XIKWEMBU NKULUKUMBA A TSRHAMISISE KUYINI?

Loko hi ya hi tiva matsrhamela ya mhunu wa kukazri, hi ya hi mu tiva ku yampswa nakone wunghanu byezru bya kula. Hi ndlela leyi fanaka, loko hi ya hi tiva matsrhamela ya Yehovha, hi ya hi mu tiva ku yampswa leswi a nga xiswone, nakone wunghanu byezru na yene bya kula. Ka matsrhamela lama hlamalisaka ya Xikwembu Nkulukumba, ku ni mune lawa ma xiyekaka swinene, a nga lawa: Ntamu wake, wutlhazri byake, wululami byake, ni lizrandzru dzrake.

XIKWEMBU NKULUKUMBA A NI NTAMU LOWUKULU

“Hosi Yehovha, lavisa, wene, u yentxile tilo ni misava hi ntamu lowukulu.”​—YEREMIYA 32:17.

Loko hi langusa ntumbuluku hi vona ntamu wa Xikwembu Nkulukumba. Hi xikombiso, loko u li ka mbangu lowu ku nga ni dambu i yini leswi u swi twaka mizrini yaku? U twa ku hisa ka dambu. Ku hlaya ntiyiso, leswo swi yentxiwa hi ntamu wa Yehovha lowu hlamalisaka. A dambu dzri ni ntamu wa ku ya tlhasa kwini? Ku hlayiwa leswaku lomu dambu dzri nga kone ku hisa kolomu ka 15.000.000°C. Ka segundu dzrin’wana ni dzrin’wana dambu dzri humesa ndzrilo lowu dzringanaka madzana ya timiliyoni ya mabomba ya nukleyari.

Nambitanu, a dambu i dzritsrongo ka tinyeleti ta ntsrandzravahlayi leti nga kone mpfhukeni. Swidondzri swi kombetela leswaku yin’we ya tinyeleti letikulu, leyi vitaniwaka UY Scuti, yi tlula dambu ka 1.700 hi wukulu. Loko nyeleti ya UY Scuti a yo bekiwa lani ku nga ni dambu, a yi ta funeketa misava yi tlhela yi khaluta lani ku gamelaka kone planeta dzra Jupter. Kumbexana leswo swi nga hi pfuna ku twisisa ku yampswa mazritu ya Yeremiya loko a ku Yehovha Xikwembu Nkulukumba a hambe matilu ni misava hi ntamu wakwe lowukulu.

Hi pfunekisa kuyini hi ntamu wa Xikwembu Nkulukumba? Wutomi byezru byi tiseketele hi mintxhumu leyi Xikwembu Nkulukumba a yi vumbiki, ya ku fana ni dambu, ni mintxhumu yin’wana leyi nga kone lani misaveni. Xileswo, Xikwembu Nkulukumba a tizrisa ntamu wake akuva a pfuna mun’wana ni mun’wana wezru. Hi ndlela yini? Loko Yesu a li lani misaveni Xikwembu Nkulukumba a mu nyike ntamu wa ku yentxa masingita. Bibele dzri li: “Lava fiki matihlu swoswi va vona, lava nhlokonho va basisiwa, lava ku fa tindleve va yingela, lava ku fa va pfuxiwa.” (Matewu 11:5) Kambe namunhla ke? A Bibele dzri li: ‘A nyika ntamu lweyi a kazraliki.’ Dzri tlhela dzri ku: ‘Kambe lava laviselaka ku Yehovha va kuma ntamu lowumpswha.’ (Ezaya 40:29, 31) Handle ka leswo ‘Xikwembu Nkulukumba a nga hi nyika ntamu wa ku tlula lowu tolovelekiki’ akuva hi kota ku langusana ni swikazratu swa wutomi. (2 Ba-le-Korinte 4:7) Xana a wu swi naveli ku va munghanu wa Xikwembu Nkulukumba lweyi hi lizrandzru a tizrisaka ntamu wake akuva a hi pfuna?

XIKWEMBU NKULUKUMBA A NI WUTLHAZRI

‘Yehovha, a mintizro yaku a hi ku tala ka yone! U yi yentxe hinkwayu hi vutlhazri.’​—AMAPSALMA 104:24.

Loko hi ya hi dondzra hi mintxhumu leyi Xikwembu Nkulukumba a yi tumbuluxiki, hi ya hi hlamalisiwa hi wutlhazri byake. Nakunene, ku ni xiyenge xa dondzro lexi vitaniwaka biomimética. Tintlhazri ti kambisisa mintxhumu leyi Yehovha a yi vumbiki, ti va ti yetisela ndlela leyi mintxhumu leyo yi vumbiwiki ha yone akuva ti khanda mitxhumu. Leswi swi sukela ka mintxhumu yitsrongo ya ku fana ni butawu ku ya ka mintxhumu ya ku fana ni swihahampfhuka.

