Ngond wa 11

Amakurump akat kwikasikesh kumekesh ranaken ra Yehova chisu chimukwashinau muntu wadoshinau kal mu chikumangen. Chilakej, Yehova kachingelap anch antwend amubwambwila mu Isarel wa pakur akarumuka chakwel ndiy asal chad usu wa kuyikwash. Pakwez, wasala rizau ra kusambish mulong wa kuyikwash, ap kurutu amekesh chijingidij cha kukarumuk. Yehova wamekesha mutapu uda ranaken rend kusutin kumulej muprofet Ozey kumuchirish mukajend, ap anch wading uchidandamedin kusal chitil. (Ozey 3:1; Mal. 3:7) Mulong wa kumwimburij Yehova, amakurump in Kristu akat kusot chakin kamu anch muntu wasadina chitil achirik, ni kakatap kusal yom yikutwisha kusal anch chimukasiken kusal mwamu. Chishimu cha Yesu cha mwan washadika,tatuku pamumanay mwanend ukat kuchirik ku chikumbu, “waya mau, wamubwikat mwanend, [ikundj] wamulangwisha nich kususu ku kan.” (Luka 15:20) Umen anch tatuku kachingelap anch mwanend ita dilikishin. Pakwez, ndiy wasala rizau ra kusambish, mud mukutwishay nvaj mwawonsu ukweta rukat kusal. w24.08 28 par. 7-8

Mazu ma mufund wa nlel mamekeshin anch Yehova kakatap kukishan manang mend. Ukat kumapan kud antu. Anch Yehova watwinkish manang mend, ukat kumapan ‘pakad kufishan nich.’ Kakatiningap anch twiyova nayimp anch twamwit umutakel wend. Pakwez, utukasikeshin kumwitau. (Jnsw. 2:1-6) Chid nchik piur petwetu? Ov, tukutwish kumwimburij Yehova kusutin kupan manang metu? (Kus. 32:8) Antu a Yehova akwet mitapu yivud ya kulejan yom yilejinau. Chilakej, tukat kuyifumb antu asu mu mudimu wa kulejan. Nich kushimpish muchim, amakurump akat kuyikwash ankwash a mudimu ni akadivar abatishinau kal kuwanyish yisend yau mu chikumangen. Ni akadivar nau anambaz akweta ukaliweny mu mudimu wa kutung ni wa kurijek akat kukwash kuyifumb akwau mulong wa kusal mudimu wa kutung yikumbu ya uteokras. w24.09 28-29 par. 11-12

Akadivar, mulong wa kwikal amukurump, ufanyidinany kwikal antu ‘akadau kufish nich,’ Charumburik anch, ufanyidinany kwikal ni katumb kawamp mu chikumangen ni kwikil antu ­akutwisha kulond nayimp piur pen. (1 Tim. 3:2) Chikwau kand, ‘ufanyidinany kand kwikal ni uman uwamp wa antu a pol.’ Chakin kamu a ntu akad kumusadin ­Yehova akutwish kulond nayimp piur pa yitiyij yen. Pakwez kafanyidinap ap pakemp kukuman mud antu akad kwikal in yakin ap mud muntu muyimp. (Dan. 6:4, 5) Iyipula anch: ‘Ov, nikwet katumb kawamp mu chikumangen ni pol pa chikumangen?’ Anch ud “mwin kukat yom yiwamp,” ukuman mikadil yiwamp ya antu akwau ni kuyijikitish mulong wa mikadil yau. (Tit. 1:8) Ukusangar kand kusal yom yiwamp mulong wa antu akwau ap anch kakwitinap kwau kuyisadin chom. Mulong wak mwikadil winou ud wa usey kud amakurump? Mulong mwamu akwikal ni musangar wa kusadin chisu chau mulong wa kuyibangin akadivar nau anambaz. (1 Pita 5:1-3) Ap anch chiyitin kusal yom yivud nakash, pakwez akat kutaninamu musangar upandakena kusutin ­kuyikwash antu akwau.​—Mid. 20:35. w24.11 20 par. 3-4; 21 par. 5

Ankwash a mudimu asadining mudimu wa usey nakash mu chikumangen. Kambuy Paul wading uyikwatin nich usey nakash amakundj inay ashinshamena. Chilakej, chisu chayifundinay in Kristu a ku Filip, wayijikitisha ankwash a mudimu nau amakurump. (Filip 1:1) Akadivar avud abatishinau kal ikal ansand ap amakurump, akat kusangar nakash kwikal ankwash a mudimu. Chilakej, Devan amutonda kwikal nkwash a mudimu padingay ni mivu 18. Pakwez, mukadivar Luis wikala nkwash a mudimu padingay ni mivu 50 ni kusut. Wamekesha mutapu wiyovilingau antu avud palonday anch: “Did dilau dijim nakash kud am kwikal nkwash a mudimu, pakampwil anch natong rukat rinmekeshidinau kud akadivar nau anambaz!” Anch ud mukadivar wabatishinau kal pakwez kandikal wikal nkwash a mudimu, ov ukutwish kwitekin mupak winou? w24.11 14 par. 1-3

