Mpfuletelo Lowu Yamukeliwiki Hi Yohane
10 Kutani ni vona ntsrumi yin’wana ya ntamu yi xika hi le tilweni na yi yambale* tlavi, a nhlokweni ya yone a ku ni nkwangulatilo, a wuso bya yone a byi fana ni dambu, a milenge* ya yone a yi fana ni mapilari ya* ndzrilo, 2 nakone a vokweni dzra yone a yi tamele xibukwana lexi a xi pfuliwile. Kutani yi beka nkondzro wa yone wa xinene a lwandle kambe a wa ximatsri yi wu beka ka misava, 3 yi gama yi bandlukana hi zritu ledzrikulu ku fana ni loko nghonyama* yi bonga. Loko yi bandlukanile, ni twa mazritu ya 7 wa swingwalangwandzra.
4 Ntsrhaku ka loko ni yingele mintxhumu leyi hlayiwiki hi 7 wa swingwalangwandzra, ni djule ku yi tsrala, kambe ni yingela zritu na dzri pfa hi le tilweni dzri ku: “Yi beki yi va xihundla mintxhumu leyi hlayiwiki hi 7 wa swingwalangwandzra, u nga yi tsrali.” 5 A ntsrumi leyi ni yi voniki na yi yime lwandle ni ka misava, yi tlakuxele voko dzra yone dzra xinene a tilweni, 6 kutani yi hlambanya hi Lweyi a hanyaka hi masiku ni masiku, lweyi a tumbuluxiki tilo ni mintxhumu leyi nga ka dzrone, misava ni mintxhumu leyi nga ka yone kun’we ni lwandle ni mintxhumu leyi nga ka dzrone, yi ku: “A ku nge he hlweliwi. 7 Kambe a masikwini lawa a ntsrumi ya wu 7 yi taka va kusuhi ni ku txhaya xipalapala* xa yone, a xihundla xa ku xwenga lexi Xikwembu Nkulukumba a xi hlayiki swanga madzrungula lamanene ka malandzra yake, ku nga vaprofeta, nakunene xi ta hetiseka.”
8 Hiloko ni yingela zritu ledzri pfaka hi le tilweni dzri tlhela dzri vulavula na mine dzri ku: “Famba u ya teka buku ledzri pfuliwiki, ledzri nga vokweni dzra ntsrumi leyi yimiki lwandle ni ka misava.” 9 Ni yi yelile ni va ni yi byela leswaku yi ni nyiketa xibukwana. Yone yi ni byela yi ku: “Xi teki u xi da, xi ta yentxa leswaku a ndzreni kwaku ku bava, kambe a non’wini kwaku xi ta tsrokotsra ku fana ni wulombe bya tinyonxi.” 10 Ni teke xibukwana lexi a xi li vokweni dzra ntsrumi ni xi da, a non’wini kwanga a xi tsrokotsra ku fana ni wulombe bya tinyonxi, kambe loko ni game ku da a ndzreni kwanga ku sungule ku bava. 11 Kutani ni byeliwa leswi: “U fanela ku tlhela u profeta mayelanu ni vhanu, matiko, tindzrimi kun’we ni tihosi tinyingi.”