Xin’we xa swikombiso leswi hlamalisaka ngopfu i mizri wa mhunu. Yanakanya kutsrongo hi ndlela leyi n’wana a vumbiwaka ha yone. Swi sungula loko tandzra dzra xisati dzri tlhanganisiwa ni mbewu ya xinuna, ku va ku hambeka maselula lama nga ni swileleto hinkwaswu swa ku tekelela vapswele. Maselula wolawo ma humesa maselula manyingi ya ku fana. Hi nkama wa kone, maselula ma sungula ku vumbeka hi tindlela ta ku hambanahambana, man’we ma hamba maselula ya ngati, man’wana ma hamba maselula ya minsiha ni ya mazrambu. Hi ku landzrela, swizro swi sungula ku vumbeka kutani swi sungula ku tizra. Hi 9 wa tiwheti ntsena selula ledzriya dzra ku sungula dzri ndzruluka xin’wanana lexi xi nga ni maselula ya ntsrandzravahlayi. Ndlela leyi mhunu a vumbekaka ha yone, yi yentxe leswaku vhanu vanyingi va pfumelelana ni leswi mutsrali wa Bibele a swi hlayiki. A te: ‘Ndzra ku twalisa hi nkonta ya ku vumbiwa kwanga, hi leswi swi hlamalisaka ngopfu.’—Amapsalma 139:14.

Hi pfunekisa kuyini hi wutlhazri bya Xikwembu Nkulukumba? Mutumbuluxi a wa swi tiva leswi hi swi vilelaka akuva hi nyonxa. A tizrisa wutlhazri byake lebyikulu ni ku yingelisisa akuva a hi nyika swilayu hi zritu dzrake ku nga Bibele. Hi xikombiso, Bibele dzri hi tsratsriya leswi: ‘N’wi byatsrhana ni ku dzrivalelana milandzru.’ (Ba-le-Kolosa 3:13) Xana swilayu leswi swa pfuna? Ina hakunene! Swidondzri swi kume leswaku loko hi dzrivalela hi kota ku kuma wuzrongo bya ku nandzrika ni ku pumba mavabyi ya mbilu. Nakone byi nga pumba gome ni mavabyi man’wana. Xikwembu Nkulukumba a fana ni munghanu wa ku tlhazriha, lweyi a nga ni lizrandzru, lweyi minkama hinkwayu a hi nyikaka swilayu leswi pfunaka. (2 Timoteo 3:16, 17) Xana a wu swi naveli ku va ni munghanu wa ku tsrhamisisa xileswo?

XIKWEMBU NKULUKUMBA A NI WULULAMI

‘Yehovha a zrandzra vululami.’​—AMAPSALMA 37:28.

Xikwembu Nkulukumba minkama hinkwayu a yentxa leswi lulamiki. Bibele dzri li: ‘A swi ve kule ni Xikwembu Nkulukumba ku yentxa swa ku biha; ni kule ni Lwe wa ntamu hinkwawu ku yentxa vusomboloki.’ (Yob 34:10) Ndlela leyi Yehovha a yavanyisaka hi yone yi lulamile. Xileswo, mupsalma Davhida a te: ‘U ta tsrema timhaka ta matiko hi ku lulama.’ (Amapsalma 67:4) Vhanu a va nge swi koti ku kanganyisa Yehovha, hikusa ‘a lavisa mbilu’. (1 Samuel 16:7) Yehovha awa swi tiva loko mhunu a khanela ntiyiso kumbe a khanela madzrimi, nakone minkama hinkwayu a yavanyisa hi ndlela ya ku lulama. Handle ka leswo, Yehovha a wa byi vona wusomboloki ni wubihi lebyi nga kone a misaveni. Nakone a dumbisa leswaku ku nga li khale lava ku biha ‘va ta susiwa misaveni’.​—Amaproverbia 2:22.

Nambitanu, Xikwembu Nkulukumba a hi muyavanyisi wa tihanyi nakone a nga tsrhami na a lulamele ku hi khatisa. A hi komba timpswalu loko swi fanela. Bibele dzri li: ‘Yehovha a ni timpswalu, a ni vumbilu’ nambi ku li ka vhanu lava yentxaka swaku biha loko va tisola. Xana leswo a hi swone swi nga wululami?​—Amapsalma 103:8; 2 Petros 3:9.

Xana hi pfunekisa kuyini hi wululami bya Xikwembu Nkulukumba? Xikwembu Nkulukumba a nga lavisi wuso. Xileswo, hi nga pfuneka ngopfu hi wululami lebyi a nga nabyu. Mupostola Petro a te: ‘Xikwembu Nkulukumba a nga langusi vuso. Kambe a tikweni dzrin’wana ni dzrin’wana lwa mu txhavaka ni ku tizra swa ku lulama, i wa yamukeleka ku yene.’ (Amintiṛo 10:34, 35) Leswo swi hlaya leswaku a nga yi hi nhlonge yezru, tiko ledzri hi kuleliki ka dzrone, ndlela leyi hi dondzriki ha yone kumbe xikhundla xezru. Hinkwezru ha yamukeleka ka yene.

