Mintlhamuxelo Ya Xibukwana Xa Wutomi Ni Wutizreli Byezru

6-12 KA MAYU

WUKOSI BYI NGA BIBELENI | 2 BA-LE-KORINTE 4-6

‘A Hi Heli Timbilu’

w04 15/08 p. 25 §§ 16-17

Ha Kazrala Kambe A Hi Heli Timbilu

Handle ka ku ganagana ku bekisa wumoya byezru i swa lisima. Loko hi ni wunghanu bya le kusuhi na Yehovha Xikwembu Nkulukumba hi nga ha kazrala a mizrini kambe a hi nge tsrhiki a ku mu gandzrela. Yehovha ‘a nyika ntamu ku lwa kazraliki, a yengeta ntamu ku lwa tsraniki’. (Ezaya 40:28, 29) Mupostola Pawulo ha byakwe a vone ntiyiso wa mazritu lawo, a tsrale a ku: ‘Hi leswo ke, a hi heli timbilu; kambe nambi a vhunu kumbe wumhunu byezru bya le handle byi fa, a vhunu kumbe wumhunu byezru bya le ndzreni byi bandzruliwa kumbe byi pfuxiwa hi siku dzrin’wana ni dzrin’wana.’—2 Ba-le-Korinte 4:16.

Xiya xiga lexi liki ‘siku dzrin’wana ni dzrin’wana’. Xi komba leswaku hi fanela ku pfuneka siku ni siku ka malulamiselo ya Yehovha. Muzrumiwa mun’wana lwa tizriki 43 wa malembe hi ku dumbeka a kumane ni ku kazrala ka le nyameni ni ku hela ntamu. Kambe a nga helanga mbilu. A te: ‘Ni titolovete ku hatla ni pfuka, nakone na ni nge si na yentxa ntxhumu, ni zranga hi ku khongota ka Yehovha ni ku dondzra Zritu dzrakwe. Xitoloveto lexo xa siku ni siku xi ni pfune ku tiyisela ku ta tlhasa namunhla.’ Hi nga tiyiseka hakunene ka ntamu wa Yehovha lowu wu hi wundlaka loko nkama hinkwawu, ina ‘siku dzrin’wana ni dzrin’wana’, hi khongota kwakwe ni ku yanakanyisisa hi matsrhamela yakwe ya ku hlamalisa ni swidumbiso swakwe.

it-3 p. 256 § 1

Ku Tiyisela

I swa lisima kuva hi nga txhuki hi luza dumbo dzrezru dzra wukriste, ku nga wutomi lebyi nga helikiki na hi nge na xidoho. Nambi vakaneti vezru lava djulaka ku hi dlaya a va nge helisi dumbo ledzri. (Ro 5:4, 5; 1Te 1:3; Mpf 2:10) Ku xaniseka loku hi nga na kone swoswi ku ta va ku nga li ka ntxhumu loko hi ku pimanisa ni ku hetiseka ka xidumbiso lexikulu. (Ro 8:18-25) Na hi ni ku lavisela loku nga helikiki, ku xaniseka kun’wana ni kun’wana, nambi ku voneka ku li kukulu, ka ‘vevuka’ mfuzri i ka ‘nkamanyana’. (2Ko 4:16-18) Ku dzrimuka leswaku mindzringo i ya nkamanyana kutani hi khomelela ka dumbo dzra wukriste swi ta hi pfuna kuva hi nga heli ntamu kumbe hi nga dumbeki ka Yehovha Xikwembu Nkulukumba.

Djulisisa Tindzralama Ta Moya

w12 01/02 p. 28

“Tsrhavisa Yehovha”

David Splane, wa Huvo leyi Zrangelaka, a khanele hi mhaka leyi yi seketeliwiki a Matsralweni. (2 Ba-le-Korinte 4:7) Hi byini wukosi? Xana i wutivi kumbe wutlhazri? ‘Im-him’, ku hlamule xikaneli. “Wukosi lebyi mupostola Pawulo a khaneliki ha byone i ‘wutizreli lebyi’ bya ‘ku humexa xihlayelamfuzri a livaleni.’” (2 Ba-le-Korinte 4:1, 2, 5) Makwezru Splane a dzrimuxe swidondzri leswaku a ntlhanu wa tihweti leti swi ti hetiki na swi dondzra ti swi lulamisele xiyavelo xa ku hlawuleka a nsin’wini. Swi fanela ku xi tlangela ngopfu xiyavelo lexo.