Padingay ni mivu 39, Mwant Ezekias wa Yuda wayela nakash. Yehova wamutuma muprofet Isay mulong wa kumulej anch ukufa kwend. (2 Ant 20:1) Ezekias kadingap kand ni ruchingej. Pateshay mazu ma muprofet Isay, wova ushon ni wadila nakash. Wamwilembina Yehova nakash mulong wa kumwit ukwash. Pateshay Yehova malembil ma Ezekias ni kuman mansoj mend, wamwovila riy. Nich ranaken wamuleja anch: ‘Am natesh kal malembil mey, naman kal mansoj mey. Tal nikukwok.’ Kusutin Isay, Yehova wamuleja Ezekias anch ukulepishaku mwom wend ni ukuyikwol in Yerusalem mu makas ma in Asiria. (2 Ant 20:4-6) Ov, urishin ni mayej mamekena mud makupwap kwau? Mulembila Yehova ap nich mansoj ku mes. Bibil utwinkishin kashinsh anch ‘Tatuku wa riy rijim ni Nzamb wa rongoj rawonsu,’ ukutukasikesh mu yikokujol yetu yawonsu.​—2 Kor. 1:3, 4. w24.12 24 par. 15-17

Tukwikal kand ni musangar wa kuyak akatish netu akuvumbuka ni kwikal kand aom! Tongin kand mutapu tukwikala ni musangar wa kwilej yom yivud piur pa Yehova kusutin kushinshikin yom yivud yatangay. (Kus. 104:24; Isay 11:9) Ni cha usey nakash, tukwikal ni musangar wa kumwifukwil Yehova pakad kusal kand chom chiyimp ap chimwing! Ov, ukulandish kwey yiyukish yiney yiwamp mulong wa “kusanger mu yitil mu kachisu kakemp”? (Heb. 11:25) Bwat kamu! Mwom tukwikala nich mu paradis, ukwikal uwamp nakash kusutamu chom chin chawonsu tukutwisha kwikal nich mu mangand minam. Vurik anch tukudandamenap kwetu kuchingel Paradis. Dichuku dimwing yikwikal ndond tukushakama. Yom yiney yitwishikin mulong Yehova watukata nakash ni witiya kumupan Mwanend mulong wetwetu! w25.01 29 par. 12

Pakach pa antu amekesha ritiy alejenau mu buku wa Hebereu pad Moses, muntu wamekesha ritiy rikash. (Heb. 3:2-5; 11:23-25) Moses wading ni mayingishin ma kwikal ni ritiy, mulong kusutin chilay, Nzamb wayinkisha ya kuda ni mem mulong wa kuwanyish maswir ma antu padingau mwi mpay. (Kub. 15:22-25; Kus. 78:23-25) Ap anch Moses wading ni ritiy rikash, pakwez, muvu umwing kupwa kwa kuyibudish in Isarel mu Idjibit Moses wasambisha kwiyipul anch Yehova ukuyinkish kamu antwend mbij mud Mwayikanay. Mulong mwi mpay mwading mamiliyon ma antu, Moses katonginap mutapu wafanyinay Yehova kuyinkish antu awonsu mbij ja kuda. Chawiy Yehova wamwipula Moses anch: “Ov, chikas cha [Yehova] chiswipil?” (Kuch. 11:21-23) Chawiy, Yehova wamwipula Moses anch: ‘Ov, utongin anch nikukangany kusal yom nalonda kusal?’ w25.03 26 par. 1-2

Ov, choviken kutong anch yom yawonsu yasadika pa chisu cha mabeb yimekeshin yom yikushikena mu machuku ma kurutu? Chakul chid anch bwat. Mulong wak? Mulong kwikil mufund wa Bibil ulonda yom yiney. Yesu wafanikesha “chirung cha Nowa” ni chirung cha kwikalaku kwa mwan a muntu, pakwez kalondap ap anch mabeb ud uprofet wa chifanakesh, ap kalondap anch muntu mwawonsu ni chinship chawonsu a chifanakeshin ni chom kanang, ap kalondap anch kupat kwa chis cha waat kwadinga ni kurumburik kwa uprofet. (Mat. 24:37-39) Yom ik yasalay Nowa pateshay uruu wa kubabesh wa Yehova? Wamekesha anch wading ni ritiy, mulong wasonga waat. (Heb. 11:7; 1 Pita 3:20) Chilik chimwing, antu ateshina rusangu ruwamp ra Want wa Nzamb afanyidin kusadin yom yiteshinau. (Mid. 3:17-20) Pita wamutazuka Nowa anch “mwin kurumburil yom yitentamina.” Nlel twikasikeshin kulejan nich mushiku kud antu awonsu ada pa mangand. Pakwez, ap anch twasalap nchik mwamu tukutwishap kamu kulejan rusangu ruwamp kud muntu mwawonsu uda pa divu kurutu disuden deza. w24.05 9-10 par. 3-5

