Amapal—Ukwetan Usey mu Chikumangen
“Anch natongin chisu nading nsand, nikat kusangar nakash pinikata kuman yom natwishang kusal. Katat nitwishinap kand kuyisal mulong wa upal.”—Connie ukweta mivu 83.
Pamwing ap niyey utwishinap kusal yom wasalang pakur mulong wa upal. Ap anch wamusadidinap kal nchik Yehova mu mivu yivud nich kushinshaman, ukutwish pamwing ap kwikal ni yitongijok yiyimp piur pa amwiney mulong wa yom ukangenya kusal katat. Chilakej, ukutwish kusambish kufanakesh yom usadina katat ni yom wasalang pakur. Anch mwawiy, yom ik ukutwisha kusal mulong wa kupandakan yitongijok ya mutapu winou?
YOM YIKWITINAY YEHOVA KUSAL
Iyipula anch: ‘Yom ik yingitinay Yehova kusal?’ Mazu mada mu Kuvurik Yijil 6:5 makutwish kukukasikesh. Tutangin mu verse winou anch: “Mukatany [Yehova] Nzamb wen ni muchim wen wawonsu, ni mupim wen wawonsu, nich usu wen wawonsu.”
Kukwatijan ni verse winou, Yehova ukwitin anch umusadin nich muchim wey wawonsu, ni mupim wey ni usu wey. Kusal mwamu kukutwish kukukwash kulik kwifanakesh ni antu akwau—ap kulik kufanakesh yom usadina katat ni yom wasalang pakur.
Shinshikin chom ech: Piwading nsand, yom ik wamwinkishang Yehova? Atushalapol avud a Yehova akutwish kulond anch amwinkishang Yehova yom yau ya usey. Niyey piwading nsand, wamwinkishang Yehova yom ya usey kukwatijan ni mashakamin mey chirung chinicha. Yom ik ukutwisha kumwinkish Yehova katat? Yid yom ukutwisha kusal nlel, kukwatijan ni mashakamin mey ma katat. Anch waman yom mu mutapu winou, ukutwish kulond anch umwinkishin Yehova yom mud yiwamwinkishang pakur. Pakur wamwinkishang yom ya usey, ni katat umwinkishin kwey yom ya usey.
Wamwinkishang Yehova yom ya usey pawading nsand, ni katat ap anch wananap kal, umwinkishin kwey yom ya usey
YOM WIJANA YIKUTWISH KUYIKWASH ANTU AKWAU
Pa ndond pa kushinshikin pa yom wakad kutwish kusal, shinshikin pa mitapu ukweta ya kuyikwash antu akwau. Chakin kamu, mutapu uda Mwin Kristu wapamina kal, ukutwish kusal yom kanang katat yiwading wakad kwikal ni mutapu wa kusal piwading nsand. Chilakej, ukutwish kusal chom chilondwilaku ech:
Kuyilej antu akwau yom wija. Shinshikin mazu malondwilaku am mada mu Bibil:
Mwant David: “Nading nsand, katat nananap kal, pakwez kand kal nimumanangap mwin kutentam amulik kud [Yehova], ap anend aswadil yakudia.”—Kus. 37:25.
Yoshua: “Katat nisotil niya ilel unou mwi njil ya rufu mukat kuyau antu in awonsu. En wijany ku michim yen, ni ku mipim yen anch, ku kushilamu kwawonsu kuwamp kwashilayimu [Yehova] Nzamb wen kudi en, kwikil chom ap kusu chimwing chaburena kuwanyin. Yawonsu yasadika mulong wenen. Kwikil chom ap kusu chimwing chaburena, bwat.”—Jos. 23:14.
Pamwing ap niyey walondap kal yom ya mutapu winou. David ni Yoshua, alonda muntu ni muntu yom yayishikena. Mulong atushalapol inay a Yehova ashinshamena alonda yom yamanau ni yateshau mu mivu yivud, chawiy yom yiney yid kamu ya usey nakash.
Anch wamusadidin kal Yehova mu mivu yivud, ukutwish niyey kuyilejap antu akwau piur pa yom yakusadidinay kal Yehova ni yayisadidinay kal antu akwau. Ov, uvurikin chisu wamana mutapu wayiyukishay Yehova antu end? Anch chid mwamu, kangal widjidjek kuyilejamu antu akwau! Chinech chikutwish kuyikasikesh antu akwau mud muchading kand kud ey. Chisik chimwing kand, anch antu akwau atesh yom wasala kal mu mudimu wa Yehova, chinech chikutwish kuyikasikesh.—Rom 1:11, 12.
