Ku Yamukela Ntizro Wa Yesu A Lulamiselweni Dzra Xikwembu Nkulukumba

‘A KU SUNGULENI Xikwembu Nkulukumba a tumbuluxi tilo ni misava’ nakone hinkwaswu leswi a swi yentxiki a swi li swa ‘hombe ngopfu’. (Gn 1:1, 31) Yehovha a vumbe vhanu hi ndlela ya kuva va va ni wumundzruku lebyi hlamalisaka. Kambe a wupfukeli lebyi viki kone a Edeni, byi tsremelise ku nyonxa ka vhanu swa nkamanyana. Nambitanu, a nkongometo wa Yehovha hi misava ni vhanu a wu txintxanga. Xikwembu Nkulukumba a kombise leswaku a ku ta va ni ku tizruliwa ka vana va Adamu lava yingisetaka. A wugandzreli bya ntiyiso a byi ta pfuxetiwa, nakone Nkulukumba a a ta suvisa Sathana ni mintizro yakwe leya ku biha. (Gn 3:15) Mintxhumu a yi ta tlhela yi va ya ‘hombe ngopfu’. Yehovha a a ta hetisisa leswo hi ku tizrisa N’wanakwe, Yesu Kriste. (1Yh 3:8) Xileswo, swa djuleka ku yamukela xikhundla xa Kriste a lulamiselweni dzra Xikwembu Nkulukumba.​—Min 4:12; Flp 2:9, 11.

LESWI NTIZRO WA KRISTE WU PATSRAKA SWONE

² Loko hi yanakanya hi ntizro wa Yesu a lulamiselweni dzra Xikwembu Nkulukumba, hi twisisa leswaku wu patsra swinyingi. Yesu a tizra swanga Mutizruli wa vhanu, Muprista Lwenkulu, Nhloko ya bandla dzra wukriste, nakone swoswi i Hosi ya Mfumu wa Xikwembu Nkulukumba. Ku yanakanyisisa hi swiyenge leswo swi kulisa ku tlangela kwezru ka lulamiselo dzra Nkulukumba nakone swi yentisa lizrandzru dzrezru ha Yesu Kriste. Bibele dzri tlhamuxela yin’wana ya mintizro yakwe ya ku siyana-siyana.

³ Hi nkama wa wutizreli bya Kriste bya la misaveni, swi ve livaleni leswaku a wuxaka bya Xikwembu Nkulukumba ni vhanu lava yingisetaka a byi ta pfuxetiwa ha Yesu Kriste. (Yh 14:6) Swanga Mutizruli wa vhanu, Yesu a tinyikele swanga xitizrulo xa lava ku tala. (Mt 20:28) Xileswo Yesu a hi ntsena xikombiso xa ku hanya hi ku txhava Xikwembu Nkulukumba. Hi yene xiyenge xa ntshima a ku hetisiseni ka nkongometo wa Yehovha hi vhanu. Ko va yene ntsena ndlela ya ku tlhela hi yamukeliwa ha Xikwembu Nkulukumba. (Min 5:31; 2Ko 5:18, 19) Lifu dzra Yesu dzra gandzrelo ni ku pfuka kwakwe swi pfule ndlela ya leswaku vhanu lava yingisetaka va tikholisa hi matovoko lama nga helikikiki a hansi ka Mfumu wa Xikwembu Nkulukumba wa le tilweni.

⁴ Swanga Muprista Lwenkulu, Yesu a nga swi kota ku ‘tsretsrelela gome dzrezru’ ni ku hlampswa swidoho swa malandzra yakwe lama tinyiketeliki lani misaveni. Mupostola Pawulo a tlhamuxele leswi: ‘Hikusa a hi na muprista lwenkulu lwa dluvaka ku tsretsrelela gome dzrezru, leswi a nga dzringiwa na yene hi matlhelo hinkwawu ku fana na hine, kambe a nga vanga na xihono.’ Ntsrhaku, Pawulo a kutxe lava kombisaka lipfumelo ka Yesu Kriste leswaku va londzrovota hi la ku heleliki a mukhandlu wa ku tlhelela ka Xikwembu Nkulukumba, a ku: ‘Hi leswo ke, a hi yeneni hi wuzrena a xiluvelweni xa timpswalu, akuva hi nyikiwa lizrezre hi kuma timpswalu ku hi pfuna a nkameni lowu fanekelaka.’​—Hb 4:14-16; 1Yh 2:2.