Chawiy tukat kukimb mutapu wa kuyisadin arund a Yehova yom yiwamp ni kuyilimish. (Rom 12:10) Mutapu ik? Mutapu umwing a ulejen mu Kuseng 15:4 anch muntu uda ngendj mu mwinkand wa Yehova ‘ukat kuwanyish kushilamu kwend kuwamp machuku mawonsu, ap anch chikalap nchik chikash kud ndiy.’ Kulik kuwanyish kushilamu kwetu, kukutwish kuyisal antu akwau nayimp. (Mat. 5:37) Chilakej, Yehova ukatin anch ikundj ni mband alimish machip mau masalau chisu chatijanau. Ukat kusangar kand anch anvaj asal usu wau wawonsu mulong wa kuwanyish machip masalau kud anau. Rukat retu mulong wa Nzamb ni mulong wa antu akwau rifanyidin kutubachik kuwanyish kushilamu kwetu. Mutapu ukwau tukutwisha kuyilimish arund a Nzamb ud wa kwikal in kwakan ni kwikal in kupan. (Rom 12:13) Chisu tukata kusutish pamwing ni akadivar nau anambaz netu mu kwipuwangej chikat kutukwash kukasikesh urund wetu ni awiy ni kwikal kand piswimp ni Yehova. Cha usey nakash, anch tud in kwakan, tukat kumwimburij Yehova. w24.06 12 par. 15-16

Yehova ukat kumekesh uyakin kud antu ikepishina. (Mat. 11:25) Twitiya nich kwikepesh ukwash wa kwilej uyakin. (Mid 8:30, 31) Chawiy, tufanyidin kubabal chakwel kangal twikal in chibud. Anch tud in chibud, tukutwish kusambish kutong anch yitongijok yetu yid yiwamp kusutamu mbil jida mu Mifund ni umutakel udokila ku dirijek da Yehova.Mulong wa kulam kwikepish kwetu, tufanyidin kuvurik anch tud kamu akemp nakash anch twiyisakesh ni Yehova. (Kus. 8:3, 4, TM K.) Tukutwish kand kulembil mulong wa kukudish kwikepish, ni kwikal aswapela kufundish. Yehova ukutukwash kulam yitongijok yend twilejina kusutin Bibil ni yidokila ku dirijek dend kusutamu ayinetu. Chisu utangina Bibil, shinshikin manans mamekeshina anch Yehova ukatin kwikepish ni ukisin chibud ni kwitutul. Ni sal usu wa kwikepish anch akwinkish chisend chikutekina piur pa antu akwau. w24.07 10 par. 8-9

Kudosh mu 1919, Yesu wasadina kachisak kakemp ka azizidinau many mulong wa kutenchik mudimu wa kulejan ni kupan ya kuda ya mu spiritu kud in kwilej end. (Luka 12:42) Chimeken patok anch Yehova uyukishin mudimu wau. (Isay 65:13, 14) Anch twadap arijekinau, twafanyinangap kuwanyish kamu nawamp mudimu watwinkau kusal kud Yesu. (Mat. 28:19, 20) Chilakej, anch akadivar katutenchikinap mulong wa kusal mudimu wa kulejan mu teritwar wa chikumangen chetu, muntu mwawonsu wakimbang kulejan kwawonsu kukatinay. Ma teritwar mamwing afanyina kumalejan tupamp ni tupamp pakwez makwau mafanyina kushal mwamu. Ov, utongin anch kud yom yikwau tutanidinamu mulong tud atenchikinau? Mud mwayitenchikay Yesu in kwilej end pa divu, udandamedin kuyitenchik antu a Nzamb nlel unou. w24.04 8-9 par. 2-4

