Ngond wa 12

In kwilej a Yesu itiya Dizu da Nzamb ni asala usu nakash wa kudisadin mu mwom wau. (Yoh. 17:6) Pakwez katwishap kutesh mulong wak Yesu amujipa pa mutond wa mar mud mpopol. Yesu wading wij anch in kwilej end ading ni ritiy ni ading amukatin Yehova, pakwez wajingunina anch ading ni kuswir kwa kutesh Mifund nawamp. (Luka 9:44, 45; Yoh. 20:9) Chawiy wayikwasha kutesh kurumburik kwa yom yading yitanginau mu Mifund. Tushinshikinany mutapu wasalay mwamu chisu chayibudikinay in kwilej end aad mwi njil ya Emaus. Ukutwish kuman anch Yesu kiyijikishap kapamp kamwing kud amakundj inay. Pakwez, wayipula yipul. Mulong wak wasala mwamu? Pamwing ap wakata anch alonda bil mutapu wading wiyovilau ni yom yading yitonginau. Ni yawiy kamu yom yasalau. Amuleja anch ading atongin anch Yesu ukwikal Mwant mu Isarel ni ukuyikwol ku winyikel wa in Rom. (Luka 24:18-27) Kupwa kwa kumekesh patok yovil yau, Yesu wasadina chad Mifund mulong wa kuyikwash kutesh uprofet uvud wading wawanyidina kal. Dichuku dinida urel, Yesu wasutisha kand chisu ni in kwilej akwau ni wayikwasha kand kutesh kurumburik kwa uprofet winou.​—Luka 24:33-48. w24.10 14 par. 9-10

Yesu wilejina kud Tatukwend wa mwiur yom yifanyidinay kusal ni kulond. Dirijek da Yehova dilondwil chilakej cha Yesu chimedina pa kusadin Dizu da Nzamb mulong wa kutukwash kwijik yom yiwamp ni yiyimp ni kututakel mu mwom. (2 Tim. 3:16, 17) Chisu chawonsu akat kutuvurish mulong wa kutang ni kusadin Dizu da Nzamb. Tukat kutaninamu nakash chisu twilejina Bibil ni kusadin mikand yetu ya win Kristu. Chilakej, tukutwish kwilakej yom yilondinay Bibil ni umutakel tutambwila ku dirijek detu. Mulong tumen umutakel utwinkinau ku dirijek detu wimedina pa Bibil, chinech chikat kukasikesh nakash kashinsh ketu mulong wa dirijek detu. (Rom 12:2) Yesu walejana “rusang ruwamp ra Want wa Nzamb.” (Luka 4:43, 44) Chikwau kand, Yesu wayileja in kwilej end kulejan piur pa Want wa Nzamb. (Luka 9:1, 2; 10:8, 9) Nlel unou antu awonsu ibombina ku dirijek da Yehova akat kulejan uruu wa Want chikalap nchik kwi ndond yishichau ap yisend yikwetau mu dirijek. w24.04 9 par. 5-7

Dandamen kuchingejin ku umutakel udokila ku dirijek da Yehova. Mu Isarel wa pakur, Yehova wamusadina Moses ni Yoshua mulong wa kupan mbil kud antu End. (Jos. 1:17) In Isarel ayiyukisha chisu chayiteshangau antu inkau umutakel kud Yehova Nzamb. Kupwa kwa yitot ya mivu, pasambisha chikumangen cha win Kristu, atwimbuy 12 apana umutakel. (Mid. 8:14, 15) Kupwa chisak chinech chajimba pawejawamu amakurump ading ku Yerusalem. Kusutin kuziyin ku umutakel winou watambulangau kud amakundj inay ashinshamena, “in Chikumbu cha Nzamb akasikana mu ritiy, avulijananga kand pichuku pichuku.” (Mid. 16:4, 5) Mu chirung chetu, Yehova ukat kutuyukish kand anch twaziyin ku umutakel udokila ku dirijek dend. w24.07 10 par. 10

Yehova wading umukatin nakash Mwant David. Washikena ap kumutazuk anch “muntu wa mutapu nikatila am.” Pakwez David wasala yitil yijim nakash, mud makaj ni kujipan. Kukwatijan ni Chijil cha Moses, David wading ufanyidin kufa. (Lev. 20:10; Kuch. 35:31) Pakwez, Yehova wakata kumukwash David kukarumuk. Wamutuma muprofet Natan kuya kumuman mwant, ap anch David wading kand kal amekesh chijingidij ap chimwing cha kukarumuk. Natan wasadina chilakej mulong wa kupukun muchim wa David. David washikena kujingunin anch wamurumbukina Yehova nakash, ni wakarumuka. (2 Sam. 12:1-14) Wafunda kuseng umekeshina mutapu wanengananay piur pa yom yasalay. (Kus. 51:1) Kuseng winou wayongojin kal akayitil avud ni wayibachikin kal kukarumuk. Ov, chitusangareshinap pa kuman anch Yehova wamukwasha nich rukat kashalapol wend David kukarumuk? w24.08 10 par. 9