Xikaneli xi tlhamuxele leswaku ‘swibya swa vumba’ ku hlayiwa mizri yezru ya nyama. Xi hambanise xibya xa vumba ni xa gole. A swibya swa gole a swi tizrisiwi ngopfu. A swibya swa vumba, swone, swi hambeliwe ku tizrisiwa siku ni siku. Loko a ho beka wukosi ka xibya xa gole, a hi ta yisa miyanakanyu yezru ngopfu ka xibya ni le ka wukosi lebyi nga ku xone. Makwezru Splaine a te “n’wine swidondzri mi nga bekeni miyanakanyu yenu ku n’wine vinyi.” Swanga vazrumiwa, mi fanela ku kongomisa vhanu ka Yehovha. Mi swibya swa vumba leswi titsrongahataka.

w09 15/11 p. 21 § 7

Yana Mahlweni U Kula A Lizrandzrwini Dzra Wumakwezru

Ku hlayiwa yini ha hine? Xana hi nga ‘tiyanamisa’ a ku kombiseni ka lizrandzru dzra wumakwezru hi ndlela yini? I swa ntumbuluku kuva vhanu va tintanga tin’we, va lixaka dzrin’we va twanana hi xivone. Nakone lava zrandzraka swihungatiso leswi fanaka hakanyingi va heta nkama wa ku tala kun’we. Kambe loko a li leswaku leswi hi kumanaka ku swone ni vakriste swi hi hambanisa ni lavan’wana, hi fanela ku ‘tiyanamisa’. Ku nga va wutlhazri ku tivutisa leswi: Xana ni zrandzra ku ya nsin’wini kumbe ku va ka swinkhubyana ni vamakwezru lava ni tolovelaniki na vone ntsena? A Ndlwini ya Mfumu ke, xana a ni titlhanganisi ngopfu ni lava ha ku sungulaka ku hlengemela hi ku yanakanya leswaku va ha li tinyiwana a va si faneleka ku va vanghanu vanga? Xana ni titlhanganisa ni tintanga hinkwatu a bandleni?

13-19 KA MAYU

WUKOSI BYI NGA BIBELENI | 2 BA-LE-KORINTE 7-10

“Ntizru Wezru Wa Ku Pfuna Lava Weliwiki Hi Timhangu”

w98 01/11 p. 25 § 1

‘Xikwembu Nkulukumba A Zrandzra Lwa Hananaka Na A Tsrhavile’

Ku sungula Pawulo a vulavule ni va le Korinte mayelanu ni va le Makedoniya, lava ntizro wavu wa ku pfuna afaka wu li xikombiso lexinene. ‘A ndzringwini lowukulu wa ku xaniseka’, Pawulo a tsrale leswi: ‘A ku tsrhava kwavu ku yengetelekile; a wusiwanini byavu lebyikulu va yandzrise wupfundzri bya ku hanana kwavu.’ Va le Makedoniya a swi nga djuli va sindzrisiwa mhakeni leyi. Ku hambana ni leswo, Pawulo a te: ‘Va hi kombela hi ku hi khongota ngopfu, leswaku hi yamukela leswi va nga humexa swone.’ Ku nyonxela ku nyikela ka va le Makedoniya ku xiyeka ngopfu loko hi dzrimuka leswaku na vone afa va li ‘wusiwanini lebyikulu’.—2 Ba-le-Korinte 8:2-4.

kr p. 209 § 1

Ntizro Werzu Wa Ku Pfuna Lava Weliwiki Hi Timhangu

A ve kolomu ka 46 A Nguveni Yezru, a tikweni dzra Yudeya ku viki ni ndlala ya yikulu swinene. Vadondzrisiwa va Kriste lava tsrhamaka kolanu a va nge na mali ya ku hakelela swakuda leswi dulaka swi tlhela swi kala. Ndlala a yi mpfempfa, lakakuva wutomi byavu byi va ndzringweni. Kambe, a va li kusuhi ni ku twa voko dzra Yehovha dzra ku mpfekela hi ndlela leyi va nga samikiki va yi twa. Afa ku djula ku yentxeka yini?

