Yesu A Dondzrisa Vadondzrisiwa Vake Ndlela Ya Ku Khongota

Hinkwaswu leswi Vafarisi a va swi yentxa a va swi yentxa hi nkongometo wa ku tikombekisa ka vhanu. A vo kombisa wunene hi ku djula ku voniwa hi vambeni. A va khongota lomu ku nga ni vhanu vanyingi akuva va voniwa. A Vafarisi a va swi tiva swikhongoto hi nhloko, nakone a va tsrhamela ku swi phindaphinda a masinagogeni, a switaratwini ni kun’wana lomu a swi ta koteka kuva va yingeliwa hi vhanu. Hi leswi yentxiki xitsrhungu xi hlamala hi mazritu ya Yesu loko a ku: ‘Mi nga khongoti ku fana ni Vafarisi. Vone va yanakanya leswaku Xikwembu Nkulukumba a ta hlamalisiwa hi mazritu manyingi lawa va ma hlayaka. Kambe leswo a swi mu nyonxisi Xikwembu Nkulukumba. A xikhongoto xi fanela ku va mabulu yaku na Yehovha ntsena. U nga phindheteli mazritu, Yehovha a djula leswaku u mu byela ndlela leyi u titwaka ha yone.’

‘Mi fanela ku khongota hi ndlela leyi: “Papayi wezru lweyi a nga matilweni, a vito dzraku a dzri xwengisiwe. A Mfumu waku a wu te. A ku zrandzra kwaku a ku yentxeke la misaveni, hi lani ku yentxekaka ha kone matilweni.”’ Kambe Yesu a tlhele a va byela leswaku a va fanela ku khongota va kombela swakuda swa siku ni siku, va kombela ku dzrivaleliwa swidoho swavu ku patsra ni mintxhumu yin’wana ya ximhunu.

Yesu a ye mahlweni a ku: ‘Mi nga tsrhiki ku khongota, yanani mahlweni mi kombela mintxhumu leyinene ka Papayi wenu Yehovha. Papayi mun’wana ni mun’wana a djula ku nyika vanake mintxhumu leyinene. Xana loko n’wanaku a ngo ku kombela pawu, u nga mu nyika zribye? Kumbe loko a ngo ku kombela hlampfi u nga mu nyika nyoka?’

Ntsrhaku ka leswo, Yesu a ku: ‘Leswi n’wine mi kotaka ku nyika mintxhumu leyinene vanenu, xana Papayi wenu Yehovha a nge swi koti ku mi nyika moya wa ku xwenga? Leswi mi fanelaka ku swi yentxa i ku kombela ntsena.’ Xana wa xi yingiseta xitsratsriyo xa Yesu? He yini mintxhumu leyi u khongotaka ha yone?