Antu avud ijing nawamp anch kulil an ud mudimu ujim nakash. Anch ud nvaj, chakin kamu usadin usu nakash wa kukasikesh ritiy rau aney ni Yehova ukat kusanger usu wey. (Kuv. 6:6, 7) Payilay mwaney mu kupam, ukutwish kusambish kwipul yipul ya usey piur pa yitiyij yetu, ni kukimb kwijik mulong wak Bibil utufundishin anch yom yimwing yid yiyimp. Ukutwish kutong anch mwaney wiyipwil yipul yiney mulong kakwetap ritiy rikash muday Nzamb ni piur pa yom yida mu Bibil. Pakwez, payilau an mu kupam, akwikal ni kuswir kwa kwipul yipul mulong wa kukasikesh ritiy rau. (1 Kor. 13:11) Chawiy didap diyingishin da kwov wom. Ukutwish kusadin yipul yipwilay mwaney piur pa yitiyij yetu mulong wa kumukwash kukudish ukaliweny wend wa kutong. w24.12 14 par. 1-2

In Kristu a mu Yudeya ading akwet kuswir kwa ritiy rikash mulong wa kupand ku mar makash mafanyina kushiken mwi ngand yau. (Heb. 10:37, 38) Yesu wasambela kuyilej in kwilej end kuchin chisu chikumanau musumb wa Yerusalem aunyingumuk kud amasalay afanyina kuchinin ku mikandu. Chiyul chend chading chiyitadin in Kristu awonsu ading mu Yerusalem ap ading mu makunku ma mu Yudeya. (Luka 21:20-24) Pasak, antu ading mu ubaj akimbang diking mu misumb yijim mud Yerusalem. Chitongijok cha kuchinin ku mikandu chafanyina kumekan mud chidap kwau chitongijok chiwamp, chawiy chading chiyitin ritiy rikash mulong wa kuziyin kwi mbil ya Yesu.​—Heb. 13:17. w24.09 10 par. 9-10

Padingay pa divu, Yesu wasala kamu nawamp mudimu wamwinkishau kusal kud Tatukwend. (Yoh. 17:4) Pakwez Yesu katongap anch ndiy kwend kusu wading ni mutapu wa kusal yom yading yikatinay Yehova. Yesu wayifumba kand antu akwau Yesu wayichingejina in kwilej end. Wayinkisha chisend cha kulejan rusang ruwamp, kufundish ni kuyibangin antu a Yehova. Yesu wayiyula in kwilej end patok nich rukat. In kwilej end amwing kadingap kitiyijina anch wafa ni wavumbuka, chawiy wayikwasha kwijik uyakin kusutin kuyiyul. (Luka 24:25-27; Yoh. 20:27) Wayileja kand kushinshikin nakash pa kuyibangin antu a Yehova pa ndond pa kukimb nfalang. (Yoh. 21:15) Wayivurisha kand kulik kwilakej yom yasalangau ni yom yasalangau antu akwau. (Yoh. 21:20-22) Ni wayileja kand kwipuk yitongijok yiyimp yadingau nich piur Want wa Nzamb ni kuyikwash kushinshikin pa mudimu wa kulejan rusang ruwamp.​—Mid. 1:6-8. w24.10 15-16 par. 13-14

Kuziyin kukupandish mwom wetu. Mud mwadingau in Isarel piswimp ni kwandam mwi Ngand ya Kushilamu, niyetu tud piswimp ni kwandam mwi ngand yisu mukwikala divu dawonsu paradis. (Isay 35:1; Luka 23:43) Satan nau ayilembil end ­kakwikalapaku kand. (Kuj. 20:2, 3) Kukwikalap kand relijon wa makasu ap umwing mulong wa kuyidimb antu piur pa Yehova. (Kuj. 17:16) Kukwikalap kand guvernema wa antu ukumeshana mar. (Kuj. 19:19, 20) Mu paradis mukwikalap ntombwij ap umwing. (Kus. 37:10, 11) Antu a pa mangand mawonsu ­akuziyin ku yijil yitentamina ya Yehova yikuleta ­uumwing ni chisambu. Chawiy, akukatijan ni kuchingejijadin umwing ni mukwau. (Isay 11:9) Tuchingedin kamu nich impu nakash chisu chinicha. Ni anch twamuziyin Yehova, tukudandamen kushakam mu paradis pa divu kadap kwau ching mu yitot ya mivu pakwez chikupu ni chikupu.​—Yoh. 3:16. w24.11 9 par. 7