Kayin wading mwan wa kusambish wa Adam ni Ev. Mud an akwau a Adam, Kayin niyend waswana kud anvaj end chibachikin cha kusal yom yiyimp. Chikwau kand, Bibil ulondin piur pend anch: “Yisalijok ya [Kayin] yading yiyimp.” (1 Yoh. 3:12) Pamwing ap dawiy diyingishin damubachika Yehova “[kumulik Kayin] ni mulambu wend walambulay” chisu chapanay yakupesh. Pa ndond pa kuswimp mwikadil wend, “[Kayin] wova ujim nakash, chad mpal yend yayipa mulong wa ujim.” Yom ik yasalay kand Yehova kupwa kwa yom yiney? Wisamba nend Kayin. (Dis. 4:3-7) Yehova wamutongisha Kayin nich kwitudish, wamuleja anch wafanyina kumuyukish anch wasal yom yiwamp, ni wamubabesha anch ujim wend ukutwish kumushikij kusal yom yiyimp. Cha ushon, Kayin walika kutesh. Walika kwitiy yom yasalay Yehova mulong wa kumukwash kukarumuk. Palikay Kayin kumutesh Nzamb, ov, Yehova wakwata mupak wa kulik kuyikwash akayitil akwau kukarumuk? Bwat kamu! w24.08 10 par. 8

In Isarel ading ni machuku ma kurutu mawamp nakash. Mulong wa ukwash wa Yehova, in Isarel ading ni mutapu wa kushakam machuku mavud nakash mwi ngand ya kushilamu. Ngand yiney yading yiwamp nakash ni yasongang mbut mwikil mutapu! Moses wayileja anch yading “[ngand ya] misumb yijim yiwamp, yiwakadany en kutung, yikumbu yizwila yom yiwamp yiwakadany en kwizwish, ni majiy ma kupund miwakadany en kupund, ni yir ya nviny, ni ya mpach yiwakadany en kukun.” (Kuv. 6:10, 11) Moses wayibabesha kand in Isarel. Mulong wa kudandamen kushakam mwi ngand yiney yiwamp, ading afanyidin kuziyin ku yijil ya Yehova. Moses wayileja kand ‘kutond mwom’ kusutin kumutesh Yehova ni ‘kulamat kud ndiy.’ Pakwez, in Isarel amulika Yehova. Chawiy Nzamb walikidila chakwel in Asiria nau in Babilon ayipandakan ni kuyitwal mu winkwal.​—2 Ant 17:6-8, 13, 14; 2 Jsng. 36:15-17, 20. w24.11 9 par. 5-6

In Kristu avud a dijin alondining anch akupand anch kusu kwau alond anch amwitiyijin Yesu ni kumuman mud mupandish wau. (Yoh. 6:29) Pakwez, antu avud ading mu Galaliya ading amwitiyijina Yesu kwinsambishin amulika. Mulong wak? Antu avud ading mu chisak chinech ading akatin kumulondul Yesu mulong wayinkisha yom yading yikatinau. Ading asangaredin kwau kuyok, kuyinkish yakuda yamwamu ni kuyifundish yom yading yikatinau kutesh. Pakwez, Yesu wamekesha anch mulong wa kwikal mwin kwilej wend wakin, chitin kusal yom yivud. Kezap kwend pa divu mulong kwau wa kuwanyish maswir ma ku mujimbu ma antu. Mulong wa kwikal in kwilej akin a Yesu, antu ading afanyidin kwitiy kutazuk kwend kwa ‘kuya kud ndiy,’ kusutin kutesh ni kuziyin ku yom yawonsu yayifundishangay.​—Yoh. 5:40. w24.12 12 par. 12-13

Yom ik yikutwisha kumukwash ngatan kulikap chisum ni kumushindil mband kusal yom yakaday kukat? Ukutwish kwikasikesh kumwimburij Yesu. Mutapu wayisadinay in kwilej end chid chilakej chifanyidinau angatan kwimburij piur pa mutapu wa kuyisadin akajau. Shinshikin yom yikutwishau angatan kwilej kusutin mutapu Yesu wayisadinangay atwimbuy end ni kusutin mutapu wambambangay nau.Yesu wayisadinang atwimbuy end mu mutapu uwamp ni wa kalimish. Kadingap muntu wa chisum ap mwin kwitutul. Yesu kasadinap ulabu wend mulong wa kwizambwish ap kuyovish wom. Pakwez wayisadina nich kwikepish. (Yoh. 13:12-17) Wayileja in kwilej end anch: “Ilejinany kud am, mulong am nid mwin kwitudish ni mwin kwikepish mu muchim, chad ukwiswedishany.” (Mat. 11:28-30) Umen anch verse winou ulondin anch Yesu wading mwin kwitudish. Muntu witudishina kadap muntu uziyina bwat. Pakwez, ud muntu ukweta mwikadil wa kwilam. Anch amujimesh, ukat kuninet zoong ni kushinshikin yovil yend. w25.01 10 par. 10-11

