Mpfuletelo Lowu Yamukeliwiki Hi Yohane
8 Loko a namula xilemo xa wu 7, a tilweni ku va ni ku zrula ku dzringana hamfu ya wora. 2 Kutani ni vona 7 wa tintsrumi na ti yime mahlweni ka xiluvelo xa Xikwembu Nkulukumba, ti gama ti nyikiwa 7 wa swipalapala.*
3 Ku tlhasa ntsrumi yin’wana yi yima altarini na yi khome xibya xa woru xa muzri wa ku nun’hwela,* kutani yi nyikiwa muzri wa wunyingi wa ku nun’hwela akuva yi wu nyikela a altarini dzra woru ledzri nga mahlweni ka xiluvelo nkama lowu ku twalaka swikhongoto swa vaxwengi. 4 A musi wa muzri wa ku nun’hwela lowu a wu li vokweni dzra ntsrumi kun’we ni swikhongoto swa vaxwengi, swi tlhantukela ka Xikwembu Nkulukumba. 5 Kambe hi ku kahlula a ntsrumi yi teka xibya xa muzri wa ku nun’hwela, yi xi tata hi makhala ya ndzrilo* wa le altarini yi ma txukumetela a misaveni. Ku gama ku va ni ku dzruma ka tilo, ku twala mazritu, ku va ni lihati kun’we ni ku tsrekatsreka ka misava. 6 A tintsrumi leta 7 leti a ti ni 7 wa swipalapala, ti tilulamisela akuva ti swi txhaya.
7 Kutani a ntsrumi ya ku sungula yi txhaya xipalapala xa yone. Ku gama ku va ni mazralana ni ndzrilo lowu patsriwiki ni ngati, swi txukumeteliwa misaveni; kutani ku pshwa xiyenge xitsrongo xa misava, xiyenge xitsrongo xa minsinya kun’we ni swimila hinkwaswu swa lihlaza.
8 A ntsrumi ya wubidzri yi txhaya xipalapala xa yone. Kutani a lwandle ku txukumeteliwa ntxhumu wa ku fana ni nhava ya yikulu leyi nga ku pfuzreni. Hiloko xiyenge xitsrongo xa lwandle xi ndzruluka ngati; 9 ku fa swivumbiwa swi nga li swingani swa le lwandle, ku tlhela ku tsrhoveka maboti ma nga li mangani.
10 A ntsrumi ya wuzrazru yi txhaya xipalapala xa yone. Kutani ku wa nyeleti ya yikulu hi le tilweni leyi pfuzraka ku fana ni motsre, yi wele ka swiyengenyana swa milambu ni ka swihlovo swa mati. 11 A vito dzra nyeleti yoleyo i Ku Bava.* A xiyengenyana xa mati xi sungule ku bava, kuva ku fa vhanu vanyingi hi mati wolawo, hikusa a ma yentxiwe ma bava.
12 A ntsrumi ya wumune yi txhaya xipalapala xa yone. Hiloko ku biwa xiyenge xitsrongo xa dambu, xiyenge xitsrongo xa n’weti ni xiyenge xitsrongo xa tinyeleti, akuva swiyenge swoleswo swi mphuma ni leswaku a siku dzri nga voni ku dzringana xiyenge xitsrongo xa dzrone. Swi va hi ndlela yoleyo ni le ka wusiku.
13 Kutani ni vona gama na dzri haha a mpfhukeni a xikazri ka tilo ni misava, na dzri huwelela dzri ku: “Khombo, khombo, khombo ka lava tsrhamaka misaveni hi mhaka ya ku txhaya ka swipalapala leswi saliki, leswi a tintsrumi tizrazru ti taka swi txhaya ku nga li khale!”