Uprofet ulejenau mu mufund winou wa nlel uwanyidin mu chirung chetu kusutamu pakur. Uruu wa Want aulejen mu mazu 1 000 ni kusut, ni kusutin kapend ka jw.org, uruu winou auteshin kud antu avud pa mangand. Pakwez Yesu wayileja kand in kwilej end anch kafanyinap “kunyimburik mu misumb yawonsu ya Isarel,” ap kulejan kud muntu mwawonsu, kurutu ndiy eza. (Mat. 10:23; 25:31-33) Mazu ma Yesu makwikal kand makin pa chirungu chetu. Ma miliyon ma antu nlel ashich ku jindond jikangeshinau mudimu wetu wa kulejan. Kuwejinaku kand, yitot ya an avadikina minit mwawonsu. Tusadin usu wetu wawonsu wa kuyilej antu a “michid yawonsu, ni a jindim jawonsu” rusangu ruwamp. (Kuj. 14:6) Pakwez uyakin ud anch tukutwishap kamu kulejan rusangu ruwamp kud muntu mwawonsu kurutu disuden deza. w24.05 10 par. 6-7

Yesu wayikasikeshang antu kusutin mazu mend. Kayibarokinangap in kwilej end. (Luka 8:47, 48) Chilakej chiwamp mud ik kud angatan ada in Kristu! Yesu wayikasikesha angatan kushal ashinshamena kud akajau. Wachirikina mazu ma Tatukwend malondina anch ngatan ufanyidin “[kulamat] kud mukajend.” (Mat. 19:4-6) Dizu dikarumwinau mu verse winou anch ‘kulamat’ mu Grek dirumburikin “kulimik.” Chawiy rukat ra ngatan ni mukajend rifanyidin kwikal rikash mu chilik cha kwikal mud ayilimikin pamwing. Anch umwing wa pakach pau wasal chom chikutwisha kuyipish uruw wau, awonsu aad akuman mar. Ngatan umukatina mukajend mu chilik chinech, kakutwishap kutal milad yin yawonsu ya pornografi. Kapamp kamwing ukudosh mes mend “ku yom yamwamu.” (Kus. 119:37) Mud Job, ukukwat mupak wa kulik kutal mband win mwawonsu nich maku mayimp.​—Job 31:1. w25.01 10 par. 12-13

Kulond anch nakulikishin kal kukutwish kurumburish yom yivud. Kwikil muntu ukutwisha kumulikishin mukwau mud mutapu ukatay Yehova kulikishin. Nfund a Kuseng walonda piur pa Yehova anch: “Dilikishin dakin did kud ey, chawiy akez kukwov ey wom.” (Kus. 130:4, NW T.) Inge, dilikishin da Yehova did ‘dilikishin dakin.’ Ndiy ukata kutumekeshin chirumburikina chakin kamu dilikishin. Mu maverse mamwing ma mifund ya Hebereu, in kufund a Bibil arumburil mutapu ulikishidiningay Yehova kusutin kusadin dizu dimwing dakad kusadinangau anch akimbin kulond piur pa dilikishin da antu. Anch Yehova wamulikishin muntu, chinech chirumburikin anch wajimwangesh kal kamu chitil chend rawonsu. Ukutwish kudandamen kwikal mu urund wa piswimp ni ndiy. Chawiy tumujikitishin Yehova nakash mulong ukat kutulikishin kamu rawonsu. w25.02 8 par. 1-3

Kutwish kwetu mu mudimu wa kulejan kwimedinap pa yibudikin tukata kwikal nich. Mulong wak? Mulong tukat kusal yom yitwitinay Yehova ni mwanend kusal​—tukat kupan uman. Ap anch tumenap muntu wa kwambamb nend ap chisu chilikinau uruu wetu tukutwish kwikal ni musangar mulong twij anch tumusangareshin Tatukwetu wa mwiur. (Jnsw. 27:11) Tukutwish kusangar kand anch mwin kulejan mukwau watan muntu usangaredina mu teritwar. Chinong cha Kalam chafanakesha mudimu wetu ni mudimu wa kukimb mwan ushadikina. Avud a pakach petu akat kumukimb ndond yawonsu. Anch mwan wamekan, muntu mwawonsu wasala usu wa kumuman, ukwikal ni diyingishin da kusangar. Chilik chimwing, muntu mwawonsu mu chikumangen ukat kukwash in kwilej asu a Yesu. Etu awonsu tukwet kuswir kwa kusal teritwar mwawonsu ni anch muntu wasambish kukumangan etu awonsu tukusangar. w24.04 18 par. 13-14