Payila mangand minam kushik kwinsuden, milong ya nfalang yikupandakan kuyip. Milong ya chipolitik, jinjit, mar madokila ku yom yatangau, ni yipupu yikutwish kutushikij: kushadish mudimu, kuburen yom ya ku mujimbu, ap kudokal ndond tushicha. u. Yom ik yikutwisha kutukwash kukwat mipak yimekeshina anch tuchingejidin chikas cha Yehova? Chom cha kusambish ni cha usey ufanyidina kusal kud kumulej Yehova yakamish yetu. Mwita chakwel akwinkish manang uswirikedina mulong wa kukwat mipak yiwamp ni chakwel akukwash kushimpish muchim mulong wa kwipuk ‘kunenganan’ piur pa milong yey. (Luka 12:29-31) Mwilembina chakwel akukwash kusanger yom yida kamu ya usey mu mwom. (1 Tim. 6:7, 8) Kimbijol mu mikand yetu mutapu wa kurish nich milong ya nfalang. Antu avud alondin anch mavideo ni mitu ya milong yida pa jw.org yisambidina piur pa nfalang yayikwasha. w25.03 28-29 par. 10-11

Pichawanyina chirung cha kuyinkish antu ading akad kwikal in Yuda mutapu wa kwikal antu a Nzamb. Kambuy Pita amwinka chisend cha kuya kumulej Korney, muntu wa muchid ukwau, rusang ruwamp. Korney ndiy wading muntu wa kusambish kumwifukwil Nzamb mu chisak chinech chisu. Mulong in Yuda kibombangap nau antu a michid yikwau, chawiy Pita wading ukwet kamu kuswir kwa ukwash mulong wa kuwanyish chisend chinech. Pajinguninay Pita chitongijok cha Nzamb piur pa antu a michid yikwau, waswimpa kamu mutapu wend wa kuman yom. Chawiy, pamutazukau kud Korney, Pita waya ‘pakad kwidjidjek’. (Mid. 10:28, 29) Wamufundisha Korney nau antu ading ku chikumbu chend kupwa ayibatisha. (Mid. 10:21-23, 34, 35, 44-48) Mu kusut kwa mivu, Pita wayikasikesha ambay nend in Kristu kwikal ni “chitongijok chimwing.” (1 Pita 3:8) Mulong tud atushalapol a Yehova, niyetu tukwikal ni chitongijok chimwing anch twimburij mutapu utonginingay Yehova mud mutufundishinay mu Bibil. w25.03 9-10 par. 7-8

Payila mangand mu kuyip nakash, mutapu wa kuman yom wa antu ukudandamen kushalijan nakash ni mutapu wa kuman yom wa Yehova. (Jnsw. 17:15) Chawiy chid kamu cha usey nakash kujingunin yom yiyimp ni kuyipuk. Tufanyidinap ap pakemp kulikidil in kutupompat atuziyisha ap atukangesha kumusadin ­Yehova.Tufanyidin kukwat nich usey chiyul chayinkishau in Kristu a mu Yudeya kud kambuy Paul cha kuya kurutu mu kupam. Chinech chirumburikin anch tufanyidin kwilej Bibil chikurikina mulong wa kumwijik Yehova nawamp ni kwijik kand mutapu wend wa kutong. Tufanyidin kudandamen kusal mwamu ap kupwa kwa kutubatish. Chikalap nchik uvud wa mivu twasadina kal mu uyakin, etu awonsu tufanyidin kutang ni kwilej Dizu da Nzamb dichuku dawonsu. (Kus. 1:2) Anch twitekin chaku ­chiwamp cha kwilej Bibil, tukukasikesh mwikadil umwing wayikasikeshau in Kristu a mu Yudeya kukudish kud Paul: ritiy.​—Heb. 11:1, 6. w24.09 10 par. 7-8

Anch tukwet urund wa piswimp ni Yehova, chikutuswapel kushal ashinshamena kud ndiy. Yawiy yom yasalay Jozef. Walika nich kutakaman kusal masandj mulong wading wij anch Nzamb ud wakin kud ndiy ni kakatap kumunenganesh. (Dis. 39:9) Mulong wa kwikal mu urund wa piswimp ni Yehova, tufanyidin kwitekin chisu cha kulembil, kutang ni kwilej Dizu dend. Mwamu urund wetu ni ndiy ukukul. Mud Jozef, anch tukwet urund wa piswimp ni Yehova, tukukatap kusal chom chikutwisha kumunenganesh. Antu avuramedina anch Yehova ud Nzamb mwom, kakutwishap kushal ashinshamena kud ndiy. Shinshikin yom yayishikena in Isarel padingau mwi mpay. Ading ij anch Yehova udaku pakwez asambish kwidjidjek anch uyibangidin kamu chakin. (Kub. 17:2, 7) Mud chibudikin, amutombukina Nzamb. Chakin kamu, tukatinap kulondul mwikadil wau wa kubwambwil, chilakej chinech chitubabeshin.​—Heb. 3:12. w24.06 24 par. 14-15

