Yeremiya A Zrezre Hi Xixixi

Yehovha a hlawule Yeremiya leswaku a va muprofeta a Yuda. A mu byele leswaku a fanela ku zrezrela vhanu ni ku va dzrimuxa leswaku va fanela ku tsrhika ku yentxa mintxhumu ya ku biha. Kutani Yeremiya a byela Yehovha a ku: ‘A ni swi koti ku khanela hikusa na ha li mutsrongo.’ Kambe Yehovha a mu byela a ku: ‘U nga txhavi. Ni ta ku byela leswi u fanelaka ku swi hlaya. Ni ta ku pfuna.’

Yehovha a byela Yeremiya leswaku a hlengeleta vazrangeli va Yuda a va a dlaya xibya xa vumba a mahlweni kwavu, a gama a va byela a ku: ‘Yerusalema a ta helisiwa ku fana ni xibya lexi xa vumba.’ Loko Yeremiya a yentxe leswi Yehovha a mu byeliki swone, a vazrangeli va hlundzruka ngopfu swinene. A muzrangeli lweyi a vitaniwaka Paxahuru a ba Yeremiya a tlhela a mu tsrimba ka xigodo. Yeremiya a tsrhame kolanu na a tsrimbiwile wusiku hinkwabyu nakone a a nga swi koti ku timenxa. Kutani hi siku ledzri landzreliki Paxahuru a mu tsrhika a famba. Kambe Yeremiya a hlaya leswi: ‘A na ha swi gwenti hinkwaswu leswi; a ni nge he ti zrezra ni siku ni dzrin’we.’ Xana Yeremiya a yimile ku zrezra? Im-him. Yeremiya a yanakanyisise ha hombe, hi wugamu a ku: ‘A zritu dzra Yehovha dzri fana ni ndzrilo a ndzreni kwanga nakone a ni swi koti ku yima ku zrezra.’ Xileswo, Yeremiya a ya mahlweni a zrezrela vhanu ni ku va basopisa.

Ku khalute malembe manyingi swinene, nakone ku sungule ku fuma hosi yin’wana a Yuda. A vaprista ni vaprofeta va madzrimi a va mu nyenya Yeremiya hi mhaka ya leswi a a swi hlaya. Vone va byele tihosana ta Vayuda va ku: ‘Yeremiya a fanela ku dlayiwa.’ Kambe Yeremiya a va byela a ku: ‘Loko mi ni dlaya mi ta va na mi dlaya wanuna lweyi a kalaka a nga na nandzru hikusa hinkwaswu leswi ni swi hlayaka a swi sukeli kwanga kambe swi sukela ka Yehovha.’ Loko tihosana ta Yuda ti yingela leswo, ti ku: ‘Wanuna lweyi a nga fanelanga a dlayiwa.’

Yeremiya a ye mahlweni a zrezra kambe hi ku famba ka nkama nambi tihosana ti sungule ku mu nyenya. Xileswo, va kombele leswaku a hosi yi dlaya Yeremiya. Kambe a hosi yi byele vazrangeli leswaku va mu yentxa leswi va swi vonaka. Hi wugamu a vazrangeli va kunguhate ku dlaya Yeremiya. Va mu khomile va va va mu txukumetela ka xihlovo lexi a xi ni ntsrokolo. Kolanu, Yeremiya a sungula ku nyuvela.

Hiloko wanuna wa kukazri lweyi a vitaniwaka Abimeleki a famba a ya vulavula ni hosi, a yi byela a ku: ‘A vazrangeli va pete Yeremiya ndzreni ka xihlovo. Loko va nga mu humexi, a ta fa!’ Kutani hosi yi zruma Abimeleki a famba ni 30 wa vavanuna akuva va ya humesa Yeremiya a ndzreni ka xihlovo. Swi nge na mhaka ni ndlela leyi Yeremiya a xanisekiki ha yone, yene a tame a va ni xixixi nakone a nga tsrhikanga ku zrezra. Wene ke, wa swi djula ku fana na yene?