Dondzro Ya Le Nhaveni

Ntsrhaku ka loko a hlawule 12 wa vapostola, Yesu a xika nhaveni a ya mbangwini lowu a ku hlengeletane vhanu va vanyingi. A vhanu lavo a va pfa he ka mimbangu ya ku siyanasiyana ya ku fana ni Galileya, Yudeya, Tiri, Sidoni, Siriya ni le mimbangwini yin’wana ya Yordani. Va buyisi vhanu lava a va kazratiwa hi mavabyi ku patsra ni lava a va hluphiwa hi mademona. Kutani Yesu a daha hinkwavu nakone hi ku landzrela a tsrhama hansi, a va a sungula ku dondzrisa. A tlhamuxeli leswi hi fanelaka ku swi yentxa loko hi djula ku va vanghanu va Xikwembu Nkulukumba. Hi fanela ku twisisa leswaku hi vilela mpfunu wa Yehovha hi tlhela hi dondzra ku mu zrandzra. A hi nge swi koti ku zrandzra Xikwembu Nkulukumba nakasi hi nyenya vhanu van’wana. Xileswo, hi fanela ku khoma vhanu hinkwavu hi ndlela leyinene ni ku tlhela hi va kombisa wunene nambiloko va li valala vezru.

Yesu a te: ‘A swi dzringananga kuva u zrandzra vanghanu vaku ntsena, u fanela ku zrandzra ni valala vaku, ni ku va dzrivalela hi mbilu yaku hinkwayu loko va ku khunguvanyisa. Loko ku ni mhunu wa kukazri lweyi a ku kwateliki, kahlula u ya kombela lidzrivalelo. Yentxela van’wana leswi na wene u djulaka leswaku va ku yentxela swone.’

Yesu a tlhele a nyika vhanu swidzrimuxo mayelanu ni mintxhumu leyi vonekaka. A te: ‘Swa yampswa ku va munghanu wa Yehovha ku tlula ku va ni mali ya yinyingi hikusa u nga ha yiveliwa, kambe a ku na mhunu lweyi a nga kotaka ku yiva wunghanu byaku na Yehovha. Tsrhika ku hlatiyelisiwa hi swakuda, swa ku nwa kumbe hi mpahla. Lavisa tinyanyana, minkama hinkwayu Xikwembu Nkulukumba a ti nyika swakuda leswi dzringanaka. A ku vilela swi ta ku gomisela wutomi. Dzrimuka leswaku Yehovha awa swi tiva hinkwaswu leswi u swi vilelaka.’

A xitsrhungu a xi ngi ngi sama xi yingela mhunu a vulavula hi ndlela liyani. Phela a vazrangeli va wukhongoti a va nga va dondzrisi mintxhumu leyi. Ha yini Yesu a a li mudondzrisi lwenene? Hikusa hinkwaswu leswi a a swi dondzrisa a swi pfa ka Yehovha.