Daniyele

3 Hosi Nebukadnetsara a hambe xithombe xa woru, lexi a xi ni kolomu ka 27 wa mametru* hi ku leha ni kolomu ka 2,7 wa mametru* hi ku yanama, a va a xi yimisa ka livala dzra le Dura, a xifundzreni xa Babilona. 2 Ntsrhaku ka leswo, hosi Nebukadnetsara a zrumisa leswaku ku ya vitaniwa vasatrapa,* valaviseli, vagovhernadori, vatlhavukanyisi, vabekisi va mali, vayavanyisi, valaveleli va nawu ni vaadminixtradori hinkwavu va swifundzra, akuva ku ta khanguliwa xithombe lexi yimisiwiki hi hosi Nebukadnetsara.

3 Kutani a vasatrapa, valaviseli, vagovhernadori, vatlhavukanyisi, vabekisi va mali, vayavanyisi, valaveleli va nawu ni vaadminixtradori hinkwavu va swifundzra va hlengeletana akuva ku ta khanguliwa xithombe lexi yimisiwiki hi hosi Nebukadnetsara, va va va yima mahlweni ka xithombe lexi Nebukadnetsara a xi yimisiki. 4 Hiloko a muzrumiwa wa hosi a hlaya hi zritu dzra ku tlakuka a ku: “A hosi yi leleta n’wine vhanu va matiko ni tindzrimi ta ku hambanahambana, 5 leswaku loko mi yingela mpfumawulu wa limhondzro, wa xitiloti, wa switxhayatxhayana swa ku siyanasiyana leswi nga ni tingoti, wa xitiloti lexikulu ni wa switxhayatxhayana leswin’wana hinkwaswu, mi fanela ku khinsama mi gandzrela xithombe xa woru lexi hosi Nebukadnetsara a xi yimisiki. 6 Lweyi a taka kala a nga khinsami a xi gandzrela, hi ku kahlula a ta txukumeteliwa ka xidzridzri xa ndzrilo lowu pfuzraka.” 7 Kutani loko va twa mpfumawulu wa limhondzro, wa xitiloti,* wa switxhayatxhayana swa ku siyanasiyana leswi nga ni tingoti, wa xitiloti lexikulu ni wa switxhayatxhayana leswin’wana hinkwaswu, vhanu va matiko ni tindzrimi ta ku hambanahambana va khinsama va gandzrela xithombe xa woru lexi hosi Nebukadnetsara a xi yimisiki.

8 Hi nkama wolowo ku humelela Vakaldeya va kukazri va hlayela Vayuda. 9 Va byela hosi Nebukadnetsara va ku: “We hosi, hanya hi masiku! 10 We hosi, u nyikele xileleto xa leswaku mun’wana ni mun’wana lweyi a twaka mpfumawulu wa limhondzro, wa xitiloti, wa switxhayatxhayana swa ku siyanasiyana leswi nga ni tingoti, wa xitiloti lexikulu ni wa switxhayatxhayana leswin’wana hinkwaswu, a fanela ku khinsama a gandzrela xithombe xa woru; 11 ni leswaku lweyi a taka kala a nga khinsami a xi gandzrela, a fanela ku txukumeteliwa ka xidzridzri xa ndzrilo lowu pfuzraka. 12 Kambe ku ni Vayuda va kukazri lava wene hosi u va bekiki swanga vaadminixtradori va xifundzra xa Babilona, lava kalaka va nga xi landzranga xileleto xaku we hosi, ku nga Xadraki, Mixaki na Abedinego. Vavanuna lavo a va swi tizreli swikwembu swaku nakone va yala ku gandzrela xithombe xa woru lexi wene hosi u xi yimisiki.”

13 Kutani Nebukadnetsara a hlundzruka ngopfu swinene, a va a leleta leswaku ku vitaniwa Xadraki, Mixaki na Abedinego. Hiloko a vavanuna lavo va yisiwa mahlweni ka hosi. 14 Nebukadnetsara a ku: “Xadraki, Mixaki na Abedinego, i ntiyiso leswaku a mi swi tizreli swikwembu swanga nakone mi yala ku gandzrela xithombe xa woru lexi ni xi yimisiki? 15 Loko mi tlhela mi twa mpfumawulu wa limhondzro, wa xitiloti, wa switxhayatxhayana swa ku siyanasiyana leswi nga ni tingoti, wa xitiloti lexikulu ni wa switxhayatxhayana leswin’wana hinkwaswu, mi va mi tiyimisela ku khinsama mi gandzrela xithombe lexi ni xi hambiki, swi ta va swinene. Kambe loko mi yala ku xi gandzrela, hi ku kahlula mi ta txukumeteliwa ka xidzridzri xa ndzrilo lowu pfuzraka. He xini xikwembu lexi nga mi huluxaka mavokweni yanga?”