Tuchingedin yom yiwamp nakash mu machuku mezina kurutu! Nich chiyukish cha Yehova, tuchingejin kuman antu avud nakash akwitiya uyakin kurutu kwa mar makash kusambish. Chikwau kand, tukwet musangar wa kwijik anch ap pa chisu cha mar makashantu akutwish kwikal ni mutapu wa kudokal mu mangand ma satan makwikala masambish kal kujiy ni kwibomb netu mu kumushiman Yehova! Pakwez kurutu yom yiney yishik, tuchikwet mudimu wa kusal. Tukwet dilau da ­kusal mudimu wakad kutwish kwez kand ­kachirikin​—kulejan rusangu ruwamp ra Want wa Nzamb pa divu dawonsu. Pa chisu chawiy chimwing, tufanyidin kudandamen kuyibabesh antu piur pa yom yikusadika piswimp ap. Antu afanyidin kwijik anch disuden da mangand minam mayimp dezin mau nakash. Mulong wa rukat tukweta​—rukat mulong wa rusangu ruwamp, rukat mulong wa antu, ni cha usey nakash, rukat mulong wa Yehova Nzamb ni mulong wa dijin dend​—tukudandamen kulejan nich impu, nich kuswapej, ni nich mushiku djat kamu ni pakulonday Yehova anch, “kwapwa kal!” w24.05 19 par. 14-16

Uchuku kurutu kwa kufa, Yesu wamufundisha Pita nau in kwilej akwau dilejan da usey piur pa kwikepish. In kwilej ashimwoka pamumanau Yesu ukat kusal yom yafanyinay kusal kashalapol. Wadjola kabwik wend, wikas disun da kukusul nich mem mwi mbund, watubwila mem pa dilong, wasambish kowish yidjatil ya in kwilej end. (Yoh. 13:4, 5) Chamwita chisu pa kowish yidjatil ya in kwilej end 12, kuwejaku ni Yudas, muntu wafanyina kumupungan. Pakwez Yesu wawanyisha kamu chisend chinech ni kwikepish. Nich kushimpish muchim, Yesu wayela in Kwilej end anch: ‘Ov, wovany kal kurumburik kwa yom nasala kal kud en? En ukat kwintazukany anch: ‘Mulej’ ap anch ‘Nsalejetu’ ni uyinginany nich, mulong mwawiy kamu munida. Chawiy, anch am nida Nsalejen ni Mulej, nakwowishany kal ku mend, niyen ufanyidinany kwowishijan ku mend umwing ni mukwau.’​—Yoh. 13:12-14. w25.03 10 par. 9-11

Mangand makat kusal anch chitukasikena kushal piswimp ni Yehova. Antu avud akat kulik chitongijok chakwel anch Nzamb udaku. Yisu yivud, antu alikina anch Nzamb udaku amekening mud akwet mwom uwamp. Anch twaman chom chinech, ritiy retu akat kuripak. Ap anch witiyijin anch Nzamb udaku, ukusambish kwidjidjek anch ukutukwash kamu chakin. Muntu wafunda Kuseng wa 73 wiyipula piur pa mulong winou. Wamana anch antu ading amombinamu akad kulimish yijil ya Nzamb ading kwau ni mwom uwamp. Mud chibudikin, wasambisha kwidjidjek mulong wak umusadidinay Nzamb. (Kus. 73:11-13) Yom ik yamukwasha nfund a kuseng kuswimp chitongijok chend? Watongijokina piur pa yom yikuyishikena antu amulikina Yehova. (Kus. 73:18, 19, 27) Ni washinshikina kand pa yiyukish yidokila mu kumusadin Nzamb Niyetu tukutwish kutongin pa yiyukish yitwinkishinay Yehova. w24.06 25 par. 16-17

Pasak, antu avud isakinang pa mitu ya akadivar nau ading atuzwendj, kusutin kuyisondjik nfalang nich diyazukesh. Chikwau kand, anzwij amwing itiyang kuyikatul milamu ni ayifishang nich antu ayingina ni milong. Yehova ukisin nakash yaku ya mutapu winou. (Ezek. 22:12) Etu awonsu tufanyidin kushinshikin mutapu tukata kuman nfalang. Tufanyidin kwiyipul anch: ‘Ov, nikat kutongin chisu chawonsu piur pa nfalang ni piur pa yom nikutwisha kuland? Anch nasondam nfalang, ov, nikat kulab pa kujichirish ni kutong anch muntu wansondjikangaj kajiswirikedinap kwend pa chisu chinech? Ov, kwikal ni nfalang kukat kusal anch niyov anch nikwet usey nakash kuyisutamu antu akwau ni kusal anch chinkasiken kwikal mwin kupan? Ov, nikat kuyirumburish akadivar ni anambaz ni kuman anch akatin yom ya ku mujimbu nakash mulong akwet nfalang? Ov, nikatining kwikal mu urund ching nau antu ada ampich pakwez atuzwendj bwat?’ Tukutwish kuchidij urund wetu wa piswimp ni Nzamb kusutin kulik kukat dikut nakash. Anch twasal mwamu, Yehova kakutulikap ap pakemp. w24.06 12-13 par. 17-18

