Ku Helisiwa Ka Yerusalema

Hi ku phindaphinda, a Vayuda a va tsrhika ku tizrela Yehovha nakone a va ya mahlweni va gandzrela swikwembu swa madzrimi. Ku dzringana malembe manyingi, Yehovha a zrumele vaprofeta akuva va basopisa Vayuda kambe a va nga djuli ku va yingela. Futsrhi a va poyilela vaprofeta nkama lowu va va basopisaka. I yini leswi Yehovha a a ta swi yentxa akuva a helisa wugandzreli bya madzrimi?

Nebukadnetsara hosi ya Babilona a a hlasela ni ku hlula madoropa manyingi. Yene a hlasele Yerusalema a tlhela a teka hosi Yoyakimi, tihosana ni masotxha ku patsra ni vhanu vanyingi va Vayuda, a va yisa a Babilona. Nebukadnetsara a tlhele a teka swibya hinkwaswu swa lisima a tempeleni dzra Yehovha. A beke Zedekiya swanga hosi ya Yuda a mbangwini wa Yoyakimi.

A ku sunguleni, Zedekiya a a mu yingiseta Nebukadnetsara. Kambe van’we va vaprofeta va madzrimi kun’we ni vhanu va matiko lawa a ma li kusuhi, va byele Zedekiya leswaku a nga ha mu yingiseti Nebukadnetsara. Kutani Yeremiya a basopisa Zedekiya a ku: ‘Loko wene wo tsrhika ku yingiseta hosi ya Babilona, ku ta yentxeka mintxhumu ya ku biha a Yuda; vanyingi va ta dlayeteliwa nakone van’wana va ta fa hi ndlala ni mavabyi.’

Ntsrhaku ka 8 wa malembe, Zedekiya a teke xiboho xa ku va a nga ha yingiseti hosi ya Babilona nakone a kombele mpfunu ka masotxha ya le Egipta. Hiloko Nebukadnetsara a zruma masotxha yake leswaku ma ya hlasela Yerusalema. A masotxha ma suka ma ya tsrandzrela doropa dzra Yerusalema. Hi nkama lowo Yeremiya a byela Zedekiya a ku: ‘Tinyikeli ka hosi ya Babilona! Yehovha a hlaye leswaku loko u yentxa leswo ku ta huluka wene ni doropa. Loko mi nga tinyikeli, a masotxha ya Babilona ma ta hisa Yerusalema ma tlhela ma ku pfalela djele.’ Kambe Zedekiya a ku: ‘Mine, ni tinyikela? A ni nge swi yentxi leswo!’

Ku khalute lembe ni hamfu, kutani a masotxha ya Babilona ma nghena ma hisa doropa. Ma hisa tempele, ma dlaya vhanu vanyingi ma tlhela ma teka vhanu vanyingi ngopfu swinene leswaku va ya va swikazrawa a Babilona.

O va ku Zedekiya a tsrutsrumile, kambe a masotxha ya Babilona ma swi kotile ku mu khoma ma va ma mu heketa ka Nebukadnetsara. Kutani Nebukadnetsara a zrumela leswaku va dlaya vana va Zedekiya a mahlweni kwake. Ntsrhaku ka leswo, Nebukadnetsara a xokola matihlo ya Zedekiya a gama a mu pfalela djele, nakone a fele kohala djele. Kambe Yehovha a dumbise Vayuda a ku: ‘Loko ku khaluta 70 wa malembe ni ta yentxa leswaku mi tlhelela Yerusalema.’

A u swi tiva leswaku a madjaha man’wana lawa a ma zrandzra Yehovha na wone ma tekiwile ma yisiwa Babilona? I yini leswi a swi ta ma humelela? Xana a ma ta tama ma dumbeka ka Yehovha?