Mutapu ukwau ukutwisha kuyikasikesh antu ud kusutin kukumangan nau pamwing anch chitwishikin. Mwamu ukutwish kuyikasikesh akadivar nau anambaz ney, ni amwiney ukutaninamu kamu. Connie wajimbulangau kwiur oku ulondin anch: “Kukumangan kukat kwinkwash kulik kuziy. Kusutin rukat rawonsu riner rikatau kwimekeshin ku Chot cha Want, mutapu ik nikutwisha kuziy? Nikat kwikasikesh kumekesh anch niyisangaredin antu akwau kusutin kuyinkishaku tuyipan; ni nikat kudandamen kwikal ni ya kusal mu mijikit ya mu spiritu pamwing ni akadivar nau anambaz nam.”
YEHOVA UKWATIN NICH USEY MUDIMU USADINANYA NICH KUSHINSHAMAN
Mu Bibil mud yilakej yivud nakash ya antu ading akad kwikal ni mutapu wa kusal yom yivud mulong wa mashakamin mau, pakwez Yehova wading uyikatin. Shinshikin chilakej cha Simeyon, ipal Mwin Isarel wadingaku chisu chavadikay Yesu. Payangangay Simeyon ku tempel, wayimanang ansand asalang mudimu wa usey nakash kwinikwa. Pakwez chading nchik piur pend? Mu kuman kwa an a antu, wafanyina kutong anch kakwetap kand usey ku mes ma Yehova mulong wa upal wend. Pakwez Yehova kamumanap mwamu. Wamumanang Simeyon mud “muntu utentamina ni umwovila Nzamb wom” ni wamuyukisha kusutin kumwinkish dilau da kumuman Yesu padingay mwan. Yehova wamusadina kand Simeyon mulong wa kulejan uprofet piur pa Mesiya! (Luka 2:25-35) Pakad kwidjidjek, Yehova kashinshikinap pa upal wa Simeyon, pakwez washinshikina pa ritiy rend rikash, ni “wading ni spiritu utumbila.”
Yehova wamuyukisha Simeyon kusutin kumwinkish dilau da kumuman Yesu padingay mwan, ni wamusadina kand mulong wa kulejan uprofet piur pa Mesiya
Ukutwish niyey kwikal ni kashinsh anch Yehova ukwatin ni usey mudimu wey wa ritiy umusadidina, chikalap nchik yom ukangenya kusal. Ku mes mend, “chipan chikupanay [muntu] kukwatijan ni yikwetay, kadap kukwatijan ni yakaday kwikal nich, akuchitiy mu mutapu wa pakampwil.”—2 Kor. 8:12.
Nich chitongijok chinech mu manang, shinshikin pa yom ukutwisha kusal. Chilakej, mu mulad ik wa mudimu wa kulejan ukutwisha kwipan nakash—ap anch ukuusal mu kachisu kakemp? Ov, ukutwish kuyikwash antu akwau kusutin kuyitazuk ku telefon ap kuyitumin ka uruu? Yom yikemp ukutwisha kusal yimekeshina rukat yikutwish kuyikwash nakash ambay ney In Kristu, pakampwil anch yom yiney yidokil kud muntu wamusadidina kal Yehova mu mivu yivud.
Antu amwing akwet mimbu mulong kakwetap ukash wa mujimbu uwamp. Shinshikin yom yasadika Kwingangel kwa Afrik yilejenau mu mushet “Mwom Wend Wafanyina Kupand.”
Vurik anch ritiy ni kushinshaman kwey yikutwish kuyikasikesh antu akwau. Ud chilakej chiwamp cha kujijaman, ni ukutwish kwikal ni kashinsh anch “Nzamb kadap wakad kutentam chakwel avuramen mudimu wen ni rukat wamekeshanya mulong wa dijin dend kusutin kuyisadin atumbila ni kudandamen kuyisadin.”—Heb. 6:10.
DANDAMENAN KUKWATIKAN MU KUYIKWASH ANTU AKWAU
Antu avud amen kal anch amapal, ikal amakundj ap amband akata kuyikwash antu akwau, akweting ukash wa mujimbu uwamp, akat kutong nawamp ni ashiching mivu yivud.
Chakin kamu, kusal yom yiwamp kukatap kamu kupwish yibudikin yawonsu ya upal. Ching kusu Want wa Nzamb wawiy ukuwanisha yom yiney kusutin kudosh yom yikata kuletish upal ni rufu—kuburen kuwanyin.—Rom 5:12.
Pakwez ap katat, mudimu umusadidina Yehova—kuwejinaku kuyikwash antu akwau kumwijik ndiy—kukukwashin kudandamen kwikal ni ritiy rikash ni ukash wa mujimbu uwamp. Amapal, ijikan anch Yehova ukwatin ni usey yom usadinana mu mudimu wend, ni chikumangen chisangaredin nakash chilakej chen cha ritiy.