Mune Wa Madjaha Lawa Ma Yingisetiki Yehovha

A ku ni hosi ya kukazri leyi a yi vitaniwa Nebukadnetsara, leyi a yi djula leswaku man’we ka madjaha ya le Yuda ma yi tizrela. Yi zrume wanuna lweyi a a vitaniwa Axpenazi akuva a hlawula madjaha lawa a ma tlhazrihile ma tlhela ma va ni lihanyu ledzrinene. A madjaha lawo a ma ta dondzrisiwa ku dzringana 3 wa malembe. A swi djula leswaku ma tiva ku tsrala, ku dondzra ni ku khanela lidzrimi dzra Vababilona, nakone a ma ta tlhela ma da swakuda swa le wuhosini. Man’we ka madjaha lawo a ku li Daniyele, Ananiya, Mixayele na Azariya. Axpenazi a ma txintxe mavito, a va a ma txhula mavito ya Vababilona a ku i Beltexatsara, Xadraki, Mixaki na Abedinego. Xana leswi ma swi dondzriki a Babilona a swi ta hona wuxaka bya wone na Yehovha?

A madjaha lawa ya mune a ma tiyimisele ku tama ma yingiseta Yehovha. A ma swi tiva leswaku Vababilona a va da mintxhumu leyi a Nawu wa Yehovha a wu yi yilisa. Xileswo ma kombele Axpenazi leswaku ma nga di swakuda leswo. Kutani Axpenazi a ma hlamula a ku: ‘Loko n’wine mi nga di swakuda leswi hosi yi djulaka kuva mi da swone, yi gama yi mi vona na mi wondzrile, nakunene yi ta ni dlaya!’

Hiloko Daniyele a famba a ya khanela ni wanuna lweyi a a va vonelela, a ku: ‘Hi kombela u hi nyika matsavu ni mati ntsena ku dzringana 10 wa masiku, ntsrhaku ka leswo hi fananise ni madjaha lawa ma daka swakuda swa hosi.’ Kutani wanuna lwiyani a pfumela.

Ntsrhaku ka 10 wa masiku, Daniyele kun’we ni vanghanu vake a va tikomba na va ni lihanyu ledzrinene ku tlula madjaha lawa mambeni. Yehovha a nyonxe ngopfu swinene hi ku vona ku yingiseta kwavu nakone a tlhele a pfuna Daniyele akuva a va ni wuswikoti bya ku twisisa milozro.

Loko va heta ku dondzrisiwa, Axpenazi a teka madjaha hinkwawu a ma yisa ka hosi Nebukadnetsara. A hosi yi bula na wone nakone yi xiya leswaku Daniyele, Ananiya, Mixaki na Azariya a va tiva ngopfu va tlhela va tlhazriha ku tlula madjaha laman’wana hinkwawu, xileswo yi va hlawula akuva va yi tizrela. Phela a yi patsra ni ku kombela mavonela yavu na yi nga si teka xiboho ka timhaka ta lisima. Yehovha a yentxe leswaku Daniyele ni vanghanu vake va tlhazriha ngopfu ku tlula vatizri va hosi.

Nambileswi Daniyele, Ananiya, Mixaki na Azariya a va li kule ni kaya, a va dzrivalanga leswaku a va li vatizreli va Yehovha. Wene ke, xana u ta tama u mu tizrela Yehovha nambiloko vapswele vaku va li kule na wene?