⁵ Yesu a tlhela a va Nhloko ya bandla dzra wukriste. Ku fana ni valandzreli vakwe va dzana dzra ku sungula, a hi vileli muzrangeli wa nyama. Yesu a nyikela nkongomiso hi ku tizrisa moya wa ku xwenga ni vabyisi lava fanelekaka, lava zrangeliwaka ha yene, lava taka tiyangulela kwakwe ni ka Tatana wakwe hi ndlela leyi va khomaka ntlhambi wa Xikwembu Nkulukumba ha yone. (Hb 13:17; 1Pe 5:2, 3) Loko a profeta mayelanu na Yesu, Yehovha a te: ‘Lavisa, ndzri mu bekile a va mboni ku matiko, hosana ni muleleti wa matiko.’ (Eza 55:4) Yesu a kombekise ku hetiseka ka wuprofeta lebyi loko a byele vadondzrisiwa vakwe a ku: ‘Nakone n’wi nga txhulananeni vazrangeli, hikusa a Muzrangeli wenu i mun’we ntsena, a nga Kriste.’​—Mt 23:10, Testamente Ledrimpswha Ni Mapsalma, TLM.

⁶ Akuva a kombisa mayanakanyela yakwe ni leswaku a navela ku hi pfuna, Yesu a hi nyika xizrambu lexi: ‘Tanani ku mine, hinkwenu lava kazraliki, na n’wine n’wi bindzriwaka, ndzri ta n’wi wisisa! Tibyatsrhelani a mpinga wanga, n’wi va n’wi dondzra ku mine, hikusa ndzri mbulwa, wa mbilu ya ku titsrongahata, n’wi ta kuma ku wisa a mimoyeni yenu; hikusa a mpinga wanga wa byatsrheka, na wo ntsrhwalu wanga wa vevuka.’ (Mt 11:28-30) Yesu Kriste a zrangela bandla dzra wukriste hi ndlela ya ku zrula ni leyi pepisaka. Yesu a tikombekise a li ‘mubyisi lwemunene’ hi ku yetisela Tatana wakwe wa le tilweni, Yehovha Xikwembu Nkulukumba.​—Yh 10:11; Eza 40:11.

⁷ Ka papela dzrakwe dzra ku sungula ku va le Korinte, Pawulo a tlhamuxele ntizro wumbeni wa Yesu Kriste loko a ku: ‘Hikusa swi fanela leswaku a fuma, a ko a beka valala hinkwavu a hansi ka milenge yakwe. Ku ta ku laha hinkwaswu swi bekiwiki a hansi kwakwe, kone, na ye n’wana, a ta bekiwa hansi ka lweyi a bekiki hinkwaswu a hansi kwakwe, akuva Xikwembu Nkulukumba a va hinkwaswu ku hinkwavu.’ (1Ko 15:25, 28) Na a nge si ta la misaveni, Yesu a a li ‘n’anga ya ku tizra’ kumbe mutizri lwa nga ni wuswikoti, nakone a ve xivumbiwa xa ku sungula xa Xikwembu Nkulukumba. (Pr 8:22-31) Loko Yesu a zrumeliwe la misaveni ha Xikwembu Nkulukumba, a yentxe ku zrandzra ka Nkulukumba minkama hinkwayu. A tiyisele ndzringo lowukulu ka hinkwayu a za a fa na a dumbekile ka Tatana wakwe. (Yh 4:34; 15:10) Hi kola ka leswi N’wanakwe a dumbekiki ku tlhasela ku feni, Nkulukumba a mu pfuxele tilweni a va a mu nyika mfanelo ya ku va Hosi ya Mfumu wa le tilweni. (Min 2:32-36) Swanga Hosi, Xikwembu Nkulukumba a nyike Kriste xiyavelo xa ku zrangela mamilhawu ya swivumbiwa swa moya swa ntamu akuva swi susa mimfumu ya vhanu ni ku helisa wubihi hinkwabyu. (Pr 2:21, 22; 2Te 1:6-9; Mpf 19:11-21; 20:1-3) Ntsrhaku, a Mfumu wa le tilweni wa Xikwembu Nkulukumba, lowu zrangeliwaka ha Kriste wu ta fuma misava hinkwayu wone ntsena.​—Mpf 11:15.

