Bibil. Tunan twa antu akat kuyibatish ni kubombakan netu pamwing mu mudimu wa kulejan. Twijap kamu uvud wa antu akwitiya rusang ruwamp tulejena, pakwez twij anch Yehova ukat kukumangej chisak chijim cha antu akupanda ku mar makash makushikena piswimp ap. (Kuj. 7:9, 14) Yehova amwinend ndiy mwant wa mudimu ni wij anch kud antu avud akutwisha kwitiy rusang ruwamp, chawiy tudandamedina kamu kulejan. (Luka 10:2) In kwilej a Yesu akat kuyijinguninang ku mushiku wau mu mudimu wa kulejan. Chilakej, pamanau antu mutapu walejanau atwimbuy nich kutakaman ni mushiku “ajingunina anch, komb antu inay ading pamwing nend Yesu.” (Mid. 4:13) Patumenau kand niyetu mu mudimu wa kulejan, antu afanyidin kujingunin anch tukat kwimburij chilakej cha Yesu, walejanang ni mushiku. w25.03 18 par. 15; 19 par. 17-18

Bibil utufundishin anch Yehova uyij antu amekena mud kakwetap usey. Chilakej, Yehova wamutuma muprofet Samwel ku chikumbu cha Yese mulong wa kutond mwanend umwing chakwel ikal mwant wa Isarel. Pakach pa anend chinan, Yese waletap sambwad kud Samwel, pakwez wamudoshaku David wading mwan mukemp nakash. Ap mwamu, David ndiy watondau kud Yehova. (1 Sam. 16:6, 7, 10-12.) Yehova wading umwij kamu David nawamp. Wading wij anch nsand winou wading umukatin nakash.Tongin mutapu wamekeshinay kal Yehova anch ukwij kamu nawamp. Ukwinkishin yiyul yiwamp uswirikedina. (Kus. 32:8) Chinech chimekeshin anch ukwij kamu nawamp. (Kus. 139:1) Anch wasadin yiyul ya Yehova ni kuman mutapu muyikukwashina, ukwikal ni kashinsh anch Yehova ukubangidin. (1 Jins. 28:9; Mid. 17:26, 27) Yehova ukat kuman usu usadina mulong wa kumusadin ni kumuziyin. Ukat kuman kand mikadil yey yiwamp ni ukatin kwikal muruney.​—Jer. 17:10. w24.10 25-26 par. 7-9

Tukwet kashinsh anch umukatin Yehova ni ukatin kuyisadin akadivar nau anambaz ney. Yom ik yikutwisha kukukwash kukudish impu ya kusal midimu yiney? Umen nchik anch watongijokin pa musangar udokiling ku kuyisadin akadivar nau anambaz ney? Yesu walonda anch: “Chiyukish cha mwin kupan chipandakenamu cha mwin kutambul.” (Mid. 20:35) Ni Yesu amwinend wasadina yom yalonday. Wading ni musangar nakash mulong wayisadinang antu akwau. Niyey ukutwish kwikal ni musangar winou.Shinshikin chilakej chimekeshina chid mu Marko 6:31-34. Dichuku dimwing, Yesu nau atwimbuy end ading aziyang kal. Aya kwi ndond ya ayinau mulong wa kwiswedishaku. Pakwez chisak cha antu chasambela kushik kurutu kwa awiy ni ading achingejin anch akuyifundish kud Yesu. Yesu wading ni mutapu wa kulik. Ndiy nau in kwilej end “kamanap chisu cha kuda.” Yesu wafanyina kwend kuyilej antu kuya kupwa kwa kuyifundish tuyom tukemp kwau. Pakwez mulong wading ni rukat, “wasambisha kuyifundish yom yivud. Ni wadandamena kuyifundish djat kamu urel.​—Mar. 6:35. w24.11 16 par. 9-10

Anvaj, mukwasha mwaney kutan mitapu ya kuyilej antu akwau piur pa Bibil. (Rom 10:10) Ukutwish kufanikesh usu usadinay mulong wa kulondin ritiy rend ni usu usadiningau antu mulong wa kubul yingambangamb ya kubul nich mizik. Kwinsambishin, mwin kubul mizik ukat kutond miminy yiswapela kubul. Mu kusut kwa chisu, chikat kumuswapel chad kubul mizik nawamp. Chilik chimwing, nsand Mwin Kristu ukutwish kusambish kwend kulejan mu mutapu uswapela. Chilakej, ukutwish kumwipul mbay nend wa shikol anch: “Ov, wij anch in siyans akat kwimburij yom yimenau mu yitang? El nikulejaku video umwing usangareshina nakash.” Kupwa kwa kumulej video uda mu chikunku Yikarumukina Anch Ayitanga? ukutwish kulond anch: “Anch antu akat kumutumbish mwin siyans ukata kusal yom kusutin kwimburij yom yatangau, ov, nany ufanyidina kutambul katumb ka yom yimburijinay?” Pamwing ap, mbay nend wa shikol ukukat kwilej yom yivud piur pa Yehova. w24.12 19 par. 17-18