Xikwembu Nkulukumba a djula leswaku hi twisisa hi tlhela hi pfuneka hi wululami byake, xileswo a hi nyike lipfalu. Matsralwa ma tlhamuxela lipfalu swanga nawu ‘lowu tsraliwiki timbilwini tezru’, lowu nga ‘mboni’ ya leswaku mahanyela yezru i manene kumbe ma bihile. (Ba-le-Roma 2:15) Xana leswo swi hi pfuna ha yini? Loko lipfalu dzrezru dzri dondzrisiwile, dzri nga hi susumetela ku fulazrela swiyentxo leswi bihiki. Nakone loko hi yentxa xihoxo xa kukazri, dzri nga hi susumetela kuva hi tisola hi va hi lulamisa mahanyela yezru. Kunene, ku twisisa wululami bya Xikwembu Nkulukumba swa hi pfuna swi tlhela swi hi tsrhindzretela kusuhi na yene!

XIKWEMBU NKULUKUMBA I LIZRANDZRU

‘Xikwembu Nkulukumba i lizrandzru.’​—1 YOHAN 4:8.

Xikwembu Nkulukumba a kombisa ntamu, wutlhazri ni wululami. Kambe Bibele a dzri hlayi leswaku Xikwembu Nkulukumba i ntamu, wutlhazri kumbe wululami. Dzri hlaya leswaku i lizrandzru. Ha yini? Hikusa ku nga hlayiwa hi ku hetiseka leswaku ntamu wa Xikwembu Nkulukumba wu mu pfumelela ku yentxa mintxhumu nakone wululami ni wutlhazri byake byi kongomisa ndlela leyi a yentxaka mintxhumu ha yone. Kambe lizrandzru dzra Yehovha dzri mu susumetela ku yentxa mintxhumu. Lizrandzru dzri khumba mintxhumu hinkwayu leyi a yi yentxaka.

Hi xikombiso, nambi leswi Yehovha a kalaka a nga pfumali ntxhumu, lizrandzru dzrake dzri mu susumetelele ku hamba swivumbiwa leswi tlhazrihiki a tilweni ni le misaveni. Swivumbiwa leswi swi nga pfuneka hi ku vona lizrandzru ni ku zron’weka ka Muvumbi wa swone. A lulamisele misava hi lizrandzru ledzrikulu akuva dzri va kaya ledzrinene dzra vhanu nakone a ha ya mahlweni a kombisa lizrandzru ledzro ka vhanu hinkwavu hi leswi “a humesaka dambu dzrake akuva dzri vaningela lava yentxaka swa ku biha ni lava yentxaka leswinene, a tlhela a nisela mpfula lava ku lulama ni lava kalaka va nga lulamanga.”​—Matewu 5:45.

Handle ka leswo, Yehovha ‘a tele timpswalu, a ni lilondzro’. (Yakob 5:11) Awa va zrandzra lava tikazrataka hi mbilu hinkwayu akuva va mu tiva va tlhela va tsrhindzrekela ka yene. Xikwembu Nkulukumba a zron’weka hi mun’wana ni mun’wana wa vhanu lava. Nakunene, ‘a zron’wa ha wene’​—1 Petros 5:7.”

Xana hi pfunekisa kuyini hi lizrandzru dzra Xikwembu Nkulukumba? Yanakanya ndlela leyi swi nyonxisaka ha yone ku vona dambu loko dzri pela ni ndlela leyi swi nyonxisaka ha yone ku yingela mahleko ya n’wana. Nakone hi mani lweyi a kalaka a nga nyonxi loko a vona lizrandzru dzra swizro swa ndangu wake? I ntiyiso leswaku a hi ta hanya nambi loko hi nga li nayu mintxhumu leyo. Kambe a wu pfumeli leswaku swikombiso leswo swa lizrandzru dzra Xikwembu Nkulukumba swi yentxa wutomi byi va lebyi nyonxisaka? Kambe ku ni xikombiso xin’wana xa lizrandzru dzra Xikwembu Nkulukumba, ku nga xikhongoto. Bibele dzri li: ‘N’wi nga hlatiyeleleni ntxhumu, kambe a timhakeni hinkwatu a ku kombela kwenu a ku tibyiwe hi Xikwembu Nkulukumba, hi ku khongota, ni ku kombela ni ku tlangela.’ Ku fana ni papayi lweyi a nga ni lizrandzru, a djula hi kombela mpfunu loko hi langusana ni swikazratu, nambi leswi hi ngeke na ku swi byela mhunu. Leswi Yehovha a hi zrandzraka, a hi dumbisa ku hi nyika ku zrula ‘loku tlulaka ku yanakanya hinkwaku’.​—Ba-le-Filipi 4:6, 7.

Hi zrindzrela leswaku ntlhamuxelo lowu wa ku goma mayelanu ni wumhunu bya Xikwembu Nkulukumba, ku nga lweyi a nga ni ntamu lowukulu, wutlhazri, wululami, ni lizrandzru, wu ta va wu ku pfunile ku vona leswi Xikwembu Nkulukumba a tsrhamisisiki xiswone. Ntxhumu wun’wana lowu taka ku pfuna akuva u tiva ku yampswa Xikwembu Nkulukumba i ku tiva leswi a ku yentxeliki swone ni leswi a ha taka ku yentxela swone.