LESWI KU YAMUKELA NTIZRO WAKWE SWI TLHAMUXELAKA SWONE

⁸ Yesu Kriste i xikombiso xezru lexi hetisekiki. A nyikiwe ntizro wa ku hi hlayisa. Akuva hi pfuneka hi ku hlayisiwa koloko ka lizrandzru, hi fanela ku tsrhama hi dumbekile ka Yehovha hi tlhela hi fambisana ni nhlengeletanu yakwe leyi yaka mahlweni.

⁹ Valandzreli va Yesu va dzana dzra ku sungula, a va wu yamukela hi ku helela ntizro wa Kriste a lulamiselweni dzra Xikwembu Nkulukumba. Va swi kombise hi ku tizra hi wumun’we na va zrangeliwa ha Kriste, va landzrela nkongomiso wakwe lowu nyikeliwaka hi moya wa ku xwenga. (Min 15:12-21) Loko mupostola Pawulo a vulavula hi wumun’we bya bandla dzra wukriste ledzri totiwiki, a tsrale leswi: ‘Hi va lava hlayaka xihlayelamfuzri hi lizrandzru, hi kula hi matlhelo hinkwawu ku yene, lwa nga nhloko, ye Kriste; lweyi a mizri hinkwayu yakwe mi tlhanganaka kun’we swinene, mi tiyisanaka ha hombe hi ku tlhangana ka swizro hinkwaswu; mi va mi kuma a ku kula hi mpimu wa ntamu lowu yaveliwaka xizro xin’wana ni xin’wana; ma ha nga yakisiwa lizrandzrwini.’​—Ef 4:15, 16.

¹⁰ Loko mun’wana ni mun’wana a bandleni a tizrisana ni vambeni, va tlhela hinkwavu va tizrisana hi wumun’we na va zrangeliwa ha Kriste, a bandla dzra kula dzri tlhela dzri tala hi moya wa lizrandzru, ku nga ‘xitsrimbo xa ku hetiseka’ xa wumun’we.​—Yh 10:16; Kl 3:14; 1Ko 12:14-26.

¹¹ Swiyentxakalu swa misava leswi hetisisaka wuprofeta bya Bibele, swi hi khanyisela leswaku Yesu Kriste a nyikiwe ntamu wa wuhosi ku sukela hi 1914. Swoswi a le ku fumeni a makazri ka valala vakwe. (Ps 2:1-12; 110:1, 2) Xana leswi swi tlhamuxela yini ka lava hanyaka la misaveni swoswi? Ku nga li khale, Yesu a ta kombekisa ntizro wakwe swanga Hosi ya tihosi ni Mufumi wa vafumi loko a tisa yavanyiso dzra le tilweni ka valala vakwe. (Mpf 11:15; 12:10; 19:16) Kutani a xidumbiso xa Yehovha xa ku tizrula vhanu, lexi a xi yentxiki a ku sunguleni loko a pfukeliwa hi vhanu, xi ta hetiseka akuva ku pfuneka lava nga tlhelweni dzra xinene dzra Kriste, va yamukeliwaka ha yene. (Mt 25:34) Hi tovoke ngopfu hi ku twisisa xikhundla xa Kriste a lulamiselweni dzra Xikwembu Nkulukumba! Ingiki hi nga ya mahlweni hi va ni wumun’we a ku hetisiseni ka wutizreli bya misava hinkwayu na hi zrangeliwa ha Kriste a masikwini lawa ya wugamu.