Disuden da mangand minam did piswimp nakash, ni tuchingejin anch yikokujol yikash yikupandakan kuvul. Pakwez mud twamana kal kusutin chilakej cha Ana, David ni Mwant Ezekias, Yehova ukat kutesh kudil kwetu ni ukat kunenganan. Ukat kuman mansoj metu. Chawiy chisu turishina ni chikokujol, tufanyidin kumwazuril muchim wetu mu malembil. Tufanyidin kushal piswimp nau akadivar ni anambaz netu in Kristu. Ni chisu tutangina Bibil tukutwish kand kutan rongoj ra Yehova. Tufanyidin kwikal ni kashinsh anch Yehova ukutufut anch twashal ashinshamena kud ndiy. Ni utukanin anch pa chisu chiwanyidina, ‘ukukuswol mansoj mawonsu’ tukata kubudish mulong wa kusansan. (Kuj. 21:4) Pa chisu chinicha, tukubudish kwetu ching mansoj ma musangar. w24.12 20 par. 3; 25 par. 19

Yehova watutonda kwikal Atuman end ni ushidinamu kutukwash mulong wa kwikal atakamena. (Isay 43:11) Shinshikin jinjil jinying jikatay kusal mwamu. Chakusambish, Yesu ud niyetu chisu chawonsu tusadina mudimu. (Mat. 28:18-20) Cha kaad, Yehova wayinkisha angel chisend cha kutukwash. (Kuj. 14:6) Cha kasatu, Yehova ukat kutwinkish spiritu wend mulong wa kutuvurish yom twileja kal. (Yoh. 14:25, 26) Cha kanying, Yehova ukat kutwinkish akadivar nau anambaz mulong wa kusal nau pamwing. Nich ukwash wa Yehova ni wa akadivar netu akatish, tukwet chom chin chawonsu tukweta nich kuswir mulong wa kusal mudimu wa kulejan. Pakwez anch waziy mulong watan kal antu akemp ku yikumbu ukutwish kwiyipul anch: ‘Kwisu kudingau antu a mu teritwar wam chisu chinech?’ (Mid. 16:13) ‘Ad ku mudimu ap mu sok?’ Anch chid mwamu, ukutwish kupan uman kud antu avud mwi njil? w24.04 17 par. 10-11

Anch ud ngatan ni ukatin kwikal mukurump wa chikumangen, dijuku dey difanyidin kwikal chilakej chiwamp. Chawiy, ‘ufanyidin kwikal ikundj utakedina dijuku dend nawamp.’ Ufanyidin kwijikan mud muntu ukatining dijuku dend ni ukata kukwat mipak yiwamp. Chinech chirumburikin kutakel difukwil da mu dijuku, kukwash dijuku dey kukumangan ni kwipan mu mudimu wa kulejan. Anch ud tatuku, aney achida akemp afanyidin kwikal ‘aziyidina ni ilimishina.’ (1 Tim. 3:4) Ufanyidin kuyifundish ni kuyifumb nich rukat. Chakin kamu, mud an awonsu, aney niyau akwet kuswir kwa kuyisangaresh kusutin kuswimbul nau ap kusengan nau pamwing. Pakwez anch wayifumb nawamp, akutwish kwikal an aziyidina, akweta kalimish ni dilij diwamp. Chikwau kand, ufanyidin kusal usu wawonsu mulong wa kuyikwash aney kwikal ni urund wa piswimp ni Yehova, kushakam kukwatijan ni mbil ja Bibil ni kushiken ku dibatish. w24.11 22 par. 10-11

Anch twipan nakash mu mudimu wa Yehova, tukuman kand nakash mutapu utukwashinay, mud chibudikin tukumuchingejin nakash. (1 Kor. 3:9) Ni vurik anch Yehova kakatap kushinshikin pa uvud wa yom umusadidina mu kuyilakej ni yisadinau antu akwau; pakwez ukat kushinshikin yida mu muchim wey. Ukat kusangar nakash pakatay kuman muchim wey wa kujikitish mulong wa chipan chend cha usey nakash, difut. (1 Sam. 16:7; Mar. 12:41-44) Anch Yehova ukat kulikishin yitil yetu, anch tukwet urund uwamp ni ndiy ni anch tukwet ruchingej ra kwikal ni mwom wa chikupu, chid kusu mulong wa difut. Tudandamenany komb kumujikitish Yehova chisu chawonsu mulong wa rukat rend, ramubachika kutwinkish mutapu wa kwikal ni yiyukish yiney yawonsu. (1 Yoh. 4:19) Ni tumujikitishany kand Yesu, watukata nakash ni wapana mwom wend mulong wetwetu. w25.01 31 par. 16-18