kr pp. 209-210 §§ 4-6

Ntizro Wezru Wa Ku Pfuna Lava Weliwiki Hi Timhangu

Ka papela dzrakwe dzra wubidzri ledzri yaka ka va le Korinte, Pawulo a tlhamuxele leswaku ntizro wa vakriste wu ni swiyenge swibidzri. Nambi leswi papela ledzri afaka dzri kongomisiwa ka vakriste lava totiwiki, namunhla mazritu yakwe ma tizra ni le ka ‘tihamba tin’wana’ ta Kriste. (Yohan 10:16) Xin’we xa swiyenge swa ntizro wezru i: ‘wutizreli bya ku tlhanganisa’ kumbexana ntizro wa ku zrezra ni wa ku dondzrisa. (2Ko 5:18-20; 1Tm 2:3-6) Xiyenge xin’wana xi patsra wutizreli lebyi hi byi yentxaka bya ku pfuna vakriste-kulozri. Hi lani Pawulo a hlayiki ha kone ‘ntizro wa ku pfuna lava weliwiki hi timhangu’. (2Ko 8:4) Swanga hi la swiga leswi liki ‘wutizreli bya ku tlhanganisa’ ni ‘wutizreli bya ku pfuna lava weliwiki hi timhangu’, ka swiyimu ha swibidzri zritu ledzri liki ‘wutizreli’ dzri ndzruluteliwe ka zritu dzra Xigrika ledzri liki di·a·ko·niʹa. Ha yini leswo swi li swa lisima?

Hi ku tizrisa zritu dzrin’we dzra Xigrika ka swiyimu ha swibidzri, Pawulo afa a twananisa ntizro lowu wa ku pfuna ni mintizro mimbeni leyi afaka yi yentxiwa hi bandla dzra wukriste. A sungule hi ku hlaya leswi: ‘A matizrela wone, ma yavanile; kambe Hosi i yin’we ntsena. Ni mintizro mi yavanile, . . . kambe leswo hinkwaswu swi tizriwa hi wolowo moya wun’we.’ (1Ko 12:4-6, 11) Hakunene, Pawulo a fanise wutizreli byinyingi lebyi yentxiwaka bandleni ni ‘mhamba ya ku xwenga’. (Ro 12:1, 6-8) A swi hlamalisi leswi a swi voniki na swi fanela ku heta nkama wakwe na a ‘tizrela tinsasi’!—Ro 15:25, 26.

Pawulo a pfune va le Korinte akuva va vona leswaku ha yini a ntizro wa ku pfuna vambeni ku li xiyenge xa wutizreli byavu ni xa ku gandzrela Yehovha. Vakriste va pfune vambeni hi leswi a va ‘yingiseta . . . evhangeli dzra Kriste’. (2Ko 9:13) Hi ndlela yoleyo, hi ku djula ku tizrisa tindondzro ta Kriste, vakriste va pfuna vambeni. Swanga hi lani Pawulo a hlayiki ha kone, swiyentxo swavu swa wunene a swi fana ni ‘timpswalu letikulu ta Xikwembu Nkulukumba’. (2Ko 9:14; 1Pe 4:10) Loko dzri khanela hi ku tizrela vamakwezru lava nga ni swivileleko, leswi patsraka ntizro wa ku pfuna lava weliwiki hi timhangu, Sentinela dzra 1° de março wa 1976 dzri hlaye dzri tiyisile loko dzri ku: “A hi fanelanga hi ganagana ka leswaku Yehovha Xikwembu Nkulukumba ni N’wanakwe Yesu Kriste va wu nyika lisima ledzrikulu ntizro wa muxaka lowu.” Ina, ntizro wa ku pfuna lava weliwiki hi timhangu i ndlela ya lisima ngopfu swinene ya ku nyikela mhamba ya ku xwenga.—Ro 12:1, 7; 2Ko 8:7; Hb 13:16.

