Eksoda

6 Xileswo Yehovha a byela Moxe a ku: “Swoswi u ta vona leswi ni taka swi yentxela Faro. A voko dzranga dzra ntamu dzri ta mu sindzrisa kuva a tsrhika vhanu vanga va famba, nakone dzri ta mu sindzrisa kuva a va hlongola tikweni dzrake.”

2 Hiloko Xikwembu Nkulukumba a byela Moxe a ku: “Hi mine Yehovha. 3 A ni humelela ka Abrahamu, Izaki na Yakobe swanga Xikwembu Nkulukumba wa ntamu hinkwawu, kambe mayelanu ni vito dzranga dzra ku Yehovha a ni yentxanga leswaku va tiva ntlhamuxelo wa dzrone hi ku helela.* 4 Ni patsre ni ku hamba xipfumelelanu na vone, xa ku va nyika tiko dzra Kanana, tiko ledzri va hanyiki ka dzrone swanga valuveli. 5 Swoswi ni yingele ku konya ka vhanu va Israyele lava Vaegipta va va yentxaka swikazrawa, nakone na xi dzrimuka xipfumelelanu xanga.

6 “Kutani byela Vaisrayele u ku: ‘Hi mine Yehovha, ni ta mi susa ka ntizro wa ku bindzra lowu Vaegipta va mi sindzrisaka ku wu yentxa, ni mi huluxa wukazraweni, nakone ni ta mi huluxa hi voko dzra ntamu* ni va ni khatisa Vaegipta ngopfu swinene. 7 Mi ta va vhanu vanga, mine ni va Xikwembu Nkulukumba wenu, nakunene mi ta swi tiva leswaku hi mine Yehovha Xikwembu Nkulukumba wenu, lweyi a mi humesaka ka ntizro wa ku bindzra lowu Vaegipta va mi sindzrisaka ku wu yentxa. 8 Nakone ni ta mi yisa tikweni ledzri ni hlambanyiki* ku dzri nyika Abrahamu, Izaki na Yakobe; ni ta mi nyika dzrone dzri va dzrenu. Hi mine Yehovha.’”

9 Moxe a game a nyika Vaisrayele ndzrava leyo, kambe a va mu yingisetanga hikusa a va hele ntamu, nakone a va xanisiwa ngopfu a wukazraweni.

10 Kutani Yehovha a vulavula na Moxe a ku: 11 “Famba u ya byela Faro hosi ya Egipta leswaku a a tsrhiki Vaisrayele va huma tikweni dzrake.” 12 Nambitanu Moxe a hlamula Yehovha a ku: “Lavisa! A Vaisrayele a va ni yingisetanga; kutani Faro a nga ni yingisetisa kuyini nakasi ni ni xikazratu ka ku vulavula?” 13 Kambe Yehovha a tlhela a byela Moxe na Aroni swileleto leswi a va fanela ku ya swi nyika Vaisrayele na Faro hosi ya Egipta, akuva a humesa Vaisrayele a tikweni dzra Egipta.

14 Lawa i mavito ya tinhloko ta mindangu ya Vaisrayele: A vana va Rubeni, mativula ya Israyele i: Hanoki, Palu, Hesromi na Karimi. Lowu i ndangu wa Rubeni.

15 A vana va Simiyoni a ku li Yemuwele, Yamini, Ohadi, Yakhini, Zohari na Xawuli lweyi mamana wake a a li Mukanana. Lowu i ndangu wa Simiyoni.

16 Lawa i mavito ya vana va Levhi hi ku ya hi ku longoloka ka mindangu ya vatukulu vake: Gerixoni, Kohati na Merari. Levhi a hanye 137 wa malembe.

17 A vana va Gerixoni loko va longoloxiwa hi ku ya hi mindangu yavu, a ku li Libini na Ximeyi.

18 A vana va Kohati, a ku li Amiramu, Izihari, Hebroni na Uziyele. Kohati a hanye 133 wa malembe.

19 A vana va Merari a ku li Makhili na Muxi.

Leyi a ku li mindangu ya Valevhi, hi ku ya hi ku longoloka ka mindangu ya vatukulu vavu.

20 Amiramu a teka Yokebede makwavu wa xisati wa papayi wake, a va nkatake. A mu pswalela Aroni na Moxe. Amiramu a hanye 137 wa malembe.

21 A vana va Izihari a ku li Kora, Nefegi na Zikiri.

22 A vana va Uziyele a ku li Mixayele, Elizafani na Sitiri.

23 Kutani Aroni a teka Elixeba makwavu wa xisati wa Nasoni, vana va Aminadabi a va nsati wake. A mu pswalela Nadabi, Abihu, Eliyazari na Itamari.

24 A vana va Kora a ku li Asiri, Elkana na Abiyasafi. Leyi a ku li mindangu ya vana va Kora.

25 Eliyazari n’wana wa Aroni, a teke mun’we wa vana va Putiyele wa n’hwanyana a va nkatake. Kutani n’hwanyana lweyo a mu pswalela Feniyasi.

Leti i tinhloko ta mindangu ya Valevhi, hi ku ya hi mindangu yavu.

26 Lweyi i Aroni na Moxe lava Yehovha a va byeliki a ku: “Humesani vhanu va Israyele a tikweni dzra Egipta hi ku ya hi mintlawa yavu.”* 27 I Moxe na Aroni lava vulavuliki na Faro hosi ya Egipta, akuva va humesa vhanu va Israyele a Egipta.

28 Hi siku ledzro, nkama lowu Yehovha a vulavuliki na Moxe a tikweni dzra Egipta, 29 Yehovha a byele Moxe a ku: “Hi mine Yehovha, byela Faro hosi ya Egipta hinkwaswu leswi ni ku byelaka swone.” 30 Kutani Moxe a byela Yehovha a ku: “Lavisa! Ni ni xikazratu ka ku vulavula, kutani Faro a ta ni yingisetisa kuyini?”