Mulong wa kutukamunin ku chitil ni rufu, Yehova watenchika chakwel Yesu afuta difut. Pakwez mutapu ik rufu ra muntu umwing uwanyidina rafanyina kukamunin mamiliyon ma antu? Kambuy Paul urumburil anch: “Mud mutapu wikalau antu avud akayitil mulong wa kubwambwil kwa muntu umwing [Adam], chilik chimwing kand antu avud akwikal atentamina mulong wa kuziyin kwa muntu umwing [Yesu].” (Rom 5:19; 1 Tim. 2:6) Charumburik anch, twikala asuk a chitil ni rufu mulong wa kubwambwil kwa muntu umwing uwanyidina. Chawiy kand mulong wa kutukwol, chita kuziyin kwa muntu umwing kusu uwanyidina. Ov, Yehova kafanyinap kwend kuyilik an a Adam akweta michim yiwamp chakwel ashakam chikupu? Kud etu antu akad kuwanyin, tukutwish kutong anch winou wawiy wading mutapu uwamp wa kupwish mulong. Pakwez mutapu winou wa kutong ukwatijadinap ni kutentam kuwanyidina kwa Yehova. Mulong Yehova ud Nzamb utentamina, kafanyinap ap pakemp kuduul chisal cha kubwambwil cha Adam. w25.01 21 par. 3-4

Mu chisu kanang, kambuy Paul wajingunina anch akumujip, pakwez chikalap nchik mwamu, wikala ni musangar nakash patongijokinay piur pa mutapu wasadinay mwom wend. Walonda anch: “Napwishin kal kubambil kwam, nalamin kand ritiy retu nawamp.” (2 Tim. 4:6-8) Paul wakwata mupak uwamp nakash wa kumusadin Yehova mu mwom wend, ni wiyova anch Yehova umusangaredin. Niyetu tufanyidin kukwat mipak yiwamp ni kwikal ni dilau da Nzamb. Mutapu ik tukutwisha kusal mwamu? Paul walonda piur pa amwinend ni piur pa in Kristu akwau ashinshamena anch: ‘Twendin kusutin ritiy, kadap kusutin yom yimekena.’ Mu Bibil, ‘kwend’ kurumburikining yisu yimwing mulad wa mashakamin utondinay muntu kwikal nich.. Muntu wendina kusutin ritiy, ukat kukwat mipak yimedina pa ruchingej rend muday Yehova Nzamb. Yisal yend yimekeshining anch ukwet kashinsh anch Nzamb ukumufut ni anch ukutambul yiyukish yivud kusutin kusadin yiyul ya Yehova yida mu Dizu Dend.​—Kus. 119:66; Heb. 11:6. w25.03 20 par. 1-2

Kusutin ukwash wa spiritu wa Nzamb, antu avud adinga pakur ni mikadil ya chisum aswimpa mu mwom wau. (Isay 65:25) Asala usu wakulik mikadil yiyimp. (Efes 4:22-24) Chakin kamu, antu a Nzamb ad akad kuwanyin, chawiy tukutwish kudandamen kurumbok. Pakwez, Yehova wabomba “antu awonsu” amukatina ni akatijadina umwing ni mukwau, mud chibudikin akwet chisambu ni uumwing. (Tit. 2:11) Chinech chid chilay chidokila kud Nzamb wa dikand dawonsu! Mazu mend makat kuwanyin kamu. (Isay 55:10, 11) Paradis wa mu spiritu udaku kamu nlel. Yehova watanga dijuku da pakampwil. Pakach pa antu end, tukutwish kutan chisambu, kusanger diking ap anch ad mu mangand ma chisum. (Kus. 72:7) Mulong wa mayingishin minam, tukatin kuyikwash antu avud anch chiswapel kwibomb niyetu mu dijuku da win Kristu. Tukutwish kusal mwamu anch twashinshikin pa kwikadish in kwilej.​—Mat. 28:19, 20. w24.04 23 par. 13, 15