kr p. 196 § 10

Ndlela Leyi Ntizro Wa Mfumu Wu Seketelisiwaka Xiswone Hi Tlhelo Dzra Timali

Xa ku sungula, hi hamba swihanano swa ku tizrandzrela hi leswi hi zrandzraka Yehovha ni ku djula ku ‘bekisa swileleto swakwe’. (1 Yohan 3:22) Nakunene, Yehovha a nyonxisiwa hi lweyi a hananaka swi huma mbilwini. A hi kambisisi mazritu ya mupostola Pawulo mayelanu ni swihanano swa wukriste. (Dondzra 2 Ba-le-Korinte 9:7.) Mukriste wa xihlayelamfuzri a nga ganagani kumbe ku sindzrisiwa ku hanana. A matsrhanwini ya leswo, a hanana hi ku ya hi leswi ‘a pimisisiki xiswone a mbilwini yakwe’. Leswi liki, a zranga hi ku kambisisa xivileleko ntsrhaku a tibekisela ku pfunisa. Mhunu yelweyo i muhanani wa ku zrandzreka ka Yehovha, hikusa ‘Xikwembu Nkulukumba a zrandzra lwa hananaka na a tsrhavile’. Wundzruluteli byin’wana byi li: “Xikwembu Nkulukumba a zrandzra vhanu lava va zrandzraka ku hanana.”

Djulisisa Tindzralama Ta Moya

w16.01 p. 12 § 2

Pfumelela Nyiko Ya Xikwembu Nkulukumba ‘Leyi Ngeke Na Ku Hlayiwa’ Yi Ku Susumetela

Pawulo afa a swi tiva leswaku a swidumbiso hinkwaswu swa ku hlamalisa swa Xikwembu Nkulukumba afa swi ta hetiseka hi kola ka tizrulo ledzri hetisekiki dzra Kriste. (Dondzra 2 Ba-le-Korinte 1:20.) Kutani, nyiko yoleyo ‘leyi ngeke na ku hlayiwa’ afa yi ta patsra wunene hinkwabyu ni lizrandzru dzra ku dumbeka ledzri Yehovha afaka a ta hi kombisa dzrone ha Yesu. Nakunene, nyiko yoleyo yi tlakuke swinene lakakuva hi vonela dzra ximhunu a swi koteki ku yi tlhamuxela. Xana nyiko yoleyo ya ku hlawuleka hi yi yamukeliki yi fanela ku hi khumbisa kuyini? Nakone xana hi swini swiyentxo leswi nyiko yoleyo yi nga hi susumetelaka ku swi yentxa, loko hi li kazri hi tilulamisela ku hlalela Xidzrimuxo Xa Lifu Dzra Kriste hi Wawumune wa 23 ka Marsu wa 2016?

g99 08/07 pp. 20-21

Xana Swi Bihile Ku Tikulisa?

Ka Matsralwa ya wukriste ya Xigrika, a zritu ledzri liki kau·khaʹo·mai ledzri ndzruluteliwiki dzri va ‘ku tikulisa, ku tikukumuxa ni ku titwalisa’ dzri tizrisiwe hi tindlela tibidzri, ya yinene ni leyi ngeke yinene. Hi xikombiso Pawulo a hlaye leswaku hi nga ‘titwalisa a ku laviseleni ka ku phatima ka Xikwembu Nkulukumba’. A tlhele a hi tsratsriya leswi: ‘Kambe lwe a titwalisaka a titwalisele Hosini.’ (Ba-le-Roma 5:2; 2 Ba-le-Korinte 10:17) Leswi swi tlhamuxela kuva hi tikulisa hi Yehovha swanga Xikwembu xezru, a nga matitwela lama taka yentxa hi mu twalisa hi kola ka vito dzrakwe ledzrinene ni wumhunu byakwe lebyinene.

20-26 KA MAYU

WUKOSI BYI NGA BIBELENI | 2 BA-LE-KORINTE 11-13

‘‘Mutwa A Nyameni’ Ya Pawulo’

w08 15/06 pp. 3-4

Ku Va Ni Ntamu A Gomeni

Nandzra mun’wana wa ku dumbeka a kombele Yehovha leswaku a mu susela a ‘mutwa a nyameni’ lowu afaka wu li xikazratu. Mupostola Pawulo a kombele Xikwembu Nkulukumba makhambi mazrazru kuva a mu susela ndzringo lowu. Ndzringo wun’wana ni wun’wana lowu nga ha fanisiwaka ni mutwa lowu hambelanaka pozre a wu ta va wu suse ku nyonxa ka Pawulo a ntizrweni wa Yehovha. Pawulo a wu fanise ni ku va a biwa nkama ni nkama. Nhlamulo ya Yehovha yi ve leyi: ‘Ti ku dzringanile a timpswalu tanga, hikusa a ntamu wanga wu hetiseka gomeni.’ Yehovha a nga mu suselanga mutwa a nyameni. Afa a fanela ku lavisana na wone, kambe a te: ‘Ndzra ku ndzri va ni gome, ka ku va kone ndzri nga ni ntamu.’ (2Ko 12:7-10) Xana afa a djula ku tlhamuxela yini?