Mulong wa kwilam pantaliken ni choziu, tufanyidin kukudish maku mawamp. Anch twilej kusadin chiyul chilondina anch: “Kisany yom yiyimp, katany yom yitentamina,” tukukasikesh mupak wetu wa kusal yom yitentamina ni kwipuk yom yikutwisha kutushikij ku chitil. (Amos 5:15) Maku mawamp makutwish kand kutukasikesh kwiman daang anch twikal mu yishiken yitupakina ni yitwakad kusambel kwijik ap kukangesh. Tufanyidin kukwatikan nakash mu mijikit ya mu spiritu. Chisu tuda ku yikumangan ap mu mudimu wa kulejan, tukukasikesh maku ma kumusangaresh Yehova. (Mat. 28:19, 20; Heb. 10:24, 25) Kusutin kutang, kwilej, ni kutongijokin pa Dizu da Nzamb, tukukasikesh rukat retu mulong wa yom yiwamp ni tukukis nakash yom yida yiyimp. (Jos. 1:8; Kus. 1:2, 3; 119:97, 101) Vurik yom yayilejay Yesu in kwilej end anch: “Dandamenany . . . kulembil chisu chawonsu, chakwel kangal wawany mu choziu.” (Mat. 26:41) Anch twasal mwamu, tukat kumwinkish mutapu wa kutukwash ni tukat kukasikesh mupak wetu wa kumusangaresh.​—Yak. 4:8. w24.07 17-18 par. 14-16

Antu awonsu akata kuyifumb akwau, afanyidin kwimburij mutapu ukatay Yehova kupan manang mend. Vurik anch Yehova ukat kupan manang mend pakad choy. Chilik chimwing, niyetu tukatin kuyinkish antu tufumbina yom twija kwa kwikatin. Tukatap kulik kuyifumb antu akwau mulong wa wom anch akutwish kutuswinkan. Yisu yimwing antu akat kutong mwamu mulong niyau kayifumbap kwau. Chawiy kakatap kuyifumb antu akwau. Yitongijok ya mutapu winou yikwetap ndond pakach pa antu a Yehova. Pakwez, tukwet musangar wa kuyilej antu akwau yom twija ni tukat kusal yom yawonsu tukutwisha mulong wa kuyifumb antu akwau. (1 Tes. 2:8) Tuchingejin anch, ‘akuwanyish niyau yitinau mulong wa kuyifundish antu akwau.’ (2 Tim. 2:1, 2) Anch etu awonsu twapan manang metu nich muchim umwing, etu awonsu tukwikal ni manang ni musangar. w24.09 29 par. 12-13

Anch umen mud ukwetap ukaliweny wa pakampwil, kangal waziy. Inge, niyey ukwet kwey mikadil yikutwisha kukwash chikumangen. Ukutwish kutaninamu nakash anch watongijokin pa yom yalonday Paul mu 1 Korint 12:12-30 ni anch wamulembil Yehova chakwel akukwash kusadin yom yiney mu mwom wey. Mazu ma Paul mamekeshin patok anch mud atushalapol akwau a Yehova, niyey ukwet usey mu chikumangen. Sal yawonsu ukutwisha mulong wa kumusadin Yehova ni kuyikwash akadivar ney. Ikal ni kashinsh anch amakurump akwatin nich usey yom usadina ni akukwinkish yisend ukutwisha kuwanyish. (Rom 12:4-8) In Kristu awonsu afanyidin kusej piswimp ni Yehova, kwikal ni musangar wa kupan ni kushakam kukwatijan ni mbil ja Nzamb. Komb, chimeken anch niyey wakudishin kal mikadil yivud uswirikedina mulong wa kwikal nkwash a mudimu. w24.11 17 par. 12-13