Shinshikin chilakej cha muntu wafunda Kuseng wa 73. Wamana antu ading akad kumusadin Yehova ading ni mapit ni ading ameken mud kakwetap kwau milong. (Kus. 73:3-5, 12) Payishinshikinay antu inay ni yom yadingau nich, wamana anch usu wasalangay mulong wa kumusadin Yehova wading kwau wa chamwamu. Wamanang “mar machuku mawonsu” mulong wa yitongijok yiney yiyimp. (Kus. 73:13, 14) Mutapu ik watwishay kupandakan yovil yiney yiyimp? Nfund a Kuseng waya ku dizang da Yehova. (Kus. 73:16-18) Kwinikwa, wading pakach pa atushalapol a Yehova, chawiy wading ni mutapu wa kwikal ni yitongijok yiwamp. Wajingunina anch, ap ang antu amwing ading akwet mwom uwamp, pakwez kadingap ni ruchingej ra machuku ma kurutu. Chawiy kadandamenap kuziy, ni wamuteka Yehova pa ndond ya kusambish mu mwom wend. Ni wakwata mupak wa kudandamen kumusadin Yehova.​—Kus. 73:23-28. w24.10 27 par. 11-12

Yehova watutazukin kal chakwel twikal “atuman” end. (Isay 43:10-12) Mu mivu ya kwinyim, mukand umwing wa Chisak Chitakedila walonda anch: “Dilau dijim nakash dikutwishay kwikal nich muntu ni muntu pakach petu did da kumutazuk anch Kaman wa Yehova.” Mulong wak? Shinshikin chilakej ech. Anch ukwet kuswir kwa kaman mwin kukulondin ku dirumburish, chakin kamu ukutond muntu wija nawamp ni uchingejidina, muntu ukweta mwikadil uwamp ukutwisha kusal anch uman wend auchingejin. ­Kusutin kututond kwikal Atuman end, Yehova umekeshin anch utwij nawamp ni utuchingejidin anch tukupan uman umekeshina anch ndiy kusu Nzamb umwing wakin. Twiyovil anch tukwet dilau dijim, chawiy tukat kusadin mitapu yawonsu yikata kumekan mulong wa kwijikish dijin dend ni kusaul makasu mawonsu mapalangeshinau kal piur pend. Mu kusal mwamu, tukat kushakam kukwatijan ni dijin tukweta musangar wa kwikal nich, Atuman a Yehova!​—Rom 10:13-15. w24.05 18 par. 13

Yesu wayikwasha antu kusutin kuyifundish piur pa Nzamb, pakwez wayikwasha kand mu mitapu yikwau. Wavudisha yakuda kupwa wayileja in kwilej end kuyinkish antu yakuda. (Mar. 6:41) Kusutin kusal mwamu, wayifundisha in kwilej end mutapu wa kuyisadin antu akwau. Wamekesha anch yiding ya usey nakash. Tongijokin piur pa musangar wikalau nich atwimbuy pasalau mudimu pamwing ni Yesu kusutin kwangan yakuda djat kamu pikutinau antu awonsu! (Mar. 6:42) Chakin kamu, chinech chid kwau chilakej chimwing chimekeshina mutapu wabanginangay Yesu maswir ma antu akwau pa ndond pa kushinshikin pa maswir mend amwinend. Padingay pa divu wasadina mwom wend wawonsu mulong wa kuyisadin antu akwau. (Mat. 4:23) Yesu wading ukwet musangar wa kuyifundish antu akwau ni kubangin maswir mau. w24.11 16 par. 10-11

Payila yom mu kuyip nakash mu ‘machuku ma kwinsudiel,’ tukwikal chakin kamu ni mitapu yivud ya kukwashijan umwing ni mukwau. Tukutwish kand kuyongoj akadivar nau anambaz netu ni kuyimekeshin rukat riswirikedinau. Mutapu umwing tukutwisha kusal mwamu ud wa kuyak nawamp ku Chot cha Want. Tushich mu mangand muda antu in chisum, akad kuyibangin akwau ni in kuyiletin yakamish. Chawiy anch akadivar ni anambaz netu ez ku yikumangan, tusotin kuyikasikesh ni kusal iyova anch tuyikatin. Amakurump akutwish kwikal mpwembu ya akadivar nau anambaz nau pa chisu cha yakamish. Anch kwashiken mar madokila ku yom yatangau ap milong yitina kwiyokish mau mau, amakurump akat kutenchik pakad kulab mulong wa kuyikwash akadivar nau anambaz nau. Akat kuyikwash kand mu spiritu. Akadivar nau anambaz akutwish kumusejin mukurump anch wijikening mud muntu muwamp, mwin kwitek pa ndond ya antu akwau, ni muntu wijing kuyitesh akwau. Mikadil mud yiney yikat kuyisal antu iyova anch uyibangidin, mwamu chikuyiswapel kusadin yiyul yimedina pa Bibil yikutwishay mukurump kuyinkish.​—1 Tes. 2:7, 8, 11. w24.06 29 par. 12-13