w06 15/12 p. 24 §§ 17-18

Yehovha A Nyika ‘Moya Lowa Ku Xwenga Ku Lava Kombelaka Ku Yene’

Loko a yangula swikhongoto swa Pawulo, Xikwembu Nkulukumba a mu byele leswi: ‘Ti ku dzringanile a timpswalu tanga, hikusa a ntamu wanga wu hetiseka gomeni.’ Pawulo yene a te: ‘Hi leswo ke, ndzri ta zrandzra ku titwalisa a gomeni dzranga, akuva ntamu wa Kriste wu tsrhama ku mine.’ (2 Ba-le-Korinte 12:9; Amapsalma 147:5) Hi ku famba ka nkama, Pawulo a swi vonile leswo hi kola ka Kriste, ntamu lowukulu wa nsizrelelo wa Yehovha wu ve ku yene. Namunhla, Yehovha a yangula swikhongoto swezru hi ndlela leyi fanaka. A nyika ntamu malandzra yakwe.

I ntiyiso leswaku a tende a dzri yimisi mpfula kumbe moya kambe dzri nga hi sizrelela ka mintxhumu leyi. Hi lani ku fanaka a nsizrelelo lowu nyikeliwaka hi kola ka ‘ntamu wa Kriste’ a wu nge helisi kumbe ku pfalela mindzringo leyi nga hi welaka. Kambe, wu ta hi nyika nsizrelelo wa moya ka minhlaselo ya misava leyi ni mufumi wa yone Sathana. (Apfuletelo 7:9) Xileswo, nambi loko u tlhangavetana ni swikazratu leswi swi nga ‘sukiki ku wene’, tiyiseka leswaku Yehovha awa xi vona xiyimu lexi u nga ka xone nakone a ku yangulile ‘ku bandlukana kwaku’. (Ezaya 30:19; 2 Ba-le-Korinte 1:3, 4) Pawulo a tsrale leswi: ‘Xikwembu Nkulukumba a dumbeka, lwa nga tiki pfumela leswaku n’wi dzringiwa ku tlula leswi n’wi swi kotaka; kambe a ta n’wi yentxela, kun’we ni ndzringo, a ndlela ya ku huma ku wone, n’wi ta kota ku wu byatsrha.’—1 Ba-le-Korinte 10:13; Ba-le-Filipi 4:6, 7.

w18.01 pp. 8-9

‘A Nyika Ntamu Ku Lwa Kazraliki’

Dondzra Ezaya 40:30. Nambi loko hi faneleka ka leswi hi swi yentxaka, ku ni leswi hi nga kotikiki ku swi yentxa hi ntamu wezru. Leyi i ndondzro leyi hinkwezru hi fanelaka ku yi dondzra. Pawulo afa a li wanuna wa wuswikoti kambe afa ku ni mintxhumu leyi afaka a djula ku yi yentxa kambe afa a hluleka. Loko a khongote ha swone ka Xikwembu Nkulukumba a te: ‘Ntamu wanga wu hetiseka gomeni.’ Pawulo afa a yi xiyile yinhla. A game hi ku hlaya leswi: ‘Ndzra ku ndzri va ni gome, ka ku va kone ndzri nga ni ntamu.’ (2Ko 12:7-10) Xana afa a djula ku hlaya yini?

Pawulo a twisise leswaku ku ni xihlovo xin’we ntsena xa ntamu lowu afaka a wu djula. Moya wa Xikwembu Nkulukumba a wu ta nyika Pawulo ntamu lowu afaka a wu djula. Ku nga li leswo ntsena, kambe moya wa ku xwenga wa Nkulukumba a wu ta pfuna Pawulo ku yentxa leswi a nga samangakiki a swi yentxa. Swi tasu ni kwezru, loko ntamu wezru wu pfa ka Yehovha, a xi kone xi taka hi hlula.

Djulisisa Tindzralama Ta Moya

w18.12 p. 8 §§ 9-11

Swivutiso Swa Vadondzri

‘Tilo dzra wuzrazru’ ledzri kombisiwiki ka 2 Ba-le-Korinte 12:2 swi nga yentxeka a li Mfumu wa Mesiya lowu nga mavokweni ya Yesu Kriste kun’we ni lava 144.000, ku nga ‘matilo lamampswha’.—2Pe 3:13.