Ana warisha ni milong kushalijan yamuletina runeng nakash ni yamudidisha. Wading ku uruw wa rupad ni mukajinend Penina wading umukisin nakash ni wamuzengolang. Chikwau kand Ana wading mumb, pakwez Penina wavala an avud. (1 Sam. 1:1, 2) Penina wamusipang Ana mulong wading mumb. ­Mulong Ana wading ni ushon, “wadilanga walik kudia” ni “wanenganana ­nakash mu muchim wend.” (1 Sam. 1:6, 7, 10) Yom ik yasalay Ana mulong wa kwikal ni usu? Waya ku dizang, ndond yamwifukwilangau Yehova. Pashikay kwinikwa “walembila kud [Yehova] ni kudil mansoj.” Wamwilembina Yehova anch: “Ez utal pa ushon wamam, mwilomb wey, ni kwinvurik.” (1 Sam. 1:11) Ni Yehova wamana yakamish yend, watesha malembil mend ni mu kusut kwa chisu wapwisha chikokujol chend.​—1 Sam. 1:19, 20; 2:21. w24.12 21 par. 5-7

Difut ditufundishin anch Yesu uyibangidining antu nakash, pakampwil in kwilej end. (Yoh. 13:1) Chilakej, Yesu wading wij anch yom yimwing yikusalay pa divu yikwikal yikash nakash, pakampwil rufu rend risansena. Ap mwamu Yesu wasala yom yiney yawonsu, kadap kusu kwau mulong yawiy yom yamwitau kusal kud Yehova, pakwez pakampwil mulong wading uyikatin antu. Yesu wipana nakash mu kulejan, kufundish ni kuyikwash antu akwau. Ap dichuku da rufu rend, Yesu wowisha yidjatil ya atwimbuy end, wayikasikesha ni kuyifundish. (Yoh. 13:12-15) Kupwa padingay pa mutond wa mar, Yesu witekina chisu chikemp mulong wa kumwinkish mpongarik umwing ruchingej ni kukimb muntu ukumubangina makwend. (Luka 23:42, 43; Yoh. 19:26, 27) Inge, rukat rikurikina ra Yesu ramekanap kwau ching kusutin rufu rend, pakwez ramekana kand mu mwom wend wawonsu wa pa divu. w25.01 23 par. 11

Bibil usadidin dizu dined mulong wa kutukwash kutesh anch dilikishin dakin dikat kutukwol ku usuk. Mulong wa kuburen kuwanyin kwetu, tud mud “asuk a chitil.” Pakwez tumujikishin Yehova mulong wa dilikishin dend, mulong ku ukwash wend tud mud asuk ‘akwolau ku chitil.’ (Rom 6:17, 18; Kuj. 1:5) Mwaning, ­Anch twijik anch Yehova watulikishidin kal, tukutwish kusangar nakash mud mutapu mukatay kusangar musuk wakwolau kal. . Kusutin chakupesh cha difut chapanay Yehova kusutin Mwanend, yid mud atwoka mu mutapu wa chifanakesh. (1 Pita 2:24) Anch twasal chitil, twayipish kal urund wetu ni Yehova. Pakwez kusutin difut, ukutwish kutulikishin ni tukutwish kand kwikal mu urund wa piswimp ni ndiy. Mud mutapu ukatay kusangar muntu wada ni mayej makash anch amwok, niyetu tukat kusangar anch atwok mu spiritu ni kwikal kand ni dilau da Yehova. w25.02 11 par. 16-17

Mu chishimu cha atalant, Yesu walonda piur pa atushalapol aad ading ashinshamena kud nsalejau ni umwing wading wakad kushinshaman. (Mat. 25:14, 30) Atushalapol aad ashinshamena ayimekeshin in Kristu azizidinau many. Mwant, charumburik anch Yesu, uyitazukin ‘kusangar pamwing ni mwant wau.’ Akat kutambul difut dau mwiur, charumburik anch divumbuk da kusambish. (Mat. 25:21, 23; Kuj. 20:5b) Ku mutambu ukwau, chilakej chiyimp cha kashalapol mwin usweral chiyibabeshin in Kristu azizidinau many. Mutapu ik? Afanyidin kwikal in kusal mudimu ukash. Mu chishimu cha atalant ni mu chishimu cha atujik, Yesu kalondap anch in Kristu azizidinau many akwikal in usweral. Pakwez, warumburila yom yikutwisha kushiken anch ashadish mushiku wau. Akukangany kwikal ni kashinsh ‘ka kutazuk kwayitazukau ni kutond kwayitondau,’ ni kakuyitiyijap kwandam mu Want wa mwiur w24.09 22 par. 10; 23 par. 12-13