Tufanyidinap kutong anch Nzamb kakwetingap kwend yovil mulong ud mwin dikand dawonsu! Nzamb watutanga mu chifu chend, nich yovil, charumburik anch Yehova niyend ukweting yovil. Bibil ulejen anch Yehova ukat ‘kwovang kusansan’ ni ‘kunenganan.’ (Kus. 78:40, 41) Yehova wanenganana nakash pa kuman mutapu ­wamujipau Mwanend kwa chisum nakash kud antu akad kumwov Nzamb wom. Difut ditufundishin anch kwikil muntu mukwau utukatina kusutamu mutapu utukatinay Yehova​—ap anamakwetu ni arunetu akatish kakutwishap kutukat mud mutapu utukatinay Yehova. (Rom 8:32, 38, 39) Chakin kamu, Yehova utukatin nakash kusutamu ap mutapu twikatina ayinetu. Ov, ukatin kwikal ni mwom wa chikupu? Yehova ndiy ukatin nakash kupandakan. Ov, ukatin anch Nzamb akulikishin yitil yey? Yehova ndiy ukatin nakash kamu kukulikishin. Chom chitwitinay kusu kwend kud kwitiy chipan chend cha riy kusutin kumekesh ritiy ni kumuziyin. Chakin kamu, difut dimekeshin anch Nzamb utukatin nakash kamu.​—Mul. 3:11. w25.01 22 par. 8-9

Etu awonsu tukat kukwat mipak yimedina pa yom tumena, tuteshina, ni twovila. Mulong yom tumena ap tuteshina yidingap kamu chisu chawonsu yakin. Ap anch yid kwau yakin, anch twend kusutin yom yimekena, tukutwish kushiken kuduul rusot ra Nzamb ap chiyul chend. (Mul. 11:9; Mat. 24:37-39) Pakwez anch twend kusutin ritiy, tukutwish kukwat mipak “yikata kumusangarish Nsalejetu.” Tukutwish kwikal ni musangar nakash ni kulam chisambu cha mu muchim anch twalondul chiyul cha Nzamb. (Kus. 16:8, 9; Isay 48:17, 18) Ni anch twadandamen kwend kusutin ritiy, tukwikal ni mwom wa chikupu (2 Kor. 4:18) Mutapu ik tukutwisha kwijik anch twendin kusutin ritiy ap kusutin yom yimekena? Mulong wa kwakul ku chipul chinech, tufanyidin kwiyipul anch: Mipak tukata kukwat yimedining pa yom ik? Ov, yimedining kwau pa yom tumena? Ov, yimedining pa umutakel udokila kud Yehova? w25.03 20-21 par. 3-4

Etu awonsu tukwet chisend cha usey nakash mulong wa kuyipwitin antu akwau mu paradis wa mu spiritu. Tukutwish kuwanyish chisend chinech anch twamwimburij Yehova. Kakatap kuyibachik antu ya ku usu mulong wa kwandam mu dirijek dend. Pa ndond pa kusal mwamu, ukat “kuyipwitin” antu itudishina kuday ndiy. (Yoh. 6:44; Jer. 31: 3) Antu akweta michim yiwamp akata kwilej piur pa rukat ra Yehova ni wuntu wend upandakena kuwap akat kumusejin. Mutapu ik tukutwisha kuyipwitin antu mu paradis wa mu spiritu kusutin mikadil yetu yiwamp ni yisal yetu? Mutapu umwing tukutwisha kuyipwitin antu akwau mu paradis wa mu spiritu ud wa kuyisadin ambay netu in Kristu nich rukat, ni ranaken. Anch muntu musu wez ku yikumangan yetu, tukatin iyova mud antu ading akad kwikal in Kristu mu Korint akumangana ku yikumangan. Alonda anch: “Nzamb ud chakin pakach pen.” (1 Kor. 14: 24, 25 ; Zak. 8:23) Chawiy, tufanyidin kudandamen kulondul chiyul cha mu mufund wilel. w24.04 23-24 par. 16-17