I ‘tilo dzra wuzrazru’ hikusa a Mfumu wu tlakukile, wu tlhela wu va henhla ka tindlela hinkwatu ta mafumela.

A ‘paradeyisini’ lani Pawulo a ‘tekiwiki a yisiwa’ kone a xivonisweni swi nga yentxeka a ku hlayiwa 1) Paradeyisi dzra ntshima ledzri taka buyisiwa a misaveni, 2) paradeyisi dzra moya dzri taka va kone, ledzri taka va dzrikulu ku tlula paradeyisi dzra moya ledzri nga kone swoswi ni 3) ‘paradeyisi dzra Xikwembu Nkulukumba’ a matilweni ledzri taka va kun’we ni misava leyimpswha.

it-1 p. 325 § 9

Ku N’quta

‘Ku N’quta Lo Ka Ku Xwenga.’ A makazri ka vakriste va ku sungula afa ku ni ‘ku n’quta lo ka ku xwenga’ (Ro 16:16; 1Ko 16:20; 2Ko 13:12; 1Te 5:26) kumbe ‘ku n’qutana ka lizrandzru’ (1Pe 5:14), loku swi nga ha yentxekaka a ku tizrisiwa hi vhanu va zrambu ledzri fanaka. Malosela lawa ya vakriste va ku sungula swi nga yentxeka afa ma fambisana ni xihena xa malosela ya va-Heberu va khale lava afaka va losana hi ku n’qutana. Nambi leswi matsralwa ma nga nyikeliki wutsrhokotsrhoko, swi ti komba ingiki ‘ku n’quta lo ka ku xwenga’ kumbe ‘ku n’quta ka lizrandzru’ a ku kombisa lizrandzru dzra ntiyiso ni wumun’we lebyi afaka byi li kone a bandleni dzra wukriste.—Yh 13:34, 35.

27 KA MAYU–2 KA JUNYU

WUKOSI BYI NGA BIBELENI | BA-LE-GALATIA 1-3

‘Ndzri Mu Yalele Hi Lavisani Hi Mombo’

w17.04 p. 27 § 16

Xana U Ni Vonela Dzra Yehovha Mayelanu Ni Wululami?

Dondzra Ba-le-Galatia 2:11-14. Petro a wele ka ndzringo wa ku txhava mhunu. (Pr 29:25) Nambi leswi a zrangiki a dzri tiva vonela dzra Yehovha ka mhaka leyi, Petro afa a txhava mavonela ya swizro swa bandla dzra va-Yuda le Yerusalema a mhakeni ya ku soka. Mupostola Pawulo lweyi afaka a li kone ka ntlhanganu lowo a Yerusalema hi 49 Nguveni Yezru a lavisane na Petro a Antiyoka ni ku paluxa wukanganyisi byakwe. (Min 15:12; Ga 2:13) Xana vakriste vamatiko va khumbisiwe kuyini hi xizathu xa Petro? Xana va pfumelele kuva swi va khunguvanyisa? Xana Petro a luzekeliwe hi timfanelo hi mhaka ya xizathu xakwe?

w13 15/03 p. 5 § 12

Ka Lava Zrandzraka Yehovha ‘A Ku Na Xikhunguvanyiso’

Petro a kombise ku txhava mhunu, afa a khunguvanyeka minkama yin’wana; nambitasu, a tsrhame a dumbekile ka Yesu na Yehovha. Hi xikombiso a yale Hosi yakwe, ku nge kan’we, kambe makhambi mazrazru. (Luka 22:54-62) Hi ku famba ka nkama, a phazame ka ndlela ya kukazri ya wukriste, hi ku khoma vapfumeli Vamatiko swanga hi loko va nga li vanene ku fana ni vakriste va va-Yuda lava sokiki. Mupostola Pawulo a beke mhaka leyo a livaleni—a kombisa leswaku a ku na mbangu wa xihlawuhlawu a bandleni. Matikhomela ya Petro a ma hoxekile. Na ma nge si na khumba wumun’we bya wumakwezru Pawulo a mu khwavele mombo hi mombo. (Ga 2:11-14) Xana ku tikulisa ka Petro ku mu yentxe a huma ka mpswhampswha wa wutomi lebyi nga helikiki? Im-him. A yamukele xikhwavelo xa Pawulo swi huma mbilwini, a xi tizrisa a va a ya mahlweni ni mpswhampswha.