Etu awonsu tukweting kuswir kwa kuwanyish maswir metu ni ma dijuku detu. (Mul. 7:12; 1 Tim. 5:8) Chid chakin anch chisu tutondina mudimu, tukat kushinshikinang pa difut tukutambula. Pakwez, tukutwishap kwend kusutin ritiy anch twashinshikin kwetu ching pa chom chimwing, difut. Anch twendin kusutin ritiy, tukushinshikin kand usu ukutwisha kwikal ni mudimu pa urund wetu ni Yehova. Tufanyidin kwiyipul anch: ‘Ov, mudimu winou ukwingit kusal yom yikisinay Yehova?’ (Jnsw. 6:16-19) ‘Ov, ukutwish kwinkangesh kwipan mu mijikit ya mu spiritu ap kwintwal kulemp ni dijuku dam mu chisu chilemp?’ Anch wakul anch mwaning ku yipul yiney, chikutwish kwikal cha manang kulik mudimu winou ap anch midimu yikasiken. Mulong twendin kusutin ritiy, tukukwat mipak yimekeshina anch tukwet kashinsh anch Yehova ukuwanyish maswir metu.​—Mat. 6:33; Heb 13:5. w25.03 21 par. 5-6

Tufanyidin kuyiman akadivar nau anambaz mud muyimenau kud Yehova. Tukat kusal mwamu mu kushinshikin pa mikadil yau yiwamp ni kulik kushinshikin pa kuburen kuwanyin kwau kukupwa pakemp pakemp. Tufanyidin kusal usu wa kupwish kupwitamijan nich rukat. Mwamu antu akatina kuyisadin niyau mu mutapu winou akwandam niyau mu paradis wa mu spiritu. Tukatin kudandamen kwikal mu paradis wa mu spiritu watangay Yehova mulong wetwetu. Awonsu akatina kwiyov pee, kupim, kwiyov zoong, ni diking afanyidin kwandam mu paradis wa mu spiritu ni kulik kubudikamu! Pakwez tufanyidin kubabal mulong Satan usadin usu win wawonsu mulong wa kutubachik kubudikamu. (1 Pita 5: 8; Kuj. 12: 9) Tufanyidinap kumulik atupandakan. El tusalany usu wa kuchidij kuwap, kwishitul ni chisambu cha mu paradis wa mu spiritu. w24.04 24-25 par. 18-19

Anvaj, ukutwishany kuyikwash nich anen kulangwish maku ma kumusadin Yehova. Yom ulondina ni usadina yikutwish kuyikwash aney kushal piswimp ni Yehova, mud kwilej Bibil, kukumangan, ni kwipan mu mudimu wa kulejan yid yom ya usey nakash mu mwom. Anch bwat anen akuman anch kwikal kaman wa Yehova chid kwau mud kwikal mu “relijon wa anvaj.” Mud chibudikin, kakumanap kwau anch kumwifukwil Yehova chid chom cha usey nakash, ap akwimik kwau kumusadin.Anch muntu wimik kumusadin Yehova, Ov, chimekeshin anch kwikil kand ruchingej? Chidap mwamu, mulong ukutwish kukarumuk ni kumwifukwil kand Yehova. Mulong wa kusal mwamu, chitin kwikal muntu wikepishina ni kwitiy ukwash wa amakurump a chikumangen. (Yak. 5:14) Mulong wa kuchirish kand urund ni Yehova chid cha usey kusal usu nakash! w24.07 24-25 par. 18-19

Mutapu ik ukutwisha kusal chakwel kwendijadin kwen kwikal kwa kalimish? Payila yovil yen kukul, maku ma chivadik ma umwing ni mukwau makutwish kwikal ni usu nakash. Yom ik yikutwisha kukukwashany kushal ishitwila? Kwipuk nsangu jijondina, kwikal pa yinen, ni kulik kuna maar nakash. (Efes 5:3) Yom yiney yikutwish kukasikesh maku ma kulalijan ni yikutwish kuziyish usu wa kusal yom yiwamp. Mulong wak chikwikal cha manangu kwisambin chisu chawonsu yom ufanyidinanya kusal mulong wa kulimishijan ni kulimish mbil ja Yehova? (Jnsw. 22:3) Yisal yimwing yimekeshina rukat yikutwish kwikal kwau yiwamp payila urund wen kukul. Pakwez, anch maku ma kulalijan mikal makash, chikutwish kukasikan kukwat mupak wa manangu. (Mum. 1:2; 2:6) kumekeshijadin yovil kukutwish kusal anch ukanganyan kwilam ni kusal chom chimukisishina Yehova. (Jnsw. 6:27) Chawiy, kwinsambishin kwa urund, chiwapin kwitekin mimbu kukwatijan ni mbil ja Bibil.​—1 Tes. 4:3-7. w24.05 29 par. 10-11