Yesu wamukata Yehova nich manang mend mawonsu. Wading wij rusot ra Nzamb piur pend, ni wakwata mupak wa kusal yom kukwatijan ni rusot riner, ap anch kusutin kusal mwamu wafanyina kuman mar mulong wa yom yitentamina. Mu kudandamen kusal rusot ra Tatukwend, Yesu kitiyap anch chom ap chimwing chimukangesha kuwanyish mupak winou.Pita nau atwimbuy akwau ading ni dilau da kusutish chisu pamwing ni Yesu ni kuman mutapu watongangay. Pafunday Pita mukand wend wa kusambish, wayikasikesha in Kristu kwikal ni chitongijok cha mutapu umwing ni chadingay nich Kristu. (1 Pita 4:1) Mu mazu ma Grek, pafunday Pita anch: “Wikasikeshany kwikal nich,” wasadina mazu mamekeshina amasalay adjadina yom ya njit. Chawiy anch in Kristu imburij chitongijok cha Yesu, akwikal ni yom ya njit yikash yikuyikwasha kurish ni maku ma kusal yom yiyimp ni kurish ni mangand minam mayikedinau kud Satan.​—2 Kor. 10:3-5; Efes 6:12. w25.03 8-9 par. 1-3

Yom ik ufanyidina kwilej piur pa muntu chirung wendijadinanya? Kurutu kwa kukudish yovil yikash piur pa muntu, ufanyidin bil kwisamb nend yom ya usey, mud ntong ja machuku ma kurutu. Mutapu ik ukutwisha kushiken kumwijik muntu nawamp? Ukutwish kusal mwamu kusutin kwipul yipul ni kuteshijan nawamp umwing ni mukwau, ufanyidin kumulej yovil yey ni kwikal mwin kashinsh mu yakul yey. (Yak. 1:19) Pamwing ap, ukutwishany kutond kusal yom pamwing chinech chikusal anch chikuswapelany kwambamb, mud kuda pamwing, kwipuwangej pamwing, ni kuya mu mudimu wa kulejan pamwing. Ukutwishany kand kwijikijan nawamp piusutishinanya chisu pamwing ni arund nau antu a mu dijuku. Chikwau kand, ukutwishany kutenchik mijikit kushalijan yikutwisha kukukwashany kujingunin kuman mutapu ukuyisadinay antu mu yishiken kushalijan. w24.05 28 par. 6-7

Piswimp ap, tukurish ni yikokujol yikash ni tukwikal ni kuswir kwa kwikamen nakash kuday Yehova. Nsang jida mu Bibil ni yom yiyishikedina Atuman a Yehova a nle,. jitukwashin kushinshikin mutapu wamekeshay Yehova mikadil yida mud diyal mulong wa kuyikwash atushalapol end. Kutongijokin chikurikina piur pa nsangu jinej. Kusal mwamu kukutwish kukukwash kumusal Yehova ikala Diyal dey.Chikwau kand, tukutwish kuyikasikesh akadivar nau anambaz mu chikumangen. Chilakej, Yesu wamupila Simon anch Sefas (dikarumwinau anch “Pita”), charumburik anch “Chikunku cha Diyal.” (Yoh. 1:42) Chinech chamekesha anch Pita wafanyina kwikal musul wa rongoj kud akwau mu chikumangen ni kuyikasikesh mu ritiy. Amakurump a chikumangen ayilejen mud “urel wa diyal dijim.” Chinech chimekeshin mutapu ukatau kuchidij chikumangen. (Isay 32:2) Chakin kamu, chikumangen chikat kutaninamu anch antu awonsu​—akadivar ni anambaz​—imburij mikadil ya Yehova yida mud diyal. w24.06 28 par. 10-11

Yehova wayimana ant a mu Isarel amwifukwila ndiy anch ashinshamen. Yehova wayimana ant akwau anch kashinshamenap alika kuziyin ku Chijil ni wasambisha kwifukwil anzamb a makasu. (1 Ant 21:25, 26; 2 Jsng. 12:1) Mulong wak difukwil did da usey ku mes ma Yehova? Diyingishin dimwing did anch, ant ading ni chisend cha kuyikwash antu kumwifukwil Yehova mu mutapu uwamp. Anch antu ifukwil anzamb a makasu, chinech chikat kuyibachik kusal yitil yikwau yikash ni kuyisadin antu akwau mu mutapu uyimp. (Ozey 4:1, 2) Chikwau kand ant ni antu au ading ipanin kal kud Yehova. Chawiy, chisu chalikau kushinsham kud Yehova ni kwifukwil anzamb a makasu, Bibil ulondin anch chid mud asala chitil cha kusochik. (Jer. 3:8, 9) Anch muntu wasal chitil cha kusochik, wamekesh kal kuburen kushinshaman kud muntu ufanyidinay kushinshamen ni wamutap kal mbay nend wa uruw ku muchim. Chilik chimwing, muntu wipanina kal mulong wa kumusadin Yehova anch wiyandjik mu difukwil da makasu, wasal kal chitil kapamp kamwing kud Yehova mu mutapu wa pakampwil.​—Kuv. 4:23. w24.07 22-23 par. 12-15