Djulisisa Tindzralama Ta Moya

w14 15/09 p. 16 §§ 20-21

Tizrela Yehovha Hi Ku Dumbeka Nambi U Lavisana Ni ‘Mahlomulo Ya Ku Tala’

Hi nga kuyini hi minhlaselo ya wusukumbele? Hi xikombiso, hi nga yentxa yini akuva hi lwisana ni ku titwa hi hele ntamu? Yin’we ya tindlela ta ku lwisana ni matitwela lawo i ku yanakanya hi tizrulo. Ku nga leswi mupostola Pawulo a swi yentxiki. Afa a swi tiva leswi afaka a titwisa xiswone ku nga ku titwa na a nga pfuni ntxhumu. Kambe afa a swi tiva leswaku Kriste a nga felanga lava ku hetiseka, kambe a fele vadohi. Nakone Pawulo afa a li mun’we wa vadohi volavo. Xileswo, a tsrale leswi: ‘Ndzra ku hanya hi ku pfumela, loku nga ku N’wana wa Xikwembu Nkulukumba, lwa nga ndzri zrandzra a va a tinyiketa ha mine.’ (Ga 2:20) Ina, Pawulo a yamukele tizrulo. A pfumelile leswaku a tizrulo afa dzri tizra ka yene hi ku kongoma.

Ku va ni vonela ledzri fanaka—ku vona tizrulo swanga xihiwa lexi u nyikiwiki ha Yehova—swi nga ku pfuna ngopfu. Leswo a swi djuli ku hlaya leswaku gome ledzro dzri to vhela dzri nyamalala. Hi ndlela ya kukazri, van’we ka hine swi nga djula hi tama hi lwisana ni minhlaselo ya wusukumbele ku ya tlhasa misaveni leyimpswha. Kambe dzrimuka leswi: A ngiyana ya wutomi yi ta kumiwa hi lava taka va nga kazrali. Hi ya hi tsrhindzrekela swinene ka siku dzra ku phatima lani Mfumu wa Xikwembu Nkulukumba wu taka buyisa ku zrula wu tlhela wu yentxa vhanu hinkwavu lava ku dumbeka va hetiseka. Tibekisele ku nhingena ka Mfumu wolowo—nambi u kumana ni mahlomulo ya ku tala.

it-2 p. 171 § 3

Va-le-Galatiya, Papela ku

A ku hlamala ka Pawulo, ‘Hai! Va Galatiya, masinge kumbe swiphukuphuku ndzrun’wine’, a swi djuli ku hlaya swone leswaku afa a yehleketa hi ntlawa wa kukazri wa vhanu lava afaka va li va lixaka dzra va Galatiya va le n’walungu wa Galatiya. (Ga 3:1) Matsrhan’wini ya leswo, Pawulo afa a khwavela van’we a bandleni dzra kohahala lava afaka va pfumelela ku kutxeteliwa hi xizro xa muyuda, va-Yuda lava afa va dzringisa ku kombisa wululami byavu hi ku ya hi lulamiselo dzra nawu wa Moxe ku nga li ‘wululami byi pfaka ka lipfumelo’ ledzri nyikeliwiki hi ntwanano lowumpswha. (2:15–3:14; 4:9, 10) Hi tsrhamela dzravu, ‘makezreke kumbe mabandla ya le Galatiya’ (1:2) lawa Pawulo a ma tsraleliki afa ma ni va-Yuda ni lava va ngeke va-Yuda, lava wugamu afa va li va-Proselita ni vamatiko lava va nga sokangakiki, nakone a swi ganaganisi leswaku van’we afa va li ma-Selitika. Hinkwavu a va tekiwa swanga vakriste va le Galatiya hi leswaku a mbangu lowu afaka va tsrhama ku wone afa wu vitaniwa Galatiya. Mhaka hi leswaku Pawulo afa a zrumela mapapela ku lava afaka a tolovelane na vone va le nyingitimu wa xifundzra xa Roma, ku nga li ku lava afaka a nga va tivi va le n’walungu, lava swi nga yentxekaka a ngi ngi sama a va yendzrela.