Tukatin anch akwetu ikala ni mutapu wa kutuchingejin, pakampwil mu yisu yikash. (Jnsw. 17:17) Yom ik tukutwisha kusal anch tukimbin kwijikan mud muntu wa kuchingejin? Tufanyidin kwikasikesh kudandamen kumekesh mikadil ya winzamb, mud kusutin kuwanyish kushilamu kwetu ni kulimish chisu. Amakurump akuchingejin ad a ukwash nakash mu chikumangen. Mutapu ik? In kulejan akat kwiyov anch akwet mwin kuyikwash anch iyovil anch akutwish kuyitazuk amakurump chisu chawonsu chikwetau kuswir kwau, chilakej ntakel wa chisak chau cha mudimu wa kulejan. In kulejan akat kwiyov kand anch ayibangidin anch akwet kashinsh anch amakurump akatin kuyikwash. Ni anch yiyul ya amakurump yimen pa Bibil ni pa mikand ya kashalapol ushinshamena kulik pa yitongijok yau ayinau, akadivar ni anambaz nau akat kuyichingejin. Akadivar ni anambaz akat kumuchingejin kand nakash mukurump wijing kulam ujindj ni ukata kusal yom. w24.06 30 par. 14-15

Nlel tukutwishap kuchingej anch Yehova apwish milong yetu yawonsu, pakwez tufanyidin kwikal ni kashinsh anch ukutukwash. (Kus. 41:4) Kusutin spiritu wend utumbila, Yehova ukat kutwinkish usu, manang ni chisambu cha mukach mulong wa kujijamen yikokujol yetu. (Jnsw. 18:14; Filip 4:13) Ukat kutukasikesh kand kusutin ruchingej ritwinkishinay mu Dizu dend Bibil ra kupwish mayej min mawonsu. (Isay 33:24) Mazu ma Yehova mada mu Bibil makutwish kutukasikesh ni kutukwash kwiyov zoong. (Rom 15:4) Nambaz umwing wa mu Afrik wa Kurand wadilang chisu chawonsu pamukwatau kanser. Ulondin anch: “Verse wankasikesha nakash ud Isay 26:3. Verse winou utwinkishin kashinsh anch Yehova ukutukwash kwikal ni chisambu ni kujijamen chikokujol chin chawonsu turishina nich.” Ov, kud verse ukata kukukasikesh pakampwil chisu urishina ni chikokujol chikash, pamwing ap chimekena mud chikutwishap kupwa? w24.12 24 par. 17-18

Amakurump akat kusal usu wa kumekesh mwikadil wa mutapu umwing pantaliken ni antu ashadikina kal. Akatin anch mukoku washadikina kal ‘achirik ku chikumbu.’ (Luka 15:22-24, 32) Kuding musangar mwiur anch muntu wasala chitil wachirik, ni kuding kand musangar pa divu! (Luka 15:7) Yehova kakatap kubwik ku mes pa yitil ya antu akad kukarumuk ni kuyilik anch adandamen kushal mu chikumangen. Pakwez, kakatap kuyomb nyim antu akata kusal yitil yikash. Ukatin anch achirik. Mutapu ukatay Yehova kwiyov pantaliken ni antu asala yitil akata kukarumuk akulejen mu Ozey 14:4: ‘Nikez kwok kuburen kushinshaman kwau. Nikez kayikat kwa kwisotin, mulong ujim wam kiudap kand pad awiy.’ Mulong amakurump ij mutapu wiyovilingay Yehova, akat kukimb kachijingidij kawonsu kamekeshina anch muntu wasambish ka kuswimp. Ni mazu minam mafanyidin kuyinkish antu awonsu amulika Yehova kashinsh anch uyikatin ni ukatin anch achirik. w24.08 28 par. 8-9

Pakwez yisu yimwing antu kakatap kutujikitish mulong wa yom twayisadidina. Tukutwish kupan chisu chetu, usu wetu, ap yom yetu ya ku mujimbu, pakwez antu akwau kakutwishap kusanger yom twayisadidina. Anch chom chinech chatushiken, mutapu ik tukutwisha kulik kushadish musangar wetu ap kulik kujiman? Vurikany anch, musangar wetu udokiling ku kupan wimedinap pa mutapu usangaredinau antu akwau yom tuyisadidina. (Mid. 20:35) Tukutwish kutond kwikal ni musangar wa kupan ap anch antu akwau katujikitishinap mulong wa yom tuyisadidina. Mutapu ik? Vurik anch piukata kupan ukat kumwimburij Yehova. Ndiy ukat kuyinkish antu awonsu yom yiwamp ayisanger ap bwat. (Mat. 5:43-48) Yehova ushidinamu anch ang niyetu twapan ‘pakad kuchingej anch atuchirishin, mwamu difut detu dikwikal dijim.’ (Luka 6:35) Chawiy kangal wajiman anch antu kakujikitishinap. Vurik anch Yehova ukukufut mulong wa yom yiwamp usadina mulong wa kuyikwash antu akwau ni mulong ud  “muntu ukata kupan nich musangar.”​—Jnsw. 19:17; 2 Kor. 9:7. w24.09 29 par. 14-16