16 Xadraki, Mixaki na Abedinego va hlamula hosi va ku: “We Nebukadnetsara, a swi vileli hi ku nyika nhlamulo mhakeni leyi. 17 Loko swi fanela ku va hi ndlela leyi, Xikwembu Nkulukumba wezru, lweyi hi mu tizrelaka, a nga hi huluxa ka xidzridzri xa ndzrilo lowu pfuzraka, nakone a nga hi huluxa a vokweni dzraku, we hosi. 18 Kambe nambiloko a nga hi huluxi, swi tivi, we hosi, leswaku a hi nge ti swi tizrela swikwembu swaku, nambi ku gandzrela xithombe xa woru lexi u xi yimisiki.”

19 Kutani Nebukadnetsara a hlundzrukela ngopfu Xadraki, Mixaki na Abedinego lakakuva a va tsrimbela wuso, a va a zrumisa kuva ku yentxiwa leswaku a ndzrilo wa xidzridzri wu hisa hi lani ku phindhiwiki ka 7 ku tlula ku hisa loku tolovelekiki. 20 Ntsrhaku ka leswo, a zruma man’we ya masotxha yake lama nga ni ntamu swinene leswaku ma tsrimba Xadraki, Mixaki na Abedinego ma va ma va txukumetela ka xidzridzri xa ndzrilo lowu pfuzraka.

21 Xileswo, vavanuna lavo va tsrimbiwa na va ha yambale swiyambalu swavu swa le handle, minkhantxu yavu, swilembe ni swiyambalu leswin’wana hinkwaswu, va va va txukumeteliwa ka xidzridzri xa ndzrilo lowu pfuzraka. 22 Leswi a xileleto xa hosi a xi bindzra ngopfu swinene nakone a ndzrilo wa xidzridzri a wu hisa hi ndlela leyi tlulaka leyi tolovelekiki, lava va pshwiki va va va fa hi ndzrilo wa xidzridzri ku ve vavanuna lava txukumeteliki Xadraki, Mixaki na Abedinego. 23 Kambe a vavanuna lavazrazru, ku nga Xadraki, Mixaki na Abedinego, va wele ndzreni ka xidzridzri xa ndzrilo lowu pfuzraka na va tsrimbiwile.

24 Hiloko hosi Nebukadnetsara a sekeleka hi ku kahlula na a txhava, a va a vutisa vatlhavukanyisi vake a ku: “A ku vanga vavanuna vazrazru lava hi va tsrimbiki hi va txukumetela ndzrilweni?” Va hlamula hosi va ku: “Ina, we hosi.” 25 A va byela a ku: “Lavisani! Ni vona mune wa vavanuna na va fambafamba na va ntsrhunxekile a ndzrilweni, nakone a va pshwi, futsrhi lweyi wa wumune a tikomba a li n’wana wa swikwembu.”

26 Nebukadnetsara a tsrhindzrekela nyangweni ya xidzridzri xa ndzrilo lowu pfuzraka a ku: “Xadraki, Mixaki na Abedinego, malandzra ya Xikwembu Nkulukumba wa le Henhlahenhla, humani mi buya halenu!” Hiloko Xadraki, Mixaki na Abedinego va huma ndzrilweni. 27 A vasatrapa, valaviseli, vagovhernadori ni vatlhavukanyisi va hosi lava a va hlengeletane kolahayani, va vona leswaku a ndzrilo a wu nga va hisanga nikutsrongo* vavanuna volavo. A ku nga na nsisi ni wun’we wavu lowu pshwiki, a mpahla yavu a ya ha li xiswoswi a yi li xiswone, nambi ku twala musi a va nga twali.

28 Kutani Nebukadnetsara a ku: “A ku dzrumisiwi Xikwembu Nkulukumba wa Xadraki, Mixaki na Abedinego, lweyi a zrumeliki ntsrumi yake akuva yi huluxa malandzra yake. Va mu dumbile, va va va nga yingiseti xileleto xa hosi, nakone a va tiyimisele ku fa* a matsrhan’wini ya ku tizrela ni ku gandzrela xikwembu xin’wana loko ku nga li Xikwembu Nkulukumba wavu. 29 Xileswo ni nyikela nawu wa leswaku mhunu mun’wana ni mun’wana ka vhanu va matiko ni tindzrimi hinkwatu, lweyi a taka hlaya ntxhumu wa ku biha mayelanu na Xikwembu Nkulukumba wa Xadraki, Mixaki na Abedinego, a fanela ku pulukanyiseliwa,* nakone a muti wake wu ta ndzruluka xikoti xa mani na mani; hikusa a ku na xikwembu xin’wana lexi huluxaka ku fana na yene.”

30 Ntsrhaku ka leswo a hosi yi tlakuxa Xadraki, Mixaki na Abedinego hi ku va nyika mintizro ya ku hlawuleka a xifundzreni xa Babilona.